<<相信好多人都講過一句說話：「我第時做阿姐，我一定唔會好似我而家個仆街呀姐咁仆街」>>
　
我以前都曾經一樣咁傻豬豬，講過呢句說話，但後來我覺得，呢一句說話係make sense嘅，你唔仆街，又點會做到呀姐？
　
身邊有好多出咗嚟做嘢幾年嘅朋友， 有部分已經升咗做senior, 或者am嘅post，但係每個人嘅際遇都唔一樣，有啲朋友做極都冇得升，而且喺同一間公司留得耐，冇得升之餘，仲越做越多嘢做。佢呀姐仲比埋本身呀姐要做嘅野佢做，「比機會佢學野」，佢呀姐亦毫無廉恥之心， 一句都冇提過話要升佢職。
　
呢啲朋友通常同你呻工作煩惱，都會話：「如果我係阿姐，我一定會搵機會提攜我嘅下屬， 升佢哋職，更加唔會將自己要做嘅嘢，畀曬啲下屬做咁仆街。」
　
★　★　★　★　★　
　
我覺得而家人大咗，我就學懂阿嬌嗰句嘅意思同真諦： 以前好天真好傻，而家長大啦！！！
其實他朝一日你成為阿姐，你都會好似瞬間看地球咁，一秒逆轉成為一個仆街阿姐，點解？
　
其實我覺得每一間公司，都有好多好濕碎好濕鳩好悶好routine 好「庇護工場」嘅嘢要做， 呢啲咁 executional 咁time consuming嘅工作， 就好似一隻白切雞入面嘅雞胸咁，雞胸嘅數目永遠都係多過雞髀同雞翼。 到你有朝一日成為咗阿姐，你已經食咗n年雞胸，你仲點會受得住誘惑唔食雞髀同雞翼，同啲junior level嘅人一齊食雞胸呢？
　
點解一個人要有事業心要升職？
唔係因為做人要進取積極同上進，係因為作為一個比較聰明嘅人，明白只有阿姐先可以食到雞髀同雞翼，享受「 啲濕鳩嘢畀曬啲細做， 自己只係點人去做」嘅工作樂趣， 咩係manager grade嘅策劃工作技巧？咪就係好似順豐派件咁，將所有濕鳩嘢派畀啲下屬做囉。
　
如果你唔想一世食雞胸，成世要做埋啲濕鳩無謂嘢，你就要盡快成為阿姐， 只有盡快成為阿姐，先可以縮短食雞胸嘅時間。
　
點解啲阿哥阿姐成日話我地對工作冇熱誠，佢地自己讚自己好熱愛工作，好勤力？ 佢哋日日食雞髀梗係覺得好好食，好enjoy 啦。佢哋呢啲係咩心態？佢哋呢啲咪上咗神枱嘅心態囉，佢哋日日食雞髀，話隻雞真係好好食，仲指責我哋點解覺得隻雞唔好食，你食雞脾梗係好食啦，我日日食雞胸，欣宜都變張繼聰啦！
　
★　★　★　★　★　
　
然後有啲好傻豬豬嘅朋友就問，人人都做過細嘅，點解啲阿姐唔considerate啲？點解佢哋唔將心比己？ 你咁問真係代表你喺職場度仲未操練出一身好本領， 你仲係未訓練到仆街既人格同潛能。 阿姐係唔需要對你considerate㗎， 佢亦都唔需要做好人， 每個人都希望食到隻雞最好個part, 佢已經日日食雞脾，佢仲點會consider你哋啲食雞胸嘅人嘅感受。去到做阿姐嘅level, 佢去entertain啲細嘅，對啲細嘅considerate嘅成本係好大，大到根本唔值得咁做。佢喺你哋面前做到好generous, 對佢呢啲食雞髀嘅人士有咩好處？就好似大家覺得奶奶對新抱，奶奶自己都做過新抱，都明白比奶奶刻薄係好難受，我想同大家講，他朝一日你成為奶奶，你就會將自己以前作為新抱嘅屈辱拋諸腦後，你只會 著緊 點樣可以用盡奶奶身份嘅權益。
　
所以個結論係，如果你係仲係食緊雞胸嘅junior staff, 畀阿姐抑壓指指點點， 你只有兩種做法， 一係你就睇開啲，個人有事業心進取啲， 希望盡快升職，縮短食雞胸嘅時間 ,唔好再奢望食緊雞脾嘅阿姐會對你considerate同埋仁慈。 一係你見你喺目前間公司呢一世都唔會有食雞髀嘅機會，你就應該 努力jobsBB, 去第二間公司度，尋找盡快食雞髀嘅機會。