【高達】ULALACUBE推出24K純金高達雕像 售價最高為2,640萬日圓 相信各位男士唔多唔少都被老婆女友鬧過買模型/Figure唗錢，今次終於可以大條道理用「黃金保值」為由買高達（前提係捨得畀錢買）。最近日本ACG週邊發行商ULALACUBE宣佈啟動新商品項目「U-Works」，結合日本工藝及人氣動畫締造出名貴精品。首波產品就同《機動戰士高達》合作，推出馬沙專用渣古II及初代高達24K純金雕像。 （圖1-2） 第一款係以1:100比例製作嘅光束步槍版RX-78-2，高18cm，重1kg，限量20隻，定價為2,640萬日圓（約$187萬港幣），並附送一個有LED燈嘅專用展示櫃。 （圖3-4） 另一款就係馬沙專用渣古II MS-06S，同樣以1:100比例製作。高17.5CM、重1KG、限量20隻，定價為2,640萬日圓（約$187萬港幣），亦會附送一個有LED燈嘅專用展示櫃。 （圖5） 最後一款就係光束軍刀版RX-78-2，模仿動畫第一集斬斷渣古姿勢，連軍刀高約10cm，重140g。雖然呢款細隻啲，但都要396 萬日圓（約$28萬港幣），限量10隻。 據了解，官網於4月20日起開放接受預訂，預計落單後2個月後發貨。而第二彈及第三彈純金雕像商品亦會喺5月公布。 #高達