[gfmurmur9572] 第一次投稿，希望抽中我啦。 本人今年呢就25歲，有份穩定嘅工作，月入2萬，男朋友大我一年，啱啱搞緊創業，收入唔算好穩定。依家我哋兩個搬咗出嚟，好好彩咁呢又俾我哋搵到一間都唔差嘅單位，月租都係萬二蚊左右，如果兩個人aa都可以接受。我同男朋友識咗年幾，係半年前先一齊，一直都是對方為結婚對象，我知佢都係咁諗，而大家真係有計劃點樣係30歲之前結婚同草錢。一直以來一切都好好，除咗佢屋企人。 佢屋企有啲複雜，阿爸好爛賭，成日呢返嚟屋企問佢攞錢，但因為佢搬咗出嚟住，得返媽咪一個喺屋企，佢阿爸咗成日問佢阿媽攞錢，冇錢呢就打佢，有次試過打到佢阿媽入廠，佢媽咪整傷咗條腰，唔可以成日返工，得佢一個獨仔，家境唔係好好，阿爸仲試過喺屋企偷錢，總之呢，聽佢講，佢阿爸冇一樣野係好。但係佢阿爸阿媽又唔可以離婚，我問佢可唔可以接佢媽咪過嚟一齊住佢又話阿爸阿媽唔可以分開住，如果分開咗住呢就會影響大陸嘅資產(反正就係有筆資產要等佢阿爸死咗之後先有得拎，如果阿爸死之前同佢阿媽離婚，筆資產就會冇咗佢個名)為咗筆資產，佢阿媽打死都唔肯搬出嚟住，話要留返比個仔，咁我都明嘅，一個女人仔付出左咁多年，講到尾都係想個仔以後嘅生活好啲，咁我都明白我男朋友有難處嘅，所以係呢件事上面我一直都冇插口。 但係近呢排，佢阿爸打佢阿媽嘅次數越來越多，佢媽咪仲要做咗幾次手術，由於佢仲係創業初階，收入唔係好穩定，屋租由三個月前起已經係我一個人俾晒，但係大佬，手術又要錢，租屋又要錢，我都要俾家用㗎，當樣樣野都講錢嘅時候呢，我就開始好煩，由細到大我都幾明錢嘅重要性，因為我阿爸阿媽就係因為錢而離婚，所以點解基本嘅收入我覺得好重要。 有幾次，我放工去佢公司搵佢，佢都唔喺度，我問佢啲合作partner去咗邊，佢話佢全日無返過公司，返到屋企，又唔見人，咁我好奇打過去問佢啦，佢就好煩躁同我講佢屋企出事所以無返過公司，頭嗰幾次我都幾擔心，但係跟住再多幾次我就覺得已經習以為常，仲有啲煩躁，喺佢嘅角度佢冇錯，因為唔返屋企分分鐘事關到人命，佢返佢屋企我都覺得好正常啫。 但係個問題就係，每一次佢丟低晒公司啲嘢唔做，衝返屋企就算，夜晚就唔翻公司，佢仲要係創業初段，所有嘢都未成熟未穩定，因為佢係做IT嘅，幫手打program，每次啲partner都要等埋佢先開會，等埋佢先可以run所有嘢，但佢就次次唔翻公司，搞到公司啲進度一拖再拖，冇收入，要交醫院費，要交屋租，佢又煩躁，我望住佢咁樣我又好煩喎，我幫佢交多一日，交得兩日，儲蓄都用得7788，耐左反而比佢有種覺得倚賴左我，奉旨俾錢佢洗甘，平日出街食飯唔會俾錢都唔緊要，嗰度都好少錢姐，但我屋租幫佢俾埋唔出聲，佢就真係冇諗過要攞返啲錢返嚟。 呢排唔知係咪因為屋企壓力，佢更加連平日返公司嘅力都冇，有次我早放工，過去佢公司搵佢食飯，先知道佢原來已經由上個月尾起就算屋企有冇出事，有時翻翻下公司就走返去我地依家租屋嘅地方，連公司都唔返。有幾次我同佢講，叫佢不如多啲返公司，起碼有啲咩ideas諗起可以即刻同啲partner com，佢就好燥底咁鬧我，話我唔明佢狀況，話返公司個進度都係咁，返嚟做乜，不如喺屋企做吓嘢算數。 講真，對住佢呢啲問題真係好煩，我有諗住同佢講，如果連今個月都冇收入，就搬去啲幾千蚊劏房度住先，我唔想大家啲開支搞到咁緊，一蚊幾毫都要度住使的生活真係唔想再過，我寧願住細啲，簡陋啲，多啲錢洗，到時應急又好乜都好，但係我男朋友個人真係好要面，我真係唔知點樣開口同佢講呢件事，而唔使令佢誤會以為我今日係嫌佢冇錢，如果我直接咁同佢講，一定會出事，我真係唔介意同佢捱，但係再咁落去，啲錢好快就會抽乾，到時我一定會同佢因為冇錢而嘈交，但係我好鍾意都好愛佢，唔想分手。 我投稿真係好想知有咩方法可以解決呢個問題，有冇人有同我相同嘅經歷，如果有人諗到方法解決佢屋企嘅問題可唔可以話俾我聽點做，又或者可唔可以教我點同我男朋友講搬去啲平啲嘅地方住，而佢可以接受到，唔覺得我係話佢，麻煩搵高人指點下我，再咁落去我都會壓力爆煲，感激大家！ ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig #香港 #情侶 #香港情侶