［藺相如，司馬相如，名相如，實不相如］（＊）咪講笑！同Freddie Mercury同Billie Eilish 齊名！獲得誠品認證！我是一個文青！

TLDR：屯門牛呢，真係睇好嘢都慢人一步，睇戲又多垃圾。所以要有馬蘭頭獎學金

1. 實情係屯門誠品，已經有貨。都話日日去睇，我仲發現搬咗位，原本係在啲財經書度，而家已經literally 「上神枱」，同Freddie Mercury同Billie Eilish 齊名！雖然暫時我都未見有任何人拎起嚟睇。實情咁耐以嚟都冇！

2. 又，真係的，明明銅鑼灣，太古同尖沙咀誠品都一早有，屯門就要再遲啲。真係鄉下地方資訊不便。「啲小朋友都要遲兩個星期先接觸到啲高質毒物」。

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

3. 你真係唔好睇少呢樣嘢，What we talk about when we talk about 村上春樹？好多人都知道佢開coffee shop/酒吧，收工在廚房寫嘢。亦都有啲人聽過個契機係明治神宫野球場（我都去過朝聖），養樂多燕子隊

4. 但再之前呢？村上春樹係關西人，京都伏見出世，但神戶讀高中。佢唔止一次提過，神戶改變佢好多。神戶係個海港，易接觸外國文化（你見仲有異人館），佢就在嗰度睇好多西洋文學。

5. 我話睇書都慢人兩星期，當然只係講笑。「而家屯門都有Donki」「仲有Mirror」。但，你可以留意下，屯門戲院（屯門戲院並唔單指「屯門戲院」）上嘅戲，都真係同「市區」唔同。唔通會上《惡與他們的距離》？主要都係上「長相屍手」之類。有人話歧視，有人話市場考慮，「啲屯門牛就係睇垃圾」，乜都好，客觀結果都係一樣。喂，呀影帝林家棟，都公然恥笑去巴倫紐睇戲嘅人啦。2015年咋喎，香港人好尊重本地電影咩？（而不幸地，套《點對點》我都有睇，但居然唔係在巴倫紐！正如導演話頭，根本巴倫紐冇上呢套戲，全新界得葵芳新都會上，我就在嗰度睇）

6. 你都唔好話冇影響，我講兩件事你知。第一，好少同人講，當年我買樓，係有諗過買駿發花園嘅。咩話？駿發花園在邊？點解我會想買？「駿發花園咪會樓下上《惡與他們的距離》」。最後點解冇買？唔係因為冇錢（我有咁窮？況且我講緊2013年），而係因為懶，同埋我諗真啲，「我買完百老匯電椅中心搬走我咪仆街？去廟街聽數波波定食煲仔飯？定學麥路人郭富城咁去聽楊千嬅唱歌？」。第二，當然係因為我懶。租開我老母（真係我老母，唔係助語詞）屯門嗰樹好地地，咪買埋佢。係呀，買架，咪撚以為佢送畀我。電視框？框你老母（呢度就助語詞）。創屋苑尺價新高添呀！虎毒不吃兒呀。「不過冇人拎支槍迫你買」「況且之後都升咗好多」「所以真係唔使怕高追，咪縮數話咩等調整」

7. 一念任天堂，一念海天堂。一念八天堂，一念朱天堂。如果我當初買咗駿發花園？而家我係咪好有文化我就唔知，「但應該執多幾球嘢」

8. 講返，我變成「港片之鬼」，你估係偶然？並唔只係因為我細細個鍾意睇港產片。喂我年代啲小朋友，個個細個都睇港產片架啦，但大咗佢地自然就會覺得好check，我溝過N條港女，都以自己唔睇港產片為榮，我最鍾意都係我問佢睇乜戲，答曰「我個人冇乜所謂不過唔睇港產片」，充份反映到港女嗰種自以為嘅優越感同懶撚係considerate，多撚謝喎。不過我都冇諗住同佢去睇港片，因為我主要係為上床。到後來睇港片先有得上床，就係後話，只能講句十年河東，十年煩西

9. 我之所以到中學都不停睇港產片，主要係因為一個人。他的名字叫徐一刀。四十歲以上嘅麻甩佬應該聽過。根本就係香港全裸監督村西徹，佢進軍海外時吳宇森都未去荷里活。佢就係自己親身上陣，同「五十嵐」一齊拍愛情動作片

10. 但關我乜事？我又唔係蘇B（一個徐一刀有份用嘅演員）。主要係，徐一刀係我同學嘅舅父。咁佢就畀好多免費戲飛我地睇，當然唔係睇佢嘅戲（當時我中二咋），而係可以去睇任何戲。我唔知係咪只係港片，但肯定嗰時咩 凱都呀， 巴倫紐呀，仲有「屯門戲院」，都好多時係上港片。

11. 我仲記得我第一套用佢嘅飛睇嘅戲，就係《水滸傳之英雄本色》，李克勤唱主題曲，梁家輝做林沖，徐錦江做魯智深，劉青雲做大茄，但最正係豹哥單立文做高俅個仔去淫辱林沖老婆王祖賢。

12. 另外仲有《風塵三俠》（梗係柏安妮嗰套），仲有套日本人拍但廣東話配音嘅《三國志》（1990年代初，已經好過《三國無双》N倍，可見周顯揚真係食撚屎的，係呀，我又要好波過美斯先可以評論？）等等。可見我嘅中學年代，就係咁渡過。

13. 然後你諗下，埃汾太（名校女生嘛）。人地呢，午飯去Pacific Place食嘢—仆你個街到我在金鐘返工我都仲嫌貴呀！另外有個朋友仲誇張，中學年代，去「有馬」日本料理午餐。

14. 朋友同我同年，但你老味，我地年代在屯門？日本嘢？「就係去八佰伴食熱海麵屋」，好撚難食的，難食過味千。當然我好後來先知道，熱海係地名（大佬呀，嗰個年代冇維基百科，又冇一年去十次日本），而八佰伴第一間店，就係在熱海。

15. 至於我嘅名句（其實係朋友講），「嗰時食百人一朱已經覺得自己好撚high」，sorry，呢個係去到出嚟做嘢嘅事。仆你個街，我去到教書嗰時，兩皮嘢個月，都係同成班搣時去荷里活（梗係鑽石山啦，好彩未去旺角荷李活）食百人一朱咋！（話時話，就快又七夕，有冇人未聽過七夕搣時嘅教事？）

16. 睇到呢度，你心諗，有冇咁誇張。都真係有的。例如我估我好似去到2000年，即係，大學畢業，我先知咩係Tiramisu，「開頭以為日本嘢」。而家啲小朋友，幼稚園茶點都食喜知次一夜干啦！

17. 真的，as a 學霸，我博聞強記嘅能力，叻過好多「名校」嘅普通學生。但行出嚟就係冇嚟貴格，食幾多貴格燕麥片都冇用。「即係余文樂咁」，真係好多年先洗到嗰種新界牛嘅味。

18. 你話冇影響？有機會我細寫。但當年我去in Oxford獎學金，邊個in我？係李兆基，冇錯係四叔。仲有楊鐵樑。同埋羅德丞（唔係羅傑承），同埋一條牛津嚟嘅鬼。喂，我見到都變秦舞陽，腳震震啦。最記得鬼佬問我點解地盤啲鐵係工字型，我都答唔出，但其實我係知嘅。（BTW，當年我報N展，真係好彩冇收我）．後來當然獎學金拎唔到，做唔到乜乜學人，返去港大繼續have fun stay poor．四叔變咗亞洲股神。楊鐵樑變咗教英文。羅德丞？選唔到特首，冇耐死撚埋了。（原來都隔咗十年）

19. 事後諗？如果我醒少少嘅，我應該話畀四叔知，我阿麻係順德大良人。我成日返去的。拿，呢啲咪分野。但冇計，歷史沒有如果，洛賓2010年球單刀如果入咗？

20. 寫咗好多，都唔係咩獅子山下可歌可泣。你心諗，而家扁平化咗好多啦。而家屯門都上到NetFlix嘛，屋企都睇到 德國飛機吸血片啦，有得上網，拉近晒啦。

21. Yes and No．但其實，個世界，都係向比較有錢嘅人傾斜嘅。我甚至覺得，我幾幸運，我年代都仲可以叫做「上流」，即係一個普通家庭（唔好講到自己赤貧啦，至少有錢去睇戲）嘅屯門仔，都仲有得發下圍。而家？未必冇，但大家心知，越嚟越難。

22. 最新嘅趣聞，英國A Level，一半人A或A+。因為多咗Teacher assessment，fuck that 教師好專業唔偏私。但有乜所謂？好似阿婆賣紙皮咁，你會噴水上去，我又自然會計返你平啲。英國好嘅大學，更加大條道理自己搞admission test，甚至乎用自己嘅discretion—冇錯，就係傳說中嘅去緬甸做義工。點解啲名人富豪仔女都入到名大學？真係叻啲？你話呢？

23. 寫咁多，冇錯，最後都係講「馬蘭頭奬學金」嘅理念。呢個年代呢，你做屯門牛又冇錢嘅，真係比較大鑊。可惜我暫時都仲係只有理念，未有好多錢，更重要係未有執行力。但，總會搞到出嚟。

（＊）又，我都係早排先知，司馬相如唔係真名，正如河國榮崇拜張國榮，佢因為崇拜藺相如先叫自己司馬相如。正如司馬遼太郎，都係因為崇拜司馬遷（應該唔包括腐刑嗰part），但自愧不如亦係自謙，先叫自己司馬遼太郎。

似乎姓司馬嘅都啱呢味嘢（司馬遼太郎又會姓司馬啦！）。不過司馬賽兒，就唔係因為鍾意馬賽所以變咗馬賽。主要係鍾意波圖。講返，上季法甲馬賽第5，冇歐聯踢，所以要等波圖歐聯分組賽第三，先有機會馬賽對波圖

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

［重慶大廈最美麗的一刻］

香港尖沙嘴有一楝大廈叫「重慶大廈」，王家衛電影《重慶森林》把這裡拍攝成罪案溫牀，中文大學的人類學家麥高登寫了一本巨著《世界中心的貧民窟：重慶大廈》談的是在一個細小的樓宇中，住了多種族的人士，經營各種生意。但本地人路經這裡，除了入去大堂光顧兌換店，或上樓吃咖喱，未必了解這地方。

我在大學教授新聞寫作，若學生知道採訪功課是訪問「居港南亞裔人士」，他們有時反應頗負面：「覺得溝通不了」「對他們印象不佳」。

為甚麼呢？香港雖然是國際社會，但外藉人士中，歐美人士得到尊重，南亞裔人士（來自巴基斯坦、印度等地），在近年香港被部份媒體描繪為「假難民」「罪犯」。

加上上周三，和平遊行的籌辦組織民間人權陣線的召集人岑子杰，不幸在街頭被人襲擊重傷，頭破血流，嫌疑犯人為南亞裔人士，有人擔心今日的遊行(10月20日)，會不會有人在南亞裔人士聚居的尖沙嘴區進行報復？又或者借用這件事，攻擊南亞裔人士或建築物，嫁禍給這場反修例運動？

香港有一批少數族裔人士，自父輩甚至祖父輩已來港，他們是第二或第三代生在此地的人，他們在香港的學校讀書，或許未必能看或寫中文字，但會說流利的廣東話，即使他們偶爾回鄉探親，但覺得最有感情的是香港。

「對他們來說，在全個地球，只有一地方可以稱為屋企，就是香港。除了是香港人，他們已想不到另一個身份。」協助一批土生土長的南亞裔少年渡過生命難關的社工王惠芬形容。

看到岑子杰事件，第一時間有反應的兩個人，就是王惠芬帶大的兩名「好兄弟」：兩人都是三十來歲，分別是拿到社工學歷的Jeff（Jeffrey Andrews），和做手機貿易的KK（Khalid Khan）。他們這對沙煲兄弟自三歲已在幼稚園認識，一起讀書。

一個做社工，另一個營商，兩人的辦公室也在重慶大廈。Jeff的父輩來自印度，他是基督徒，口才了得；KK是虔誠回教徒，父輩來自巴基斯坦，較內向，但由於經常於回教社區做義工，例如宴請窮貧人士吃飯，在回教圈子得到尊重。

兩人得悉岑子杰事件後，立即思考可以做甚麼，化解社區可能出現的誤會，他們構思於今日大遊行的日子，在重慶大廈門口開一個派對，向遊行人士免費派冰水，有尼泊爾裔的土生香港女士在門口派蛋撻，路過的遊行人士都很受落，有人上前跟南亞裔朋友握手以示支持。

在早上十一時，已有二千支水預備了，原來有租戶及巴基斯坦的長輩捐了二千元讓大家買水，重慶大廈的管理處亦免費提供冰粒。Jeff拿着咪高峰問大家：「以後大家驚不驚重慶大廈？」（眾回應：不驚！）「以後大家仲驚不驚南亞人？」（眾答：不驚！）管理員嘖嘖稱奇，眼珠瞪大小聲說：「很融洽，沒事發生，真神奇。」

最奇怪是，有幾位黑衣青少年走到重慶大廈內駐足，我問，你們為甚麼來這裡休息？若不是有這個活動，你們平日會不會到重慶大廈？一名黑衣蒙面少女坦言，以往從不敢走進這裡，今日卻覺得沒問題「你知道，現在這個時勢，入店吃飯也要小心，不知道這裡的人是否歡迎我們嘛！」；另一名黑衣少女則回答沒擔心過：「我在示威前線，看過好幾位南亞手足啦！」

社工王惠芬坦言，很多土生南亞少年，因為學習中文面對困難，有時會失學，甚至會走上吸毒或結交損友的歧途。像他遇上KK，當時他讀到中四就輟學，第一次相遇，少年ＫＫ因為自己親兄弟經常走去替王惠芬做義工，他不明白，於是去唬嚇她，王惠芬偽裝古惑仔口吻回應KK，才發現原來這位巴基斯坦背景的少年非常純品，只是讀書困難，染上惡習才走了歪路，從此兩人不打不相識，現在是好友。

現在KK已有自己事業，更是三個孩子的爸爸，他更特意把孩子送到本地的學校讀書，接受一般香港人的教育。有同鄉笑他傻，覺得他應該送孩子到南亞裔較多的學校讀書，會比較容易，但他執意這樣做：「希望孩子可以受教育，比我讀更多書，識講識寫中文，更能投入香港社區。」

今日最動人的一刻，是重慶大廈一眾朋友站在門口，一起高歌一曲Beyond樂隊的《海闊天空》，廣東話歌詞流利得很，遊行人士很受落。Jeff嗌咪：「我哋都係香港人！係唔係！」（眾回應：係！）一名在場做義工的物理治療師表示，他在尖沙嘴區出入多年，「從沒看過重慶大廈的氣氛可以如此歡樂，和街上的人打成一片，真係體現咗多元包容的香港精神。」

帶了一對五歲孖仔孖女來遊行的李生李太，在重慶大廈外觀看良久，「香港人很有智慧，有人想我們和南亞裔的人敵對，我們就往相反方向發展，我還有一個大女兒今天沒有來，她讀書的學校，有南亞裔同學，我發現他們有時比香港人更香港人。」

重慶大廈不遠處，就是KK經常去做祈禱的清真寺，重慶大廈的眾人向群眾表示：「多謝大家尊重我們的清真寺！」因為曾經擔心有人會立心不良，今天去搞破壞。所以同時間，已有幾位蒙面黑衣示威者，和幾位年長的老人，拿着手寫的英文紙牌站立在清真寺外，上面寫着「示威者一定不會破壞清真寺及重慶大廈」，「別怕我們，我們在守護這裡，怕有別人搞破壞」。

沒有人想過，下午四時半，清真寺真是受到不禮貎對待．警方派出的水炮車經過寺外，當時寺外沒有人向警方進行衝擊，只有守護的人士，和急速回到寺內的信徒，但警方卻向清真寺的門口及鐵閘方向發射藍色液體，把寺廟染藍。

於香港一直致力服務少數族裔的機構香港融樂會表示，當時印度協會前主席Mohan Chugani，融樂會總幹事張鳯美及一名巴基斯坦裔的會員，及多位民眾被射中不適送院。而清真寺亦被水炮車液體污染，這件事令坊間震驚，登上各大國際傳媒。融樂會指出：「警方以藍色水劑染污清真寺設施，乃侮辱宗教場所及侵擾宗教自由，要求道歉，並向公眾交待。」

當大家得悉清真寺被染藍，一小時內，一批熱心市民，包括穿示威者裝束的人士，旋即趕到清真寺自發以清水，毛巾及掃把替清真寺清潔被污染的設施，畫面讓人動容。相反，警方在多個小時之後，才派人探訪寺方，有便衣警察拿毛巾抹欄杆五分鐘後離開，官方聲明表示，顏色水「誤中」清真寺。

本身回教徒的KK說：「很多陌生人從沒進入過清真寺，但示威者那麼善良及熱心助人，我看到他們去幫我們清潔清真寺，我致以無言感激。」

（圖右上為KK，右中為KK與支持反修例運動的藝人阮民安於重慶大廈握手，旁為社工王惠芬，右下圖中為Jeff，他搭着肩膊的是會用廣東話表演楝督笑的藝術家Vivek Mahbubani）

（讀者若想較全面了解香港少數族裔的扎掙和故事，推薦大家讀這本書《公義的顏色 王惠芬與少數族裔的平權路》）

《 國際夢 》
( Based on a true story )

Chris Lam ，林日曦，同 Yvonne Tam， 譚玉瑛， 佢哋兩個响 Kong U 認識，Year 2 開始拍拖，仲好好彩唔使驚香港土地不足，可以住hall兼扑嘢。

曾經有人同我講笑，話响Kong U畢業出嚟嘅女仔，冇一個係處女，香港開埠以嚟，只有一個例外，佢叫劉淑儀。

我個心離一離，知道佢唔係講笑。

講返林日曦同譚玉瑛，09年畢業之後，Chris 去咗將軍澳教中學，Yvonne入咗Big 4 ，就係亞視永恆執笠嗰陣時清盤嗰一間，捱超級騾仔，即係收一份人工，做兩份9小時工作，兩個人加加埋埋收入都有60K左右，開始儲錢結婚。

Yvonne 份人冇乜要求，只係希望將來有自己嘅小天地， 同埋要Chris應承佢，第日生BB一定要入私家醫院唔住公立，同埋小朋友一定要讀國際學校，同埋第日有閒錢一定要請外父外母去歐洲，同埋下刪一萬字。

騙徒手法真係層出不窮，林日曦話等佢有閒錢，即係等有人嗌佢「收嘢啦 ！」嗰一日，一兩個億都茂問題。

2012年聖誕節，佢哋終於拉埋天窗，响第一城供一個兩房單位，我記得，當年佢地張帖印咗兩個公仔，寫住《 C Y 結婚了》， 嗰陣時，CY呢個名唔單止未發臭，仲幾吃香添，未有乜嘢龍蝦齊陰、UGL嘅出現。

結咗婚兩年半，佢哋個BB女出世，由於希望佢將來好似皇帝女唔憂嫁，所以同個BB女改咗個英文名，用影印機跟足英女皇個曾孫女一樣，叫 Charlotte 。

故事，而家先至開始……

（ 本故事純屬虛構，內容屬實，如有雷同，實屬慘情 ）

係人都知道，Chris 出世嗰陣時唔識喊， 接生嘅醫生發現佢口喺裏面含住粒金，差啲以為佢係轉世靈童，廿九幾年嘅成長發育期，文靜到冇朋友， 算得上係宅男2.0

不過呢位教書嘅林Sir ，响高登個朵就好爆， 綽號《 千首觀陰小腦細 》，網上講嘅嘢，同佢平時真· 林日曦木口木面，真係判若兩人， 唔知一定以為佢精神正常。

呢一晚，Chris 如常咁全神貫注喺i-pad，Yvonne一邊餵BB食粥仔一邊催促佢。

「 你唔好再上網啦，要快啲同Charlotte報幼稚園，如果唔係輸在起跑線就斃喇……」

「 得啦。」

「 你應承過我㗎，我今朝揀咗兩間，一間係德瑞國際幼稚園、一間係法國國際幼稚園。」

「 得啦。」Chris 對眼冇離開過個mon半秒 「得睡？乜嘢得睡呀？」

「 German Swiss Kindergarden 呀！ 」

Yvonne 今朝响電腦，都係search kindergarden， 唔知道 kindergarten 本身係德文，係ten 唔係 den， 以為kinder出奇蛋，加個花園就係幼稚園。

「 哦！咁梗係德瑞好啲啦，話到尾兩個有錢國家，強強聯手……」

林日曦根本就唔知道，瑞士有七成地區都係講德文， 歐洲好多國家五百年前都係一家人，佢一直以為德國淨係出產德國寶熱水爐、瑞士淨係識得生產瑞士糖，直到結婚度蜜月嗰年，參加康泰九天歐洲超值團，先至知道原來德國有咸豬手，仲鬼咁開心，响瑞士用咗15歐買咗一支孖人牌指甲鉗，雖然比起廟街榕樹頭嗰個阿婆，擺地攤五蚊一支嘅韓國指甲鉗難剪，但係始終都叫做用緊國際品牌。

「 咁一於揀德瑞啦，」Yvonne 放低BB女， 轉身行入廚房，「 你準備三千七百蚊，聽朝去交報名費……」

一聽到呢句說話，Chris 即刻好似畀醫院急救心臟嗰兩個鑊仔蓋响心口炸一炸，成個人彈起，幾乎撞爛ikea嗰盞99蚊吊燈。

「 你話乜嘢話？乜嘢3700蚊話……？」

「 報名費囉……」 譚玉瑛冇佢咁好戲，一邊咬住個蘋果，一邊窒佢老公，「你想個女學你咁冇出息? 要贏在起跑線呀！」

「 喂喂喂 ！ 我上次話要用三千幾蚊買部任天堂nx你又唔畀？」

「 膝頭上面就脾！幾廿歲人仲成日掛住打機。」

「 咁如果交咗報名費，佢地唔收 Charlotte 咁點呀？」林日曦個樣，好似五歲小朋友同特首研究住屋問題咁認真。

「 咁你上次係馬會買咗500蚊車仔，最尾輸1比0，咁又點呀？馬會有冇得退番畀你呀？」

「 車仔輸波嗰場，咸豐年之前啦老婆……」

「 我唔理呀，總之聽朝一齊去排隊交報名費，如果唔係，我就同個女返外家住！」

※ ※ ※ ※ ※ ※ ※ ※ ※ ※

僑福道，係山頂嘅僑福道。

唔係乜嘢荃灣又叫做「九龍山頂」，人哋大富翁都識得地理，唔會傻到將荃灣、山頂、九龍用同一隻顏色。

認真，七百四十萬香港人，最少七百三十九萬未踏足過山頂僑福道， 連僑福道喺邊一dud都唔會知，所以話，收得你三千七百蚊報名費，唔通係馬寶道咩。

朝早七點半，Chris 同 Yvonne 已經搭的士嚟到僑福道幼稚園門口 ，call香港飛的85折，連埋兩條隧道都要兩舊半。

點知一落車，前面已經有三四十人排緊隊， 好彩交報名費唔駛抱埋BB，如果唔係真係企到腳跛。

林日曦見到排佢前面嗰個平頭裝麻甩佬，竟然企喺學校門口煲煙，啱啱想發圍，佢老婆即刻拉住佢，細細聲喺佢耳仔邊講 ：「 咪玩啦，上次我响公司見過呢個人，佢一入嚟我哋兩個partner即刻走出嚟迎接，佢係大陸上市地產發展商嚟㗎……」

「 好巴閉咩！」林日曦一臉不屑，繼續頭岳岳左望右望，見到一個靚女行緊埋嚟，佢帶住副白色巨型膠框 Gucci 黑超， 踩住對 4吋半Prada 橙紅色高踭鞋，「 老婆，你睇下呢個靚女，有八成似楊冪……」

「 佢咪就係楊冪囉！」Yvonne 撞一撞Chris 手踭，「 你唔見劉愷威抱住小糯米跟响後面行咩？」

林日曦一日懵幾勻，點都要畀佢搵到一個位入。

終於，佢見到一個唔知係唔係錫克教，不過包晒頭嘅喬寶寶行埋嚟排隊，「 話明國際學校，呢啲第三世界嘅人都埋嚟爭？」 林日曦 一貫嘅輕佻語氣，「 個個都嚟爭，我嗰三千七百蚊咪凍過水！」

點知個星哥行埋嚟自我介紹，佢話因為娶咗一個香港女仔，所以選擇同個BB留喺香港。

日曦冇搭嗲，仲細細聲、 好專業咁向老婆講解，「嗱，就算香港政府都唔當呢啲係外國人㗎，你睇下報紙就知道，喺蘭桂坊醉酒鬧事嘅鬼佬，警方公佈會叫做“外籍人士”， 而响元朗醉酒鬧事嘅印巴哥哥仔，警方就會公佈叫做“南亞裔人士”……」

喺香港長大嘅日曦，根本想像唔到，呢一位星哥嘅伯爺，係美國矽谷一間軟件開發公司嘅真·老細，佢唔單止見過喬布斯，仲同喬布斯食過幾次晚飯，淨係新德里間工廠已經請左六千幾人。

鏡頭，愈拉，愈遠。
愈拉……愈遠……
排隊嘅人龍，越變，越細，越變……越細……就好似一串行軍中嘅螞蟻。

Chris 同 Yvonne ， 永遠都唔知道，Charlotte， 到底需要乜嘢。

This is a tragedy.

李懂媽

魚蛋，將廉價魚剝皮拆骨打肉，化腐朽為神奇。王老太，王林記魚蛋粉靈魂人物，粗壯爽朗；年輕時是個美人胚子，困頓苦學至中三，在六十年代殊不簡單。

「我有個老師說，人的遭遇講你出生的環境。龍生蛇竇，你就當蛇，蛇一樣的遭遇；鳳生雞巢，你最叻也在雞群，飛不到哪裏。」68歲的她，從沒飛出筲箕灣，和魚蛋糾結大半生：小時在魚蛋檔劏魚；24歲嫁予魚蛋佬，做魚蛋軋斷三指；後來魚蛋佬變醉酒佬，工場與店，她苦苦獨撐……橫逆不息，她一一用狠勁對擊。鳳，終究不是雞；就像草根魚蛋，也蛻變為代表香港的美食。

王林記在筲箕灣東大街的盡頭，平日店外沒人龍，但由六七點早市直下，幾近座無虛席。不獨賣魚蛋粉麵，還有濃郁豬手清腸腩白飯多士；來的不是漁民街坊，就是白領熟客。王老太說，兒子阿傑認為貼名人相太老套，所以常來的發哥周潤發、方中信等全沒合照。


不過，眼前的王老太實實在在是一本魚蛋秘笈。是日清晨七點，跟她接收香港仔買手運來的漁獲。卸魚時，她已知魚新鮮不新鮮：「你看，䱛魚眼仔精精靈靈，好新鮮；倒下來那一下是雪味而非腥味，不新鮮才有腥味。」王老太中氣十足，聲大自信。

這天收了䱛魚、黑門鱔和鰽白。「竹籤（魚）我們也照打，因為現在魚很缺乏。今天有，明天不知有沒有。」她見過內地兩三層高「鐵拖」漁船，「戰艦一樣大，有先進雷達，一掃（海裏魚）就捕光了。」十多年前她發覺漁獲漸少，已置雪房，「魚多我就買多些，先冰封它，無魚了就要拉出來用。」

魚要有魚味
「做魚蛋，魚一定要新鮮。」王老太常掛嘴邊。「魚唔靚，你怎樣雪都無用，但新鮮的魚雪了，牠會有幾成靚存在。」在缺魚如休漁期，她預先冰封「撚手貨」，打魚蛋時再混合艇家釣回來的鮮魚。


今天，很多行家採用供應穩定、由越南菲律賓入口的大黃鱔，「那種大黃鱔，肉很白淨，但無味，你要放味道下去。」王老太鍾情中國海域的黑門鱔，「這種鱔魚肉鮮甜，我們潮州人很喜歡用來煲粥，放鹽和少少冬菜，那煲粥就好正喇！」如此鮮味用來打魚蛋，就不需要放太多調味料了。坊間魚蛋有些死實實，有些爽如蒟蒻，她形容「鬆化」才是正宗潮州魚蛋。人家多少會混些澱粉，她卻堅持全用魚肉不下粉，「我們喜歡幾種魚混合，譬如九棍、黑門鱔、大䱛細䱛，纖維不同；愈多種魚，俗稱的明膠就愈強。」至於魚肉混入多少水分和鹽、浸魚蛋怎樣調節水溫以致一粒魚蛋內外爽彈又鬆軟，全要歲月磨練。王老太的叔仔王炎興打了魚蛋50年，就在王林記擔大旗。

鳳生雞巢
不同魚種的纖維、黏性、魚味濃淡……王老太了然於胸，畢竟做魚蛋超過40 年，可是這並非她原來想走的路。她本名劉蘇女，祖籍潮州，在筲箕灣東大街出世，童年喪父，母親再嫁，弟妹眾多，小時候就很窮。「我們去魚蛋檔幫人免費劏魚，人家就送些魚頭魚春給我們作米糧。魚春當飯魚頭做餸，不飽，只是滯。」她想起也打嗝。

因為母親不識字，常被人欺負；蘇女誓要讀書，靠賣爛銅爛鐵讀上小學。她樣子像混血兒般玲瓏標致，成績也好，是校內的風頭躉；順利考上中學，卻交不出學費，加上家人溫飽排首位，只有去工廠打工，但仍爭取返金文泰夜校，努力讀至中三才再沒有精神兼顧下去。

「知識改變命運」終成泡影。就在失落的14歲，芳心許了同鄉小子王炎林，「我們青梅竹馬，也是初戀，雙眼盲咗！」王老太回到少女時，笑眯眯。24歲那年，患癌的母親病危，為了沖喜，二人半夜拜了王家祖先草草完婚，「媽媽心事了卻，我結婚那天她就走了。好淒涼！」

本來，丈夫在北大酒家做燒臘，沒多久轉跟他大哥學打魚蛋。「我好怕做魚蛋，因為我小時拿着石春揼魚，揼到手指全彎了。」當時她沒選擇：「嫁雞隨雞飛，嫁狗隨狗走，嫁隻馬騮通山走。老公做魚蛋，你就跟他做魚蛋。」

1979年，兩口子在山邊台（筲箕灣天后廟後山）母親遺下的山頂小木屋開設工場，做魚蛋批發。她日做最少18小時，每天吃11碗飯但體重才90多磅。「那時夜晚12點才吃晚飯，男人睡了，我還要洗衫洗尿片洗碗，兩點才睡。朝早四點五點就要起床，魚蛋我一個人浸，一個人切，一個人炸……到老公起床時，我第一批貨已經要出了。」28歲那年，因為睡眠不足，「絞魚肉，一插，插了入去，沒了一截。」她輕描淡寫，摩娑着左手三隻手指：食指和無名指指頭被削平，中指斷了半隻；今天已不當一回事。

牛的反抗
日積的勞累褪盡鉛華，88年蘇女腰痛至無法再推貨上下山，於是和丈夫商量買了東大街現鋪，前面擺十幾個座位賣魚蛋粉麵，後面做工場。兩口子從零開始，胼手胝足捱到有樓有鋪頭，她一直等待上律師樓和丈夫簽契聯名做業主，可是丈夫早已靜靜寫了自己的名字。

「為何我沒有？」有天她忍不住問。「有甚麼呀？你似甚麼呀？你似一隻牛罷了！牛耕田馬食穀。你有腦嗎？你無腦。」王老太憶述丈夫的回應，依然動氣。「就被他一句驚醒夢中人，原來我是一個無腦的女人。」抹乾眼淚，她明白不需再為這男人仆心仆命。

蘇女大解放，即刻重拾舊夢——返夜學，去英國文化協會讀Free Talk，又去劉家傑那裏學英語。家婆是個守舊潮州人，重男輕女，「我生了三個女，她已不喜歡；我讀書更加不得了。她說，你讀這麼多書為何？你想控制我王家呀！」丈夫以前打魚蛋，因魚肉要加冰，冬天尤其寒苦，習慣飲烈酒如瀘州大麯、拔蘭地禦寒。那時已上酒癮，功夫盡喪，也不忘揶揄她：「你學這麼多英文幹甚麼？東大街有幾多個鬼佬跟你說話呀？」

41歲的蘇女做到七勞八傷，於是向丈夫「辭工」。她一離開工場，丈夫無法做下去，唯有將工場和訂戶一起讓給五弟炎興。蘇女不參與批發，只負責店鋪樓面，丈夫自此再沒給她家用。「家婆教他不要過錢給我，怕我『走佬』。實在，我不捨得四個子女，不容易放棄這個家。」她於是跟丈夫「講數」：「得！你不用給我錢，但你供仔女讀書、出國留學。」丈夫對子和女總算公平，後來讓大女和孻仔放洋讀飽書。

貓狗也溫飽
2002年，王老太跟叔仔商量將王林記現鋪全做門市，在對面街另置工場。其時丈夫終日醉昏昏，店務早由她一手打理。至於4年前開大坑分店、今年9月開柴灣分店都是兒子接棒的後話，丈夫無從見證，因為7年前他「被酒浸死了」。

王老太自小命途多舛，心有千千結。45歲到志蓮淨苑學了4年佛學，種下因緣，慢慢放下從前怨恨。「兒女眼前冤，夫妻渡客船。到底是我太強，還是他太自卑？難說。對我老公恨與不恨都算數喇！總之我日日都有三枝香插給他。」她哈哈大笑。

現在，她在王林記已是半退休，主要任務是買魚收魚，9點吃過魚蛋早餐做了QC，便去筲箕灣避風塘游泳兼餵野貓野狗，風雨不改。三道防波堤不接陸地，十足孤島，上面卻有很多水上人棄養的貓狗；王老太見牠們無水又無食物，於心不忍。王林記每日都用老雞熬高湯，她就挑骨留肉，混入魚腩或牛腩碎作貓糧或狗糧。

「我餵了30年了。我們這一代，小時最緊要有溫飽。」她笑言，小時侯信基督教和天主教，因為前者派奶粉，後者派米，餓肚皮話事。因為自己困難過，幾十年來她買魚日日清數，不需買手墊支；教子女做生意，不可騙人也不可欠夥計錢。

「人又好，貓又好，狗又好，最緊要有溫飽暖著。」她慣租的小機船駛向石壆，高呼一聲：「貓！」十幾隻肥貓即從四面八方的石罅跑出來，翹首朝她喵喵叫；其他堤上的黃狗、黑狗，未待叫喚，老遠看見她，已不停搖着尾巴蹦蹦跳。

撰文：韓潔瑤
攝影：梁偉德

王林記魚蛋粉
地址：筲箕灣東大街10號東寶大廈地下A號鋪
電話：2886 0068
營業時間：星期一至日 6:30am-8:00pm
詳情： http://bit.ly/2R7wbwZ

===================================
立即Subscribe我哋YouTube頻道：http://bit.ly/2Mc1aZA (飲食男女)

新店食評，名家食譜，一App睇晒！
立即免費下載飲食男女App： http://onelink.to/etwapp

《飲食男女》Facebook：http://www.facebook.com/eatandtravel

飲食男女網站：http://etw.hk

Follow我哋Instagram，睇更多靚片靚相：http://bit.ly/2J4wWlC (@eat_travel_weekly)