【龔成問答信箱】（Q22041-Q22060）

Q22041：

Hello 龔sir 我係你股票班初班既舊生 最近睇緊12號恒基既年報 有d問題想問下

請問本年度盈利後面點解仲有一個本年度收益總額？唔係好睇得明 除稅及重新分類後之本年度其他全面收益淨額 即係點？

仲有佢既基礎盈利14899係點計出黎呢？我嘗試將公佈盈利10192 加 "投資物業及發展中投資物業之公允價值（減少） / 增加" 2413 都計唔到 14899

聯營同合營公司既盈利需要剔除嗎？

最後就係buffolio顯示既恒基 PE係用基礎盈利定公佈盈利計算呢？我需唔需要加減其他數字去計算正確既PE?

唔好意思 有好多問題

龔成老師︰

這頁"綜合損益及其他全面收益表"，係分析估值時，我都唔會特別去參考。因為佢主要係一些非營運性變動，無太大參考價值。

至於基礎盈利，主要係扣除左"物業公平值變動"，所造成之影響。

你可以參考翻2020年年報P.226，你用"本公司股東應佔盈利"，再加翻所以公平值數字(因為當年公平值，都是負數。若當年公平值係正數，你就要倒轉，扣除翻佢。)，就會計到14899個答案。

水牛網顯示，會係用用"本公司股東應佔盈利"作計算(即包含公平值之影響)。

------------------------------------------------

Q22042：

龔成老師你好！好想同你分享個好消息！我同丈夫成功買到第2層樓啦！難得睇中啱心水地區尺數既低水單位，所以決定賣哂所有股票同埋加按少少層樓俾首期

首先 我好想多謝老師你強調儲資產呢個概念，雖然我啲股票唔係大賺，不過起碼不經不覺已經儲到一筆可以靈活套現既資產，全靠呢筆錢 今次先有機會入市。

不過宜家手上已經冇哂股票 現金亦唔多，要供2層樓亦都令少左現金流去儲股票

再加上黎緊首要目標係可以儲到筆錢裝修新屋，想請問老師我應該如何分配長線同短線既投資方向？

現階段應該全部保留現金用黎裝修？還是繼續以月供方式儲貨？

謝謝老師建議

龔成老師︰

先恭喜你，又成為業主。

我地財富組合除左要有增長力和質素外，平衡性都好重要。你現時資產明顯係偏重於物業類，長線你應集中加回一些優質股，以免過於集中個別資產類別，而產生風險。

因此，你新資金建議優先投入股市，去令成個組合更平衡。

至於先裝修，定投資，你要從生活所需和財富增值，2者之間去取個平衡。

但我建議，點都要每月做番少少月供，唔好完全係零。因為你現時係零股票，而大市又只係合理水平，這個狀態唔理想。

另外，由於你要供2層樓，令每月可投資金額減少。你最好盡快將另一層樓放租，去提升自已可投資現金流，咁會較好。

當然，你現時現金太少，都要留一定的現金先。

------------------------------------------------

Q22043：

老師你好，我又有問題想問。看完"80後千萬富翁"後，有一個疑惑

假設我辭職後，以全職股票投資者創富，之後希望分散投資，買入一間物業，問題就來了：

1.沒有工作，全職股票投資者，可申請按揭嗎？

2.同時，過到壓力測試？

3.成立空殼公司，買入物業是否更好？

龔成老師︰

1) + 2)你可以利用「資產方式」申請按揭，而非一般有收入人士，所用的「壓力測試方式」。

或者你可以加入擔保人，都有機會可以提升你成功申請按揭機會。

但坦白講，無收入要做按揭，一般都會較難。

所以最好在你有穩定收入時，處理好物業這部分，之後先辭工。

3) 成立空殼公司買入物業，係可以節省不少稅項。但空殼公司本身，都有不少營運和買賣成本，例如要會計師每年核數、買賣時需要律師評估資產等。

加上公司買物業要支付「買家印花稅」15%，因此否則未必值得咁做。

------------------------------------------------

Q22044：

1:假設，本金10萬，每月再投入1萬。如果比自己目標係每年升15%,咁應該點計，因為以年計

1月資金可用12個月，但12月資金只用1個月。咁我應該用22萬乘15%,定應該點計好?

2：老師，想請問下，假設如果雙方同意，我冇任何牌照既情況下，可以幫人做投資嗎

3:老師想請問下，假設現在有1百萬資金，用了5年時間儲錢加投資得來，有買樓需求，可選擇用來買樓首期或繼續用股票滾下去，

但如果買左首期後就變左股票果邊滾落去既速度慢左，面對咁既情況應該點做好

4：老師，想問如果抽到居屋，又比左首期買左之後，可唔可以出租？

龔成老師︰

1) 唔好諗到太複雜，我地唔係要一個好精準架數字，因為投資中間會有好多變數，未必一切如你估算一樣。

但係你要知一個大概數字，係有意思，可以作參考架數字。

以你情況，可以簡單點，當你當年每月資金，係年尾一次過投入。咁樣計算，簡單之餘，出來結果都會相對保守。

第1年回報︰22萬 x (1 + 15%)
第2年回報︰(第一年回報 + 12萬) x (1 + 15%)....如此類推

2) 如果是《證券及期貨條例》規管範圍，基本上就要有牌照。如果你只係幫下屋企人手，當然另計。其實，當中好講有無「利益」在其中。

3) 如果你係有實際需要，去置業的話，你係可以動用這筆資金。其實物業都係一個資產，都算係一種投資。

但最好，係你置業之餘，都有一定資金，用投資優質股，令成個組合唔好偏左係物業個邊，咁就最理想。

4) 根據正常程序，係要補左地價，先至可以成間居屋放租。

而且，投資物業放租，在香港現時法例下，是不能以高成數按揭進行的，金管局定明，如果要投資物業收租，最高的按數不能高於5成，高於5成者，只能自住。

當然，這是政府的規定，但坊間的做法，往往是另一回事。但你要明白佢地的做法是犯法的，因此一定有風險，做與唔做，自行決定。

坊間不少投資者，就算高成數揭揭都會照放租，其實你照去地產經紀同你講你想這樣，佢地就明，會照同你做，當然，細節位不便在這裡講太多，有機會你上堂見到面，我分享坊間的做法。

記住，所有事情都會有風險的，這是一個值博率的問題，我只可以話，坊間不少人都會照做。

------------------------------------------------

Q22045：

龔sir，你好!多謝你一直耐心回覆讀者的提問。我都其中一個支持你的讀者，你的著作特別是年報勝經，寫得很好。我亦因此開始學習睇年報。

最近我投資左百度(9888)，現價大約210蚊左右。投資原因主要是看好雲業務同智能駕駛的前景。我相信這兩個範疇能配合中國未來的大方向。

配合本身網上廣告業務收益穩定，有利百度發展新增長點。

百度最大的擔心是競爭者多，在今日「全民製車」的時期，百度的賣點只是研發時間比同業長，比同業更早開始投入研究。講到這裡，就引伸出另一個憂慮，就是巨大的無人駕駛投資能否變現。

我明白股價反映公司價值，同時亦反映了市場的對於公司的期望值。但在這裡，我唔識判斷「市場期望值」這件事。

不知我的看法是否正確，百度目前的市盈率大約9倍左右，應該是屬於健康水平。 未知老師的看法如何? 現價應否再加注?謝謝!

龔成老師︰

多謝你的支持!

百度(9888)為全球最大的中文搜索引擎，是內地用家搜尋資訊主要對口，2019年百度用户規模突破10億，而百度App日活潑用户2億，信息流位居中國第一。

當你坐擁不少資訊和客戶群，就可以利用佢地去發展很多不同業務。

雲和無人駕駛，都會係有業務當中較有潛力部份。百度的無人駕駛技術，其實唔錯。雖然越早研發，唔代表一定可以越早市場化。

但百度在無人駕駛技術，無論研發和運作，都累積左一定經驗，有助提升佢成功市場化機率。若無人駕駛技術成功市場化，相信會成為集團盈利的新增長點。

由於無人駕駛市場未算成熟，就算有較多競爭者進場，都未必會造成較大影響。加上集團有一定技術，係競爭上相信會有優勢。

這些部份發展雖有潛力，但都存在很多不確定性，我地好難完全掌握將來發展狀況。因此，係估值時，對這些不確定性較高的分部，要保守少少。

百度現時收入，主要來自在線營銷服務。這部份，集團有一定優勢，預期長線發展正面。

百度在規模和質素上係有，但你預佢中短期會較波動，不宜持有太多。若你資金好充裕，要價加小注係可以，否則等較大回調才加注，會比較好。

------------------------------------------------

Q22046：

龔sir你好，我對於股票買賣只是初哥，之前都是有少少人云亦云既心態作買賣。而我丈夫曾經上過你既堂，從他口中得知你的FB page，最近經常睇你既page增加投資概念。想問下你嘅意見。

本人37歲，已婚未有仔女。月入$58K，丈夫月入$20K多少少，收入算穩定，已購入一層自住物業，仲有17年需要供樓。

之前一路只保守地作儲蓄，大約有流動資金$100萬，扣除供樓，生活費同雜費，每月可儲蓄$24K，想可以好好分配同計劃點樣做好投資理財，為將來有小朋友及退休生活作計劃。

之前買入一些收息股票為主。如下：

0005 匯豐 70.5x1200股+46.2x2000股
1398 工商銀行 6.41x 15000股
2800 盈富基金 28.72 x2000股

1. 睇了你的FB page 後想嚐試月供股票，考慮緊每月用一萬蚊月供0002，2318，6823。這些組合適合嗎？

2. 現在持有既股票組合適合繼續長期持有？定放售？

3. 如果買潛力股，你會建議買邊隻？

期待老師的回覆，非常謝謝！

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你37歲，應以增值為主。平安(2318)係可以，但其餘2隻只係收息股，增長力較弱，唔係太適合。我建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$12000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有100萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

但我建議，在你實行以上計劃前，先儲起半年開支(若你預將會有小朋友，都要預留埋這部份開支)，作為應急之用，咁會較穏當。

2) 你持股雖然都有質素，但匯控(0005)和工行(1398)都係收息股，你年紀不宜持有太多。建議沽出部份，慢慢換至上述股票，會較好。

3) 我上述潛力股，都適合你，但你投資經驗較淺，要控制個比重，唔好佔多過組合3成。

另外，大部份潛力股現價都略貴。現時只有安碩恒生科技(3067)、ＧＸ中國電車基金（2845）、比亞迪(1211)、阿里（9988）、中生製藥（1177）、福壽園(1448)勉強算在合理區頂部，可分注入貨，其餘想買就要等一等。

------------------------------------------------

Q22047：

龔成老師，你好，最近睇左幾本理財書，當中都有一個對沖概念，但睇返sir的書，或fb的對答，好似都好少呢方面既資訊，是否同你理念唔一樣？

另外我本人都買左d科技股，例如阿里巴巴和小米，都諗住有排都唔放，但又唔想繼續供落去，想供d其他行業的（你話同一產業不是多過30%)，

睇左眼科藥物公司兆科眼科，或者是德視佳，一個造藥一個行醫，你會點睇？

龔成老師︰

我主要係建議透過創建一個合適、平衡、有質素的財富組合，去做到在合理風險下，爭取最大回報。

跟一般對沖，去平衡風險有所不同。而且對沖唔易玩，唔適合一般投資者去操作。

兆科眼科（6622）係一間眼科製藥公司，致力於療法的研究、開發及商業化。通過自主開發或許可引進已建立起包含25種候選藥物的全面眼科藥物管線，涵蓋影響眼前節及眼後節的多數主要眼科適應症。

集團初步將策略重心放在中國五大眼科適應症上，包括乾眼症(DED)、濕性老年黃斑部病變(wAMD)、糖尿病黃斑水腫 (DME)、近視及青光眼。

佢已建立起由13種創新藥及12種仿製藥（按國家藥監局的《藥品註冊管理辦法》分類）組成的眼科藥物管線。創新藥管線包括8種候選藥物，若獲批准則有潛力成為中國市場領先產品。

仿製藥管線包括6種潛在中國首仿藥。集團擁有8項已頒發的中國專利及一項已頒發的歐盟專利，並提交6份中國專利申請。

佢已於廣州市南沙新區建造的生產設施，根據中國、美國 及歐盟cGMP標準設計及興建以用於生產眼科藥物，其生產能力完備並可用於商業化規模生產。

由於未有盈利，風險度會較高，加上企業規模不大，因此投資值博率未算高。

當然，由於規模不算好大，若果企業之後成功，可以好勁，但失敗對股價都有很大影響，因此是有潛力，有風險類。

只可以話，這類股，唔建議大注，當小注投資下好了，同時要明白當中的風險。但用作月供，就不建議了。

德視佳（1846）主要於德國、丹麥及中國以「德視佳」品牌提供視力矯正服務。

佢的服務可大致分為屈光性激光手術（包括全飛秒激光手術及飛秒激光聯合準分子激光角膜原位磨鑲術）、後房型人工晶體（ＩＣＬ）植入術；晶體置換手術（包括單焦點及三焦點晶體置換手術）及其他（包括用作矯正眼晴屈光不正的ＰＲＫ／ＬＡＳＥＫ及角膜基質環段ＩＣＲＳ植入手術）。

見佢的財務數據都不差，生意與盈利都有穩定增長，現價算是合理，但不是高增長類，同時由於規模未算好大，可小注直接買入，但不宜月供。

另外，我地月供係一個長線計劃，最少供3年，並持有5年，才會有較佳效果。因為月供可以拉平均個買入價，減少買貴貨風險。

若你經常供一陣就轉，會影響到平均價格效果，令最終回報不確定性增加。

------------------------------------------------

Q22048：

我想請教一下，你覺得應該怎樣教育兒童理財？因為看過你的文章/書本，你都提及學校缺乏理財教育！謝謝！

（期待可以在澳門上課的澳門讀者）

我兒子8歲，有時會問我供樓借貸，公司借錢，點解麥當勞可以咁成功等等，我自己本身不是商科，所以都係google咁簡單講俾佢知

龔成老師︰

我建議你同佢玩「大富翁」、「現金流」這些遊戲。

如果佢8歲已經有這些問題，我相信佢對這方面好有興趣，好有潛質，日後可以好有成就，你可以找一些成功的名人、商人傳記之類的兒童書比佢睇。

書本和遊戲，都係教授小朋友理財的理想方法。好似大富翁遊戲，小朋友可以從享受遊戲同時，也會學到不少經濟理論和操作模式。

另外，書本可以令佢從前人身上，學到一些經驗。當然，佢年紀比較細，較難理解我們成年人睇架書籍。

最好先選擇佢年紀水平，和他有興趣的書籍入手。之後才慢慢加入一些，未必是他有興趣，但又對他理財知識有幫助的書籍。

家長在遊戲和閱讀時，要多加讚賞，對佢學習會有激勵作用。

如果你本身無太多理財知識，就係教授小朋友同時，自已都要增進一下，甚至一齊學習。可以作親子活動之餘，都可以提升雙方學習的樂趣。

------------------------------------------------

Q22049：

老師：我在重整現時持有的股票組合，由於未到8月上課時候，唯有再麻煩老師，唔好意思。想請教以下幾隻股票是否優質和他們的合理價範圍。謝謝！

405
939
2822

此外，以上三隻股票是否都屬於平穩增長股呢？謝謝！

龔成老師︰

這3隻股票，都係優質，同時現價都在合理區，可以分注入貨。

越秀房產（0405）和建行(0939)係收息股，增長力較弱，主要係收下息。以你年紀，收息不用佔太多，大約2成左右好了。

南方A50（2822）算係平穩增長股至潛力股之間，有一定波動性。此股適合你年紀，可以考慮。

------------------------------------------------

Q22050：

老師你好！我居住在澳門，今年45歲，自住房屋市值約900萬還欠貸款400萬，每月供17000。

另有一間市值約600萬已供滿收租約9000（澳門租金較低）

因疫情上年失業，現新工作每月薪金只有18000再加上9000租金，每月收入共27000，每月供樓保險加上生活開支剛好月月清，另有60萬積蓄想投資股票市場。

現時手頭沒有揸股票，想問應唔應該賣咗收租樓，還清400萬貸款，剩餘200萬用來買平穩收息股？還是只用60萬積極蓄投放股市？

另外想買老師你的書，我是股票初學者，適合先看那一本？

龔成老師︰

其實物業都係一種資產，除非你收租物業升值潛力真係好弱，或者質素好差，否則持有用作收租，咁會較好。

至於增值，你可以先用這60萬去做。由於你已經有2個物業，故你新資金應先集中係優質股類，以免出現過度集中風險。

以你45歲，可以選擇一些「平穩增值股」+「潛力股」作投資目標。

由於你現時無太多投資經驗，潛力股這類風險較高的股票，你就不要持有過多，最多維持1-2成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-4成，到時要視乎你投資經驗多寡，和了解這些股票程度而定。

大市現處於合理水平，那60萬資金，你可以先用20-30萬，以"分注"形式慢慢入貨。餘下資金，就等大跌市機會出現，才大力度掃貨，並長線投資。

你可以先睇我架《80後百萬富翁》、《財務自由行》和《股票勝經》，都適合初學者。

------------------------------------------------

Q22051：

龔成老師你好，剛開始月供股票3個月，其中一隻月供2382 平均價179，佢今個月升左好多

我係想長線持有，但遇著咁大升幅，平均價就會拉高 變貴左。心態上係繼續月供 還是停供一個月先？

龔成老師︰

舜宇光學（2382）係有質素和潛力的潛力股，若你係年青至中年人士，月供這隻股票係可以。

現時此股已經偏貴，但由於未到好貴，我地係唔需要停左個月供。短期成本價，係會有被拉高情況，但係月供係一個長線計劃，長遠個價都會拉平衡。

除非佢再升到一個好貴水平，我地可能要減少股款，甚至停供。但大前題係，你有無定平貴的能力。若果無，我建議你不理價值升跌，一直去供。

因為你自行調整供款，如果時機不對，反而大大影響左你平均價格的效果。所以，若你投資經驗較一般，我建議你選好優質股後，唔好理個價，一直供，反而對你最有利。

------------------------------------------------

Q22052：

龔老師你好，我今年31歲，月入二萬五，月存二萬，手持8份儲蓄保險，有啲五年期，有啲十年期，有啲三十年期（大約150萬左右），

有七十萬流動資金，另外有三十萬買咗股票，但坐緊艇包括:

9988（200)$280買入
175 (2000)$31.5買入
1810 （1200）$29.5買入
0066（2000）$38.9買入
1801 （1000）$90.6買入

龔老師我二年後想買樓，想用呢70萬用二年時間滾到100萬，請問有咩建議。麻煩指點迷津

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你持有股票，都係有質素，長線持有係無問題。但信達生物（1801）仍處於燒銀紙的狀態，不確定性好大，暫時唔建議加注。

我地投資股票，其實等同投資一間企業。希望透過其自然增長，以達至財富增值的目的。所以，我地投資一定要較長時間。而2年只算係一個短時期，股價好易出現波動，增加回報的不確定性。

因此，你這70萬不宜作太高風險投資。我建議用盈富(2800)，再加收息股作為組合。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

大市現處於合理水平，那70萬資金，你可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

但這個組合增長力，未必足以2年內由70萬滾到100萬。但佢勝在穏定性較高，在只能投資2年的情況下，這個配置會較為穏當。

另外，"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

你現時持有儲蓄保險，實在係太多。如果佢了一定時間的，你可以保留。但你還很年青，我建議你長線計，應該取消部份，將資金轉至優質股去做增值，會較好。

------------------------------------------------

Q22053：

龔sir，你好！有幾個投資問題想問。

1. 投資黎講，係咪唔應該買保險，或者唔應該買有儲蓄成份保險？

2. 按回報計算，應該買50年樓齡二手樓，還是一手樓？

3. 未來咩房型或者尺數更適合投資？

龔成老師︰

1) 答案係不一定。

我地理財，要做到「攻守兼備」，保險、備用現金等是防守，但防守部分不用太多，餘下資金就應進攻。保險最大的作用是「保險部分」，反而投資作用一般不大，即是買保險，最大作用是醫療、人壽、財產等的風險轉移，將你不想承受的醫療費用等不可預測支出，轉嫁比保險公司。

儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

2) 一手樓，好多時都會有一定溢價，變相令你買貴貨，影響長線回報，所以我一直都唔係好建議買一手樓。

至於50年樓齡二手樓，由於已有一定樓齡，除了本身保養成本會較高外。向銀行貨款也較困難，因此投資價值都較一般。

2個選擇，其實都唔係咁理想。除非50年樓係好平，租金回報率又高，而且係一些大型屋苑，才值得考慮。

3) 房型其實無特定，尺寸最好至少有300呎，可以附合到一個家庭的最低限度需要，投資價值會較好。

其實我地投資一間物業，最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

另外，你再要審視其升值潛力，未來地區上、交通上、生活等等的配套發展，才去下一個結論，咁會較好。

------------------------------------------------

Q22054：

你好 龔sir，Follow左你嘅post都有一段時間 我亦都睇左你嘅著作「財務自由行」「80後2百萬富翁」「股票聖經」「50隻潛力股」最近4月中更參加左你加「投資陪升股課程」剛剛都畢左業

其實我一直都想理財 覺得你講嘅理論好實用及貼地，好有循序漸進嘅思維。

老師你所教嘅方法都係由你經驗所堆積出黎嘅結論 炒股散戶10個有9個都輸 你教嘅長期持有優質股其實先係最快嘅捷徑！

我雖然開始理財或接觸真正理財只有半年多啲 但思維上我確實改變左 而我起碼已每日記帳已維持左大半年 而每月月尾也會檢討 (先發現原來自己成日駛好多無謂錢 !) 多謝阿SIR!

老師 就我個人情況 我有幾大重點想請教 先講我背境

今年34歲 未婚沒有仔女 每年有年終雙糧及花紅 年薪為一百萬多啲

換左樓 樓價700萬多啲 做按揭9成 月供約24k 每月可儲到16k 左右 當中10K放左係月供股票

1. 現金約有450k 放左係買樓是「高息戶口 」約 1.4% PA – 都係聽阿SIR教導 留番D現金當做BACKUP 及緊急用錢 – 見戶口又有少少息 所以暫時放係度

2. 股票約有 450k 全部都係2-3月入
788 - 10000股
823 - 400股
1177 - 4000股
1448 - 2000股
1833 - 400股
1928 – 2800股
1972 - 5600股
3067 - 6000股
3918 – 2000股

3. 月供股票 每月10k – 由本年3月先開始供
00175 – 2k
00700 – 2k
01211 – 2k
02800 – 2k
09988 – 2k

4. 沒有其他兼職及副業

問題：

1. 目標 40歲前有1000萬 以上咁樣執完條數好似都未有咩FEEL 想請教阿SIR有咩建議可達到我目標?

2. 計過月複利息回報 上堂提到10-15% 已叫做好理想 但依個都係參考% 點可以令自己既增長穩定D？見住自己D投資上上落落 我連唔蝕都無信心 應該點好

3. 調整緊股票係6:4 水桶1 vs 水桶2 - 一直都賣咁D 1972 而放入D水桶1度 但見住D水桶1好似都無咩升 無咩信心做到阿SIR講既每年10-15%增長 想請問應該點調整好?

4. 因為我工作時間都叫自由 亦都放星期六, 日 但我問題係真係無咩特別興趣及嗜好 點樣先可以令自己多D興趣 從已令自己多個機會有個副業或兼職 我依家只有打工一份收入 好似好危險咁

5. 自己打算2022年結婚 係緊急用錢度預算300k黎用做結婚 都打算結完就生小朋友 如結左婚及生小朋友 應該點調整以上所有策略?

6. 年年交稅都10幾20萬 好肉赤 有咩方式可以減少 或更好處理方法

最後想問阿sir你係咪真係有開到糖水鋪？哈哈 我要去幫襯一下 ! 謝謝

龔成老師：

我不會公開你的名，不過問題會放上網，等更多人能學習。

1）你現時的理財不差，配置平衡，同時配合你的年齡情況。但如果要去到$1000萬，就要再加努力，因為你現時每月儲到$16000，一年約20萬，就算計及投資回報，以及你現時持有的資產去增值，要滾存到$1000萬都不易。

除非你之後用一些較進取的方法，例如集中投資潛力股，以及自己發掘潛力股，早市場一步找到，投資並得到數倍計的回報，就有機，但這要你付出較多，你要每星期花大量時間去尋找潛力股。

2）我地最重要睇長期回報，目標一年有10%-15%，但不用每年睇，而是睇長期的平均，你已經方向正確，保持進行就得。

只要你多做功課，全面了解企業，以及其增長力，就會好有信心。

3）你要睇長期，你的思維仍停在短期股價。其實你要睇「企業成長及價值」先得。

4）你要多了解自己。如果唔知自己想發展D乜，就「試」，有時試試下，你就會更了解，例如試下做小生意，找一些你平時不會想過做的兼職，唔好浪費左你的時間。

如果無野做，就花多D時間去研究企業，睇年報。

5）最重要是你預留$30萬以上的現金，餘下先投資，由於2022年與現時已接近，因此這$30萬不宜投資。

只要預算要結婚的資金，準備好。餘下資金就算進取少少，都無問題。

6）如果有需要，就開公司，當然你最好問翻會計師佢地的意見，現時公司頭$200萬的盈利，交約8%稅，比高薪打工仔交的稅仲少，你可以上網了解下。

------------------------------------------------

Q22055：

龔成老師你好，我想问下7522只股，当时听朋友介绍买下7522，平均价为3.75买入8万股，这股现在一直向下，我应该怎樣处理，是否应该溝貨，还是走货？请賜教。

这只股會否會跌倒变费纸的

我不憧买股，这段时间看了你的视频，知我买的股亂七八糟，有909、9888 全部虧損。我有一百万來投资，现在用了一半，我应怎樣重新组合，麻煩晒。

龔成老師︰

你先要緊記一個好重要的概念，我地買入一隻股票，一定要知道佢質素、行業前景、財務狀況等，才去投資。

唔好聽朋友講、或者聽消息，就去買貨。如果你連隻股票背後買什麼、公司如何賺錢、行內有什麼優勢、點解未來有發展和增長潛力，都答唔倒自已，咁就要停一停，唔好投資住。

ＦＩ二華夏納一百(7522)投資目標是提供在扣除費用及支出之前，盡量貼近納斯達克100指數每日兩倍反向表現（-2x）的每日投資業績。

如果納斯達克100指數跌1%，你就會獲利2%(另扣管理費)。但若然納斯達克100指數向上，你就會虧損。

我對這類產品有保留，納斯達克100指數在過去一直反覆向上，所以長遠計持有這股對你"不利"，一定多於"有利"。

建議你長遠就算不全數沽出，也最好沽出大部份，換碼至其他優質股較好。

其實，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

明源雲(0909)和百度(9888)都係偏向潛力股類型，都係有長線投資價值。若你係年青至中年人士，只要唔係持有過多，可以守。但若佔你佔合較多，最好沽出部份，去平衡一下風險。

若你對投資知識不多，我建議你先用月供去儲貨。現在你每月先用5成儲蓄做月供。其餘先儲起，用一邊月供一邊儲蓄的策略。

大市現處於合理水平，餘下50萬和每月儲蓄，就等大跌市機會出現，才大力度掃貨，並長線投資。

若你現時組合，只係得1,2隻股票，我建議你都將部份股票，換碼至上述優質股，令組合風險可以更分散，整個組合也會較健康。

------------------------------------------------

Q22056：

老師，我近期抽到白居二，想購入沙田愉翠苑，為小孩的校網作準備。

問題1. 三房盤唔多，呢期成交量又高，價錢有的癲，三月至今升了12.3% 有的單位價亦企得好硬，心怕而家唔安排，睇定啲遲下連盤都冇！借問一聲，你有何看法？

問題2. 看新聞明年會加息，我究竟用H息口好，定用P息口好呢？

人生第一次 去選擇買樓 這麼重大的決定，真想跟老師分享

有睇中到盤, 但價錢不到位,預700-720萬, 睇中單位為740萬，在想要不要去馬, 怕錯過左, 之後就冇合心意的盤...

老師...求你指引我...

龔成老師︰

1) 本身三房這類大單位，供應係較少，故價格較敏感都係正常。雖然佢近期升左唔少，但由於白居二始終跟市價，有一定拆讓，故有一定吸引力。

加上這個是你自住房，考慮重要主要係是否配合「你長線生活需要」和能否做到「供得起」。如果係無問題，你都可以考慮入市。

2) 明年是否加息，暫時都係一個問號。以現時狀況計，H息會較好。但政府規定，居屋只能用P按，故你其實無得選擇。

------------------------------------------------

Q22057：

老師你好！我係你股票學生，完最後一課，感受到老師的愛心同努力，一星期兩晚3-4小時站立不停講課，課程內容非常豐富，非常感激, 辛苦你了。

另外，想請問之前不懂股票，自己又想穩健及有利息，買了：

恒生銀行 。3500
匯豐銀行。4400。
領展。$2000。（月供）
盈富基金。$3000 （月供）
小米。200
瞬宇光學。300

其實之前買匯豐恒生作收息，其他是認識你後才購入。我知道要減持銀行股，請指教應該怎樣保留。謝謝

龔成老師：

你現時較大的問題，是銀行股較多，你不要再增持這類，你應該溫翻第2堂的筆記，慢慢調整翻一個適合你年齡及風險承受程度的組合。

我會建議你過1年後，經濟好翻D，匯豐（0005）上翻D，減持部分，餘下就慢慢減，直至去到適合你配合配置的比例。

至於恆生（0011），質素比匯豐好，因此留低的比例不較匯豐多。

至於其他選股，其實無問題的，都是一些有質素的股票，你持有無問題。至於月供部分，你可以長期進行。

------------------------------------------------

Q22058：

老師 我抽中白居二 但而家二手樓市都好貴

但唔利用今次機會又怕再抽唔到
你覺得其實買公屋（eg 華貴邨）有你升值潛力？

樓齡29年 - 但好似有地鐵2026年華富有地鐵。

另外一係買私樓 要承擔有機會租唔出時 要俾供費 ，心目中係天水圍wetland seasons bay.

主要都想升值 搵到錢 可以財務自由！

你點睇呢兩個選擇，我知都幾大分別.....

龔成老師：

從自住的角度，你好好運用白居二會較好，公屋在投資角度的價值不及私樓，但從自住角度，其實可以考慮，因為你能以較少的現金流支出，解決了自住方面的問題，你就可以有較大的餘下現金流，去進行其他方面的投資。

華貴邨在地點不差的，港島區始終近中環，但地鐵相信有排先起好。因為佢要拆左華富邨，安頓好原本的居民，之後先用地鐵一整發展，相信要10年時間先落成。

華貴邨在公屋裡，算是有質素的，但不是大升類，只是平穩增長。如果你從自住的角度考慮，不是不可。

------------------------------------------------

Q22059：

龔 Sir，現時持有：

1000 股 9988 @$213
4000 股 1928 @$36.9
120,000 股 728 @$2.58
2000 股 941 @$48.7
30,000 股 3033 @$7.9

請問對此組合有何意見?建議加入金股，車股到組合?

現時買 7299 定2840 會較好?

龔成老師：

你現時持有的股票，基本上都是有質素的，其實問題不大，你持有就得，部分股雖然略有回落，但長線有得守的。

但你長遠，最好建立一個更平衡的組合，同一股票，最好佔組合比例15%以下。

你可以加入ＳＰＤＲ金ＥＴＦ（2840），這是一隻追蹤黃金價格的交易所買賣基金，當金價上升，佢都會上升，當金價跌，佢都會跌。

睇翻佢過往的價格表現，基本上都追蹤到黃金的價值，因此都可以成為投資黃金的工具。

只要佔組合比例不過多就得。

------------------------------------------------

Q22060：

想問，其實如果我長揸6666，唔會會可以上番去呢？

好驚佢會爆煲啊，到時渣都冇

龔成老師︰

若母公司出事，的確有機會出現，母公司要沽出恒大物業(6666)股權套現還債的情況。如果真係出現，的確會令股價受壓。

但你要記住，我地投資係睇長線，和企業本質。恒大物業(6666)負債情況，無母企咁差，加上物管行業，預期未來會發展得唔錯，因此有投資價值。

不過，集團大部份物業，都係來自母公司。故母公司出問題，令發展減慢，有機會會影響到集團發展。

當然，這些都是未知之數。以現時狀況計，恒大物業(6666)都有投資價值。如果你真係較擔心佢前景，你可以沽出部份，去平衡風險。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

#新年故事：【賣懶】

「賣懶，賣懶，賣到年三十晚！」一群小朋友成群結隊在街頭大喊，手中拿著大紅燈籠、線香和紅雞蛋。

年三十晚，吃過團年飯後，我和他結伴出門，打算去逛逛家附近的年宵市場。

「喂，今年，你賣了多少懶？」他靠近我，故作神秘地小聲問道。

每年農曆新年前夕，他都會到市集擺攤賣懶。和他平常生活和工作的態度一樣，他連賣懶都比別人賣得認真積極。每年，他都會在攤檔盡力叫賣，務求將舊一年的懶在年廿九晚前全數賣清光，好讓自己能在年三十晚好好休息，然後可以過一個朝氣蓬勃的新一年。

我經常好奇，為什麼他做每件事都能出盡全力，而他總會回答我相似的答案：那是每年成功將懶賣清光的效果。

「沒有啦，我今年沒有賣懶。」我說。

「甚麼？沒有賣？」

他晴天霹靂，彷彿在年終沒有賣懶是人生中最不可能接受的事情一樣。他追問：「這是甚麼意思？可不能這樣。賣不光你的懶的話，你可以叫我幫你賣啊。」

「不用啦，真的不用。」我續道：「我不打算賣懶了。」

「賣懶，賣懶，賣到年三十晚！」另一群小朋友成群結隊，在街頭大喊。

我緩緩走近那群小朋友。

「來吧，你們有多懶？哥哥將你們的懶全數買回來。」

那群小朋友又驚又喜，畢竟他們從來未見過像我一樣年輕的人竟然會買懶。一般而言，懶都是賣給有錢人、退休人士或老人家的，年輕人又怎可以買懶？買了懶之後，豈不是不能認真工作，不能憑著獅子山精神力爭上游，每晚加班至晚上十二時追求升職加薪年終花紅？雖然如此，小朋友還是興高采烈地張懶全數賣給我，畢竟有賣懶機會，誰可以錯過。

「你瘋了嗎？你在幹甚麼啊！」朋友急得面紅耳熱赤，我只好擺出一個無奈的神情，拍拍他的膊頭，讓他安撫情緒。

賣了這麼多年懶，我從未思考過人要賣懶的原因。某一天，我突然反思，人為甚麼要賣懶？為甚麼要賣懶賣得這麼辛苦？我不明白。

人們總說忙是好事，但忙到連安安穩穩地睡個午覺也是遙不可及的事，這是好嗎？我們就像兔子般忙碌追求用魚竿綁在自己眼前的紅蘿蔔，卻永遠無法享受紅蘿蔔的美味。

我在一個寫揮春的攤位前停了下來，正當朋友一臉狐疑，我拿起毛筆，揮筆寫下新年願望：

「我不想努力了」

「就是這六個字？」看管攤檔的伯伯不解地問。

對。新一年，只想忙，忙著懶。

【新年習俗：賣懶】

「賣懶！賣懶！賣到年三十晚！」傳統上，年三十晚吃過團年飯後，小朋友會提著燈籠，拿著線香和紅雞蛋，成群結隊到廟宇上香，再吃完紅雞蛋，就算是賣懶成功；更有人說，小朋友會在年三十晚四出走訪，再逐家逐戶拍門派發寫有「財神」的紅紙，趁此機會𢭃利是；「財神」當中，有機會混入寫上「懶」的紅紙，假如順利派發便算是成功賣懶，代表來年將可以更勤奮努力⋯⋯

近年，這個習俗漸漸消失，也愈來愈少人聽過賣懶。你曾試過賣懶嗎？也許，我們漸漸不再賣懶，是因為與其努力，我們都寧願好好懶下去。

Story by StoryTeller Team @everyone.is.storyteller
Illustrator：Karry Li @karryli

StoryTeller 是一個說故事平台。我們連結不同創作者，希望透過文字、圖畫和聲音，重新把故事帶回生命。StoryTeller 同時亦是獨立創作單位，我們收集人與人之間的片段，將不同人的故事帶到你面前。我們相信故事的療癒力量，感受別人，也是感受自己，因為沒有你的故事也是你的故事。歡迎任何合作／品牌推廣，請電郵至 info@story-teller.com.hk。

#沒有你的故事也是你的故事 #賣懶
#農曆新年特備 #新年故事 #Storyteller #KarryLi #EveryoneisStoryteller

📚 成為 Reading Club 會員，支持 StoryTeller 繼續創作美好的故事：
https://bit.ly/2MNRcPK

📻 收聽 StoryTeller Radio ：https://store.story-teller.com.hk/pages/podcast (link at IG highlight)
📖 預購 Ztorybook Issue 01 : https://bit.ly/3j9RLzv
👉🏻Tag us at IG @everyone.is.storyteller to be featured
📮投稿你的故事／藝術作品：https://bit.ly/2FwN6G3

→Follow @ztorybook.official 留意最新動向

【龔成問答信箱】（Q12361-Q12380）

Q12361：

龔成老師，我係你舊生，正在計企業素質與估值，想請教下你。

請問你覺得耀才證券金融（1428）素質如何？ 因為我認為股市、經濟長遠會向上，股票市場愈來愈多人交易。以下係我既分析

業務：提供買賣股票、衍生工具股務，并從中收取傭金。

在香港擁用23間分間，客戶人數超過23萬，而且管理層打算繼續把握機遇，加開分店，吸引內地客源，長遠有望進一步提高客戶人數，增加市佔率。

佢每年都會投放資金加強伺服器保安、提升服務速度，加上手續費、傭金既平，令耀才擁有一班忠實既用戶。

市值：28值
年度：2014/2015/2016/2017/2018
收入（億）：
4.1 /5.16 /6.75 /5.62 /9.44
盈利（億）：
1.66 /2.18 /3.25 /2.71 /5.16
每股盈利：
0.14 /0.15 /0.19 /0.16 /0.34
每股股息：
0.041 /0.038 /0.057/0.048/0.091
派息比率（%）
28.14 /24.98 /29.7 /29.9 /29.9
ROE(%):
16.6 /12.55 /15.98 /12.36 /19.57
流動比率：
1.25 /1.1 /1.49 /1.33 /1.24

優點：香港大型既證券行之一，有一定市場佔有率，分店、客戶數量持續增加，管理層有野心，想進一步吸引內地客源。

長遠股票、衍生工具交易一定愈來愈多，故前景正面。
弱點：競爭對手多，當經濟、股市處於弱周期，交易會減低，進一步影響盈利

投資策略：呢類股票股價較易受股市環境影響，以現時環境可分注入，在股市陷入狂熱時賣出，這股不宜太大注，因為負債比率偏高，流動比率較低，當股市恐慌時有存在危險

以上是我既分析我既問題是

我計出既估值介乎$1.8-$3.9之間，現價$1.4屬平，有計錯嗎？

之後有件事我比較擔心，我在股票機目到，耀才有掛盤一直買入/出售自己股票，係要營做交易量大的手段嗎？

最後老師點睇呢只股票？
多謝老師解答

龔成老師：

耀才證券金融（1428）都算不差，有點質素的，但這股的規模不大，業務較為波動。

佢生意近年保持增長，反映業務正不斷發展，這是正面的訊息，但仔細睇要留意翻，就以17/18年度來講，收入$9億，比上年$5億有明顯增長，若果睇年報的附註，會解釋收入結構的組成，經紀佣金及孖展融資利息收入，是最大的部分，而帶動17/18年度收入明顯增長的，好大程度來自「孖展融資利息收入」。

這反映，當市況好時，佢這部分會有明顯增長，但當市況差時，這批客有可能蝕左唔少錢，之後要復原都要一段時間，而佢業績可能會有較大的影響。

這反映佢業務一定會好波動，從而在估值上，都不能過高。

你上述的分析都大政正確，講出了這企業的重點，在香港證券行中，佢都算有知名度，因此有生存的空間，而香港品牌、內地客源，成為了佢的發展方向，因此都有增長潛力的。

整體來說，這股有投資價值，有發展，但規模始終不大，同購業務風險較高，所以投資注碼不能太多，同時估值時要保守少少。

所以，你估值數字，應該再為調低3成，咁會比較好，現價大約處合理區較下部分，都算有投資值博率，但你要預佢股價較波動。

至於佢掛盤買自己的股票，其實不用擔心，佢的客戶要買賣時，就會出「耀才」的名，當客想買這股時，你就會見到耀才盤掛出，佢的客較多買賣這間公司，不出奇的。

如果佢有心造大成交，就唔會用佢自己公司名掛盤做買賣，所以，你唔洗擔心。

------------------------------------------------

Q12362：

龔Sir 我係你股票班同學，自從接觸左你專頁，我完全改變左我資產結構，對資產概念完全改變，多謝曬你！

我建立左團隊生意，網上課程等等，都係參考你的財務自由行和致富藍圖，建立過程唔難，但發覺最難係維持。

因為每天都面對好多人問一些重覆，而無聊的問題，我見你也能夠一直回答，原全沒有煩厭的感覺，請問這如何做到？如何保持積極。

而同人合作生意時，10個有11個人，都是得個講字，想問下龔Sir 如何解決合作的問題，或者有龔Sir 會有咩先小人後君子的條款設定？

希望龔Sir 新書大賣。

龔成老師：

同人合作是一個好複雜的問題，你一定要想「互相的利益」，這件事要有共同的利益，要有長遠的利益，你要同對方講到，這項目會帶到比佢點樣的利益。

坦白講，我近年偏向「買賣」多過「合作」，即是我比一筆錢，去買你為我提供的某些服務，始終明買明賣比較好。

如果你同人合作，一定要寫合約，唔好得個講字，唔好只講信字。

至於你話答問題方面，其實你要想貢獻方面，我地做生意，當然想賺錢，但最希望在賺到錢的同時，可以幫到人，對社會有貢獻，當你發現每次都幫到不同的人時，事情就會不沉悶了。

------------------------------------------------

Q12363：

龔老師，我28歲，暫時有6手領展，好五好再加？
五明既地方係，既然你話優質股係可以長期持有，

例如領展，甘點解五可以不停有錢就買領展？
例如我儲夠100手領展咪可以五洗做。
同埋點解你好似五太推薦領展，見你有時推介陽光/月秀，都五會推領展。

如果我只會一手手買，係五會放，頂到老
有咩你係建議？

因為我由細到大都係屋村長大，睇住領展發展，所以比較偏好領展，

同埋除左不停盡力累積優質股作退休用，我宜家仲有咩動作可做？我五想老做汁紙皮訓m記

龔成老師：

領展（0823）是優質股，這點不用懷疑，但你都要明白，優質股都會有「平貴」之分，如果你在貴的價位買入，長遠你的回報率減。

所以，我地應該善用手上的現金，在適當時買入。

另外，我地理財，其實是建立一個組合，這個組合要有平衡的分配，如果你過份集中在單一股票，就會有集中風險，就算這股優質都是。

另外，你累積優質股的目的為退休，其實你可以計劃得更好。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，現時你應該累積有增長力的股票，領展是可以是其中之一，同時，你要學會投資技巧，在選股、企業估值、投資時機裡下功夫，令你加快財富增值。

------------------------------------------------

Q12364：

請問0178莎莎國際，你之前提到莎莎長遠質素向好，但2019年開始不斷下跌。

是其營業方面有問題，還是受最近香港政治因素影響其生意額，如果是後者，是不是應該趁机吸納?把握在便宜區入貨

龔成老師：

莎莎（0178）面對的問題，中短期影響較大，例如香港零售業，香港社會運動，人民幣下跌等，這都會對消費有影響。

長遠而言，這些因素影響不算太，不過，網購及旅客的消費力減弱，有些是長遠性對佢有影響，因此，這股在估值上，有少少調整。

現時在合理價，小注投資可以，但就不能太大手投資。

------------------------------------------------

Q12365：

我最近轉新工
但是只有1萬元

如何好似你咁5年滾到100萬元?
因為我扣埋車費飯錢mpf都唔剩好多

仲有每個月保險2千幾元
又要還債2千多元。。。

咁你話我點好

龔成老師：

首先，要盡力慳錢，令自己有本金，無本金就乜都做唔到，就算只儲$4000，都是一個數目。

另外，你要學投資，盡力將資金滾大，你要學選股、企業估值的能力，然然你要不斷研究股票，不斷選股，目的是早市場一步找到有潛力的企業，如果可以把握到一個機會，都足以令你的財富倍計上向。

最後，建議你增加收入，你可以找兼職，做小生意，長遠來說，一定要突破現時的人工。

------------------------------------------------

Q12366：

老師你好，我爸爸在2010年左右以股價1.2左右入手了首長國際（0697），然後不斷跌，佢係0.7時再入手，現時共投資了6萬港元。

然而現時股價一直只跌不升，目前只有0.29，我睇左下這間公司的資料，盈利上都好飄忽，有d連2018年的數據也空了。

我想問首長國際還有潛力、有反彈的空間嗎？還是該忍痛止蝕？謝謝！

龔成老師：

我地持有一隻股票與否，關鍵位是企業的質素、前景，買入價不是關鍵因素。

首先，你要用一個第三者的角度，分析首長國際（0697），如果你這刻有資金，會否入這股？

佢本身係中國，從事停車場經營管理，以及私募基金管理業務，因此業務會比較波動，如果你睇翻過往5年的業務，有3年都出現虧損。加上佢生意十分波動，都反映這企業的投資價值不高。

當你明白上述的狀態後，就知這企業投資價值不算高，亦不值得加注，賣出這股是較好的做法。不過，見佢最近有盈利改善的情況，所以，你可以考慮先賣出一半，然後餘下再等下，睇下企業的業務有無改善，先決定餘下的貨點處理。

------------------------------------------------

Q12367：

Hello, 龔sir

想查詢一下你意見有關月供，本人今年30歲，剛開始月供11, 823, 1038, 每隻1000蚊，呢幾隻股OK嗎？謝謝

拾單問多樣，本人13.66 買左175, 早前比大摩唱淡，應該等佢上返定點？ 只係少少地買左2手，THZ

龔成老師：'

上述你月供的，都是有質素的股票，你可以開始進行，長線投資，每隻$1000都可以的，但如果日後收入增加，宜慢慢增加金額。

月供股票唔好理中短期股價，集中長線投資就得。

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

至於所謂的大行目標價，其實唔需要太著重，好多時都只是講下，同埋只集中在中短期分析，你長線投資就得。

不過，中國車市放緩、外來競爭、行業競爭加劇，都成為不利的因素，相信中短期仍會對佢不利。

現時價位在合理區，但股價波動，要長線投資，車市要慢慢才好轉。但你有得守。

------------------------------------------------

Q12368：

老師你好，想請教一下投資策略。

現時有十二萬積蓄，其中46k 分別為股票 0003 (1100股）and 0005 (400股)，其餘為現金。

每月月薪50k, 年終多數有一個月花紅。每月扣除支出後能儲40k。

理想目標於七年後置業。

想請問應該怎樣分配收入投資？該投資什麼股票或債券才能增加收入？每月購買0003+0005是否太保守？

龔成老師：

你有7年時間，財富仍有一定的增長力，建議你投資平穩增值股類別，煤氣（0003）可以，但匯豐（0005）就比較保守。

債券只是產品，不是真資產，同時回報低，未必適合你投資。

最簡單的方法，就是每月做月供股，供$30000，盈富（2800）、銀娛（0027）、長建（1038）、中銀（2388）、港鐵（0066）、恆基（0012）。

------------------------------------------------

Q12369：

龔 Sir 您好! 我是你的忠實讀者, 由2017年開始拜讀你的著作及文章, 獲益良多。

近日檢視自己的股票組合, 其中2015年港股大時代我亂買下的一些股票仍然蝕很多

我上AASTOCK查看過以下公司的財務報表, 可惜我看不懂, 所以想請教你, 我是否應該

將以下5支股票沽出, 留資金待將來跌市時買入你介紹的優質股呢?

現金 180萬
月供股票 72萬 (賺緊3萬)
另有股票 現值 88萬（包括以下5支，全部都蝕緊）

460、604、1114、1300、1800

除了股票和現金外, 我沒有其他資產, 我現年52歲, 單身, 與父母同住, 希望利用股票投資及收息作退休用

打算未來5年逐步買入優質高息股,
所以想重組現時的股票組合。請指教。

龔成老師：

月供的部分，如果是優質股，就可以保持長期月供，唔需要因為有錢賺就停止。

至於你現時持有的股，要理性處理，始終我地持有的最大理由，是企業的質素，而買入價只是一個心理因素，唔好比佢影響。

四環醫藥（0460），這股則比較麻煩，因為曾經停過牌一段時間。

如果你睇翻佢年報中，每年獨立核數師的意見，你會見到在2014年出現「不表平意見」，2015年、2016年出現「保留意見」，這都反映核數師對佢盤數感到有可疑，這是一個十分不利的因素。因此，賣出是較好的策略。

深圳控股（604）唔算差的，你可以持有，這股有得守，股息不錯，你可以當收住息先。

華晨中國（1114）都有質素的，但中國車市放緩、外來競爭、行業競爭加劇，都成為不利的因素，相信中短期仍會對佢不利。

股價由高位回落不少，除了反映過往處貴水平，現在回落至合理水平外，同時反映市場預期中國車市的不利情況。相信這股中短期股價仍會不利，但長遠前景仍在的，有貨可守。

現時價位在合理區，但股價波動，如投資要分注，同時要長線投資，車市要慢慢才好轉。

俊知集團（1300）規模較細，質素算是不過不失，如果持貨不過多，無問題，可守住先。太多貨就要先賣出部分。

中國交通建設（1800）增長力較弱，只是收息，你預股價上得較慢，但這股並不是無質素，所以睇你投資目標，持有收息可以。

上述的股，未算是最優質的類別，除了四環外，其他可以等較好的時機先賣，四環就要賣出。然後再將資金，慢慢轉成優質的收息股類。

你可以開始為自己的退休做準備。

------------------------------------------------

Q12370：

老師你點睇歐洲經濟？我在考慮強績金應否加入歐洲市場相關的股票基金

龔成老師：

脫歐問題，過往的歐債等問題，仍然對歐洲經濟有影響，不過已慢慢好轉，但長遠來說，歐洲仍然有債務等結構性問題，只能視為一個一般經濟的國家，不能視為理想的經濟地區。

強積強你可以考慮小部分，這刻算是不貴，有投資值博率，但長遠發展又唔算好勁，所以小部分配置就得。

------------------------------------------------

Q12371：

內地燃氣股你點睇？

龔成老師：

長遠發展正面。

因為中國的污染及霧霾問題嚴峻，過往中國為追求經濟發展，一直忽視相關問題，近年人民對這方面愈來愈關注，加上污染問題會衍生其他社會問題，例如影響人民的健康，這會對社會造成經濟上損失，因此，中國政府知道這問題一定要面對。

為減輕對煤炭和原油等污染嚴重能源的依賴，使用清潔能源是重要方向，與煤炭及原油等傳統能源資源相比，天然氣較為清潔，產業符合中央的方向。

國家出台的發展規劃中，多次強調天然氣對保護生態環境有利，能改善大氣質量，並能提高公眾生活質量和健康水平。

相信長遠來說，這行業特別是下游部分，前景不錯。

------------------------------------------------

Q12372：

老師，ROE是甚麼？

龔成老師：

ROE是「股本回報率」，公式是「盈利」÷「股東權益」，盈利就是上年度的全年盈利，而股東權益就是會計上，股東的部分，這並不是由二手市場的股價計算的，即計算時，不是用「市值」計。

「股東權益」是會計數字，將企業的總資產，減去總負債，就是股東權益的部分，反映股東在會計上，擁有這公司多少資產。

------------------------------------------------

Q12373：

如果賭股,應該揀金沙(1928)定新濠(200),見你推薦金沙係優質股,亦有文章介紹新濠,想知揀邊隻好

另外想問問老師點睇新世界(017)?

新世界接班人上場後,係各方面都有唔少動作,無論商場,酒店,虛擬銀行都做得積極,係內地發展都唔錯,盈利好似漸漸提升,想知老師覺得呢間公司點?

龔成老師：

因為澳門賭業股，基本上每隻都有投資價值，因為開賭本身是好好賺的，當中以金沙（1928）會較優質，因此我會建議投資金沙。

至於新世界（0017），不差的，相信長遠的前景不錯，有增長力，但由於業務已龐大，因此無法高增長，只是基本增長類別。

------------------------------------------------

Q12374：

老師，請問ETF市盈率係邊度搵？我係apps搵吾到，還是有計算的方法？謝謝解答，祝新書銷量節節上升

龔成老師：

因為ETF是一個基金，當中有好多股票，因此，一般都唔會列出市盈率的，你找不到是正常。

如果要找，就是找翻原來指數，例如盈富基金（2800），就要找翻恆指的市盈率，你上「恆指服務公司」的網站就找到。

------------------------------------------------

Q12375：

老師不好意思, 想問多少少. 2638 現在入可以嗎? 還是等回返7個幾先?

龔成老師：

港燈（2638）在$8以上，是略貴的水平，早前跌一跌落去$8以下，之後又上翻去，這股有質素，是收息股，但增長力就無。

所以，你可以等$8以下先考慮，如果這刻入，最好就分注或月供。

------------------------------------------------

Q12376：

老師，關於博彩業的一些問題，你有什麼意見嗎？
同位於亞洲的日本開放賭場及綜合渡假村，對澳門博彩業會否構成衝擊呢？

澳門博彩主要做中國客，但日本係旅遊業真係好出色，相信渡假村質素亦能與澳門相比，會唔會有好多中國客去日本賭，順便可以遊日本...（因為日本產品亦深受中國人歡迎......）

本人手持一手銀娛，雖知道銀河3、4期以及橫琴有重大發展，亦知道呂志和、呂耀東一直想於日本投資賭業（休閒娛樂），所以龔成兄你覺得日本開賭對濠賭股是利還是弊..？ （特別是銀娛）
謝謝！

龔成老師：

日本開放賭業，的確會對澳門有影響，但就未到核心性，始終澳門是中國的地方，同時賭業及娛樂等的各配套，其實都發展得好好，因此唔需要太擔心。

銀娛（0027）會投日本的賭牌，這刻未知結果，因此好難下定論。但佢本身澳門的業務，已足以這股的投資價值，你長線持有就得。

------------------------------------------------

Q12377：

龔成老師 我而家月供 9000 23歲 月入16000
3000 03
2000 12
1000 823
1000 66
2000 11

1.想問組合有冇問題 心大心細緊11要唔要轉6823

2. 想問要達到財務自由例如20000 一個月被動收入 以上組合要滾存幾耐左右 真係計極都唔識

3. 當我滾到有第一桶金 下一個步驟係咪可以諗 再投資 例如置業 生意 移民 或者保守d 將組合重點收息股

龔成老師：

1）你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

不過，香港電訊（6823）是收息股，而你這刻其實要「增值」，因此不用轉。

2）假設你每求每月收息$2萬，一年為$24萬，假設投資6%思報的收息股，你就要有資金，$400萬。

若果你每月投資$9000，回報率10%，17年後，你會滾存到$430萬，到時可轉為收息股，達成財務自由。如果你想加快進入財務自由，有兩個方法，第一，增加本金，第二，提高回報率，例如在組合增加潛力股比例。

3）要睇你到時的目的，你可以將部分本金用作置業，同時部分再投資，然後投資增值後又再做其他野。不過，這刻集中想「如何滾大財富」、是最重要的。

------------------------------------------------

Q12378：

老師 如何看1157？
行業週期上升？
謝謝

龔成老師：

中聯重科（1157）主要從事研究、開發、生產與銷售工程機械、環衛機械和農業機械，提供環境解決方案，以及融資租賃服務。

企業早幾年的生意不太好，有持續下跌的情況，盈利亦比較波動，到近一年才好轉，而股價都升翻唔少。

這股現時估值算合理，但不算平宜，投資值博率只屬中等，你分注投資都可以的。

------------------------------------------------

Q12379：

龔成老師你好! 請問你對 1359中國信達 有睇法嗎?

恆指成份股中算是跌得很低殘, 所以如果本質仍不錯的話打算買入, 希望可以參考老師的意見, thank you

龔成老師：

中國信達（1359）並不是恆指成份股。

佢的業務包括不良資產經營，投資及管理、金融等，這類業務都較為賺錢，比其他的金融機構賺得更多。

不過，當涉及這些不良資產的業務時，就一定會有較大的潛在風險，當經濟及金融市場出現逆轉時，對佢的打擊唔少，到時股價亦會較為受壓。所以這類股的優質度唔算太高。

由於佢有規模，因此又未至於好大問題，中短期的波動一定有，所以，如果你投資金額不大，小注投資，都可以的。

------------------------------------------------

Q12380：

老師你好 睇信報見到介紹收息股1628
老師點睇？

龔成老師：

禹洲地產（1628）主要於中國廈門、上海、福州及合肥從事物業開發、物業投資、物業管理以及酒店業務。

生意的增長力不錯，但負債略高，都有投資價值的，但就不建議太過大注。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【Finspark第一次舉辦綫上收工宴！】

2020年大家真的過得不容易
由於行動管制令導致經濟放緩
許多公司為了開源節流
都沒有辦法發放年終獎金或花紅給員工
沒有年終獎金或花紅來過年
這對打工族來說簡直是惡夢啊！
慶幸的是
多虧了我的員工們這一年來的努力
讓公司在這麼艱難的一年裡
居然還賺到了錢
為了答謝員工們的努力付出
所以我舉辦了一場「豪華線上收工宴」
送員工佛跳牆
讓他們在家裡也能感受收工宴的氣氛
不可缺少的
當然是總值87萬的花紅
是不是難以置信
我真的捨得給這麼多的花紅嗎？
想看我怎麼花式寵員工嗎？
想知道的話就點快點擊影片觀看吧！
另外
我們公司還繼續招聘人才唷！
有興趣的朋友可點擊下面的「求職申請」鏈接！
https://valueinmind.co/join-us/
.
獲取我的獨家理財貼士
http://bit.ly/get-spark-financial-tips
.
【免費】股票投資工作坊 - 從0開始學股票
http://bit.ly/join-free-webinar-now
.
🔥點擊連結瞭解更多詳情或購買🔥
https://valueinmind.co/zh/sparks/
.
👇更多相關影片👇
傳銷、微商、保險，月入過萬是騙局？
https://bit.ly/3azM4Iz
.
你打算幾時退休？
https://bit.ly/2Zse2ja
.
我最失敗的理財規劃——生小孩！一次過算給你看！
https://bit.ly/3u454Xh
.
⚡ Spark 的 Facebook 很熱閙
http://bit.ly/2X3Cgwr
.
⚡Spark 的 YouTube 很多教學
http://bit.ly/2KMqMvR
.
⚡Spark 的 Instagram 很多八卦
http://bit.ly/31YMLon
.
⚡理财交流站
http://bit.ly/finspark-group
.
⚡美股交易交流区
http://bit.ly/finspark-foreign-stocks

#收工宴 #花紅bonus #招聘