【龔成問答信箱】（Q20141-Q20160）

Q20141：

老師，現時全球不斷印銀紙，股市應該長期向上，是否就不會有股災出現？

龔成老師：

1971年開始無再用金本位的貨幣制度，即是由1971年開始，我地已經不斷印銀紙，這段時間，資產價格大增。

但久不久，都會大跌，1973年港股跌9成，1987年股災，1997年金融風暴跌7成，2001年科網爆左跌6成，2008年金融海嘯跌7成。

無人知幾時發生，但歷史不斷發生。

真正的股災，是在你想都想不到的情況出現。
大家想到的股災，就絕對不是股災。

------------------------------------------------

Q20142：

龔sir 您好! 我終於完成了你的網上課程大富翁18課，所以趁機會整理一下自己的財務狀況，再請教您的意見! 多謝您常常耐心解答讀者的問題，而且您每天都向我們灌輸正面及積極的思維，實在令我獲益良多! 謝謝您!

內容可能有點長，首先多謝您耐心閱讀！
以下是我現時的狀況:

3X歲
每月收入：45K
每月支出：15K
每月供緊危疾及醫保：$700
每月可儲淨現金：30k
現金: 90萬
儲蓄保險: 20萬
現時股票大約70萬(詳情如下)：

水桶1(約34.8%):

吉利汽車（0175）， 1000股，平均價24.2，持倉佔比5.0%
中國鐵塔（0788）， 2000股，平均價1.9，持倉佔比0.5%
阿里巴巴（9988）， 1000股，平均價208.7，持倉佔比28.3%
中國生物製藥(1177) ， 1000股，平均價7.5 ，持倉佔比1.0%

水桶2(約51.4%):

盈富基金（2800）， 3000股，平均價25.5，持倉佔比8.7%
南方A50 (2822) ， 400股，平均價20，持倉佔比0.5%
安碩恒生科技 (3067) ， 200股，平均價16.5，持倉佔比0.4%
中國人壽（2628）， 1000股，平均價20.9，持倉佔比2.9%
中電控股（0002）， 500股，平均價88，持倉佔比6.0%
中銀香港（2388）， 500股，平均價32 ，持倉佔比2.2%
太興集團（6811）， 4000股，平均價3 ，持倉佔比1.6%
友邦（1299）， 600股，平均價69.4 ，持倉佔比5.7%
港鐵 （66）， 2000股，平均價38，持倉佔比10.3%
恒基地產 (12) ，2000股，平均價30，持倉佔比8.2%
香港交易所 (388) ，100股，平均價360，持倉佔比4.9%

水桶3(約13.7%):

工行（1398）， 4000股，平均價4.6，持倉佔比2.5%
建行（0939）， 10000股，平均價6 ，持倉佔比8.2%
匯賢（87001）， 7000股，平均價3 ，持倉佔比3.0%

問題１：我知道持有以上18隻股票是過多，請問我應該怎樣取捨，以達至持倉5至10隻股票 ? 我未能多花時間留意每隻股票的狀況，所以希望只持有一些可以不用太理會的股票。

問題2: 如果重組股票組合，應該在甚麼時機賣出部分股票?

問題3: 以我的年齡、淺薄的投資知識及短缺的時間，我應該怎樣分配股票(水桶1-3)的比例?

問題4: 我平常買賣股票都是設定價位，並不會即市操作。請問以這樣類似月供，但每月手動的方式，是否適合? 但有時會買不到或賣不出? 抑或我應不理價格，定期定量買入? 還是等低位才大手買入?

問題5: 我和先生有一自住樓，但小朋友即將出生，長遠再購入一大單位的話，居住環境會較舒適，當然支出會相應大增。

但很矛盾的是現時並沒有時間及精力去處理買樓事宜，卻又擔心年齡愈大按揭愈難，將來樓價也會愈來愈難負擔，所以仍有點猶豫不決。您對此有甚麼意見? 這可能要用盡我現有的資金。

多謝龔sir的耐心解答，期待你的答覆～祝願身體健康! 平平安安! 事業更上一層樓!

龔成老師：

1）你的分配大致可以。你整個組合，有防守性產品，同時有股票這類進攻產品，基本上無問題。

中國鐵塔（0788）增長力略減左，暫時水桶1-2。3067是水桶1。中電（0002）是水桶2-3。

以一個$100萬以上的組合，大約可持有10-15隻，因此，你又唔算好散，只是適當的整合就得。

中國人壽（2628）、太興集團（6811）不宜加注，原有貨持有就得。

2）如果你3X歲，水桶3未必需要持有，這幾隻水桶3股都可以賣出。除非你本身較保守，就可以考慮持有。

3）水桶1可25%，水桶2可75%。到你有至多的知識，可以將水桶1加至40%左右。當然，都要考慮你的風險承受程度。

至於水桶3，0-20%。

4）如果你未有掌握大市買賣時機，以及未有企業估值的概念，你用自行分注的模式，可以的，總之將一注資金分開多注，慢慢買入就得，將買入價平均。

同時，當見到大跌市時，就可以加注。這是最平衡的做法。

5）不要太強行去換樓，自己的負擔能力是最大的考慮因素，如果這方面未得，就儲更多資金先，利用儲蓄及投資滾大，到有一定的數量後，你已經感到無太大壓力，到時先換樓。

------------------------------------------------

Q20143：

想問如果有10萬元本金，怎樣可每個月有1千至2千收入？

龔成老師：

$10萬要平均一個月收$1500，即是一年$18000，回報率18%，這是一個很高的回求回報率！

你預背後要承受一定的風險，才可爭取到這個回報。

我建議你用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

如果你這刻好想用$10萬收息，不是不可，但預一般的工具，一年收息約$5000。

------------------------------------------------

Q20144：

阿sir 你好，想問問如果一啲未有盈利既公司，應該點計佢既合理價？用咩估值法比較好？同埋又點分析呢？例如宜家美國果啲科技公司，好多都無盈利，但又升到天花板咁高

另外，S&P500 個合理價可唔可以用你教既PE去計？

龔成老師：

每類公司都有不同的估值方法，有些公司可以同時用多種方法。

如果無盈利，可以用預測的盈利作計算，考慮一個佢已經建立好完整的生意，到時的盈利多少。然後就用行業的市盈率做推算。

至於S&P500，你可以睇翻佢過往的市盈率水平，然後大致將佢分區，以過往去推算平貴度。

------------------------------------------------

Q20145：

你好！想請問1971買唔買得過？

我用物管同業平均PE計到佢值8.18，唔知咁計啱唔啱？((59,061,000×1.1977×1.6)÷415,000,000)×30= 8.18

條式係 （(19年度股東應佔溢利 乘 人民幣兌港元 乘 盈喜公佈每股盈利增長百分比) 除 已發行總股本）乘 同業平均下限PE
係pe嘅公式

龔成老師：

你的計算方法，方向不是錯，但會出現了一些誤差。

最大的問題是最後X30，這是同業平均下限PE，但你要好清楚當中的「可比較性」。

中國物管行業，你會見有些企業市盈率好高，當中有8一個重要因素，就是有強大的母公司支持，市場預期母公司不斷發展物業，但的生意就能持續增長，因此值一個高市盈率。

但如果這因素不足，就不能用一個太高的市盈率去作計算基礎。

弘陽服務（1971）質素是有的，但未算好強。

佢主要係中國從事提供物業管理服務，包括安保、清潔、綠化及園藝、設施管理、維修及保養服務。

睇翻佢資料，佢總合同建築面積達2700萬平方米，其中在管總建築面積達1600萬平方米，在管項目主要分布於南京市及江蘇省，佢的在管物業主要為弘陽地產（1996）所開發的項目。

由於1996本身規模唔算好大，因此，都唔能夠弘陽服務的增長力好強。

所以，你在計算是估高了這公司。

------------------------------------------------

Q20146：

老師呀，咁想問有冇啲乜嘢高增長類嘅優質股推介

龔成老師：

坦白講，現時大部分潛力股都升左，這刻買入反而有風險。

安碩恒生科技（3067）是勉強可考慮的，這ETF可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20147：

成哥 好想請問下如果買樓 紅磡 深水埗 元朗 屯門 東沖 邊度好

龔成老師：

如果以投資價值來計，紅磡會較好。當進行長期樓市分析時，地點佔了好大因素，因此市區、交通較方便的地方，質素始終較高。

加上區份長遠可供應的數不算多，因此紅磡會較好。

------------------------------------------------

Q20148：

龔sir 我想問下如果儲到一筆首期 應該買樓或是投資股票較合適呢？
樓是自主住的

龔成老師：

如果你有實際的自住需要，而現時你首期足，供樓方面無問題，其實已經可以開始睇樓，選對就買。

但如果你資金好勉強，就唔建議太急，不如投資股票，將資金滾存更多，遲D先買。最好是你買樓後，仍有一定的資金剩。

比起分析樓市升跌，你本身的供樓能力更加重要。

香港樓市，中短期有可能向下（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

------------------------------------------------

Q20149：

龔sir 你好，現時有10 手9988, 均價275, 請問是否可溝貨？

快手298 買入，是否可以再加持？
thanks a lot

龔成老師：

阿里（9988）將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

又以佢的螞蟻貸款業務來講，這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同意一些監管方法，以及找到合理的賺錢模式，你預阿里現價約在合理區頂部，這股可長線。不過，中短期會波動。

如果有貨，可持有，但就唔需要太急加注，最近由貴去翻合理區頂部，但由於你已有貨，因此，唔建議加注太急。

至於快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。

現價雖然無之前咁貴，但仍略貴，但短期股仍會十分波動，如果想入貨加注，這刻唔建議。

------------------------------------------------

Q20150：

老師，好多謝你每日抽咁多時間解答咁多人既問題，唔只係投資上的問題，更多更重要係人生上的疑難。
有個職業交叉點好想問問老師的意見～

今年27歲，一直都做同一間公司。兩年前開始在公司做得唔開心，但好處係可以準時收工，同事關係亦很好。

正因為可準時收工，因此有時間在1年前發展副業做花藝。花藝方面每月大約有$10000或以上的收入，同時亦有意計劃今年生育。

原本計劃在現有公司做到生完小朋友（預算大約明年年頭），可以享受產假之餘，同時可以過到壓力測驗買樓。

但每天都抱住好想辭職和唔太開心既心態工作好辛苦，就你意思，你會建議一直忍住到原本計劃的時間才辭職/ 現在放心一搏全職做花藝呢？

補充少少 未辭職的另一原因是一直struggle 花藝會否是長遠的職業好選擇，因為之前老師有提及過手工藝未必是長遠發展的好選擇，會比較困身，難做成提及被動收入的行業。

多謝你既意思呀老師！

龔成老師：

如果你準備買樓，就最好等完成買樓過程先，當然這段工作時間你要調整心態，唔好太過負面，否則你好辛苦。

完成在買樓動作，過左按揭後，就可以辭職。

如果你現時單利用副業模式，花藝方面都有$1萬收入，我相信是有發展的，所以你之後可以全力去試，雖然手工藝未必能做到好大，但我相信是你的興趣，你可以試左先，之後再睇下點樣搞大佢。

------------------------------------------------

Q20151：

龔Sir你好，本人31歲，開始買股票大約已經過一年有多了，但我仍然會說我仲係新手。

月薪約$18,000，水電煤租家用每月支出$7,000，學費每月$2,000

以下是我持有的股票

阿里巴巴（9988） 200股@188.87
中海油（883） 2000股@6.95

以下是我持有的月供股票
每個月月供$7,000
（2）（5）（2800）各$2,000
（6823）$1,000

中電（2） 330股@77.44
匯豐（5） 798股@40.42
盈富（2800） 880股@26.49
香港電訊（6823） 1461股@11.24

我有幾條問題想請教下龔Sir

1. 我另外有很少的蟹貨，是（928）和（3313）各一手，請問我應該點處理他們 ?

2. 我目標係想5年內有一百萬港元或以上，請問咁樣會否太貪心 ?

3. 因為我認為我缺乏現金買股票，所以有諗過賣曬（9988）可以多D現金買其他股票。
如果我現在賣曬（9988）咁樣做會唔會係錯誤的決定 ?

4. 現在暫時有現金5萬，想買D倍升股又唔知擇邊D股，請問有冇好介紹? 令我更快有更多錢 ?

5. 另外想請問我的月供股票需要換組合嗎 ? 定係繼續咁樣ge組合供 ?

麻煩你！

龔成老師︰

1） 雅高控股（3313）和蓮和醫療（0928）無投資價值，建議沽出。

另外，中海油（0883）質素只算中等，不宜持有太多。所以，此股唔好再加注了。

2） 我地一般係希望組合可以做到一個合理增長，講緊係每年10-15%左右，如果你要5年內做到100萬，就要將月供加大至約$12000，會較為適當。

3） 價質架股票，長線會自行增值，所以只要有質素，我地就應該長線持有。阿里巴巴（9988）係優質潛力股，你長線持有會最理想。

4） 現時大市只在合理區，你5萬蚊先儲起，等大跌市才用。

5） 要，因為你組合相對你年紀，係太保守。匯控（0005）、香港電訊（6823）和中電（0002）增長力唔高，主要係收下息。

你月供組合，應該以增長股為主，以下都係合適選擇。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

現時大市只在合理區，每月儲蓄唔好盡用。最好留有部份，等大跌市出現時，可以用來掃貨。

------------------------------------------------

Q20152：

hello 龔SIR, 想麻煩你幫我做個案分析
本人40歲, 現在無持有任何股票,無物業, 租住私樓,未婚

銀行現金: 50萬
保險月供: $5000 （供到55歲）
每月儲蓄: $3000-5000

1. 現金50萬中應該用多少出來投資? 哪隻股票較好?

2. 每月應該用多少去月供股票? 哪隻股票較好?

3. 在疫情下很多行業都做唔住, 但股票卻不斷升, 是正常現象嗎? 大市仍有上升空間嗎?謝謝

龔成老師︰

1） 現時大市合理區，而新經濟股就有少少貴，50萬可先動用一半，以分注形式，慢慢咁入貨。餘下就等大跌市機會，才出手。

以下股票都適合你，當中"平穏增長股"應佔較大比重。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

另外，"保險"其實只係理財中防守性部份，買足夠保障就可以，增值應留比優質資產（如優質股、物業等）去做。你可以睇下，有無需要調整。

2） 你每月應先用5成儲蓄，去做月供，其餘先儲起，用一邊月供一邊儲蓄的策略。餘下一半，同樣等大跌市時機。

3） 短期股票走勢，可以完全跟基本面無關係。但長線，只要一隻股票有質素，佢真正價值自然會在股價中反映出來。

現時大市在合理水平，中短線會升定跌，我估唔到。但現水平，唔算係貴，長遠仍有一定上升空間。

------------------------------------------------

Q20153：

你好龔成老師，我41歲單親帶住個仔仔，想請教你我的財務組合ok ma?因為著前途苦惱中，想令財富增加令生活穩定

以下是手持股票平均價如下:

3988-31000股$3.7
0011-1000股$196
2800-500股$29.4
6823-33000股$10.5
0003-16000股$11.4
0778-4000股$7.2
1686-4000股$7.25
6088-3000股$3.7
1772-200股$137

我差不多全是收息股，3988，0011是18年尾買（蟹貨），其他都係近期買，但股價都向下走，
於是就入左6088和1772，你可以分析一下我的組合有問題嘛？

6088和1772值得長線持有嘛？
先謝謝你花時間了解及分析，候覆

龔成老師︰

你組合比較偏重係收息股，以你年紀，應該先做好財富增值。當累積了相當財富後，才漸漸轉成收息型股票，為自已創造穏定現金流。

你現時應將部份收息股（3988, 0011, 6823, 0778），換碼至一些"平穏增長股" 和 "潛力股"，並以"平穏增長股"為主。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、粵海（0270）

潛力股︰小米（1810）、中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

你現有持股中，贛鋒鋰業（1772）上市時間唔算長，這類企業數據較少，好難分析。

只見佢的盈利略有波動，業務上有點潛力，但不宜持有太多。

FIT HON TENG（6088）質素中等，雖然都有投資價值，但企業不是最高質之列。

不過，這股始終不是無質素，暫時可以守住，但在有較大反彈時，可以賣出部分，餘下再守。

------------------------------------------------

Q20154：

龔成， 睇左你Facebook 都年幾， 我想問手持嘉華國際， 平均價3.7 ， 應該點部署

龔成老師︰

嘉華國際（0173）算是香港的中型地產商，都有投資的價值。

如果睇翻佢的財務數據，雖然收入有點波動，但地產企業常有這情況，特別是中型一類，有時會令股價較為波動。

整體來說，都有質素的，但又未去到好強。你預佢只能平穩增長，潛力唔算好大，長線持有係可以，但不宜持有太大比重。

------------------------------------------------

Q20155：

龔老師你好，先講我下嘅生活背景，我47歲，從事陪月工作6年，薪金大概每月$25000左右

之前跟人炒倫敦金結果信錯人蝕$10萬，我一年前留意你的FB和買了你四本著作，獲益良多

開始明白資產配置好緊要，如何買入優質股永久持有便是資產，你提供的比亞迪我賺了6位數

十分滿足和開心，感謝你無私分享，你真係我們投資路上的明燈，非常欣賞平時好多正能量知識為我們加油打氣

每月家用+交通費+雜費支出$12000，去年買一個每月供$3300左右的年金，10年供完

我和女兒2018年各供20年的危疾+意外+住院醫療保險各$70萬保額的供款，每月供$4000左右

每月供領展$1500；盈富$2000；港鐵$1500，比亞迪就$120便停供，在$262買出一手，現時還有少部份打算長線持有

華夏恒生1手，（請問安碩和華夏邊隻好些？幾錢先平？打算分注入）
中生製藥2手
現金$20萬，住公屋
每月可儲$3000-5000

請問我的資產配置健康平衡嗎嗎？
如果我實現人生的第一個100萬，如何可以做到？

我是一個讀書唔多，對數字唔敏感和沒有記性的人，我其實好想報讀你提供課程，但我擔心自己讀唔到

我非常明白老師是非常繁忙，你時間許可先覆我

龔成老師︰

好多謝你架支持!

安碩恒生科技（3067）相對華夏恒生科技（3088）費用成本會較低，長線計會較好。但你要留意，由於幾隻恒生科技ETF都係初上市，追蹤誤差只能作參考。實際誤差未必一樣，你要知道這個風險。

你現時資產配置上，都可以。由於大市只在合理區，每月儲蓄唔好盡用。要留有部份，等大跌市機。

以你人生階段計，投資上要保守少少。中生（1177）、比亞迪（1211）、安碩恒生科技（3067）這類潛力股，不宜佔組合太大比重。未來重心，係應該放係"平穏增長股"上。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、粵海（0270）

20萬現金，扣除大約半年開支的應急錢後，現時可以先將小部份入市。餘下的同樣等大市有明顯回調，才出手。

至於課程方面，其實適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資時機、配置、評估平貴，在投資上已掌握了一定的知識。

另外，你上課之前，多睇理財、股票類的書，留意一下財經新聞，到時就較易跟到。

------------------------------------------------

Q20156：

Hello 龔Sir

1. 我宜家開始月供港鐵500同港交所500，請問咁嘅組合有冇問題？

2. 同埋我有一手陽光房地產3.9入，係咪應該放住先？

3. 我想買嘅股票都未去到合理價，但又好驚錯過咗個價就買唔返，應該點做？

4. 我最近留意到9992同埋2633，老師點睇？
麻煩晒你呀！

龔成老師︰

1） 如果你係年青至中年人士，這組合係可以。

2） 陽光房地產（0435）主要係收息，若你較年輕，這類股票不宜持有太多。只是一手的話，可持有。

3） 如果唔係貴得太緊要，你可以先入一小注，去平衡入唔倒貨架風險，或者用月供去儲貨都可以。

4） Pop Mart泡泡瑪特（9992）是一家覆蓋潮流玩具全產業鏈的一體化平台，當中包括藝術家發掘、IP運營、消費者觸達及潮流玩具文化的推廣。

根據弗若斯特沙利文報告，分別以2019年的零售價值（市場份額為8.5%）及2017年至2019年的收益增長計，集團是中國最大且增長最快的潮流玩具公司。

合作伙伴中不乏知名品牌，好似迪士尼、HELLO KITTY等等。而產品中，最為人所認識就是"盲盒"，此銷售模式為集團貢獻不少。

雖然中央規管會有負面影響，但長線質素和發展前景依然係度。2019年純利為4.5億，但現時市值超過1000億。在這個水平投資，風險絕對唔細。就算想投資都要控制好注碼。

雅各臣科研製藥（2633）在香港從事非專利藥及中成藥的開發、生產、市場推廣及銷售。

見佢生意都穏定，但增長和賺錢能力只算係中等，都有投資價值。現價計，算是合理區，可分注入貨。

------------------------------------------------

Q20157：

請問老師152及590 及1928的合理區中下部係幾錢呀？值得投資嗎？

想收息加平穩增值

龔成老師︰

這3隻股票，都有長線投資價值。以現價計算，都已在合理區中下部範圍。

但3者所屬行業不同，深圳國際（0152）主要從事收費公路的開發、營運及管理；物流中心及綜合物流港的建設、營運及管理等業務，發展會較穏定。

金沙（1928）係澳門博彩業，六福（0590）係零售業，你預佢地中短期都會較弱，但長線持有係無問題。

------------------------------------------------

Q20158：

龔sir你好，你的讀者
想問以下股可入手的合理區
0001
9988
1972
1928
0027
1810
0388

龔成老師︰

港交所（0388）和小米價1810）現價略貴，要回較多才算合理區。現時月供較好。

其餘幾隻，都在合理水平，可以分注咁慢慢入貨。

但留意阿里巴巴（9988）只在合理區頂部，未算話平，入貨時要控制注碼。

上述都是有質素的股票，只是平貴度的問題。

------------------------------------------------

Q20159：

早晨你好 ,最近想搵一啲可以中長線投資既股票， 2013 同285 現價可考慮嗎？ 或者有咩係適合加入
大約會投放資金係10萬左右。

另外手上持有 1789, 應否繼續持有🙏🏿
謝謝你

龔成老師︰

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

長遠業務上係有一定潛力，但盈利和股價上佢都幾波動。此股可投資，但只宜小注。

比亞迪電子（0285）質素不差的，有潛力。睇佢過往發展都正面，有技術，而前景都唔錯。

考慮到近期的增長，$30左右算係佢合理區頂部，現價己經略貴。

愛康醫療（1789）算是不差，從財務數據睇，佢的賺錢能力不錯，生意有理想增長，盈利增長快速，股本回報率高。

但上市年期不算太長，這點令過往的數據，未知能否反映佢的真實情況。

此股現價係貴，如果你持貨唔多，現貨可持有。現回到較合理水平，要回較多先算。

------------------------------------------------

Q20160：

早晨，想請教一下你意見

之前跟人買入3313，0.8入，已經蝕到入肉，應該有得佢放喺度，定係走晒佢算數？
仲有冇機會上返去？

龔成老師︰

雅高控股（3313）主要從事大理石開採、加工、貿易、銷售、商品貿易及貨運、倉儲和物流業務。

公司市值不高，盈利十分波動，質素不佳。企業不斷虧損，無乜投資價值，賣出這股較好。

其實如果你有上過我股票班，一定會發現此股無投資價值。其實投資股票就會買企業，你要好好研究佢質素和前景，確定是有質素才作投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13601-Q13620）

Q13601：

龔sir 想同你講d打氣說話 ，見你之前出左條片「25歲月入$7萬的理財方案」，引起好大迴響，有人更話你作故仔，我想講，我正正就係2年前問過你問題個位25歲月入7萬既人！

2年前見你將我既個案拍成video同大家分享其實令我好驚喜，因為自己係高收入專業人士，眼見身邊差唔多年紀既人都冇咩投資理財知識，我都好希望我既個案分享可以幫到其他人。

其實2年前你post呢個video 既時候已經見到d人既comment 係focus 係打咩工可以月入7萬，估唔到今次你再post既時候會引起咁大迴響！

不過，我想講既係你幫左我好多，好多人以為收入高就等於理財能力好好，但係我真係完全唔識，睇左你既書完全改變左我投資理財既思維。

令我開始月供股票，上埋你既堂更加令我既投資選股知識大大進步。

雖然依家個市場比較波動，坦白講賬面上呢刻我係蝕左少少錢，不過我深信你所講既投資優質股基本上係穩賺，只係時間既問題！

所以龔sir你唔需要失望同氣餒，你的確係幫緊好多人，有智慧既讀者亦會明白凡事有可能發生。我好期待你既進階班！！

龔成老師：

放心，其實好小事，我無事的。

我都有少少印象，過往都出過這片，而我有D片，過幾年會再出多次，希望對網友有知識上的提升。

兩年前出的時候，好似無今次咁多人嘩嘩聲，可能之前我個FB人數只是幾萬，去到而家有12萬，當你搞得大時，就會好多無聊人，無計。

總之放心，我係一個比較我行我素的人，唔太理會別人的說話，所以從來唔會將D惡意攻擊放上心，我永遠只求做好自己，唔太理別人。

反而，如果網友有對條片主角作批評時，希望你唔好介意就得。

其實香港地，25歲月入$7萬雖然有點高，但並不是無可能，所以我對佢地話我作故仔，的確有D震驚，因為我同你都會認為，呢個數唔係無可能的，而我自己收到的個案及朋友，呢D並唔係誇張事。

不過算啦，如果佢本人個世果觀好細，就自然接受唔到一D勁過佢的人，呢D人真係好難幫到佢。如果我地要進步，就要有心空，要多向勁人學習。

另外，其實好多高收入人士，都唔太識理財，有睇過《富爸爸，窮爸爸》就明，作者個窮爸爸，就是典型高收入人士，但就個個月都無錢剩。

大家加油啦，理財係長期戰，保持儲蓄、投資、知識進取，我希望4月前後進階班出到街，到時見！

------------------------------------------------

Q13602：

老師，雖然我未上你堂，但我想答謝你，解答我咁多問題！想直接入錢俾你龔成做支持。係我1番心意心，可以俾account我嗎？

龔成老師：

先多謝你的心意。
但我建議你買幾本我的書，送給朋友及有需要的人，這樣已是對我的一種鼓勵，同時，我相信這樣會對社會有更大的貢獻。

你現時保持知識的提升，希望日後可以在課堂中見到你！

------------------------------------------------

Q13603：

朋友做開港幣定期，非常滿意息率有2厘5多，一講股票就話蝕左係咪我賠，如何說服距月供股票？

龔成老師：

佢要明白，我地不是炒股，而是進行財富分配。

現金只會不斷貶值，而現金真相只是「政府借據」，長期一定要持有真財富，如物業、股票。

以過往幾十年計，物業升值幾十倍，恆生指數升值幾十倍！根本長期持有優質資產，是穩賺！

所以，你要教佢「儲優質股」的概念，如不懂，就投資盈富（2800）。記住，是儲，買入後長期持有，甚至不賣出。

------------------------------------------------

Q13604：

老師你好，我是澳門居民，自從聽了你的意見 我每月都有在中銀月供2800 ，近排我看它有排股息，想問一下股息是甚麼時候派發？

而且發在那裏，還有一些賣出股票程序都不太了解。期待你的解答，謝謝～

龔成老師：

你可以睇翻一般的財經網站，都會公佈每隻股票派息的資料，以盈富（2800）來說，最近一次派息為0.78，除淨日在2019年10月31日，這個日子用來界定，那個股東有息收，那個無。即是你在10月30日收市，睇下你持有多少股，如1000股，你就得到$780股息。

佢的派送日為2019年11月29日，即是這天，你就會收到錢。

你可以睇翻你證券戶口的結算戶，佢應該會自助入落去的，澳門可能會遲少少。

但由於佢每次派息都要收手續費，若然股息太少，有可能無錢收到。

------------------------------------------------

Q13605：

龔老師，買6033和548收息好唔好？有8%息

龔成老師：

電訊數碼控股（6033）業務算是不差，佢生意都算穩定，但有時都會出現生意下跌的情況，由於這股增長不強。

但見佢過往派息穩定，作為收息股可以，的確有8%，但見佢最近業績，生意額略有下跌，這都會有少少風險。但我相信不太大注就得，這股可以長期收息的。

至於深圳高速公路（0548），現時股息率有成7%、8%，但下年有機會減少少，因為佢這年有特別股息，而下一年度未必會有。

這股視為收息股，可以。

------------------------------------------------

Q13606：

你好，我有本金5萬
每月能儲蓄5千

想5年後有50萬
應該點做好？

龔成老師：

現時的本金$5萬，暫時唔需要心急動用，因為現時大市只處合理價，未算平，你有些資金等機會較好。

而每月的$5000，則可以用作投資，你可以做月供股票，又或自行分注投資。你可以考慮盈富（2800）、恆基（0012）、銀娛（0027）、港交所（0388）等，這些都是優質，可投資的股。

如果你保持每月月供$5000，5年本金有$30萬，加上原有的$10萬，要滾存到$50萬是合理的，你只需要「儲優質股」就得。

------------------------------------------------

Q13607：

龔成老師你好：我是由太太介紹看你Facebook的，本人現在想把$50,000先試試投資。

想請問你介紹的778和66號股票，如中線投資應該選擇那一隻好？（本人亦想在將來慢慢增持其中一隻股票）謝謝老師指導。

還有一件事想請教，看到你的分享之後，亦想知道如果將來買了股票作中線投資時候派息是應該要他們的現金還是要他們的碎股呢？謝謝。

龔成老師：

首先，我地投資，只會選優質股，而你上述的兩股，都是優質股，所以可投資，另外，我地會考慮平貴因素，以及適合你與否。

如果你想收息，就投資置富（0778）（但增長力就不算強），如果想平穩增值，就投資港鐵（0066），而我地投資一定會長線的。所以，要睇你的投資目標。

至於收息時，要股還要息（首先，不是所有股票都有提供以股代息），部分先有。

以股代息就是你收息時，唔要現金，要股票。

第一，你一定要長線投資的，因為佢會派碎股比你，所以你最好以不斷儲股，每次都收息的模式進行。如果你不怕有碎股，基本上可以進行的。

第二，只有優質股才可進行。上述股可以的。

第三，換股價合理，上述股現價合理，可以進行。

------------------------------------------------

Q13608：

老師，如果做長線投資，係經濟差時就入多點。

如果到經濟好時，到目標就可以放？

龔成老師：

你所講的方向正確，其實我地買股票就是買企業，當企業在經濟差時，的確會賺少左，但就不會倒閉，如果是無質素的企業，就會出現倒閉。

當我地分析企業價值時，會以長期作計算，所以長期經濟的好壞我地都會考慮，而經濟差時，股價則會大幅向下，但只要企業質素無變，這就是很好的投資時機。

相反，到經濟好時，股價會大升，到時可考慮賣出，但如果是很優質的股，就不要輕易賣出，到時可能只賣出一部分。同時，到時不能單分析經濟，同時要分析大市冷熱，以及計算估值，現時處平貴。

------------------------------------------------

Q13609：

你好
想問關於1337 雷蛇前景?

龔成老師：

雷蛇（1337）我會用「有潛力，但有風險，不確定性大」

佢本質好波動，佢到而家仍處於虧損狀態，但公司市值已有$100億，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。因此，這股有前景，但風險好大，無人知真正的價值，如你真的要投資這股，只能小小注。

------------------------------------------------

Q13610：

阿sir，我是你澳門學生，我正在分析金界控股(3918)。

我用你給我們的評估表格作分析，在分析資產負債表中，"現金"是只否指 "現金及銀行結存" ?另外，利息成本可在哪裡找到?謝謝

龔成老師：

現金，即是「綜合財務狀況表」裡現金及銀行結存數目。

至於利息，就是在「綜合損益表」，有關利息及融資成本的部分。

------------------------------------------------

Q13611：

老師你好，請問您覺得546阜豐集團有無質素呢？家人買咗，持有一年。佢算係收息股嘛？

龔成老師：

阜豐集團（0546）主要從事製造和銷售玉米生化產品，氨基酸、黃原膠等。產品有一定的市場，但增長力就不強，同時盈利較為波動，其中一個原因是受成本影響。

企業質素不過不失，賺錢能力唔算好強，但現價就不貴，收息都可以考慮，不過股息不一定穩定。只要投資金額不太大注就無問題。

------------------------------------------------

Q13612：

你好 龔成。請問下你點睇175 吉利氣車？
最近見佢呢1 2個星期每日都行使購股權發行股份，有d奇怪
Thanks!!

龔成老師：

好多企業都有這類的行為，正常的，唔需要太擔心。

除非佔比太多，才會明顯地攤簿原有股東每一股的權益。你可以找翻企業上年度的總發行股數，以及現時的總股數比較，就知會否有問題。

------------------------------------------------

Q13613：

成哥，你好。上完股票班後，我嘗試用上堂學嘅知識評估手上持有嘅股票同做估值。

當我在為2382 舜宇光學做估值時，我發現很難找到同行市盈率，因為只有高偉電子都係生產鏡頭。

而舜宇嘅最大競爭對手係大立光電，係一間係台灣上市嘅公司。

所以想問下點樣先揾到同行市盈率 及 可以用大立光嘅市盈率作參考嗎？

龔成老師：

你的確可以用其他國家的上市公司，作出比較，只要是與鏡頭有關的，都可以。如果有較多數據，可比較性就會較高。

除非該股市處於一個封閉市場，否則，當地的企業，都有參考的價值。

除了自己同行外，我地亦會同利用該企業過往的數據作比較。

------------------------------------------------

Q13614：

我都打算買一點佐丹奴和必瘦站作為持有3-5年既投資，一邊收息。

必瘦站又係咪好股呢？另外你覺得現價供恆地作為組合裡3成，你認為他前景好嗎？

龔成老師：

佐丹奴國際（0709）及必瘦站（1830）都是有質素的股票，有投資價值，都是可長線持有，不差的收息股。不過，中短期一定會受香港情況影響，因此中短期股價會較波動。

恆地（0012）佔20%-25%較好，雖然這是綜合企業，但都不建議佔比過多，我相信有前景的。

------------------------------------------------

Q13615：

老師 我係投資小學雞 睇左你既貼文開始管理自己既資產。

現在每月月供9000，投資組合如下：
2800 $2000
5 $1000
66 $1000
1211 $1000
2778 $1000
3 $1000
823 $2000

匯豊仲值唔值得月供？見佢業績唔算好，想搵另一隻取代佢。中銀香港定係銀娛好？

維他奶 幾時先算平價？
謝謝

龔成老師：

你上述所供的，都是有質素的股票，可以進行月供，長線投資，不過就有少少散，這會令你每一隻供的金額較少。不過，如果你會長期進行月供，例如5年，這就無乜問題。

至於匯豐（0005）這都是有質素的，不過，增長力不強，你預這只是收息股，唔好對股價有太大的期望，你要問翻自己的投資目標，單收息是否適合？如果想轉另一隻，中銀香港（2388）的確是可考慮的。

維他奶（0345），這股有質素，但現價略貴，如果要去到平，你預起碼要跌多3成以上。

------------------------------------------------

Q13616：

成哥，請問你，年報的現金流量表（年未之現金及現金等值）是否意思該企業由上市至現今年報前前后后入左幾多總現金流比該企業

在1177企業的2018年報看到不明白所以請求成哥解答，謝謝

成哥，請問你會唔會一對一幫學生補習（補有關年報及估值），請問你方便嗎？謝謝

龔成老師：

年末現金，即是結算日的現金總數目，你都可以話由企業上市現金數，加上每年的淨現金流入數。

其實我地唔會咁樣去分析現金流量表，反映你集中睇近幾年的情況，特別是經營活動部分。

至於一對一補習，抱歉，這個暫時未有提供。最多只是上堂當面問我。

------------------------------------------------

Q13617：

成哥你好！已拜讀了您幾本著作，當中《股票勝經》對我影響好大！睇完後下決心以三個水桶法整理手持的股票，將一些以前無知買下的短炒股放哂，將資金投放在潛力股。關於這方面，有事想請教你：

1. 現對福壽園（1448）和光大環保（1257）有興趣，亦閱讀年報和寫下個人報告。兩隻都想分三注入，但還未熟識估值，暫時認為1257現價合理，但未知1448是否處合理區？如否，合理區的範圍大概是？

2. 我在雅生活（3319）發出收購消息後，在$16.5購入，現在持續向上升。有感近來熱炒物管股，但該股的數據亦不俗，所以現在的升幅是股價高於價值還是企業價值釋放了？

3. 以前無做功課貪平入左小米（1810），依家睇番數字有感質素頗差，是否企業資素不佳？應及早沽售嗎？

感謝你費神閱讀和回覆

龔成老師：

我地投資，就是建立一個長期的財富組合，你賣出質素有問題的股票，是正確的做法。

1）兩隻都是有潛力的股票，但你要留意，這些潛力企業，業務會存有不確定性，因此佔你財富組合的比例不能太大。

福壽園（1448）要$6以下先算合理，不過，唔知能否見到，所以你有$7以下，都可以先小小一注，然後第跌到$6再入，不跌不入。中國光大綠色環保（1257）則現價合理。

2）雅生活（3319）雖然近期有少少炒味，但這股有質素，值得長線持有，因此不用急放，除非升到太誇張先賣出。

3）其實小米集團（1810）不是無質素的，佢業務都有增長力的，因為佢的產品的確受歡迎，同時處於增長狀態中。

但估值是最大的問題，佢不斷在燒銀紙，同時無人知幾時先有較理想的現金流，大家都只是憑「將來價值」去推斷，因此股價一定好波動，市場估值經常處於不一的狀態。

所以，你要預佢將來慢慢會向好，但未有確定時間，因為佢的確這刻未有較好的盈利，如果你持貨不多，可以持有，都值得博佢將會有發展。

------------------------------------------------

Q13618：

龔成老師，請問美團點評有升值潛力嗎？
值得投資嗎？

龔成老師：

美團點評（3690）佢業務巨大，同時增長快。不過，佢仍是有危有機的股票。業務較新興，過往不斷燒銀紙，近期算是好翻d，但未有似樣的盈利，當然，可能有前景的。這類企業不是不可投資，在要控制注碼，不能大注。

因為無人知真正的發展情況，因此市場對其估值都是「估估下」，這一定會帶來股價上的波動，如小注，都可以考慮的。

------------------------------------------------

Q13619：

你好 龔老師
我層樓加按左200萬現金出來
每個月都要供息供本

如果將該200萬全投資在股票上
個策略應該點部署？

龔成老師：

由於加按的原理是增加負債，因此在投資上，不建議太進取，平穩增值股+收息股，是比較適合你的配置，你可以視乎自己承受的風險度，而決定兩者間的比例。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、必瘦站（1830）、互太紡織（1382）等（記住，股價略波動，不能太過大注）。

另外，由於你突然多了這筆錢，在配置上要小心，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q13620：

老師你好，想請教一下 數字王國 (547) 呢隻股仲有冇前景? 5G真正盛行時對佢啲VR業務會否有幫助?

兩年前於不同價位買入為數不少嘅股數, 平均價大約 $0.42, 但見目前股價跌到差唔多谷底, 需要止蝕離場嗎?

但咁樣走就會蝕成十幾萬, 有啲唔捨得...
另外, 我亦於 $1.78 買左少少 中國鐵塔 (788), 呢隻股仲值唔值得持有呢?

龔成老師：

數字王國（0547）年年虧損，中期業務又出現生意下跌的情況，這類股投資價值，坦白講，賣出是最好的方法。

如果一間企業，太長期虧損，就算大環境向好，都唔一定反映佢受惠，因為之前的情況已反映佢企業本身的賺錢模式有問題，因此，唔好有太多期望。你持有，「博」的成份多過「投資」。

加上你持有太多貨，這會有集中風險，如果你唔想一次過賣，建議分注賣出，或起碼賣出部分先。

至於中國鐵塔（0788）有質素的，只是近期有少少炒概念，所以這刻唔能夠太進取。

這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處好高水平，反映現時估值略貴。

由於這股有發展力，如你有貨，可長線，但不建議太過大注。

今天來捷米樂單車測試一下牧田打氣機，挑戰無內胎的公路車跟下坡車是否能成功充氣？不然原本都要用照片中的儲氣瓶加打氣筒才能用，也順便拿小米充氣寶亂入試試，沒想到測試結果... 這禮拜上片就知道XD

除Gogoro車主外公路腳踏車 一般機車 腳踏車 自動腳踏車都要有！米家電動打氣機1S打氣測試超低胎壓要充多久,電動打氣機打球要多久好用嗎?
小米打氣機機車 公路車都可以打
抽獎規則
1.訂閱我跟阿輝的頻道
2.分享影片
3.影片留言區留言 『我要抽米家充電寶1S』

#小米充氣寶1S #小米充氣寶
加入我的Line@生活圈⬇︎
@3ctim
訂閱3cTim哥副頻道⬇︎
http://bit.ly/36gDKs7
加入頻道會員⬇︎
http://bit.ly/2LoUuox

現在Podcast也可以聽得到Tim哥的科技午報了
Apple https://apple.co/2IupRwH
Google https://bit.ly/3hMfwMn
Spotify https://spoti.fi/32ZflZS

訂閱3cTim哥主頻道⬇︎
http://bit.ly/2MgPy4H
訂閱Tim嫂頻道⬇︎
http://bit.ly/2PEnHMZ

追蹤3cTim哥即時動態⬇︎
instagram☛http://bit.ly/2HCZ52j
facebook☛http://bit.ly/2JyOGGK

Tim哥嚴選商城 🛍️ 3C購物
官方網站▶️ https://goo.gl/jW7cny
App Store▶️ https://goo.gl/67foDK
Google PlayStore▶️ https://goo.gl/l6B5Zp

*圖片內容截取自Google搜尋網站
**音樂與音效取自Youtube及Youtube音樂庫