［我自信有日如願　縱使天高地厚　仍被我逆轉］ 放心，未死，亦冇人死。雖然人總有一死。我同學W（呢篇佢會出場）紀念冊嘅志願，係寫「過傳奇嘅一生」。我呢？好似係寫「發明時光機」。不過嗰時冇諗返去平安夜，做低我阿爺。佢傳唔傳奇我唔知，我亦未發明時光機。但邊個知呢？本文全無公共性，想發達想知多啲嘅唔使睇。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
告個急先：Ivan已被炒，已成失業人士。未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。 一星期至少出返六篇文．月頭訂最抵！月費80
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

1. 到底意難平，原本上星期五寫，等到今日先寫。不過都仲未係《被炒記2.0》，你當係序或者楔子。未見過啲書好多個楔子？甚至可能玩到《等待果陀》咁，最後果陀都冇出現—不，甚至佢出唔出現已經不重要。果陀只係一個推進劇情嘅工具，一個MacGuffin。可能《被炒記2.0》都係。

2. 講返，上星期五，2021年3月12日（記住呢個日子，伏線嚟的），係我在康宏嘅last day（＊）．午餐，在呢度食，我揀嘅。（晚飯？之前貼過啦，阿Sir請食飯，馬會嘛）

3. 一般嚟講，如果同朋友食，而我堅持去一個地方食，多數係幾強烈嘅理由。而通常唔係因為嘢食。出街食飯唔止係為食飯嘛。

4. 有乜特別？因為2019年3月18日（記住呢個日子，伏線嚟的），我地一行四人，又係在呢度食嘢。嗰日正係我返呢份工（即係，「上一份工」）嘅第一日。有始有終，開工食呢度，散水又食呢度。我個人就係咁無聊，正如我同隔離台陳公食飯（唔tag了）都揀返廿年前同佢去過嘅藝術中心。正如上星期四晚我都揀國際咖喱館，又有原因，另文講。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
5. 想講嘅係，友情。呼，冇計，老人家係賣呢啲。年青人講熱血，我地梗係講老火湯細水長流（同屙尿一樣）。

6. 一行四人，鋼琴家W君相識最久。有幾久？係喬治奧威爾嘅1984年。係喎，小學一年級同學，讀到中七都同一班（當然中途唔係年年都同一班）。L君，我都唔知係邊一年，但都係小學雞年代，小三小四咁上下？而家我都唔係好知佢撈乜，你當佢兼職補習天王，正職渣鑊鏟啦。最後一個，T君，佢比較重視私隱，所以我講少啲，sort of我嘅行家，中二識佢，1992年。即係呢班朋友，至少都識咗差不多30年

7. 我地仲要係同一間中學嘅。咁我中學唔係咩名校（「地區名校」即係唔係名校。正如「affordable luxury唔係luxury」「副學士唔係學士」「PTGF唔係GF」），但好歹我地都全部讀大學，港大中大添。唔止，四條友，五個Degree 四個Master 兩個Doctor添（至少，希望冇數漏）。當然你可以話「唔代表乜」嘅。隨你。但，係咪真係阿豬阿狗都讀到港大中大（其實都……係嘅）

8. 三十年，真係好久好久，特別係咁多嘢變咗，由小學或青春期，去到中學，公開試，大學，做嘢，結婚（全部結晒），生仔（佢地有小朋友，我冇）。你睇住我，我睇住你，大家都變咗好多。但似乎都係向好嘅方向變。

9. 特別係我。二三十年前，四個入面，最想自殺嘅應該係我，唔係我第一都第二。但而家我變咗好熱愛生命。當中經過好多嘢，但，並冇你想像中咁咩超然，唔係悟道，唔係因為埃汾太（都有部份係嘅），唔係因為宗教，或者小朋友。主要都係吃喝玩樂酒色財氣咁。咁多好嘢未食，咁多地方未去，邊捨得死？（OK，如果我話咁多好文未寫，好多好書未睇，咁多好戲未得閒睇，係咪即時有文化好多？其實又只係narrative，根本同一回事）

10. 我地並冇好似女仔咩四朵金花咁，甚至亦都冇成為梅菊蘭竹 粥飯麵飯。可能我記錯，但雖然同一間中學，我印象中，中學年代冇乜一齊活動。反而係做嘢返嚟後先多

11. 你話係咪好熟嘅朋友？就tricky．睇你用咩標準。必定係好重要嘅朋友，但，往往都係一年先見一兩次。甚至佢地三個結婚，都係得一個有請我—我呢？我酒都冇擺。

12. 但你懂的，男人嘅情義，就唔係呢種的。我估女仔會覺得好緊要，好姐妹四朵金花，轉流嫁（廢話，唔通一齊咩。我諗起經典嘅娛樂標題「李心潔下嫁彭氏兄弟」），點會缺席。但男人真係唔同。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
13. 對我嚟講，應該係最老土嘅，無友不如己者，幾個朋友都令我學曉好多嘢。鋼琴家W先生同我最早相識，小學雞年代同佢玩泥沙。我到而家都講，車，當年我同佢一齊學琴，我都唔使練琴都同佢咁上下—事實我當年從不練琴，全部都天才波 pseudo sight reading，應係有啲「天份」。但之後呢？天份is overrated，特別係我嗰啲都冇乜咁特別嘅天份。正如學校嘅數學成績，一般我都高過佢。但我係工匠，佢係藝術家。唔係講咩貼中題目識考試咁低層次（我似咁低層次？），但行家一出手咪知。拳王未必係最好打嗰個，但會係有紀律嗰個。其實我當年都冇乜，但比佢有。佢係考完試會早走嘅人，我係坐到尾將份卷用唔同方法做幾次做到最後一分鐘嘅人。比較遺憾，係後來佢在俄羅斯彈琴，咁啱我在英國讀緊Master，佢嚟咗，但我都冇好好招呼佢 —因為我係一個死線前趕論文嘅騎士。最後亦都冇去到莫斯科作客— 結果咁多年我都冇去過俄羅斯。佢？就當然俄文都識講。不過後來，佢在三亞（冇錯係海南島）開演奏會，我就真係有去聽啦。海天盛筵？咪玩啦，潮汕牛打邊爐咋。

14. 同學L嘅，我都唔知佢幾時由一個夾住本《地球的奧秘》（主要係為咗上我屋企睇鹹帶），同我講Linus Pauling 嘅科學家，變咗炒期指著Armani 嘅才俊。當然兩樣嘢冇乜矛盾，佢而家都仲同學生講Linus Pauling 的。不過我最記得，應該都係同佢在另一同學（不在此文中）屋企踢波。「屋企大到可以踢波？」，才不，居屋，四五百尺？但短橋窄馬，小球有小球玩法。咁細個廳我地（其實係我）仲可以斬角球，由佢插水式頭槌飛頂，打爛人地屋企嘢。仲有？仲有記得，小學雞乜乜數學比賽。喂好撚大件事，知唔知我地去邊度呀？去德望呀。喂！德望呀！（＊＊）你諗下個反差幾撚咁大！對於我地呢啲新界牛屎仔，好震憾架。仲要由屯門搞一大輪去到石峽尾再入去。比賽成績？我都唔記得，應該冇拎獎。而反正我只係做後備，居然有啲咁無聊嘅嘢。同學L，教曉我好多很無聊但真係要有人講我先著燈嘅嘢，例如「如何加價」之類。

15. 同學T嘅，佢最著緊私隱。所以不講太多。但，W君小學中學影響我最深，T君在我做嘢後影響我最深。對我嚟講佢係最有威嚴嘅角色，甚至你可以佛洛伊德地話我將青春期屋企冇老豆 冇阿哥嘅感情投射在佢身上（老豆冇死，離咗婚走咗啫）。佢就係嗰種Mentor嘅角色。對我嘅批評相當辛辣，但總會去到咁上下位又逗返住我，等我唔好反枱，或者意志消沉。呢度只係講幾句，但當中點拿掐個分寸，就係人情世故學問了。

16. 朋友之中，我最崇敬最拜服嘅，就係嗰啲一早行一條路，一早有一個想法，然後我最初唔信，最後自己都行埋嗰條路。呢啲朋友我就最崇敬。T同學正係呢種。仲有陳公，以及賴叔，其實都係（雖然兩個都後生過我，但學無前後）。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
17. 重點？真係冇乜重點。但嗰日食飯，唔知點解講開爬corporate ladder嘅遊戲，我話我玩咗咁多年，都係失敗嘅，好大可能呢餐飯，就預示住我離開中環（＊＊＊），告別十五至二十年嘅寫字樓生涯（睇你計唔計教書或做蕉行嗰時），冇得再做salaryman 個個月尾等paycheck到。T先生話，都唔算太差啦，休得過謙。的確係。

18. 我地講返，2019年3月嗰餐飯，我第一日返工。食完飯唔知做乜興起，咁啱之後幾日W先生在大會堂有個演奏會（而我係冇去嘅）。唔知邊個講起，佢話去試下個琴，我地就順便一齊去，仲等佢即席彈返兩首歌。

19. 對，成件事有啲輕描淡寫。但，首先你要有個開演奏會漑朋友。另外你幾條友仲要係可以食完飯都唔返公司走去大會堂聽人彈琴。仲要係即興，幻想即興曲（放心，佢當然唔係彈蕭邦），如果一早約實就冇晒個意思。就係即興，大家可以去咁樣，聽返兩首，洗滌下心靈，之後先再返司，而唔使望住14:00返公司打卡。

最後呢個小故事作結：

20. 我記得細個睇蘋果日報左丁山寫《GG細語》，專欄名點嚟？係佢飲咖啡嘅餐廳。但佢篇文有講，呢啲就只適用於啲可以辦公時間鼠出去飲咖啡嘅人。嗰時覺得有啲串，又幾型。事隔多年，不經不覺我都變成可以鼠出去飲咖啡嘅人，但結果我有次係鼠咗去新城做節目，然後我就當面同左丁山講返呢個故事！後來仲在佢專欄出現過。正如細個我睇鬼報，見到有Appointment一版，見到啲鬼頭轉工會見報，覺得巧有型。後來？我見工都轉咗報。「其實唔難」「最緊要你同記者friend，嗰日又冇乜新聞」。嗰時都覺得係quite something

21. 而家？我就真係幾點起身 幾點食飯都冇人理了，恨到啦。不過：

最美一幕　還未閉幕　最闊的路在塵世遠方

22. 我記得伍晃榮本書有講，當年電視台有個鬼頭過左身，但佢生前一早安排咗，畀低咗舊錢。佢嘅遺願就係大家送走佢後大家去返平時去開間酒樓，照樣食飯打牌就得了。

23. 我諗，我都係咁安排。我死咗你地就去打邊爐啦。（放心，冇事，但及早諗定都好）

（＊）嚴格嚟講3月13日先係，但星期六。當然康宏作為一間企業管治咁出色嘅企業，係有計埋最後一日糧畀我嘅。真係多撚謝。搵篇文再講

（＊＊）後來嘅「50萬空姐」，全名「50萬開琴行空姐」，正係讀德望嘅。Another Story．但，誰不愛空姐呢？

（＊＊＊）「中環」as a metaphor，上環都可以係中環，灣仔都可以係中環。MK見工都可以係中環。

＝＝＝＝＝＝＝＝＝＝＝＝＝＝
2021比別人知得多。subscribe now。Ivan Patreon，港美市場評點，專題號外，每日一圖，好文推介。每星期6篇，月費80，半年已1400人訂！（https://bityl.co/4Y0h）。 年費仲有85折

［活在回憶中，到老一場空呀］狡兔都有三窟，出嚟行要幾張鬼卡。退休點可以只靠一隻股票？

1. 一貫作風，報紙專欄，導讀長過正文。你當係Director’s cut

2. 慣例，post最底有全文，反正免費嘢。或者睇返蘋果亦得：　滙豐如辰衝 廿蚊不是夢（https://bit.ly/2PrVQky）　

3. 張圖我幾鍾意，固然辰衝都講咗一個星期，過氣，但我度篇文都幾日前，而第一句湧出嘅就係呢句，「滙豐如辰衝」，廿蚊不是夢係後來加嘅，某讀者提議的

4. 唔鍾意嘅，又會指手劃腳講，廢文，成篇文連業績點差又冇講，公司面對咩問題又唔講，點解係廿蚊又唔講（答案：因為順口，原本想寫　十蚊不是夢）。但，你肯定想聽我講　業績點差　公司面對乜問題　同埋點計估值？我寫幾萬字都得。但你咪玩啦，百壇齋主。畀A你又話冇B，畀B你又話悶，正四方西。你肯撚定？咁不如我地講下份業績，咩係RWA，乜嘢係NRFB ，乜嘢係CET1 ratio 先？Risk Weighted Assets, Non Ring Fenced Bank，Core Equity Tier one ratio，唔好話我拋縮寫啦。你肯定你想我寫呢啲？Glossary你都未撚識睇啦多多事實。咁當然你唔使好波過美斯先可以鬧美斯，但至少都要識球例掛

5. 我想講嘅係，大佬，2020年啦。但依然係行禮如儀，又去講返某人直播落淚，又係搵幾件長情阿叔出嚟講退休金泡湯，然後又搵曾淵滄出嚟講自己啲匯豐鎖在新加坡佢幾蚊時買冇問題—係事實，但，厭唔厭？同樣地，辰衝執笠又係講當年邊個阿叔在呢度溝名校女生，當年點樣丘世文顧西蒙。實情寫嗰個，同埋睇嗰個，都廿年冇去過辰衝。

6. 事實大家早早唔睇書，睇嘅都亞馬遜誠品。同樣地，講匯控創新低，同時間蘋果創緊新高，美團創新高，甚至個「港版納指」嘅恒生科技指數都新高。正如明報星期日有篇文寫得好（https://bit.ly/30rzIgw），「我覺得沒必要討論辰衝，它不配被懷念或被撻伐」。「咁你又寫？」。我唔同，我擺明呃like搵食。而且我係個人Page，唔係霸住個B1頭條寫本人同辰衝嘅私人恩怨嘛

7. 辰衝係文化陸羽（但本人去陸羽其實冇乜嘢，咪舊式酒樓服務），匯控就係銀行界檀島—越做越差。講嘅未必係服務（服務就間間都差架啦），但股價同業績唔呃你。

8. 冇錯，銀行難做，全世界都難做，請去鬧聯儲局同歐洲央行。銀行股普遍都差—但都有冇咁差同最差嘅分別。匯控在上一次危機（金融海嘯），其實股價畀好多銀行都好，因為資本強大云云。但今次就唔係了，在眾多銀行中，佢跑輸好多同業

9. 至於「退休全部靠晒佢啲派息」嘅，固然唔係貪心之徒，但不幸地，都係做咗錯嘅決定。點解你退休嘅錢，可以全部靠晒一隻股票？！朋友話「如果佢買晒亞馬遜你又唔會咁講」，差矣。可能係。但，即使我推介任何投資都好，有冇叫你訓身家買落去？

10. 仲有個深層次啲嘅問題，Alternative Path，Possible Worlds嘅問題。（https://bit.ly/3kbJYBx）。人人都講黑天鵝，你估人人識黑天鵝咩。作者咪講過，Your dentist is rich, very rich。你剝爆卡買中石油，當然係你有膽識你好嘢，但，我唔會叫人去照做一次咯。結果同決策過程，係唔同嘅。所以咩四十歲會計師身家買匯豐（https://bit.ly/3k6O7qe），當然要恥笑。你訓身家買乜我都係咁話，祝你好運。你廿歲我都仲理解，成副身家十萬八萬甚至一萬幾千。但四十歲人，你輸晒之後—唔係冇得翻身，但，半場畀人數咗三球了。

11. 係架，佢訓身家買咗六合彩而家發達添。但如果唔中呢？仲要話退休人士休息喎。匯控出業績嗰日，仲有兩間藍籌出業績，恒生同中電。業績一樣差，但恒生就減派息，中電就保持派息。我當你最初唔係退休靠晒匯豐，買晒呢三隻，都係收少啲息，但至少唔會冇飯開日日嘈，最多係由食半島變檀島。

12. 講過了，買匯豐嘅，「想穩穩陣陣收七厘息嘛」。呢個咪就已經係錯嘅諗法。世界上係冇「穩穩陣收七厘息嘛」，甚至冇「穩穩陣收三厘息嘛」。美國十年長債債息0.5定0.6厘，高過呢個數嘅就係「唔穩陣」。本來風險冇問題，但你唔知自己take 咗就有問題。

13. 周顯有過一個露骨但我好鍾意嘅比喻：你去嫖妓，看似危險，其實安全，等於職業車手賽車，一定做足安全措施。你啲老蘭ONS，以為乾淨，其實等於臭飛渣大膽車地下賽車，呢啲先最危險—因為你以為安全。

14. 買輪嘅，唔會買身家（你會嘅恭喜你）。但買匯控嘅，就買身家—因為以為冇風險「最多個價跌但我夠長命」「穩穩陣收七厘息嘛」。

15. 所以好多人嘅諗法都係有盲點嘅。等於埃汾叫你買金，然後佢訓身家去買，輸咗錢又問我點好　—　叫你買，同叫你訓身家買，係兩回事。What if 我睇錯呢？What if 你睇錯呢？你成副身家信一個未見過嘅人，咁我好多謝你對我嘅信任，但你自己就好危險。

16. 當然你可以話我細膽，隨便你，你今晚訓身家買場波，應該快過你咩買蘋果買亞馬遜升幾倍。但，如果唔中呢？

17. 呢個亦見於我嘅做人哲學，同埋行為。唔止我要求自己盡量高透明度，亦都要求自己坦誠（那怕係戇鳩地坦誠仆街地坦誠）。睇過收費短片嘅可以做證，我唔信聯匯爆煲（事實爆咗未？），但，我一樣叫人轉啲美金 – 因為，可能我估錯呢？同樣地，你今日睇梗係美股好，但我亦唔會叫你買晒—如果我同你都估錯呢？

18. 再舉個例，我要嘅，一早可以買樓添。事實我啲同學好似04 甚至02買樓，我去到13。我係咪人工特別低過佢地？又唔係。甚至唔使13年我都可以呼丕層樓添（濕鳩屯門樓都係樓），但我都係儲到可以呼丕後再一陣先買（固然都係做九成按，留意我可以呼丕，同我去做呼丕，係兩回事）。係架，錯過咗09年個升浪呀，但又如何？下下倒後鏡咩。係架，早年我想換去住太古城添，當然買得起，當時仲有銀行士大夫優惠—但，如果畀人炒呢？如果我想劈炮呢？（結果果然冇耐後我就裸辭，如果嗰時換咗層太古城就應該唔會了）

19. 至少09年後，我全部日子都訓得安穩，今年3月咩股災，冇乜點驚過。我完全冇減倉，仲有加（講股票啦，樓冇買多層，雖然有諗過，咩呀，台灣樓唔係樓？），而家堆嘢價值低位升返五成（其實，即係同標普指數差不多，但夠啦）。你可以睇返個FB post啲人點串我點鬧我（https://fbook.cc/3DW0）。咁我肯定佢地全部而家都表現好過我的，應該係。根本唔使跑贏大市，因為大多數人連呢點都做唔到。

20. 再諗下，咩97移民潮啲友，當時當然覺得香港仆硬街啦，個個都咁講，於是連根拔起，層樓都快手買賣。「但如果你錯呢？」
-----------------------------------

辰衝執笠，我相當心涼，該店出名門高狗大白鴿眼。滙控（005）呢？我並冇特別唔鍾意，但如果辰衝係文化界陸羽（本人去陸羽倒冇不快），滙控就係銀行界檀島。前景坎坷，食老本，全無改善，稍為有尊嚴嘅人都避之則吉。說話係難聽，但三唔識七我冇必要針對小股東，記住苦口良藥。

咩年代呀？個世界要進步的。但辰衝執笠後，照舊係訪問吓啲阿叔當年點溝名校學生妹，照舊講咩一個年代終結。今次滙控業績後，朋友依然係傳某人在電視落淚張相。傳媒循例又訪問下啲長情股東，「我退休靠晒佢㗎啦，但都冇計，惟有希望下年派返息啦。」

滙控創新低嘅同時，蘋果創緊新高。OK，美股巴閉嘛，唔好咁屈機。但「港版納指」一樣創新高。話港股廢嘅，至少騰訊（700）、阿里巴巴（9988）、美團（3690）等，近年差不多任何位買你都贏錢，而我唔係叫你去買細價股喎。

滙控愚人節彈弓手，除咗淨嘅股息都唔派，至今4個月。有本書叫《Who Moved My Cheese？》。你不停咁鬧滙控令你嚿乳酪冇咗，有冇用？冤有頭債有主，而家係英倫銀行搶咗你嚿乳酪喎。

最好笑係，滙控在歐洲蝕到七彩，南北美非洲中東基本上打和，就係亞洲賺埋貼歐洲蝕！而仲要係英倫銀行禁派息！但公司或股東堅持攬住英國做總部，就唔知點解了，莫非英國有乜乜咁巴閉？而家環境，講遷冊香港梗係政治不正確。但，不如諗吓新加坡之類？阿爺可能肯接受，又可能唔使俾人限派息。

滙控鬧劇，畀大家最大嘅教訓係：投資應該分散。每次我講呢句，都會畀人鬧，但事實如此。唔好講「一早買騰訊、蘋果就冇事」之類。實際啲，買滙控嘅係咩人？多數咩心態？我歷年都接觸唔少呢啲小股東，佢哋並唔係貪心嘅人。可惜，好人未必係有好報嘅。唔係你嘅錯，係社會嘅錯。你問個小股東點解買滙控，想像吓佢會點答？佢應該唔會答「我覺得公司可以改變世界升幾百倍」、「覺得管理層好有型」、「覺得銀行超好賺」。

十個有九個答你「我諗住穩穩陣陣收吓息」。不幸地，呢個世界上，係冇「穩穩陣陣6厘息」，甚至冇「穩穩陣陣2厘息」。美國10年債券，而家係0.6厘息左右。任何超過呢個水平嘅息，就即係「有風險」。只不過，有時風險喺你知嘅地方，有時喺你唔知嘅地方。畀得6厘息你，當然係有相當大風險，你食咗唔知啫。

唔想咁樣，可以點樣？風險其實好難避免。除非你甘心拎0.6%回報，否則必定有風險。但，你可以將佢管理得好啲。我見訪問好多退休人士，居然係可以成副身家放晒落滙控。有啲真係話平日開支就靠收4次息。唔覺得咁有問題？佢有事你咪PK？

我無法估下一隻蘋果，因為話唔埋會變下一隻8號仔，況且退休人士唔適合咁進取。但市面大把收息工具，當然，都係必定有風險。但最重要嘅，就係分散。當你最初買啲滙控，但又買啲恒生（11），買啲中電（2），三間咁啱一齊出業績：一間唔派息，一間減，一間維持。咁你最多係由食半島變成食檀島，但總好過乜都冇！你話，咁咪拖低個股息回報囉？係呀！咁，你想食得好定瞓得好吖？拎個中庸之道囉。我幾肯定滙控嘅股東，而家寧願最初有買其他幾隻。
狡兔都有三窟，出嚟行要幾張鬼卡。退休點可以只靠一隻股票？活在回憶中，到老一場空呀，切記。

————————————————————————————————
最新收費影片：第一次推介跑贏大市，同你回顧檢討下。仲有新推介。40分鐘，都係賣返$80

簡介及以前嘅片（未睇可訂）：https://bit.ly/3iYMD0F
報名嘅，課程編號CC006：https://bit.ly/3eXVX1K
報完名交咗錢，呢度log in：https://bit.ly/3gYXu9e
之後按最頂「按此觀看」就得
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:　回顧第一段專欄片有幾勁！今段落多幾個Number賺死你！40分鐘，都係賣返$80

影片/課程編號：CC006
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC006]
2/利用信用卡網上付款
3/及後有登入資料可以立即收看
查詢：whatsapp 63832145

❣️大胃倩推介😍極大碟 捧住個肚走😋超抵食母親節套餐❣️

母親節到啦😍大家諗好咗去邊度食未呢💗作為半個屯門友😉今次搵到間超抵食性價比高嘅酒樓開餐👍🏻

吸引到我地去嘅原因係價錢實在太抵😍$1488一圍💗免茶芥仲要唔使加一⭐️有齊魚蝦雞豬雞飯麵糖水🤩見到個餐牌已經即刻book定位😆

💁🏻‍♀️高湯焗蝦球伊麵
大大隻蝦球已經非常吸睛😍肉質新鮮爽口彈牙👍🏻每一啖伊麵食到湯汁的味道🥰

💁🏻‍♀️原隻鮑魚白玉盞
淨係睇個賣相已經相當吸引😆原隻鮑魚😍炆得非常入味😋連個節瓜都充滿着鮑魚嘅香氣

💁🏻‍♀️秘製黑蒜骨
一字骨唔單止大大舊😆仲非常多肉😍配上秘製嘅黑蒜香料真係絕配👍🏻外脆內軟香口而不油膩⭐️

💁🏻‍♀️XO醬彩鳳花姿
蕃茄同青瓜係我嘅至愛呢🥰淨係見到半碟已經非常有心思💗XO醬汁微辣嘅味道配上西芹肉片非常開胃😋

💁🏻‍♀️無味精燉雞湯
絕對係家的味道😋瘦肉南北杏蜜棗杞子粟米紅蘿蔔💗飲得出絕對係冇味精👍🏻我自己飲咗三碗哥哥都飲咗兩碗😍

💁🏻‍♀️清蒸雙龍躉
營養豐富不在話下😉肉質細嫩鮮甜滑不溜口😋

💁🏻‍♀️蟲草花杞子浸菜苗
呢道菜絕對係健康推介👍🏻蟲草花補肺腎、止咳、養氣🥰杞子又可以明目😍

💁🏻‍♀️木桶農家雞
雞皮燒得焦紅香脆，肉質嫩滑多汁😍雖然已經食到尾聲但係我都食咗四舊😆

💁🏻‍♀️欖菜肉碎炒飯
飯底炒得粒粒分明😍配上欖菜十分惹味

💁🏻‍♀️泰山凍糕
杞子桂花糕味道清甜可口食完仲可以排毒美肌添🥰

💁🏻‍♀️暖在心糖水
最鍾意食暖笠笠嘅紅豆沙🥰紅豆入口軟腍，每一啖都帶有果皮香

其實就算唔係慶祝母親節平時一大班親戚朋友聚餐都非常抵😍

泰山集團中菜廳
屯門井財街15號金銘大廈1樓A號舖

#泰山集團中菜廳 #屯門友 #母親節 #聚餐 #中菜 #覓食 #紅橋 #sinmama #全職師奶 #hkinfluencer #hkblogger #bloggerhk #hkblog #influencer #hkkol #親子KOL #親子活動 #親子活動好去處 #活動推介 #親子blogger #hkparents #大胃倩系列 #hkfood #家庭日 #親子日常 #hkfoodie #開餐 #三五知己 #港式 #酒樓 Sin Sin Lee

呢排開始多返出去同朋友食飯, 一班人食飯要食得開心, 其中一樣就係每個人可以自由揀自己鍾意食嘅嘢, 唔洗就住就住, 叫幾多都得~

打邊爐任食周圍都有, 呢度仲有埋點心放題, 多款港式點心選擇, 啤酒汽水任飲, 食物質素屬於中上, 百幾元就可以同班FD笑下聚下食兩個鐘, 絕對係聚舊嘅好選擇~

8:30前入座成人$188，小童$168
8:30後入座成人$158，小童$138
*另收$10醬油費及加一服務費*

??‍♀️此片為餐廳合作影片～

-----------------------------
東哥點心籠仔蒸飯專門店
觀塘店地址：觀塘駿業街48號地下
訂座電話：6364 8062 / 27725688
旺角店地址：旺角荔枝角道33號百匯軒2號舖
訂座電話：6365 0914 / 28861029
屯門店: 屯門青海圍8號地下A1,A2舖(置樂附近）
訂座電話:26622188 / 26622209

豬扒向來是香港庶民美食代表，從茶餐廳到粉麵店，都找到用豬扒做的美味菜式，豬扒包、焗豬扒飯、吉列豬扒，港式、中式、日式做法，不論用平價的急凍貨抑或用本地豬扒，都各有風味，豐儉由人。

鋒膳
地址：灣仔石水渠街69-71號年威閣2樓B號鋪
電話：2267 0288
營業時間：12nn-3pm，6:30pm-11:30pm
詳情： http://bit.ly/2Jg4Oh8

焗豬扒飯在不少高級粵菜館都有提供，這間藏身灣仔舊區內的鋒膳就做得出色。大廚兼老闆黎兆鋒(Nansen)出身飲食世家，爸爸黎汝森入行超過四十多年，曾是鄭裕彤開設富萬年酒樓（已結業）的總廚，後來自立門戶開了東湖海鮮酒家，Nansen從小已懂吃愛喝，兩年前開了這間私房菜。


晚市貴，平均消費過千多二千元，午市亦不便宜，用一級食材來做碟頭飯，賣百多元的番茄豬扒飯，不用茄汁，用新鮮荷蘭番茄來做茄醬，鮮酸開胃，豬扒用日本黑豚，肉香豐富，賣相標青。價錢更包括一碗足料鮮甜的爵士湯，是貴族版焗豬扒飯。

翠華餐廳
地址：灣仔駱克道54-62號博匯大廈2樓
電話：2542 2288
營業時間：7am-1am
詳情： http://bit.ly/2BX4K36

連鎖店的焗豬扒飯又平又好味。但眾多店中，哪家出色？早陣子，入行30多年的中菜名廚鍾志強，為我們實試5間連鎖店的出品後，挑選了翠華餐廳為連鎖店中的焗豬扒飯之王。

翠華餐廳的焗豬扒飯全是即叫即焗，色澤金黃，醬汁飽滿，香氣撲鼻。豬扒是厚切，口感、肉汁都豐富，入口一咬，鬆軟程度恰到好處，配料豐富，蘑菇、甘筍粒、洋葱、西芹及紅蘿蔔。醬汁調味也豐富惹味。美中不足是飯，雖然有香味，但煮飯時下得太多水，令飯太濕，未能粒粒分明。賣$72，價錢比其他連鎖店都貴些少。


炊豕店
地址：銅鑼灣加路連山道11號地下
電話：2805 6665
營業時間：星期一至日12nn-9pm
詳情： http://bit.ly/2TC245a

炊豕店於2013年開業，只賣家常菜，秘製豬扒、南乳豬手、滷水蛋、滷水雞翼等，再放在白飯上吃，簡單卻美味。帶骨豬扒以薑葱蒜醃足一日再炸香，肥瘦均勻，入味腍滑，再淋上手切五花肉的台式肉燥，是最原始的滿足肉香。除了白飯，亦可配粗麵或幼麵。全店裝修懷舊，綠白瓷磚、手繪黑尾公雞碗、斑駁的藍綠鐵凳，全是老闆珍藏。最近在中環開分店，坐得較舒服。

豬大王
電話：9069 3886
地址：旺角黑布街99號昌明大廈地下C號鋪
營業時間：11am-11pm
詳情： http://bit.ly/2MU2ywT

豬大王單是店名，已告訴大家主角是豬，屯門、旺角都有店。豬大王以雞翼、豬扒聞名，豬扒醃得入味，即叫即煎，厚身但鬆軟，鹹香入味，非常可口。另外豬雜亦出色，店主Mo哥表示單是洗豬雜便要花一整個上午，每款都要花個多小時沖水把內臟裏的血沖洗掉，各款內臟該爽的爽，要粉的粉，質感味道都是應有的準繩。小店平時所配搭的粉麵及湯底都只是平平，建議加錢轉加芫荽皮蛋湯，甘鮮下火。

Porker
地址：中環威靈頓街55號地庫
電話：6706 5298
營業時間：星期一至五12nn-3pm，6pm-11pm；星期六及日12nn-10pm
詳情： http://bit.ly/2NJglXu

日本吉列豬扒專門店，是人氣燒肉店298 Nikuya的姊妹店，裝修以撲克牌為主題，環境有些逼狹，位於地庫內，勝在隱蔽。

餐牌以豬肉為主題，採用鹿兒島三元豚，提供吉列豬柳、吉列豚肉餅、吉列豬柳三文治等不同吉列吃法，所有豚肉在日本屠宰後，經過控制溫度、濕度熟成起碼一個月，令肉味更濃，肉質更柔軟。即叫即炸，外層酥脆，配合豬扒外的肥脂，入口油香。每天都會轉換用過的油，沒有討厭的油味。

除了吉列豬扒，還有多款豬肉不同部位的小吃，吉列煙肉、香荽豬耳、醋豬雜都是惹味之選。

老友記
地址：中環華賢坊東17號地鋪
營業時間：11:30am-8pm（星期一休息）
電話：6189 6898
詳情： http://bit.ly/2Cm59gr

人氣小店，裝修以舊屋村為主題，撥輪電話、嘉頓玻璃杯、初代紅白機、上下架床，是打卡勝地。賣懷舊小食如豬扒包、燒賣、魚蛋、豬油渣銀針粉等。豬扒包跟別處不同，是洋葱豬扒包的版本，洋葱炒得焦糖化，爽甜，豬扒分量足，肉多，麵包是軟身豬扒包，略為薄身。

編輯：楊志強

========================================
立即Subscribe我哋YouTube頻道：http://bit.ly/2Mc1aZA (飲食男女)
立即免費下載飲食男女App： http://onelink.to/etwapp
即like《飲食男女》Facebook：http://www.facebook.com/eatandtravel
飲食男女網站：http://etw.hk
Follow我哋Instagram，睇更多靚片靚相！
http://bit.ly/2J4wWlC (@eat_travel_weekly)