【龔成問答信箱】（Q22061-Q22080）

Q22061：

龔sir, 本人52歲，早年對股票市場沒有深入認識，便跟朋友一起買入股票，97年全部變晒蟹貨，朋友話同佢鬥長命，所以全部都沒有放出，

但有些已100合1，變為單位數股票，想放出也蝕手續費。

最近這兩個月開始睇你Facebook, 覺得應該要整合一下手上的股票，不應採取放任不管態度，要選擇一些適合自己年齡的投資組合。想問以下股票是否應全部放出？

0604(深圳控股）
0622(威華達控股）
0697(首程控股）
0759(CEC國際控股）
0887(英皇鐘錶）

0910(中國三迪）
1168(百仕達）
1339(中國人民保險）
1387(中國地利）

1466(錢唐控股）
8173(萬亞企業）
8178(中國訊息）
8311(圓美光電）

手上還有以下賺的股票，是否應繼續持有？

0354(中軟國際）
0700(騰訊）
1810(小米集團）IPO
2158(醫渡科技）IPO
6618(京東健康）IPO

睇左你facebook後，上月買入以下股票。

2382(舜宇光學）月供$2000
2800(盈富基金）月供$2000
6823(香港電訊）2000股

月入3萬，扣除開支後可儲蓄$5000，.流動資金$1,200,000. 應怎樣運用現有資金，來選擇適合的投資組合。

龔成老師︰

我地投資一隻股票，就如投資一間企業。如果你係無質素架股票，不論而一刻係賺定蝕，你都應該要沽出。

唔好諗住同佢鬥長命，因為無質素架股票，可以越跌越深，去到一個低賤的你估唔到的水平。所以要果斷，無質素就要沽出，將資金收回，用於有價值的股票身上，才是正確做法。

另外，你唔好再單係聽朋友講，或者聽消息就去買貨。

我地買入一隻股票，一定要知道佢質素、行業前景、財務狀況等，才去投資。如果你連間公司點賺錢、行內有乜優勢、點解未來有發展和增長潛力，都答唔倒自已，咁就要停一停，唔好投資住。

以你52歲計，現時月供的股票都無問題。至於，你現有持股方面。中國人民保險(1339)有質素，你可以長線持有。

深圳控股(0604)、首程控股(0697)都可持有，但質素較一般，不宜持有太多。

中國軟件國際(0354)、騰訊(0700)、小米(1810)、醫渡科技(2158)、京東健康(6618)係有質素的潛力股，由於佢地風險較高，以你年紀不宜持有太多，最多只可佔組合2成。

其餘股票，質素較弱，甚至係無投資價值，建議最好沽出，換至其他優質股較好。

未來時來，你可以用以下股票作目標，當中以平穏增長股為主力。但隨著年齡增加，慢慢增加收息股的比例。到退休時，你收息股比例，應提升至100%。

現時大市只係合理水平，現金佔比重大約3-5成。你可以睇翻自已現金和股票比重，決定是否再投入更多資金入市。若然係再入市，緊記係分注慢慢入，唔好一次入晒，以減低買貴貨機會。

------------------------------------------------

Q22062：

老師， 8367 倩碧是麻孫樂控股公司，上月見價位低殘，買一百萬股都是十一萬左右。 之後減磅兩次，仍有六十餘萬，繼續揸擔心一天瀉九成。 可以點處理？

龔成老師︰

倩碧控股(8367)集團於香港以「麻酸樂╱嫲孫樂」、「峇峇娘惹」及「泰巷」三個自營品牌經營。另外，有提供特許經營商經營，供中式麵食、泰國菜式，日本菜式及馬來西亞菜式。

此規模唔算大，營業額唔算多，而且有按年下跌的情況。過去企業多年虧損，2021年表面上係轉虧為盈。但實際上，只係公平值變動(一些會計數字，而非實際收入)會造成。

實際上，佢過去4年都係維持虧損狀況(包括2021年)。睇唔倒有乜明顯因素，支持佢近期大升。

遇到這些情況，我地就要好小心。而且企業本身無明顯投資價值，建議盡快沽出較好。

------------------------------------------------

Q22063：

龔成老師，你好呀！之前問過你有關投資股票嘅問題，因為等佢價格高啲先放，所以現在冇變動過。仍然係以下咁：

#1 2500股 $53.5
#2 1000股 $71.5
#941 1500股 $42.5
#291 10000股 $67
#3690 500股 $278
#909 8000股 $53.5

現在問題是我嘅租約差唔多滿，有現金和以上股票200萬左右。請問我應唔應該賣晒啲股票，用我190萬左右嘅錢去做down-payment 買樓，做6成按揭呢？

因為供樓同我現在租金一樣。我想買嘅係一個272呎嘅元朗開放式單位自己住，供樓連管理費會是$12000內。請問我嘅投資方向啱嗎？

因為份工剛剛做，要到出年才有稅單可以做8到9成按揭，又怕出年更貴，應該怎麼樣更好呢？ 麻煩老師解答，萬分感謝！

龔成老師︰

現時貸款息率唔高，其實盡借長線只會貶值的現金。之後，再將空出來的資金做投資增值，咁會較好。

至於明年樓價會點，無人知。但從長線投資角度考慮，你用低成數按揭，長線可以投資資金會縮細，在現時市況，對你係不利。

現時持有股票，都係有質素，長線持有就可以。

明源雲(0909)和美團(3690)不確定性較高，不宜持有太多。

另外，你非常集中係華潤啤酒（0291），佔組合近一半。記住，個別企業和行業，不要佔組合15%和30%以上，否則會有過度集中性風險。

因此，你要沽出停份，去平衡風險。

------------------------------------------------

Q22064：

龔SIR你好~~我係上年PM問你供股既建議，供左大概九個月，一開始你叫我拎5K月供真係好心痛，後來我減少開支再諗辦法做副業，真係比我做到月供5K!!!

見到有正數增長真係好開心(大概8%)!! 呢一年努力抗疫唔出街，總共儲左10零萬(拎左8萬左右投資)，自己做副業賺左萬零蚊,

雖然好少錢，拎去入左一手IBOND打算賺少少，錢搵錢呢個感覺真係好好。

加上好好運咁逆市升職，加左家用比父母，佢地又開心左～我覺得自己好適合做月供，個心好定，唔洗成日望住個市影響心情！可以用多D時間專注正副職/讀書。

本來手上有5萬左右現金，不過拎左去大學交學費， 再學埋電單車， 比我用晒了…而家無錢入市啦, 只可以月供， 不過D錢投資自己身上我覺得值得既!

未來打算加大個月供計劃！每個月總共可以儲1萬至1萬3～

而家調整緊個計劃，想問下你既意見～

1. 我應該繼續用5K月供,定加到6K?

2. 月供2800 價位約$27, 我可唔可以停左等到價位回落先再供?用筆錢供其他股票?

3. 如果已經有1810, 1211, 9988, 2158, 6618呢幾隻股票係手, 我應唔應該供3067?

9988而家月供緊, 其他暫時無供. 1810, 1211等價位低先再供. (暫時主力供823, 9988, 1177, 2638, 2800)

4. 最近考左電單車牌, 打算買車送外賣/送貨之類.（期望每月賺多$3-5K, 因為我係女仔, 第一比人話危險, 二黎比人笑我無出息, 但我唔理旁人既眼光, 我要賺錢呀!!!!)

a. 假設我手上有四萬現金:
i. 直接全數買車
ii. 兩萬蚊去分注月供股票, 留兩萬係手, 用信月卡分期12個月供車, 利息大約0.15-0.18% . 如果供股票想揀2638, 打算派息可以cover信用卡大部份既利息.

5. 思想上唔夠進取, 唔敢100%拎晒去買潛力股, 所以揀月供2638, 咁樣係咪好蝕底呀?

多謝老師花時間睇我既問題!!

龔成老師︰

現時你理財方向，都正確，要保持住。同時，你努力學習，去提升自己投資知識。

1) 如果每月係可以穏定儲到$12000，你就應將月供加大至$6000

2) 唔建議，首先，我地只會係去到好貴架水平，才會考慮減供款或停供。但現價計，盈富(2800)只在合理水平，不需要調整供款。

另外，你投資經驗不多，我唔建議你咁快自行決定調整供款策略。因為如果你調整時機不對，會大大影響長線平均價格效果，令長線回報受影響。

除非你對定平貴，係好有信心。否則一直不理價格，去長線月供，反而對你係最有利。

3) 港燈(2638)係收息股，增長力不高。你現時29歲，應以增值為主，故此股不適合你作為月供目標。

至於安碩恒生科技(3067)，你去月供係可以。只要你科技股(9988, 1810, 3067)，唔好佔超過組合3成。同時間，潛力股(1810, 1211, 9988, 2158, 6618, 3067, 1177)唔好高於組合4-5成，咁就可以。

小米(1810)現價略貴，但月供還是可以。而比亞迪(1211)現價係貴，月供最好等回到$17X才考慮。

4) 其實工作，都無性別之分。你唔洗太理別人眼光，做正確的事，永遠都是對的。

以利息率計，用分期買車，再去投資收息股，係會較理想。但你要明白，股票始終會有價格波動，有機會賺息蝕價，你要明這個風險。

另外，你都要了解清楚，這個是否真正總年息，會否有其他潛在費用，才去做決定。

5) 我地投資，除左年紀係考慮因素外，投資經驗和風險承受能力，都係一個考慮。所以，無話絕對的對與錯，重點係是否適合你。

以你年紀，港燈(2638)的確會係較保守。但要去到100%潛力股，你個組合風險，又會出現過高情況。

你可以用一半平穏增長股，一半潛力股作組合，這樣組合平衡性會較好。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22065：

龔Sir，感謝你在股票班最後一堂的個人分享，聽到我眼濕濕。實在太有共鳴，亦自愧不如。

我嘅成長環境同老師你有啲似，都係成長於公屋家庭，居住環境擠逼，由於長期缺乏私人空間，非常渴望擁有自己居住的房屋單位，

但礙於香港樓價高企，個人經濟能力有限，一直處於半放棄（人生）狀態。

自愧不如的是比老師你行慢好多好多步。老師在十多歲嘅時候已經定下目標，立定決心，付出超乎常人嘅努力，28歲嘅時候賺到第一個100萬，反觀現時27歲嘅自己才剛剛起步。

不智嘅我都曾經怪責父母嘅不努力，甚至抱怨不想被生下來，傷害了彼此。

現在明白父母給予自己最寶貴的禮物是生命，財務知識可以自己學，錢應該自己搵，人生掌握在自己手中，將來由自己親手構建。

當人立志成為優質股、潛力股、倍升股，定必增長迅速，回報驚人。深願能夠運用所學，日後向老師你匯報成果。

龔成老師︰

你現在才27歲，現在努力去做好財富增值，未算遲。這是你最大的本錢，只是你這刻努力，一定能完成到目標！

其實，好多外在的客觀環境，唔到我地去改變。但我地可以改變自己，調整自己的心態。

你唔好覺得不如我，我都只係一個普通人，我做到的事，你都可以做得到，只要你相信自己。

上完課程後，你就當係一個新起點。努力去為自己人生定好計劃，比心機學好理財，相信很多你過往覺得的「不可能」，都會慢慢變成為看得見的「無限可能」。

同學，加油!

------------------------------------------------

Q22066：

老師，上年開始FOLLOW你的PAGE，亦很同意要買優質企業的看法。我亦已閱讀了你的4-5本書籍，亦閱讀了格雷厄姆、彼得林區、巴菲特的一些書籍。

透過購買優質股，我曾經浮收益超過6位數，我非常感謝！

然而，今年分析了968 後，認為該股是優質，故分注入了3手，分別是15、13及12，然而卻不斷下跌，收益不斷減少，令我反思是否應該斬倉...亦令我覺得不應該持續望住股票...希望將來可以好似老師甘可以令利財產增值。謝謝老師

老師，均價13.8入了3手968 信義光能，請問是否應止蝕？

老師，一直都想入完美醫療，但見佢業績持續向好，股價亦不斷上升。想問下老師，此隻股是否仍然5蚊左右才是合理區頂？

龔成老師：

其實，你保持用「價值投資法」就得，但要留意，這是長期性的，你中短期會有好多考驗。

信義光能（0968）是有質素的股，但你犯了幾個錯。

第一，你在貴的價位買入。

第二，你每次買入價相差太近，起碼要有10%以上，如果股價較波動的類別，要差15%。

第三，你應該等回去合理區先分注加注。

第四，你唔應該因為「股價下跌，就認為企業質素轉差」。

這股可以守的，但就要耐心點，如果你持貨不過多，無問題。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

業績前計佢$4是合理區頂，業績後股價升左好多，雖然我之前好大機會會調高佢合理價值，不過，現價都有少少貴。

所以，如果無貨，你可考慮回少少，先小注，然後等跌多d先正式分注投資。

------------------------------------------------

Q22067：

Coinbase我係咪應該放手？

龔成老師︰

Coinbase Global Inc（COIN）雖然有獨特性，但真正的長期價值有多少，根本好難估。

佢係加密經濟技術供應商，佢從平臺上的交易中產生大量交易費用的凈收入，以區域來講，佢大部分收入來自美國，其次是世界其他地區。

要分析佢的價值，就要睇翻虛擬貨幣長遠發展。以本質來說，虛擬貨幣是人為創造出來的，絕對不是「資產」，有沒有真正的價值，如何定義真正的價值，未知，亦令COIN的價值，變成未知數。

長遠的價值，取決於「有多少人用」，如果長遠好多人用，的確可能有高價值。但如果無人用虛擬貨幣，這公司都無價值。

因為分析長遠是否好多人用，是非常困難，因此，當中存有相當的風險，當然，潛力同樣都大。

若你只係好少注，同時又睇好虛擬貨幣長遠發展，你可以守。若佢佔你組合較多，最好沽出部份，去平衡風險。

------------------------------------------------

Q22068：

您好，龔sir.，我想問您對Pre IPO有了解嗎？

我朋友佢話私募基金的回報高過股票，她提及到她將20萬本金放在系一個私募基金的項目裡，三到四個月連埋本金已賺40萬，她問我有冇興趣？

因為我的投資都是放系股票，對於Pre IPO相關資訊真是不太了解，而且回報率禁高，會不會有很大風險呢？

因為我聽她講就好似好低風險，但我始終都不太相信。按常理，高回報就高風險，但她提及的IPO好似有點有悖常理，所以想請教一下您，謝謝！

龔成老師︰

Pre IPO就係指企業在上市前(即IPO前)，進行的集資。

由於正式上市申請，係需要一段時間，有些企業就會用這個方法，去提前得到一些資金，用作上市前支援營運之用。

而Pre IPO基金多數會在上市時，就沽出這些股票獲利。由於上市前，一般估值較低，故潛在升幅會較大。一般這類股票基金，投資時間都唔長，可能講緊只係1,2年時間。

但你有留意我FB，我經常都會話，唔太建議投資IPO。因為可以參考數據好少，好難進行一個合理估值。而且好多時，企業真正表現，要1,2年先會睇得到，故投資風險會較大。

Pre IPO是未正式發表上市的企業，其可參考資訊，就更加少。甚至連佢最終能否上市，都會係一個問號。

我唔係話這類基金，全無投資價值。但你要明白當中潛在風險唔細，是否值得投資，你要自己衡量。

當然，我不是話這類項目不值得投資，只是「有風險，有回報」的類別，你要明白這點。

就算你最終決定投資，你都要控制注碼。永遠我地都要係「先知風險，後想回報」。

------------------------------------------------

Q22069：

老師你好！我跟咗你嘅投資方法三年，而家手上有超過一半係潛力股。我有限住自己每個月至少要供幾多錢，但有時手上嘅股票價格又偏貴唔想再入住，久而久之就越買越多隻股票，而家已經有14隻。

除咗股票數量太多之外，有時咁啱果個月得某一隻股票係合理價我就會買晒佢，好似而家9988已經佔我嘅投資18%。

我知道老師講過單一股票唔好超過15%，但而家佢係喺我手上已有嘅股票中價格最合理嘅。我唔想再增加股票嘅數量，但又無理由買其他貴貨。

龔成老師：

如果你出現愈買愈多的情況，反映你買入前，無經過仔細思考、研究，小心作決定，我在股票班，會派一份6頁紙的「企業評估表」

要求學員，每次買股票之前，都要填好先買，目的是希望令佢地，確保買入的都是有質素的股，以及睇得好準先會買。

阿里（9988）這刻，你只有不要再增持，到之後你有資金，慢慢配置到其他股票，阿里的%自然會減少。這動作不用急，長遠進行就得。

------------------------------------------------

Q22070：

老師你好，我兩三個月前開始見到你FB, 見到你教投資，有看你回答大家嘅問題，睇咗你嘅80後百萬富翁，而家睇緊股票勝經，

我47歲，有幫爸爸和女兒投資，持有以下股票。另外1063唔識點處理，結果而家價值得返$300幾，而家見到6808又跌到$5個幾，應該繼續長遠持有還是換出？

請你指導吓，謝謝老師！

本人持人
1. 9988 阿里爸爸 200股 $245.80
2. 9618 京東 500股 $397.40
3. 3690 美團 400股 $389.80
4. 0909 明源雲 2000股 $54 + 1000股 $45.80
5. 2013 微盟 4000股 $26.05

6. 2318 中國平安 2000股 $97.15 + 500股 $89.10
7. 1211 比亞廸股份 500股 $150.80 + 500股 $147.30
8. 6808 高鑫零售 3000股 $10.20
9. 3738 阜博集團 1000股 $32
10. 1398 工商 19000股 $5.73
11. 1063 新確科技 60000股 $1.38

爸爸80歲
1. 2888 渣打 300股 $105 + 300股 $77.80
2. 0003 中華煤氣 2000股 $14.88 + 100股 送嘅
3. 2318 中國平安 1000股 $95.70 + 500股 $91.30

用女兒利是錢幫佢投資
1. 2800 盈富 500股 $25.88
2. 3067 安碩恒生科技 200股 $17.83

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

由於你地3個人的人生階段不同，所以投資方法和目標，都會有分別。

先講你女兒，佢年輕，可以增長為主。你現時這個組合，已經係可以。

若你想增長力較高，可以多儲安碩恒生科技(3067)。但此股波動性會較大，要睇翻你自已風險承受能力。

至於你父親，由於已經係退休人士，重點唔會再係增值部份，應以收息股為主。透過股息的現金流，去支援佢退休生活上支出。

渣打集團（2888）質素只是一般，建議換碼。而煤氣(0003)和平安(2318)都有質素，可持有。

未來若你加大你父親投資，應集中收息股。以下都係有質素的收息股，你可以從中參考一下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

至於你本人組合，以你47歲計，增長係需要，但要慢慢轉得保守點。

高鑫零售(6808)質素較中等，不宜持有太多。

新確科技(1063)主要於香港從事電話及相關產品之設計及銷售等業務。

這股規模細，加上多年出現虧損，暫時睇唔倒有投資價值，建議你沽出。

中國平安(2318)、工行(1398)有質素，可持有。

較大問題，係潛力股類股票(9988, 9618, 3690, 0909, 2013, 1211, 3738)你持有太多。以你年紀，最多只可以佔4成，而且要慢慢開始下調至2成。

現有持股，可以唔洗沽。但將來，你投資上應較集中平穏增長股部份，令組合風險水平，慢慢回復平衡。

現時大市只在合理區，資金唔好盡用。最好留有部份，等大跌市出現時，可以用來掃貨。

------------------------------------------------

Q22071：

老師最近睇緊千萬富翁， 內容話到如果依家工作發展前景有限 就要轉工轉職位 尋求突破。

關於哩點 我想問下 如果我覺得我依家工作唔會有好大突破

但係我本身工作經驗唔多同時又岩岩得到哩份工冇耐， 咁嘅情況下要繼續留待 或者 搵機會轉工會好d？

龔成老師：

你要以5年、10年，作為思考的單位，現時的工作，對你長遠有無用？

如果無用，就要轉，轉是大方向，但是否這刻轉，或一年後轉，就要睇你自己的情況。

如果你本身工作經驗唔多，就可以先在現時工作，做1年先，等你有工作經驗先轉。又或者，你繼續翻現時工作，同時，尋找自己想發展的工作，如果找到，就辭工。

總之，你要思考你的大方向。然後就要想想，現時選擇那些工，最有機會完成到你的大方向。

------------------------------------------------

Q22072：

你好，我見恆安國際1044 數據都不差，現價入是否值得長線渣？

Pe 純利 股東資金回報都好
唯早前亦回購了數次

龔成老師：

對，恆安國際（1044）的財務數據不差的，不過，企業的發展與增長力就不強，佢主要業務為在中國生產，分銷及銷售個人衛生用品，零食產品及護膚產品。

恆安擁有多個品牌，如「心相印」、「安而康」、「品諾」、「安爾樂」等，而業務大致可分為紙巾產品、衛生巾產品、一次性紙尿褲產品、零食產品。

恆安具有品牌，又處於增長中的市場，前景不俗，故此企業為不錯的優質股。不過，市場競可能令毛利略為受壓，但相信隨著此企業發展更多較高毛利產品，影響不算大。

長遠來說，恆安仍有一定的前景，故有投資價值的。成本上升，令佢略有風險。整體而言，有長線投資價值，現時大約在合理區中間。

------------------------------------------------

Q22073：

龔成老師，請問5M可以買什麼樓來放租？可以考慮那些區域？6年後退休，現在應否做按揭？謝謝！

龔成老師︰

其實無話特定乜野樓會較好，藍籌屋苑會加分，尺寸最好近300呎，符合一個家庭基本需要。

你要睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

另外，你再要審視其升值潛力，未來地區上、交通上、生活等等的配套發展，才去下一個結論，咁會較好。

現時息口低，承做按揭，再用多出資金去投資，相信會較好。

但由於你已近退休之年，按揭未必批倒好長年期，故壓力測試上，可能要求會因此而高左。在選擇物業時，你要考慮埋這因素，具體你要問清楚地產經網、銀行，了解清楚先。

------------------------------------------------

Q22074：

老師你好，我黎緊有計劃生完2胎就辭職，因為無人湊BB。你會建議我現階段應該點樣投資？

(先生份糧 + 被動收入可以支撐大部分家庭開支) 我之前買既增長股依家都係負數居多，現階段我應該考慮買返d內銀/ 公用股 收息嗎？

或係我應該買3067/2845 呢類etf嗎？ (手上大約有10萬可投資)

龔成老師︰

我地投資，係應先處理好防守部份(日常生活)，才去進攻(財富增值)。

由於你會做全職媽咪，家庭收入會少了一部份，故首要任務，是要先做到收支平穏。因此，現時支援緊你日常基本開支的收息股，我建議你就唔好變動。

若收支平衡上，依然有一定缺口，你可以將部份平穏增長股，轉移至收息股，去增加家庭現金流。

若已經大致收支平衡到的話，你那些平穏增長股，照持有就可以，讓其繼續為你財富增值。除非佢質素係有問題，否則唔好太在意中短期波動，一直長線持有就可以。

至於3067/2845這類較有增長力的潛力股，到你家庭收支平衡之餘，每月都可以空出一定資金，才作考慮。

至於你手上10萬，我建議你留在身邊，作為應急錢，會較為理想。

------------------------------------------------

Q22075：

你好老師，萬分感謝你的回覆和提供詳細的資訊及分析！

不好意思，這麼遲回覆你，因技術性問題今日先開通富途牛牛戶口。

交代小小我的個人資料，我現43歲，自住物業沒有按揭(已供完)，有物業放租(但租金全數比按揭，按揭還有8年)，現60萬現金，

另20萬要6年後先可取出(兒子出世時買的小狀元儲蓄保險)，現每月可儲HKD13000，現計劃分階段投入20萬作投資股票。

如我選擇五隻平穩增長股作為我開始、首次投資股票，我會以"分注"形式，以下每隻股票先買一手，然後留意價位再每手每手入?

1）盈富(2800)
2）金沙(1928)
3）中銀(2388)
4）港鐵(0066)
5）粵海(0270)

這樣可行嗎？以上這5隻股長揸的話最少多少年較好？這5隻股現在入貨是合理區嗎？

另想問中國鐵塔00788你點睇？

謝謝老師！麻煩晒你！感謝

龔成老師︰

你現時已持有2個物業，成個組合係物業類比重好高。未來時間，應集中投入股市，令組合更平衡。

以你年紀，都有一定增值需要，你現時這個組合係可以。如果你想再進取少少，可以加入少少潛力股。

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

但你要留意翻，部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 騰訊（0700）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

至於你目標的5隻平穏增長股，都在合理區，現價可以先入一注。每再回10-15%，就再加注，直至資金用完。

另外，每月儲起的$13000，都可以做月供股票。每月先用一半儲蓄做月供，另一半就儲起，等大跌市機會。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。長遠仍算有發展力，可長線。不過，潛力度比過往略減。

這股都適合你年紀，現價可以分注入貨。

------------------------------------------------

Q22076：

你好，老師，有個方法想問你可唔可行，小弟有一層自住樓，已供完，銀行估值600萬，現想加按360萬，分10年還，連本金利息400萬

我計劃：

買1隻穩陣收息股100萬(做膽)，買10隻穩陣不同行業優質股做腳20萬x10隻，淨番60萬一半定下期一半慢慢還款，用曬之後將1隻腳賣走，用來還款，用曬再賣，用曬再賣咁

(當然首選揀隻賺的腳賣啦)10年後，淨反個膽100萬

這方法可行嗎？可以叫做無本生利嗎？

10年叫做無本賺100萬

謝謝老師解答

龔成老師︰

現時息率低，透過借貨去投資，從而賺取息差，係可以。

但有兩大風險，你一定要明白。

第一，借貸創造，表面上無本生利，但實質有風險的，你負債增加，風險會增加。

另外，如果你投資的股票不幸股價下跌，你就會出現「賺息蝕價」，對你不利。

同時間，如果日後加息，又或你收息股的派息減少，都會令你得到的息差回報收窄，你的回報會減少。

所有借貸投資，都不是無本生利，而是背後承受了一定的風險，我不是叫你不能做，而是做進行前，一定要明白當中風險，不要視為穩賺項目。

第二個風險，就是你個配置，有問題。

首先，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你膽拖這種模式，個膽一定會超過這個標準，令你出現過度集中性風險。

另外，定期本身回報不高，很大機會回報低於你本身借貨利息。變相，你已有一部份貸款，係無效率地運用，拖低了整個組合回報。

若你想用個定期，去平衡個組合風險。我建議你直接不借定期個部份資金，反而仲有利。

餘下資金，我建議你投資一些「平穩增值股」+「收息股」。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)、粵海(0270)、領展(0823)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

若你想組合增長力高一些，可以較集中「平穩增值股」。相反你想平穏少少，可以集中係「收息股」。

但成個計劃，你要明白一點。你係投資緊股票，就算最穏陣架收息股，都會有波動，有機會出現賺息蝕價情況，故你計劃係唔會100%穏賺。

而且，現時大市只在合理區，唔算係好平，這個風險就會更高。

現時大市只是合理區，你借款得來資金，可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

投資增值，其實唔洗諗到好複雜。只要你用我上述計劃，並長線持有這些優質股，其實已經很大機會，得到一個唔錯回報。

------------------------------------------------

Q22077：

你好 老師，又想麻煩你提點下我。

手頭只有各一手而已

-小米
-3067
-6618

我有10萬

1/ 應該繼續集中月供現有嘅小米，3067 ？

2/6618應該keep定放？其實擺起度都無所謂作長線？

3/ 依家手頭嘅好偏埋一邊 或應入手其他類別 （福壽園/金沙/銀娛/中電/地鐵/領展/比亞迪電子/700）

4/ 新能源股 可以建議邊啲我去study多啲？

再次感謝

龔成老師︰

1) 你現時3X歲，雖然投資上可以進取少少，但都不建議全部買晒潛力股。

佢地雖然有增長潛力，同時風險都較高，不宜持有過多。

以你年紀，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。以下平穏增長股，現價都在合理水平，可以分注入貨。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

月供你可以小注潛力股，較大注係平穏增長股，就可以做到平衡效果。

2) 京東健康（6618）有質素，這股可長線。

其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大。但由於你只係小注，照持有就可以，但暫時唔好加注了。

3) 係偏向左潛力股，故應加大平穏增長股，去平衡翻個組合。

4) 信義光學(0968)和福萊特玻璃（6865）你可以研究下，但現價都在略貴水平，回多1成左右，值博率會較高。

------------------------------------------------

Q22078：

老師你好，我係投資新手，20歲。我看好未來奢侈品會有更大的市場，所以想投資相關股票，但香港相關股份較少。

我留意到美國有一隻LV ADR股票，LV集團覆蓋性廣，有品牌價值，全球通關後預期業績也會有增長，股價也每年穩步上升中，想問可以以分注買入的方法每月購入嗎？

除奢侈品股，我也看好未來醫美板塊，科技板塊和新能源板塊的發展，想問大方向正確嗎？我應該如何開始部署這些板塊的資產呢？有什麼股份老師比較推介？

謝謝，希望老師能抽空解答

龔成老師︰

LVMH Moet Hennessy Louis Vuitton SE(LVMUY)是一家法國的奢侈品集團，業務涉及六個領域：葡萄酒及烈酒、時裝及皮具、香水及化妝品、鐘錶及珠寶、精品零售及其他業務。

企業有一定品牌，都有投資價值。但畢竟業務以消費類奢侈品為主，較受經濟大環境，盈利會較波動。

這股票都有投資價值，但現價唔平，最多只宜好小注。利用月供儲貨，會較好。

至於你所講的板塊(醫藥業會係重點，醫美都有市場，但無醫藥類咁高潛力)，都係有潛力，同時會係未來大方向之一。

以下都是一些我較睇好的相關行業潛力股，你可以參考下。

潛力股︰安碩恒生科技(3067)、信義光能(0968)、阿里（9988）、騰訊（0700）、舜宇光學（2382）、小米（1810）、中生製藥（1177）、ＧＸ中國電車基金（2845）、三星FANG ETF（2814）。

你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

你每月大約用一半儲蓄月供，另一半就儲起，等大跌市機會。

另外，潛力股雖然有增長潛力，同時風險都較高，不宜持有過多。

以你20歲年紀，潛力股可佔約5成，餘下應用以下平穏增長股。但由於你投資經驗較淺，潛力股比重，先用3成以下這個指標。到你學到一定投資知識，才慢慢調高。

餘下投資比重，你就配置在平穏增長股上，會令你組合更平衡。

------------------------------------------------

Q22079：

你好啊，龔成老師，我今年27歲，月入兩萬，每個月儲$5000，無月供股票。現時手頭上持有呢三隻股票：

1）中國移動0941 $47.9：1000
2）龍光集團3380 $11.7：2000
3）香港寬頻1310 $9.3：1000

因為我以前係短炒輸過錢，所以我現在就吾想再走回頭路。就想試下建個收息倉，慢慢打造被動收入。

但我見龔成老師通常都叫學員「先增值、後收息」咁我現在呢個想法是否太慢或者吾適合現在的我？求老師賜教

龔成老師︰

短炒係一個不正確投資方法，就算全球投資最賺錢的巴菲特，都唔會做短炒。

其實投資股票，就係等同投資一間企業，只要係有質素，你長線持有比時間佢自行增值，咁已經會有唔錯的回報。

我經常都會叫讀者和股票班同學，用「先增值，後現金流」作方法，去做投資增值。

意思係，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你27歲，就應以增值為主。中國移動(0941)和香港寬頻(1310)係收息股，增長力欠奉，不適合你。但由於持股不多，你可保留，但不要再加注。

龍光集團(3380)適合你，都有增長力，但負債佢比較多，風險會略高。現貨可持有，但暫時不要加注。

你現時這個組合，增長力太低。未來時間，我建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$2500做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股或潛力股。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

另外，你現在還很年青，應盡力去做去財富累積部份。我建議你每月最好可以空出一半薪金，去做月供，咁會較理想。

------------------------------------------------

Q22080：

龔成老師您好，本人之前高位買了中國財險（2328), 一路坐艇, 暫時賬面蝕了幾萬蚊。請問你覺得這股票前景如何，應繼續持還是換另一只股票。

本人心水完美醫療(1830)。求指導

龔成老師︰

中國財險（2328）主要於國內為各界客戶提供多種財險產品，包括機動車輛保險、企業財產保險和家庭財產保險。

過往的生意與盈利都不差，不過就無乜增長動力，質素算是中等。這股都可長線，不過就重收息，唔好對股價有太大期望。

若佢只係佔你組合不多，你可以持有。但若較多，你可以沽少少，去平衡翻個風險。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

所以，如果無貨，可考慮回少少，先小注，然後等跌多d先正式分注投資。如果本身有貨，就長線持有，但這刻就不要心急加注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19061-Q19080）

Q19061：

老師：見你FB 有此說法「98%的散戶想法，會停留在「賺現金差價」，但你要明白現時的貨幣系統，現金已不是錢，資產才是，不斷追隨現金無法賺到大錢。你要跳過98%散戶的想法，了解有錢人怎樣賺錢」

那麼，Cash is King 是錯的嗎？

長期持有優質股票，只買不賣，是為了賺取股息？這豈非要持有大量優質股票才有大額股息？

我是否想錯了？謝謝老師

龔成老師：

「Cash is King」是錯誤觀念。

你睇翻全球的有錢人，他們是怎樣賺錢。

我20年前開始睇致富類書，就是見到所有有錢人，都不會有「Cash is King」概念，他們明白，現金不是「真正財富」，現金只會貶值，最重要是持有資產。

李嘉誠利用地產致富，巴菲特利用長線持有優質股致富。

他們大部分資產都是一些「會增長的類別」，長期持有。

而佢地都會持有現金，不過，佢地明白現金的作用只是「等投資機會」。

現金正在無限發行，永遠貶值，持有現金只會成為輸家。

你唔好停在「要賣出股票」的概念，要有「真正財富的概念」，建議你多睇書，《股票勝經》《財務自由行》對你好有用。

------------------------------------------------

Q19062：

龔老師，你好，我近排先追隨你，我啱啱供咗盈富5000，小米1810供1000，1177供1000，比亞迪1211供2000

比亞迪呢個月先開始供，87蚊供咗23股，宜家咁高，我停?還是繼續供落去呢?
請你指教，謝謝。

龔成老師：

現時的確有點兩難，因為潛力股的股價上左唔少。你可以停一停比亞迪（1211），其他就保持月供，長線進行。

始終比亞迪$100以上都貴，你等佢落翻先考慮，又或者供另一隻。

------------------------------------------------

Q19063：

龔成老師你好，因為我唔肯定現時採用嘅儲蓄planning 好唔好，所以想問你意見

背景： 2019大學畢業生，已穩定工作一年幾個月，月入平均17k, 因為讀書嘅時候感受到貧窮嘅無力感，所以一開始做嘢就好急草錢，有持有公用股for 長線投資，自從幾個月前睇到你嘅書同fb嘅Q&A，都有每個月用$6000月供幾隻股票，當中盈富佔$3000:

長線持有中 (未有增/減持想法）:
1. 0003 (10500@$11.52)
2. 02638 (4000@$7.81)

月供中:
1. 00823 (62@$62.01)
2. 00066 (150@$39.38)
3. 02800 ([email protected])
4. 00669 ([email protected])

一共大約16萬股票，如果唔計mpf，大約有5萬蚊嘅現金儲蓄，不過因為遲啲要做手術，可能得返2萬左右。

因為轉咗工，下個月我嘅薪金會上調至19k，2年後可能會同朋友夾份搬出住，變相每個月支出更多。

有計過條數，我其實係需要更多現金儲備，但係我又想係未搬去，趁未有另一筆開支前，可以增值我嘅資產，入手更多優質股。所以有幾個問題想問：

1. 因為薪金上調，我應該點去分配？定還是我要降低月供嘅金額，放更多落現金儲蓄？

2. 宜家月供緊，感覺上係有排都未供完，我想知幾多手先叫足夠？

3. 因為我所選擇嘅股票都係長線投資，增長都慢，假如真係有需要拎一筆錢出嚟，我係咪要放咗股票？定係我要接觸下短線投資？

另外特別想多謝你之前分享月供股票呢個概念，可幸嘅係 我可以趕係中低位嘅時候開始月供，所以均價都唔高，多謝！

龔成老師：

1）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

我見你現時持有的，部分只是收息股，如煤氣（0003）、港燈（2638），這些股雖然有質素，但就未必好適合你年齡，所以，你可持有，但唔好加注。在之後的財富配置，要提高翻增長力。

你可考慮月供盈富（2800）+安碩恒生科技（3067）。

2）你可以保持月供的，這是一個財富配置的計劃，不一定要有「完」的概念，是將你財富有效配置的模式。

你要思考，怎樣對你財富最平衡，現金與股票，各類股票等。同一股票太多就會有集中風險。

3）唔好短炒。

你先要儲一些現金，如果有需要用現金，就先動用這筆先。之後先考慮賣股票。

------------------------------------------------

Q19064：

成哥 有置業既問題想請教你

我同女朋友準備3年後買樓結婚
而家我收入27000 佢32000

佢係政府工會跳point
我係持牌測量師 跳糟後30000以上

3年後大家約定儲到80萬作首期同雜費

資產方面

1. 自住公屋 綠表市值220萬左右 但未供完 欠36萬
2. 港股+美股 共20港幣
3. 珠海公寓 約值100萬港幣 簽左10年租約 10年回報約25萬港幣

欠債
1.信用卡欠款約27萬 投資用 每月供6400 3年半後供完
2. 政府學費 13萬 8年後供完

手上仲有2年半後家人既綠表資格

所以我打算3年後用綠表抽新屋

因為都比較難抽中
如果抽唔中

買私樓好 定居屋二手市場好？
另外買幾大先易轉手？
如果買左上述既物業 同時又抽中左綠表市場既新居屋 點樣配置好？

麻煩哂成哥

龔成老師：

無論你之後的置業情況如果，都建議你這幾年，集中在股票方面的投資，利用股票去進行財富增值，至於買甚麼樓，慢慢決定都得。

當然，你唔能夠全部持有股票，一定要部分留現金。

你可以以平穩增長股為主，分注投資優質股就得。

置業方面。從自住角度，政府樓是較著數的，因為你每月的現金流支出較少，這就可以令你有更多資金投資，原理就是自住政府樓與住私樓，在相同自住概念情況下，政府樓的每月支出一定較少。

不過，在投資角度，私樓長遠的租金收入，以及升值能力，一般都會比政府樓較好。

你可以這刻先買二手居屋，同時之後不斷財富累積，之後先再私樓。

------------------------------------------------

Q19065：

你好呀龔先生 我有好大既家庭負擔 又唔識投資買股票 又想增加資產 銀行有70萬 成日想買保險儲蓄 由得佢擺 幾十年後比小朋友 唔知咁樣做岩唔岩

定係可以有其他方法快啲增加 請問可以比少少意見我嗎？

龔成老師：

如果你有家庭負擔，在財富配置上會偏向穩陣。

不過，全部持有現金都不是方法，你可以留$35萬現金，餘下$35萬就投資股票，部分平穩增長股，部分收息股。

平穩增長類你可以考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

收息股可考慮：5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

你唔好一次過入這些股，要分注，要慢慢進行，部分資金要等跌市才動用。

------------------------------------------------

Q19066：

老師，我剛退休，收到一筆約七百萬現金，我好迷惘，想請你指點一下如何配置。

龔成老師：

你可以將這$700萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$700萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q19067：

Hello 龔成老師, 大家都是80後, 我仲有兩個月就40, 希望10年後財務自由, (最好係5年, 因為工作隨時可以無左). 我月入5.5萬. 約儲3萬. 現金約HK$500K, 外幣約HK$150K, 美股約HK$200K.

至於港股:
公司 號碼 股數 平均價
匯豐控股有限公司 5 1,200 $ 77.00

吉利汽車控股有限公司 175 4,000 $ 22.00

中國教育集團控股有限公司 839 2,000 $ 15.20

安徽海螺水泥股份有限公司-Ｈ股 914 4,000 $ 54.50

中國建設銀行股份有限公司—Ｈ股 939 142 around $5

工商銀行—Ｈ股 1398 2,093 around $4

太古地產有限公司 1972 800 $26

冠君產業信託 2778 3,000 around $5.5

盈富基金 2800 1,000 around $27

交通銀行股份有限公司—Ｈ股 3328 1,265 around $4

ＦＩ二南方恒指 7500 9,000 $7

京東集團－ＳＷ 9618 100 $ 226.00

網易－Ｓ 9999 100 $ 126.00

想請問老師應該步處如何? 從而5-10年後可財務自由.

龔成老師：

首先你要明白，我地繼續持有一隻股票與否，與你的買入價無關，因為這只是一個心理因素，最重要是企業的質素、前景。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你現時的年齡，可投資平穩增長股為核心。

有部分股，如匯豐（0005）、工行（1398）、建行（0939）、交行（3328）就不用持有太多。因為增長力不強，只是收息股。

另外，7500這類反向衍生工具，無必要持有。

至於其他股，無問題。之後的方向，以平穩增長股為核心，再加小部分潛力股，保持進行，已經是適合你的大方向。

------------------------------------------------

Q19068：

龔sir, 今次係第一次與你洽談，我現在61歲仲有幾年就退休啦（65歲)，現在仲跑緊數，睇到你好多寶貴意見，希望65歲做到財務自遊啦

我既目標在最後5年再儲蓄多3百萬（每月4萬月供股票，28OO，66，1398，3988)

住屋已供月，退休後用來收息，以上4隻股票OK要？
住屋已供完

龔成老師：

以你的年齡，現時可以投資平穩增長股+收息股，你上述投資，方向都是這類。

上述4隻都是有質素的，可以供，不過，有些少問題。

第一，你如果$300萬集中4隻股，會有集中風險，建議分散少少。

第二，當中有2隻是銀行股，同時較集中。

平穩增值股，可再加入，例如盈富（2800）、長建（1038）、恆基（0012）、粵海（0270）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、置富（0778）、陽光（0435）都可以。

你可以選擇部分，去進行月供，到65歲就長期收息。

當然，你都要有部分現金在手，唔好100%股票。

------------------------------------------------

Q19069：

龔sir，唔好意思，想問一問阿sir你點睇賽晶科技（00580），因為見到公司研發IGBT 芯片，想知道佢有冇潛力

龔成老師：

我無研究賽晶科技（0580），見佢的業務都穩定的，同時有一定的盈利，財務數據算不差。

不過，見佢規模不算大，你要確定佢在全球，真的擁有相關技術，現時的研究情況如何。

我從過往的財務數據睇，見佢業務不差，財務數據不差，但就未知潛力度，建議你睇佢的年報進一步分析。

------------------------------------------------

Q19070：

龔成老師你好
本人26歲，月入$14000

現在放緊無薪假，月入大約$12000
想30歲前搵到人生第一個$100萬
現金大約$18萬
另外手持

2手滙豐（59.9入）1手生物制藥（8.9入）
2手大快活 （25.15入）1手港鐵（38.5入）
同家人夾錢買咗間屋（夾咗$30萬首期）

間屋租咗出去等人供緊
有打算賣出樓宇
可以拎返共$45萬

股票依加都係蝕緊錢，請問我應該放左佢地嗎？同埋我資金咁少，應該如何部署投資呢？謝謝你！

疫情下每月存款$3000-4000
正常情況下每月存款$5000-6000

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這年齡，匯豐（0005）這類收息股，未必適合你，你應該投資較有增長力的股。你等佢上翻多D就轉其他。

至於另外3股，都有質素的，可持有，但都不是高增長類。

如果你想30歲完成目標，要盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。月供股票都可，最重要是你仍有現金在手，唔好用盡。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

我希望你這段時間提高財務知識，到你取到$45萬後，可以更有效運用。

------------------------------------------------

Q19071：

Sir,想問你個問題，已經買左7萬股煤氣，1萬股金莎，5000股盈富，現金約30萬左右，目前睇好博彩同消費行業，想買入銀河同高鑫

但想知道應該怎樣運用資金會比較好，本人30，每月可儲3萬

龔成老師

這些都是有質素的股票，你可以長線。其實最重要是「配置」，建立一個長遠平衡的組合。

銀娛（0027）有質素，你可分注投資，但同一行業比例唔好過多。

高鑫零售（6808）於內地經營大賣場業務，以提供各種零售商品包括紡織品、電子產品、日用百貨、大眾消費品及生鮮產品。集團除對外採購品牌產品，亦自有品牌商品。

近期被阿里收購，股價上左，這刻的投資值博率，算是中等。

睇翻佢基本面，雖然業務穩定，但睇翻佢過往的財務數據，就發現佢生意增長力不算強，盈利增長力都不強，相信佢都會因中國的經濟週期受影響，同時，網購的發展對佢都有一定程度的影響。

不過阿里收購，會利好長遠發展，這股都有前景的，但不能只睇好的一面，而以佢現時的估值計算，這刻的投資值博率只屬中等，未到吸引的人平。如投資只能小注先。

$30萬中，你可以動用$10萬，餘下就留現金。你可以分注投資股票。建議你同時加入其他股，唔好只集中幾隻股。

至於每月$3萬，可以部分月供，盈富（2800）、安碩恒生科技（3067）（小注）都可以長期月供。

------------------------------------------------

Q19072：

老師，我啲股票蝕緊，好似有排都唔上返嚟，我應該點好呀？

12,66,405,5,3,2388,823,700

12,66,405,5,3,2388,823帳面都蝕緊10幾萬，係咪經濟好啲就會上返嚟？

我知道股票係一種投資 只要有耐性，但係依家好似蝕錢多啲，應該點做呀？

龔成老師：

有兩點你要注意翻，第一，我地繼續持有一隻股票與否，與你的買入價無關，因為這只是一個心理因素，最重要是企業的質素、前景。

最重要不是賺蝕數，而是「配置」。

第二，如果大部分股你都蝕錢，而我睇翻上述股票其實有質素，相信你有買入方面未能掌握，建議你日後同月供策略，將買入價平均，對你有利。

上述股，你可以守，只要經濟好轉，過1年後，大部分都會上翻唔少。

另外，你要將「賺蝕」概念減少，要有「配置」，長期持有的概念。

------------------------------------------------

Q19073：

龔成老師。我與先生（32/30歲）有一個小朋友。現有2個物業，一個貸款270萬，一個貸款450.感覺現在的資產較偏重在物業，現時現金流只要約10萬

是否建議分批沽岀正榮服務，換碼至你fb提及的盈富，金沙，舜宇等股票會較好？還是待有較多現金流，再作佈署？

另外想問問你幾時會黎澳門開班？

龔成老師：

如果你股票持有比例唔多，建議你之後加強這方面，令你的組合唔好太多物業類。

正榮服務（6958）主要在中國從事提供物業管理服務及提供增值服務。

佢的物業管理服務，包括住宅及非住宅物業的清潔服務、安全秩序服務、園藝服務及工程維修服務。集團會委聘外包商提供若干物業管理服務等。

生意與盈利理想，現金流理想，因此整體是不差的。

不過股價就有少少波動，有時行業有炒作，股價上落較大，要注意風險。加上佢規模較細，不似同行有些較大型及有背景支持的有優勢，這會扣左d分。

整體都可以的，但未到最高質之列。這股你持有都得，但如果這股只是你唯一一隻股，就要調整。

你可以建立一個平衡的財富組合，盈富（2800）等等，「平衡」是重要的，你要從長期角度作配置。當然，留部分現金都重要的，所以，現金有$10萬是基礎。要利用「餘下現金作配置」。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q19074：

Hello 老師，不知您記不記得我呢？
經過數年努力後，我在早前終於買了樓，我買了啟德（近$800萬樓價）樓花。

現想請教您，我該兩成首期上會、還是四成首期上會好？

我還在跟家人同住，想在3-4年後用綠表抽新居屋，故啟德會放租出去。謝謝您的意見。

龔成老師：

恭喜你！
這是你努力的成果！

啟德這區不差的，長遠正面。

你可以比較少首期，只要你可承受風險，同時你要有現金剩就得。

至於日後再買樓，可以，現時做好這一步先，順利做按揭，同時買樓後由於有負債，點都要預留現金。

之後就努力儲蓄投資，日後可以考慮再買樓。你方向無問題。

------------------------------------------------

Q19075：

想多問一下 2年後我會有2筆儲蓄保已回本+有少量的息
約20萬左右

想知道到時候應該拿出來投資 還是繼續滾息？

龔成老師：

如果你的投資知識好低，同時你好怕風險，就留在原有的儲蓄保。

在我地的理財配置中，儲蓄保都有佢的角色，是防守部分。不過，進攻度不足。

如果你有少少投資知識，想回報可少少，就應該將資金，轉投資其他項目，最簡單如盈富（2800），回報會較高。

------------------------------------------------

Q19076：

老師請快幫忙1789買了1萬股
点解市升佢連跌幾日？

龔成老師：

愛康醫療（1789）本身正面，不過，貴。

佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。

睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。

這股業務不差，有增長潛力，盈利增長，這反映企業有實際的價值提升。

不過，這股經常處於少少貴的水平，股價一定會較為波動。如果你持貨不多，就不用理中短期股價，如果太多，就應該減持。

------------------------------------------------

Q19077：

有時見到d潛力股票
少少上
大大回
搞到好驚
但學你話齋
而家燒銀紙階段
所以就算產品賣得比同期高增長率好似都係無太大嘅增長

另外我仲想問
我之前買左紫金（2899）
係6蚊左右就已經放左
呢排見佢都升得好快
想問下
如果我中長線嘅話
可否值得再入？
幾錢度為合理？

另外我手上有小米
華潤水泥
同周黑鴨
是否都值得做中長線？
小米而家已經試緊破頂（爭扎緊是否應該要出）

留意左你fb一段時間
想入你建議嘅粵海同維達
合理價是多少可入？
問題比較多
好多謝你嘅耐心解答

龔成老師：

你唔好太著重「股價」，最重要睇企業價值。這類公司，要睇下你博唔博，長遠的情況如何，唔好太理短期股價。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。現價合理區頂。

至於你持有的股，都是有質素的，可長線。

粵海（0270）現價合理，分注投資可以。

維達（3331）合理，是平穩增長型，現價分注投資都得。

------------------------------------------------

Q19078：

龔成老師，先多謝你，我看了你的的書：80後一百萬富翁，80後二百萬富翁，選股勝經，年報勝經，我看完，我的財富與金錢都有明顯的提升，多謝你。

我現在自己下載年報，根據你書中的內容一步一步分析。

以下是我現時的財政情況，希望可以得到你的指點：

月薪 17000， 2019年畢業 現25歲 單身女 每月大概可以儲蓄10000

現持有股票分配如下
386-中國石油化 8000股 買入價 3.98 （前幾日 我3.1 賣出4000股）
1448-福壽園 4000股 買入價 7.5475
1810-小米 1200股 買入價 13.56
1830-必瘦站 4000股 買入價2.87
1928-金沙中國 400股 買入價 29.5
2382-舜宇光學 100股 買入價 123.9

股票市值大概 12萬
現在持有現金 大概6萬

問題1:
我現在的全職工作時間為一個星期6日，我呢幾日係度留意兼職情況，我前幾日見到一個時薪120的補習，一星期2日，一日2小時，請問你認為我是否去做兼職還是利用時間，增加知識。

問題2:
我目標是2021年9月是儲蓄40萬，我覺得如果按現時情況黎睇，好似無咩希望咁，請問你有什麼建議？

問題3:
請問對於我現時的財政情況有什麼好的建議？

問題4:
如果要自由，書建議要從商，但我從來無關於做生意的唸法，我的專業是關於金融的範疇，我唔知做咩生意好，我知道你都是金融出身，你可以分享下你之前做生意的經歷？如果要做生意，你有什麼建議給我？補充：我租屋住

我會耐心等待你的回覆，十分多謝你可以閱讀到此！

龔成老師：

1）我初踏出社會工作時，由於本金不足，要盡快有本金進行投資，等我可以財富滾大財富，所以，頭1、2年我不斷做兼職。

但之後，我就開始減兼職，因為我放更多時間在「研究股票」，令我可以將資金滾大。

所以，你要睇翻你自己現時的本金，去到基本狀態未。你要平衡「得到本金」與「增加投資實力」這兩方面。

2）比起2021年目標，我反而建議你定一些長少少的目標，如2025年、2030年。其實原理如同種樹，唔好太心急，反而目標長遠建立大樹。

3）分配都不差，但現金唔算多，同時之後可以加入盈富（2800），以平衡組合。

4）如果你本身有金融知識，可以集中發展「投資」，投資股票的回報可以好大，但你要專業，我一星期用6小時分析一間公司，一年50間，但一年只買1、2隻股票。

其實你投資可以發展好大，同時要放好多時間。

當然，你可以試下做小生意。我乜都做，小販、網站等等。

------------------------------------------------

Q19079：

龔sir 其實系咪唔算優質既股票大跌，你都唔會考慮，寧願買合理價既優質股？

例如005，144，659 等 都大跌
唔系無質素又唔系優質股

龔成老師：

我地最重要睇企業質素、前景，如果優質度無變，當然不用理，但如果優質度變左，就另一件事。

以銀行業來講，賺錢能力的確有所減弱，優質度減，投資價值地減，值得佔我地組合比例都會減。

至於招商局港口（0144），貿易因素同樣令佢賺錢能力與增長力減弱，雖然不是無質素，但有所減弱。

至於新創建集團（0659），這股本質就無明顯減弱，不過增長力減，以及面對中短期不利情況。

我選股，會以較高優質度及增長力行先。

------------------------------------------------

Q19080：

老師，我可以問你，你係成功之前，我記得你講過你都經歷過一d fatal mistake，但係你係點樣捱過黎，最後建立出而家自己既資產出黎？

龔成老師：

投資方面，十幾年前試過幾次近輸身家的經驗，每次都好痛，但每次我都比一個限期自己唔開心，之後就一定要重新振作。

當時輸左幾次勁之後，好決心要學好投資，同時要自己之後的投資，每一次都好小心，要逼自己好仔細研究之後，先會出手。

就算我面對唔同人生低谷，我都好快企翻起身，我會逼自己做運動，同埋要自己睇成功類書。同時要同自己講，最重要是之後的大目標，這刻只是小挫敗，是學習，之後會更強。通常就好快起翻身。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q15741-Q15760）

Q15741：

龔成老師，有個投資哲學想問下你，如果57.1買左1手匯豐，有其他心義嘅股票，因為唔夠錢買嘅關係，你會唔會走左匯豐止蝕，攞果度啲錢買另一股？

龔成老師：

其實最重要，是計算那一方的長遠增長力較好。

例如你現時持有匯豐（0005），持股價值為$20000，如果你預期5年後，這股升幅連股息，會令你的財富達至$30000。

如果你這刻賣出匯豐轉買另一股，你持有另一股的價值在這刻就是$20000，如果這股5年後會上升一倍，你持股的價值就是$40000。這當然應該轉另一股。

你消化翻我上述所講的情況，與你的「買入價」完全無關！

買入價只是一個心理因素，最重要是企業的本質、前景，那一個能令你的財富有最大增值。

------------------------------------------------

Q15742：

老師！想問如果0548深高速什麼價位入較合理？有可能跌到6以下嗎？謝謝老師

龔成老師︰

未來會跌到多時錢無人知，我地唔會用"估走勢"這個方法投資，應該係睇翻隻股票本身平貴，再去進行資金配置。

深圳高速公路（0548），同樣是不錯的股票，收入主要來自公路路費。現時9成收入依靠路費收入，另外佢都有做環保事業，這部份會有增長潛力，現階段佔比重很低。預期此股長遠會由收息股，慢慢進化成平穏增長股。

現時股息率雖有8%以上，但要留意計算當中包含了上年特別股息，這股息並不一定每年都有。扣除特別息計，只有不足4.5%，未算吸引，但月供的話是可以的。

------------------------------------------------

Q15743：

你好 老師我從上年開始留意你嘅fb
睇你嘅股票教學 都學咗好多嘢 多謝你嘅無私分享☺️不過我本身都係新手一七年先開始接觸股票

我今年26歲
先前嘅工作每月收入3-4K
現時失業
現時現金7.7K 股票持有23萬

分別：
恒生11 持有400 買入價159

瑞聲2018 持有1000 買入價50.5

舜宇光學2382 持有500 買入價121

阿里巴巴9988 持有300 買入價195.2

我應該如何部署？
而且我想係今年明年
來增加我嘅財富收入 因為可能係未來兩年後需要在家照
顧孩子 並且沒有收入
我能夠可以在股票市場賺取更多嗎？
謝謝你 萬分感激

龔成老師︰

以你現時情況，首要目標係找回一份工作，去維持翻你的收入。雖然現時市況長工未必快找到，但兼職都要做住先，唔好比自已資金維持流失狀態。

你持有7.7K現金唔算多，加上你現時無業，我唔建議你動用這筆資金去投資，應先留來應急用。

我地投資會運用「先增值，後現金流」作方法，年輕時投資較多增值類資產，較後期則應投資較多保守類項目。

以你年紀，應收增值為主，你持有的股票都有質素和適合你。明白你希望在小朋友出世前這2年，未有太大負擔前全力為財富增值。但希望你明白"財不入急門"，2年是一個很短的時間，就算再優質企業都會出現中短期價格波動，故2年這個增值時期唔理想。

建議未來增值時，你可以考慮透過月供股票進行，能儲多少就多少，並長線持有。

策略上，到你可以穏定儲到錢時候，你就用5成去做月供，其餘先儲起，用一邊月供一邊儲蓄的策略。月供方面，你可以選擇投資在平穏增長股︰

盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）或潛力股︰比亞迪（1211），中生（1177）或福壽園（1448）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q15744：

你好龔SIR, 想請教下, 現時約30, 月入約$4w, 投資左好幾年一路都蝕多過賺, 依家想重整投資組合, 每月預$25000投資
現有組合如下:

9988 @ 205 4手
939 @ 7 10手

想問一問，我個人係想盡快增值資產, 係咪要加入潛力股拉高返個組合增長力? 謝謝

龔成老師︰

首先，我地投資會運用「先增值，後現金流」作方法，初期應投資較多增值類資產，較後期則應投資較多保守類項目。

以你年紀，應以增值為主要目標。你現有持股中，建行（0939）只是收息型，無乜增長力唔適合你。

策略上，你可以用月儲到的錢一半去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）或潛力股︰比亞迪（1211），中生（1177）或福壽園（1448）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q15745：

你好龔sir, 想請問下，領展同希慎，邊隻會值得買？兩隻都接近52週低位，希慎在香港都好耐時間，但經過會德豐想私有化之後，覺得希慎都有私有化的機會。

另外自己想整合一下現時的投資，我有：
0005，買入$69.9- 1手
0011，買入$203- 2手；$175-1手
1299，IPO入1手
2018，買入$53-2手

感覺手上的貨比較分散，唔知你有乜嘢建議，可以整合一下呢？謝謝

龔成老師︰

我地投資股票就是投資企業，應考慮企業長線質素和前景。52週低位這些與企業本質無關，可以唔需要理。至於希慎（0014）會否私有化，無人會知。我地投唔投資佢，重點應該睇翻佢企業本素。

領展（0823）和希慎（0014）論規模、長遠發展潛力等，會係領展較好。價格上希慎在合理區，領展會相對貴少少，要回到4%才入會較好。

至於你現有持股都係有質素，但匯豐（0005）是收息股，適合年紀大或退休人士。而另外3隻為平穏增長股，適合年青和中年這些需要財富增值的人。你可以睇翻你人生階段，去調節你未來選股策略。

你現在持股唔算散，但佔比上有少少偏重左係銀行股，咁樣會有過度集中單一行業之風險，要留意。

------------------------------------------------

Q15746：

老師你好，請問如果我月供盈富基金$3000蚊，不是每個月也是固定金額月供，而是見佢股價去到平的區域時月供多些錢，當佢股價貴的時候便月供少些錢

是否回報會比每個月固定供同一個金額會高些？另外我想問是否起碼一定要月供3年？

如果我用兩年時間供了$180000，便不再月供，比起用五年時間才可以供到$180000，那麼是否利潤是3年好過5年？

我見恆指有週息率，為何恆指會有週息率？因我不懂太多。謝謝老師回答。

龔成老師︰

平時供多D，貴時供少D，總回報一定會比"每月定額"的多。但問題重點係，你必需肯定自已有定股價平貴能力。否則，你還是用"定期定額"模式去做月供比較好，這會更有效幫你平衡價格波動，減低買貴貨的風險。

另外，月供我建議長期進行，3年唔算太理想，最好係5年或以上。

至於用"2年"定"5年"去攤分$180000供款，邊個最終回報高D，無一個肯定架答案。假設你股票同樣10年後才沽出，2年供完會有較長年間做複息效應，回報理論上會高D。

但問題係剛巧這2年股市估值極高，就算你2年內月供去買貨，你最終回報可能會輸比平分5年的月供計劃。這也是點解我叫你要盡量供長D時間，因為可以減少這些極端情況，所造成價格風險。

恆指週息率，就是指50隻股票的平均股息率。即係你投資$10000係恆指，若周息率為2%的話，你一年應該會有$200股息收到。

------------------------------------------------

Q15747：

你好，我是新手工作數年而且，只有少量資金買入股票。現時股價跌，是否入市好機會？有興趣匯豐或盈富，作收息及長線投資，謝謝指教

龔成老師︰

近期股市回落不少，但恆指市盈率都仲係11倍左右，故盈富（2800）未算平，到24000點才稱得上進入初步平宜區。

匯豐（0005）作為一隻收息股，股息率達8%，已經有長線投資價值，可以買入。

但我地投資應該用「先增值，後現金流」作方法，初期應投資較多增值類資產，較後期則應投資較多保守類項目。所以係放配投資項目時，會因應番你的人生階段。年青時，集中"平穏增長股"+"潛力股"，到你已近退休之年，才轉回"收息股"去創造平穏現金流。

匯豐（0005）是收息股，無乜增長力，唔係咁適合你。你可以考慮集中投資盈富，佢係包括50間質素不錯上市公司股票的組合，有增長力之餘，又可以幫你平衡風險。

但現時大市比較波動，你入市必需"分注"，慢慢入，唔好一次過買晒。

------------------------------------------------

Q15748：

龔兄，1099、6855點睇呀？

龔成老師︰

國藥控股（1099） 為中國最大及具實力的醫藥分銷和零售企業，集團在中國主要城市以直接經營和特許經營方式管理零售連鎖藥店網絡，向終端消費者銷售藥品及大健康產品。

此股有質素，但增長力唔算太強，是平穏增長型。佢有個比較大問題就係負債比較高，而度會扣左D分，整體而言此股有質素，可投資。

亞盛醫藥（6855）這類新上市的股，我無仔細研究，因為新股一向的風險較高。另外這股最大的問題，是未有正式的盈利。

佢主要從事生物製藥業務，核心治療領域包括癌症、ＨＢＶ及衰老相關疾病。到目前，佢共有8款候選藥物進入臨床開發，正在進行28項臨床試驗和21個在全球範圍內提交的ＩＮＤ（試驗性新藥）。

企業不能話無潛力，但不確定性實在太高，是較高風險的類別，有危有機，只可以話，如睇好佢的產品將來市場發展，小注投資都可考慮。

------------------------------------------------

Q15749：

老師如果而家入匯豐$50價位是否算是低位現在入可以嗎？謝謝老師的指點迷津

龔成老師︰

匯豐（0005）這企業的賺錢能力比過往年代已減，現時只係一隻收息股。長遠佢只會為你提供穏股息，但股價增長方面，就唔好太大期望。

佢現價不足$50，股息率達8%，已經有長線投資價值，可以買入。

但由於中短期股價波動，你要入貨記住"分多注"，慢慢入。

------------------------------------------------

Q15750：

呀sir 優質股可長期持有 咁幾時可以放呢？ 好似我低價買入，升左好多啦但好似呢次咁 咁咪會還原基本步

呀sir 如何可以計到合理價格，知道幾時可買入？

龔成老師︰

優質股我地應該長線持有，但都會有沽出架時候︰

1） 當買入的是優質股，若買入後發現自己犯錯，這股不是優質股。

2） 這股核心的質素轉差，變成非優質股，這時無論賺蝕都會沽貨。

3） 市況過熱，市場處牛市三期的狂熱狀態，例如2015年的大時代狂熱時，我便會採用多沽少買的策略，但當時的市況未到極度狂熱，所以我亦只是沽出了一部分的貨。此外，股價要是嚴重高估，例如市況狂熱，又或自身的原因令股價爆升，都有可能沽出。

至於你所講"好似我低價買入，升左好多啦但好似呢次咁 咁咪會還原基本步"，係"估走勢"的想法，這樣做唔正確。

因為你諗住而家個價高，沽咁D，回翻再買貨。但實際操作上未必做到，因為你以為高價架，沽完後可以再升，無人會知，最尾可能令你進退失據。

而合理價點計，我課程中都要講好幾小時，簡單咁講係睇翻企業質素、行業前景、財務數據等資料，去估算出來。

------------------------------------------------

Q15751：

老師你好，本人28歲，入月26K，之前月供左幾個月就無再供，只供了8K，手上現金約有230K，家人欠我60K如想今年內變大手上現金至35K

每月供$4000，這樣可以幫到我嗎？依家個市差左，好似都適宜入股。另外，5G電訊股值得投資嗎？

謝謝。

龔成老師：

每月入$4000，可以，現時的市況開始有投資值博率，你可以加大月供，同時適當地用現金，買入優質股長線。但要留意，股市波動，要慢慢用現金，唔好一次過用盡。

5G電訊有投資價值的，可以考慮，但中短期波動，要長線。

------------------------------------------------

Q15752：

龔成老師你好，之前在facebook上聽過你對匯豐銀行嘅分析， 明白現今低息環境下對銀行嘅生意有一些不利嘅資訊

咁中銀香港 ( 2388 ) ，還值得長線投資嗎？ 這隻股票還會平穩增值嗎？ 本人月供$2000這隻股票。

龔成老師：

中銀香港（2388）可投資，這是有質素的股票，可長線持有。不過，大環境比過往年代弱左，因此預佢增長力不及從前，但都有投資價值，平穩增長型，不過不建議投資太大注碼。

------------------------------------------------

Q15753：

龔先生你好，因為前排買咗樓同男朋友自住，共花了60多萬做首期，大部分股票都放了，想請問一下目前持有1200@$65.8的匯豐和2000@$6.6的建行應該放嗎？

還是持續收息？如果放可以給我一個價位參考嗎？

因為我同佢都持續進修中，每年學費＄30000左右也佔去不少時間，在有正職而晚上進修的情況下未有機會報老師的班，待明年五月畢業後會上堂，謝謝你！

龔成老師：

這兩股都是收息股，你預無乜增長力，如果你明白這點，目標只是收息就可以，另外，你唔應該太集中在銀行股，這會出現集中風險。

如果你想增值多少少，其實應該轉其他股。因此，其實好睇你本身的投資目標。

如果賣出，你可以等佢升翻10%先賣，反正股價跌了不少，你都不急賣出。

------------------------------------------------

Q15754：

老師你好，因年輕時十分大洗，亦完全沒有理財觀念，導致現時已30歲都沒有任何積蓄；最近終於儲到$15,000左右，想投資少少

請問應短線投資定長揸較好？如短線有冇建議？長揸應該會買盈富基金，恰當嗎？

我現時月入2萬，家用加還債已用$14,000左右，租$3,000，剩餘的用黎食飯搭車，真正儲到的可能每月只有$500-800

因此想靠投資增加儲蓄或現金流；我呢個情況自覺都好kick手，但我真的很想改變現時情況，望指教，謝謝

龔成老師：

短線投資無法賺錢，所以不建議。

你可以考慮盈富（2800）或領航標普五百（3140），這都是指數基金，買入就等如投資港股組合、美股組合，就算不懂選股，這組合都是十分好的。

另外，你要想方法開源，做兼職、小生意都是可行的方法，你要善用時間。長遠來說，你要想想突破，現時的職位長期有無得提升，前景如何，唔能夠只停於現時情況。

你30歲，根本是黃金時期，你要盡力在事業上做得更好，同時要盡力儲更多初期資金，有資金投資，之後的財富先可以滾大！

------------------------------------------------

Q15755：

成哥 我睇完你本財務自由行後 覺得自己充滿希望 開始學投資啦

我買左2342 6060 1717三隻股票
唔知放唔放好 求指教

龔成老師：

保持知識的增值，長遠一定會與你的財富成正比！

我地繼續持有一隻股票與否，是基於這企業的質素、前景，如果這兩股比你之前買入時，質素有好大的改變，就要賣出，但如果只是股價跌，就不用賣。

京信通信（2342）質素不差，但風險略高，這類股只建議持有小注。

眾安（6060），風險類股，這股難分析，因為業務仍有不確定性，以這刻的情況，質素只是一般，但如果之後業務有明顯發展，有潛力的，只可以話這股不建議大注。

澳優（1717）有質素的，現價合理，無問題，可長線。

------------------------------------------------

Q15756：

龔老師、您好！
近日黃金價格不斷上升、有機會上升到2万关口嗎？

另外、想把手上持有的黃金高價賣出，售出后大約有50万。想利用這50万投資，年期長短都可以，建議投資那方面？
1.房地產
2.銀行定期
3.股票市場
4.储蓄保險

感謝回覆

龔成老師：

好難分析黃金的走勢，但你將部分賣出是可以的，黃金只需要持有小部分在財富中，就可以。

以現時的股市平貴度，你可以投資在股票市場，只要分注買入優質股，長線投資，同時留有現金就可以。

------------------------------------------------

Q15757：

龔老師，最近常常留意老師的發文和解答，很認同老師的股票分析！想在股票市場里學習創富技巧。

今年35歲，在澳門生活。已婚，有一個小朋友，月入5万以上，年尾有獎金，年薪平均70-100万。目前手上持有市值一千万物業，當然還在供款（月供23000）。

手持現金700万，過往股票只接觸高低位拋售，未接觸過收息股和月供股。

因為想轉工作或創業，收入短期內可能不及之前，打算為自己創造每月5-10万的現金流為日常生活費。我目前條件有可能嗎？

若想把現時現金增持，應該怎樣分配和買入那一隻股票？
還是投資房產？

老師覺得在橫琴投資房產能有槓桿回報嗎？

多謝老師的指導！
祝老師身體健康，萬事亨通！

小朋友4歲，丈夫是自僱的中小企業，收入穩定，每月收入約4万

龔成老師：

由於你本身已經有物業，在財富分配的比例上，你應該投資其他類別，長期持有優質股，是其中一個方向。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

現時的大市，有投資值博率，你可以考慮長線持有一些優質股，盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

留意，股市波動，要分注投資，同時留有現金等機會，慢慢用。

------------------------------------------------

Q15758：

龔老師你好
本人今年27歲

月入24000連佣大約一個用30000至35000
家人有300萬其實預留給我將來置業
本人心儀附近的屋大約700-800萬

想問下如果供樓咁樣會唔會太大壓力
當然短時間3-5年希望出租
之後才自住
未知現時是否合適時間

龔成老師：

如果你問銀行借$500萬，還30年，假設利率3%，每月供款就要去到$21000。

以你的情況來說，其實有點吃力，我會建議你目標物業可以減翻D，$500萬-$600萬會比較好。當然，如果你最初出租，而你預期之後的人工會慢慢增加，就可考慮高少少的樓價。

香港經濟將轉弱，樓市會出現中短期下跌，可以1、2年會出現，但不會預期出現大跌。只要香港經濟好翻，樓價會向上，因為香港樓始終供應不足，你可以考慮把握這個時機。

------------------------------------------------

Q15759：

老師，我手上 持有100萬股票 62 持有4400 股 10% 左右 理由是（觀塘有地）而且巴士必須交通工具

823 持有 2000股 15%
778 25000 股 20%
2778 14000股 7%
12 4000股 13%

以上3隻 Retis + 恆基已 57% 了

然後新創建 15000股 占 15% 平均11.XX （輸得太多）
另外12 恆生銀行我都有 900股 占 15% 還有隻 144 開始收集 占幾個% 咋

另外我有2層細單位 1個自住 另一個租金夠交按揭，個人可能太偏好物業 果邊le q

龔成老師：

載通（0062）質素只屬中等，但不是無質素，持有不應該太多。佢的優質是現金流強，但如果仔細分析佢的財務數據，會見到佢成本增加的速度，大於收入增加的速度，這反映佢無成本轉嫁的能力。

另外，你現時持有太多地產類股票，已有集中風險。

招商局港口（0144），質素只是中等，收息就可以，但預期增長力不強，不建議大注。

你應說建立一個更平衡，以及優質的組合。

------------------------------------------------

Q15760：

老師，在上堂的時候我有一個不是很明白的東西，平穩增長會持續上升，派息比收息股少

如果收息收也有平穩地上升，例如5年升較多，那麼不是收息股比平穩增長更好嗎？

龔成老師：

這涉及一些企業增長的概念。

當一間企業，佢有較好的增長力，而佢派息不多，即是保留盈利，投入到企業的比例較多，因此，這企業預期成長較多。

相反，另一間企業，如果佢派息多，即是投入資金到企業的比例少，這類企業應該成長力，會比之前的企業少，因此，「如果收息收也有平穩地上升，例如5年升較多」，這只是一個假設，對大部分企業來說，增長不及之前的類別。但如果佢股息的增長真的好強，這樣，投資價值的確不少。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。