人生必然經歷過不斷轉工種，不斷轉公司。但若干年後，你覺得塵世間已經無野值得留戀，於是放棄繼續尋尋覓覓，留喺一間公司終老…因為你覺悟到，無論轉幾多份唔同嘅工種，你始終都係唔鍾意份工。無論轉幾多間公司，個老闆都係咁仆街。原來喺你腦海入面，嗰間共同為目標奮鬥，上下一心去解決問題，努力付出係有回報嘅公司，只係一個烏托邦… . 而當我轉咗好多份工之後，我仲到發現到一樣野，就係每一個辦公室都擁有一群相約嘅「奇行賤種」…就好似讀書時，每班都有一個被集體欺凌嘅肥仔。象棋都一定有兩隻炮兩隻車。而每一間公司，除咗有個仆街老闆之外，對落總係有一班「奇行賤種」去維持辦公室仆街生態。 . （註：「奇行種」一詞，本源於動漫《進擊之巨人》中的巨人種類，奇行種雖與一般巨人外表無異，但行動模式怪異而且行為大多數無動機，所以令人無法捉摸。） . 老闆有幾仆街相信大家都好清楚，OT唔補水、24小時睇e-mail、放假都要覆電話…所以老闆絕對係一腳踢爆你人生城牆嘅五十米巨人，而以下要講嘅就係竄入黎啃噬你心智嘅奇行種。 . . 一） 『你老母幾點鐘生你出黎？』 . . 呢種同事對你嘅年齡、住址、家事、私事，甚至乎星座都極濃厚興趣，由你入職開始，就好似查家宅咁「住邊頭啊？幾歲？有冇女朋友？」。你永遠無法猜度佢問黎做乜同埋知黎做乜，呢個就係奇行種嘅特性，因為佢可能連自己都唔知問黎有乜用，但佢就總係不停打聽你嘅私人生活，然後作出評價，或者留返一班同時食飯Dead air時扔出黎作為話題。 . 對付方法：對付呢種人，一定要鳩噏當秘笈，佢問你住邊，你答佢b612星球，佢問你有冇女朋友，你就答佢支持同性戀。總之就要破壞佢嘅記憶系統，令到佢連複述返出黎都覺得憨鳩，方可將佢擊退。 . . . 二） 『幫我聽住個電話，有人接聽就叫我！』 . . 工作上同其他公司溝通就少不免，尤其係大公司，撳幾十個制，等一輪都未駁到真人聽電話。而呢種同事就誓要話畀全世界人聽，佢打緊電話。開著個speaker就走去做其他野，佢自己就行到老遠部影印機去print野，難為坐佢隔離嘅同事就一直被騷擾，普通鈴聲都算數，有時最煩嘅就係對方電話有接駁鈴聲，我已經聽足成個月容祖兒首「成就了登上懸崖峭壁的女子～」 . 對付方法：對付呢種人要以其人之道還治其人之身，一趁佢行開咗就即刻CUT咗佢原本條線，然後偷偷打去自己內線，再「Long」起個電話，再叫佢返黎。當佢疑惑「咦？點解無人講野嘅？」，你答佢：「佢可能等得太耐，好似你咁行開咗去print野，唔緊要，繼續努力，下次一定得嘅！」 . . . 三）『我嗰張呢？無可能，下張一定係我！咦唔係、咦又唔係…』 . 我明白咁辛苦撳完個Print制嗰種心急嘅心情，亦明白見到影印機出極都唔係自己嘅野嗰種無奈。但有啲野，唔屬於你就唔屬於你，無謂急於一時，有時我順次序print出黎，我就係想順返次序拎埋位。但你幾張幾張咁抽出黎，又唔排返次序，到最後你終於拿到自己嘅野，我就要好似玩襟棉胎輸咗咁，將一疊亂晒次序嘅文件疊齊返埋位重新排好次序。而最令人氣憤嘅係，佢仲用一副怪責嘅口吻同我講:「下次Print咁多張紙出聲嘛…」 . . 對付方法：每次你Print一大疊文件時，又見到呢類奇行種有所行動想出黎printer拎野，你就要搶先一步出去鳩拎晒所有紙返黎。等佢搵餐飽嘅，隔十分鐘先用一副彬彬有禮嘅態度拿返屬於佢嘅文件行去佢個位，同佢講：「唔好意思，拿咗你張紙。」通常佢都會話：「「原來係你拿咗，等我撳幾次行到出黎又搵唔到…」「係咩？下次print一張咁少出聲嘛，我讓你先。」 . 今次講住咁多，下次帶各位行入Pantry同廁所，見識吓更多唔同嘅奇行種