【回南天 #洗衫 好難乾？5招快速乾衣妙法】⁣ ⁣ 睇下天氣報告，成個星期天陰陰、多雲、有霧、有雨，心情即時跟住天氣跌入低谷。春雨綿綿，「濕立立」唔止令人周身唔舒服，最令人頭痕係洗衫唔乾。雖知道唔係人人屋企有 #乾衣機，即使近年洗衣店開到梗有一間喺左近，但就係唔安心囉！咁嘅天氣，要喺屋企將啲衫晾乾，有乜方法呢？⁣ ⁣ 🔽🔽🔽🔽🔽🔽🔽🔽🔽🔽🔽⁣⁣⁣⁣⁣⁣ 關注自己及家人健康？⁣⁣⁣⁣⁣⁣ 立即 Follow @LikeMagazineHK ， 每日送上健康生活Tips⁣⁣⁣⁣⁣ 🔽🔽🔽🔽🔽🔽🔽🔽🔽🔽🔽⁣⁣⁣⁣⁣⁣ ⁣ 1. 衣物排列長短長⁣ 洗好衫後，有人習慣將啲衫分晒長短，然後順序將之排列，排到靚一靚，但咁做其實令啲衫無咁易乾。曾有試驗顯示，將洗完嘅衫分別以「長短長」、「短長短」、「長長長」排列方式晾曬，結果「長短長」勝出，啲衫乾得較快。原因係當衣物排列呈拱形，中間形成空間，空氣會從呢度流過，產生上升氣流，將水分快速帶走。⁣ ⁣ 2. 加風扇吹呀吹⁣ 當天氣翳悶時，自己覺得呼吸唔多順，你都會開把風扇吹下，等空氣流通。晾衫同樣道理，當濕度高，空氣「立」到好似唔多郁，風又無多滴時，加把風扇喺晾曬嘅衫附近，加強空氣循環，啲衫會快乾少少。⁣ ⁣ 3. 出動吸濕神器報紙⁣ 報紙向來係吸濕好幫手，年老一輩嘅家庭主婦都有將報紙放櫃桶底嘅習慣，話吸濕一流，唔怕啲衫發霉喎！回南天晾衫時，可以將報紙鋪喺晾衫架嘅下面，報紙有吸濕功效，幫手吸啲水氣，加快乾衫速度。⁣ ⁣ 4. 加大面積⁣ 天氣唔好，晾乾衫已經唔容易，晾大毛巾更麻煩。毛巾等吸水力強，洗完後就算用洗衣機再「乾水」一次，拎出嚟仍然好濕，好難乾。想晾曬時快少少乾，試下唔好對齊懸掛，因為咁樣水分難散發，只要用一邊長一邊短嘅掛法，毛巾就會加快「散水」。至於被單之類大件嘢，晾掛時多用幾個衣架，將其中間撐起，形成空間，當能增加空氣流通嘅面積，就可加速晾乾嘅時間。⁣ ⁣ 5. 袋子帽子衣領反反反⁣ 其實回南天晾乾要快乾，重點係要「空間」，盡量令衣物嘅布料唔好疊埋一齊，幫佢製造空間，讓空氣流過，加快水嘅散發。牛仔褲等難乾衣物，善用多個衣架衣夾，將褲管撐開成筒狀，就可以乾得更快。另外，褲袋要反出嚟，先能吹乾。衣物如有帽子，記住又要反出嚟，必要時多用個衣架撐開佢。衣領要反起豎起嚟，增加與空氣接觸面積，自然乾得快！⁣