* 《不日成名》中的莫忘初心 — 成名嘅過程入面係咪必然會腐朽？《不日成名》係2000年嘅一套美國電影，但竟然可以好應棍咁描述到今日扭曲嘅社會形態。 — 好多人話呢家世界正處於喺熾烈嘅「網紅經濟」入面，一位世界知名嘅KOL出個POST，原來已經可以賺到幾百萬港紙，人人爭住進入呢個市場，亦衍生出好多怪異嘅社會現象。 — 喺《ALMOST FAMOUS》呢套戲入面，以一個十五歲記者威廉嘅角度去睇世界，佢憑住自己寫稿嘅才能，比知名嘅音樂雜誌《ROLLING STONE》睇中，要求佢為樂隊《STILL WATER》寫一稿特約專題。 — 而喺搜集資料嘅過程入面，呢位十五歲嘅小伙子見盡樂隊風光背後嘅沉淪，例如性愛、毒品、煙酒等等嘅誘惑，現實迫使樂隊腐化，例如因為樂隊每個人人氣嘅差異，團隊出現分裂同爭權，又或者係因為為咗要尋求更大嘅利益，需要拋棄同自己一齊紅褲仔出身嘅經理人，夢想被所謂商業化同標準化所摧毀。 — 甚至連主角威廉自己，都享有樂隊嘅福利，可以同女粉絲上床，令佢覺得自己同樂隊係「自己人」，所以要寫「好」隊樂隊，誘惑無處不在。 — 只要你有名，利益自然隨之而嚟，呢個描述尤其適用於今日嘅網紅社會。而喺競爭劇烈嘅市場入面，要搶HIT RATE，要有人留意，嘩眾取寵係最容易嘅手法。例如女嘅，大可以SHOW性感嘅身材，大可以P圖P到似JANICE MAN，甚至買假LIKE假COMMENT假SHARE，將自己抬到去一個「被崇拜」嘅位置，然後得到利益。 — "STILL WATER"想威廉喺《滾石雜誌》入面寫到自己隊BAND好勁，因而成名；而好多網紅都希望靠搏出位而得到其他廣告商垂青。但係你識籠絡，其實其他人都識；你識P圖露事業線，其實好多人都做到，一切無內涵嘅人同事，都唔恆久。 — 而更多扭曲嘅行為係，好多人為咗成名，會向負面嘅方向去行。例如我哋見到鄰近地區嘅年青人會花大量時間喺「抖音」，練習合符節拍嘅動作去「呃LIKE」；好多藝人可能會靠走光／緋聞去增加自己嘅曝光率。有句英文叫" Dont make stupid people famous"，其實我唔太同意，因為成名可以係萬世流芳，亦都可以係遺臭萬年，永不翻身。 — 喺《不日成名》嘅最後，樂隊終於明白自己隊band勁唔勁，講到尾唔係有關人哋寫到你勁唔勁，而係本身你嘅音樂可唔可以感動到人。成名唔係錯，搵錢都唔係錯，但喺過程當中千祈唔好唔記得自己嘅初心，究竟係啲咩嘢帶到你嚟今日呢個位置，而你喺呢個位置，又可以繼續做啲咩。 — 「跟指標 指標有天淘汰／搞清楚 搞清各位病態」，呢兩句係supper moment喺《不要死在崇拜裡》嘅歌詞。好多網紅／藝人為咗成名無所不用其極，但得到其他人嘅認同應該係目標而唔係手段，甚至只係附屬品。唔偏執唔放任，跟住自己嘅靈魂去行，為世界能夠更加完美而繼續付出，總會有人睇到。 — 畫作：塵阿力映畫 （請大家多多支持阿力嘅專頁，畫畫都係對世界實質貢獻嘅一種，嚟緊仲會有好多香港電影嘅插畫！比like支持吓咁靚嘅fan art啦！！）