重大消息公佈，希望大家可以花兩分鐘時間聽我講啲嘢
　
我孔明又再出書喇～～
　
其實由上年六月開始反修例運動開始，我就再無寫故仔了，主要原因都係生活同運動情緒影響，所以我一直都無太大心力去寫故仔，我自問係好投入場運動，所以再一次向讀者說聲抱歉，但我仲未收山的。
　
大家有冇留意上年我出咗本《跟蹤》，自從書展後，我就再無為呢本書宣傳，係因為過去香港實在太痴線，幾乎每一日都有唔開心事情發生，令我喺呢段日子入面覺得唔係咁合適去宣傳自己本書，更加唔想大家係呢個時期去花錢買我本書。
　
所以剩餘嘅書一直存放喺倉庫，一直燒緊銀紙去租倉存放又唔敢同讀者講。
　
雖然過去我一直都無咩故仔寫比大家，專頁更新一直都係講緊場運動，但其實我默默咁為過去一年嘅抗爭經歷寫咗個長篇故事，但國安法突然出現，我所寫嘅故事就唔可以出街了，連印刷商都唔敢冒呢個險。
　
一夜之間收起哂我所有犒，短時間內真係對我好大困擾，但為咗趕緊書展，所以我一直默默咁去構思新故事，但時間係唔會等人，好多印刷商都因為我時間太急而拒絕幫我印刷唔接我生意，幸好最後有間黃店印刷商肯幫我，令我趕得及書展前一日完成。
　
網上面好多人都話書展係藍屍集中地，全部都係三中商中資集團玩哂，但其實係有我地呢啲無咩人識嘅出版社喺到默默咁生存緊，我地拒絕任何中資書局，所以只能夠網上同書展去賣，所以書展無咗，對我嚟講一定有影響，但為咗防疫安全，我係支持延期，大佬，書展咁多人，真係是但一個人播毒都奶哂嘢，所以唯有呢家單向式咁網上賣。
　
書展延期，你問我有冇損失，作為「迴水文化」出版社老闆嘅我，當然有損失，就係裝修錢、倉租等等都係燒銀紙。我地背後無大水喉，我地仲要幫一班有熱誠嘅作家出書，所以每個成本都好緊拙。
　
我知道我今年銷量一定比上年差，今次印刷數量都比上年少好多，始終過去我專頁一直都係宣傳場運動而無咩點寫故仔，亦因為我政見而流失咗超過三千個讀者unlike，亦因為我政見而無咗好多廣告商，但其實通通都唔緊要，反正我本身都無咩人識，我嘅銷售對象從來只有我班讀者，都已經無咩街外人認識我呢個寫手孔明，書展對我嚟講，只係比我一年一度可以見到讀者，一齊傾下計，簽下書嘅聚會。
　
如果銷量差，證明讀者對我感覺都差咗，我更加要檢討自己。
　
講下本書先，今次用「黑色」作主打顏色，《失蹤》係白色，《跟蹤》係灰色，《迷蹤》係黑色，呢種黑白灰系列我覺得幾特別，我亦都決定以後作品都朝住呢個方向進發，好想有一日儲齊咁多本系刊放喺書櫃到，我會好滿足，希望讀者都有呢種感覺。
　
本書係講主角周奕宏來自驅魔家庭，因為父母得罪地獄魔鬼而離開咗佢，自此周奕宏就獨自生活，並發現城內迷霧愈來愈濃，身邊的人經常遇到古怪事情，逼使周奕宏利用驅魔手法面對這一切.....
　
雖然呢個故事創作寫作時間好緊拙，但我自己幾鐘意呢個題材，我下一本作品都會繼續用呢個題材去寫得更認真，更用心。但如果今次銷售太差，我就要認真考慮繼唔繼續出，我並唔係要逼大家買，而係我都要諗下我自己仲有幾多心力去創作，畢竟喺香港做創作真係好難。
　
之前聽人講，全廣東話嘅書係市場絕無僅有，但我想講，我出道十一年，所出嘅書，所創作嘅故事，全部都係廣東話，我一直深信廣東話真係好好聽，令到故事更加令人投入，特別一句「你個混蛋！」同「你個仆街！」已經好大分別，廣東話係值得保留同推廣。
　
所以都希望大家繼續支持廣東話書藉，支持我＝」
　
另外，今次同以往一樣，絕不加印同再版，原因之前都解釋過。
我唔想見到我嘅書好孤獨咁等人領養，所以每賣出一本，市場就永遠少一本，希望讀者能夠好好珍惜我本書。
　
買書注意事項：
　
1. 所有書，我都會簽名，大家都可以係店鋪備註到寫低想我寫咩比大家
2. 我只有銀行入數同payme付款
3. 順豐到付
4. 所有訂單都會盡量一星期內寄出（我請咗大假，可以快手寄書）
5. 上次仲有少量限量版結界手冊，亦都會隨書附送寄出
6. 市場無任何書局有得賣，只有我呢度可以買
　
有咩問題都可以隨時問我＝」
　
我嘅網店：https://homingming.boutir.com/

入去慢慢揀 （其實得兩本） 自己收藏又好，送禮又好，記得多多支持我孔明 ＝」
《失蹤》、《跟蹤》、《迷蹤》，等你集齊同我一齊進入結界。
　
（所有野都係我一手一腳去攪，所以處理訂單時會比較耐，請大家體諒！o！“）