【入樽回憶】神級對手的重要

你有幾耐無面對過一個能瞬間擊潰你及你所屬團隊的強敵了？

暉哥近期睇番《男兒當入樽》漫畫尾果5,6本，即係壓卷作湘北對山王工業，故事中山王係無敵級，隊員有防守no.1深津一成、198cm屈高嘅圖騰柱野邊將廣、全能松本稔、連急性盲腸炎都忍到嘅耐力王一之倉聰、最強中鋒河田雅史、仲有單挑王沢北，可謂鑽石陣容。

佢地轉校去是但一隊都可以成為主將，仲隨時勁過牧伸一、藤真、仙道等。每一位都可以一打五咁滯，等於一隊5S級，湘北等於挑戰緊5隊波！

而當中嘅沢北榮治更加設定為幼稚園已經打波嘅最強BOSS級，睇番佢一打三上籃fake過赤木、流川、櫻木。再諗番櫻木由神奈川選拔賽，打三浦台高中一野「頂上灌籃」爆光頭仔內藤鐵也個頭被foul出場，到贏翔陽、陵南，以為湘北勁咗好多，原來都係白費，世界競爭力嘅速度屬殘酷級。

暉哥諗起初中雞果陣個喺街場打波，都同幾個隊友打過唔少鋼條仔、鳩foul玻璃男、成身滑哂哂嘅肥仔，都以為已經勁勁地，點知有年暑假嚟咗成班大隻高佬，屈爆jump shoot、高組織力、仲有暉哥跳盡都唔夠搶板，最後只能汁單手打個波出三分圈，等隊友死追，係好惡打，不過同佢地打咗半個暑假後，確實強咗好多。

所以一個團隊有豬一樣嘅隊友唔係話太重要，但就極需要神一樣嘅對手，加激勵力高嘅領導，經歷吓慘敗或慘勝，先會大有進步。

生活、打工都滑哂啞嘅你，生命中有無神級對手呢？