當全世界都只講一種語言（下） . 我甚至開始懷疑，保衛每個國家嘅語言，真係好過地球語？ . 喺我最迷茫嘅時候，天神賜我一張「穿越一日遊券」。 . 我決定去一千年後，我想知道，一千年後，到底大家係講緊地球語，定係各自嘅語言？ . 如果大家都講緊地球語，仲生活得好幸福快樂，就證明我做緊嘅嘢，完全無意義。 . ， 瞬息間，一千年後。 . 我試吓向我遇到嘅人講地球語，但佢哋嘅反應好奇怪，好似聽得明明少少，又有啲驚喜咁。 . 我再講番中文、英文，佢哋就完全明白晒。 . 我心中一陣狂喜，唔通「保衛語言大聯盟」成功咗？地球語真係無取代到其他語言？ . ， 同佢哋溝通咗一輪，我先慢慢拼湊出個真相。 . 原來，地球語好快就取代咗其他語言，成為世界各地嘅法定語言。 . 但係天下大勢，分久必合，合久必分，地球語講耐咗，地域差距，又令地球語產生咗唔同嘅變化。 . 總之統一嘅地球語，又變番分開嘅語言，再加埋各種「復興舊語言」運動，以前嘅中文、英文又出番晒黎。 . 但分開嘅語言用耐咗，大家又覺得唔方便，計劃推行一種「世界話」。 . 佢哋想參考地球語，去發明新嘅「世界話」，但地球語已經係幾百年前嘅歷史，歷史學家拼拼湊湊，都只得出個大概。 . 於是，佢哋見到識講地球語嘅我，當然好驚喜。 . ， 一千年後嘅人，半請半捉咁捕獲咗我，逼我教地球語。 . 我寶貴嘅穿越廿四小時，就用咗黎教佢哋地球語，唉。 . 一路教，我一路諗，到底我仲應唔應該保衛語言？就算明知係徒勞無功？ . ， 臨走前，我忍唔住問果班一千年後嘅人：「你哋咁辛苦搞『世界話』，如果一千幾百年後，『世界話』又消失咗，仲有咩意義？」 . 其中一個人答：「你識唔識講秦朝嘅語言？」 . 我搖頭。 . 「咁咪係囉，咩語言咩文化，到最後都會消失㗎啦。」 嗰個人擺擺手：「覺得應該做嘅嘢就去做，問心無愧咪得，諗咁多未來都無意思。」 . ， 我呆咗。 . 返到現代之後，我繼續搞「保衛語言大聯盟」。 . 我哋做咁多嘢，都係講為咗未來。 . 但其實未來係點，大家都知，就係你守護嘅、對抗嘅、愛嘅、恨嘅都會化為烏有。 . 再重要嘅文化都會變成歷史，然後湮滅。 . 但呢一刻，有啲嘢你想做、你覺得應該做，咁就值得做。 . ， 我明白咗呢個道理，但我喺我以前嘅講稿度，居然發現咗呢段說話。 . 係喎，呢啲道理我唔係應該一早就識講㗎咩？點解我要浪費一次穿越去明白一個道理？ . 唉，早知就去穿越中注六合彩啦。 . －完－ . #短故 #短篇 #小說 #陳美濤 #廣東話 #粵語 #tomatochan #當全世界都只講一種語言

* 講幾句《真•三國無雙》 (含劇透) - 唔誇張，就唔係無雙 ! 如果香港電影嘅上半年， 能夠接近大眾嘅焦點， 係《一秒拳王》 ; 咁下半年嘅關鍵， 幾可肯定係《真•三國無雙》! - 由夫妻檔周顯揚導演，杜緻朗監製雙劍合壁，喺《殺人犯》嘅陰霾之下，再加埋一系列鳩鳩哋，又疑似貨不對辦嘅人物造型之下，其實我一早已將套戲列為笑片類別，但估唔到電影不論喺劇情上、製作上、動作設計等等嘅方面，都有出乎我意料之外嘅認真。 - 睇每一個角色出無雙 係一種享受; 但如果連續睇兩個鐘無雙技， 就係一種折磨。 - 一隻Game點樣改為一套電影，出事居多，但《真•三國無雙》有《三國演義》嘅文本盛載之下，再加埋觀眾對三國故事既有嘅認知，可以自行腦補人物關係故事內容，劇本反而就無太大嘅問題，甚至有文戲主導嘅傾向，幾個關鍵角色，只要揀返一兩件佢哋嘅重要事件，就可以勾勒出人物豐富嘅性格。 - 例如武聖關羽嘅溫酒斬華雄、三姓家奴呂布殺義父丁原、亂世奸雄曹操誤殺呂伯奢一家、三英戰呂布、洛陽大火、煮酒論英雄，基本上電影就係以一關關/一場場熟悉嘅歷史事件構成，兩個鐘嘅時間，由蒼天已死、黃天當立，去到州牧割據，三國時代嘅開端。 - 入場前最大嘅期待，係隻game入面打贏對手就會講嘅一句說話[dick 儍 doctor lee !!]，一套廣東話嘅作品無尼啦喂爆一句日文金句，一定全場爆笑。 - 但通觀成套電影，竟然無呢句對白嘅出現，點解呢?當中當然可以有好多可能嘅原因，但依我嘅見解，團隊想拍嘅，可能係一套真嘅電影，而唔係單靠Gimmick而拍一套鳩片，因為，一句日文對白，可能就足以打破成套電影苦心營造嘅認真感覺。 - 而將《真•三國無雙》再觀照而家靜待黎明嘅香港電影工業，已經幾耐無出過一套似樣、無因為群星有啅頭就hea，呃你入場嘅娛樂大片?對上一套咁嘅戲係乜? 我已經講唔出。 - 誠然，香港票房幾高幾爆都好，對住呢種億億聲嘅大製作，佢係合拍片要上大陸，甚至賣埠面向世界，係必然嘅事。但合拍片唔一定要柒，唔一定係左抄右抄，唔一定要係主旋律，喺妥協嘅夾縫中仍然能夠滋養亮麗嘅玫瑰，呢個就係香港電影人嘅韌性同能力。 - 未來仲可唔可以有具質素嘅大製作?我唔知道，睇得一套得一套，但香港人仲拍到《真•三國無雙》，對我嚟講，已經係香港人嘅驕傲。

好啦，可能係最後一次擺市集。 話說我上個星期諗咗好耐擺唔擺市集，但我諗緊嘅時候已經三月中，三月又係忙到嘔白泡嘅月份（一至五實習星期六返全日學），加埋月尾呢排又有好多人生日⋯⋯仲要擠時間預備市集真係玩自己。最重點係我本身已經係窮L，實習同返學用晒我嘅時間，冇時間返工加埋實習啲交通洗費⋯我本身賣啲野又十幾蚊至幾十蚊，要cover返租金真係淆底了，所以冒住蝕錢嘅危機報市集真係分分鐘擺完變咗大窮L🤣但最後，我都係覺得就算蝕錢，都想報市集。 點解會咁決定呢？我都諗咗好耐。但我心諗：下個月就要醫管局面試，幾個月後就會開始RN忙碌人生，加上最初頭好難適應⋯之後嘅生活應該都幾大壓力，可能都冇咩心力經營呢度。所以我好想趁我仲叫做有心少力嘅時候，做自己想做嘅野。好想可以面對面同你地交流，想分享我嘅創作，想唔理咁多現實嘅限制做難得地令我有啲熱誠嘅事。而事實係，為到市集畫新嘅作品嘅時候，我久違地喺畫畫裡面感受到快樂，嗰刻覺得雖然有啲吃力同辛苦，都好值得。 其實日日PAPA真係攰攰地，放工都想抖，冇乜時間準備啲咩，但都畫咗幾款新postcard：香港人系列全部市集限定，唔會再特登印🤮；仲有粉色嘅無敵破壞王postcard，我自己好鍾意；另外仲有之前剩低嘅舊款，會用清貨價發售～啊，仲有之前出嘅廣東話同旅行家貼紙都有得賣。 因為驚冇乜野賣，我仲燒肝地畫咗少少現貨schedulebook（其實暫時剩係畫咗兩本，但會盡力畫下大家story俾嘅idea）。期望可以畫幾張現貨黑白心意卡，有想我特別畫嘅野可以覆我story嘅問題。畫唔切嘅話到時會帶啲卡仔去，到時即刻畫幾張人像/你想我畫嘅野。 最後，我仲好傻仔地印咗少少我自己鍾意嘅野。之前喺度分享過幾幅同病房經歷有關嘅插畫，我特登揀咗四幅來印成卡，背面係手寫嘅病房經歷分享（發現我啲caption真係好l多字，抄到我手軟先發現唔夠位，又要再cut字數重新來過，應該冇人會做啲咁晒時間嘅野⋯⋯）。純粹覺得想有實體一張張卡，等大家可以攝喺書呀schedule入面，間唔中攞出來睇下，可能會有被治癒嘅感覺。仲有Self Love漫畫（呢個係我近期最鍾意嘅作品，所以特別想印幾張），背面會隨機寫啲quote畫啲小插畫，應該係好鍾意我啲畫嘅人先會買嘅野🤣。 好啦，其實我仲畫咗一款新貼紙，我自己畫完都好鍾意，同埋對我來講好有特別意義，但你喺呢張相唔會見到，因為我都未肯定趕唔趕得切市集完成～話說我上個星期畫完就sd咗個設計圖俾一間印刷鋪，點知對方收到email就話我知「睇完個設計圖嘅內容，公司未必印到」🥺嗰刻我先意識到，原來宜家真係唔可以再自由創作，有啲內容係唔印得。但嗰個員工都超好人，特登話我知兩間佢認識有機會可以幫我印嘅印刷鋪，最後我就成功揾到鋪幫我印喇～但因為時間勁忟，應該要星期三四先攞到實物，如果加埋包裝⋯⋯四月一放工應該要搞好耐🥺但我希望印得切啦，因為我真係好想好想可以同你地分享呢個構思同設計，好想好想呀。 好啦，咁長氣應該冇人睇到最後，都係快啲講重點。市集會喺復活假期2-4/4（我仲未肯定擺唔擺埋4/4🤮），喺觀塘興業街四號八樓THE WAVE舉行，入場係免費架！入場係免費架！入場係免費架！市集搞手花咗好多心機籌備，加埋同場仲有好多好有心嘅同路人小店，希望大家一齊支持同路人啦。 到時來探下我啦，我會好滾動架。雖然所有野都會好簡陋（我諗住將所有野攤喺枱面，連陳列架都冇，擺一次就唔特登買😖），但絕對係一個有內涵嘅攤檔🤣um，講完有少少心虛。 仲有一個重點，過去賣香港人系列嘅作品都會寫明每張卡賣幾錢捐幾錢，但今次我唔會逐樣咁樣計同列明喇，因為計數嗰啲真係好花時間⋯可能你會問咁我啲收入會唔會捐出，但我直接咁講啦，因為今次啲成本都好高，我都冇信心唔蝕錢，所以我會搞掂好自己先再捐錢🥺希望大家明白啦，如果有follow開我應該都知道我係咩人～每次義賣記錄我都盡量清晰、透明度高啲咁樣俾大家追蹤返（link in bio）。我都有諗過如果我唔係全數捐係咪唔好有同抗爭有關嘅創作出現喺個booth會好啲呢，咁樣就唔駛驚人話我食人血饅頭；但我都係畫咗少少呢方面嘅作品，因為我除咗想創作自己鍾意嘅野，都好想有更多令香港人有共鳴，可以留為紀念，印證呢段歷史嘅創作。所以放心啦，如果有得賺，我實會盡自己嘅力量做我能力範圍可以做嘅事。 好啦，宣傳完畢。多謝你睇晒。#staycutemarket2021