唔知你屋企有冇曾經為過送唔送屋企人入老人院而煩惱過呢。 琴日收症收咗個病房常客，個個姑娘都識得佢。佢係一個九十歲嘅婆婆，好多野講好精靈。本來佢同屋企人住，但因為之前有cancer切除咗直腸同肛門，喺腹部開咗個造口排便，屋企人兼顧唔到佢嘅造口護理，所以只好送婆婆去老人院。婆婆一入來，我收症問佢一堆問題嘅時候，佢已經滔滔不絕開始呻佢喺老人院嘅經歷：「如果唔係因為呢個造口，我駛鬼住老人院咩。住老人院好慘架，成日都要綁人手，綁到實一實。條片up住24個鐘都唔幫你換！我有俾錢架，搞到好似乞佢地幫咁！一個月都要八千蚊，單人房就要一萬蚊⋯啲床好窄架，得咁闊（用手勢形容）⋯啲阿姐全部外省人來嘅，冇啲耐性同愛心，真係好慘架！」講講下，佢就好灰咁話：「如果之後我有咩事，唔駛救我喇，叫醫生幫我打支針等我安安樂樂咁死好過啦！」聽住佢講，我都不禁想像佢喺老人院嘅生活。 綁手（約束手帶）喺醫院都好常見，因為有時啲公公婆婆精神狀況有啲亂嘅時候，可能會自己爬床、想走；但其實啲姑娘好多時都會俾啲機會佢地先，盡量都唔想綁，真係搞唔掂怕有危險，都會同屋企人講返個情況先會用呢啲約束裝備，用意都係保障病人安全。用咗之後都會有相關嘅assessment chart去定期mon住，確保約束手帶/手套/背心嘅使用係合適，冇箍得太緊整傷病人。但喺老人院，我就真係唔知有冇咁完善嘅評估喇，加上香港啲老人院質素咁參差，新聞都成日睇到好多令人髮指嘅虐待院友事件。所以我諗喺用約束裝備上，都唔敢保證係用得合適、安全。 至於換片，雖然醫院病房都好忙，但換片都一定唔會懶，至少四個鐘都會換一次，同埋會幫佢地轉埋身。有啲老人科病房甚至換得更加密，一更都可能換成四次。你話啲病房助理/護士（我之前出老人科係全個病房嘅姑娘阿Sir都要一齊換片）換片hea唔hea，講真就真係睇人。我試過part啲姐姐係好求其，就算有屎都可能剩係輕輕抹一下就算；但都有啲好細心，真係會抹到乾淨先換下一個。換得求其定認真，除咗睇換片嗰個人本身性格，都好睇病房忙唔忙、多唔多病人。但至少以我觀察，我覺得換得好細心或者做得夠嘅一定多過好求其嘅，始終預防pressure sore（壓瘡）係病房裡面一大重點，如果成日求其換求其抹，up到病人patpat紅咗損咗，病房啲大粒野/管理層都會怪罪落來話換片功夫做唔好。所以就算求其都有個譜，起碼有屎都一定會幫你換。而且病房好重視病人私隱，換片都一定一定會拉好簾。但老人院呢？老人院缺乏監管，照顧工作做得唔好都唔未必會有咩好嚴重嘅後。如果連沖涼都可以就咁除晒長者嘅衫褲，要佢地冇尊嚴地喺露台沖；更何況係換片呢啲普遍人認為係厭惡性嘅工作呢？所以好多老人院入來嘅case，patpat都多數有壓瘡，有啲可能甚至係爛到見骨。 講咗咁多，點解我特登分享呢件事，其實係因為我屋企人最近都為到送唔送公公住老人院而煩惱。雖然公公今年都九十歲，但其實佢仲行得走得，甚至唔駛揸拐杖；不過佢近幾年有啲腦退化，加上佢有長期尿喉要護理，而佢又成日都因為尿喉處理得唔好而入院。佢同婆婆兩個人住，但因為佢地年紀差好遠（以前啲人好多都係冇感情地因為父母之命而結婚），婆婆日頭要返工，都唔可以照顧公公。前幾日，公公又入咗院，媽咪同佢啲家姐細妹都發現公公自理能力開始變差，食藥又唔識自己跟時間食。佢地開始諗係咪需要送公公入老人院。其實如果有錢就話請個工人就搞掂，又或者要送去老人院都揀啲好靚、服務好好嘅院舍；但香港又有幾多個有錢家庭呢？以前我都會覺得有得揀緊係唔揀住老人院，仲要香港啲老人院質素咁參差；但真係喺自己屋企發生嘅時候，又發現好多時真係好似冇得揀。 我又再諗，疫情肆虐都成一年，有啲調查結果都發現好多長者因為唔可以成日外出而有抑鬱嘅情況。如果連住喺屋企，起碼叫做有自由嘅長者都咁唔開心，咁嗰班喺安老院舍每日過住千篇一律嘅生活，得唔到適切照顧甚至可能係受住好多唔人道嘅對待，仲要連屋企人都冇得見嘅公公婆婆，會有幾絕望呢。可能有好多都好似琴日呢個婆婆咁，寧願死咗佢一了百了，都唔想再繼續呢種痛苦嘅生活。 講咗咁多，其實我都仲係唔知可以點做。一方面唔想睇住公公入咗老人院，可能健康仲差咗；但另一方面卻唔知有咩其他嘅方法。好多時送屋企人入老人院，唔係因為唔愛佢地，只係呢個社會環境限制咗我地愛佢地嘅能力。喺香港一生人勞勞碌碌，買樓唔駛諗，租樓又貴，就算係廁房劏房閒閒地都幾千，物價又高，剩係應付住屋同生活開支，都可能已經好吃力，就算有心想照顧年邁父母，都未必有能力去做。而一班長者勞碌一生，到老卻冇一個保障等佢地可以安老，只好繼續勞碌。但年紀咁大都冇咩工作可以揀，多數做外判清潔工，係叫做可以有份收入，但工作環境差、冇保障，外判公司只係為求利益用盡方法、走法律隙灰色地帶剝削呢班老弱員工。「安享晚年」對好多香港嘅長者來講，可能只係一個遙不可及嘅夢。 喺香港，每日都有好多好多嘅悲劇靜靜上演，好似前排寒潮一日有幾個長者喺屋企過咗身都冇人知，但呢啲都可能只係冰山一角。都係嗰句，愛要及時，愛到就愛，做到就做，照顧到嘅時候就好好照顧你嘅家人。可能會好難行，但我相信總有希望，一齊加油。#staycuteprocreate #staycutewardsharing