【龔成問答信箱】（Q21801-Q21820）

Q21801：

龔 Sir, 岩岩上完你的投資班，多謝你悉心既教導，真係獲益良多！

我上完堂之後有d問題想再請求下你

1. 想問下「盈利」同「股東應佔溢利」分別在於咩？因為我記得你講過佢地是不同的，尤其想自己計 EPS等等數據既時候應該點揀？

2. 另外見到有同學問你增長率既時候，你用左年度化增長率 (上堂時都唔見你講過）而唔你用複式增長率 (CAGR)去計，想問下應該咩時候用邊個？

因為增長率不同，有代表性盈利可以差好遠

e.g. 388
年度化增長率:
5年增長 (9.11-4.76)/4.76 = 91.4%
年度化增長率: 91.4%/5 = 18%

CAGR:
(9.11/4.76)^(1/4) -1 = 17.6%

感謝龔 Sir!!!!

龔成老師︰

1) 財報上「盈利」，多數係包含「股東應佔溢利」和「非股東權益」。前者，就係股東真正可分到的盈利部份，也是你用來計算EPS用的。

後者，係一些非集團可佔有的盈利部份，這部份會在集團盈利中除去。

2) 其實2者係一樣，個計算方法如下。

(9.11 / 4.76) ，再開方(5-1)，只後將答案再減1，就係得出個增長率+17.6%。

你見之前18%，只係我將小數位進左位，其實背後答案係一樣+17.6%。

------------------------------------------------

Q21802：

龔sir你好，我想請教一下你。我買股票已有一年多，但資產不是升值很多，甚麼很多資金都放在股票裏拿不出來。因此想問下你我而家的投資組合是否有問題：

0005 @800股 (36.28)
883 @4000股 (8.11)
1211 @500股 (192)
2013 @2000股 (12.6)

3800 @1000股 (3.65)
6618 @100股 (110)
9633 @600股 (66)
9988 @100股 (287)

我覺得我買ge股票都好散，每隻都買小小咁，如果我而家加注，應該買邊隻？另外，我亦考慮買一D收息股或儲蓄保險，有穩定的資產增長。

麻煩龔sir有時間可以比Ｄ意見我！感謝！

龔成老師︰

投資股票，就等同買入一間企業，就算再優質的企業，要時間去升值。1年只係一個短期的時間，你唔好預期會有明顯的效果。

我地係投資增值時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時持股，大部部都係有質素和增長力。若你係年青至中年人士，這些股票係合適。

但收息股(包括匯控 - 0005)類，就不宜持有太多，因為佢主要係收下息，增長力較弱，會拖慢你財富增值效果。

"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

中海油(0883)質素中等，不宜持有太多。

其次，我發現你好集中係潛力股類(除了0005, 0883, 3800外)，佢地雖然有增長潛力，同時風險都較高，不宜持有過多。

就算你偏向年青，潛力股都只可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你先要加大翻平穏增長股部份，令組合更平衡。

而持股中，保利協鑫能源(3800)係較麻煩一隻。現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

------------------------------------------------

Q21803：

呀sir! 其實我好認同您 投資係長線 唔係短炒 所以我將來投資果喲優質股 我都會長擺係到 如非必要都唔放

不過 我想問下呀sir 您之前提過升一倍放一半 但如果我只入左一手 放一半會出現碎股問題 甘係唔係代表其實我要係低位入兩手或以上？我用緊富途牛牛做買賣 佢又好似唔比賣一半

另外呀sir 您堂上講到話一隻股票 好似港交所（388）佢既質素甘高 甘佢股價一定長期向上 甘如果我宜家唔入市 將來佢升到好高（假設$600）

甘我係唔係會錯過宜家既入市時機？

同埋呀sir ，我上星期又買左喲新股票，暫時有：
9988@$203 一手
2638@$7.83 一手
VOO @377.04 兩手

我黎緊會繼續定期定額投資VOO 同埋留意大市 入呀sir您上面推薦既優質股 如果長遠甘做 係唔係一個好既投資策略？

唔該呀sir 因為黎緊畢業要搵野做 要係搵野做前學識投資 問既野比較多 唔好意思 唔該您呀sir

龔成老師︰

其實優質股，只要佢一直質素都無明顯變差，我地長線去持有，永遠都係最有利。

而升一倍放一半，主要係比一些較保守投資者，等佢地可以先收回成本。或者一些初學者，佢地未能完全掌握何為貴，才會用這個策略去沽貨。

至於港交所(0388)這類優質股，長線預期係會一直上升。但我地唔可以因為咁，就不理價值平貴，直接入貨。因為若然買貴左，雖然最終都會升，但成個回報就已經差好遠。

因此，我地都要緊守平貴原則，去有計劃地入市。如果你好驚真係會錯失入貨機會，你可以用月供儲貨，咁就可以。但當股價去到異常貴，好似之前比亞迪(1211)成本2XX，就會連月供，都不適用。

而我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你還未畢業，相信是一個年青人，你現時正值財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，應該要進取少少，可以較集中「平穏增長股」和「潛力股」。港燈(2638)係收息股，增長力唔高，你不宜持有太多。

至於其餘2隻，都係適合。但長線計，我地唔好成個組合，只集中係2, 3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

由於你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

將來你投身社會，可能會較忙。但唔好因為離開左學校，但忘記了學習。投資係需要持續學習，提升自己知識，才會做得好的。

------------------------------------------------

Q21804：

你好岩岩上完你第6堂, 好有沖動去用你條FORMULA去中銀網選股, 不過我好貪下, 會先唔用PE

自己篩完一堆搞左兩個鐘之後, 有隻見到好想問下你意見: 8137 - 洪橋集團

另外想問問，除咗你堂上教的公式，有冇一D網站/一條公式岩宜家用可以快搵到D一次性受疫情影響的股票？ 比如之前問你果隻大快活

就會因為PE/ROE問題而篩走左，甘可惜左反而

龔成老師︰

洪橋集團(8137)雖然過到大部份篩選準則，但你要留意佢過往股價都幾波動。

而且，市盈率都一直維持偏低水平，代表市場對佢睇法好一般。你再仔細睇，佢盈利其實主要來自一些公平值變動，唔係實際收入。

因此，佢投資價值，並不如表面睇咁高。

之後課堂，我會教你點睇年報，你就可以理解到，這隻股票箇中問題。

網站方面，暫時我見都係中銀個網會較好用。至於這個篩選並唔係完美，的確會有可能篩走一些優質股。也會好似8137，誤入一些投資價值一般的股票。

但這個已經算係較有效率方法，特別係對初學者，會較易掌握。

之後，你再配合基本面和仔細分析財務數據，已經好大機會，找到一些有價值的股票。

------------------------------------------------

Q21805：

龔sir，您好。我經常留意你的facebook，特別是龔成問答信箱。最近買樓問題很煩惱，可以請教一下您嗎？

本人33歲，先生(33歲)，育有一對年幼子女(幼稚園)，目前2人合共有現金200萬，先生月入5.4萬(5年後可加薪至8萬)，我是sales,平均每月3萬幾，沒有股票、物業。

現在同家人一齊住，大概還可以一齊住5年。之後搬出來，會請工人。我們現打算置業，有幾個唸法:

1. 直接買3房，但只可以買到30+樓齡的舊樓，八成按揭，只可即刻自住。(擔心舊樓不保值)

2. 唔理地區、大細，買400萬樓，5成按揭，放租，之後換樓(擔心之後樓價升，難換樓)

3. 買2房半新樓，八成按揭，即刻自住，有機會再換3房。(都係擔心難換樓)

目前呢5年沒有迫切住屋問題，只是先生錯過左兩次置業機會，擔心樓價再升難而置業，而且即使現在開始供樓，也要供到退休了。現在儲了一筆首期想盡快上車

現在未置業，每月開支約3萬。若置業後搬出來住+小朋友返學，每月開支大約7.5萬

最終目標有一套三房樓自住，有機會再置業作收租用途。請問龔sir我應該點做好

龔成老師︰

以你現時情況，用方法1和2都係可以。

至於3，我就唔係咁建議。因為好多時新樓都會有一定溢價，令你變相買貴左。

方法1，30+樓齡唔一直定無投資和升值潛力，但就好睇個物業本身質素、地區、交通配套、是否大型屋苑等。另外，你要留意佢幾時會做大維修，這個潛在成本，你必需要注意。

至於方法2，都係可以，先買一間較細屋，去以資產追資產，從而減低樓市波動，對你將來換大屋的風險。

但大前題，你這間細屋，都要有一定質素和升值能力，最少升幅能跟大市同步。之後，你再利用月供優質股，去累積更多資金。到有一定數量，就可以入市，以細屋換大屋。

由於這間是你自住屋，所以入市與否個重點位，係你是否"供得起"。只要你確保可以長線都"供得起"，而佢又符合你長線生活所需，咁就無問題。

最後，我建議你置業時候，要考慮埋個財富組合的平衡性，唔好過於偏重任何資產類。否則，會有過度集中性風險。

最好你係置業同時，一定要留一定優質股進行增值，成個組合才算平衡和健康。

------------------------------------------------

Q21806：

Hi 龔Sir, 我想問下美國有機會加息嗎? 如果加息對香港樓市有冇影響？ 謝謝

龔成老師︰

過去一段長時間，全球維持一個較低利率水平。但長遠計，息口必然會重新回升。

雖然，我地唔知幾時會發生這件事，但都要為這個情況，作好準備。

香港樓市現時處於合理區頂，但當出現加息，市民供樓成本上升，必然會直接影響入市資意欲，令樓價下跌。

但我認為香港樓，長期香港樓市，依然會維持向上，好難跌好多。

首先，我用身邊的朋友去分析（因為佢地都是適婚年齡的），我見到一個現象，唔少朋友結婚後，買唔到樓，要同父母用住，這幾年都係咁，而且人數不斷增長。

佢地正在儲錢，正在等樓價跌，只要在適當時機，就會搬出去住，你知道這是甚麼？這就是潛在的購買力，而且不斷累積！

香港樓長期供應不足，需求正不斷累積，這將會令樓價保持向上，跌少少，又會升過。

------------------------------------------------

Q21807：

請問1029鐵貨前景如何？我多年前0.8買入，後來0.3又買，前後有十几萬股，近解套之際政策降温，又面临大股東賣股份……是福是祸，宜守定是宜走换一隻其他的股票呢？

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

鐵貨（1029）經營採礦業務，專注在俄羅斯遠東及中國東北地區開採、開發及經營工業商品項目。

佢擁有多個項目組合，著重於開發礦場、生產及加工鐵礦石及鈦鐵礦，過往業務只是一般，雖然都有生意，但盈利上落較大，有時出現虧損，投資價值唔算好高。

整體分析，只是一般般。賣出會較好。

------------------------------------------------

Q21808：

我有3個問題想請教老師：

1. 新手投資 + 加強儲蓄能力 想問我可以先睇老師邊啲既書藉，除咗實體書，會否有電子書可以係iPhone睇？

2. 關於投資盈富基金既平均買入價, 以下係我唔同時間唔同價位買入，但平均買入價一路上升，請問個原理係點樣，因為越買越貴就唔敢買..

$24.18x500
$27.42x500
$29.26x500
$28.2x500

3. 請問如何計算到宜時既股票屬於貴定平？

龔成老師：

1）你可以睇《80後百萬富翁》
《股票勝經》
《財務自由行》
之後再睇其他。

上述都是最入門及適合你的，另外，我部分書有電子書，如《股票勝經》
https://www.enrichculture.com/products/9789888395767

2）最重要睇長期的，月供往往要5年以上，最好都3年，因此你預需要因為短期的價格上落，影響左策略，只要大方向正確的就得，當然，如果我地評估到現價貴，就可能會減少金額或停止月供，但在一般情況，你保持月供就得。

3）要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21809：

龔成sir,想些問題想請你指敎！小弟剛出社會 有十幾萬美元在投資 我睇左好多關係財富嘅書籍 知道汽車其實係負債

因為會令你現金流出，但我最近對某品牌汽車感有興趣 ，想擁有自己嘅汽車 但我知佢係負債 唔應該擁有 但我真係好中意 每次見到架車 都好想要

但同時又知道唔應該擁有 每次心情都好忐忑 如果係你會點做令自己舒服啲

龔成老師︰

你要分清楚，何謂「想要」和「需要」。

「想要」純粹係你個人感覺，或者想滿足自己一些欲望。

「需要」係有一些客觀因素，你係要持有這個物件，以達成某些實際目的。

簡單咁講，如果你係自顧人士，開車接單送貨。「汽車」就係你生財工具，可以為你創造價值，唔係一個負債。

若你只係覺得鐘意、或者只係想用佢作消閒娛樂，無創造出實際價值，就係你負債。

我唔係話，你完全唔可以用錢，去做一些娛樂性消費，但我地要平衡。最好係先做投資增值，有空閒錢，再考慮消費，咁會較好。

你其實可以用一個方法，就是「定目標」。

例如完成了一個財務目標，例如有$20萬、$100萬等等，你就可以用買車去獎勵自己，這樣就可以平衡，同時令自己更有效追求目標。

我地運用財富的法則，「先增值，後現金流」。

------------------------------------------------

Q21810：

成哥，我本身有留意8473，因為睇佢符合轉主板條件，0.4買左佢，點知港交所轉例，改做盈利要三年8000萬，

而家跌左，我仲未賣，而家心情好灰。

其實我買之前都覺得佢唔係妖股，係靠實力既股票。我個人認為彌明生活百貨管理得好好，我自己作為男仔陪女朋友去呢間鋪都覺得佢好，

另外佢作為零售，在疫市黎講算係好強，加上佢籌備緊做美容院，我個人認為佢會有發展空間，雖然買貴左，但我認為可以繼續持有，呢種心態正確嗎?

我明明有睇你書，但我輸左俾人性

龔成老師︰

你用生活所見，去初步分析一隻股票，係正確。但記住，我地是否投資一隻股票，主要考慮佢長線企業質素。

而能否升主板，跟企業本質無關，雖然轉版能提高了市場價值，但在更多時間，只是炒作，因此，你唔應該作為考量點。而且，這些消息好易相關股份，成為炒作對象，令股價被不合理推高，要小心。

彌明生活百貨（8473）業務不過不失，發展能力中等，不是高增長的類別。

以佢現時的經營情況，算是合理價，但這股始終規模不大，加上近年的盈利有下跌情況，存有風險。投資係可以，但不建議太大注。

另外，政治相關因素，都會令這股波動，要明白股價風險，政治因素是好難預測的。如果你持有太多，宜減。

------------------------------------------------

Q21811：

首先多謝你之前的指導，另外想問1088中國神華及3339中國龍工前景如何，可長期持有嗎？

還有3658新希望服務，剛抽到一手，是優質股嗎？

龔成老師︰

中國神華(1088)始終有一定規模，但政策不是好支持行業，的確會對佢有影響，但已經在股價反映左。

另外，由於佢地的產品自主力較弱，因此不算好高質。所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。

所以整體來講，這股不算差，但又不算非常好，唔好對股價有太大的期望，主要係收息的。可長期持有，但不建議太大注。

中國龍工（3339）主要業務為製造及分銷輪式裝載機、壓路機、挖掘機、起重叉車及其他基建機器。佢的產品有出口至俄羅斯、中東、澳大利亞及非洲等地。

雖然近年生意不差，但以過去5年計，生意與盈利都有波動情況，這點不得不注意。而企業的賺錢能力算是中等。

以企業的質素來計只屬中等，現時不貴，股息率都算吸引，但業務波動是風險，因此投資不能大注。但長線基本上可以的。

新希望服務（3658）係中國綜合物業管理及民生服務運營商。

佢為住宅物業、商務物業及其他類別非住宅物業提供物業管理服務，亦向非業主提供增值服務（包括案場管理服務。現時在管樓面面積超過1000萬平方米，物業管理項目全部位於中國一線、新一線和二線城市。

近年企業發展不差，生意與盈利都有一定的增長，不過，企業規模始終不是好大，獨特性未算強，投資價值算是中等，未算好吸引。

你只係一手，唔算太多，可以長線持有。

------------------------------------------------

Q21812：

老師，想講吓投資以外的事。我今年29歲，本身在一間蚊型工程公司工作，人工比大學同學低幾個point。

不過最近老闆想移民，所以佢想我留低幫佢打理生意，等佢走咗之後生意可以繼續營運。(我原本想完成part time master degree 就揾工)本身公司响香港得3個員工，

啫係我，我上司同埋我同事。上司都有好大機會2年之後移民，之後就應該由我接手大部份公司業務。老闆將我人工加咗50%，

而且會有分紅(公司營利嘅某個百分比)同公司股份俾我地。我諗咗幾日，決定試吓留低，因為我覺得接手一盤生意機會唔係人人有，如果可以學習營運整間公司，

相信都係好難得嘅經驗。雖然老師嘅新書有提及只有辭職並全職創富才是財富增值的最佳方法，但我仍想嘗試一下營運這間公司。老師有何看法呢?

龔成老師︰

其實我覺得係一個唔錯的學習機會，你可以親手營運一盤生意之外，仲要唔係孤身作戰，而係有有經驗架人指點，我覺得有嘗試的價值。

我書中講全職創富，除了自己做生意外，都仲有其他幾個方法。所以，你都要睇翻，自己本身個大方向係點。

如果你係想向做生意方向發展，這個是一個唔錯的學習機會。

加上你現時29歲，最緊要試多D野，保持進步，從你長遠人生的角度，這次是很好的進步機會，會對你成長有用，加油！

------------------------------------------------

Q21813：

你好，我而家計劃緊置業結婚及提早退休

本人28歲 與另一半工作穩定，總月薪約50000，扣除開支及家用，每月可儲25000。

資產方面
- 2層內地二線城市收租物業，總市值約180萬，租金回報約2%。2013年以約40萬購入，預期該地區具長遠發展潛力，每年增值約8-10%，
近年內地樓市升勢強勁，正猶豫是否現時賣出一層套現。

- 港美 優質+潛力股票+主要指數ETF，總市值約40萬，科技類（eg科網、半導體、電動車）約佔40%；傳統金融、醫療、能源、消費品類約佔50-55%；
另外投資約5%黃金、白銀ETF+加密貨幣。持倉變動甚少，期望長期穩定增值10-15%。

- 已累積3年股票投資經驗。

- 現金約70萬（包括應急資金20萬）等大冧市掃平貨

- 負債約10萬

- 已購買足夠保障的危疾、醫療及人壽保險。

目標一：預期在5年內以首置、高成數按揭買入市值800萬內市區樓作結婚自住之用。

目標二：希望40歲前累積1000萬淨資產（當中包括1層香港自住物業）。

我可以用咩方法完成以上目標？
唔該成哥

龔成老師︰

首先，係開始投資計劃前，你要睇翻你負債部份。如果個息率係較高，你要先處理好，否則會拖低長線投資效果。

現時你持有2間內地物業，租金回報率只係一般。雖然你預期有增長力，但由於你計劃5年內要在香港置業，如果再加上這2間內地樓，你成個組合就會偏左係物業類，會有過度集中性風險。

若果你覺得這2個物業，長線升值能力會唔錯，你保留都可以。但往後新資金，要集中係股市，以免太偏中係單一資產類，因而造成風險。

現時你每月儲蓄和現有資金，可以用優質股去增值，為你中短期買入香港物業和長線退休，去作準備。

你可以投資「平穏增長股」和「潛力股」，去創造一個增值平台。你先用每月5成儲蓄，即是用$12500做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，現有50萬現金和每月儲蓄，就等大跌市機會出現，才大力度掃貨，並長線投資。

我假設投資回報有10%（連股息再投資），你每月投資$25000 + 90萬資產(40萬股票和50萬現金)，若你在5年後買入物業(假設你會動用120萬)，到40歲時大約會增值至680萬。

再加上你3個物業，相信都有機會，可以達成1000萬的目標。

------------------------------------------------

Q21814：

現有9988, 700, 388, 有考慮1810, 其他要研究下，總是留不到现金？！

2382, 1177, 2845 可幾錢考慮買入

未有時間可上你堂，你那些書我應該睇呢？

龔成老師︰

你上述的持股，整體都係較有增長力。但你要明白，佢地增長潛力大之餘，不確定性都會較高。

若佢地發展理想，回報當然好。但當發展不似市場預期，股價就會有較大向下調整的壓力，你要主要這個風險。

現在舜宇光學科技（2382）、中生(1177)和GX中國電車(2845)，算係合理區頂至略貴水平。

你最好等佢地回多1成，才開始小注入貨，值博率會較高。

以下是我的13本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）
《80後千萬富翁》（初版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21815：

你好龔成老師，本人最近先開始投資屬於初哥。

現在持有以下股票：
700騰訊 $625 600股
300香港交易所 $459 400股
941 中國移動 $52.8 1500股
1177 中國生物製藥$7 3000股
1810小米 $24.5 400股

請問以上股票是否可以一直持有？

最近騰訊業績是否不大好？

這些股票您有什麼意見給我，可以在什麼地方注意，還請老師指點迷津。

龔成老師︰

你以上股票，都係有質素，但有2個問題，想你注意翻。

首先，你才29歲，應以增值為主。中國移動(0941)係收息股，增長力好一般，不適持有太多。

另外，你而家太偏重左係潛力股(0700,0388,1177,1810)，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。但由於你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

至於現有持貨，由於優質，故不用沽出。只要用新資金，去慢慢拉平均個價，咁就可以。

騰訊（0700）發展正面的，業績都無重大問題。

只是近期中央打壓大型企業，令佢股價較波動。但相信政府，應該唔係想佢地做唔倒生意。只係希望加以規管，在可控和對整體經濟安全的條件，去賺錢。

此股有長線質素無大變，你記住我地投資一隻股票，係睇佢長線質素。一些中短期因素，如果無令佢長線質素轉差，就算股價出現波動，你都唔洗太在意，你照長線持有就可以。

------------------------------------------------

Q21816：

老師，我溫習緊notes，有d唔明

1) 388，823 屬於水桶幾？佢地係特殊例子，高派息率，但潛力較大

我這2隻都持有，比例應該怎樣配置？

2) 原本我一家打算去澳洲，但佢封關，無得入境。

為了移民，於是賣樓，但當時打算入籍澳洲後才買澳洲樓

所以去年10月賣出hk大單位，今年1月時買入hk細單位收租,大約每年2.7厘回報

手持hk 100萬用來買股票，亂咁買左d, 依加上左你既堂，想學習下點樣配置

另外，澳洲封關，現打算去UK, 原因為亞仔升學，因亞仔（小二）越來越討厭返學，亂做功課，成日欠交，但佢好聰明，無乜溫書都有85～100分，只是不適合被填鴨

如果去UK, 用hkd 100萬做首期，還是keep on買股票？

sorry寫得有d亂，因為原本去澳洲移民，依加轉UK...近日都好較心亂

龔成老師︰

1. 港交所(0388)係水桶1，而領展(0823)係水桶2。

一般水桶1，派息比率係應該偏低。因為這些企業，都尚在發展階段，需要保留較多盈利去作發展。

但港交所(0388)由於佢業務性質特別，本身行業又係有壟斷性，唔需要留太多盈利，都可以維持其優勢，因此佢派息比率會較高，係正常。

房托類根據規定，佢必須派出最少90%盈利作股息，因此我地會視為水桶3。但領展(0823)有點特別，佢有別於其他房托，只係用組合物業收租。

領展還會定期翻新有潛力物業，去提升佢價值，從而令租金有所增長。因此，我地會視為水桶2，有派息之餘，都有平穏增長能力的類別。

若你係中年人士，港交所這類水桶1，最多可佔組合40%，若你投資能力較一般，可以再下調。水涌2會作為力，再配以少少水涌3，就算得上係平衡。

2. 當你完成課程後，你可以因應自已能力、年紀和風險承受力，去試下配置。如果不懂定平貴，就先月供或分注。總之，唔好急住去投資，要量力而為。

再有唔問，就係INBOX再問我。

至於，100萬點樣用，我會比較偏向建議你用來在英國置業。

從投資角度，你應該考慮這筆資金的機會成本，投資係乜野地方，先可以將佢係合理風險之下，利潤最大化。

若以香港樓和香港股市做例子，現時租金回報率低，股市值博率較高，故資金應留係股市。

但由於你要移居異地，應該先以安頓好生活，減低不明朗因素為優先。加上英國普遍樓價，無香港咁貴，值博率都會較接近。

因此，如果你找到合符你長線生活需要的自住物業，又可以供得起，咁你置業先係可以。到你未來生活一切安定下來，有閒錢時，才再投資增值。

而一刻，你應該保留較多資金，去處理你英國新生活上的問題。優先從生活上考慮，投資放後少少，我相信會較好。

------------------------------------------------

Q21817：

龔兄(1)千萬富翁本書最尾詳解5條致富方法， 如果我唔跟次序去睇得唔得， 先睇股票後睇其他ok ?

(2) 你嘅書裏面提到有錢人經常運用財富系統[借]去創富, 假設我已經做曬自身風險評估，想問下如果我先買咗自己嘅信貸評級報告，

然後先去銀行或者財務公司，咁樣係咪好過佢哋主動去查我嘅信貸記錄(聽人講畀人主動查好似會對評級有影響) ? 其實喺銀行借同喺財務公司借邊度合適? 如何取捨?
感激解答

龔成老師︰

1) 實戰編，你可以先睇你目標的類型，係可以的。

但建議你最終係要睇晒，有助於你了解和幫自己定位，去計劃將來。

2) 以我所知，銀行定你自己去做評級報告，係唔會有分別。至於借銀行定財務公司，一般銀行利息會低D，而且會較方便。財務公司唔係唔得，但你要了解清楚是否持牌，和產品相關細節。

如果係整體成本較低，你都可以考慮。

通常我自己會視借貸投資，是我最後一張「皇牌」，真的有需要時才會動用，即是見到一個明顯的投資機會，全世界都平貨，值博率好高時，才會動用。

但現時大市只係合理區，明顯未係機會，若想用借貸投資，建議再等等。

------------------------------------------------

Q21818：

你好龔成老師，本人48歲，丈夫49歲，有250萬現金本身做定期存款多年，現在因為冇利息，希望賜教方法，唔想有風險或者超低風險，

有一層自住樓，（欠按揭80萬），有150 萬股票，有110萬銀行保本保險儲蓄，一層大陸順德細樓（已經付全數）50 萬，20萬基金（低風險），謝謝。

我是主婦，丈夫做生意，有一個三歲小朋友，自住樓約值700 萬。

股票包括 5，2018，3175，405，700，270，2888，1733，2318，1800，1833，6088，2314，6127，2845，2812，2820，2238，1658，1186，3800。

龔成老師︰

其實就算投資最穏健和保守的股票，都係會有風險，只會係多與少的分別。

若你係完全唔想承受任何風險，你可以投資定期，儲蓄保險、美國國庫債券、IBOND等低風險產品。但缺點係，佢地增派息率唔高。

以你現時年紀，應該都要做少少財富增長，才算理想。但若你真係唔想承受太多風險，只買上述產品都係可以。

如果你可以承受少少價格波動的風險，你可以將部份資金，投資「收息股」。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

大市現處於合理水平，那250萬資金，你可以先用多50-80萬，以"分注"形式慢慢入貨。餘下資金就等大跌市機會出現，才大力度掃貨，並長線投資。

至於你現有持股，其實好多波動性都好大。以你較保守的投資取態，佢地唔係咁適合你。

騰訊（0700）、平安好醫生(1833)、昭衍新藥(6127)、GX中國電車(2845)、三星中國龍網（2812）、ＧＸ中國生科(2820)都有質素，但係不確定性較大，股價預期會好波動，建議你不要持有太多，甚至將佢地全部換成收息股，或者一些適合你的產品。

平安(2318)、粵海(0270)、瑞聲(2018)、IT HON TENG（6088）、廣汽集團（2238）、中國鐵建(1186)係平穏增長型，波動性會細D，但風險會比收息股高。你自己再衡量下，是否持有，還是同樣換至其他地方。

Ｆ三星原油期（3175）我無對這基金有特別研究，佢係追蹤油價相關的指數。

中短期油價會好波動，風險高。但長遠計，油價唔會好似現時的低位水平。

因此不是無投資價值，但你最好仔細了解這基金和佢追蹤的指數先。同埋，一定唔可以大注。

易大宗(1733)、渣打(2888)投資價值不高，建議換至其他投資項目。

保利協鑫能源(3800)現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

餘下無提及的股票，都係收息股，若你可承受少少價格波動的風險，長線持有就可以。

最後，你要留意持股總數，以你資金收量，組合大約10-15隻股票好了。過多你會好難定時審視和管理，對你會不利。

------------------------------------------------

Q21819：

你好！龔成老師，本人38歲想請教一下如何調整現有投資組合，邊D適合長揸，邊D應該沽出/減持？

股票組合如下：

香港中華煤氣有限公司 (3) 3024股@ 17.30
思捷環球控股有限公司（330）600股@ 50.00
中國建設銀行股份有限公司—Ｈ股（939）3000股@ 8.00
金利豐金融集團有限公司（1031）4000股@ 6.00

工商銀行—Ｈ股（1398）4000股@ 7.00
醫渡科技（2158）1000股@ 65.15
京東健康（6618）50股@ 71.00
阿里巴巴－ＳＷ（9988）500股@ 250.00

另外如果想加入比亞迪電子（0285），吉利汽車 (175) ，阿里巴巴－ＳＷ（9988）作長線投資，現價可入嗎？謝謝老師

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你38歲計，應以增值為主。建行(0939)和工行(1398)只係收息股，增長力唔高，不宜持有太多。

思捷環球（0330）當多年前，環境改變令佢「生意持續下跌」，佢的質素已經改變，佢已經要進行止蝕的動作。

金利豐金融(1031)質素一般，建議慢慢換至其他優質股較好。

醫渡科技（2158）有潛力的，可長線。但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

你現貨可持有，但暫時唔好再加注了。

其餘持股，都係有質素和適合你年紀，長線持有就可以。

至於想再加入比亞迪電子（0285），吉利汽車 (175)，都係可以。比亞迪電子（0285）現價偏貴，回多1,2成才算合理區頂，才可開始小注。而比亞迪電子（0285）現價算合理區頂，無貨可先小注，到有明顯回調，才正式入貨。

阿里巴巴(9988)雖然現價合理，但由於佢已經佔你組合較高比重，個別企業不應佔組合15%以上，否則會有過度集中性風險，故你暫時不要再加注。

另外，你而家太偏重左係潛力股(2158, 6618, 9988, 0285, 0175)，佢地雖然有增長潛力，同時風險都較高，不宜持有過多。

你算年青，風險承受力較高，但潛力股也最多只宜佔組合約5成，餘下應集中係平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

------------------------------------------------

Q21820：

你好，龔Sir, 很後悔不早點認識你的專頁，因為跟住你的投資方法，幾個月已經見到明顯的增長，真心感謝你願意將你的心得經驗不吝分享。

現有一問題在猶豫：（現37）6年前買了一份投資保本的保險供10年（還要供4年）因當時幫朋友無留意回報，現發現每年投入5萬，10年後多1萬，

而且供滿期後再放多5年先會多20萬，現在停供會蝕7萬，但因今年（最遲明年）會置業需要資金，請教阿Sir會如何安排？謝謝

龔成老師︰

我地理財，要做到「攻守兼備」，保險、備用現金等是防守，但防守部分不用太多，餘下資金就應進攻。保險最大的作用是「保險部分」，反而投資作用一般不大，即是買保險，最大作用是醫療、人壽、財產等的風險轉移，將你不想承受的醫療費用等不可預測支出，轉嫁比保險公司。

因此，你要視乎翻你持有的投資保本的保險供，當中的特性，以及本身的預期回報，其中保險的作用。

從投資角度計，你保本保險回報，唔算理想。

同一筆資金，若利用優質股去增值，長線好大機會可以跑嬴這份保本計劃。

當然，你這計劃的好處，就係保本和較有保證回報。而投資股票，股價始終會有波動性，有一定風險。

但由於你係有實際置業需要，而資金又不足，那你只能選擇停供。

以你37歲，應先做好增值部份，我較建議先用優質股增值。但若你係好保守架投資者，買儲蓄保本保險，都係可以，但最好不要太多。因為佢會拖慢你財富增長步伐，你要明白這點。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21641-Q21660）

Q21641：

龔成：你好，我追中在你都有一段日子，我想請問一個問題，股票6127在6月22都有$164股價。

之後股價到$128，見財經網站話創上市新高，我真係唔係太了解，可否回覆，謝！

龔成老師：

因為這股進行了「十送四紅股」，股價自然地調整左。

送股只是一個數字遊戲，持有股數多左，但股價下調左。

例如你原本持有1000股，10送4後，你就會持有1400股，但整個企業價值不會因此而改變，因此，股價會自然調整，例如之前股價$164，你持有1000股，市值為$164000

現時股價會因送股的「除淨」因素而下調，調整至$117.14，你持有1400股，你持貨市值（$117.14X1400股）=$164000。

所以，之前的$164已經變成了現時的$117.14，所以當你見到$128，就是創新高。

------------------------------------------------

Q21642：

龔sir，你好，自從上年上完你既投資班，獲益良多，亦成日推介你既書，專頁同投資班比朋友

想問問金沙既財務穩健情況，流動資產淨值負值

總負債 / 股東資金比率446%，主要原因都係今年equity大減（-56.6%）翻查附註，法定儲備可按除稅後利潤調整，因為今年無錢賺，大跌是否正常？

今年係特別年份，現金流正值，見到繼續有投資，可見金沙對未來有信心，另外今年經營虧損，靠融資獲得資金。今年interest coverage係負數。

想問下除左以上不太利好既數據，仲有咩數據可以分析金沙財務狀況？ 謝謝謝

龔成老師︰

其實上年疫情，令到全球經濟活動都受影響。旅客大跌，所以成個澳門博彩業，都受到很大打擊。

總負債 / 股東資金比率大升至446%，是由於2020年出現大幅虧損，再加上2020年頭派息開支(用作支付2019年中期股息)，都令儲備大幅下跌。

因此股東權益部份，出現較大度下跌。負債本身都有增長，但幅度算合理。因此股東權益有較大收縮，故總負債 / 股東資金比率大升，係正常。

我地係睇數據之餘，都要分析個基本面。數據好差，但事件係一次性，唔會做成長遠影響。這時候，個別受影響年度的指標，參考性就未必咁大。

金沙(1928)長線質素，依然不變。

你睇倒佢過去，無論收入和盈利都有穏定增長。而且，每年都有唔錯派息，係一隻優質平穏增長股。

你見佢爭取在這個低訪客時期，加快將金沙城中心重塑為澳門倫敦人。可見集團對行業長線發展，依然係有信心。

疫情開始轉好，集團生意會慢慢重回正軌。但由於疫情對整體經濟和個人收入，都有一定影響。因此，你預此股中短期都會較弱。

若你有貨，長線持有係無問題。

------------------------------------------------

Q21643：

早晨阿sir 本人月光族 每月2萬人工 每次出糧唔知錢去晒邊。

見到有其他網民投稿，每月1萬作為月供股票 所以我現時出手的話 唔知距離5年滾存100萬會唔會太遲呢

月供股票可以提供3個組合 分別穩健增長 中風險 高風險 最近都有留意你既頻道介紹 所以今次決定狠下心去離開月光一族

中電0002、比亞迪1211, 港燈2638, 盈富2800, 中銀香港2388，各月供$2000。

未開始供 所以想問問呀sir 有冇其他組合可以選擇或替換 月光一族上

龔成老師︰

能夠決心離開月光族，已經是行出成功一大步。做財富增值，當然越早做越好，可以享受更多複息增長好處。

更重要，係你要學懂正確投資知識，和用合適投資方法，才會有效率地達成目標。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係偏年青人士，你可以用「平穏增長股」 + 「潛力股」的組合。

你現時組合中，中電(0002)和 港燈(2638)只係收息股，增長力不高，唔係咁適合這個年齡層。

你可以在下面提及股票中，選擇一些適合目標，去取締這2隻股票。

但留意，由於「潛力股」有一定波動性，你現時投資經驗較淺，「潛力股」比重就要相對下調，大於3成以下。到你有一定經驗，才加大至3-5成。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21644：

龔老師，啱啱聽你咁講 ， 先增值後享受， 有正如所講長線投資一定會有回報，我想問你個意見，我同先生月入大約四至五萬 ，

正因為而家有兩個小朋友讀緊小學 開支好大 儲錢亦唔多

如果我手頭上有一間價值六百萬嘅樓居屋 係自住嘅 大概仲有一百六十萬未供完

因為短時間都升值咗好多 都算係人生第一桶金，你覺得能唔能夠賣出 然後用二百萬至三百萬長線去投資 然後自己租樓住五至八年

咁到五年或者八年後 咁樣財富增值 係唔係一個好嘅選擇？

但如果最後升值唔多，有機會而家住緊嘅屋 都會再升 。

但如果我唔用呢個機會 根本就冇辦法 拎到現金去投資，拎唔到現金投資 就唔能夠錢搵錢。

龔成老師︰

每個人都有自住需要，如果你沽出租樓，就等同沽空樓市。

由於投資都係有一定不確定性，如果你最終投資回報，係差過樓市上升幅度和這些年的租金成本，你會得不償失。

我唔係話咁做一定唔得，但這個操作有一定風險存在。如果你投資經驗不多，我建議咁做。

你現時情況，較穏陣做法，就睇翻自己開支和收入，有無調整的可能性。

盡量放棄一些不必要開支，同時間，睇下有無可能增加額外收入，好似做兼職、網店等等。

令自己每月盡量去空出一筆資金，去儲優質股，為自己財富增值。這個方法財增速度，未必有你賣樓再投資咁快，但會相對穏當，你可以自己衡量下。

------------------------------------------------

Q21645：

想請教老師，3606， 同868 都係做玻璃，做埋都有做汽車玻璃，但點解個市盈率可以差咁遠?

咁可唔可以代表3606 overprice，而868 相對合理（之前$17-$18 有，但24-25 已經放哂）

後悔做左個短視嘅投機者
謝謝

龔成老師︰

雖然2間都係做玻璃，但信義玻璃（0868）業務集中在浮法玻璃，而福耀玻璃（3606）則重心在汽車玻璃上，而且企業規模都有所不同。

因此，市盈率唔可以完全直接地比較。

福耀玻璃（3606）有質素，現價會略貴，如果回翻1成會較合理。相信長遠能增長，但由股近年股價上左唔少，之後股價未必是爆升模式。

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。

現時估值偏貴，投資值博率一般，回翻近1,2成，才可以入貨。同時，你預佢中短期會比較波動，要長期先見到收成。

------------------------------------------------

Q21646：

老師你好，有啲問題想請教你。

1: 房托估值嗰時應該用 P/B 定 p/ffo 好？

2: 請問 P/ffo 應該點做？可唔可以喺度教教我？可唔可以用778來做例子？

3: 仲有個 P/affo 我都唔知係乜嘢嚟。

有勞老師

龔成老師︰

1) P/FFO會好少少，但其實2個都係一些輔助性參考指標。

所謂的FFO就是Funds from operations（營運現金流），在房託中其實比盈利更有效反映真實情況。

但要記住，我地重點都要睇埋佢企業質素，去了解佢將來發展情況，和租金增長能力，才去決定是否值得投資。

2) 有少少似PE，佢係將P(現價)除以FFO(即經營產出淨現金流)。若指標越高，代表你所投入資金，要回本年期越長，某程度上代表越貴。

3) P/AFFO是在P/FFO基礎上，作出一些資本開支相關項目的調整。

由於P/FFO和P/AFFO有些複雜，不同企業在自行估算時，都會有些分別，所以用作不同企業比較的準確性，未必太高，只宜作輔助性參考。

（其實，你細心想想，房託用股息率已是一個很有代表性的指標，因為佢根據「可分派收入」的9成作派息的。有時在分析時，太過複雜化，未必是好事）

------------------------------------------------

Q21647：

阿sir, 如果在投資角度, 你覺得內地, 例如大灣區的住宅物業, 有投資價值嗎?

現時香港的樓價實在太貴, 如果在香港買樓, 會佔用我好大部分的資金。加上現時租金回報不太好，物業升值潛力又不敢肯定。

其實我好喜歡黃竹坑的新樓盤， 但實在太貴，現在已經要三萬元一呎，將來真的有很大升值空間嗎？

我現在約有400萬現金，80萬股票， 還有一些長線的保險公司儲蓄計劃。 我知道現金比例過多，所以想加注在股票及投資物業。

上完你的堂現正整理自己的投資組合，希望阿sir可以給我點意見。

龔成老師︰

大灣區我未仔細研究，你都可以睇翻佢租金回報率和長線增長潛力，去決定其投資價值。

黃竹坑的新樓盤，都有投資價值。因為同區缺乏大型新盤，故有一定需求存在。但呎價唔平，所以升值能力會扣少少分。

其實每個人都有自住需要，最終都會買個自住物業，但當過程可以大不同。

首先，你要因應自己能力(是否供得起)，實際生活需求，去決定買入什麼樣的單位。

你要睇長D，講緊係5年、10年、甚至20年的人生計劃，到底要一個點樣架物業，先可以配合到你。

之後，我地再制定一個可行計劃。

如果你目標單位，唔係太貴，而你又有一定資金。可以買入單位之餘，有一定資金留下，進行投資增值，那計劃可以直接進行。

若你現時資金較少，你可以先用優質股，去累積資金，再去置業。

或者目標單位較貴，你可以先買入較細單位，之後放租。令你可以有一個物業，用以資產追資產方法，減少物業價格波動，對你購入最終目標物業的影響。

另一邊，再用優質股增值，到有一定資金，就細屋換大屋。

若你最終目標係一個較貴物業，你可以先買入一個細單位，做踏腳石。餘下資金，努力用優質股去增值，直到有一定金額，就去換大屋。

可用「平穏增長股」 + 「潛力股」，去創造一個增值平台。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

現時大市只係合理水平，扣除置業資金部份，現金和股票最好各佔一半。餘下資金，就等大跌市出現，才加大力度掃貨。

------------------------------------------------

Q21648：

龔成老師, 講個好消息你知, 我成功上樓做業主啦! 首期主要係自己積蓄, 雖然認識你較後期,

但你的page影響左我,現在省多一蚊去投資, 未來就可以累積多10蚊的資產。

最近準備供樓,開始減少日常不必要的開銷,發現原來自己都可以一個月可以用少於MOP2000,

更意識到平日的自己衝動消費的不智,日後每一筆開銷都會更謹慎, 重點係尼種有目標的節流並不會讓自己感到不開心，尼個絕對係本年度最大感悟。

現在我每個月有約MOP5000可以放到投資戶口, 以往我是全數供基金(有全股亦有股債), 至今賺5%左右, 手上亦有啲碎股(盈富, 銀娛及港交所),

但只供了一個月因置業而停供, 現在我應該:

1. 停供基金, 但不賣出基金, 將月供基金的錢轉移到月供股票(盈富, 銀娛及港交所)

2. 月供股票的手續費不菲, 每筆月供交易為MOP50, 另外每年MOP120保管費, 假如供股多但月供金額少, 手續費就顯得相當高昂。

3. 不停供基金, 之前供的碎股繼續持有抑或賣掉呢？如上述費用顯示, 擔用閑置碎股最終會被蠶食到渣都冇。我應該賣出碎股嗎?

感謝遇上老師無私的分享及指導, 感激你影響了我的消費觀, 讓我能向FIRE又邁進一步。

龔成老師︰

恭喜你，成功升格為業主。

現時你財富組合，完全偏向物業類，有集中性風險。但由於你剛置業，係正常。但長遠，你要將單一資產，控制係組合8成之內。到你較年長，比重更要進一步下調至6成，才算穏當。

所以，你未來新資金，應集中投入股票市場，去令組合更平衡。

你現時投資配置，可以先衡量翻個基金的投資策略，所投資的資產類別、投資策略、風險程度、市場、費用成本、以及過往的表現。可以睇佢過往5-10年，如果回報係比主要投資市場高，有考慮繼續投資。

相反，若你預期佢長期都會差過大市，就應將資金轉去做月供股票。

至於澳門月供費用係較高，你可以集中供晒盈富(2800)，去減低月供成本對你的影響。

若你最終係選擇持續去供基金，原有碎股可持有。但你覺得，長遠為左個少少股票，而要定期付上一定費用不值的話，沽出都可以。

------------------------------------------------

Q21649：

Hello 龔成sir , 我是一位39歲初學投資者，投資失利中。

請問以下股票應否加注或止蝕 ？

舜宇光學2手 @213
吉利 1手 @27.9
比亞迪 3手 @229
美團 1手 @428

阿里巴巴 1手 @263
移卡 1手 @100
海普瑞 1手 @18.4

謝謝你

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你以股票，都係有質素。唔需要太過在意中短期股價波動，長線持有就可以。

但你上述股票，都係潛力股類，佢地有增長力，但波動性都較大。特別係海普瑞（9989）和移卡（9923），不確定性就更高，只宜小注。

以你39歲計，潛力股最多佔組合一半好了。加上你投資經驗一般，要再減少少，至3成。否則你成個組合會過份進取，風險過高。

但你唔需要沽出現有股票，只要將新資金，優先投放在平穏增長型股票，去令組合慢慢平衡翻，咁就可以。

------------------------------------------------

Q21650：

龔Sir,我要同你報喜啦，我地早2日簽左合約，買2房單位，中層484尺，

由560萬講到531.8萬成交，系整個屋苑同一尺單位最抵買，而且大家都負擔到既供款。

我手持股票有以下：

小米 1200股 27.3入
中國海洋石油 10000股 10.16入
阿里巴巴 500股 283.4入
7500 10000股 6.225入

想問吓以上股票是否可守？7500應該只能等待?

你有意見可以比我嘛？謝謝

之前見你講比亞迪可以再月供翻，但我吾知應該點做，大概每月可用1000-2000做月供，因買樓後流動資金不多，亦都不想再分散太多隻股票

我只係想集中買比亞迪，我本身係用渣打戶口去買，想請教一下你用邊間銀行或者證券行會比較優惠。

再次多謝老師百忙中抽空去解答我

龔成老師︰

先恭喜你，成為業主。

從財富配置角度，你現時成個組合，偏向物業部份。但初期係正常，長遠計，你要將單一資產比例，慢慢調到去不超過8成，以免有過度集中的風險。

所以，你現在享受新居之餘，都要開始計劃，將未來的新資金，慢慢配置在優質股上。

你現時持股，唔算係大問題。小米(1810)和阿里巴巴(9988)，可長線持有。

ＦＩ二南方恒指（7500）的投資目標，係反向追蹤恆生指數每日表現。如果恆指跌1%，你就會獲利2%(另扣管理費)。但若然恆指向上，你就會虧損。

我對這類產品有保留，恆指在過去數10年反覆向上，所以長遠計持有這股對你"不利"，一定多於"有利"。

建議你長遠就算不全數沽出，也最好沽出大部份，換碼至其他優質股較好。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業，不宜持有咁大注。同樣建議你沽部份，換碼至其他股票。

以你年紀，應以增值為主。你唔好太集中一隻股票，要建立一個組合。

比亞迪（1211）可以是其中一隻，但不是唯一一隻，你要考慮每隻股的%是否平衡。

如果你這刻比亞迪無貨，可小注月供，你計總比例就得。即是每隻股佔你股票組合長遠的比例。但長遠，你應該建立一個更平衡的組合。

大市只在合理區，你手上資金都唔好用盡，留部份等大跌市機會。

匯豐與南洋商業銀行月供都可以。

------------------------------------------------

Q21651：

老師 你好！ 2380 中國電力，我買入長期收息嗎？

我銀行可以借loan, loan rate 1.5% ,咁我借loan 來買呢隻股票 轉息差 ，你覺得風險大嗎？

龔成老師︰

先講股票本質，中國電力（2380）作為收息股，不差的。

佢主要在中國開發、建設、擁有、經營及管理發電廠。過往業務都有增長，不過盈利有少少波動，主要受成本及定價因素影響。

這股增長力不強，但作為收息股，這股不差，現價合理，都有長期持有的價值。

你現時借貸利率不高，的確可以因此創造息差收入，但你要留意幾點。

首先，你借貸利率是否固定，若將來加息，你息差優勢，就會被削弱。

另外，雖然現時有不錯息差存在，但股息並非保證。而且，大市只在合理區，難保會出現「賺息蝕價」的情況，你要明白這些風險。

最後，就算你要實行這個計劃。選擇收息股時，唔好集中晒係一隻，要分散幾隻不同行業的收息股，才會做到分散風險的效果。

------------------------------------------------

Q21652：

老師，想問下6098前景和什麼價位屬於平。

另外亦都想問下必瘦站還是2138比較好,我之前是2138職員，覺得前景也不錯

龔成老師︰

碧桂園服務（6098）由碧桂園（2007）分拆上市，主要於中國提供物業管理服務等服務。

例如包括保安、清潔、綠化等，物業管理組合涵蓋住宅物業、商業物業、寫字樓、多功能綜合樓、政府及其他公共設施、產業園、高速公路服務站、公園及學校。

佢無論在業務本質、規模、品牌、財務數據、前景，都是理想的，反映這企業有一定的質素。加上有一定的現金流，背景發展等，投資價值絕對有，相信這企業的前景不差，有長線投資的價值。

但要留意，行業有時會有較大的炒作，股價上落大，要注意風險，而整體是有長線投資價值的。

現價算係貴，最好等回1,2成，才開始小注儲貨。要回到平宜區，最少要回多4,5成。

必瘦站(1830)和香港醫思醫療集團（2138）都係有質素，相信業務發展都會不差，長遠有增長力。

如果你對2138較了解，你可以考慮投資佢都可以。但2隻股票，現價計都係貴。

香港醫思醫療集團（2138）要回多1,2成，才算合理區頂。而必瘦站(1830)最多回到$4左右，才開始慢慢入貨，會較理想。

------------------------------------------------

Q21653：

老師老師，我剛發現我媽係過去一個月不停買入0803（昌興國際），我睇返個股價係咁跌，我怕係伏股，可唔可以比d意見我。

龔成老師：

這股質素不佳，年年虧損，過往又供股又合股，同埋2019年度、2020年度，核數師意見為「不表示意見」，反映佢盤數「有古怪」。

叫佢自己小心D啦，問翻佢，點解入股一盤不停蝕錢的生意？

------------------------------------------------

Q21654：

你好，我有 2隻股票想問下 想睇下你點睇 ，9698 100蚊買 1044 65蚊 買 ，2隻都蟹左唔少，仲破底跌，點做好...

龔成老師︰

唔好太睇重"買入價"，因為當你購入一隻股票後，你是否繼續持有，關鍵位是企業質素、前景。買入價，只係一個心理因素。

萬國數據（9698）有質素的。

佢的業務為開發及營運數據中心，根據佢公司提供的資料，佢係全中國最大的運營商網絡中立數據中心服務提供商，市場份額約2成。

現時主要通過GDS上海、GDS北京及其子公司進行該等業務。GDS北京及GDS上海各自持有經營業務所需的互聯網 數據中心牌照。

佢提供託管和管理服務，包括創新和獨特的託管雲價值主張，機房面積為266,260平方米，有一定的規模。

見佢生意有一定的增長，行業前景正面，有長線投資價值。出現帳面虧損原因，主要係你買入價過高。

現時下跌，純粹係股價回至較合理水平。暫時守住先，除非貨太多就考慮減。

恆安國際（1044）主要業務為在中國生產，分銷及銷售個人衛生用品，零食產品及護膚產品。

恆安擁有多個品牌，如「心相印」、「安而康」、「品諾」、「安爾樂」等，而業務大致可分為紙巾產品、衛生巾產品、一次性紙尿褲產品、零食產品。

恆安具有品牌，又處於增長中的市場，前景不俗，故此企業為不錯的優質股。不過，市場競可能令毛利略為受壓，但相信隨著此企業發展更多較高毛利產品，影響不算大。

未來成本上升，令佢略有風險。整體而言，長線有投資價值，可以守。

------------------------------------------------

Q21655：

龔sir:您好，尋晚上咗你個堂，因為太多同學啦冇時間問你，所以喺呢度問你，你可以慢慢解答。

講到供股部份若果唔供，股價就會跌，如果咁是否係應該喺供股日前賣出呢？Thx!

另外想問9928質素如何，可否長期持有。

龔sir:今日重溫左你尋晚上嘅堂，知道供股要睇返企業嘅前景、目的、誠信、過往記錄、家族控制因素，及檢視此股佔投資比例嘅多少，己消化了。

龔成老師︰

其實供股，就係而家發一些新股票，向現有股東再集資。

你有權選擇買這些新股(即係供股)，或者不買。由於會發行新股，令每股盈利被攤薄，股價會因此而下跌。

但個原因唔係個企業質素，出左問題。而係每一股的價值，被這些新股分薄左，所以才出現下跌。

因此，我地係唔會因為供股，而去沽一隻股票。當然，佢進行得太多，例如5年內出現2次，我地就要對這些股票較為保守。

你最重要睇「質素」。如果佢有質素，其實可以持有而所謂的下調，其實是一個調整，你到時會收到供股權，如果你不想供但又想持有該股，可以賣出去對消股價下調的因素。

至於時代鄰里（9928），佢係由時代中國控股（1233）分拆上市，主要在中國從事提供物業管理服務及相關服務。

業務不差的，過往財務數據，生意與盈利都有理想增長，前景正面，有長線投資價值。

------------------------------------------------

Q21656：

想問下有邊隻晶片股比較好的？

老師請問1919現貨可入嗎？

龔成老師︰

你可以考慮買台積電(TSM)，佢係一間有質素架企業，在全球半導體業界有領先地位。

集團專注生產由客戶所設計的晶片，現時已經是全世界最大的專業積體電路製造服務公司。

如果你睇好半導體發展，可以月供，並長線持有。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

現價略貴，回2,3成會合理翻d。

------------------------------------------------

Q21657：

龔sir， 嚟緊會上你嘅堂不過有啲嘢等唔切想而家問,

留意到比亞迪管理層講過，未來會分拆半導體業務上市，而吉利亦會分拆極氪智能電動車上市，瑞星會分拆光學業務

咁即係話佢原本呢啲賺錢業務嘅財務會獨立左反映出嚟，咁對於本身嘅1211，175，2018， 佢哋自身嘅 價值或者估值係咪無原先咁高 ?

因為原本擁有嘅嘢已經拆咗出嚟，少咗一樣嘢喺身上。
多謝龔sir解答

龔成老師︰

其實這些分柝動作，有好有壞，當一間企業擁有一些資產，市場未必完全能反映到這資產的價值，如果分柝比佢一個獨立地位，就能釋放當中的價值，從而提高了整間企業的價值。

另外，分柝上市能得到資金，而上述的幾間公司，都處發展期，希望得到資金去進行發展，當投資發展新業務，長遠能為企業帶來更大利益，對企業就有利。

當然，分這動作如同賣出該資產的部分構益，的確有可能減少了企業的賺錢能力，但就好睇企業如何運用得來的資金。另外，就算分柝上市，企業一般仍會擁有控制權，因此不影響企業在決策方面的發展。

至於會計上，要睇翻母公司會持有多少權重，才知道會否將這些分拆部份的財務數據，全面反映在母公司年報上。

但這個只是會計上，最重要係公司將這些有潛力部份上市，可以釋放其價值之餘，可以集資到一筆資金，去持續發展。

當然都有機會影響佢估值，令中短期股價較為波動。但長線而言，對集團是正面的。

------------------------------------------------

Q21658：

我係新手，諗住1833從高位140回調左25%可以入貨，點知一直都跌落去。呢三個月股市既氣氛都好差，係咪常有既事情？ 氣氛係咪又會突然之間轉好？

明明睇左你既書，要控制注碼，但都係心急⋯

龔成老師︰

記住，我地投資唔好受氣氛所影響。而且，更加唔好去估個走勢，會唔會突然變差，或者變好，咁係好危險。

我地永遠都只會用「企業質素」和「平貴度」，去作投資決定。

平安好醫生（1833）長遠有發展力，但股價在中短期，會十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，你緊記要控制注碼。如果你持貨佔組合，已經有一定比重，就算再跌，都唔好再加注。

再加注表面睇，係好似溝平左個買入價。但實際上，你係將更多資金，投入一隻高風險的股票，令自己風險再進一步提高。

------------------------------------------------

Q21659：

老師你好，想請教你一的問題。

我媽媽係年幾2年前0.97買左1560星星地產，買完一直跌 依家0.45。應該點做好?

同8188。0.6買。依家得0.138

龔成老師︰

星星地產(1560)主要在香港從事物業發展及物業投資、提供物業管理服務及提供融資。

佢唔係全無質素﹐集團規模細，盈利唔多，而且都較波動。

投資價值一般，若你媽媽持貨較多﹐建議沽出部份，換至其他優質股。若只係好小注，勉強都可以持有。

駿傑集團控股(8188)主要於香港從事以下地下建造服務，如隧道建造、地下煤氣管有關的地下公用設施的建造與翻新服務等。

企業規模好細，而且過去多年出現虧損情況，見唔到有投資價值，建議沽出。

------------------------------------------------

Q21660：

如何建立穩定和長久的被動收入？

龔成老師︰

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你現時2X歲，先用優質資產，如有增長力的優質股、物業等，去累積一筆資金。

到有一定數量時，就將佢地慢慢換成優質的收息類資產。

這些收息資產產出的現金流(如租金、股息、利息等)，就是你的被動收入。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21301-Q21320）

Q21301：

龔SIR 我有問題想問

1. 想問股票班，第4堂現金流折現法如果用係股票, 適合用係邊類型股票? 還是呢種方法唔係太適合用係股票?

因為股現金流折現法用係有年期同穩定無增長既資產先適用…

咁股票全部都係無年期, 加上增長率難預測, 咁係咪現金流折現法唔岩用係股票?

2. 另外想問第5堂教的估值法,,合理區範圍要加Buffer,, 想問點計個百分比, 例如合理區係 $100-$200,, 範圍百分比應該係

(a) (100/200)X 100% = 50%
(b) (100/100)X 100% = 100%

3. 都係關於市盈率估值法,,如果某公司佢係行業龍頭, 需要調高10%,,想問係調高佢PE合理區還是計到最尾個Step 先調高合理估值?

參考第5堂Notes P.34, 388為例,,388因為係壟斷狀態, 要調高

咁應該係幾時調高?
(a) 將PE合理區32.7 – 37.7 倍調高10%
(b) 將合理估值加左Buffer 後的 $212 - $298調高10%
(c) 還是無所謂, 兩個是但一個都得?

4. 我用左388 最新數據去計佢個合理估值,.

年度: 2016/2017/2018/2019/2020
每股盈利($): 4.76/6.03/7.5/7.49/9.11
每股盈利增長率(%): -28.96/26.88/24.38/-0.13/21.63

近5年每股盈利 = $6.978
增長率 = 8.76%
有代表性的EPS= $7.53
合理PE = 34.18x to 42.75x
估算合理價 = $258 to $322
因為估值範圍闊度=25% 所以唔洗加Buffer

(a) 想問以上估值計得岩唔岩?

(b) 因為我想增長率準確D, 我用左過往5年增長率相加再除5

[-28.96 + 26.88 + 24.38 + (-0.13) + 21.63)/5 , 得出8.76%,

我想問堂上你話實計既法(複式增長率) 係咪就係咁樣計? 定係我計錯?

(c) 都係關於增長率問題, 我上網睇番”預測每股盈利”

年度: 2021/2022/2023
預測每股盈利: 11.88/13.73/15.64
EPS增長率(我自己計): 30.4%/15.6%/13.9%

我可唔可以用2021既既預測每股盈利增長率30.4% 當作計算有代表性的EPS既增長率? $6.978 x 1.3= $9

咁樣計法會唔會唔準?

(d) 想問估值範圍闊度應該係(322-258)/322 x 100% =20% 還是 322-258)/258 x100% = 25%

5. 第5堂Notes. P.83, 點解公用股可以用PB Ratio 分析? 公用股Average PB Ratio 13x-16x, 大過4x 正常應該唔可以用PB 分析

有勞龔SIR！

龔成老師︰

1) 其實現金流折現法，係最正統的估值方法，基本上係適合於任何股票。

但由於計算上，有不少主觀數字。只要稍有偏差，最終計算結果的落差，係可以好大。

如果你經驗較淺，你用佢來計算現金流穏定，或者資產有固定年期的企業(好似西隧盈利)，係可以。

但若果你想計一些波動性較大，增長力較高的股票，我建議你先用其他估值方法，會較為穏陣。

2) 假如你初步估值得出，合理區係 $100-$200。

你就用佢2者的差額，即$100。再去比對估值中最高價位，即係$200。

以100/200，得出結果係50%。由於合理價格範圍，高於20%，所以你就不用在初步估值上加入緩衝區。

但假若今次，你初步估值得出，合理區係 $100-$110。

以10/110，得出結果係9%，少於我們要求。因此，你要在初步估值上，加入10%緩衝區。

最終估值，會變成$90 - $121。

其實你要明白這個加緩衝區的原理，是希望股價能更有效反映合理區，你不要公式化去用。

3) 其實港交所，一直都係獨市經驗，你用佢過往PE作參考，已經可以。

因為當中已經反映其獨市優勢，不用作調整。

至於所謂的調高多少%，其實是當比較該企業及行業市盈率時，若然這企業是龍頭，若果以行業市盈率作基礎，就有可能調高，但調高多少%，無絕對的，因為最重要是衡量該企業比行業有多強。

4a + b) 我地算增長率，唔係單單用個平均數，而係用過往多年的增長，去計一個每年平衡增長率。

由2016年至2020年，每股盈利大致上升92%。

年度化增長率︰約為+18%
有代表性的EPS= $8.23
合理PE = 34.18x to 42.75x
合理估值︰$281 - $352
由於合理區範圍只有20%，故再加10%緩衝區，估值變成︰$253 - $387

當然有代表的EPS，我用增長率18%，當我地運用時，要理性地分析，往後是否能增長18%，我地不能公式化運用，要明白每一個數字背後所代表的意義。而從18%推算出來的有代表性的EPS= $8.23，由於能有效反映近年的盈利情況，因此，我相信這數字有一定的代表性。

4c) 你都可以參考大行預測，但最好用多間大行的平均數。之後，你可以用佢結果，再更你計算結果，取一個平均數，去作為有代表性的EPS，都係可以。

4d) 以你上述例子，(322-258)/322 x 100% =20%才是正確計法。

5) 由於公用股，主要企業價值，都可以反映在會計資產上。因此，可以用市賬率，作為計算中電(0002)這類公用股平貴指標。

我相信你見到公用股佢PB去到10倍以上，是找錯左數字，你見到的數字，應該不是PB。

------------------------------------------------

Q21302：

龔老師 請教下，0548已過除淨日，係未再回落D再入好D呢

龔成老師︰

首先，你可能對派息運作，有點誤解。好多散戶都會覺得，「除淨日」後會跌，那時候買入就最抵。

其實，這個想法係不正確。

「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。作為投資者，你唔會在此期間前後，去做買/沽貨，而出現任何著數。

所以，「除淨日」只係一個用來扣除派息權益的日子，與你是否投資一隻股票，係絕對無關。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以，但就不要對股價有太大期望。現價合理。

------------------------------------------------

Q21303：

你好阿sir，我已睇左三本你既書，分別係選股、股票同年報勝經

本人都對金錢系統同時間值有概念，識捕捉市場恐慌同熱市同有明確目標6年要有100萬

目前進度用左15個月18萬貨，4萬現金，問銀行借左平loan 10萬等恐慌入市機會

但睇完三本書始終吾識做估值衡量股票平貴

一般既市盈率同現金流折現法都明白，但吾識衡量股票平貴同搵潛力股
求指點

龔成老師：

對，保持閱讀與進步，長遠來說，你的知識一定同財富成正比。

至於借貸投資，則是有危有機，雖然利息不高，但你都要明白，這動作有風險的。我一般較建議「有明顯機會才動用「借」這個最後動用的「皇牌」，在一般情況，不太建議為借而借。

如果你現時已經借了資金，就可以等大跌市時，好好把握機會，但唔好心急動用，寧願輸利息，都唔好心急投資。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21304：

老師你好呀！
請問你點睇1358同2899呀？謝謝你

同埋358

龔成老師：

普華和順（1358）主要於中國開發、製造及銷售再生醫用生物材料產品；輸液器產品；以及骨科植入物產品。

本身業務有點波動，同時未見有好大獨特性與規模，整體的投資價值未算好高。

佢派特別股息後，股價除淨大跌，而派特別股息令佢現金減少，整體企業發展力不強。整體的投資價值唔高。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。

------------------------------------------------

Q21305：

老師，目前只有以下的股:
939@4000,
968@2000,
1177@2000,
1810@1000.
1257@2000

想問1257和956邊隻較好，
睇左老師的書，想入

1317或1569两者選一，
1448，1830，1928，696，1458，老師可以比d建議應該咩組合較好

另外，也想問下老師如何評價558，我見佢都升得多，
謝謝你抽空睇我的留言

龔成老師：

現時持有的組合，基本上都是有質素的股，長線持有無問題，但要留意，當中持有的小米（1810）、信義光能（0968）、中生（1177）都是潛力股類別，這些都是可長線投資，但都不能過度集中在潛力股。所以當你日後增加潛力股時，要留意翻比例及上限。

新天綠色能源（0956）本質不差，值博率會高少少，有一定的增長力，但由於都有一定的負債，考慮到風險因素，現價只是合理區，未算平。

你投資都可以，分注無問題，但由於這企業規模比較細，加上有行業風險，因此唔建議太大注。

至於教育股，可考慮楓葉教育（1317）。

至於另外的5間，都是有質素的，如果想收息及平穩增長，可考慮金沙（1928），如果想潛力，可考慮褔壽園（1448）、必瘦站（1830）（當然這兩股回翻少少就較有值博率）。

------------------------------------------------

Q21306：

老師您好，請問一下必瘦站1830，您如何分析及看好的原因，希望能夠詳細地瞭解一下您的看法。非常感謝您！

龔成老師：

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

這股我自己都有貨，都是長期睇翻，見佢之前的發展一直唔差，加上疫情仍有錢賺，這是加分的地方，你可以推算到，當經濟正常翻，佢的生意一定會唔錯。但近期升了好多，已貴，最好回少少先小注，大跌先正式買入，會較穩陣。

------------------------------------------------

Q21307：

老師我剛開始月供股票，2800 $2000，823/2388各$1500，現在有2個小朋友約10歲，我想將佢地既利是錢用黎買股票希望在佢地成年時已有一筆唔少既錢比佢地繼續投資

如果我用佢地既錢用晒黎買3067長線可以嗎？還是有其他穩陣長線部署？

自己持有
8000 股 1313 $9.34
2000股 358 $16.76
可長線持有嗎？

龔成老師：

你現你月供的盈富（2800）、領展（0823）、中銀（2388），都是有質素的，都可以長期進行。

至於現時持有的股票，華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，你長線持有就得。

至於江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。因此不建議持有太多貨。

至於你小朋友，集中投資恆生科指（3067）不是不可，但就始終有少少風險，要睇你地的風險承受能力。這是一個潛力股基金，當中都是潛力股，回報高，風險大。從你小朋友長線投資角度，不是不可，但就要明白這動作的風險，如果承受風險能力不高，就只宜部分投資這基金，不能全部。

------------------------------------------------

Q21308：

你好，想問下﹐我用個個估值方法對於某d股會偏差好大。

好似我用來計1177﹐佢收入一時可以增長40%﹐一時又得16%﹐今年仲下跌左﹐變相好難預計以後增長幾多%

龔成老師：

當我地進行企業分析，以及進行估值時，最重要是找一些核心因素。

例如你見佢有時收入增長較多，有時就較少，而我地會著重佢長期的收入增長是多少，而不是一年半年。

同時，你不能只公式化去運用，你要懂得將財務數據「意義化」，你要解釋翻，點解佢該年會增長較多，而另一年增長少，當時的大環境怎樣，而將來的大環境發展又會怎樣，從而推算將來的收入及財務數據情況。

因此，你要利用對企業「核心」，及「長期」的因素作為分析點。

------------------------------------------------

Q21309：

龔成老師，如果3067咩價位入比較適合？

175，2600現價可入？

龔成老師：

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

吉利（0175）業績弱將會對股價短期不利，企業價值都有少少影響，不過最重要睇翻長遠價值，吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

中國鋁業（2600）主要從事鋁土礦、煤炭等資源勘探開採；氧化鋁、原鋁和鋁合金產品生產、銷售、技術研發；國際貿易；物流產業，火力及新能源發電業務。

過往的業務與盈利都較波動，反映企業較受外圍價格影響，產品價格自主能力較弱。

質素算中等，現價合理，但又唔算吸引，投資價值只是一般。

------------------------------------------------

Q21310：

啊Sir，多謝你之前回覆，之前請教過你後已減持左一半煤氣轉到9988，同時亦投入左一部分係3067。以下係小弟現時既倉。

想問以下問題:
1. 餘下的煤氣應在那個價位完全減持？

2. 鐵塔長期表現不佳，我應否轉股？如果轉的話那個價位開始減持和轉那一隻股票？

3. 小米和阿里，暫時是我第二、三大持倉，我應在那價位再增持？

4. 福壽園和舜宇光學我非常看好，應在那價位增持？我看福壽園最新業績理想，合理區會由$7上升多少呢？

5. 3067,我在$19.51入市，應該算略貴，我應該如何是好？和在那價位再增加呢？

麻煩晒啊sir

優質股:
1. 煤氣x3,000@$14.5,
2. 銀娛x1,000@$52.25
3. 港鐵x3,204@$38.93
4. 領展x2,137@$62.83
5. 金沙x5,322@$28.78
6. 盈富x2,[email protected]

-潛力股
1. 鐵塔x90,[email protected]
2. 小米x5,400@$25.89
3. 舜宇x500@$129.8
4. 雅生活x3,250@$31.92
5. 中生製藥x12,[email protected]
6. 福壽園x6,000@$7.67, 4.96%
7. 阿里巴巴[email protected]
8. 3067x3,700@$19.51

龔成老師：

1）煤氣（0003）不是無質素的，因此你餘下的貨，持有都無問題。

除非你好想集中資金在潛力股，但其實我又不太建議。

2）中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。

其實只要你持貨不過多，就無問題，如果你較擔心，就賣部分轉其他較有增長力的。

3）如果已經佔有一定的比例，就唔好心急，其實一隻股佔股票組合15%已經是上限，你可以考慮翻這個因素。

同時當你已經持有一定的比例，就更加不要心急加注，小米（1810）最好落翻2成以上，而阿里（9988）就落翻1成以上，先考慮加注。

4）這兩股都是有質素的，但經常都唔平，其實你可以考慮月供。如果你本身有貨，可考慮跌翻1成以上加注。

5）你預恆生科指ETF（3067）合理區頂約在$16/$17，如果低過這價，你又資金足，其實可以慢慢分注買入，以長期儲貨的模式進行。

------------------------------------------------

Q21311：

老師你好！之前因為要買樓俾首期所以將所有股票都賣晒，而家要重新建立股票組合，想再請教一下老師。

三十歲，穩定職業，月入大約十萬，扣除供樓及生活雜費後，每月大概有三萬元剩，打算每月投放兩萬蚊於股票投資，一萬作儲蓄，另外現金有30餘萬打算放入投資市場。

暫時自己選擇了
穩健的包括：

- 美股ETF: VOO

- 創科實業

潛力股包括：
- 小米
- 金沙中國
- 金界控股
- 必瘦站
- 舜宇光學
- 福耀玻璃
- 阿里巴巴

想請問一下老師我的選股是否正確，比例就應該怎樣分配？多謝老師，祝生活美滿！

龔成老師：

基本上，方向正確。

你剛買完樓，可以重新配置個整個財富組合，由於已置業，在之後的配置上，考慮以股票作為增值，是可以的，亦是較平衡的做法。

你所選的都是有質素的股票，都可以考慮，以你30歲的年齡，基本上是適合的，如果你本身有一定的投資實力，潛力股可以去到60%，如果投資實力一般，就大約30%已足夠，你可以睇翻自己的實力及風險承受程度去配置。

$20000作投資（可以利用月供或分注），以及$10000儲蓄，方向正確。

至於現金$30萬，以現時的投資市場平貴，你動用一半資金，以分注模式買股票，可以的。餘下就留現金，去等機會。

至於上述股票，無問題，VOO是ETF，佔比多少少都得，至於其他，就投資適當的比例。

要留意福耀玻璃（3606）、必瘦站（1830）、創科（0669）、舜宇光學（2382）現價唔算平，投資時要控制注碼或回少少先考慮。

------------------------------------------------

Q21312：

阿Sir！好開心我睇完你本書買左1211同1830，都係短時間升左好多

所以1211我無忍得住5手放左2手，不過已經攞返本金。必瘦站就吸收左經驗，無放到，但又後悔無買多啲

我呢種心態係未唔係幾好要改？

另外正題
我股票有

1830,13638股
1211,1500股
0066,1039股
1928,400股
823,213股

全部都係大跌嘅時候買，
所以以家全部都係賺，
但係而家有一個問題，
我唔知可以再買咩

因為好多都唔平，
但係我又唔想月供，
係咪一年只係等一次機會入，
儲多啲錢先？

龔成老師：

比亞迪（1211）同必瘦站（1830）都有質素，同時長遠有發展力的，你餘下的貨，可長線持有。

至於心態，我地永遠無得後悔，投資好需要你理性，因此你平常心就得。

其實，你現時持有的，都是有質素的股票，你持有就得，唔需要太著重當時買入價。

因為最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

至於你唔知可以再買咩，其實，投資不要心急，不要為買而買，要有機會才買，現時大市在合理區，如果部分較貴的股票，就不要心急入貨，但有部分股，其實現價仍可考慮，當然，你要有一定的資金留低，而不是用盡現金，因為以現時的整個大市平貴狀況，你留翻3-5成現金，其實都可以的。

如果你現金較多，可以考慮一些合理，平穩增長股，例如：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果不想月供，就分注進行。

但要記住，留部分現金，等機會，都是重要的。

------------------------------------------------

Q21313：

Hi, 你好. 有個關於轉工嘅小問題想請教下你

之前有間公司, 經agent幾年前問過我有冇興趣一個post, 跟住我話冇興趣, 幾個月前同一個 agent 搵我去interview 同一間公司 一個post,

佢請咗我同事, 佢係 restructure 要攞package嘅人, 跟住依家有另一個 post open, 同我而家做緊嘅嘢差唔多, 星期五agent叫咗我去interview, 星期六朝早收到offer,

佢減咗我3k人工, 大約有 50% 人工升幅, ~10k, 現在我在這間公司做了11年, 工作環境, 老細, 同事不錯, 只係沒有什麼升職機會, 想請教下你的意見, 萬分感謝

因為我公司將會有restructure, 大約5-7月才知道, 請問我應該推掉 offer, 等restructure之後才找工作( 如果真是被裁員), 其實我現在的工作也挺穩定的, 未必會被裁員,

現時3X 歲. Thanks a lot

現時人工30k

龔成老師︰

你可以多從「長期」視點去分析，就工作來說，無論做那份工作，我地的主要目的都是薪金，以及興趣。

你可以想想，10年後你希望自己的薪金如何，職位是甚麼，當你有左這個大方向，就知道這一刻的情況。

因為2份工作表面上，工作內容係一樣。但當中可以學習，進升等機會，相信會有所不同。

你已在現在公司做了11年，應該會了解，5年後、10年後、甚至20年後，你發展會係點。而這個結果，是不是你想要的?

正如你所講，現職地方無乜升職機會。若果你目標係更上一層樓，咁你就要諗下現時工作環境是否真的適合。

如果不適合，我建議你可以考慮一個新環境，試一試。

當然，此前你都可以問下你轉左新公司的同事，了解一下這公司的情況，去再作衡量。

至於裁員會係一個風險，但唔係而一刻你決定去或留的主要理由。更重要係睇長線發展，邊一間先會更大機會發展到你心目中的目標。

------------------------------------------------

Q21314：

龔成老師您好，小弟對派息基金有疑問想請教下您。

留意到XXX有一種叫每月派息兩次既基金計劃，佢嘅做法係首先喺月頭買入一隻係月中派息的基金，等到佢除淨之後，就將舊錢轉落另一隻月尾會派息嘅基金度，

咁就變相一嚿錢同一個月收兩次息。我明白個本金，會因為要派息而下降， 但我留意到佢基金價格都尚算穩定，10年來只係緩慢下降，過往紀錄派息記錄好穩定。

就算基金價格慢慢下跌，但收到既利息係扣除基金價格下降後仍然有利潤 。計劃提及會有每月10%利息。

Btw我留意到XXX有同樣嘅做法，佢自稱一個月可以最多轉四次，但要喺操作上邊好完美先做到。

XXX動力亞洲高收益債券基金
XXX基金 - 亞洲高收益基金

龔成老師︰

首先，你要先了解，到底收息資產，是否適合你自己。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

因此，若你係年青至中年人士，而一刻應先集中財富增值，收息產品並不適合你。相反，你已近退休之年，又或者你係好保守架投資者，將資金投資在收息資產，係可以。

債券和派息基金，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

你以所以提及的，都是收息類產品。XXX派息基金計劃，派息係吸引。但你要留意翻是否全數為「保證部份」，還是會有波動。

而「XXX動力亞洲高收益債券基金」和 「XXX基金 - 亞洲高收益基金 」 ，主要都係投資一些「未達投資級別的高收益證券」。

這類所謂「高收益債券」，即是「垃圾債券」，風險唔細。

唔係話唔可以投資，但你要明白當中有一定風險，而非一個穏陣的收息選擇。

------------------------------------------------

Q21315：

龔成老師，你好!我現時剛出來工作，為專業人士，工作穩定，月入三萬，每月可儲2萬，現暫定每月固定存1萬去股票戶口。暫定來年會用16萬去進修，目標是30歲時買到700萬的樓。

上年開始接觸股票，現時股票戶口有 27萬，分別為
港股 15.6萬
美股 6.7萬
現金 4.8萬

另外有銀行有5萬存款、2萬 ibond及10萬定期 (4月到期)

以下為港股詳情
1. 9988 X 300 平均價:257.3333
2. 00001 X 500平均價:57.6
3. 1093 X 2000平均價:8.5
4. 00003 X 1050平均價:13.7524
5. 3319 X 250平均價:30

6. 6618 X 50平均價:146.
7. 3067 X 300平均價:17.2333
8. 1317 X2000平均價:2.3
9. 3033 X200平均價:8.675
10. 3313 X 20000平均價: 0.1515

問題1: 我打算等3313回去比較高位置就賣出，這做法可以? 除了3313外，想問問上述組合有甚麼需要改進的地方? 我需要多增加潛力股，還是增持現有個股(3319/1093)，或增加現金?

問題2: 9988 佔倉好像比較多，但之後有機會波動，我應趁低吸納，還是維持現狀，甚或賣出一手?

問題3: 想問問我的買樓目標會不會太難達成? 我又可以以甚麼方式加快達成目標?

問題4: 想問問 1523 珩灣科技是否優質股? 因為其ROE在30%升至40多%、EPS、及派息都長期穩定增長，現時PE在15左右，亦不算太高

加上5G時代對其SD-WAN路由器銷售應該起剌激作用，初步分析正面。可是，由於沒有太多大行研究報告，所以不太肯定其預測盈利。

如果是優質股，同時想問問其合理價。

問題5: 想問問6186 中國飛鶴是否優質股? 因為其ROE在這4年都維持在40多%，且5年間淨利率增幅(10.91%  40%) 顯著高於毛利率增幅(54.61%  72.5%)，反映公司有效降低成本及定價。

如果是優質股，同時想問問其合理價。

問題6: 想問問1297中國擎天軟件是否優質股? 初步分析: ROE平均有20%; EPS穩定增長，而2020年度更是有100%增長;

流動、速動比率持續有6以上，反映公司現金流動性甚高; 公司業務(退稅軟件)具低成本，高獲利性，且沒有太多競爭者。

如果是優質股，同時想問問其合理價。

感謝你的回應。

龔成老師︰

1) 雅高控股（3313）主要從事大理石開採、加工、貿易、銷售、商品貿易及貨運、倉儲和物流業務。

公司市值不高，盈利十分波動，質素不佳。企業不斷虧損，無乜投資價值，賣出這股較好。你唔好預佢會升翻好多，因為佢投資價值好低。如果你唔想一次過沽晒，你可以分注咁出都可以。

你才剛踏入社會，算係年青一群。投資上，可以較為進取，以「平穏增長股」 + 「潛力股」作目標，比重大約各佔一半。

ibond和定期這類收息產品，增長力好有限，唔建議用。

至於組合上，你而家太偏重左係潛力股，佢雖然有增長潛力，同時風險都較高，不宜持有過多。

未來時間，你要加大翻平穏增長股部份，令組合更平衡。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

2) 阿里巴巴(9988)成個組合近3成，明顯偏高，有過集中性風險。緊記，相同行業不可佔組合多於3成，而單一企業不要高過15%。

就算佢跌，你都唔好再加注住。到你組合平衡翻，你先再作考慮。

3) 大市過去年平均回報10%計（連股息再投資），你每月投資$20000再加上你現有定期、資金和持股等(約值45萬)，5年後大約會增值至250萬。

相信這筆資金，足夠幫助你置業。

4) 珩灣科技（1523）過往的增長不錯，相信長遠有發展，但公司好細間，一年盈利只有不足美金$1500萬，風險較高，現時估值算是合理，都有潛力的。

若你想投資，可以好小注博下。

5) 中國飛鶴（6186）不差的。

佢係中國從事生產及銷售乳製品，以及銷售營養補充劑，以生產嬰幼兒配方奶粉產品為主，當中可分為高端嬰幼兒配方奶粉及普通嬰幼兒配方奶粉兩大類別。

產品有一定的品牌與市場，同時過往的增長力理想，長遠有前景。

比較大的問題是估值，近期經常在合理區中上部至略貴的水平，股價有時投資值博率不足，因此要注意風險。長線投資可以，但就要控制注碼。

6) 中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。現價其實有投資價值，但就唔建議太過大注。

------------------------------------------------

Q21316：

你好，龔sir ~ 我是在上月開始閱讀「80後百萬富翁」及 「大富翁置富藍圖」。我很後悔現在（30多歲）才閱讀你的書籍，浪費了很多時間。

我現在剛踏入股票巿場，想你幫忙分析一下組合是否合理？

周大富 20% $11入
盈富 25% $29入
海螺創業 33% $36入
太古地產 8% $24入
新鴻基公司 8% $4入
3067 ： 3% $17入

現在有2000是供基金（最少要多供2年，不算之後也會月供），月供$4000 （供2800，1929及 0586）。

另外，手頭有6萬現金，因要讀書。我應該先投資在股票巿場，都要交學費才換回現金，還是先保留？

最後，近來中國都在研究氫能量，請問你對1907 旭陽集團的前景有何看法？我比較擔心佢負債情況，但佢是行業龍頭，加上同地方政府有不同合作，也很吸引。

不好意思，一下子問你這麼多問題，希望你能騰出一點時間回應我的疑問。謝謝

龔成老師︰

你現時持有和月供的股票，都係有質素，適合你這年紀。但緊記個別企業，唔好佔組合15%以上，否則會有過度集中風險。

你周大福(1929)海螺創業（0586）明顯有這個問題，所以你月供可以先用另一隻股票代替。而現貨可持有，唔洗沽出，用新資金去慢慢平衡翻個組合，咁就可以了。

而盈富(2800)雖然超過15%，但由於佢係一籃子股票，而非單一企業，所以比重上係無限制。另外，恆生科指ETF（3067）反而你加翻少少比重都可以，但當然不是一次過加，只是這類ETF，組合佔多少少都無問題。

至於手上6萬現金，如果你1,2年內就要用來讀書，我就唔建議你投資了。因為時間太短，回報不確定性會好高。

中國旭陽（1907）無特別分析，只見之前有些報導。

佢之前公布，澄清最近涉及其於河北省定州市及內蒙古的氫能項目的若干媒體新聞報道，指定州項目試產，並擬於呼和浩特市建加氫站。

該集團指，有關於定州經濟開發區河北旭陽新能源產業園內建設運營氫氣儲運和建加氫站，有關生產基地去年7月開始試產，探索區內在氫能存儲、運輸和燃料相關電池布局機會，開拓京津冀市場等。

至於去年，該集團合營企業與呼和浩特清水河縣政府簽訂另一項氫氣項目框架協議，合作於清水河縣開展氫氣開發項目。

與定州項目相似，該集團將負責於清水河縣進行氫能生產、運輸和建設加氫站，把該市發展為華北地區氫能輸出基地。

只可以話有風險有回報的類別，如真的想投資，一定要控制好注碼。

------------------------------------------------

Q21317：

老師你好，本人24歲，扣除家用每月儲蓄約$15,000(自己較少開支和娛樂)，現金約有$100,000。

目標是28歲前置業，但預計現時置業需$400-$500萬或以上，不知這目標是否在能力和資金範圍內，所以想請教你的投資方向和意見。

股票如下：
0003 11.5，10,000股
2382 175，100股

另外，想問繼續買0003，還是賣出？定轉移集中買其他潛力股如舜如丶中生或小米。謝謝。

龔成老師：

你有4年時間準備，都可以利用投資，去適當利用股票去進行財富增值，到你準備買樓前的一年，就要將股票分段賣出，準備所需的資金。

你可以投資「平穩增長股」，加上小量「潛力股」為組合，助你幾年內財富增值。

煤氣（0003）增長力不強，你不宜持有太多，建議減部分，但留部分是無問題的。

另外，舜宇（2382）、中生（1177）、小米（1810）都是適合你的，都是有潛力的股。不過，你不能只集中在潛力股。

你現時的現金，可以動用$5萬，分注投資。

至於每月儲到的$15000，初期可月$10000去做月供或分注，到後期，就要慢慢減金額。

------------------------------------------------

Q21318：

hello 啊Sir
想問問

#2318 中國平安
#2518 汽車之家
#388 港交所

呢3隻長期持有可以嗎？
合理價大概係幾多？
謝

龔成老師：

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

港交所（0388）絕對是優質股，獨市生意，加上香港的金融中心角色，這企業有長線投資價值。

多年來的生意與盈利都有理想增長，派息不差。

但要留意，由於這股的盈利會受股市成交影響，因此股價都會有影響。

這股雖然有質素，但近年成為市場焦點股，令佢經常處貴的水平。現價略貴，你預回1成較好。

這兩股都好有質素，你月供都得。

至於汽車之家（2518），都有質素的。

佢中國的汽車消費者在線服務平台。根據資料，以移動端日活躍用戶計，在汽車服務平台中排名第一。

透過旗下網站為汽車消費者提供全面、獨立及交互式的內容和工具並為汽車價值鏈的汽車製造商和經銷商提供全套服務。

根據資料，集團是最大的在線汽車廣告及線索服務供應商，就媒體服務及線索收入而言，於中國在線汽車垂直媒體廣告及線索市場中佔據的市場份額約3成。

佢收入源自媒體服務、線索服務及在線營銷及其他。

佢係2008年成立，最開始是一家內容型垂直媒體公司，專注於媒體服務。於 2016年，推出「4+1」戰略轉型方案，打造了一個囊括「車內容」、「車交易」、 「車金融」及「車生活」的平台，從內容型垂直公司轉型和升級為數據和技術驅動的汽車平台。

自2018年起，專注於用人工智能（AI）、大數據及雲技術（統稱ABC）開發全套智能產品和解決方案，透過提供跨價值鏈的端到端數據驅動產品和解決方案，構建一個連接汽車行業所有參與者的集成生態系統。

展望未來，計劃繼續利用「軟件即服務」（SaaS）能力連同核心AI、大數據及雲技術同時進行橫向和縱向擴張。

發展力是有的，但價位都唔算平，如果控制注碼，這股都可長線的。

------------------------------------------------

Q21319：

你好，想請教你，25歲，月入$25000，一直都是月光族
每個月要還卡數$7500（大約仲有1.5年）

但依家想改變，唔想再喺呢個循環，因為經常都會自責、內疚，依家想儲錢結婚、買樓，自覺好似得番好少時間，已經25歲

已報了你的投資班，希望學習投資知識，因為一直都無接觸理財、投資知識。

屋企人有買你的書，應該睇邊本先？

依家我打算先儲蓄、供月供股票，但係我應該供邊隻，同埋應該供幾多錢？仲有d咩可以做？
謝謝你！

之前只在中銀開左個股票戶口，我應該喺中銀做月供股票，定係有其他建議？謝謝你！

龔成老師：

過去的情況無得改變，自責無意義，你只要做好這刻就得，你現時25歲，只要行翻正確的方向，已經比好多同齡的人做得好。

現時，不要再增加卡數，如果卡數利息較高而又可以提高還款，就盡早處理。

之後，就要留有一定的現金，作為備用及等投資機會。

到餘下有資金，可以長期都不動用的，就可以做長線投資。

你25歲，財富有增長力，可投資「平穩增長股」+「潛力股」，在你知識未算高時，潛力股不用太多。

暫時，你可考慮一些ETF，如盈富（2800）以及恆生科指ETF（3067），至於個股，我會建議你上完堂後，先正式加入。

另外，現時大市波動，唔好用盡現金投資。

投資不用急於一時，這是一個長期的策略，所以好多野都可以等你上堂先進行配置。

------------------------------------------------

Q21320：

本人在銀行工作，part-time 要徵詢公司的同意，是不可能的事，但轉工是一個可行方案。不過，本人在這間公司任職，倘餘幾個月，快將7年了！

如果工作屆滿10年， MPF （僱主voluntary 部份）可以拿到100% 。現在要離開公司的話，損失40%, 大概都有幾十萬，唔捨得！

距離屆滿10年，尚有3年多，現在打算好好裝備自己。

老師，我明白在股票投資組合裏要取得平衡，投資增長力較強的股票的同時，亦要投資平穩增長股。

請問如果用7年的時間分別投資平穩增長股及增長力較強的股票，平均7年回報的差距有多大？

龔成老師：

其實我以前都做過銀行10年，我未過試用期，已經出現做兼職了，當然，銀行不會同意，佢地亦不會知。

這當然有風險，但有時做人，又唔好有太多限制思維。

但如果你不想做兼職，當然無問題，只要好好利用這幾年的時間，裝備好自己就得，因為我都睇得出，你的目標是起碼想做多3年，那你就好好利用這3年時間。

如果用7年時間，投資平穩增長股，我假設回報為8%，假設每月投資$10000，預期7年後滾存到$108萬。

如果用7年時間，投資平穩增長股，我假設回報為15%，假設每月投資$10000，預期7年後滾存到$130萬。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。