【國際滑「鐵」盧】港鐵海外投資連番觸礁實錄 #永續港鐵霸權 #7月專研

港鐵公佈2021年中期業績，當中除了顯示一如以往的發展地產業務龐大紅利外，海外投資業務的財政狀況亦十分值得關注，正反映出港鐵投資核心逐漸傾向海外，愈來愈偏移以香港為本位的發展實況。

港鐵自2009年開始運用多年來從香港所得的巨利，向海外市場拓展進軍。然而，檢視十多年來財務報告，可發現回饋香港的「盈利」卻只有蠅頭小利，這間自稱「國際級鐵路公司」在本地已經建立霸權壟斷，但極少提及海外投資策略原來連番觸礁? 一直引而自豪的鐵路加物業模式究竟是一套「完美方程式」，還是一場「國際滑鐵盧」？

▌海外投資「窮忙」

港鐵由2009年起，先後在澳洲、英國、瑞典、中國等地發展及營運多項鐵路項目，由2010至2020年十年間，大型海外鐵路項目數量由2個變成12個。而最新2021中期業績公佈顯示，港鐵將於2021年12月接管瑞典Mä lartå g的營運服務，顯示未來將會開拓更多海外業務。翻查近年港鐵年報：

—2020年海外業務總收入：214億

—2020年海外投資盈利：4.76億 (利潤率只有約2.2%)

港鐵於2020年海外業務總收入超過本地票務收入成為港鐵最大收入來源。然而，當扣除開支成本後，海外投資盈利非常微薄，雖然相對香港業務過去兩年虧損為佳，但仍可明顯見到港鐵一直在「窮忙」。如果從應佔利潤分析，剔除包括物業業務的票務的收入的內地及澳門業務，海外業務營業額佔絕對大多數，達195.92億元，但應佔利潤只有5,700萬，利潤率僅有0.3%。

可見走出國門的港鐵，利潤確實非常可憐，當中依靠墨爾本鐵路項目佔收入最多。而不少項目每年大多只賺幾千萬。而英國西南鐵路項目(South Western Railway)更「損手爛腳」，在2019年要港鐵額外撥備港元4.3億【註一】，連港鐵自己在當年年報亦表示英國及瑞典鐵路表現欠佳。

在「窮忙」財政數字背後，反映的是港鐵不斷「輸出」香港人才、技術及資源的實況。近十年港鐵年報顯示【註二】：

—員工薪酬總額中海外業務開支

2015年：50億

2020年：92.6億

—海外員工人數

2015年：8,157個

2020年：16,921個

—海外業務資產

2010年：87.79億

2020年：332.35億

除了海外員工已佔現時港鐵全部員工近49%外，根據立法會就港鐵公司鐵路業務質詢，顯示港鐵公司於2016年會調動近80名專職支援香港以外鐵路業務的員工，而到2020年已經上升近200名，當中更會調動本地管理及技術員工至不同鐵路城市「輸出」技術，明顯見到港鐵有發展比重愈來愈偏向海外的傾向。

然而，港鐵海外業務亦由於當地的工程延誤、當地基建配套持有人以及疫情影響，而遇到不少阻礙；瑞典斯德哥爾摩的通勤鐵路（Stockholm commuter rail）於18年因當地基建配套問題，就準時度與顧客滿意度承擔重大罰款【註三】；各地項目亦曾出現大大小小的罷工。(已更正此段落關於港鐵海外營動的內容)

隨著港鐵海外投資數字日益飆升，特區政府往往解釋指，港鐵會為海內外的投資額定下風險管理指標。然而，問題在於，明明政府作為最大股東的港鐵，港鐵利用本地業務的盈利去不斷投資這些「冇肉食」的海外項目，也不善用解決本地鐵路營動時所帶來的各種超支延誤加價等民生問題，這是否合乎港鐵以香港為本的定位？當本港業務是由香港市民、公帑補貼與政策傾斜支撐而成，此舉是否有違公共基建「取之於民，用之於民」的本意呢？亦是現時市民對港鐵海外財政運用原則的一大質疑。

▌完美方程式的「觸礁」

「完美方程式」鐵路加物業發展模式一直是港鐵引以為傲的投資策略，2017年時任港鐵主席馬時亨多次接受訪問稱，港鐵本地鐡路「開一條蝕一條」，需積極拓展海外市場，將「鐵路加物業」的完美方程式推銷至海外，「聲稱」會將盈利回饋香港【註四】，嘗試合理化港鐵近年積極開辦海外新鐵路的原因。

2017年港鐵大肆宣傳港鐵鐵路加物業模式進軍海外，連享負盛名的麥健時公司(McKinsey & Company)亦要為其在官網上放上一篇 ”Hong Kong’s successful self-financing formula” 來歌頌【註五】。而其中最受矚目正是港鐵聯合其他外國發展商入圍參與競投成為倫敦尤斯頓車站重建發展項目(項目地盤面積約22公頃)。然而，翻查現時倫敦尤斯頓車站(Euston railway station)重建的項目進度，原來項目早於2019年由澳洲聯實集團(Lendlease Group)中標【註六】，怪不得港鐵沒有公佈後續消息。

港鐵雖一直嘗試向各政府推銷其「賺錢大計」，卻處處碰壁。除了英國外，港鐵的地產方程式在瑞典亦面臨同樣的挑戰。2017年港鐵同時入圍的瑞典斯德哥爾摩城市Upplands Vasby 其中一個市郊鐵路車站附近的重建項目。當時瑞典日報(Svenska Dagbladet)有報章標題亦提及當地專家表示非常喜歡其規劃理念，但時任斯德哥爾摩市議員則表示當地不需中國國有的商鋪，並表明沒興趣向港鐵出售土地【註七】。而時至今日，港鐵仍未見有公佈項目的最新進展消息。另一篇瑞典日報的報導標題亦有提及瑞典國防委員會主席Pål Jonson 希望在外國公司在營運鐵路前要先進行安全審查【註八】。瑞典政府是否會將項目交予港鐵，或需要因應當地的政經考量。可見，所謂「完美方程式」其實不一定通行於國際，當遇上複雜的地緣政治時，就更加寸步難行。

▌未竟北上之路

港鐵國際間推銷「完美方程式」處處碰壁，而中國市場則成為其中一個重要依靠。根據最新2021年港鐵中期業績公佈，港鐵今年3月在中國杭州取得杭州西站南側的建設用地使用權。除此之外，現時亦在北京、深圳及天津擁有地鐵周邊物業的經營權，算是港鐵多年靠攏中國市場的「成果」。

港鐵多年中國投資多個鐵路項目，足跡遍及深圳丶北京丶杭州，某些項目更在兩鐡合併前已經簽署協議。然而，單單中國就概括多達5個城市的鐡路項目，包括北京（4號線、大興線、14號線、16號線、17號線）、深圳（4號線及北延線）、杭州（1號線及下沙延伸段、5號線）、澳門（輕軌氹仔線），各大城市業務總和只佔2020年總海外業務收入約8.5%，佔收入比例則只有約4%。同時，港鐵亦擔任「廉價勞工」不斷輸出技術、人手及資金，換取地方政府的合作機會。早於2017年港鐵在杭州籌備建港鐵學院，輸出鐵路人才返大陸或到一帶一路。此外，北上為配合大灣區發展，港鐵更在2018年順德區陳村站毗鄰綜合物業發展項目【註九】，負責「冇肉食」的顧問技術支援。

即使成功取得上蓋鐵路項目，港鐵在中國要面對的問題仍然很多，發展進程似乎也不太順利。如深圳龍勝站上蓋物業項目「天頌」，作為首個港鐵獨資開發的地產項目，港鐵亦包攬發展商的角色。這有別於叫特區政府送地、交由發展商開發，坐定定等收錢的慣常「二房東」模式。然而，天頌由興建到售銷卻引發一系列工程問題，例如停車場未開放已經出現發霉和積水，住宅內的客廳更是天花板高低不平，地板存在不同空鼓等等【註十】，而有報道亦指天頌地產項目的售樓疑涉貪污問題，港鐵三高層遭解僱【註十一】。至於天津的項目，根據去年年報指出，指由於建造地庫時需進行額外鐵路安全保障工程，北運河站商場發展項目的完工日期已延至2024年，距2017年獲得項目至今已蹉跎7年【註十二】。可見，港鐵北上之路仍非一帆風順，尤其面對現時內房國鐵競爭、中港土地制度差異等挑戰。

可見，相比起港鐵在香港營運上受到政府送上蓋可以保持壟斷霸權，到海外就「見光死」。即使港鐵不斷在海外投入大量技術、資金及人力資源，但每年的利潤仍然少得可鄰。而箇中原因相信跟港鐵海外「鐵路加物業」模式失效息息相關。當港鐵在海外失去政府送上蓋物業發展權的政策庇護，「完美方程式」的鍊金術就會失效，更顯所謂「國際級典範」的港鐵發展模式少有人提及脆弱的一面。

參考資料：
【註一】HK01：港鐵就英國業務　撥備4.3億元 https://bit.ly/2VVPocm

【註二】港鐵2011年至2020年財務統計數字：https://bit.ly/2Uc9sX8

【註三】港鐵2018年年報：https://bit.ly/3jVfKn7

【註四】明報﹕港市場飽和 新線「開一條蝕一條」 港鐵「走出去」 海外盈利回饋本港
https://bit.ly/3CJOfoR

【註五】Ｍckinsey＆Company：The ‘Rail plus Property’ model: Hong Kong’s successful self-financing formula. https://mck.co/3yJB3y2

【註六】 Lendlease Wins $7bn London Euston Project (26 February, 2018). https://bit.ly/3CIPncs

【註七】瑞典日報(18 Augest, 2018). Stockholm behöver inte statliga kinesiska butiker” https://www.svd.se/stockholm-behover-inte-statliga-kinesiska-butiker/om/mtr

【註八】瑞典日報(Svenska Dagbladet) (20 February, 2020). T-banedriften: ”Vi måste vara ytterst försiktiga” https://www.svd.se/t-banedriften-vi-maste-vara-ytterst-forsiktiga

【註九】港鐵2018年年報：https://bit.ly/3jVfKn7

【註十】【曝光】港鐵天頌交樓遭遇“質量門”，“港式服務”哪去了？https://www.gushiciku.cn/dc_hk/101065990

【註十一】立場新聞：傳港鐵一負責內地事務高層捲貪污調查　被即時解僱 https://bit.ly/37CdOdp

【註十二】港鐵2020年年報：https://bit.ly/3jOws7s

港鐵霸權專研系列全部成果一覽：https://liber-research.com/features/07_2021/

研究自主 月捐撐起港鐵霸權專研系列：https://liber-research.com/support-us/

FPS ID：5390547
HSBC PayMe 捐款支持：https://bit.ly/32aoOMn
戶口號碼：匯豐銀行 640-198305-001 (LIBER RESEARCH COMMUNITY (HK) COMPANY LIMITED)
義工招募：https://bit.ly/2SbbyT3

【龔成問答信箱】（Q21801-Q21820）

Q21801：

龔 Sir, 岩岩上完你的投資班，多謝你悉心既教導，真係獲益良多！

我上完堂之後有d問題想再請求下你

1. 想問下「盈利」同「股東應佔溢利」分別在於咩？因為我記得你講過佢地是不同的，尤其想自己計 EPS等等數據既時候應該點揀？

2. 另外見到有同學問你增長率既時候，你用左年度化增長率 (上堂時都唔見你講過）而唔你用複式增長率 (CAGR)去計，想問下應該咩時候用邊個？

因為增長率不同，有代表性盈利可以差好遠

e.g. 388
年度化增長率:
5年增長 (9.11-4.76)/4.76 = 91.4%
年度化增長率: 91.4%/5 = 18%

CAGR:
(9.11/4.76)^(1/4) -1 = 17.6%

感謝龔 Sir!!!!

龔成老師︰

1) 財報上「盈利」，多數係包含「股東應佔溢利」和「非股東權益」。前者，就係股東真正可分到的盈利部份，也是你用來計算EPS用的。

後者，係一些非集團可佔有的盈利部份，這部份會在集團盈利中除去。

2) 其實2者係一樣，個計算方法如下。

(9.11 / 4.76) ，再開方(5-1)，只後將答案再減1，就係得出個增長率+17.6%。

你見之前18%，只係我將小數位進左位，其實背後答案係一樣+17.6%。

------------------------------------------------

Q21802：

龔sir你好，我想請教一下你。我買股票已有一年多，但資產不是升值很多，甚麼很多資金都放在股票裏拿不出來。因此想問下你我而家的投資組合是否有問題：

0005 @800股 (36.28)
883 @4000股 (8.11)
1211 @500股 (192)
2013 @2000股 (12.6)

3800 @1000股 (3.65)
6618 @100股 (110)
9633 @600股 (66)
9988 @100股 (287)

我覺得我買ge股票都好散，每隻都買小小咁，如果我而家加注，應該買邊隻？另外，我亦考慮買一D收息股或儲蓄保險，有穩定的資產增長。

麻煩龔sir有時間可以比Ｄ意見我！感謝！

龔成老師︰

投資股票，就等同買入一間企業，就算再優質的企業，要時間去升值。1年只係一個短期的時間，你唔好預期會有明顯的效果。

我地係投資增值時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時持股，大部部都係有質素和增長力。若你係年青至中年人士，這些股票係合適。

但收息股(包括匯控 - 0005)類，就不宜持有太多，因為佢主要係收下息，增長力較弱，會拖慢你財富增值效果。

"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

中海油(0883)質素中等，不宜持有太多。

其次，我發現你好集中係潛力股類(除了0005, 0883, 3800外)，佢地雖然有增長潛力，同時風險都較高，不宜持有過多。

就算你偏向年青，潛力股都只可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你先要加大翻平穏增長股部份，令組合更平衡。

而持股中，保利協鑫能源(3800)係較麻煩一隻。現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

------------------------------------------------

Q21803：

呀sir! 其實我好認同您 投資係長線 唔係短炒 所以我將來投資果喲優質股 我都會長擺係到 如非必要都唔放

不過 我想問下呀sir 您之前提過升一倍放一半 但如果我只入左一手 放一半會出現碎股問題 甘係唔係代表其實我要係低位入兩手或以上？我用緊富途牛牛做買賣 佢又好似唔比賣一半

另外呀sir 您堂上講到話一隻股票 好似港交所（388）佢既質素甘高 甘佢股價一定長期向上 甘如果我宜家唔入市 將來佢升到好高（假設$600）

甘我係唔係會錯過宜家既入市時機？

同埋呀sir ，我上星期又買左喲新股票，暫時有：
9988@$203 一手
2638@$7.83 一手
VOO @377.04 兩手

我黎緊會繼續定期定額投資VOO 同埋留意大市 入呀sir您上面推薦既優質股 如果長遠甘做 係唔係一個好既投資策略？

唔該呀sir 因為黎緊畢業要搵野做 要係搵野做前學識投資 問既野比較多 唔好意思 唔該您呀sir

龔成老師︰

其實優質股，只要佢一直質素都無明顯變差，我地長線去持有，永遠都係最有利。

而升一倍放一半，主要係比一些較保守投資者，等佢地可以先收回成本。或者一些初學者，佢地未能完全掌握何為貴，才會用這個策略去沽貨。

至於港交所(0388)這類優質股，長線預期係會一直上升。但我地唔可以因為咁，就不理價值平貴，直接入貨。因為若然買貴左，雖然最終都會升，但成個回報就已經差好遠。

因此，我地都要緊守平貴原則，去有計劃地入市。如果你好驚真係會錯失入貨機會，你可以用月供儲貨，咁就可以。但當股價去到異常貴，好似之前比亞迪(1211)成本2XX，就會連月供，都不適用。

而我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你還未畢業，相信是一個年青人，你現時正值財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，應該要進取少少，可以較集中「平穏增長股」和「潛力股」。港燈(2638)係收息股，增長力唔高，你不宜持有太多。

至於其餘2隻，都係適合。但長線計，我地唔好成個組合，只集中係2, 3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

由於你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

將來你投身社會，可能會較忙。但唔好因為離開左學校，但忘記了學習。投資係需要持續學習，提升自己知識，才會做得好的。

------------------------------------------------

Q21804：

你好岩岩上完你第6堂, 好有沖動去用你條FORMULA去中銀網選股, 不過我好貪下, 會先唔用PE

自己篩完一堆搞左兩個鐘之後, 有隻見到好想問下你意見: 8137 - 洪橋集團

另外想問問，除咗你堂上教的公式，有冇一D網站/一條公式岩宜家用可以快搵到D一次性受疫情影響的股票？ 比如之前問你果隻大快活

就會因為PE/ROE問題而篩走左，甘可惜左反而

龔成老師︰

洪橋集團(8137)雖然過到大部份篩選準則，但你要留意佢過往股價都幾波動。

而且，市盈率都一直維持偏低水平，代表市場對佢睇法好一般。你再仔細睇，佢盈利其實主要來自一些公平值變動，唔係實際收入。

因此，佢投資價值，並不如表面睇咁高。

之後課堂，我會教你點睇年報，你就可以理解到，這隻股票箇中問題。

網站方面，暫時我見都係中銀個網會較好用。至於這個篩選並唔係完美，的確會有可能篩走一些優質股。也會好似8137，誤入一些投資價值一般的股票。

但這個已經算係較有效率方法，特別係對初學者，會較易掌握。

之後，你再配合基本面和仔細分析財務數據，已經好大機會，找到一些有價值的股票。

------------------------------------------------

Q21805：

龔sir，您好。我經常留意你的facebook，特別是龔成問答信箱。最近買樓問題很煩惱，可以請教一下您嗎？

本人33歲，先生(33歲)，育有一對年幼子女(幼稚園)，目前2人合共有現金200萬，先生月入5.4萬(5年後可加薪至8萬)，我是sales,平均每月3萬幾，沒有股票、物業。

現在同家人一齊住，大概還可以一齊住5年。之後搬出來，會請工人。我們現打算置業，有幾個唸法:

1. 直接買3房，但只可以買到30+樓齡的舊樓，八成按揭，只可即刻自住。(擔心舊樓不保值)

2. 唔理地區、大細，買400萬樓，5成按揭，放租，之後換樓(擔心之後樓價升，難換樓)

3. 買2房半新樓，八成按揭，即刻自住，有機會再換3房。(都係擔心難換樓)

目前呢5年沒有迫切住屋問題，只是先生錯過左兩次置業機會，擔心樓價再升難而置業，而且即使現在開始供樓，也要供到退休了。現在儲了一筆首期想盡快上車

現在未置業，每月開支約3萬。若置業後搬出來住+小朋友返學，每月開支大約7.5萬

最終目標有一套三房樓自住，有機會再置業作收租用途。請問龔sir我應該點做好

龔成老師︰

以你現時情況，用方法1和2都係可以。

至於3，我就唔係咁建議。因為好多時新樓都會有一定溢價，令你變相買貴左。

方法1，30+樓齡唔一直定無投資和升值潛力，但就好睇個物業本身質素、地區、交通配套、是否大型屋苑等。另外，你要留意佢幾時會做大維修，這個潛在成本，你必需要注意。

至於方法2，都係可以，先買一間較細屋，去以資產追資產，從而減低樓市波動，對你將來換大屋的風險。

但大前題，你這間細屋，都要有一定質素和升值能力，最少升幅能跟大市同步。之後，你再利用月供優質股，去累積更多資金。到有一定數量，就可以入市，以細屋換大屋。

由於這間是你自住屋，所以入市與否個重點位，係你是否"供得起"。只要你確保可以長線都"供得起"，而佢又符合你長線生活所需，咁就無問題。

最後，我建議你置業時候，要考慮埋個財富組合的平衡性，唔好過於偏重任何資產類。否則，會有過度集中性風險。

最好你係置業同時，一定要留一定優質股進行增值，成個組合才算平衡和健康。

------------------------------------------------

Q21806：

Hi 龔Sir, 我想問下美國有機會加息嗎? 如果加息對香港樓市有冇影響？ 謝謝

龔成老師︰

過去一段長時間，全球維持一個較低利率水平。但長遠計，息口必然會重新回升。

雖然，我地唔知幾時會發生這件事，但都要為這個情況，作好準備。

香港樓市現時處於合理區頂，但當出現加息，市民供樓成本上升，必然會直接影響入市資意欲，令樓價下跌。

但我認為香港樓，長期香港樓市，依然會維持向上，好難跌好多。

首先，我用身邊的朋友去分析（因為佢地都是適婚年齡的），我見到一個現象，唔少朋友結婚後，買唔到樓，要同父母用住，這幾年都係咁，而且人數不斷增長。

佢地正在儲錢，正在等樓價跌，只要在適當時機，就會搬出去住，你知道這是甚麼？這就是潛在的購買力，而且不斷累積！

香港樓長期供應不足，需求正不斷累積，這將會令樓價保持向上，跌少少，又會升過。

------------------------------------------------

Q21807：

請問1029鐵貨前景如何？我多年前0.8買入，後來0.3又買，前後有十几萬股，近解套之際政策降温，又面临大股東賣股份……是福是祸，宜守定是宜走换一隻其他的股票呢？

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

鐵貨（1029）經營採礦業務，專注在俄羅斯遠東及中國東北地區開採、開發及經營工業商品項目。

佢擁有多個項目組合，著重於開發礦場、生產及加工鐵礦石及鈦鐵礦，過往業務只是一般，雖然都有生意，但盈利上落較大，有時出現虧損，投資價值唔算好高。

整體分析，只是一般般。賣出會較好。

------------------------------------------------

Q21808：

我有3個問題想請教老師：

1. 新手投資 + 加強儲蓄能力 想問我可以先睇老師邊啲既書藉，除咗實體書，會否有電子書可以係iPhone睇？

2. 關於投資盈富基金既平均買入價, 以下係我唔同時間唔同價位買入，但平均買入價一路上升，請問個原理係點樣，因為越買越貴就唔敢買..

$24.18x500
$27.42x500
$29.26x500
$28.2x500

3. 請問如何計算到宜時既股票屬於貴定平？

龔成老師：

1）你可以睇《80後百萬富翁》
《股票勝經》
《財務自由行》
之後再睇其他。

上述都是最入門及適合你的，另外，我部分書有電子書，如《股票勝經》
https://www.enrichculture.com/products/9789888395767

2）最重要睇長期的，月供往往要5年以上，最好都3年，因此你預需要因為短期的價格上落，影響左策略，只要大方向正確的就得，當然，如果我地評估到現價貴，就可能會減少金額或停止月供，但在一般情況，你保持月供就得。

3）要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21809：

龔成sir,想些問題想請你指敎！小弟剛出社會 有十幾萬美元在投資 我睇左好多關係財富嘅書籍 知道汽車其實係負債

因為會令你現金流出，但我最近對某品牌汽車感有興趣 ，想擁有自己嘅汽車 但我知佢係負債 唔應該擁有 但我真係好中意 每次見到架車 都好想要

但同時又知道唔應該擁有 每次心情都好忐忑 如果係你會點做令自己舒服啲

龔成老師︰

你要分清楚，何謂「想要」和「需要」。

「想要」純粹係你個人感覺，或者想滿足自己一些欲望。

「需要」係有一些客觀因素，你係要持有這個物件，以達成某些實際目的。

簡單咁講，如果你係自顧人士，開車接單送貨。「汽車」就係你生財工具，可以為你創造價值，唔係一個負債。

若你只係覺得鐘意、或者只係想用佢作消閒娛樂，無創造出實際價值，就係你負債。

我唔係話，你完全唔可以用錢，去做一些娛樂性消費，但我地要平衡。最好係先做投資增值，有空閒錢，再考慮消費，咁會較好。

你其實可以用一個方法，就是「定目標」。

例如完成了一個財務目標，例如有$20萬、$100萬等等，你就可以用買車去獎勵自己，這樣就可以平衡，同時令自己更有效追求目標。

我地運用財富的法則，「先增值，後現金流」。

------------------------------------------------

Q21810：

成哥，我本身有留意8473，因為睇佢符合轉主板條件，0.4買左佢，點知港交所轉例，改做盈利要三年8000萬，

而家跌左，我仲未賣，而家心情好灰。

其實我買之前都覺得佢唔係妖股，係靠實力既股票。我個人認為彌明生活百貨管理得好好，我自己作為男仔陪女朋友去呢間鋪都覺得佢好，

另外佢作為零售，在疫市黎講算係好強，加上佢籌備緊做美容院，我個人認為佢會有發展空間，雖然買貴左，但我認為可以繼續持有，呢種心態正確嗎?

我明明有睇你書，但我輸左俾人性

龔成老師︰

你用生活所見，去初步分析一隻股票，係正確。但記住，我地是否投資一隻股票，主要考慮佢長線企業質素。

而能否升主板，跟企業本質無關，雖然轉版能提高了市場價值，但在更多時間，只是炒作，因此，你唔應該作為考量點。而且，這些消息好易相關股份，成為炒作對象，令股價被不合理推高，要小心。

彌明生活百貨（8473）業務不過不失，發展能力中等，不是高增長的類別。

以佢現時的經營情況，算是合理價，但這股始終規模不大，加上近年的盈利有下跌情況，存有風險。投資係可以，但不建議太大注。

另外，政治相關因素，都會令這股波動，要明白股價風險，政治因素是好難預測的。如果你持有太多，宜減。

------------------------------------------------

Q21811：

首先多謝你之前的指導，另外想問1088中國神華及3339中國龍工前景如何，可長期持有嗎？

還有3658新希望服務，剛抽到一手，是優質股嗎？

龔成老師︰

中國神華(1088)始終有一定規模，但政策不是好支持行業，的確會對佢有影響，但已經在股價反映左。

另外，由於佢地的產品自主力較弱，因此不算好高質。所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。

所以整體來講，這股不算差，但又不算非常好，唔好對股價有太大的期望，主要係收息的。可長期持有，但不建議太大注。

中國龍工（3339）主要業務為製造及分銷輪式裝載機、壓路機、挖掘機、起重叉車及其他基建機器。佢的產品有出口至俄羅斯、中東、澳大利亞及非洲等地。

雖然近年生意不差，但以過去5年計，生意與盈利都有波動情況，這點不得不注意。而企業的賺錢能力算是中等。

以企業的質素來計只屬中等，現時不貴，股息率都算吸引，但業務波動是風險，因此投資不能大注。但長線基本上可以的。

新希望服務（3658）係中國綜合物業管理及民生服務運營商。

佢為住宅物業、商務物業及其他類別非住宅物業提供物業管理服務，亦向非業主提供增值服務（包括案場管理服務。現時在管樓面面積超過1000萬平方米，物業管理項目全部位於中國一線、新一線和二線城市。

近年企業發展不差，生意與盈利都有一定的增長，不過，企業規模始終不是好大，獨特性未算強，投資價值算是中等，未算好吸引。

你只係一手，唔算太多，可以長線持有。

------------------------------------------------

Q21812：

老師，想講吓投資以外的事。我今年29歲，本身在一間蚊型工程公司工作，人工比大學同學低幾個point。

不過最近老闆想移民，所以佢想我留低幫佢打理生意，等佢走咗之後生意可以繼續營運。(我原本想完成part time master degree 就揾工)本身公司响香港得3個員工，

啫係我，我上司同埋我同事。上司都有好大機會2年之後移民，之後就應該由我接手大部份公司業務。老闆將我人工加咗50%，

而且會有分紅(公司營利嘅某個百分比)同公司股份俾我地。我諗咗幾日，決定試吓留低，因為我覺得接手一盤生意機會唔係人人有，如果可以學習營運整間公司，

相信都係好難得嘅經驗。雖然老師嘅新書有提及只有辭職並全職創富才是財富增值的最佳方法，但我仍想嘗試一下營運這間公司。老師有何看法呢?

龔成老師︰

其實我覺得係一個唔錯的學習機會，你可以親手營運一盤生意之外，仲要唔係孤身作戰，而係有有經驗架人指點，我覺得有嘗試的價值。

我書中講全職創富，除了自己做生意外，都仲有其他幾個方法。所以，你都要睇翻，自己本身個大方向係點。

如果你係想向做生意方向發展，這個是一個唔錯的學習機會。

加上你現時29歲，最緊要試多D野，保持進步，從你長遠人生的角度，這次是很好的進步機會，會對你成長有用，加油！

------------------------------------------------

Q21813：

你好，我而家計劃緊置業結婚及提早退休

本人28歲 與另一半工作穩定，總月薪約50000，扣除開支及家用，每月可儲25000。

資產方面
- 2層內地二線城市收租物業，總市值約180萬，租金回報約2%。2013年以約40萬購入，預期該地區具長遠發展潛力，每年增值約8-10%，
近年內地樓市升勢強勁，正猶豫是否現時賣出一層套現。

- 港美 優質+潛力股票+主要指數ETF，總市值約40萬，科技類（eg科網、半導體、電動車）約佔40%；傳統金融、醫療、能源、消費品類約佔50-55%；
另外投資約5%黃金、白銀ETF+加密貨幣。持倉變動甚少，期望長期穩定增值10-15%。

- 已累積3年股票投資經驗。

- 現金約70萬（包括應急資金20萬）等大冧市掃平貨

- 負債約10萬

- 已購買足夠保障的危疾、醫療及人壽保險。

目標一：預期在5年內以首置、高成數按揭買入市值800萬內市區樓作結婚自住之用。

目標二：希望40歲前累積1000萬淨資產（當中包括1層香港自住物業）。

我可以用咩方法完成以上目標？
唔該成哥

龔成老師︰

首先，係開始投資計劃前，你要睇翻你負債部份。如果個息率係較高，你要先處理好，否則會拖低長線投資效果。

現時你持有2間內地物業，租金回報率只係一般。雖然你預期有增長力，但由於你計劃5年內要在香港置業，如果再加上這2間內地樓，你成個組合就會偏左係物業類，會有過度集中性風險。

若果你覺得這2個物業，長線升值能力會唔錯，你保留都可以。但往後新資金，要集中係股市，以免太偏中係單一資產類，因而造成風險。

現時你每月儲蓄和現有資金，可以用優質股去增值，為你中短期買入香港物業和長線退休，去作準備。

你可以投資「平穏增長股」和「潛力股」，去創造一個增值平台。你先用每月5成儲蓄，即是用$12500做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，現有50萬現金和每月儲蓄，就等大跌市機會出現，才大力度掃貨，並長線投資。

我假設投資回報有10%（連股息再投資），你每月投資$25000 + 90萬資產(40萬股票和50萬現金)，若你在5年後買入物業(假設你會動用120萬)，到40歲時大約會增值至680萬。

再加上你3個物業，相信都有機會，可以達成1000萬的目標。

------------------------------------------------

Q21814：

現有9988, 700, 388, 有考慮1810, 其他要研究下，總是留不到现金？！

2382, 1177, 2845 可幾錢考慮買入

未有時間可上你堂，你那些書我應該睇呢？

龔成老師︰

你上述的持股，整體都係較有增長力。但你要明白，佢地增長潛力大之餘，不確定性都會較高。

若佢地發展理想，回報當然好。但當發展不似市場預期，股價就會有較大向下調整的壓力，你要主要這個風險。

現在舜宇光學科技（2382）、中生(1177)和GX中國電車(2845)，算係合理區頂至略貴水平。

你最好等佢地回多1成，才開始小注入貨，值博率會較高。

以下是我的13本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）
《80後千萬富翁》（初版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21815：

你好龔成老師，本人最近先開始投資屬於初哥。

現在持有以下股票：
700騰訊 $625 600股
300香港交易所 $459 400股
941 中國移動 $52.8 1500股
1177 中國生物製藥$7 3000股
1810小米 $24.5 400股

請問以上股票是否可以一直持有？

最近騰訊業績是否不大好？

這些股票您有什麼意見給我，可以在什麼地方注意，還請老師指點迷津。

龔成老師︰

你以上股票，都係有質素，但有2個問題，想你注意翻。

首先，你才29歲，應以增值為主。中國移動(0941)係收息股，增長力好一般，不適持有太多。

另外，你而家太偏重左係潛力股(0700,0388,1177,1810)，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。但由於你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

至於現有持貨，由於優質，故不用沽出。只要用新資金，去慢慢拉平均個價，咁就可以。

騰訊（0700）發展正面的，業績都無重大問題。

只是近期中央打壓大型企業，令佢股價較波動。但相信政府，應該唔係想佢地做唔倒生意。只係希望加以規管，在可控和對整體經濟安全的條件，去賺錢。

此股有長線質素無大變，你記住我地投資一隻股票，係睇佢長線質素。一些中短期因素，如果無令佢長線質素轉差，就算股價出現波動，你都唔洗太在意，你照長線持有就可以。

------------------------------------------------

Q21816：

老師，我溫習緊notes，有d唔明

1) 388，823 屬於水桶幾？佢地係特殊例子，高派息率，但潛力較大

我這2隻都持有，比例應該怎樣配置？

2) 原本我一家打算去澳洲，但佢封關，無得入境。

為了移民，於是賣樓，但當時打算入籍澳洲後才買澳洲樓

所以去年10月賣出hk大單位，今年1月時買入hk細單位收租,大約每年2.7厘回報

手持hk 100萬用來買股票，亂咁買左d, 依加上左你既堂，想學習下點樣配置

另外，澳洲封關，現打算去UK, 原因為亞仔升學，因亞仔（小二）越來越討厭返學，亂做功課，成日欠交，但佢好聰明，無乜溫書都有85～100分，只是不適合被填鴨

如果去UK, 用hkd 100萬做首期，還是keep on買股票？

sorry寫得有d亂，因為原本去澳洲移民，依加轉UK...近日都好較心亂

龔成老師︰

1. 港交所(0388)係水桶1，而領展(0823)係水桶2。

一般水桶1，派息比率係應該偏低。因為這些企業，都尚在發展階段，需要保留較多盈利去作發展。

但港交所(0388)由於佢業務性質特別，本身行業又係有壟斷性，唔需要留太多盈利，都可以維持其優勢，因此佢派息比率會較高，係正常。

房托類根據規定，佢必須派出最少90%盈利作股息，因此我地會視為水桶3。但領展(0823)有點特別，佢有別於其他房托，只係用組合物業收租。

領展還會定期翻新有潛力物業，去提升佢價值，從而令租金有所增長。因此，我地會視為水桶2，有派息之餘，都有平穏增長能力的類別。

若你係中年人士，港交所這類水桶1，最多可佔組合40%，若你投資能力較一般，可以再下調。水涌2會作為力，再配以少少水涌3，就算得上係平衡。

2. 當你完成課程後，你可以因應自已能力、年紀和風險承受力，去試下配置。如果不懂定平貴，就先月供或分注。總之，唔好急住去投資，要量力而為。

再有唔問，就係INBOX再問我。

至於，100萬點樣用，我會比較偏向建議你用來在英國置業。

從投資角度，你應該考慮這筆資金的機會成本，投資係乜野地方，先可以將佢係合理風險之下，利潤最大化。

若以香港樓和香港股市做例子，現時租金回報率低，股市值博率較高，故資金應留係股市。

但由於你要移居異地，應該先以安頓好生活，減低不明朗因素為優先。加上英國普遍樓價，無香港咁貴，值博率都會較接近。

因此，如果你找到合符你長線生活需要的自住物業，又可以供得起，咁你置業先係可以。到你未來生活一切安定下來，有閒錢時，才再投資增值。

而一刻，你應該保留較多資金，去處理你英國新生活上的問題。優先從生活上考慮，投資放後少少，我相信會較好。

------------------------------------------------

Q21817：

龔兄(1)千萬富翁本書最尾詳解5條致富方法， 如果我唔跟次序去睇得唔得， 先睇股票後睇其他ok ?

(2) 你嘅書裏面提到有錢人經常運用財富系統[借]去創富, 假設我已經做曬自身風險評估，想問下如果我先買咗自己嘅信貸評級報告，

然後先去銀行或者財務公司，咁樣係咪好過佢哋主動去查我嘅信貸記錄(聽人講畀人主動查好似會對評級有影響) ? 其實喺銀行借同喺財務公司借邊度合適? 如何取捨?
感激解答

龔成老師︰

1) 實戰編，你可以先睇你目標的類型，係可以的。

但建議你最終係要睇晒，有助於你了解和幫自己定位，去計劃將來。

2) 以我所知，銀行定你自己去做評級報告，係唔會有分別。至於借銀行定財務公司，一般銀行利息會低D，而且會較方便。財務公司唔係唔得，但你要了解清楚是否持牌，和產品相關細節。

如果係整體成本較低，你都可以考慮。

通常我自己會視借貸投資，是我最後一張「皇牌」，真的有需要時才會動用，即是見到一個明顯的投資機會，全世界都平貨，值博率好高時，才會動用。

但現時大市只係合理區，明顯未係機會，若想用借貸投資，建議再等等。

------------------------------------------------

Q21818：

你好龔成老師，本人48歲，丈夫49歲，有250萬現金本身做定期存款多年，現在因為冇利息，希望賜教方法，唔想有風險或者超低風險，

有一層自住樓，（欠按揭80萬），有150 萬股票，有110萬銀行保本保險儲蓄，一層大陸順德細樓（已經付全數）50 萬，20萬基金（低風險），謝謝。

我是主婦，丈夫做生意，有一個三歲小朋友，自住樓約值700 萬。

股票包括 5，2018，3175，405，700，270，2888，1733，2318，1800，1833，6088，2314，6127，2845，2812，2820，2238，1658，1186，3800。

龔成老師︰

其實就算投資最穏健和保守的股票，都係會有風險，只會係多與少的分別。

若你係完全唔想承受任何風險，你可以投資定期，儲蓄保險、美國國庫債券、IBOND等低風險產品。但缺點係，佢地增派息率唔高。

以你現時年紀，應該都要做少少財富增長，才算理想。但若你真係唔想承受太多風險，只買上述產品都係可以。

如果你可以承受少少價格波動的風險，你可以將部份資金，投資「收息股」。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

大市現處於合理水平，那250萬資金，你可以先用多50-80萬，以"分注"形式慢慢入貨。餘下資金就等大跌市機會出現，才大力度掃貨，並長線投資。

至於你現有持股，其實好多波動性都好大。以你較保守的投資取態，佢地唔係咁適合你。

騰訊（0700）、平安好醫生(1833)、昭衍新藥(6127)、GX中國電車(2845)、三星中國龍網（2812）、ＧＸ中國生科(2820)都有質素，但係不確定性較大，股價預期會好波動，建議你不要持有太多，甚至將佢地全部換成收息股，或者一些適合你的產品。

平安(2318)、粵海(0270)、瑞聲(2018)、IT HON TENG（6088）、廣汽集團（2238）、中國鐵建(1186)係平穏增長型，波動性會細D，但風險會比收息股高。你自己再衡量下，是否持有，還是同樣換至其他地方。

Ｆ三星原油期（3175）我無對這基金有特別研究，佢係追蹤油價相關的指數。

中短期油價會好波動，風險高。但長遠計，油價唔會好似現時的低位水平。

因此不是無投資價值，但你最好仔細了解這基金和佢追蹤的指數先。同埋，一定唔可以大注。

易大宗(1733)、渣打(2888)投資價值不高，建議換至其他投資項目。

保利協鑫能源(3800)現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

餘下無提及的股票，都係收息股，若你可承受少少價格波動的風險，長線持有就可以。

最後，你要留意持股總數，以你資金收量，組合大約10-15隻股票好了。過多你會好難定時審視和管理，對你會不利。

------------------------------------------------

Q21819：

你好！龔成老師，本人38歲想請教一下如何調整現有投資組合，邊D適合長揸，邊D應該沽出/減持？

股票組合如下：

香港中華煤氣有限公司 (3) 3024股@ 17.30
思捷環球控股有限公司（330）600股@ 50.00
中國建設銀行股份有限公司—Ｈ股（939）3000股@ 8.00
金利豐金融集團有限公司（1031）4000股@ 6.00

工商銀行—Ｈ股（1398）4000股@ 7.00
醫渡科技（2158）1000股@ 65.15
京東健康（6618）50股@ 71.00
阿里巴巴－ＳＷ（9988）500股@ 250.00

另外如果想加入比亞迪電子（0285），吉利汽車 (175) ，阿里巴巴－ＳＷ（9988）作長線投資，現價可入嗎？謝謝老師

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你38歲計，應以增值為主。建行(0939)和工行(1398)只係收息股，增長力唔高，不宜持有太多。

思捷環球（0330）當多年前，環境改變令佢「生意持續下跌」，佢的質素已經改變，佢已經要進行止蝕的動作。

金利豐金融(1031)質素一般，建議慢慢換至其他優質股較好。

醫渡科技（2158）有潛力的，可長線。但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

你現貨可持有，但暫時唔好再加注了。

其餘持股，都係有質素和適合你年紀，長線持有就可以。

至於想再加入比亞迪電子（0285），吉利汽車 (175)，都係可以。比亞迪電子（0285）現價偏貴，回多1,2成才算合理區頂，才可開始小注。而比亞迪電子（0285）現價算合理區頂，無貨可先小注，到有明顯回調，才正式入貨。

阿里巴巴(9988)雖然現價合理，但由於佢已經佔你組合較高比重，個別企業不應佔組合15%以上，否則會有過度集中性風險，故你暫時不要再加注。

另外，你而家太偏重左係潛力股(2158, 6618, 9988, 0285, 0175)，佢地雖然有增長潛力，同時風險都較高，不宜持有過多。

你算年青，風險承受力較高，但潛力股也最多只宜佔組合約5成，餘下應集中係平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

------------------------------------------------

Q21820：

你好，龔Sir, 很後悔不早點認識你的專頁，因為跟住你的投資方法，幾個月已經見到明顯的增長，真心感謝你願意將你的心得經驗不吝分享。

現有一問題在猶豫：（現37）6年前買了一份投資保本的保險供10年（還要供4年）因當時幫朋友無留意回報，現發現每年投入5萬，10年後多1萬，

而且供滿期後再放多5年先會多20萬，現在停供會蝕7萬，但因今年（最遲明年）會置業需要資金，請教阿Sir會如何安排？謝謝

龔成老師︰

我地理財，要做到「攻守兼備」，保險、備用現金等是防守，但防守部分不用太多，餘下資金就應進攻。保險最大的作用是「保險部分」，反而投資作用一般不大，即是買保險，最大作用是醫療、人壽、財產等的風險轉移，將你不想承受的醫療費用等不可預測支出，轉嫁比保險公司。

因此，你要視乎翻你持有的投資保本的保險供，當中的特性，以及本身的預期回報，其中保險的作用。

從投資角度計，你保本保險回報，唔算理想。

同一筆資金，若利用優質股去增值，長線好大機會可以跑嬴這份保本計劃。

當然，你這計劃的好處，就係保本和較有保證回報。而投資股票，股價始終會有波動性，有一定風險。

但由於你係有實際置業需要，而資金又不足，那你只能選擇停供。

以你37歲，應先做好增值部份，我較建議先用優質股增值。但若你係好保守架投資者，買儲蓄保本保險，都係可以，但最好不要太多。因為佢會拖慢你財富增長步伐，你要明白這點。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q14581-Q14600）

Q14581：

你好龔sir，現有以下組合希望指教一下。亦想趁機多謝你令我能夠買到人生第一隻倍升股中生製！！

中生製
3000股，平均4.97

比亞迪
500股+839股月供
平均38.8

楓葉教育
2000股
入手價2.43

港燈
500股
入手價7.5

盈富基金
月供1082股
平均27

月儲$8k至$10k
現時月供$5000:
3000盈富2000比亞迪

想問一問，係組合上潛力股佔得比較多，我需唔需要加平穩增長股係組合入面？但我個人係想盡快增值資產

如果需要的話，考慮到平穩增長股比潛力股嘅入場費都比較高，我應該加大月供盈富嘅金額？加碼盈富去分散風險，還是再加月供$1000另一隻平穩增長股會比較好？謝謝

但我用中銀買股，派息個陣，好似扣左同買股都樣既手續費。。

龔成老師：

你上述持有的，都是有質素的股票，基本上可以長線持有，部分買入價幾好，記得，唔好比短期獲利影響左你，要長線投資。

至於月供部分，都是有質素，可保持月供，不過，潛力股的比例較多。我建議你在之後的增持比例上，增加翻較多的平穩增長股，減慢潛力股增加的比例。

如果考慮入場費問題，建議你加大月供盈富（2800）的金額。

------------------------------------------------

Q14582：

老師，一直以來都有拜讀你的著作，淺白易明，實在造福不少沒有接受過理財教育的朋友。

學生希望以自身個案，得到老師評價及指點。

本人今年26歲，正職為社工，月入為30000元左右，但每月需交家用8000元，自己只有2萬2運用

小弟在一年前開始月供股票，大約一萬元左右：中電、煤氣、恒生、長建、領展都有供 每隻大約2000元

另外本人平日都有兼職外快，每月另增加收入2000元左右，但因為拍拖開支都較大

本人同時發展保險、創立自己公司生意，但都是在剛開始起步。

本人希望35歲前置業、買車，50歲時能財務自由，屆時希望每月有被動收入5萬左右。

我應如何再作準備？

目標上 會否訂得不合理？

龔成老師︰

首先，多謝你的支持! 你現時尚年輕，是有機會達至你目標。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主。你時月供中電（0002）和恒生（0011）都是收息為主，增長力欠奉，唔適合你。你可以將佢地更改為穏增長股︰

盈富（2800）、金沙（1928）、中銀（2388）、港鐵（0066）、港交所（0388）、粵海（0270）或潛力股︰比亞迪（1211），中生（1177）或福壽園（1448）。

策略上，現在你每月可運用的$22000，可以5成去做月供，其餘先儲起，用一邊月供一邊儲蓄的策略。儲起的現金等待機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

假設你35歲提取當中200萬作首期之用，以恆指過去年平均回報10%計（連股息再投資），你每月投入$22000，扣除35歲首期這筆200萬開銷，50歲時大約會增值至1200萬。

你再將此1200萬資產轉換成有5%或以上股息率的優質收息股中，你就可以為自己創造每月$50000現金流。

------------------------------------------------

Q14583：

你好龔成老師，近2年不斷看你的書及YouTube片，對於我在投資市場上增進好多知識，亦對年輕人很勵志！

本人今年27歲，目標想係3年內儲80-100萬，月入約3萬2，可月儲$15K，當中月供$4K 盈富、$2K 港鐵、$2K 恆基、$1K 比亞迪，想問問你對於現時投資方向意見，謝謝你！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主，你現時月供的都是有質素的平穏增長和潛力型股票，都適合你。但要3年達至80-100萬，這需要承受高一點風險，你每年平均回報要15%以上。

而且3年是一個較短的年期，中短期會較受外圍因素影響，因此回報不確定性也相對較高。

我建議你將目標拉長至5年，這樣以恆指年回報10%計，你每月投資$15000，就有機會增直至約110萬，這計劃會較為穏當。

------------------------------------------------

Q14584：

近來有什麼潛力股介紹? 1177是成哥心水, 1789 及3319也可以嗎?

龔成老師︰

比亞迪（1211），中生（1177）或福壽園（1448）這3隻，一直都是我潛力股中首選。

至於，愛康醫療（1789）算是不差，這股有潛力，但規模細，風險會較高，雖然從財務數據睇，佢的賺錢能力不錯，生意有理想增長，盈利增長快速，股本回報率高，但上市年期不算久，這點令過往的數據，未知能否反映佢的真實情況。

因為好多公司都係，上左市2年後，才慢慢見真章，如你投資這股，建議你不要太大注。

雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。加上這企業的背景因素，以及行業的發展，相信這企業的前景不差，有長線投資的價值。

這企業的發展快速，可說是有危有機，雖然可帶動業務快速增長，同時會令企業造成風險，你要明白這點。但這刻都不能叫平，如投資，最好分注投入。

------------------------------------------------

Q14585：

826 天工國際老師點睇 前景如何。上到4.0 嗎

龔成老師︰

天工國際（0826）主要從事生產及銷售模具鋼、高速鋼、切削工具及鈦合金。

按產品組合計，4成多營業額來自模具鋼部份。 模具鋼主要用於模具及壓鑄模以及機械加工。 各式各樣製造業均須使用模具，包括汽車、高速鐵路建設、航空及塑料產品製造等行業。

此企業不是無質素，但是賺錢能力唔算好強，整體質素只是中等。

如果你只是持有小量可以，不宜大注。此股現時市盈率去到26倍，以佢質素而言唔算平，要去到你所講$4，相信比較困難。

------------------------------------------------

Q14586：

成兄，你好，想請教你關於1503招商房托的招股書內容。

1. 想問下附錄一會計師報告I - 9頁的現金流量表，這公司的現金結餘由2017年2億幾大減至2018年的2千萬，主要是什麼原因？

2. 投資活動中的一項「向關聯公司墊款」是什麼意思？

3. 這基金仍是國企招商局集團旗下管理嗎？那麼買這基金無問題吧？

你怎評價這公司的財務報表？

龔成老師︰

1） "現金流量表"包含了"經營現金流"、"投資現金流"和"融資現金流"3個項目，這3個項目變動都會影響到最終"銀行結餘及現金"這個數。

所以，好難講話邊一個單一原因導致少了2億。睇翻2018年，最大變動來自投資現金流中支出了逾11億「向關聯公司墊款」，這個代表集團向招商蛇口輸出了11億元，這個項目算是令現金結餘減少的最大原因。

2） 「向關聯公司墊款」是指招商蛇口的集中資金管理政策，集團每年都會基於為遵守"招商蛇口的集中資金管理政策"，向大股東招商蛇口以「向關聯公司墊款」名目轉撥現金。

3） 關係上有點複雜，房託管理人為招商置地的間接全資附屬公司，而招商置地為於開曼群島註冊成立並於香港聯交所上市（股份代號：00978）的公司。招商置地由招商蛇口間接擁有74.35%的股權，而招商蛇口則由招商局集團擁有64.33%的股本權益。

簡單而言，大家算係同系企業。另外，你見到損益表，佢2016-18純利都維持增長，但留意當中有一個"投資物業公允價值變動"數字十分大，這個是物業本身價值變動，並非實際收益。當扣除後，實際純利其實是按年出現倒退。

你有留意開我POST的話，應該有印象我一向都新股半新股都無興趣，因為真實面要慢慢先見到，加上佢股價十分波動，估值困難。所以最好觀察多一段時間，才作投資決定。

------------------------------------------------

Q14587：

龔Sir 你好, 本人現時30歲, 係18年年中左右成為你的讀者,繼而開始了我的月供生涯, 現時資產為100萬,現金70萬, 股票30萬. 平均月入約45K, 每月大約可儲27K-30K, 並希望2022年底時儲夠180-200萬上車.

我本身月供額為22K, 但最近見市況較為波動, 想調整金額保留多些現金於大跌市時大手買入, Proposed 的新月供額如下

0003: HK$2500->HK$2000
0005:HK$2000->Cut（匯豐和恆生比較, 比較看好恆生其穩定性和發展）
0011:HK$2500->HK$2000
0012:HK$3000->HK$2500
0027:HK$2500->HK$2000
0066:HK$2000->HK$2000
0823:HK$2000->HK$2000
1038:HK$3000->HK$2500
1299:HK$2500->HK$2500
想問

1.以上月供股票選股可以嗎? 會否過於平穩或太集中?
2. 月供金額調整方面OK嗎?

3.現時及調整後的現金及股票比例OK嗎? 如要2022年底前有200萬資產會否很困難?

謝謝老師解答,祝新一年身體健康! 財富更上一層樓!

龔成老師︰

1） 你以上供款組合都是優質股，而且無過度集中風險，但潛力股就欠奉。以你年紀，可以加入一些潛力股如比亞迪（1211），中生（1177）或福壽園（1448）去加大組合增長潛力。

2） 其實"月供股票"就是每月投入相同的金額，買入同一隻或多隻股票，並持續進行。例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

你可以見倒市況當變差，佢會變相買多左股數。反之，市升佢會買少D。就用這種方法去調節市場波動所造成的影響，所以你其實唔需要因為市況波動要去調整你供款額。

而匯豐（0005）只是收息股類，唔適合你年紀，你可以照CUT左佢。

3） CUT左匯豐後，你每月月供金額為$20000和儲蓄資金為$10000。以現時市況計，大市在合理區，你這個比率都可以。

你現有70萬現金可分成2份，頭35萬可用分注形式，慢慢買入優質股。其餘35萬就等機會，當大市出現一定程度的下跌，就可以動用現金去投資，在平宜價加大力度掃貨。

以恆指年回報10%計，你要2022年增長至約200萬是有機會的。但問題是再優質的股票，中短期都會有波動。由今年至2022年只有2年，是一個十分短的年期，所以價格波動迼成的不確定性會好大，佢會影響到你最後回報，你要明白有這個風險。

------------------------------------------------

Q14588：

龔成老師，看過你的股票勝經後，對投資股票多了點認識，去年買入了金沙和置富產業作長線投資。

現在情況是本人36歲，月入20K，每月可儲5K，有80萬現金，20萬股票，分別是置富，金沙，富力地產同豐
可怎樣令財富增值? 月供股可以嗎?希望可以買樓

謝謝老師

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀，應以增值為主。你持股中金沙（1928）是平穏增長型股票，所以合適的。但置富（0778）只是收息類，增長力欠奉。而富力地產（2777）業務都算不差，生意保持理想的增長，但負債問題令人擔心。中國樓市過往向好，利用高負債去賺錢無問題，但當出現樓市逆轉，對佢就有較大的打擊。

置富和富力如果佔你組合比重唔大，可以保持持有。

至於財富增值方面，你可以將你每月儲到的$5000作月供票，平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）或潛力股︰比亞迪（1211），中生（1177）或福壽園（1448）都適合你，你可以從中選1,2隻作月供之用。

另外，現時大市大致在合理區，你持有的80萬現金可分成2份。頭40萬用分注形式，慢慢買入上述優質股。其餘40萬就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q14589：

龔老師你好 我想請教下 htsc 6886依隻股票點樣? 我持有800股 依隻係咪優質股? 如果唔係，幾時先可以賣? 唔該

龔成老師︰

HTSC華泰證券（6886）主要從事證券及期貨經紀、證券自營買賣、證券承銷及保薦、證券投資諮詢、資產管理、融資融券、代銷金融產品及其他業務。

此股質素算是中等，業務雖然有，但賺錢能力不強，唔好預佢有太大的增長力，如投資不多，都可以持有的。

如果要換碼，現時進行就可以。

------------------------------------------------

Q14590：

Hi, 你好呀。想問下
我現在月供1000港鐵（00066）
現有461股,平均買入價43.171

1）現在香港情況，你認為港鐵前境如何？

2）是否應該賣出？還是應該繼續月供？或是停止月供手持461股？

3）香港情況對盈富（02800）影響大嗎？

龔成老師︰

1） 現時社會運作推持了半年，難免對鐵路經營、物業發展和租金收入造成影響。但這個情況不會永遠持續落去，只會中短期影響到港鐵（0066）盈利。

長遠而言，佢依然受惠於其獨特性，本身已經壟斷了全港的鐵路，和未來香港發展都會依重鐵路。

2） 港鐵（0066）長線質素無大轉變，現時無需要沽出。中短期下跌，反而造就你供平貨，所以你保持月供就可以了。

3） 盈富（2800）是包括50間質素不錯上市公司股票的組合，當中包含了香港和中國企業。在香港社運和中美貿易戰影響下，中短期難免會出現下調。

但長遠計，當這些問題解決了，組合中優質企業盈利能力就會回復。所以我地只要長線持有，這些中短期問題造成波動，是否用理會的。

------------------------------------------------

Q14591：

老師，想請問 3333 恆大我29元高位入 已支兩年 想知是否應該現時止蝕離場改買第二隻好呢？

龔成老師：

我先從佢基本面講，中國恆大（3333），佢係中國從事房地產開發、物業投資、物業管理、酒店運營，另外，佢亦有你金融業務、互聯網業務及健康業務。

近年發展不錯，業務有理想增長，同時有相當的規模，這都是佢的優勢。佢一年共有約600個項目，完全或部分竣工，分布於中國各地，根據佢公布的資料，合共有計7225萬平方米。這反映佢業務龐大。

生意不差，企業有賺錢能力，但負債情況不理想，處於極高水平，令這企業存有風險。這是最大扣分的地方。

整體來說，這股都有質素，但就有風險，因此若投資只能小注。

所以，如果你持有太多，建議你賣出部分，如不多，你暫時可以繼續持有，等上多D先賣，只要佢生意保持，相信可以上多少少的，但就要平衡風險。

------------------------------------------------

Q14592：

老師 我今年24歲 月入2萬左右
每月可儲 12000
想開始月供股票
供9000一個月 會否太多

66 $2000
1177 $1500
1928 $1500
2800 $2000
3333 $2000

龔成老師︰

現時大市在合理區，你運用每月$12000可投資資金比例（75%月供和25%儲蓄）都算可以，但你組合就有問題。

頭4隻都是優質股，但如果你想月供埋恆大（3333），我就有保留。

但你睇佢過去財務數據，雖然見到佢生意不差，企業有賺錢能力，但負債情況不理想，處於極高水平，令這企業存有風險。

對經濟好時，佢有賺錢能力。但經濟轉差，物業滯銷，資金鏈出現問題，後果可以好嚴重。整體來說，這股都有質素，但同樣風險也不少。

你可以考慮停止恆大的供款，將投資資金比例變成（58.4%月供和41.6%儲蓄），這樣會更切合市況。

------------------------------------------------

Q14593：

你好龔成老師，我由17歲開始成為你讀者，我現時18歲，讀Year1，5年後月入大約$34000。

現時手上有1手匯豐和2手中銀，月存$3000，想問下老師我應該如何規劃我的長期投資，謝謝你

龔成老師：

匯豐（0005）中銀香港（2388）都是有質素的，不過，你唔應該太集中在同一行業，另外，匯豐的增長力不強，只是收息股，而你這個年齡是增值的時候，因此，未必最適合。

如果你每月能儲到$3000，可以做月供股票，盈富（2800）是最適合的。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14594：

阿Sir, 我之前自己試計2020 估值, 計到過左$60左右已經開始偏離合理價位，我係$70頭放左

之後見佢博命上，想了解原因，因為我暫時未分析到有咩因素會係咁上，亦有可能自己分析錯左~
阿Sir請指教

龔成老師：

首先，安踏（2020）係有質素的股，有潛力，這書在《50股》已講，由於有發展，因此，就算長期或永遠持有都得。

至於估值方面，由於佢增長力強，因此我地會多用預測的模式，你要預測一個較能代表到企業之後情況的盈利。

就以最簡單的預測市盈率計，現時約35倍。

當然，我地會以保守作原則，因此這股現價有少少貴，當你見到$70，少少貴，如果無貨，不應在這位入，但如果你之前有貨，由於佢有質素，有發展，因此，繼續持有無問題。

同埋，唔好太著重中短期的分析與投資策略，要長線。

------------------------------------------------

Q14595：

老師你好，希望可以得到老師嘅回覆。本人37歲， 現時60萬現金， 每月可儲三萬。

由2020年1月開始每月將做一萬蚊嘅月供股票。

參考咗老師平時嘅推介， 將按下面比例月供股票， 不知月供股票數目(6隻)會否太多? 按此分佈是否適合?

盈富基金 $4000
金沙 $1500
領展 $1500
長建 $1000
比亞迪 $1000
中生製藥 $1000

人到中年, 但手上資金不足， 希望在2020年開始努力增加自己嘅資產， 可以盡早財務自由， 希望可以得到老師回覆！謝謝！小讀者上

龔成老師：

以你現時的年齡，其實財富仍是有增長能力，但就不能太過進取，你投資平穩增長股+小注潛力股，是可以的。

你上述月供的股票，都是有質素的，資金分配方面無問題，其實6隻唔算多，不過，每月的金額就會有點少，怕要儲較耐才有一手貨，但如果你是長期月供的，其實無問題。可以進行上述的月供。

如果你現時無其他股票，其實可以將$60萬，投資部分，如$20萬在股票，如果你投資知識經驗不多，就加大月供金額至$2萬，原理是慢慢將資金轉為股票。不過，就點都要有現金剩。

其實，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14596：

龔Sir，請問03993/洛陽鉬業＆00347/鞍銅股份，

1）現股價合理嗎？是否優質股？
2）如作長線投資可以嗎？
3）如2選1哪隻比較好？

謝謝！

龔成老師：

1）洛陽鉬業（3993）並不是完無質素，但不能說是穩健，佢的營業額同盈利都十分波動，這點令分析佢較困難。因為好難確定到往後經營環境對佢的影響，同埋，佢亦因成本令佢盈利較波動，這同樣是較難預測的。

我地好需要，用過往的數據去分析，同時判斷往後的經營環境，如果過往數據變化太大，會較較分析。

另外，這股的股價較為波動，加上曾經有段時間比散戶熱炒過，都令我對這股的趣減左。這股不是不能投資，但不建議大注。

鞍鋼股份（0347），本質屬中等，但有較受大環境影響。

佢始終這只是商品企業，沒有一些太大的優勢。近年盈利上落較大，難以達到穩定生意與盈利的投資擬標。所以整體的投資價值只是中等。雖然這刻的股息率不差，但下年有機會因盈利回落而略減，要注意翻。

持有這股不是不可，但就不建議持有得太多。

2）都可以，但不建議注碼太多。

3）兩隻的質素都不算太高，如要2選1，鞍鋼會穩陣少少。

------------------------------------------------

Q14597：

老師你好！我有一手0027銀娛在$48時買入，現在看到重上$60，應該賣出嗎？

雖然一直以老師所教的方式月供，卻拿不准該什麼時候賣出，尤其是潛力股。賣出後也不知道換成什麼股票好，潛力股中我仍在月供比亞迪、中生和石藥。

假如真的賣出，我應該再投資另一隻潛力股還是加大其他潛力股的月供金額？

另外我剛賣出0006電能，打算換成0405越秀現價$5.3，不知道老師覺得這樣好嗎？還是有其他更好的收息股可以推介(已在月供1928 2388)？謝謝！

龔成老師：

銀娛（0027）是有質素，有增長力的股票，就算你繼續持有都無問題。當一隻股票有質素時，我地唔會急於賣出。

一般來說，決定賣出股票，都基於這3個原因：

第一，企業質素已變。

第二，股價升得太多，價格遠超其合理價值。

第三，你找到另一筆明顯更高回報的投資。

就現時的情況來說，未有明顯出現上述情況，所以你應該持有。

至於你賣出了電能（0006）的資金，你可以投資越秀房產
（0405），現價在合理區，你可以分注投資，長線持有。

------------------------------------------------

Q14598：

龔老師：之前請教過你
你建議我可以每月供盈富基金＄１００００
但我有一個問題想請教

因為我有７０萬是在按揭戶口收息，月息約＄１３００
若動用入面的錢去買盈富基金，影響每月按揭戶口的利息收入

但我又唔知月供盈富基金，是否能優勝過齋放７０萬係按揭戶口？

龔成老師：

其實，這正正是回報的比較。

我當你現時有一筆現金，你如果存於高息戶，等於對沖按息，就是等如該筆資金得到了2%多的回報。

如果將這筆資金投資盈富（2800），每年收到的股息，就有約3%，同時有潛在增長力，根據過往多年的數據推算，盈富長遠都是向上的，連股息的預期回報為8%-10%。

雖然盈富的預期回報較高，但盈富始終有不確定性，所以，要視乎你自己的風險承受能力，而投資投資與否、投資多少。

如果你是長線投資，承受風險的能力為中等，你可以將其中$15萬盈富，分注去入，已經是一個平衡的策略。同時，你可以考慮將另外的$15萬，投資收息股，以低風險的情況下得到5%、6%股息，這都是不差的配置。

------------------------------------------------

Q14599：

老師，我係你學生，看過你介紹六福590的文章，我嘗試比較幾間香港珠寶公司及看其年報，想請教幾個問題

1. 財經網站公佈的數字（ROE, 存貨周轉日數等）與年報有出入，我應該以年報公佈的為準嗎？為何有這樣的出入？

2. 六福201819年報中經營現金流出現負數，我嘗試從註解或管理層分析中找原因，但找不到（不知道是不是自己問題），請問你有留意到嗎？

3. 周大福1929連續幾年派意比率超過100%，是不是動用自己資產維持高息留住投資者一例。而且，其年報公佈的派息比率撇除了特別息計算，只有7X%，感覺好像有意隱瞞。請問我想法有錯嗎？

謝謝你

龔成老師：

1）年報是最準的，部分財經網站是人手入，可能有差別。同埋，有時可能在程式上略有不同，例如年頭年尾，平均數等。

2）如要是存貨增加，因為生意轉弱，同時之前入貨多左，而佢一向的存貨週轉日期都好耐，因此當佢有這情況，就會令現金流減少較明顯，因為佢存貨佔資產的比例多。

不過，由於對六福（0590）本說，不少存貨，都是有價值的項目，所以唔需要太擔心。

3）周大福（1929）的目的，是保持派息，因為保持派息政策，是不少大企業都會做到，這可以維持長線投資者、基金的持貨。

至於特別股息方面，我相信只是小問題。

------------------------------------------------

Q14600：

大師，1316耐世特 6.9買入了
有冇咩睇法呀？

龔成老師：

耐世特（1316）的基本面，算是不過不失，佢係轉向及動力傳動產品供應商，主要產品包括轉向系統（電動助力轉向機、液壓助力轉向以及轉向管柱），以及動力傳動系統。

佢的產品可用於小型客車至全尺寸貨車等各類汽車，由於佢出口至美國、墨西哥、加拿大、歐洲等地，所以貿易保護主議會對佢不利。

不過，行業較弱，及競爭加大，都對佢不利，佢早前公布的業績，其實有點弱，但又唔算好差。

這股現價合理，但就未必值得投資太多，因為質素始終不強，你持有可以，但不建議增持。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。