［東亞賣盤？我估係賣大陸業務］昨日間間銀行都跌，就係東亞唔跌，有啲嘢嘅。今日仲要升多一成幾。

（又，記得今日18:15睇直播）

1. 首先，我到而家都唔明，點解人人都仲叫東亞做華資，或者港資銀行。甚至鬼佬都仲叫佢係香港最後一間家族銀行。唔好講大生（係生，唔係新）咁極端，喂，即係當大新王守業冇到？

2. 好啦，你自己可以去望下，東亞嘅大股東，到底係乜水。基本上就係八國聯軍，日本仔三井住友，西班牙Caixa，馬來西亞國浩郭令燦，仲有美資對沖基金Elliott Capital。就係唔見港資。咁你勉強可以話郭令燦係「華資」，唔使分咁細。至於姓李嗰家，持股極少，仲要分散，應該都唔係一致行動。

3. 我同東亞真係相當多淵源，呼。首先我細個就住荃灣東亞花園。同東亞銀行應該冇乜關係，但樓下就真係有間東亞銀行！細個大人去，我又跟住去，就係我第一間參觀嘅銀行。

4. 打後，到我做分析員，睇銀行股嘛。時為美好嘅pre 雷曼年代，人人發中國夢，嘩，中國十鳩幾億人，一人買一對鞋，不撚得了呀。之類。For some reason，東亞在大陸嘅業務，非常咁勁。在大陸佢係可以同匯控花旗平起平坐。原因其實都好簡單，因為東亞李生就代表咗香港精神，英殖時佢咪紳士英國貴族，到換旗時佢投共又比任何人快。

5. 亦因為，東亞係其中一隻最早出業績嘅藍籌，所以我好記得。多數啲業績期，寫第一間我都仲有啲心機，去到最尾就變咗行屍走肉了。而東亞當年仲好似年年在Ritz Carlton（舊嗰間！即係而家AIA/CCB嗰度！唔係九龍站！）開，亦係少數會將分析員同記者撈埋一齊嘅公司。有啲分析員當然十分不高興，就梗係高級打工仔嘅傲慢覺得你班農民阻住大爺地球轉。本人就好樂意撈埋一齊，甚至我撈咗我以前女朋友返嚟，財經記者嘛。所以李國寶都算撮合咗我，雖然最後冇結婚。

6. 講開又講，李國寶當年都幾多花邊消息，唔止講咩佢對皮鞋之類，最大單都係內幕交易嗰壇嘢。咁東亞主持人已經講明係講業績唔講李生私人嘢，但記者理撚得你（都好似係好事），點會放過李國寶。但又講下李國寶真係冇乜咩架子，散場時就極速閃入電梯，同我一齊！冇話咩幾個大漢做保鏢咁。當年我仲記得啲記者追訪佢，結果打到我（啲記者好多架生嘛，特別係攝影或電視台）。呀寶哥哥仲同我say sorry！

7. 不過講到very sorry，不如都係講返個股價。再講一次，當時係美好嘅pre雷曼大中華膠年代，隻東亞一度股價六十蚊！你可以望下而家幾錢。而當年，美好嘅pre雷曼年代，本人都去對沖基金見工，有個年輕過我而又唔靚嘅小女孩煙我，咁循例指定動作都叫你pitch隻股票（其實即係畀冧把，用英文即時好似好pro）。我就講東亞，畀佢恥撚笑到我一楝都冇。事實亦真係如此。當然工亦係見不成。

8. 往後嘅事大家都知，東亞啲大陸業務就真係麻麻。特別近幾年香港反大陸嘅氣氛咁勁—但我想講，真係唔好將個焦點放在「進軍大陸冇運行」。實情其他外資行做得不錯，「主要係東亞自己嘅問題」。證據？你見佢香港都不見得做得好丫。股價盈利就係一切。

9. 然後仲有壇嘢。2014年我在耆英證券被炒，高人安排下幫我搵個地方安心立命，嗰間嘢（我有一期係返灣仔的）正係東亞下面嘅子公司。亦都所以啦喎，我當時都係東亞嘅員工。咁就大家明啦，你懂的。但畢竟我打佢工，佢又冇待薄我，我就所以到2020年先寫呢啲。雖然檔嘢其實冇耐賣咗畀台灣佬，亦都所以點解我又打過台灣佬工。BTW我做啲公司都幾興賣盤，耆英亦係我在位時賣畀馬拉佬的。所以我就由打兩份工變咗打四份工。

10. 東亞近年積弱云云，都不用我多講。咁多八國聯軍，有啲據說係李家啲朋友，但更多係來者不善。想狙擊佢又有，想買起佢（間公司啫，唔係佢條命）又有，想拆骨嘅又有，乜都有。總之我都好想知佢地嘅董事會係點開的。

11. 但，日本仔或者國浩西班牙嗰啲都唔講住。近幾年個焦點係美資Elliott。呢個擺明就係想拆咗李家個台，覺得佢經營不善，早賣早著。我純局外人角度睇，指控係應該成立的，始終股價就係一切。銀行經營係難，但你睇東亞啲股價，真係跑輸其他同業都好多。

12. 李家點玩？其實都係好簡單嘅一招，配新股畀啲疑似自己友（例如日本仔），然後攤薄Elliott嘅股權。咁都得？好似真係得的。所以唔好話供股賤，其實呢啲配股仲賤，你想跟都冇得跟。然後故事就係Elliott直頭告上法庭，話呢個行動損害股東利益云云。大約個故事係咁

13. 最新玩法係乜？你見到個股價咁升梗係有啲嘢。原來話東亞會做個Strategic Review，仲請咗高盛去做顧問報告。呢度就充滿聯想啦。

14. Strategic Review嘅嘢，最正常，不外乎睇下有邊啲唔掂嘅業務賣咗佢，或者有啲邊市場撤出咁。有人估話東亞賣盤，但我估唔係，照計賣盤就唔使搵人Strategic Review，大股東自己出面傾咪得。

15. 另外留意，今次呢個Strategic Review，係得到Elliott支持的。仲話會暫停個訴訟。講得白啲，大家都係求財，唔好累鬥累。東亞可能自知理虧定乜，或者想送走Elliott，咩都好。可能讓步，可能做啲嘢，令到幫到股價，咁Elliott賺錢咪走人。對沖基金嘅嘢，搵錢啫，真係同你run間銀行咩

16. 咁會係有乜搞作？我都冇乜細睇。但其實東亞之前都賣走過唔少嘢（包括我以前間公司，賣咗畀台灣佬）。真係仲要賣，而又夠大嘅，可能真係成檔大陸業務賣咗佢。畀第啲外資又好，畀中資又好（但我懷疑中資會唔會接，除非好平價）。
17. 即管又睇下之後發展係點。當然有人話可能係BEA Union藍十字，甚至馬來西亞Affin Bank之類，冇細睇，但，應該未大到Elliott滿意嘅地步吧。定或者係BEA Life？夠大未？

【專業五人足球鞋: Desporte Boa Vista Kl2 實測】
.
話說五人足球响香港愈嚟愈盛行。五人足球响國際層面上一直有規模地發展，五人足球更加有屬於自己嘅歐聯賽事同世界盃。當五人足球晌香港變得愈嚟愈重要時，啊靴亦响度同大家介紹一個專做五人足球鞋嘅日本品牌：Desporte！
.
去親日本，啊靴一定會留意Desporte喱個品牌，原因係佢外型特別，而且細緻位做得非常唔錯。响日本嘅五人足球聯賽上面，就有唔少球員都着上喱個品牌。話說Depsorte早於2003年成立，目標係製作最完善嘅五人足球鞋。而阿靴今次亦非常開心，於 Kemari Sports 嘅協助下，有幸實測呢個品牌嘅波Boot！
.
Desporte嘅波Boot亦有唔同嘅版本同系列。佢地主要因應用料分兩個版本，貴版鞋面會選用袋鼠皮，平價版鞋面會用上合成皮。今次啊靴實測嘅波Boot叫Boa Vista Kl2，屬於Desporte嘅貴版選擇。Desporte更加話佢係一對靈活速度型嘅波Boot，今次實測，阿靴就認真睇睇佢質素如何。
.
Boa Vista Kl2鞋面用上優質袋鼠皮，質感軟熟。佢鞋頭位置較高，鞋頭及兩側會用上較硬嘅合成皮，設計源於五人用足球比普通足球缺乏彈性，適量嘅波boot硬度有助提昇踢球嘅力量。鞋身中央用上網狀質料，有助波Boot嘅散熱，鞋身較後位置亦用上合成皮，減輕波Boot嘅重量。Boa Vista Kl2做工非常之細緻，鞋踭內籠位置用上麂皮，令波Boot變得更鎖腳。至於鞋底位置更加用上記憶海綿作避震，亦有本身的EVA緩震物料。鞋墊同樣用上麂皮，亦帶有緩震物料。
.
阿靴就著過Boa Vista Kl2於數場五人足球比賽上，最難忘嘅一定係舒適度。袋鼠皮質料，麂皮鞋籠，以及細心嘅緩震用料，加上波Boot鞋型傾闊腳，基本上踢波過程係非常舒服，而呢一點，响著Boot嘅初期，阿靴已經感受到佢帶嚟嘅舒適度。
.
另一方面，阿靴對Boa Vista Kl2嘅鞋底蹉波感覺係非常滿意，比賽時會感覺到鞋底同波嘅感應係離奇地出色。盤扭層面上，啊靴認為靈活度屬於中等水平，較闊嘅袋鼠皮鞋身難與較修腳嘅波Boot作比較，不過佢鞋底帶嚟嘅優質磋波感覺，又的確令佢加翻唔少分數。
.
Boa Vista Kl2射門質感屬於中上，坦白講，啊靴踢五人足球鍾意係著啲鞋面較硬嘅波Boot，原因係個五人波屬於低彈度，鞋面較硬嘅波Boot正正令射門更加食力，亦正正係呢個原因，阿靴一直麻麻地袋鼠皮波Boot。不過估唔到嘅係，Boa Vista Kl2 嘅設計係減輕到喱個問題，佢鞋頭及兩側用上較硬合成皮，而鞋面就用上袋鼠皮，設計令射門比一般袋鼠皮Boot更食力，亦保持到袋鼠皮帶來嘅舒適度。至於腳內檔射門及五人常見嘅篤射，受惠於佢較硬嘅鞋頭及兩側，力量感的確唔錯。
.
長傳質感屬於中上，鞋頭雖然較高，但係掘落波底嘅長傳又會估唔到地柔同順，喱點再次令阿靴感到驚喜。短傳上阿靴就認為屬於中等，發揮上不算突出，不過傳球質感屬於穩定。
.
至於緩震層面上，Boa Vista Kl2 用上記憶海綿和緩震鞋墊，但鞋底用嘅物料只係屬於普通嘅EVA質料，阿靴認為Boa Vista Kl2 於緩震層面上，相比React同Lunalon等大牌科技仲有一個距離，但距離不算非常大。不過總括嚟講，Boa Vista Kl2 嘅緩震仍屬中上水平。
.
Boa Vista Kl2有一個位置曾令阿靴感擔心，波boot鞋頭鞋帶位置對落，就有Desporte嘅細標誌，標誌用上針織質料繡上。著上腳時因為佢針織質料較硬，阿靴就曾擔心佢會帶嚟刮腳嘅問題。不過於實測過程上，刺繡並無帶嚟刮腳狀況，同時隨著踢波時間越長，刺繡位置質感亦越來越軟。阿靴就認為，如果Deporte可以減低刺繡嘅硬度，相信Boa Vista Kl2 會變得更加舒適！
.
至於尺碼上，阿靴平時著開US8嘅波Boot，而Boa Vista Kl2屬於正常Size，著翻US8就會啱啱好。至於鞋型上，基於日本牌子好多時候係用亞洲人腳做設計藍圖，佢係屬於中至闊腳，亦會適合絕大部分嘅波友。
.
Desporte Boa Vista Kl2實測報告：
盤球：●●●●
控球：●●●●
短傳：●●●◐
長傳：●●●●◐
射門：●●●●
靈活：●●●◐
避震：●●●●
-----------------------------------------------------
【屎波裝備多Instagram】Follow: instagram.com/hkfootballreview
【波Boot實測】白飯魚: https://youtu.be/-dbvs0_YgiY
【波Boot比較實測】20年前Predator重現: https://youtu.be/WpuXHSnErl8
【靴分享】六個射門要訣！: https://youtu.be/LaVsmSvFoFQ

【送禮靴 GIVEAWAY!】
【速度型性價比高釘boot：Kipsta CLR900 FG 實測 】
.
作為一名屎波裝備多，啊靴當然要同各位講盡唔同嘅波boot。而今次，啊靴就同大家深入講下一對性價比高嘅選擇。話說DECATHLON晌香港已經開咗一段時間，產品以平價為主打，晌咁多個部門裏面，佢地亦擁有足球部，裏面亦有波boot品牌Kipsta。
.
Kipsta係一個法國品牌，有幾個歐洲職業球員就著緊喱個品牌嘅波boot。Kipsta已經出咗好幾對波boot，當中有釘有平底，亦有分唔同等級。今次啊靴就同大家解構一下價錢只需$499嘅Kipsta頂級版本釘boot CLR900 FG!
.
CLR900 FG賣點係輕巧，對boot只得180g，對於喜歡速度感嘅波友一定會非常滿意。CLR900 FG鞋面就用上輕巧嘅PU合成皮，摸上手質感算薄但有少量硬度。為咗加強波boot嘅整體球感，鞋面上有一條條凹下嘅紋理。波boot內籠中後位置用上體貼嘅麋皮，亦沿著腳踭形狀配以cushion設計，令波boot更鎖腳碗，呢種設計一般會晌頂級版波boot先遇到，可見Kipsta晌CLR900 FG嘅設計相當有誠意。鞋釘上佢用上相當輕巧嘅質料，鞋釘較短，亦呈鑽石形，讓大家有更靈活嘅抓地力。
.
CLR900 FG設計和用料相當之簡單，佢嘅質感令啊靴想起Nemeziz/Mercurial喱類別嘅速度靈活型波boot，啊靴就著CLR900 FG踢過數場比賽，於$500有找嘅價錢上，整體發揮的確有點令人驚喜。
.
啊靴最滿意嘅係CLR900 FG嘅盤帶球感，受惠於鞋面同鞋釘嘅輕量化設計，加上佢較修腳嘅設計，令啊靴諗起舊時於田徑場上爆破嘅跑鞋。CLR900 FG盤帶上具速度感，加上貼腳質感帶來一定靈敏度，於扭波及直推爆破上相當有快感。
.
腳面射門係啊靴另外一個感到滿意嘅地方。CLR900 FG鞋面較薄，而質感係屬於少硬，為大家帶嚟爽朗嘅射門體驗，佢嘅合成皮鞋面可以較容易射出腳面嘅飄波，球感相當食力。不過CLR900 FG嘅鞋面凹凸紋理不算強烈，帶嚟嘅摩擦力亦較低，腳內側chok射嘅孤度幅度也較少。
.
長短傳發揮啊靴就應為屬於中等水平，鞋面合成皮質料令短傳屬於爽嘅類別，不過穩定度就爭少少咁。雖然係咁，啊靴對CLR900 FG於長傳嘅食力程度感到相當滿意，啊靴亦非常喜歡用佢做一啲低高度嘅長傳。
.
都係個句，每對boot有好同唔好，啊靴認為CLR900 FG嘅鞋面會有少許滑，晌落雨嘅狀態下，控球需要多啲時間適應同修正。此外，CLR900 FG嘅保護性都會較弱，始終波boot鞋面係較薄。
.
至於鞋型上，CLR900 FG係屬於中至修腳，闊腳嘅波友就未必咁適合，尺碼上啊靴大部份波boot就著EU41，CLR900 FG買翻正常sizeEU41就啱啱好。
.
啊靴就成日講波boot，希望大家揀boot時有多個參考。不過今次除咗講，大家仲有幾會著！今次 Decathlon Hong Kong 會晌「屎波裝備多」FB同IG各送出兩對Kipsta CLR900 FG波boot，俾大家直接體驗一吓喱對輕巧型波boot嘅特性。
.
晌FB喱邊大家做嘅嘢相當簡單，大家只需要like咗「屎波裝備多」喱個page，再晌comment位置講出你嘅尺碼，以及想得到Kipsta CLR900 FG嘅原因，啊靴會選出兩個最佳答案，並送出CLR900 FG 俾喱兩位波友。今次送禮活動截止時間為本星期日(19/5)23:59，啊靴會於下星期一(20/5)於本post comment位置作得獎公佈。
.
送禮活動有咩疑問就inbox我😊
.
Kipsta CLR900 FG 實測報告:
盤球：●●●●◐
控球：●●●
短傳：●●●
長傳：●●●◐
射門：●●●●
舒適：●●●◐
保護：●●●
-----------------------------------------------------
【屎波裝備多Instagram】Follow: instagram.com/hkfootballreview
【波Boot實測】白飯魚: https://youtu.be/-dbvs0_YgiY
【波Boot比較實測】20年前Predator重現: https://youtu.be/WpuXHSnErl8
【靴分享】六個射門要訣！: https://youtu.be/LaVsmSvFoFQ