*嚴禁劇透* *粗口自行過濾* *可瘋狂話戲屎但免外表批評人身攻擊* · [1230隔夜超短劇評][TVB][包青天再起風雲 EP03] · [讚] 包大人喺自己個腦度重組案情嗰段，畫面拍佢自己代入兇手角度去行兇還原案情，係拍得有啲心思。不過都唔夠「招財」、「進寶」兩位老師入解語軒教姑娘相撲成段拍得咁有心思。 · 嗰段獨立嚟睇係拍出個水準。李嘉夾埋張振朗又幾有效果，再加上小寶喺喜劇方面嘅穩定發揮，成段由大家要做皇后所以接受練功，到肥妹囂三娘畀咗本《房中秘笈》展昭，之後王朝同三娘對戰，成個都非常之完整。小寶飛天再拎朵花出嚟嗰下其實幾正，加埋鏡頭同埋CG配合，係好睇。 · [彈] 不過問題嚟喇，笑位咁好睇，搞到個焦點走晒。入解語軒係想睇吓有邊個人識得真功夫可以攞王員外條命喎，如果要將重點放喺小寶演嘅三娘身上，咁係咪應該將佢寫成疑兇，講多兩句懷疑佢嘅原因呢？其實喺三娘接受相撲訓練嘅時候，佢已經唔出色，仲好勉強，話佢要隱藏身份唔想顯露得唔得呢？係得嘅，咁成段就講得通，亦都可以keep到個笑位，到佢真係同王朝對打，先揭開佢真係唔識武功，王漢展昭係懷疑錯，咁成段相撲訓練為咗抽出兇手就成立。 · 有一個位又係睇到我呆咗。一直都話語嫣姑娘佢M到而避席唔去訓練，其實懷疑佢係好應份，但王朝展昭成個訓練到最後同三娘交完手先去查，會唔會過份咗？如果佢哋兩個血氣方剛（連包大人都血氣方剛睇咸書）嘅話，可唔可以加返佢哋畀姑娘迷嘅一兩個鏡頭，話佢哋畀美色所惑唔記得查都可以。 · 最令我震撼嘅係王朝佢哋兩個一見到語嫣就出手，咁使鬼入嚟潛伏又搞咁耐訓練做咁多嘢咩？直接打過，迫佢哋出手，自然可以搵到水老闆識武功啦。話時話，懷疑語嫣直接打佢已經拍得好牽強，跟住一吓見水老闆嘅輕功就知佢係高手呢吓又係薄弱嘅。如果真係要咁交代，個輕功運行距離可唔可以再遠啲呀？依家語嫣咁跌法，普通一個反應敏捷嘅人喺咁短距離其實都可能救到佢。 · 無論係包拯睇咸書、公孫策口沒遮欄、展昭重視破案同功名，呢啲都係打破晒金超群「正常」版本嘅人設。我就當咗佢係前傳咁睇，亦都可以當佢係另一個故事去睇，不過呢三集對於角色塑造同埋查案過程都係水過鴨背，完全做唔到嘢。 · [以下劇透一兩句] 今次雲中流水玲瓏一案，應該係想寫開封第一訟師雲千羽出嚟，咁點解要浪費咁多時間喺解語軒度玩相撲呢？全集只有雲千羽湯曉晨同朱家慶辯論嗰度係有啲相關，仲要寫得唔夠……個人希望包大人今次判錯案，咁就有啲嘢睇吓。（我就嚟頂唔順喇） · [演員表] 譚俊彥 飾 包拯 / 張振朗 飾 展昭 / 曹永廉 飾 公孫策 / 胡定欣 飾 雲千羽 / 姚子羚 飾 紀念念 / 李嘉 飾 王朝 / 譚坤倫 飾 馬漢 / 李日昇 飾 張龍 / 黃耀英 飾 趙虎 / 張國強 飾 雲中流 / 傅嘉莉 飾 湯曉晨 / 蔡國威 飾 姜耿 / 陳自瑤 飾 水玲瓏 / 小寶 飾 囂三娘 / 李美慧 飾 柳語嫣 / 魯振順 飾 朱家慶 · #1230隔夜超短劇評 #TVB #包青天再起風雲 #譚俊彥 #張振朗 #曹永廉 #胡定欣 #姚子羚 #李嘉 #譚坤倫 #李日昇 #黃耀英 #張國強 #傅嘉莉 #蔡國威 #陳自瑤 #小寶 #李美慧 #魯振順

[動作場口] 無綫嘅《包青天再起風雲》裡面，除咗展昭同埋王朝馬漢張龍趙虎識得武功之外，傳聞今次連包拯都識武功，不過睇咗三集就未見佢使出真功夫。 · 反而《仇老爺爺》估佢唔到有動作場口，喺第9集《決戰老超人》裡面，仇海凡同埋仇樂秋互打，動作場口嘅片段總長，好似仲多過《包》三集嘅總和。唔係驚天動地，但真係有啲驚喜﹗ · [上網或去APP重溫《仇老爺爺》第9集][決戰老超人] · #無綫 #TVB #包青天再起風雲 #ViuTV #仇老爺爺 #游學修

[無綫][包青天再起風雲] 聽日就首播嘅《包青天再起風雲》，喺宣傳片裡面提到所有角色都跳出傳統設定：包拯識武功、展昭佻皮唔係最好打、公孫策談戀愛，接唔接受到見仁見智，我個人就覺得好過乜都唔改重新拍多一次嘅，持開放態度。 · 早幾日，冇藍剔認證、共3525人關注、從未post過本尊近照嘅微博用戶「包青天金超群」，就share咗胡定欣上載嘅預告片，仲品評咗幾句：「本府感覺這個包拯有點用力過猛，你們覺得呢？戲勢逼人？青天再現？」其實金超群做嘅包青天都有啲作狀，最記得係佢闔埋眼再開返眼時，個眼珠永遠遲一秒先由上而下歸位，嗰吓白眼真係構成唔少陰影。 · 到底呢個微博用戶「包青天金超群」真定假？係咪史上演包青天最多次數嘅演員金超群呢？我覺得係假㗎，但又有傳媒引用佢嘅帖文喎……我抱頭覺亂。 · #無綫 #TVB #包青天再起風雲 #金超群