【龔成問答信箱】（Q22661-Q22680）

Q22661：

你好襲成老師，最近941中移動宣布派息，我本身早兩個月開始月供股票，但又未供足整股，

想問問我會唔會收到佢既派息之類？同麻我想收到佢派息要係幾時前買入佢股票！謝謝

龔成老師︰

只要你係「除淨日」那天之前，持有相關股票，就可以收到是次股息。

以你持有中移動(0941)，只要你在除淨日前的收市日，依然持有，就可以分到股息。

至於有多少，就視乎所當天收市，你所持有股數。未供足整整1手，係無影響，都會有得收股息。因為派息係持「股」數，而非持「手」數計。

每股會有HKD1.63股息，假設你持有10股，就會收到HKD16.3。但由於銀行或證券行，可能會收取苦干費用，故實際到你戶口的金額，有機會比HKD16.3少。

而「除淨日」那天，股價就會扣除派息部份，例如原來股價$10，派息$1。但這天你依然未會收到股息。

------------------------------------------------

Q22662：

我係進階班學生，有事想請教，大行報告「维持“买入”和目标价 34 港币，潜在上行空间为24%

我们维持 2021/2022 年非 GAAP 口径 EPS 预测人民币 0.75/0.95 元。我们 维持“买入”评级和并使用 SOTP 方法得到目标价 34.0 港币，

对应 38.9 倍 2021 年 PE，潜在上行空间为 27%(2021 年 8 月 12 日收盘价)。

我们预计 2021E/2022E/2023E 年 EPS 分别为 RMB0.75/0.95/1.09，维持“买入”评级和目标价 34.0 港币。」

呢3個資料點樣得出目標價34蚊啊？

龔成老師︰

其實大行唔係單憑這3個資料，去得出目標價HKD34。

佢地係因應小米(1810)不同分部特性，再利用相關應估值方法，去計算出各分部各自市值和每股價值。

在加總後，再給預一個折讓比重，從而計出每股目標價為HKD34。詳細係用左什麼估值法，你要睇翻份報告先知。(如果唔記得點去分析，你可以睇翻我，進階班第8堂教的內容)

而2021-23年的每股盈利，係純粹一個估算得出的主觀的數字。

記住，我地係決定用唔用而D數字時，必先要確定相關估算，是否合理。佢這3年的每股盈利預算，都偏向合理。

但每估價值去到HKD34，我就有少少保留，因為這樣的話，佢2021年市盈率去到分別38倍，唔算好平。我會保守少少，預佢市盈率約為25-30倍，即現時大約係合理區頂位，會較為穏妥。

------------------------------------------------

Q22663：

龔sir 想問下買德福花園（舊，但係有四百幾尺，實用），定係將軍澳嘅新寶城（新，唔夠400呎），投資價值較高。

龔成老師︰

從投資角度計，論位置、交通、生活配套、物業大小等。整體而言，會係德福較好。而且係大型屋苑，都係加分地方。

但將軍澳不是無可取地方，因為佢樓齡始終較新，而且將來將軍澳至藍田隧道完成，會令佢同東九商區進一步拉近，都會提升佢物業價值。

所以，好難話邊個投資價值，會係明顯高一班。

如果你係用來自住，可以考慮埋生活上因素，去再作決定。

如果係投資，現時租金回報率唔算高，其實投資優質股，反而值博率會更好。

------------------------------------------------

Q22664：

想問下3339中國龍工及3380龍光集團值得長線當收息股嗎？

龔成老師︰

中國龍工（3339）主要業務為製造及分銷輪式裝載機、壓路機、挖掘機、起重叉車及其他基建機器。佢的產品有出口至俄羅斯、中東、澳大利亞及非洲等地。

雖然近年生意不差，但以過去5年計，生意與盈利都有波動情況，這點不得不注意。而企業的賺錢能力算是中等。

以企業的質素來計只屬中等，現時不貴，股息率都算吸引，但業務波動是風險，因此投資不能大注。但長線基本上可以的。

龍光集團（3380）都有質素的。

佢係中國一家於粵港澳大灣區住宅市場的一體化物業發展商，並發展長三角核心都市圈及西南、中部城市等區域。

主要於中國從事物業開發、物業投資、建築及裝飾以及一級土地開發：物業發展分部開發、物業租賃分部、建築及裝飾等。

過往業務發展不差，生意與盈利都有增長，不過負債就少少高，略有風險。這股都有長線投資價值，現價合理區中間位。

你用來收息都可以，但行業性質令佢會較波動，如果物業發展收入減少，有機會影響到派息，故不建議太大注碼。

------------------------------------------------

Q22665：

阿Sir, 你好.我想請教下, 如何選擇收息股, 手上有10萬... 因為想安排退休之後仍然有糧出. 十分感謝

如果想每月有大約8-1.5萬收息, 要多少資金及選擇什麼股票投資? 再次感謝

龔成老師︰

你可以考慮目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

(你可睇下我本《50穩健收息股》當中仲有好多)

現時大市在合理區，你可以先用一半資金，分注買入上述收息股。餘下一半，等大跌市才動用。

如果你希望退休時，每月有0.8-1.5萬蚊現金流，以股息率6%計，你需要本金160-300萬。

若你現在無這筆資金，你就用我之前講的平穏增長股和潛力股，去累積這筆資金，為退休作準備。

------------------------------------------------

Q22666：

感謝大師您的指點。但由於恒指最近呢次插水，經濟環境不好手持蟹貨又多，個人都是節衣縮食。如大市能比較有力反彈，

港澳經濟又回復正常流動，我都想親身向老師請教請教。那麼大師對大市後市看法如何？是見底了會反彈？還是還有下行空間？thx

龔成老師︰

中短期大市點走，我唔知。

我地投資唔應該用"估走勢"架方法去投資，正確方法應該係去理解企業長線質素和前景，再了解佢處於平定貴，之後去進行資金配置。

現時大市在合理水平﹐但部份潛力股依然係略貴。你可以因應自己現時組合情況，去作出配置。

------------------------------------------------

Q22667：

如果我用以下策略可唔可行：

平穩增長
港鐵 2手
盈富基金 3手
領展 3手
長建 2手

潛力
騰迅 1手
港交所 1 手
安碩恆生科技 4手
GX 中國電動車 1手

平穩：潛力約6:4，總本金約27萬

再月供小米，騰迅及盈富基金

另外，這些股票過往增長率加起來約有幾多？

龔成老師︰

以你28歲年紀計﹐這個組合係可以。而月供部份，建議你用指數基金做主力，因為另外2隻都係潛力股，咁樣會平衡D。

現時大市只在合理區，27萬可先用一半，分注入貨，餘下的就等大跌市。

現時平穏增長股，都在合理區，可以開始入貨。但潛力股只係合理區頂，暫時不要太大注。而當中港交所(0388)更是略貴，要回2,3成才可以開始慢慢儲貨。

你以上組合，長線計你預年增長約10-12%。但這只是估算，而且你潛力股較多，不確定性較大，最終你都要睇大市情況。

------------------------------------------------

Q22668：

龔sir，我之前買入的2137騰盛博藥，買了三手，20蚊買，今日升左超多⋯雖然升很多，但我又有少少擔心，怕它會跌很多⋯唔知仲揸唔揸好…

我見佢D信息佢嘅 研發的新冠中和抗體有很好的數據，好似好有前景咁，求你的建議

龔成老師︰

騰盛博藥（2137）屬有危有機類。

佢主要從事生物製藥業務，專注於研發傳染病療法。候選藥物產品管線例如有ＢＲＩＩ－１７９（ＶＢＩ－２６０１）及ＢＲＩＩ－８３５（ＶＩＲ－２２１８）：授權引進候選藥物（其中ＢＲＩＩ－１７９為核心產品），許可範圍為大中華區（中國內地、香港、澳門及台灣）。

用於開發ＨＢＶ（乙肝病毒）的功能性治癒，已在中國內地、香港、新西蘭、澳大利亞、泰國及韓國完成ＢＲＩＩ－１７９的１ｂ／２ａ期臨床研究，及正在中國開展ＢＲＩＩ－８３５的２期臨床研究。

這類股較難分析，因為要了解藥品將來的價值，以及市場情況。

佢一定會有好多研究，但你要明白由研發到場化，係要好幾年時間，而且當中有好多不確定因素，例如研發失敗、不能成功申請藥物上市等。

只可以話有危有機，這股不建議大注。若佢佔你組合較多，而你有已有不少獲利，可以考慮沽少少，去平衡風險。

------------------------------------------------

Q22669：

老師，請問對00267中信有何睇法？是否歸納為水桶2？是否有投資價值？

龔成老師︰

中信股份（0267）係綜合企業，有多項業務：

（１）金融業分部提供銀行、信託、資產管理、證券和保險等服務。

（２）製造業分部從事生產和銷售特殊鋼、重型機械及鋁輪轂等。

（３）資源能業源分部從事原油、煤炭和鐵礦石在內的資源及能源產品的開採、加工及貿易等業務。

（４）工程承包分部為基礎設施、房地產和工業項目等提供承包和設計服務。

（５）房地產業在中國內地主要從事綜合體和商業地產項目的開發和管理以及城市更新和發展業務。

雖然業務多，但不算做得好好，每項業務的發展力都不強，整體質素只是一般。

現時股價有合理區中下部，投資價值不是無，但這股增長力始終一般。此股算係水桶1至2的股票，主要都係收息，對股價唔好有太大期望。

------------------------------------------------

Q22670：

想問「海底撈」同「雅生活服務」？6862有貨，但唔多。麻煩晒！

如果要估值，呢兩隻應該用什麼估值方法

龔成老師︰

海底撈（6862）正本質是不差的，長遠仍會正面，不過中短期會弱。

第一，管理層有講過，之前市場對佢地公司過度樂觀，估值偏高。第二，管理層話公司面對中國的市道，其實業務不是一直都好的。

加上這股之前貴，相信中短期股價仍一般。

不過以長遠來說，這股仍有質素的，佢以「海底撈」品牌經營火鍋店及外賣業務，火鍋菜單由鍋底、醬汁蘸料以及在鍋底烹飪的食材三個主要部分組成，可點單鍋、鴛鴦或四宮格鍋底組合，餐廳提供多種調料及食材，以及供應小吃、酒和飲品。

在中國有好多分店，以及外國都有。

有規模，有品牌，整體正面。相信長遠仍有發展的。

不過，這股市場之前比佢好高估值，就算近期回落，最多只能稱為合理區頂，一定未平。你有貨可長線，但暫時只建議小注，股價始終波動。

雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

整體是有長線投資價值的。現價合理，不過股價都會有時出現波動，投資宜分注進行。

這2隻，由於都有一定增長力，我建議你用翻市盈率比較法，會較好。

但雅生活服務（3319）和其他物管股，好多上市時間都唔長，你基本上唔會找到一個有意義的行業市盈率。

因此，我地只能憑佢業務性質，去大致估算市盈率區間，你預大約15-20倍。

而海底撈（6862）都有類似情況，但佢相對增長潛力會較高，你預25-30倍左右。但計算每股盈利時，最好參考早一年，因為疫情令本年數字代表性弱左，你參考2019年會較好。

------------------------------------------------

Q22671：

老師，小米 合理價 幾多點？

金沙中國 但唔怕政治 影響

龔成老師：

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區頂位至略貴，小注分注可以，但唔好入得太急，預佢股價仍波動。回多10%更有投資值博率。
金沙（1928）長遠仍有質素的。政治因素有少少，但風險度唔算高，我相信佢好大機會取得賭牌。

佢中短期會弱，加上全球疫情反覆，都對佢有不利影響，不過，相信這只是中短期，以長遠的角度分析，企業仍是有質素的。

在正常的經營環境分析，佢持有的資產好有質素，行業本身好賺，雖然疫情略有反覆，但全球疫情最壞的情況，相信已過。佢長遠是收息及平穩增長型。

但由於仍有未知數，加上之前虧損，因此將企業估值調低左。

現水平在大約在合理區中下部分，如果本身有貨，可長線，耐心持有就得，如果無貨，現價已經可以分注，但都要留現金。投資貨要有心理準備，中短期會弱，要長線，企業有長線投資的價值。

------------------------------------------------

Q22672：

龔 Sir 早晨 麻煩幫我分析吓組合啱唔啱？

我是一位單親媽媽48歲 獨力養14歲兒子 沒有任何贍養費 公務員月入4萬 現時每月儲一萬現金 月供股票一萬 現時現金有18萬 股票如下 :

水桶一 :
788 有10000股($1.48)
1211 有500股($210)
1448 有4000股($8.11)
1810 有1288股($23.14) 月供$1000
9988 有100股($258.6)

水桶二 :
2800 有3543股($28.19)月供$2000(之前$5000)
9月起會新加如下月供 :
66 將會月供$1000(幫兒子儲)
823 將會月供$5000

水桶三 :
1310有2000股($12.76)
1398有668股($4.49)月供$1000
2638有2000股($7.83)

現在已上了8月班第一堂 希望阿Sir比D意見我 計劃52歲退休 退休金約200萬 每月領$13000長俸 麻煩晒

目標4年後有多200萬 現時住公屋

水桶一係咪太多？

龔成老師︰

你水桶1的確係偏多，佔左你組合一半以上。以你48歲年紀，水桶1大約佔組合3成好了。

但由這些股票都有質素，你唔洗沽出，只需要用未來新資金，投資一些平穏增長股和收息股，令個組合回復平衡，咁就可以了。

至於月供方面，選股和策略(一半供、一半儲蓄)係無問題。但資金分配上，我唔建議集中係領展(0823)，佢雖然有質素，但始終係單一企業，分散風險能力較弱，你用翻盈富(2800)做主力，會較為穏當。

另外，由於於尚有4年就退休，潛力股就不要再加注，時間短，會令個風險太大。另外，平穏增長股和收息股比重，大約各一半。

餘下18萬現金，你就等大跌市機會，才出手入貨。

而且，當你愈接近退休之年，收息股佔組合比重，就應更多，到退休時，應100%持有收息股。故你要在做月供同時，慢慢調整組合持股，為退休做準備。

我假設投資回報有7%（連股息再投資），你每月投資$20000 + 現有資產約70萬(持股和現金)，4年後大約會增值至190-200萬，故這樣安排相信很大機會達至你的財務目標。

再加上你退休金200萬，將這些資金投放入收息資產，以6%息率計，每月大約可以創造現金流2萬。你可以以此作參考，調整你計劃。

但當然，你唔需要太急於去動手，投資係一個長線配置，你先上完堂，有個完整概念才開始，會更好。

------------------------------------------------

Q22673：

龔Sir，你好~ 有幸在疫情初期認識你，參照你的建議購買了以下是從現有的投資組合：

175 33.45@1000
788 1.52@10000
1211 34.2@500
2388 23.75@3000
2800 24.67@4500
9988 205@200
1928 26.2@400

上述的股票我打算長綫持有，唯一擔心的是175是否應該放？還有9988是否應該增持？以我現在的投資組合，下一步買的股票應該考慮哪個行業？博彩？醫藥？

另外，也想請教你人生規劃的意見，本人今年33歲，女，月入21K，另外有200萬現金做定期，剛置業及未婚，供樓壓力都大（每月大約12k），一直都想增值自己，

但苦無方向，生活就好像比層樓困住自己，請問龔Sir您認為在沒有特別的愛好下，應該怎樣尋找自己的價值呢？

感謝您一直以來不辭勞苦為我們解答問題，感謝！

龔成老師︰

先講你投資部份，以你33歲年紀，應先努力做好財富增值。你現時持有股票，都有質素，係可以長線持有。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

但現價已經係略貴，現貨可持有，但暫時不要加注。

至於阿里巴巴(9988)近期有較多不明朗因素，雖然長線企業質素，唔算有明顯轉差，但風險係高左，估值上都會有少少調整。

但由於未影響到核心因素，因此你照持有係無問題。由於你本身有貨，要再加注，最好等佢回多少少先。

而定期，本身只係定息產品，無增長力之餘，利息回報都不高。建議你用來投資優質股，效益會更好。

以下股票，都適合你。

除了200萬現金外，如果你每月都儲到錢，建議你都做下月供股票。用月用一半儲蓄做月供，另一半儲起。

大市現處於合理水平，那200萬資金，你可以先用50-80萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

係進行配置時，緊記唔好集中係個部企業或行業。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

至於如何尋找自己的價值，這個問題其實可以好複雜，而且都無一個特定答案。

如果你而一刻未找到自己興趣，或者人生目標所在。其實唔需要急，只要你多去接觸不同的人和事、睇多D不同書籍，慢慢去開闊視野，自然就會慢慢找到人生目標。

但緊記一點，這個人生價值評分，是你比自己，唔係人地比你。你要分清楚，是你自已的人生目標，還是純粹別人的期待。

只要你好好認真面對自己，一定可以找到專屬於你自己的人生價值，加油!

------------------------------------------------

Q22674：

龔成老師你好。我一直都有閱讀你所寫的書籍。目標是希望可以盡快財務自由，一生三宅，錢滾錢。

現有資產如下：
現金90萬

煤氣(3): 9883股
領展(823): 1369股 (另每月供$4000，股息會選擇以股代息）
長江基建(1038): 500股
小米(1810): 400股
金沙(1928): 800股
盈富(2800): 3018股

阿里巴巴(9988): 100股
巴郡Class B (brk.b): 10股
Snow: 10股
SPY: 11股

灣仔住宅210呎市值$400萬(按揭餘330萬)

打工月入3萬，自己小生意月入2-3萬左右。一個月大概會用1萬2千作家用或日常開支

想短期內（大概2-3年）再購入一個大尺數的住宅，資產上應該如何部署？應否如你書中所說，呢段期間增加股票百分比以分散風險？

我是否應提高月供股票的銀碼以加快速度提高股票比例？以上資產是否可以繼續持有？謝謝老師！

龔成老師︰

若你想累積資產，去購入一個新物業，用以上股票，係適合。

但個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。

你現時煤氣(0003)明顯係超標，因此你最好沽少少，換至其他優質股上。

以你收入計，只月供$4000領展(0823)實在太少，建議你用每月儲蓄一半，去做月供，另一半就等大跌市機會。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

或潛力股︰安碩恒生科技(3067)、比亞迪(1211)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

但潛力股波動性較高，而你預期會在2-3年會動用這筆錢的話，由於時間不長，建議集中係平穏增長股會較好。

大市現處於合理水平，那90萬資金，你可以用多20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

而物業方面，你現時單位呎數太細，我比較建議有最少300呎，即一個家庭最低要求呎寸，投資價值會較好。

如果你灣仔個單位係投資用，你可以考慮3年後，用佢細屋換大屋，這樣長線增值潛力，相信會較好。

最後，你係創建一個財富組合時，除了要有質素外，都要有平衡性。意思就是，唔好太偏重於個別資產類。

就好似你現時首要目標，係增值置業。但你係置業同時，最好留有一定優質股進行增長，否則成個組合就會偏晒係物業個邊，造成風險。

------------------------------------------------

Q22675：

你好，龔成先生，我係55歲人士，前幾年離職後沒有穩定工作，最近重新入職，將有穩定收入，扣除住屋開支，每月可儲蓄4萬，想問如何善用這五年儲蓄，為退休增添收益

適合做月供股嗎？如何配置？謝謝

龔成老師︰

以你55歲年齡，是應該為退休做準備。但係進行財富增值時，就不宜完度進取，因此，你可以用「平穩增值股」+「收息股」，作為投資目標。

至於月供，其實任何人士都適合，特別係投資經驗較淺，不懂估值的投資者。可以透過月供，用平均價格買入法，去平衡買貴貨風險。

因此，你係可以做月供股票，目標係供「平穩增值股」+「收息股」，比例你預大約各一半。如果你想保守少少，你可以加大「收息股」部份比重。

但這個組合比例，不是一直沿用至退休。而係隨著年齡增加，你要慢慢增加收息股的比例。到退休時，收息股應佔100%。

目的是，讓你可以在退休後，透過收息股的現金流，支援你退休後的生活。

策略上，你每月5成儲蓄，即是用$20000做月供。其餘先儲起，用一邊月供一邊儲蓄的策略。

平穩增值股，例如指數基金、金沙（1928）、長建（1038）、中銀（2388）、港鐵（0066）、恆基（0012）、粵海（0270）、領展(0823)。如果有投資美股，可投資VOO。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q22676：

龔成老師你好!依二年除左睇新聞都比較小用Facebook,但都間中有緣份睇到你在網絡上解答讀者問題,交流同分享投資心得,非常配服你一直可以保持到敬業樂業既心態!

最近一直希望可以開始用自己香港既現金投資,因為我深明財富增值利用複息效應同時必須跑贏通脹,亦非常同意投資要有均衡組合,分散風險.同時要避免短炒圖利心態.

我今年28歲,年收入約港幣55萬左右,由於我目前長駐外國工作,日常開支主要會用自己外國戶口既收入,

香港戶口扣除家用每個月會有約1萬可以用作投資.儲蓄方面會係外國戶口做,每個月約7千.

目前儲蓄約有港幣35萬 - 港幣戶口約佔20萬(全現金,無負債)，暫時外國戶口部份打算保留現金作為應急之用.

我依個星期爬佐你既文章同埋問答與分享,亦見到你有集中推介十幾隻股票,我係投資新手岩岩起步所以希望得到你既指教睇下以下組合點樣 :

平穩增長股:
0002 月供 1000
2800 月供 2000
0012 月供1000

潛力股:
0388月供2000

其他4千暫時打算保持現金,等大跌市再加注入手以上4種,同時亦都想將現時一半現金(約十萬)買以下2種股票 :

3067@3000股 已買[email protected]
3110@2000股

想請問現時價位是否適合或者我應如何分注?

短期目標係可以係3年內連儲蓄可以滾存到150萬,5年達到200萬. 其中一半可以用黎做首期.

最後我想請教你既係我現時工作穩定,亦有望可以在2萬內加薪到年薪70萬,我收入增加部份應該投放係月供股票上定係直接一注注買入呢?

有心理準備股票會放中長線所以希望選擇正確亦可以得到你既意見嬌正心態!下年如果有機會番香港夾到你既時間,一定會報名參加你既投資倍升股課程!

祝事業順利及最重要身體健康!

龔成老師︰

你的投資理念，大致上都正確。只要你選擇正確的優質股，在合理區價，甚至平宜水平買入，並長線持有，自然就可以獲得唔錯回報。

我地做財富增值，一般希望做到架合理回報，係每年增長10-15%。

我假設投資回報有10%（連股息再投資），你每月投資$10000 + 20萬現金，5年後大約會增值至100萬。你現時這個目標，用股票投資去做，風險會好大，較難達到。

如果你無其他增值方法，建議你按部就班，透過月供和買入優質股，去為自已資產作增值。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時28歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

你現時月供策略和選股，都係可以。如果你本身外國戶口，每月都有額外儲蓄，你可以再加大少少現時月供金額，都無問題。

但如果你每月儲在外地戶口$7000，係生活費，或者用於當地生活應急，就不用調整，照現時計劃就好了。

大方向係用每月一半儲蓄做月供，一半儲蓄等大跌市機會的策略。

現時大市在合理區，你30萬現金，可以用10-15萬去分注入貨，餘下部份同樣等大跌市。選股方面，派息基金(3110)無乜增長力，主要係收下股息，唔適合你年紀。

你可以用以下股票代替，而安碩恒生科技(3067)係適合你投資，但唔好全數只入3067。

因為我地配置時，除了要考慮質素外，都要顧及平衡性。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

安碩恒生科技(3067)係科技股指數ETF，故算係單一行業，只宜佔組合最多3成。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

或潛力股︰安碩恒生科技(3067)、比亞迪(1211)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)、QQQ勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22677：

龔老師，想問下 6823
總負債點解噤高到6成
但派息又超過100%
公司噤既情況係唔係唔健康?

謝謝 解答

龔成老師

第一，佢負債比率雖然有少少高，但未到危險，因此整體問題不大。

第二，佢本身業務穩定，以及現金流穩定，所以就算負債有少少高，佢都有足夠的現金流去支持佢的情況。

至於佢派息，雖然100%，但由於有很強的現金流支持，因此無問題。整體穩定，是理想的收息股，不用擔心。

------------------------------------------------

Q22678：

你好！龔成老師, 本人現在22歲, 剛畢業, 現月入$15,000。

計劃:
月供美股:$10000HKD
(主力供ETF :VOO, QQQ, ARKK, VUG), 每月各1股左右。

家用&日常洗費&現金儲備:$5000HKD

請問老師現在我這樣的組合會否過於進取?應否更多分散投資, 例如投資高質潛力港股?

希望可以得到老師的回復 ! 感謝老師

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你現時22歲，十分年輕，財務負擔相對較少，進取少少都係可以。

但你要明白QQQ, ARKK和VUG都係潛力股，佢地增長潛力係高，但風險都會較大。我比較建議你用平穏增長類的VOO作主力(約佔40%)，其餘潛力股每隻約20%，咁會較好。

如果你想進取D，全部平均25%都可以，但風險會偏高，你要明白這一點。

另外，現時大市只在合理區，每月最好留有3-5成儲蓄，用來等大跌市機會。

除了美股，你都可以考慮加入一些港股，去平衡地區性風險。以下都係適合你的股票，你可以參考一下。但緊記潛力股風險較高，要控制好注碼。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22679：

你認為加密貨幣可投資嗎？
小注投資如何？

龔成老師：

虛擬貨幣，我不是這方面的專家，所以我無太多意見。

如果你能承受風險，小注投資不是不可，而你一定要等倍計回報，利用以小博大的模式進行，同時明白有風險。

以本質來說，這是人為創造出來的，絕對不是「資產」，有沒有真正的價值，如何定義真正的價值，未知。

這些人為創造的貨幣，因為關注度由很少變得大，價格會大升，但這背後是否有真正的支持，我不知道。只能說，投資這些貨幣，投機味好重，可能大賺，亦可能蝕到一文不值，因為，當中有沒有價格，我不知道。

但這不代表佢無價值，佢可能好勁，只是我自己不知佢好勁定好差。

佢長遠的價值，取決於「有多少人用」，即是說，雖然無真實價值，但可以有「交易價值」，如果長遠好多人用，的確可能有高價值。

因此，這些虛擬貨幣，由於我無法作出專業分析，所以，我不會投資。

但如果你分析到佢長遠的交易大，大家都持續關注，就有價值，就值得你投資。

我並沒有支持或反對投資虛擬貨幣，只能說，虛擬貨幣風險高，因此不建議大額投資。或者你可以用以下的心態投資，首先，你預期可能會大跌，心態上只用「閒錢」投資，就算不幸大跌對你都無影響，但你的要求回報一定是倍計，博虛擬貨幣有多倍計的升幅，絕不要升少少就賣。

------------------------------------------------

Q22680：

老師你好，想問隻293點睇？謝！

龔成老師：

坦白講，國泰（0293）的質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q14201-Q14220）

Q14201：

龔老師，你好。上緊你的股票班，同朋友上了第一課，真是收獲大！改變了我理財的思路！

現有一事請教，我手上現金較多（那些不是資產），想買一兩隻美股或A股（我已有不少港股及H股），有推介嗎？
我買股已超十年經騐，明白我自身該承受升跌的風險，謝謝你。昨晚下課我也問類似問題，但等候問問題的同學太多，沒有細問。

龔成老師：

其實美股，有很多好強的企業，你都可以考慮，只要你從消費者的角度去分析就得，例如：蘋果、麥當勞、迪士尼、可樂、FACEBOOK、巴郡B股。

不過有一個更簡單的方法，就是投資美股ETF，例如領航標普五百（3140），你連美股戶口都唔需要開，只要有港股戶口，就可以買這基金。

這基金追蹤往美股標普指數，當中都是全球最有質素的企業，同時，由於這是一個組合，比你單持有一隻股票，有更好的風險分散能力，因此，我比較建議你投資這基金。

同埋，國內股票都是這樣，我會建議你投資南方Ａ５０基金（2822）。

我通常會早15分鐘翻到課室，你可以早少少翻去問我，通常同學都好中意放左學先問，你上堂前問可以少D人。

------------------------------------------------

Q14202：

你好龔成老師

手上資金15萬 月入1萬5 剩儲7-8000
上月剛開始月供823 1千5 2800 2千 12 1千5 同66 2千

現想加多少少或者直接買1手12這樣好嗎？
還請問再加多隻3號長遠會穩陣嗎

龔成老師：

你現時月供的，都是有質素的股票，你可以保持長期進行，唔好理中短期股價，保持月供就得。

至於恆基（0012）與煤氣（0003）由於是同系，你唔好買太多，否則會過度集中，你可以買一手恆基，佢業務已經持有煤氣。咁就得。

至於現時持有的$15萬，唔好用盡。現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14203：

老師，看見你三月份的進階課程，有以下問題想一問，
1.這是第一次推出的課程嗎？2.有筆記嗎？3.有沒有持續進修基金認可？4.有補堂嗎？

龔成老師：

1）對，進階班3月是第一次搞，之後仍會搞。

2）有，每堂都有2份筆記，一份是POWER POINT，一份是文字版及重點圖表，

3）抱歉，並未列入政府的進修基金範圍。

其實，我都有同政府傾過，但政府要求佢將課程內容大改，要改到好學術性，先合符要求。

經過研究後，覺得若大改課程變學術性，實能度將會大大減少。學員只能學到一些理論而唔實用的野。

我認為，學員學到最多野，最能實戰應用，這才是最重要。因此，決定保留原有課程。

4）你只要預早同我同事講，下次開進階班時，就會補翻比你。

------------------------------------------------

Q14204：

老師請問如何看今年新股嘉濤2189, 認為有質素嗎? 可以月供長期購入嗎?

龔成老師：

嘉濤控股（2189）主要係香港從事安老院服務。佢合共營運8間護理安老院。

佢的安老院舍服務包括住宿、專業護理及照料服務、營養管理、醫療服務（存置醫療記錄及安排院友個別就醫或住院）、物理治療服務、心理及社交護理（舉辦康樂活動），以及個人護理計劃。

業務其實不差，穩定，同時有增長力，佢企業規模唔算大。不過上市年期不算長，令現時分析到的數據，不能100%盡信。

整體來說，都有質素，有投資價值，但不是最高之列，現價都算合理，只要唔太大注就無問題。

------------------------------------------------

Q14205：

現供
盈富5000
恆地5000
中電3000
中銀3000
恆生3000
長江基建3000

龔老師 上述建倉會否平衡 抑或轉一轉會好啲

龔成老師：

基本上是平衡的。首先，上述所供的都是有質素的股，都可以長期月供。

如果想優化，可以增加盈富（2800）部分，令組合更為平衡。另外，組合有少少集中在公用及銀行，你之後如果有資金，應該增加這兩個範疇以外的類別。

------------------------------------------------

Q14206：

老師，我想入2800，但未知幾時入2800好！
怕低處未算低

龔成老師：

無人知幾時最底的，亦唔好刻意去預期，無意義的。同埋，我地投資是長線進行，就算這刻投資後，股價中短期下跌你其實唔需要理會，因為中短期上落好正常，只要集中翻長期就得。

盈富（2800）是值得投資的，現價處合理區，如果你本身股票不過多，現價已可以，你可以用分注投資的方法，例如今日入一注，過3個月再入一注，再過3個月又入一注，這模式可以平衡你的買入價，這樣你就不用擔心這刻買完後跌的問題。

------------------------------------------------

Q14207：

龔sir 你好，我今年25歲，月入33000，我係你5月班既學生，上完堂真係學左好多野，改變左我既諗法，仲有你係最後一堂講你既故事，真係好inspiring, 我都希望有一日我都可以achieve到。

我之前都有問過呀sir 你問題，之後都有開始月供以下股票， 雖然上完堂對於選股有咗更深嘅認識但係始終未夠經驗所以只係夠膽月供住先， 嚟緊再儲多啲知識 有把握先至再入市，

～2800 2手
～1211 2手
～823 1手

但而加問題黎，因為市道唔好，上星期開始做了失業大軍，所以我會停左月供先，現在現金有around 15萬同以上股票，車我都已經賣左…

現在我plan緊會轉行，但可能要再過多半年到先開始先有返收入，而加想問下呀sir你，我是否需要搵野做住先，但因為我準備 轉行既事需要比較多時間準備，加上無屋企負擔， 返工搵錢都係自己洗，但半年無收入點都有啲擔心，想問下呀sir 你意見。

仲有，想問下我現在手上既現金，15萬，應該儲住先以防萬一， 還是可以有什麼策略發揮到呢筆錢最大功效，雖然我知道唔多。

麻煩晒。

龔成老師：

我地所有野，都以長期的角度分析，你這刻失業，只是暫時性，如果你預期半年後先有工作，你要好好想想，這半年點樣可以有效運用，對你長遠有最大的幫助！

工作都是學習的模式之一，如果你有長遠的目標，有無一些短期工作，一些兼職，可以提升你這方面的能力。

如果你半年後會轉行，是否要一些準備，如果提升自己。

這半年其實對你好重要，是一做改變的位，甚至是一些突破機會，你要好好利用，甚至，可以做一些小生意，這除了是學習外，都有可能是你人生的突破。

由於這段時間無收入，月供股票可以先暫時停。這刻的理財以防守為主。

另外，每個人都有夢想，我唔希望因為現實而放棄我的夢，所以盡一切方法，去盡力完成，我相信你都有你的夢，你都可以完成的。你要保持進步，保持向上的動力，唔好比中短期一些不利的事情影響到你，我自己睇翻我過往，每次失意時，都是突破位。加油！

------------------------------------------------

Q14208：

老師，請問1503招商局商業房托是否值得長缐投資，用來收息的優質股？

「招商蛇口將會提供上市後３年收益率保證，比市面上其他房託基金的穩定優勢更佳。」

我不太明白如何提供收益率保證
謝謝老師!

龔成老師：

我未正式睇佢所謂保證的內容，但我推斷到是大約甚麼一回事，因為10年前，過往有些房託上市，都有做過類似的事。

簡單來說，就是佢用某些方法，每年派出一個保證的股息。一般的房託，只利用「可分派收入」，去計算每年能派多少，這房託，如果這年的「可分派收入」較少，就會利用儲備、又或大股東收少D息，去達至保證某個股息的效果。

不過要留意，這只是3年，所以，如果是長線投資，最終都要面對真實的租務市場情況。

整體來說，這股不差的，有投資價值，都可以長線。

------------------------------------------------

Q14209：

大快活，請問是否超級抵買了？

龔成老師：

大快活（0052）整體的質素無變，仍是質素。

不過，我地睇翻佢最近的年報，會見佢面對兩個問題，第一是成本上升，例如人工的上升，第二是香港的現時不利情況。

第二點可以視為中短期問題，不用太擔心。反而第一點，見到佢人工上升的情況，無法將佢轉嫁比消費者，加上市場競房激烈，這方面對佢的賺錢能力有少少影響，所以在估值上，減左少少。

這刻可以話處合理區中下部，有長線投資價值，但未去到好平的水平。

------------------------------------------------

Q14210：

我都想問下，金界控股合理價位係幾多？

龔成老師：

金界控股（3918）有質素，但由於市場始終較新興，風險會比澳門博彩股較高，所以估值上都會比澳門博彩股低翻D。

現價在合理區頂部，小注投資都有價值，這股值得長線投資的。

------------------------------------------------

Q14211：

龔成老師好！我係大約兩個月前朋友介紹有幸成為你的讀者，然後開始留意你的Facebook 專頁，好感激你無私分享的理財知識。

我現在38歲，因有長期病患，3年前開始冇做嘢，現在老公負責大多數支出，存款在上年用哂買自住樓，收入剛剛好夠生活供樓，五年後自住樓供完老公也將退休，到時我將負擔起大約40000/月的生活費。

我現有資產如下：
出租樓大約$550萬，租金13000/月
現有股票有：

2號:500股
3號：2000股
5號：14638股
12號：3000股
405號:20000

883號：2000股
1988:15000股
2388:2000股
2800:1000股
3988:30000股

另有20萬儲蓄保2022年到期有22萬
有人民幣20萬息2.9%
港幣存款210萬息2.4%
活期20萬

我的情況有點複雜，希望老師你可以比點意見我，點樣平衡返個投資組合，又可以做到月入40000/月，無盡感激。

龔成老師：

首先，你可以好好利用這4年時間，去進行財富增值，我地會用一個「先增值，後現金流」的方法，這刻集中增值，到4年後，再進行資產配置，到時會集中現金流類別的項目。

所以，你這刻應集中在增長類的項目，你持有的股票，雖然有質素，但部分只是收息股，增長力不強，例如中電（0002）、匯豐（0005）、中行（3988），你要睇翻需唔需要調整，轉為有增長力的類別，例如盈富（2800）已是有基本增長的。

至於港幣存款，$210萬，同樣可以好好利用。

由於你這刻物業佔財富組合的比例比較多，資金應投資股票方面，你可投資平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

這刻可以將部分資金，以分注的模式，慢慢投入股市。

同時，有一個少少進取的做法（但你要衡量你的風險承受能力），就是加按物業，這可以將套出的現金，適當地投資股票增值，只要是穩健，優質的股，長線投資就無問題。不過，這動作始終會增加了你的負債，你要明白當中的利與弊。

到4年後，再進行資產配置，集中在高息，現金流較強的類別，到時投資6%的收息股，要達到你的目標都是可能的。

------------------------------------------------

Q14212：

你好，老師
這兩年看了你的書，了解了現金流的重要性，但小女今年已經39，沒有任何存款，請問可以怎樣開始？

龔成老師：

不如咁啦，你逼自己做3樣野。

第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平。你可以先了解下不同的收費。

第三，將每月的部分資金，去做月供股票。你要逼自己以月供股票模式去儲錢，你已經錯過了之前的時間，這刻一定要盡快開始！就算每月$3000都不差。

你可以供供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過半年，有知識及少少經驗後，就可以利用你手上的資金，其中一部分，去投資股票。

------------------------------------------------

Q14213：

龔成老師！你好。請問6896金嗓子質素如何 因$3.6時入了貨 現在不知應否留住收息

龔成老師：

我地繼續持有一隻股票與否，最重要是企業的質素、前景，買入價只是一個心理因素。

金嗓子（6896）近年的盈利有下跌情況，其實佢不是完全無質素，但市場過往對佢有太大期望，但現時見到佢增長力只是一般。

這股其實派息不差，你這刻可以收住息先，但要上翻去你買入價，的確較難，因為當時市場預期佢高增長，當時是貴，但要上翻去，就要有一定的因素支持，但暫時都未見到。

所以，你預這股是收息，以及有平穩增值，如果這都是你的投資目標，其實可以持有住先。但如果太多貨，就應該賣出一部分。

------------------------------------------------

Q14214：

老師 想問下 3313如何？

還有反彈的可能嗎？
會否一直沉底？

龔成老師：

其實之前都有分析過這股，雅高控股（3313）這類股，風險好高的。

我從基本面分析佢，投資價值不高，而佢股價上落大，的確好吸引散戶，但從我地正式投資的角度，唔會選這類股。

這股現時投機味太重，唔建議買。長遠者必會上，反彈可能有。

如果你有貨，建議賣出，除非你小注，而你確認這部分資金，是屬於高風險類的（你可以當博下的模式），但說到尾，投機味太重。

------------------------------------------------

Q14215：

老師你好，請問14前境如何？
現價值得買入嗎？

龔成老師：

希慎興業（0014）本身有質素，持有大量銅鑼灣優質地段，但近期的社會運動，對佢影響唔細。

不過，香港的情況只是中短期，從長期而言，佢仍是很有質素，絕對有長線投資的價值，現價合理，分注投資無問題。

------------------------------------------------

Q14216：

你好, 我由18年9月開始供66同823, 請問到現時為止, 823仲值唔值得供落去？

依家大市就算升, 823似乎都冇乜上升跡象
謝謝

龔成老師：

絕對唔好以中短期的股價，衡量一間企業的質素。

領展（0823）是好有質素的股，這點無變，只是由於香港的社會情況，對佢中短期有影響，而佢長期的質素仍在。

你預在之後的中短期，就算大市升，佢都未必有得升，這是由於香港的社會對佢中短期有影響，不過，我地絕對唔會因為咁樣就衡量佢無投資價值。

因為所有投資都要長期，而你月供股票，其實應該希望佢「中短期不斷跌，長期向上」，這對你才是最有利的，成本最低。

另外，我留意到，大股東在近半年不斷增持。

------------------------------------------------

Q14217：

老師請問66現價合理區嗎？

你建議買5000股66or 4000股05？
長遠邊隻增長力會比較強

感謝

龔成老師：

港鐵（0066）是好優質的股票，長遠有平穩增值的能力，同時有一定的派息，現價在合理區中上部，分注投資可以。

至於匯豐（0005），都是有質素的，但增長力不強，只是收息股，唔好對股價有太大期望。

所以，投資港鐵會好少少。

------------------------------------------------

Q14218：

想問你係facebook時常叫人月供股票。其實比起買幾手係身，月供有咩好處/優勢?

龔成老師：

最大的優勢是減少風險。

當你不斷月供是，原理就是將一筆資金，分開在好多次去入，這能減少一次過高位買入的風險，可以將買入價平均。

可能有人認為，月供無法把握一次過在低位買入的機會，這的確是，但前題是「你有能力捉到低位」。

根據我過往多年做銀行，見了無數散戶投資的經驗，好多散戶都以為自己能一次過買入捉低位，但最後卻是高位，反而好簡單做月供的散戶，長期的回報更好。

------------------------------------------------

Q14219：

之前買咗00011恆生兩手173.80, 應唔應該溝貨? 現在溝得未?

龔成老師：

我地決定繼續持有一隻股票、決定加注與否，不是睇買入價，買入價只是心理因素。

第一，要分析這股有無質素，恆生（0011）有質素，可以持有。

第二，這股佔你組合比例，如果現時佔比不過多，你加注可以。

第三，現價平貴，決定再入與否，一定要睇翻現價平貴。這股現價合理，加小小無問題。

------------------------------------------------

Q14220：

成哥 你好
本人持有1883
目標收息為主

現年28歲 打算長期持有之退休
穩陣嗎

謝謝指導

龔成老師：

中信國際電訊（1883）是不錯的收息股，但就未必最適合你。

先講佢質素，算是不過不失，佢的確係澳門唯一提供全面電信服務商，見佢生意都算穩定，但就見唔到有上升。

不過，盈利就穩定並平穩增長，但始終生意無上升，點都會有扣分的地方。相信佢能平穩發展，但增長力就不強，收息可以，但就不要對股價有太大期望。作為收息股，佢是穩定的。

不過，你28歲，其實應該投資較有增長力的項目。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q12701-Q12720）

Q12701：

你本《年報勝經》好有用！最近我見 中軟國際（354）跌唔少，老師計到是 合理區 下部？

我計到估值大約 2.8-3.2。如果用巴菲特貼現估值是2.7$。

吉利汽車告理層好似話盈利會比上年減少40%，便宜區會跌到6$樓下嗎？

老師，市場已經聽到有人話情況可能差過2003，2008年。跟住又見到巴郡上季賣左好多股票，持有1224億美元（好似從未持有過咁多現金）。

老師，依加投資策略應該點做？

龔成老師：

中國軟件國際（0354）現時在合理區中上部，這股有潛力的，但業務本身就比較波動，所以投資金額唔能夠太多。

另外，這類股由於業務波動，有時估值的變化都會較大。

至於吉利（0175），雖然業務弱左，但我地估值時，要了解翻佢的業務是中短期還是長期的不利，考慮到佢中短期仍有不利因素，而長遠仍不算差，如果要落到平宜區，$8以下開始是。

至於香港的情況，我相信唔會去到沙士咁樣，不過，中短期一定會比較弱，而我地投資，反而會認為有危有機的。

至於巴菲特，佢一向都持有大量現金，有時因為買賣等調整持有多少少無問題，唔見到佢大量賣貨。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12702：

老師 請教一下 中銀香港2388現在算是便宜價嗎 可以掃貨嗎？

龔成老師：

中銀香港（2388）本身有質素的，可長線持有，佢由高位回落左唔少，這刻在合理區中下部，但就未到平宜區，這股已經可以分注買入，只要唔用盡資金就得。

你預佢中短期仍會波動，要長線投資。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12703：

龔成先生你好
我想請教大師你

一直也有留意你的書及影片，關於莎莎國際見大師曾看好前景

現在股價回落不少，是否還有價值投資？
謝謝大師

龔成老師：

莎莎（0178）本質唔差的，品牌、銷售網絡、財務穩健，都是佢的優勢，因此長期的投資價值仍在。

不過，自由行人數減，經濟問題，人民幣弱，香港事件，都對佢短期有很大的打擊，這一定會令佢的股價在中短期仍弱，但相信佢能過到這關，之後股價會好轉。

現價在合理區中下部，可分注慢慢入，但未到掃貨區，你要有心理準備，若問題進一步變差，股價會再下跌。所以要以3年以上的角度去分析。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12704：

龔sir 你好呀 0019係米入貨時機？

龔成老師：

以質素來說，太古地產（1972）會比太古（0019）更高質。

0019股價的確由高位回落了不少，而這股本身亦有一定的質素，這刻處合理區，未到平宜區，如你買入，可以，分注就得，但就不是掃貨。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12705：

788，1.4入3萬股
1.87入3萬股現2樓上渣定沽

龔成老師：

中國鐵塔（0788）有質素的，有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。

這股最近是市場焦點，同時近期問答信箱好多人都問，我就知這刻有少少熱炒的情況，若分析佢市盈率，會見到現時仍然處好高水平，反映現時估值略貴。

由於這股有發展力，如你有貨，可長線。

如果你持貨佔你總財富的比例較多，可以考慮賣出部分，餘下則長線持有。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12706：

之前$69買左5號,,,依家跌到咁樣, 洗唔洗放左佢先? 會唔會再升返咁高...

66 同823仲買唔買得過?
1117 有潛力嗎?

依家努力咁睇緊你D書, 希望可以投資多D落收息股

龔成老師：

匯豐（0005）本身雖然有質素，但近10年的賺錢能力有轉弱情況，這刻只能視佢為一隻收息股，唔好對股價有太大的期望。

如果你貨不太多，可以持有，但你只能當佢收息，股價上翻去要較長時期。

至於港鐵（0066）、領展（0823），當然可以長線投資。

中生製藥（1177）是潛力股。

如果你要分析收息股，記住從業務穩定性、盈利與現金流穩定性、股息穩定性，這幾個方向去找。

另外，你要睇翻自己的年齡情況，如果年紀唔算好大，唔需要太集中在收息股，因為我地進行人生財富累積，會以「先增值，後現金流」作策略。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12707：

成哥 香港可能加速回歸中國 到時候唔知會否以人民幣作為主貨幣。

聯繫匯率受到影響 港股是否不再值得投資？

龔成老師：

暫時睇，香港仍會用聯繫匯率，這對香港在國際上的地位、貿易都好重點，中國都明白這點，因為在經濟上，將香港變成中國一個普通的城市，對中國無好處，反而比香港在經濟上在獨特性，對香港同中國都最為有利。

所以，在可見的將來，都唔會變。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12708：

老師：我今年25歲，最近睇到有份儲蓄保險，供5年，每年約5萬3，成本約265000，第六年預期拎310000。回報算唔算好？

定係用呢筆錢投資
2800/2388，5年既回報會高d?

現時人工唔高$15500，扣除家用雜費保險，只剩約$5000可用作投資，應該月供股票比較理想還是買儲備保？

龔成老師：

在理財的角度，這類儲蓄保險都有投資的價值，但回報不算高，通常這類投資，都是比一些不太懂投資的人，可以作為投資的項目。

另外，由於這項目的風險較低，可以視為理財其中一部分。

但如果是年輕人，這類產品只要小小就夠，因為自己投資股票，只要有基本的投資知識，都可以有更好的回報。

所以，你可以以月供股票，例如月供盈富（2800）為投資主線，再加少少這些儲蓄保險產品都可以。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12709：

老師，又想問你，之前你係讀者信箱講過買100%追蹤恆指的mpf，想問點解呢？我可以點分析mpf？點揀？

龔成老師：

首先，強積金是超長期的投資，我地只要好簡單咁人生階段、風險承受能力去配置就得。例如年紀較輕就進取，中年就平衡分配，年長就保留，咁就得。

即係話，我地根本唔需要轉來轉去，按人生的階段，簡單分配就得。

所以，如果一個人的年齡在40以下，仍可以進取的，可以將較多資金，投資在較為進取的類別，少少在平衡組合，咁已經得。

所以我一直集中在增長類別，而與其信所謂的基金經理，不如簡單追恆指，回報會更好。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12710：

老師你好，本人現年36歲，在內地開設茶餐廳和香港做網上零售服裝年薪約1,000,000。

收入是一年結算一次，所以我可以一次攞出1,000,000出嚟，有物業自住的月供$12,000，還有一間村屋樓花興建中。

現在打算用1,000,000現金做首期投資紅色的士，我比較喜歡查實物不太喜歡投資股票，請問老師有何高見謝謝

龔成老師：

其實股票的本質就是企業，企業都可以好實在的，你可以花時間多了解。比較好的做法，就是建立一個平衡的組合，當中可以包括物業、的士牌、優質股票、現金，咁樣會比較平衡。

的士牌，是不錯的投資工具，近年已回落至合理水平，而且可以做高按揭，可投資。但叫車工具APP等，會對佢做成一定的影響，整體上，影響了佢的增長力，但要做到平穩，有穩定的現金流，可以，因此，你都可以考慮投資，現價合理。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12711：

您好，偶然看到您的面書，想徵詢閣下就投資事宜的意見,以下是本人的個人狀況：

1.約有200萬左右現金
2.家庭收入約7萬；
3.居住予太太之個人物業；
4.女兒一名，約3歲
5.供2份永久年金，金額分別為300000及500000港幣，於2022年完成供款；

想為退休及女兒長大後讀書所用，請教相關投資分向，女兒部分希望為她投資藍籌股進行增值

龔成老師：

你本身已有自住樓，因此唔需要太急買第2層樓，同時，你持有一定的現金，以及已投資年金產品，在投資分配上，其實有點保守，組合的增長力不強。

其實你已做好了防守的部分，之後要做的就是進攻，你可以將$200，其中的$100萬，分注投資股票，只要穩健，不太高風險的就可以，目的是想你的財富有平穩增長的能力。

你可以將$100萬，分注投資平穩增值股，例如分1、2年去入，投資盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

盈富的佔比可以較多。

同時，如果你每月都有一定的資金剩，可以同時做月供股票，除了考慮上述的股票外，亦可以月供小小潛力股，例如比亞迪（1211）、中生製藥（1177）。

你保持這樣進行，不斷財富滾大，如果日後到有相當的財富，而物業市場又處合理價水平，你到時可以考慮投資多一個物業作收租之用，但這一步不用急。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12712：

老師，本人36歲，現金不多，打算準備開始月供1萬優質股，再儲1萬現金。但考慮到香港局勢。

現在是否時機開始月供計劃？還是全力儲現金留待日後（不確定何時出現）大跌市掃貨？

月供組合方面，優質地產股應否考慮？12、16、1972哪隻前景較好？

擔心零售市道差/倘出現的裁員潮會嚴重影響香港未來的地產市業。many thanks!

龔成老師：

你現時已可以開始月供，投資者太多主觀的分析，反而不是好事，無人知事情真正會點發展，無人知，而股市點發展，無人知。

另外，股市的發展亦不一定同事情發展有絕對的直接關係，所以，我地應該用平衡投資模式。當大市處合理區，分注投資，如果平宜就掃貨。

而你這刻將$1萬去月供，適合的，所以已經可以開始，月供是長期策略，因此不用理中短期問題。

地產可考慮，恆基（0012）可以。

零售業中短期可能弱，但長遠計，反而是投資優質零售股的時機。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12713：

龔成老師你好，我最近開始看你的專頁覺得你分析很專業，望可以指點一下。

我剛剛踏足社會，聽朋友說買了幾手中國鐵塔

$2.29 x 20000
$2.09 x 10000
$2.16 x 6000

想問前境如何？應該在最近加碼？
謝謝

龔成老師：

這股雖然不差，但你都不能過度集中。

先講這股，中國鐵塔（0788）有質素的，只是近期有少少炒概念，所以這刻唔能夠太進取。

這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。

這股最近是市場焦點，同時近期問答信箱好多人都問，我就知這刻有少少熱炒的情況，若分析佢市盈率，會見到現時仍然處好高水平，反映現時估值略貴，就算加注，都要回多少少。

由於這股有發展力，簡單來說，你的貨可長線持有，不過，你要睇翻自己持貨是否過多，當你組合同一行業、同一股票比例太多，就會對組合的整體造成風險。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12714：

龔成老師，我40歲，想用$15000，月供三隻股票，每隻五千，但太多選擇揀唔到，如果3，5，2800，12，66，2638 中揀三隻，老師有什麼提意thx麻煩曬

龔成老師：

你40歲，適合平穩增長類的股票，可以供盈富（2800）$7000、港鐵（0066）$4000、恆基（0012）$4000。

你唔好理中短期的股價，保持長期月供就得。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12715：

龔 sir 你好，我26.90元買入 1000股 盈富基金，是否快咗入貨呢？因為現在跌緊。

另外想問 如果想入 匯豐 或 恒生，入那間會比較好呢？長線收息為主，謝謝！

龔成老師：

記住，無人能準確地分析到幾時見底，所以，唔雖然理會中短期的股價上落，坊間的財演所謂分析大市走勢，是無法做到的只是馬後砲的技巧。

我地會以平貴去分析，你買入價合理，唔需要因為跌緊而擔心，要長線持有。

恆生（0011）會比較好，有基本的增長力，不過匯豐（0005）的股票穩定，如果你目標只是收息，就匯豐，想收息加增長，就恆生。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12716：

你好，龔成先生
有5萬閒置資金，可以選擇什麼股票

龔成老師：

目前的大市在合理區，你可以動用部分去投資，長線持有。由於$5萬不算太多，你先要留下一定的備用現金，同時不希望你太集中在單一股票。

因此，投資盈富（2800）較適合，你可以現價入一手，之後，若果大市明顯回落，你再入多一手，長線持有。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12717：

老師～想請教一下月供5000買386中石化近一年！但現在處於底位！你建議轉供其他還是繼續？謝謝你

龔成老師：

中石化（0386），質素算是不差，但又未到好好，始終這只是商品企業，沒有一些太大的優勢。

生意近5年只是上上落落，無乜增長力，這是受油價等因素影響，反映佢處於一個被動的狀態。

所以，然股價回左，但只是合理水平，不過作為收息股投資，都可以，股息率的確是不錯的，但由於增長力不強，不要對股價太有期望，同時買入時應分注，只要不太大注，都可以的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12718：

龔先生，你好。我37歲，有2名小孩，由於每月要供樓及生活費，每月都所剩無己。每月扣除所有開支可以剩餘$2000左右。

我之前有買儲蓄保險，但都要等多15年後先可以用到，而我又唔識買賣股票。想請教一下每月只有$2000，可以如何投資？

預10年左右，希望會有多一點的資金。
感謝。

龔成老師：

你有買儲蓄保險，在理財中已經做好了防守的部分，餘下就是進攻。

你將$2000每月投資股票是適合，不過，由於你無投資經驗，加上資金不算多令組合較難有效分散，因此，集中投資盈富（2800）是最好的策略。

因為盈富本身是一個組合，當中包了50隻質素不差的股票，所以本身已有風險分散的能力。你可以每月供$2000，長期進行我相信是最適合你的。

另外，你最好比較多幾間銀行的收費，因為如果手續費佔本金太多，對你影響會較大。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12719：

龔成您好，幾年前開始看你的投資專欄。

最近下定決心要處理好屋企嘅資產，而家嘅情況係30隻二三綫股票股票1.5M，現金1.5M，想請教下你點樣處理好

龔成老師：

我地繼續持有一隻股票與否，最重要是企業的質素、前景，買入價只是心理因素。

因此，你要以質素、業務、前景，去分析你手上的持股，無質素的股票就要賣出，狠心賣出。

並慢慢將資金，集中投資更優質的股票，最基本就是盈富（2800），長線持有就得。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q12720：

成大師,。本人今年40歲, 每月收入$50,000, 現月供股票每月共$17000, 主要為儲蓄用, 請問以下組合ok? 會否太保守.
1. 2800 $8000
2. 0003 $3000
3. 0823 $3000
4. 0027 $3000

謝謝賜教

龔成老師：

上述所供的，都是有質素的股票，絕對可以長線投資，只要你不理中短期股價，保持進行就得。

以你的年齡情況，適合投資平穩增值股，上述的股票都是這類型，因此上述月供無問題，雖然部分股票如煤氣（0003）、領展（0823）都有少少貴，但只要你長期進行月供，就無問題。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。