【龔成問答信箱】（Q20741-Q20760）

Q20741：

老師，看了270粵海投資最新的年度業績報告，佢除稅前溢利對比上年係有增長的。

但與此同時，非控股權益大增超過8成，而稅項則增加接近4成，係扣除非控股權益同稅項之後，股東應佔溢利就跌左1成，當中係咪反映左一些負面因素呢？

會唔會對企業價值有影響？

本身賺錢多左，毛利亦提高左，但扣減稅項同非控股權益之後就出現盈利倒退，呢一點有些疑惑，所以想問問老師你有咩看法。謝謝。

龔成老師︰

稅務開支大增，主要係由於收入大增及某些盈利增長所致，當然中間亦有一些會計及稅務因素。但唔會因為稅務增加而認為佢質素差左。

而非控股權益，你見到數字大增了很多，由$6億增加到$11億，但這其實不是「支出」，而是一個會計上的調整數。

主要係反映集團的非全資附屬公司，當中不屬於粵海(0270)的盈利部份。

因粵海非100%持有這些公司，故盈利會透過這個項目，去按比例調減。因此，這不是一個負面的因素，只是權益裡盈利分配問題，又或只是一些會計上「計多左」的數而要扣走比非全資附屬公司的數。

因此，你所講的兩個因素，並不是影響佢質素的核心因素。

而佢在收入和毛利都有增長的同時，純利郤出現倒退。相信是當中部份成本，在此期間有較大上升。但由於未有年報，好難明確知道當中原因。

所以，我地暫時都唔可以咁快認定有長線影響，但都會扣少少分。到我地等到有詳細資料，才可以知道實際情況，才可以作出最終結論。

------------------------------------------------

Q20742：

龔sir, 你點睇隻7552,現畤可作為平風險嗎？

龔成老師：

ＸＩ二南方恒科（7552）之投資目標為追踪恒生科技指數每日兩倍反向表現（－２ｘ）的投資業績。

表面上可以對沖大市下跌，平衡風險，但實際操作好難，佢有槓杆，其實你好難控制得好。你幾時買？幾時賣先最好？根本好難。

國泰（0293）自己都有做油價對沖，最後輸左過百億。有好多野，睇就易，做就難。

------------------------------------------------

Q20743：

龔成老師，最近常常睇你的專頁常常幫人解答疑難，而我岩岩學投資，初初接觸股票，但我而家好迷惘。本人而家27歲，手上本來有現金流13萬，月入1萬5。

因為吾識，於是買下買下，慢慢地放左12萬係股票到。而最近蝕左3萬多。

我不知可以點算，我覺得自己好似吾適合投資，好多都係買入即跌，都係高價位入。

但好多股票買左放係到，股價仲係虧損嘅狀態，所以我諗緊應該要放定繼續長放，龔成老師，可以比少少意見我嗎？

1205 0.468入
3800 3.59入
9911 6.12入
1830 5.56入
1208 6.04入

我因為好多都係高位，我想放左佢地轉換買穩定既股票或套現。

你認為我應該要繼續等定放哂佢地套番現先...

龔成老師︰

你要明白一個概念，我地持有一隻股票與否，關鍵位是企業質素、前景，不要被買入價影響。

買入價只是一個心理因素，如果企業本身係有質素，而核心因素又無變。中短期股價波動，我地係唔需要理會。

中信資源(1205)業務的賺錢能力唔算好強，因此投資價值一般。

保利協鑫能源（3800）質素只是一般。佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估。此股都可以投資，但只宜小注。

赤子城科技(9911)主要從事開發一系列移動應用程式、健身應用程式、遊戲應用程式等。業務上，係有吸引力的，不過，我一向都新股半新股都無興趣，因為真實面要慢慢先見到。

由於上市時間唔長，故較難準確估值，只建議小注，同時你要明白當中的風險。

必瘦站(1830)買入價係貴，但此股有質素，可長線持有。

五礦資源（1208）質素都只是一般般，長遠要找機會賣出。

其實你唔係唔適合投資，只係定平貴和選擇優質股能力都不足。建議再投資前，你要去多讀投資相關書本、年報，新聞和課程。你可以睇我寫架"80後百萬富翁"、"財務自由行"和"股票勝經"，都適合初學者。

另外，你都建議你考慮本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成。到你讀完整個課程後，你已能自己選股、投資、評估平貴，相信會直接幫助到你。

課程時間，你可以留意我FB。

------------------------------------------------

Q20744：

龔sir,請問1918點睇？如想買入，什麼價較為合適

龔成老師︰

融創中國（1918）此股有一定風險。首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但你要明白背後的風險，

現價算係合理水平，但你要明白此股股價較波動，自己最好控制注碼。

------------------------------------------------

Q20745：

成哥，早晨！自從中了老千股後聽你話開始研究及學習.購入了您的年報、股票聖經和80後百萬富翁；
還想加入金沙及福壽園（請問甚麼價位才為合理或便宜區？）

現持有以下股票：
匯豐：53*800
領展：69.3*200
中國生物製藥：8.46*2000
小米：17.14*600
必瘦站：4.58*4000
長城汽車：26.8*1000
舜宇：215.4*100
安碩恆生科技：19.85*100
智中：1.57*48000（老千股）
阿里：224.45*400
（想整理一下及騰出資金待合理時機購入金沙及福壽園）求指導🙏謝謝

老師，如賣出長城汽車、舜宇和智中國際（老千股）、再購入金沙.好嗎？

龔成老師︰

智中國際（6063）唔可以話一定係老千股，佢主要在香港作為分包商提供外牆工程及建築金屬飾面工程項目設計、供應及安裝服務。

此股剛上市不久，無論規模、盈利等都好細。業務上，吸引力只算一般，此股不宜持有太多。小心。

長城汽車（2333）有質素的，業務都不差，不過，過往的增長力不算好強，長遠業務發展雖然正面，但未必是潛力型。這股都有長線投資價值。

睇翻你成個組合，持股都有質素，但係好集中係"潛力股"。佢地雖然有增長潛力，但同時波動風險都唔細，故不宜持有太多。

未來，你可以集中翻D係平穏增長股，令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、領展(0823)、希慎(0014)、太古地產(1972)

金沙（1928）和福壽園(1448)現價合理，可分注入貨。要平宜的話，要等佢地回多2-3成。

------------------------------------------------

Q20746：

龔成老師你好！一直有留意你的FB Page，早幾天買了你的「財務自由行」

打算開始從知識增長自己的腦袋。想請教下你我持有的股票組合。

我現時30歲，月入約30K，工作穩定，我現時持手股票總值約200K：

1. 2015年$5.3購入綠色力量環保10000股(1330), 現虧19,300

2. 2021年1月 $9.9 購入香港電訊5000股(6823), 現盈5,400

3. 2021年1月 $40 購入長實集團1000股 (1113), 現盈6,150

4. 2021年3月 $70 購入領展1000股(0823), 現盈550

因為股票1購入後並持有多年仍未上返買入價，打算用2-4的股票Cover 股票1的損失

所以我計好價就放2-4的股票嗎? 老師有沒有建議以上持有股票幾多放好？

有什麼策略我可以參考?

股票2公布了5月派息，我好不好等到派息才放？

我可以預100K-200K可作投資用，除了以上股票組合，老師有沒有其他策略可以教下我?多謝老師！

龔成老師︰

你有一點好錯，用賺錢架股票，去填補虧損股票架損失，咁係無意義。你咁好大機會會令手上好架股票，越來越少。我地應睇佢本身質素，來決定是否持有。

綠色力量環保(1330)都算有質素，但負債偏高會係扣分架地方。此股可持有，但不宜佔咁高比例，建議沽出部份。

而其餘3隻都係有質素，但香港電訊(6823)增長力唔高，唔適合你年紀。另外，個別行業唔好佔組合3成以上，否則會有過度集中架問題。

因此，你要調整地產類股票比例，去令組合更平衡。

至於收息前後沽貨，其實係無分別。

將來時間，你可以用"平穏增長股" 和 "潛力股"作投資目標。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股︰安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)。但佢地波動性和風險會較高，你要自己平衡。

現時大市只在合理區，現金和股票最好各一半。因此，餘下100K-200K資金，我地就等大跌市，才出手掃貨。

------------------------------------------------

Q20747：

龔sir，我想請教下
我現揸

2800 500股25買
2382 100股214買
1772 200股112買
6618 300股153買

我手頭上有6萬既流動資金，我想問我現時組合，可唔可以長擺下

龔成老師︰

現時持股都有質素和增長力，若你係年青至中年人士，係可以。

但留意你現時除了盈富(2800)，都係一些波動性較高架股票，佢地增長力高，但風險同樣高。

特別係京東健康(6618)，這類股票不宜大注。未來再加注，可以優先放在一些平穏增長股，例如金沙（1928）、恆基（0012）、平安(2318)、中銀（2388）、港鐵（0066），令組合更平衡。1772小注好了。

現時大市只在合理區，6萬現金先儲起，到有較大回調才出手。

------------------------------------------------

Q20748：

老師，6969思摩爾國際+3993 洛陽鉬業 +6049 保利物業 。想長期持有，請問適唔適合？謝謝

6969 $75.9入了2000股
6049$58 入了2000股
3993$6.8入了12000股

聽朋友話貪心，買多左貨，最近不停跌，好驚。我應該點算好？謝謝你，老師

龔成老師︰

我地分析是否持有一隻股票時，唔好睇咁短線，要從長遠角度和質素去考慮。

思摩爾國際（6969）係霧化科技解決方案提供商，基本上業務是正面的，有當中的獨特性，以及長遠有增長力，這股有長線投資價值的。

洛陽鉬業（3993）質素中等，但不能說是穩健，佢的營業額同盈利都十分波動，這點令分析佢較困難。因為好難確定到往後經營環境對佢的影響，同埋，佢亦因成本令佢盈利較波動，這同樣是較難預測的。

此股的股價較為波動，若佔你組合比重不多，可以守。

保利物業（6049）都有質素的。佢係中國的物業管理服務綜合商，主要提供以下三項服務：（1）物業管理服務（2）社區增值服務（3）非業主增值服務：主要向物業開發商提供案場協助服務。

生意與盈利都有理想增長，現金流不差，本身有質素。但市場有時對這類股有少少熱，令股價較波動，加上規模不算好大，因此都有風險。

優質度有的，故現貨可長線持有，但不宜太大注。

------------------------------------------------

Q20749：

你好，首先想多謝你教曉我正確的投資方法，我在慢慢閱讀老師的書，剛完成50優質潛力股，正在讀選股勝經。有幾個問題想請教下

我今年28歲，月入3萬，已於2017年購入自住新界樓一層，供樓後儲蓄大概每月8000。希望5年可累積200萬現金。暫時現金流有40萬左右，現時並持有以下股票

[email protected]
[email protected]
00914-500@48
[email protected]
09988-100@281
[email protected]/21.5

請問老師以上組合平衡嗎？風險及潛力可以嗎？如想再購入其他股票，什麼合適？

另外，在啟德發展區附近擁有33年樓齡工廈單位一個，已供斷，暫時估價260萬。由於一半屬於家人，一直空置沒有租出。

考慮到工廈按揭限制多，樓齡太舊，有可能要繳付一筆大廈維修費，我考慮將單位出售，再作投資。老師認為可行嗎？還是繼續持有？

謝謝！希望得到老師寶貴的意見！

龔成老師：

上述都是有質素的股票，你可以持有，長線投資。但如果想組合更加平衡，建議你加入ETF，例如盈富（2800），如可以承受風險就3067。

以你年齡，部分加入，安碩恒生科技（3067），可以的。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

如果該工廈價值不高，出租方面不強，就可以考慮轉其他資產，你分析時，最重要睇翻長遠的投資價值，發展程度，你要分析維修後價值與租金能否提高，去分析是否有持有價值。

------------------------------------------------

Q20750：

龔sir，你好 一直有睇開你post
好多謝你好用心分亨你既經驗同智識。
以下有問題想你給些意見 ：

本人 3x, 收入約$30k /月
先生 3x, 收入約$20k /月
已有一個小朋友 ，另將有一個黎緊出世 ，本人有一自住物業 ，月供計埋雜費約 $15k/月 （一房單位 新樓），現時有3個方案：

由於將有多個BB：想增加居住空間 ：

1. 賣出現有物業，套現買間三房

2. 將現有租出 ，然後買間兩房，但儲蓄只夠買間較細及舊2房，（如簡選此方法 ，手上會無曬儲蓄 ）

3. 把現時物業出租 ，
再租間2房
請你給些意見 ，謝謝!

龔成老師：

從財富增長的角度，（2）是較好，因為可以在長遠，擁有最多的資產。當然，都要睇翻你地是否承擔得到，如果太過勉強，就等過幾年，你地有更多資金先進行。

如果你地好急，一定要搬，就睇下這方法在供樓方面是否供得起，如果勉強得，都可以考慮，但就要明白風險，如果唔得，就考慮（1）。

------------------------------------------------

Q20751：

你好，龔成老師！我很認同你的理財理念，我希望對自己的財務重新審視。

我想詢問如果300萬儲蓄現時未首置，我應該如何配置我的理財組合？置業上是否以20 年樓齡內及租金大於供款為主要入手考慮？

我應該現時購入物業還是先行投資優質公司股票以增長資產？

增長股與收息股的比例現時應該如何劃分比例？ETF 應該一同加入考慮嗎？以上一系列的問題有點長，謝謝你的意見！

龔成老師：

如果你本有物業，而持有一定的現金，其實已經可以留意物業市場，最好是買入10-25年的物業，用大約$150萬作首期。

最好是將現金，轉為股票+物業，長期持有，建立一個平衡，財富增長的組合。

如果你決定投資物業，就唔好太急買股票，除非見到大跌市就入少少。否則，應該等你完成置業後，之後仍有一定的現金剩，到時就開始增加股票。

至於增長股與收息股的比例，好睇你的年齡與風險承受程度。如果年輕，就可投資平穩增長股+潛力股，年長，可較多收息股。

建議你睇《財務自由行》《大富翁致富藍圖》，適合你的。

------------------------------------------------

Q20752：

老師你好，我一直有追你既post，好認同你既投資理念，亦眼見你路途上幫助左好多人，希望將來可以有機會上你既堂！

有關本人投資方面，真係超級bb班，有一個困擾，希望老師幫忙解答！我係$9既時候入左3320，一直等到依家。見老師過往只有極少數評論呢一隻估

只係提過話佢有質素，但就未見詳細分析，希望老師可以幫忙詳述一下，同埋會唔會有機會上返$9呢？十分感謝！

龔成老師：

華潤醫藥（3320）都有質素的，但不是最高質之列。

佢主要於中國以「三九」（又稱「９９９」）、「雙鶴」、「賽科」、「紫竹」、「東阿阿膠」及「天和」等商標從事研發、製造、分銷及零售醫藥與其他營養保健品。

產品組例有化學藥品，例如包括慢性病（如心腦血管疾病及糖尿病）藥品的研發及產銷、輸液治療（主要是大劑量靜脈注射液）、兒科、腎科與生殖健康的治療領域、抗感染與皮膚病用藥，亦製造及銷售少量原料藥。
　　　　
另外，亦有中藥、生物製劑、營養保健品。

其實業務仍發展中，不過賺錢能力就唔算好強。這股都有長線持有的價值。

有貨你可以持有，但要上翻$9，相信要多少少時間，耐心。

------------------------------------------------

Q20753：

老師，以往我從無投資過。喺大約两個月前開始買股票，曾買0136 亦賺左小小到後來高位入左，點知跌到剩下1半，但都係小注。

而另外31蚊入了1810請問應否繼續持有

我喺1個月前開始留意你Facebook 專頁。發現你既投資方法好有道理，你講到不用理公司股價，只需研究該公司價值及應長線望遠，不應貪圖短暫獲利。

想請問你有那1本你寫既書會教看公司估值及從公司年報可看出是否值得投資的呢？

知道老師你會很忙，但都希望能指導1下

龔成老師：

選股是重要的技巧，如果未能掌握，可以投資盈富（2800）作組合的核心。

恒騰網絡（0136）有危有機類。

現時企業盈利不多，但市值極高，市場對「前景」有無限幻想，有時炒作會升好多，但跌都可以好勁。

如果長遠業務成功，會爆得好勁，但失敗，會跌得好勁。因此，長線投資不是不可，但只能小小注。如果持貨較多，宜減。

至於小米（1810），你持有就得，但你買入價貴，之後要慢慢學習企業估值。

你可以睇《股票勝經》《年報勝經》。

------------------------------------------------

Q20754：

龔成老師你好呀！我想增加自己嘅收入，本身自己有份做文員的職業，但每月收入唔高，微薄的收入無辦法為買樓做好準備

雖然我自己都有買到股票，但始終投資股票難免會有損失，當中都損失左唔少錢，想問下有無方法可以指導下。謝謝！

龔成老師：

第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當然，你可以自行分注買入，但要你有知識，懂得分平貴先得。有知識財富就增長較快。當然你要努力儲本金。

------------------------------------------------

Q20755：

老師，點解你唔高位賣1211？

龔成老師：

我一直都持有1211，已12年，平均價$20，之後上到$88，跌翻去$12，當時個個都問我點解唔$88放。

其實，無人能捉到最高位，我地只有持有優質企業令財富有最大增長，如果成日都以捉高位概念進行，反而會升少少賣左。我地投資要理性，不要認為自己能做到不能做到的事。

我只知道，長期佢會慢慢上升至$100以上，但好多野無得估的。

------------------------------------------------

Q20756：

龔sir 想請教你 我31，岩岩學識玩股票 買左3800 3067 可以提供一下意見嗎？

我追緊你YouTube 爬反文 因為我想35歲擁50萬 但好似好遙遠 因為只有4年時間...

而我收入大概16k 暫時未有咩負擔 但個個月卡數都過萬

我準備實行你教既方法 吾碌卡 全現金同埋買豬仔錢罌 希望龔sir可以比到意見

龔成老師：

安碩恒生科技（3067），有長線投資價值。適合你年齡。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

保利協鑫能源（3800）業務不穩，質素中等。

佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率未算好高。

如果真的想投資，小小注好了。

你如果想完成$50萬目標，第一，唔用信用卡，同時要減少支出，你要盡快累積基本的本金先，否則根本唔會有錢去滾大財富。

第二，要想方法開發收入，你現時31歲，其實事業有發展，要想想長遠提高收入，發展你事業的方法！

第三，要開始投資，你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

------------------------------------------------

Q20757：

龔sir你好，最近開始想學習下投資
我宜家27歲，做左都7年野
宜家月入3萬，有30萬現金

想問下如果要睇書應該睇邊啲，唔知道應該點樣開始，又唔知買嘅話啲資金應該點分配，身邊嘅朋友都係短炒嘅多，冇乜投資經驗問唔到佢哋意見

另外上堂學嘅野同你啲書嘅內容一唔一樣？

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

如果你不懂選股，就投資ETF，如盈富（2800）、恆生科指ETF（3067）。

不過最初唔好用太多現金。

有9成散戶都是短炒的，所以你朋友短炒是正確。不過，全球日賺錢的投資者巴菲特，佢是反對短炒，並用70年去證明長線最賺錢。你可以想想，應該跟那一個。

課堂大部分內容，都是無在書講過的，而一些實戰，更具體的投資技巧，都只會有課堂講述。

例如企業估值技巧、5種選股模式、選股程式的具體應用、年報分析的實戰技巧，同時會派一份6頁紙的「企業評估表」給學員，令你可以自行為企業進行有系統的質素評分。

你可以當書只是頭1、2堂的入門部分。

------------------------------------------------

Q20758：

你好龔成老師，經朋友介紹開始留意你既Facebook專頁，有追番之前你寫既post同讀者問答信箱，好欣賞你既才華，發現你寫既書同比讀者既建議真係好貼地！

以下有小小問題想請教老師，我今年29歲，年半前開始學買股票，盲中中就買左d銀行股，諗住有息收又不會有太大風險

但發現呢類銀行股買左一段時間都無咩起息。希望老師幫我分析一下現有組合，應該繼續持有還是要沽出？

或可以推介一下有邊類型股票適合我重新配置我的股票組合（月入2萬，月儲蓄8千，無供緊樓，現階段有5萬流動現金可作其他投資）

現股票組合如下：
005*800 @50.7
1288*10000 @3.48
3988*15000 @3.6
1810*1000 @29.45
7500*3000 @5.815

龔成老師：

你現時持有3隻銀行股，這幾隻不是無質素，但未必適合你。

以中行（3988）來說，由於內地經濟無過往年代咁強，股價無過往咁好，由中美貿易戰開始，中國的經濟動力已有所減少，加上最近的疫情，都是影響經濟的因素。不過，初步已好轉，但不是高增長型。

現價合理區中間，這股收息可以，但就唔好對股價有太大期望。

幾隻銀行股都有類似情況，以收息為主，增長力不強，但不是無質素。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

所以你這年齡，未必適合。

另外，你同時持有3隻，這會出現行業集中風險，你要注意翻。

ＦＩ二南方恒指（7500）產品之投資目標為追踪恒生指數每日兩倍反向表現（－２ｘ）的投資業績。好難玩，唔建議你投資。

小米（1810）你可長線，但預佢短期股價會好波動。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

$30萬，暫時可動用$10萬-$15萬。

平穩增長股：潛力股
7：3
（如果你投資實力較強，可增加潛力股比例）

平穩增長股：考慮盈富（2800）。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20759：

龔成sir，我父母有廿萬現金存款，但都沒有工作，我每月家用俾佢哋有$13000，佢哋只會存現金，沒有投資概念。

我最近計劃每月用$4000供股，為佢哋未來打算
$2000 領展
$2000 盈富

是否一個理想組合而又較為平穩？
想聽聽你意見
多謝

龔成老師：

$2000 領展
$2000 盈富

可以，你可以長期進行，都是適合的投資。

至於$20萬，其實可以動用部分去投資收息股。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

這些都是股價上落唔算大，有穩定派息的股票。

------------------------------------------------

Q20760：

你好呀龔sir
呢排心情有d亂

現持有
9618 @50 356入
1398 @2000 5.1入
1024 @100 392.2入
3690 @100 410.6入
1833 @100 122入
1810 @400 27.95入
1 @500 52.9入

應否止蝕放1024和3690？
溝貨的話又沒有那麼多可動資金

龔成老師：

上述持有的，基本上都是有質素的，但新經濟股你的買入價都貴，建議你日後用分注或月供模式去投資。同時，你組合的比例較多在新經濟類股，風險平衡度不足。

1、1398無問題。

9618、1810，業務穩健，只是買入價少少貴，平常心睇股價就得。你預佢中短期股價都會波動。

1024、3690、1833，有潛力的，但之前都處明顯貴的水平，就算近期回落都略貴，不過，業務有增長力，只是估值的問題。如果你持有過量，可能要減少少，但如果不多，就守住先，不過要有心理準備股價好波動。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18081-Q18100）

Q18081：

龔成sir ! 你好~ 有啲野想請教下你

我下年將會畢業，我讀個科係computer science(計算機科學)，比起作為一個打工仔 我更想自己創業。

我呢幾日同大學professor傾過， 佢話我這學科 以往畢業生不少都會收到apple, google,facebook等大公司的offer,擔任 軟件工程師。

加上我有去呢啲大公司實習的經驗 要入去應該係有機會的。而且入職人工已經有 16.8萬美元年薪，坦白講 這對我是很吸引的。

但另一方面 我也很想自己創業，去設計一啲app/程式幫到人的日常生活，但若果將來成為一名打工仔，應該沒有時間去專注自己事業。

想問下龔成sir 你如果是我 你會點樣取捨? 你當初點樣一邊工作，一邊自行創業的? 係你創業初期 有冇經歷過啲咩大挑戰? 後來點樣刻服呢?真心想學下野 所以請教你

期待龔成sir的回覆及意見

龔成老師：

除非你做生意好強，已經建立緊一盤生意，或明顯地捕捉到市場，否則，我會建立你先打工。

記住，打工不是一世打工，而是先打工，你剛畢業，完全無社會經驗、人脈、行業知識、實戰能力，去創業的風險會較高。

因此，我會建議你去打工，而打工的公司，要同你想創業有相關性的，第一，你能夠取得知識與經驗，第二，你可以得到資金。

只要你唔好忽視創業夢就得，你打工一段時間後，就可以並行創業，或全職創業，我相信對你來說是最好的。

我自己是一邊打工，一邊做生意的，這是辛苦，得較平衡的做法，如果你創業中途，見到生意發展快，就可以立刻辭職，全力去做。

------------------------------------------------

Q18082：

老師，你點睇護老集團的前景？松齡（1989）同嘉濤（2189）你會怎樣選擇？

龔成老師︰

香港人口老化加劇，長遠長者服務需求，只會有增無減。

松齡護老集團（1989）係香港的長者安老院舍運營商，為長者提供全面的安老服務。

業務主要有提供安老院舍服務，例如為長者提供住宿、專業護理及照料服務。以及銷售安老院相關貨品及提供醫療保健服務，即是按院友的需要向其銷售尿片、營養奶、醫用手套、飼奶袋等。

此股現時尚在停牌，只能等佢有進一步消息。

嘉濤（2189）都不差的，見佢生意穩定，盈利與現金流穩定，現價合理。

香港這行業，長遠有市場的，需求會更多，不過，競爭都大，加上市民對這行的要求、如衛生等，會愈來愈高，這會產生一定的成本。

整體都是正面，但未算最高質之列，這股可投資，長線，但規模唔算大，因此唔建議投資太多。

------------------------------------------------

Q18083：

本人38歲，育有二子，公務員，月入約＄35000， 每月約儲＄20000， 現金約一百萬。有一層樓，約50年樓齡，每月還12000， 現放租，租金約10500， 供到65歲，亦有其他股票，詳情如下：

港鐵：6039股（平均買入價$40.4）
吉利5000股（11.7）
騰訊100股（371.😎
領展400股（74.64）
比亞迪1000股（57.65）
平安好醫生200股（100）
金沙 1600股（31）
中銀香港5000股（27.21）
盈富基金 3500（25）
阿里巴巴100股（245）
中國生物製藥10000股（9.6）
小米2600股（15.24）

月供：港鐵，金沙，領展：由2019年供到依家（中途試過無供幾個月）

另，中銀香港，盈富，建行：由2018年供到2020年（但見到龔老師你講過建行係收息股，加上中銀香港已經係銀行股，就係2020年5月停供）

現供：港鐵，金沙，盈富 ，中銀香港，領展，各＄2000
想問一下

1. 由於我近期買左4000股港鐵，諗住停月供港鐵，轉供另一隻或加大現有月供的其他股票。我應該停供地鐵嗎？如建議停供，咁轉邊隻股好？

2. 我發覺睇價位入金沙，比月供便直，打算一手手入金沙算，故都想停供， 咁做好嗎？

3. 我月供比例合適嗎？需調整嗎？

4. 是否可以長線持有上述股票？

5. 由於我月供無乜潛力股，想一手手入/月供，又諗過，用現金50萬，分5注，主要分注買5隻股票，包括潛力股。關於月供同整手買入，或者選邊隻，有甚麼意見？

6. 由於我放租個層樓，都好舊，想換樓再租出去，但問過銀行借得三百萬左右，根本換唔到更好，點算？

多謝龔老師解答。

龔成老師︰

1） 港鐵（0066）有質素，但佢係你組合中已佔太大比重。單一企業最好保持組合佔比15%以下，所以我同意你停供，轉供其他股的想法。

現時你組合缺乏較有潛力股票，你可以考慮潛力股︰比亞迪（1211），中生（1177）或福壽園（1448）。

2 & 3） 可以，現時金沙（1928）處於合理區較低位置。你可以用分注形式，慢慢入貨都得。

如果你停供金沙，你可以將佢供款加入盈富（2800），用盈富做主力，咁你個組合平衡性會更好。

4） 你全部持股都有質素，可長線持有。但留意翻平安好醫生（1833）佢地的上市年期不算長，業務上，佢的確是高增長，同時業務有發展潛力。

但睇翻佢地的財務數據，平安好醫生仍處燒銀紙狀態，故此股只宜小注投資。

5） 月供方面，你可以按現時計劃進行。

現時大市只是合理區較底位置，你現有100萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

選股方面，我地會因應翻人生階段去做決定。以你年紀，可用"平穏增長股" + "潛力股"作目標，以下都是相關的優質股，供你參考。

平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、粵海（0270）、領展（0823）、希慎（0014）、太古地產（1972）;或
潛力股︰比亞迪（1211），中生（1177）或福壽園（1448）。

6） 由於你個放租物業本身係負現金流，加上物業己有一定年期，可能會拖低租金升值能力。

而且舊樓往往有一個問題，就係很高的維修成本。當這些因素加起，有機會令你長線處於一個不利的狀況。

當然，我地唔係要而一刻就立即去換樓，。你可以一邊用股票增值，儲多D彈藥。另一邊KEEP住去睇樓，到有投資機會時，就出手換樓。

------------------------------------------------

Q18084：

老師1833現價可買？
另外1801可買嗎？

龔成老師︰

平安好醫生（1833）都可以話係潛力股，但就屬於較高風險的類別，我自己會比較怕投資這類。

首先，佢地的上市年期不算長，加上上市時是市場熱炒期，當時估值過高，對這類股有少少保留。

業務上，佢的確是高增長，同時業務有發展潛力，但睇翻佢地的財務數據，平安好醫生仍處燒銀紙狀態。你覺得佢有潛力，可以小注。

而信達生物（1801）係一家中國生物製藥公司，開發了集研究、發現、開發、製造及商業化於一體的生物醫藥平台，並在腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。

佢同平安好醫生一樣，都係仍處於燒銀紙的狀態。潛力度係有，但估值好難，現時市值都唔細，只能完全「估」佢將來的價值，不確定性好大。所以策略一樣，投資可以，但只宜小注。

------------------------------------------------

Q18085：

老師，其實我地坊間買了股票的錢，到底喺去咗邊度？去返買既嗰間公司定全部屬於係交易所？

龔成老師：

另一個人。

交易所就是一個二手的交易市場，例如你想買入某股100股，要$10000，其實就是在香港有另一人賣比你。例如是「龔先生」，龔先生就將持有的貨賣左比你，而你就將$10000比左龔先生。

當然，中間會有交收過程，但原理就是這樣。

------------------------------------------------

Q18086：

老師今日睇返倍升股的書，發現原來已經有好幾隻倍升了

今日睇返倍升書中提及的股票，部分已經倍升，有部分已經......好似不值搏了

希望老師快D有更新倍升股的書

另外優質潛力股提到1830 PE 10合理

想請問一下今年PE是否要調整到7-8才是合理？
便宜區在PE 7以下？

龔成老師：

必瘦站（1830）有質素的，因為之前除淨左$0.34，因此估值都會減少左，因為派股息原理就是將企業的現金派比股東，因此企業的價值會因此而減少左。

你預這股現價合理，去翻$1.7以下就開始平。這股有長線投資的價值，有質素，但由於規模唔算好大，因此唔建議太大注。

------------------------------------------------

Q18087：

成哥。做了些功課，想向你請教。我比較了時代鄰里及奧園健康的業績，發現時代鄰里在管面積同比增加39%，盈利同比增加76%

奧園在管面積同比增加34%，同比盈利只增加24%。是否代表奧園健康賺錢能力在同業中的確很弱，所以股價無起色。我7.6有貨，本來想長期持有，陪住隻股增長。

若果太忙，希望至少能在節目中分享一下看法。謝謝。

龔成老師：

時代鄰里（9928）與奧園健康（3662）都是有質素的股票，從業績中，見到增長力不差。

你上述的分析，是其中一個方向，了解佢地的業務增長，以及盈利增長，能分析到佢地的賺錢能力情況，的確，奧園健康在賺錢能力方面，唔算好強，因此股價的增長不多（這就是市場對佢的睇法）。

另外，市場會同時衡量這企業的其他特質，去進行估值，例如長遠的增長力，質素、負債、賺錢能力、背景等。

這股都值得長線持有的。

------------------------------------------------

Q18088：

龔sir, 想請教有關投資組合。本人32歲，現時手頭上沒有股票，可每月儲蓄18k。 打算$8000用作月供股票，餘下為存款等待價位合適時買入一些潛力股。

打算月供以下4隻股票，各$2000
1. 388
2. 700
3. 2800
4. 9988

請問資合分配及所選的月供股票組合合適嗎？
Thanks!

龔成老師：

你的策略正確，其中$8000月供是適合的，而你所選，都是有質素的股票，計劃可以進行。

要留意的是，你月供中，不少是有增長力的股，而你打算剩下現金投資潛力股，你要計劃下，會否令組合潛力股類別太多。始終潛力股的風險度較大，你要自己取平衡。

加上現時不少潛力股都唔平，你剩下現金投資的動作，唔好急去入，要慢慢入，時刻都要留有一定的現金在手。

------------------------------------------------

Q18089：

最近我有睇你既投資理念，我覺得你講既野好適合，亦鼓勵我學習投資知識，好多謝你。

我想問，老師你點睇阿里巴巴、小米1810前景？
適合中長線投資同月供股票嗎？

有機會好想上到你堂

龔成老師：

阿里巴巴（9988）是有質素的股票，有長線持有價值，相信往後仍有增長力，不過現價就唔算平，建議你月供投資，或等回多少少先。

至於小米（1810）同樣是正面的，這股仍有長遠的發展力，但自從之前公布成功入選恆指成份股後，股價就上升，開始過左合理區，所以暫時都是月供較好。

------------------------------------------------

Q18090：

你好！本人今年46，一家四口，打算賣去物業套現投資，投資額約700萬。請問可以如何分配投資？

龔成老師：

由於香港買賣物業成本高，加上無人知物業市場之後的升跌，因此做賣物業決定要想清楚先，同時，自住樓一般都唔建議賣。

假設你賣出物業後得到現金，你可以建立一個組合。

你46歲，你可以考慮平穩增長股類別：

盈富（2800）及其他ETF。

另外：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

如果你比較保守，就可考慮收息股，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

你亦可以同時考慮其他資產，車位、的士牌、債券、銀行或保險公司的產品。當然要留有一定的現金在手。

------------------------------------------------

Q18091：

龔成老師：
請問902華能如何？值得買入嗎？

龔成老師：

華能國際電力（0902）早幾年受成本因素影響，加上國策對佢不是全有利，這都影響了佢的賺錢能力。近一年算是好翻D。

企業整體不差，前景算是中等，現價合理，但就要預佢的增長力不強，只是平穩型。如果投資注碼不多，可以的。

------------------------------------------------

Q18092：

你好龔sir, 最近開始睇你d post想繼續向你學多d野。暫時我好少流動資金但將會月入6萬。 如果想月供股票，你提過應該供盈富基金+另外一兩隻收息股。

請問你會推介邊隻？3000 盈富 + 1000 + 1000 OK嗎？ 謝謝

龔成老師：

如果你年齡唔算大，其實可以投資翻一D有基本增長力的股票，唔需要投資收息股。

盈富（2800）$3000，再加2隻，各$1500。如果你每月儲到錢，建議你進一步加大月供金額。不過初期先試下，每月$6000是可以的。

銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18093：

你好！龔老師
我本人持有2000股吉利汽車，在$25買入

有3000股中國銀行，在$3.9買入
有16000股中國鐵塔，1.72買入
有8000股中廣核，在2.45買入

請問是否繼續持或轉買其他？

龔成老師：

上述的股票不是完全無質素，但買入是較大的問題。

吉利（0175）、中國鐵塔（0788）都可以守，吉利可能要多少少時間，但不是無機會上翻去的。

至於中行（3988），你預這只是收息股，增長力不算強，如果你想組合有較好的增長力，可能要考慮轉其他。

中廣核（1816）都有類似的情況，但不是無質素的。

------------------------------------------------

Q18094：

你好，請問384 & 788值得買嗎?
現价ok?thx

龔成老師：

中國燃氣（0384）業務正面的，無論是行業發展，大環境，前景，這股都不差。財務數據正面，生意與盈利保持向上，股本回報率高，賺錢能力強，不過，負債少少高是扣分的地方。

整體來說，這企業都有投資的價值。

現價合理，可以長線投資，但未必是高增長類。

至於中國鐵塔（0788）有質素的，之前有少少炒概念，所以之前估值有少少貴。

這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

考慮到佢的質素、發展能力，這股算是合理價。

由於這股有發展力，可長線。

但如這刻買入，分注入可以的。

------------------------------------------------

Q18095：

龔成老師，小女今年22歲 剛出來工作 月入30000現持現金20000每月可儲6000如果想5年後財富增值至一百萬應如何入手

小女有想過月供股票，如每月供6000元如果投資小米其他股又如何呢？請老師給意見

龔成老師：

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

你可以每月盈富$4000，供小米（1810）$2000。這會比較平衡。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過半年，有知識及少少經驗後，就可以利用你手上的資金，其中一部分，去投資股票。

------------------------------------------------

Q18096：

老師，你好
現持有中國恆大(3333)
可繼續持有嗎？

公司質素可以嗎？
謝謝你

龔成老師：

中國恆大（3333）於中國從事房地產開發、物業投資、物業管理、酒店運營，另外，佢亦有你金融業務、互聯網業務及健康業務。

佢總共有約好幾百個項目，完全或部分竣工，分布於中國各地，根據佢公布的資料，合共有計7000萬平方米以上。這反映佢業務龐大。

佢生意不差，企業有賺錢能力，但負債情況不理想，處於極高水平，令這企業存有風險。

整體來說，這股都有質素，但就有風險，如果你持貨不過多，可持有，但太多最好減翻D，這股股價波動可以好大。

------------------------------------------------

Q18097：

成哥，我睇完你D書後，我覺我地既經歷都好相似，我開頭係投資上面都係輸好多錢。包括D牛熊渦輪，最近正股都損手包括匯豐同長和

我而家有大概1.6M Cash

有around 10萬 股票
405//2000股//成本5.22
823//300股//成本59.2
939//2000股//成本6.3
1928//400股//成本32
3988//10000股//成本，3.25同2.71
9618//50股//成本226（抽新股到而家

基金買美國股債為主，低位買，而家AROUND 20萬左右

未有任何物業
月入50K左右（可以草到一半）

眼見政治因素，環球經濟唔明朗，唔敢買樓買股。之前有大量匯豐同長和都損手已全數沽出止蝕離場。

現時應該如何分配資產？

龔成老師：

每個人都有學習的過程，最重要是之後掌握選股及投資技巧。

你現時持有一定的現金，可以好好利用。現時你持有的股票，並不是無質素，可以持有，但就唔好加銀行股了。

雖然經濟不明，但你唔好太比這因素影響，你要明白「買入股票就是買企業」，只要預期企業3年後業務向好，仍然有質素，其實就有投資價值。

經濟差反而股價平，如果一切都明朗，股價往往已經升左。

我建議你動用部分資金，例如$30萬-$70萬，分注投資優質股，慢慢買入，唔好急。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。最好當然等佢地回多少少先。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18098：

老師想請教下你，1316耐世特出左業績，唔係好識睇，我年頭6.56入，應該點步署

龔成老師︰

耐世特（1316）為一家全球領先的先進轉向及動力傳動系統、先進駕駛輔助系統（ADAS）及自動駕駛（AD）賦能技術的公司。

剛出2020年中期業績，盈利倒退近99%。由於疫情影響，令不少生產和銷售活動停擺，對集團生意造成重大打擊。

但這相信只會係中短期問題，唔會影響到佢長線質素。睇翻佢過去幾年都比較弱，你預佢中短期仍會面對不利的經營環境，見佢生意並無增長，盈利都是。

相信要過一段時間，先會慢慢進入正常少少的時期。這股都算有投資價值，但就未必值得投資太多，因為質素始終不強。

------------------------------------------------

Q18099：

請問怎樣釐定股價是否合理？

例：#700 我上次想入價$507，我覺得貴，放棄咗。但好似高處未算高咁。我應該怎樣去評估？謝謝

龔成老師：

你要學懂計算企業估值。當然過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

另外，價值會慢慢改變的，例如今天的$500騰訊（0700），其實比2年的$470平。

對於無企業價值概念的人來說，「$500比$470平」，這是好難理解的，但你要明白，企業價值會因企業發展而改變，當大家衡量平貴時，不能單以股價數字大小作標準。

這就是我經常強調的「高不等如貴；低不等如平」。

現時的騰訊，並不能以平來形容，但如果比較2年前高位，現時的價位反而較為合理。現時的估值，可說是合理區頂至略貴的水平。

------------------------------------------------

Q18100：

想問下你點睇匯豐？屋企係係52蚊 大手入左

龔成老師：

匯控（0005）賺錢能力與增長力的確弱左，但又未去到完全無質素，近期股價受壓，除左佢經營環境影響，佢派息問題都是因素，因為市場一向理解這股是「收息股」。

我從股息角度分析這股。

相信長遠是收息股，但股價增長就有限。可以先從佢近年唔派息及財務情況分析。

首先睇翻佢財務數據唔算話特別差，今次要停派息，主要原因係接獲英倫銀行透過審慎監管局發出的書面通知，要求匯豐取消派息。

所以，佢並不是自己好唔得，而去到要唔派息，而是因應翻英國監管局要求，才這樣做，所以，雖然是不好的利息，但不是核心性不利。

停派息對收息股從來都不是好事，但在這全球經濟咁差時候，為集團預留一筆資金備用，對集團和股東都是有利的。

在全球經濟環境影響下，集團中短情況相信都會維持波動，未來再停派息也說不定。但我地投資應該要集中考慮翻佢長線因素，雖然預期匯豐中短期表現會受壓，但長線質素依然存在。

作為收息股係可以，概念上，就是放棄中短期股息，而預期將來慢慢回到正常狀態，只要你投資組合唔好太偏重單一隻匯豐或銀行業就無問題。

但記得，唔好佔比太重就得。同時明白這只是收息股，唔好對股價有太大期望。同時不能持有太多。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。