［葬禮進行曲］你四十歲人，去過幾多次葬禮？

TLDR ：Always Go To Other People's Funerals — Otherwise, They Won't Come To Yours

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

1. 而家聲名極臭嘅朱利安尼，講過相當老派嘅人情世故嘢：婚禮呢，其實唔得閒真係未必要去，反正錦上添花，少你一個唔少。但葬禮，雪中送炭，務必要去支持遺屬，多你一個好多。況且，人可以唔結婚，結婚亦可以唔行禮，但總會死。死咗嘅，唔係完全無親友嘅，總會做啲嘢。當然明顯唔係佢發明呢套講法，佢只係在書講，我亦只係聽人講佢本書講

2. 況且葬禮，相當Flexible，流水席，幾時就到時間咪過去，見到遺屬講兩句，望下有冇識嘅人，喜歡嘅好快都走得。

3. 後生嘅朋友寫咗篇文（https://lkdin.io/3VOb），佢剛四十，即係後生我幾年。咁我呢幾年都冇去過葬禮（我記錯嘅請你報夢話我知），所以我四十時嘅數字，同而家一樣。朋友話三個或四個，咁我應該多過佢。你可以計下，去到你四十歲為止，去過幾多個葬禮。未夠嘅？「自己pro rata返」。「當然唔好計咩法治已死香港已死嗰啲一日去幾次嘅」

4. 當中，不存在咩「四十歲人應該去過幾多次葬禮」，正如我不打算研究「四十歲人應該打過幾次飛機／有過幾多性伴」之類。但背後，總會反映到啲嘢。雖然又話人老咗去嘅葬禮多咗，但照計四十歲呢，你同年啲朋友，一般都未死。你去嘅都係長輩之類，細細個都可以去。

5. 朋友話去得少，反映佢毒，冇乜朋友，同屋企人關係惡劣。可能都有啲關係。我都冇乜朋友，同屋企人關係都惡劣（但好似冇佢咁惡劣，真係人上有人）。但仲有好多因素影響，例如你有另一半嘅，往往就去多一倍。

6. 我試下數，我去過嘅葬禮，應該八個？有兩個我好似冇印象有去到，但照計我係有去的。然後寫完呢篇文我就會洗自己腦，十年後我就又變得肯定自己有去。人嘅記憶幾咁唔好可告！況且我地年代唔興「懷念爺爺」咁影響，好似暫時我都冇在殯儀館打過卡。（然後我查返手機app，原來係有！三次！都話記億唔可靠。咁其實殯儀館打卡冇乜嘢。冇人叫你在入面打嘛。）

7. 我父母好早生我，老母今年62，老豆64．兩個都唔食煙（老豆N年前食，戒咗好耐），所以根據大數法則，健在嘅機會比較大。咁你估到，八個之中佔咗四個嘅，就係阿爺阿麻，阿公阿婆，全數釘蓋，好合理。

8. 我嘗試排序，雖然未必太準。但，頭兩次應該最震憾，冇經驗嘛，況且細個（雖然都十歲以上），有啲驚的。

9. 第一個死嘅，係我阿公，我讀緊小學，四五年班咁上下？嗰時放學成日同老婆出去瑪嘉烈探病。應該係九龍大酒店？冇玩咩破地獄嗰啲，但都真係都仲係一回事，去足全程，同學校請假的。冇守夜，或者有人有但我冇份。阿公印象都多，細個在石圍角村，拎佢本不文集睇，佢又會帶我飲西茶，西多士冇餡嘅年代，幾咁美好。星期六佢睇賽馬，我就睇中間插播嘅大力水手，或者德國波。不過死嘅人太多，不能個個講好詳細

10. 之後係我阿爺，更加親近。冇錯係我出世時已經著咗草去台灣嗰個，堅稱自己冇收片但又走咗佬嗰個。但我有記憶時，佢已經返咗香港做返老正，當然亦唔見有乜錢（聽聞在台灣敗晒）。阿爺嘅感覺，就係唔係幾好老脾，但又唔係會打我嗰種，都係慈祥嘅。但又不過，我完全不能將佢同差佬扯上關係，雖然我一路都知，但總係覺得好似換咗另一個人。阿爺都算死得早，大約我中二三時死咗。嗰時佢臥病在床，我仲在側邊打機，真係不孝。記得佢死前健康當然更差，脾氣亦差，好多嘢唔食得，最記得成日要食田雞—唔係佢要食，係好似唔食得其他嘢。嗰時就開始知道死亡，可以揀真係長痛不如短痛，但邊度你揀？我唔相信阿公或阿爺咁選擇。當然佢地亦未去到話受好多痛苦，或者吊住好耐咁。阿爺最後死在大陸，唔知返去搵神醫定換腎定乜鬼。就係記得解穢酒食過「黃埔炒蛋」，記得阿麻好似幾風騷。唔知係因為照顧病人好累丫（咁阿爺病重時都真係好臭脾氣），定係拎咗唔少錢。冇錯，阿爺到底有幾錢遺產，去咗邊，都係大家扯貓尾，永遠冇真相，有人話根本冇，有人話去咗我阿麻度，有人話去咗我老豆度（應該都有啲），總之冇一仙去過我度。

11. 講咗咁耐先兩件，加快速度。見到嘛？阿公阿爺死先，佢地老婆反而擺耐好多。咁好合理，一來女人長命過男人，二來佢地娶老婆都揀後生，阿公更加係再娶，所以阿婆未咁快。由我中二定中三（1992？），打後十年，好似都冇再去過葬禮。阿婆幾時去架呢？慚愧，我都真係唔係好記得。細個當然都有啲感情，但後來阿婆已住老人院，咁大家知，慢慢就少深，我就更加少去 —唔好記嗰時我已經高中或者大學，有自己多姿多彩嘅生活，主要係溝下女做下愛咁，點都好玩過去老人院吧？你反對嘅，我同你交換。直到而家，我都唔記得阿婆幾時死，甚至唔記得我有冇去佢葬禮（希望阿婆唔好上嚟留言話：仆街仔！你死我都未死呀！），但合理地假設，應該總有出現下？當埘我同我老母關係未咁惡劣，佢叫我去我應該會去。不過又諗下，實情阿婆唔係佢親老母（都話再娶），至於我老母親母，我冇見過的，好早死咗。

12. 然後，又好似一輪高峰，嗰幾年去較多。我阿麻死咗，好似十年前多啲？留意佢最後就住在我而家住嘅地方，佢瞓廳（唔通我瞓？況且床架高，佢爬唔到）。事實佢臨終前幾年，都係同我一齊生活嘅。我係咪喪盡天良？都未完全係嘅。有時都會慚愧，冇陪佢多啲。佢健康尚好時，都試過我返工拎漏嘢佢拎去中環畀我（！），又或者我要帶女返屋企搞嘢時，醒一百蚊畀佢落去飲茶（唔係點？）。

13. 無論如何，當時已經有Facebook，亦係比較深刻嘅。當時係年尾，阿麻之前健康並唔特別差，即係長命病嗰啲當然有，但佢話唔舒服入醫院時，都仲係自己執嘢自己叫車。佢去醫院時我都探過下佢，都仲係幾健康。但話咁快。有一日我老母打嚟，就同我講，「你阿麻走咗啦」。我想講，我老母當時在屯門醫院返工，阿麻亦都住屯門醫院，我真係以為佢嘅走咗係出咗院，然後佢先話我知。當時我在公司，仲係十分搏命嘅分析員，我甚至諗緊使唔使放工先去，好似有上Facebook出post，甚至諗係咪要坐的士之類。無論如何最後就坐的士，去到叫做見佢最後一面（已香，但仲在床上，明啦）。

14. 往後嘅事，好多人都聽過。見完最後一面，不過係午飯時間咁上下？我返咗屋企瞓（分析員嗰時七點幾就返到公司，我係摸黑出門的）。然後？我去咗旺角。做乜？睇戲。同埃汾太睇戲。睇嗰套戲，叫做《3D娜塔莉的情人》，聲稱係全世界第一套3D韓片，條韓妹好靚，又好波，我都冇深究係咪整，有乜關係？

15. 我走咗去睇《3D娜坦莉的情人》（https://bityl.co/8Hsd），非常之卡繆，非常之《異鄉人》。我甚至應該係因為睇咗《異鄉人》先會咁。成件事我已經唔係好記得。我上一次寫文，係講「咁買咗飛丫嘛，唔通唔睇，點預到佢咁啱嗰日死」。但，我諗返件事唔係好合情理，首先嗰個年代，我好似仲唔多興網上買飛。之但係又不過，如果我唔係一早買咗飛，照計我唔會特登出旺角睇戲？Anyway同埃汾太睇完，就梗係上床啦。都話十分之《異鄉人》（正因如此，如果我冇買飛，點會特登出旺角？唔係叫埃汾太返屯門會簡單啲？留意我午飯已經返咗屯門）。第二日，我照樣七點半返到公司。冇能力的人嘛，唯有早返工。

16. 埃汾太當然都見過阿麻，食過好多次飯，當然都有去葬禮，不過遺憾阿麻冇機會見到我成婚。亦冇機會同我影畢業相。當然遺憾係佢嘅遺憾，我先唔理呢啲嘢。咁而結婚亦冇可能特登就阿麻，況且當時亦唔知佢就死，佢都唔知自己咁快死。但畢業相嘛，理論上可以就老人家嘅，不過事實上港大行畢業禮時我已去咗英國，英國行禮時我又返咗香港，而我又唔會唔係正日自己搵套衫同勞蘇影相咁

17. 第幾個？數完第四個。然後第五個，我老豆老婆（非我老母，但亦唔係「後母」，都冇一齊生活過，正如我老母老公我都唔會叫「後父」，佢出現時我都中七啦大佬），其實時序上早過我阿麻，但舖排上好似應講晒麻爺公婆先。實在件事有點複雜，我亦都唔係好想講。當然唔係死者嘅問題，又唔係我問題，係顧及下其他人感受。話說我老豆老母，在我阿爺死後就好似離咗婚，冇因果關係，但時間大約係咁。我老母再嫁但冇小朋友，我老豆再娶，生多咗件，所以我有個同父異母嘅妹，不過比較少提，亦唔係十分熟。但講時講，我老豆呢個再娶嘅對象，廿年前左右就死咗，自殺的，燒炭，成件事十分震憾。當時係我大學畢業後，去英國之前，我在老豆公司過下日晨（係佢返工嘅公司，唔係佢開間公司咁爽）。佢都有講另一半抑鬱症呀之類，然後事發當日我甚至係同佢一齊在公司的，不過冇同佢一齊返去破門，嗯，成件事都幾震憾，所以我都唔係好想講太多。佢嘅葬禮我有冇去？我估應該有吧？（我同死者關係並不差，反正都唔會成日見到，亦冇啲啲咩「你拆散咗我屋企」嘅憤恨，畢竟真係冇人拎支槍迫我老豆有婚外情的，對不？）

18. 第六個，我外母。同樣地，涉及其他未死嘅人不講太多。當時我已經結咗婚，當然係有去葬禮的。不過講真，結婚冇耐外母就去咗，一直都唔係太多交集，同外父就多啲。外交仲係好健康，日日炒股票，大家有心。

19. 第七八個，算唔算特別少少？第七個係恐龍，冇錯，就係叫恐龍。中學同學嘅大學同學，成班一齊玩，稱不上極之好朋友，但至少會私下傾計兩個人食飯咁。點死的？自殺。我仲記得佢在甚麼教堂定乜做後事，平日嘅夜晚，我仲要一半走咗出去同倫敦鬼定美國鬼conference call講港交所。嗰時嘅工作真係十分困身。真係搞搞下嘢在時鐘酒店 conference call又有，聽聞有人一路conference call一路被吹蕭（唔通幫人吹咩），無從證實，但唔係我。亡友好多金句，被其他朋友拎出嚟講，例如嗰句「呢啲我愛你呀會結婚呀，性行為嘅潤滑劑嚟啫，唔想講嘅咪去樓下買支KY，雖然凍啲但效果唔爭太遠」，好多人以為係佢創作，實情係我話佢，佢發揚光大的。

20. 如果我冇記錯，亡友好似細我兩年，副作用就係我在英國返嚟香港後，仲會借用佢啲大學戶口做各樣嘢，例如上呢個 data base搵工．我最記得，好似嗰時佢畢業我未搵到工，佢都有安撫我，同我講，「唔緊要，一個恐龍倒下，仲有竹萬萬隻恐龍」—講嘅係佢細佬仲讀緊大學。不過後來我冇用到恐龍二號，放心，我搵到工，佢都搵到，佢死時我都差不多離開金英了，好似2012年前後？

21. 多得電話，我都仲保留住同佢最後嘅message（當然唔知佢自殺），就係我推介完元朗嘅煲仔飯，佢覺得好正。就係咁。後來我都仲成日去，都會諗起佢，雖然我同佢冇一齊食過。

22. 最後一個，你可以話「最不重要」，但亦係性質上完全唔同。工作上嘅……前輩？唔係我本書鳴謝嗰幾個，但係嗰堆人。亦都係自殺，相當震驚。佢不算同我極熟絡（雖然我在倫敦出trip佢都打畀我有嘢搵我救火），亦唔算直接幫咗我極多嘢（咁當然都有啲）。但始終係個慈祥嘅長者，亦係業界有啲聲望嘅人。壇嘢都搞得幾大，俗啲講句，生前好友們幫佢風光大葬，算係極度榮哀？未致於好似「大時代」咁，但的確見到一啲猛人，甚至會同我講「佢都有提起你」。

23. 我記得應該係英國脫歐公投嗰年（冇錯，相入面嗰次，睇返日子正係公投之後嗰日），就係我最後一次去葬禮，就係呢位前輩。我嗰日不停心諗，到底葬禮係咩回事？係畀邊個睇（當然係畀生嘅人睇），係為咗表達大家對佢懷念？定係話畀大家知，第時你死咗大家都會咁對你？

24. 總之，都係嗰句，Always Go To Other People's Funerals — Otherwise, They Won't Come To Yours

25. 冇乜特別，都唔算寫得特別好，甚至差過我朋友，「都幾大鑊」，只係留個紀錄。另外，關於葬禮，寫過篇舊文，原來都未夠一年前。舊文就寫得幾好（https://fbook.cc/3Z0d）

26. 不過有個講法，一個人死兩次，最後一次有人提起佢地先係真正死。咁以上呢啲故人，我又幫佢地續一續命咁，個感覺好似泊車餵錶咁。以前仲有個紅色旗，十分有實感。

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

［我講嗰個西貢，而家叫胡志明市呀］假裝在越南🇻🇳。之前在投注站對面，有人話某金融KOL一提就好多人。咁即係，鍾意嘅嘢梗係讚，唔通想人執笠冇生意咩（雖然有時都會有私心驚講完啲嘢好多人去，但反覆思考下，都係唔知醜太高估自己）

＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

TLDR：原本講越南🇻🇳，變咗講《濁水標流》，同埋社會。食評？冇喎。

1. 而家搬遠咗，何福堂七仔再過。餐牌多咗嘢，有春卷有飯。之後報告。多咗個人幫手（佢阿媽？），但廣東話就麻麻地，唔似Jason 咁流利。大家講嘢唔好咁快咁複雜。

2. 又，屯門越南🇻🇳人好多都住呢頭。「之前有單情侶斬人都係」

3. 老嘢會知，我舊文都有寫（https://bityl.co/7uCf），屯門當年有好大個越南🇻🇳難民營，在虎地。而家富泰/嶺南大學個位。仲係開放營。越南🇻🇳人可以出嚟買嘢，甚至打工。

4. 我細個住兆康，細細個就接觸越南人。「就好似村上春樹在神戶海港接觸外國人咁」。舊文都寫過，越南難民，男人咪做地盤，做古惑仔好似冇乜，龍五咩（嗰時黑社會仲未老化，「人工」又還好，仲吸引到本地人，唔使搵南亞人）。

5. 女嘅？咪賣身。都市傳說「十二個蘋果」，係咪十二個唔重要，係咪蘋果都唔重要，但肯定係有呢啲勾當。呢啲冇乜需要潔癖刻意迴避的。冇乜技能嘅女人，搵錢當然係靠呢樣，有乜好奇怪？你見Florida Project都係咁，叫個細路入房就算架啦！（＊）。

6. 我並唔係要做女權自主L講到做雞點高尚點尊貴，點樣反污名化．雞咪雞咯，正如盲人係盲人 基佬係基佬，你問佢地佢哋都覺得冇問題。咩「visually impaired」之類，左膠自己感覺良好啫。我基佬聾人朋友都係自稱基佬聾人，亦唔介意人咁叫（兩個人啦，唔係又聾又基）。

7. What's in a name? That which we call a chicken by any other name would taste as sweet．正如我唔係美化吸毒或乜，但，根本就十分平常。你個世界可能冇呢啲嘢，但你個世界唔係全世界嘛。

8. 舊文提過，《過春天》茄輪都唔打個，亦係呢種潔癖。《麥路人》就仲好笑，根本呀「媽媽」下海合理之極。而我唔明呀金融才俊阿博嘅邏輯在邊，做乜去飛機場幫人出火就得（唔係正骨可以搵八萬蚊下話？邊度請人？），企街就唔得。

9. 《濁水漂流》並唔算好出色，但佢比《麥路人》好嘅係「誠實」。喂啲「街友」慶祝兄弟出冊就係醒一針。人地個世界係咁的。你見美國啲窮黑人都係咁，為乜呀？電影講到明（我覺得太明），等你走唔出呢個圈呀。唔通你「上流」咗會關心啲道友兄弟？人地就係唔想見你成功有正常生活。梗係要drag you down

10. 正如呀吳鎮宇明顯對阿木投射咗父子情（又係講得太白），阿木去吸毒佢要鬧，朋友引阿木佢都唔畀。明白係嗰種「我自己衰但唔想個仔衰」嘅心理。

11. 咁所以，佢去請阿木叫雞，根本亦係合理之極，唔通幫佢訂一年《端傳媒》？（即係咁講，或者，唔通幫佢訂一年 Ivan Li Patreon？）．我記得《華爾街》人地corrupt the youth，咪出花紅帶佢叫雞咯，睇得起你呀。

12. 喂，係咁架喎，唯一唔合理就係做乜深水埗企街有啲咁後生嘅女，仲好似係本地活雞。我就冇見過啦，導演不妨介紹下。

13. 舉一反三，《濁水漂流》入面，你見呀老爺一行人，就係去舖頭偷嘢。係咁架喎，根本平常之極。一樣，我唔係「美化」犯法或偷嘢（私有產權是資本主義的基石），但更唔係講咩「竊鉤者誅，竊國者侯」之類（雖然好大程度上係），唔係講咩「制度不公義」咁上綱上線。

14. 應該睇到呢度，好多人都不滿我呢句「喂，係咁架喎」。「個社會就係多呢啲你咁嘅仆街先搞到咁」「點解唔去改變佢」。但，喂，真係咁架喎！你當然可以或者應該去改變佢，「人人係咁唔代表你都要係咁」，正如我都冇去吸毒冇去偷嘢。但，你自己做好自己咪夠，我就至怕人指指點點其他人，「你應該點點點」，人地嘅人生，我嘅人生，關你撚事咩。

15. 我本書都未有位講，人生一大法則：唔好畀unsolicited advice，好乞人僧的。我以前都會，大個先知幾咁討厭。你點咗條好路人行，就自不然做優越青，「拿，嗰時多得我叫你入建造業訓練局咋，人工仲，哈哈哈」。你點咗條衰路人行？人地怨你一世添。

16. 係，好多人就係咁的，講過隻股票佢輸咗錢都嚟怨你啦，一定係有人拎住支搶指住你買的。呢個世界好多人，就係唔會為自己嘅決定負責任。但，喂，係咁架喎！

17. 所以，你見我核心價值都係個人主義，你咪煩我我咪煩你，大家走大家嘅路。

18. 呢個未必係《濁水漂流》嘅價值，但首先導演有講，戲入面蔡思韵嘅角色，就等於當年嘅佢。講真，呢啲中產，唔係話你不知民間疾苦，但，你點去明白人地嘅感受呢？導演本人，戲入面嘅蔡思韵，仲有我同你都係。

19. 我個人覺得戲入面拍啲大學生迎新營去露宿者度學習，又搞埋啲咩理想家園，就好有喜感。雖然我後來發現而家O Camp真係玩呢啲，好彩我早出世。而似乎導演拍呢啲唔係為咗諷刺啲大學生消費露宿者，實請畢業爭住幫地產霸權同政府出力起樓，只係我太cynic

20. 真的，適可而止，可能咁啱嗰排得閒，我睇咗好多導演嘅訪問。戲入面有一幕我好欣賞，個記者訪問吳鎮宇，問佢故事，都刻意中斷咗—呢個安排係特登的。我見唔少講法話故事無頭無尾（想點？），冇講到點解班友淪落街頭，冇講背後嘅故事。導演有話：就係特登唔講，因為佢唔想你有代入感，唔想你搵到自己嘅影子，「第時我都會係咁」，導演係寧願你用一個抽離啲嘅角度睇。

21. 食評？冇喎，等緊嘢食。但你睇我啲文為咗睇食評？

（＊）Bonus：大逆不道，但我都真係要講，希望我老母睇唔到。話說我十歲八歲時，我老母都係好撚神秘咁，有時夜晚唔見咗人，仲要特登打扮咁。咁嗰時老豆已經走佬，我雖然十歲八歲，但都知好多嘢，都心諗哪有錢？我嗰期係真係幾乎以為我老母去賣身或坐枱的（未免太高估佢？但，我十歲八歲時，我老母三十未到喎）。真係罪過罪過。真相？佢只係約咗情人啫，佢後來老公，當時都搞離婚，好合理，況且係我老豆有婚外情在先。不過呢，就真係唔好低估啲小朋友嘅「懂事能力」，我細細個已經sense到呢啲嘢，由佢會打扮已經知。亦證明我細細個就係一個好敏感嘅小朋友，都話啲單親家庭嘅小朋友好多都係咁。

＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

《黃金海岸酒店Staycation+屯門遊》

12-14/6 一家四口 #3日2夜 #黃金海岸酒店 #staycation，3歲巧兒同4個月細佬都好開心。講行程之前，要講下湊住BB+小朋友 staycation既問題同解決方法。

第一個問題係訓覺。巧兒對上一次staycation係2歲半個時，都係同一間酒店，個次佢日頭都開心既，但夜晚就一路喊住話要返屋企，應該係唔習慣生保床，結果夜晚係床要同佢玩多個幾兩個鐘，玩到佢一滴電都冇剩先訓。今次我地 #帶私家被 過黎，果然佢可以訓得好好，上床後15-20分鐘就熟睡😊

然後，帶BB出行就要解決 #奶樽清潔 既問題。用完既奶樽先用 #奶樽清潔液 洗好，再用 #私家熱水壺 沖一沖滾水，最後用 #奶樽消毒片 浸泡，都幾方便😉

仲有，要解決 #儲存母乳 既問題。呀仔唔肯埋身，而我泵奶時間同佢食奶時間未必配合到，所以泵完之後都要儲存好，等有需要時拎出黎食。酒店房個雪櫃仔連雪幾罐飲品都唔夠凍，雪唔到母乳啦！酒店都好好，我泵完奶可以call room service，有人會幫手收左盒奶放係餐廳既雪櫃。呀仔要食時，可以去返餐廳自取，或者搵人送返上房，摸過係夠凍既🥰

跟住，就紀錄下個實際行程（因為天氣/ 小朋友精神狀態/ 時間而同原定行程有唔同）

Day 1️⃣
11:30 沙嗲軒lunch
13:00 午睡
16:00 鯊魚冒險島
- 呢個playroom要收費，住客$70一個session，設施同大少少既康民署室內運動室差唔多，唔係好值，玩左一次就夠
17:00 黃金泳灘
- 三歲小朋友堆下沙已經夠開心，可以玩30分鐘以上。上年游水一直都有同佢著游水片，依家戒左日頭片片，所以都順理成章連游水片都唔駛著喇！
18:00 越不同dinner
- 西式、越式食物都有，好多選擇，但西式食物質素比較出色
19:30 返酒店房沖涼訓覺

Day 2️⃣
07:00 酒店自助早餐
08:30 屯門公園
- 之前同巧兒去過一次屯門公園，超級好玩，設施好多元化，但個次係下午4-5點去，太多小朋友，仲有啲小朋友橫衝直撞，今次晨早去就非常好，成個公園應該唔多過5個家庭
10:00 爬蟲館
11:00 屯門公共圖書館
12:00 Bamboo Thai食lunch
- 基本上行去屯門市廣場就有好多餐廳選擇
14:00 返酒店午睡
17:00 酒店泳池游水
19:00 金功夫點心小廚食dinner
- 小菜基本上樣樣都幾好味，巧兒最鐘意脆豆腐，我最鐘意黃金蝦球，老公鐘意雜菜煲夠多菜
20:00 返酒店浸浴缸

Day 3️⃣
07:00 酒店自助早餐
08:30 黃金泳灘
- 玩沙、游水
10:30 旅程結束

巧兒成個trip都玩玩玩，好開心，三歲真係識玩喇！要再發掘下一個 #親子好去處 喇！

————————————————

💡好文回顧💡

《坐月日與夜》
https://www.facebook.com/100043347206086/posts/369586301162940/?d=n
《產後48小時》
https://www.facebook.com/111805923718473/posts/274199974145733/?d=n
《疫情下聯合醫院生產記》
https://www.facebook.com/111805923718473/posts/259721718926892/?d=n
《巧生活 — 戒片片》
https://www.facebook.com/111805923718473/posts/192615865637478/?d=n
《巧生活—戒奶咀》bit.ly/byebyedummy
《巧巧成長—Trouble 2 變Lovely 2》bit.ly/trouble2lovely2
《巧巧成長—教出充滿安全感的孩子》bit.ly/nurturesecurity