【龔成問答信箱】（Q22601-Q22620）

Q22601：

龔成老師,剛看完你的書,提及選股市盈率最好於5-20倍之間,但太低反映企業會有什麼問題?例如688如今只有3.7倍市盈率.

龔成老師：

在理論上，低即是平，但你見我定指標在5-20，是一個初步的參考，投資者仍有好多因素要分析，不選5倍以下的原因，是因為「有點過低」，而市場是公平的，當一隻股這樣低，反映佢有幾個可能性：

第一，佢盈利代表性不足。第二，佢之後的盈利有下跌可能，第三，佢的風險較高、或質素較差。

中國海外發展（0688）市盈率低，是因為佢不少盈利都來自物業重估，即是盈利不能反映真正的情況，代表性不足。以長遠來說，這股不是無質素，在發展商來講，不算最強，長遠有平穩增長的能力，前景都可以。

睇翻佢的財務數據，基本上都是正面的，但生意增長力不是好強，見佢過往的生意都只是平穩，而整體都有投資價值的。
可以視這股為平穩型的企業，現價合理。當然中短期可能因樓市一般而股價一般，但長遠，仍是可以的。

------------------------------------------------

Q22602：

阿sir,我見你提到1177，2269又點睇，2269大公司，而且盈利較好？

龔成老師︰

雖然2間同係醫藥企業，但其實2間公司，無論業務和賺錢模式，都係完全不同，不宜直接比較。

中生(1177)已建立一套完整的商業系統，有多個已賺錢的藥品類別。透過營運賺取資金，再開發開藥物去再賺錢。

但由於開發藥物係有風險﹐唔一定成功。如果失敗佢要自行承擔所有相關損失，不過中生(1177)本身已有一定產品收入作後盾。

就算個別研發失敗，造成資金鏈問題的機會唔大。所以，此股擁有的這個營運模式和規模，令到佢持續有盈利增長，係一間唔錯的潛力股企業。

而藥明生物(2269)主要提供有關生物製劑藥物發現、開發與生產服務。

佢涵蓋生物製劑發展過程的所有五個階段，即藥物發現、臨床前開發、早期臨床開發、後期臨床開發及商業化生產。

集團本身唔係賣藥，佢係收錢助人去研發、測試和生產。

其賺錢模式較穏定，加上本身項目又多，可以把失敗風險分散。而且研發成本和風險，有第三方客戶分擔，故因失敗而出現資金鏈問題機會會較少。

此股潛力是有的，因為過往的財務數據的確理想，但現時的估值唔平，這刻投資值博率一般。

不過，這類股好難話現價一定貴，因為佢有好高的增長，只可以話現價唔平，但如果之後有高增長，那就未算太貴。只可以話，如果你真的想投資，小注好了，你要明白業務有不確定性，同時股價會好波動。

------------------------------------------------

Q22603：

龔老師您好～本人今年26歲，留意了您的專頁兩年多的時間，對您的一套投資理念非常認同！未來亦會努力實行以財務自由作目標。

到現時我用了30多萬儲蓄（佔總儲蓄6成）陸陸續續買入了幾隻股票，但可能是經驗不足，有幾隻股票處於負增長階段以及組合有點散，故打算重新部署一下。

持有股票如下：

1. 1928 :29.5買入1200股
2. 66 : 42.5買入1500股
3. 354: 4.06 買入2000股
4. 1211 : 37買入500股

5. 12: 37.5買入1000股
6. 1810: 10買入600股
7. 1830: 2.6買入8000股
8. 2382: 125買入100股

9. 2388: 23.5買入1000股
10. 2013: 13.75買入4000股
11. 788: 1.24買入26000股

想請教一下老師：

1. 現組合太分散了，老師您會建議可賣出那些股票？以便另作較有利的投資。

2. 2013前境如何？可繼續持有、賣出或加注嗎？

3. 海螺水泥及恆基地產那隻更有投資價值？

4. 現仍有大概20萬閒置儲蓄，可如何佈處？

5. 1177中藥6元是否初步進入便宜區間？

問題有點多，希望能得到您的回覆！感謝！

龔成老師︰

我地投資係一個長線計劃，只要你買入股票係有質素，長線都會增長。但中短期難免會有波動，令你出現帳面虧損，但只要佢地本質無受影響﹐照長線持有就可以。

1) 你現有持股，都係有質素和適合你。當中微盟集團（2013）和中國軟件國際(0354)質素係有，但風險性較高，要控制注碼。

由於全部都有質素，不用沽出。但長線計，你要控制組合持股，集中在10隻左右，以便定期審視和管理。

2) 微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平。

由於佢不確定性高，而你又有一定持貨，故暫時不建議加注。

3) 海螺水泥（0914）有質素，有增長力。

佢主要從事生產和銷售熟料和水泥製品，業務地區包括中國東部、南部、西部、中部及海外。而安徽海螺是水泥行業中，全球最大的單一品牌供應商。

水泥屬於基礎原材料行業，對建築行業有很高的依賴性，同時亦會與經濟增長速度有較高的相關性，特別與固定資產投資相關。即是說，當中國基建及房產市場不景，水泥行業會比一般行業處較大的不利狀態。

另外，水泥企業在生產過程中，燃料成本佔總生產成本中約佔了超過一半。若能源價格出現較大變動，就會對企業成本造成較大影響。因此，當能源價格出現較大上升時，將引致安徽海螺的成本增加，影響其中毛利。

綜合來講，佢擁有相當規模、生產能力，有一定的質素及賺錢能力，而水泥行業長期將因中國城鎮化以及一帶一路的建設，仍然會增長，但不會像過往般快速，而是進入較平穩的時期，在本質上此企業不差。

現價合理區中間，但要留意盈利有潛在波動。

恒基地產（0012）都有質素，雖然增長力不算好強，但都有平穩增長能力，不差的。

佢始終是香港大型地產發展商之一，雖然賣樓最好賺的年代過去左，但在香港賣樓仍是賺到錢，不錯的。

這股都有質素，單計佢手持農地是全港最多的發展商，就明有一定的價值，當然，農地要發展要好長時間，所以先話這股要好長線。

質素上，其實都好相近。只能說，增長潛力會係海螺水泥（0914）大少少。

4) 由於你已有30萬持貨，這20萬宜暫時儲起，等大市有較明顯回調，才出手。

5) 未算，$6只算係合理區中下部。現價計，都要有較大幅回調，才會到平宜區。

由於中生(1177)係好有質素，好多時都唔會回到平宜區。你無貨，其實現價已可以入首注，之後再慢慢加注就得。

------------------------------------------------

Q22604：

謝謝您之前的幫忙解決問題。我現時有一大難題，不知如何決定，想再次請教您。

因一些家庭原因，我會賣出現有住宅，搬到一個較大單位居住。賣出後連同手上現金有1500萬左右，現有2個方案：

1）勉強可以買入一個800呎單位自住，不過手上就冇多餘現金，不能再製造現金流。而且每月要俾3000元管理費。

2）將1500萬投資，預計有5%收息，將收息嘅錢用來租樓，除交租35,000元外，還有剩錢用來再投資。

因為預期8年後退休，然後在世界各地住一陣時間。所以方案2比較適合我們，因為退休前後改變較少，不用賣入賣出樓宇。

不過方案2要好穩陣，近日見股票起伏大，唔想只投資股票，請問老師有何建議？要求不高，5%已經可以，不過一定要穩陣。

龔成老師︰

首先，你要知道搬到一個較大單位，是一件長時間的事，還是只係未來幾年。到你退休後，較細單位都可以。

如果係後者，你可以先買入一個細單位，最好係適合你地退休後入住。現時先放租，而自住樓就另外找租盤。這樣就可以解決住屋問題之餘，又有錢去做投資。

若是前者，方案2會比較好。雖然方案1，你們可以避免受到長線租金波動的影響，但令你資金盡用，不能作投資增值，始終唔理想。

另外，由於你們退休後，都計劃周遊列國，租屋或者對你們較方便。

只要你明白，租金和投資變幅未必一致，有機會令你租金支出和回報差額收窄，導致退休現金流進一步減少。你覺得可承受這風險，咁就無問題。

假設你用方案2，資金上唔好全部買晒股票，要做一個平衡配置，去分散風險，從而提高你獲得現金流的穏定性。

你可以將這$1500萬，分成5部分。

第一部分投資收息股，你可以建立一個收息股組合，你可考慮港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之需。同時，若投資市場大跌，你可以在這時買到更多的收息股，股息率會進一步上升。

你可以將$1500萬資金，平衡地分配在上述的項目上，對你來說是最好平衡風險，同時有穩定的現金流。

但當然，你現時距離退休尚有好幾年，故不需要咁快將全部資金，放入以上收息資產。你可以先將部份，放係我之前講的平穏增長股，去保持增值。

同時間，開始慢慢用其餘資金，配置上述收息組合，為退休做準備，咁就可以。

但如果你情願穏陣D，收大約5%回報就可以。這樣你直接用資金，配置在上述5個項目，咁就可以。

------------------------------------------------

Q22605：

謝謝龔Sir，其實我只有100股騰訊五萬頭買，因以前從不投資，所以上了你堂後才明白投資重要性，不是炒買，但由於先前看市場消息不夠多功課做不足，

以為五百頭都係合理區，所以不小心早買入了，但一買就大跌所以心理壓力好大,而且買入後一直出的都是中央負面消失，所以分析不到。今天仲大跌得勁，所以

十分恐懼又怕幾年後上不回去那辛苦儲來的錢就好像不見了，所以就更怕好像學習了都錯。剛剛收到你的回覆心情平靜一點否則又高位買貨底位賣出了。

請教一下龔sir如估值減了，它上回5xx不難，但減了不是更便宜，那去返5xx會變貴那市場還願意給回貴價錢？另外想問下如重估值後5xx是否屬於貴或是合理區？

現在這幾天心情反覆不安，所以由你百萬富翁書籍從看，你的書已齊要重看一次了，先前上堂的資料也重看然後發現自己補足價格概念仍很差，但謝謝龔Sir你回覆

龔成老師︰

如果再有政策出台，係有較明顯影響，係重新估值時，有機會令現時合理價，變成平宜。

至於到時會唔會有人，願意用貴價錢去入貨，其實係會有人。特別係大市狂熱時，好多人會不計平貴，盲目追入。

但這都不是重點，重點是我地唔會預測將來走勢，只會用現有客觀資訊，去判斷現時投資決定。

我地睇到騰訊(0700)受中央政策影響，長線風險大左，所以估值都有下調少少，只要不持貨過多，就無問題。

但由於佢長線質素，未受重大影響，所以以你只持有1手投資者而言，只要一直持有就可以。此股依然有增長潛力，長線企業慢慢成長，股價自然會跟隨上升，你唔需要太過擔心。

記住，我地投資要放眼長線。如果你改變唔到個思維，只會一直因為中短期股價波動(但這個情況是必然會出現)，而承受沉重心理壓力。

其實這樣狀態，你係不宜作任何投資。

------------------------------------------------

Q22606：

成哥，以下是我的組合，但情況不是太正面，是否欠缺什麼？

388 @ 230.1 4手 405
1177 @ 7.45 2手
3067 @ 13.21 1 手
9988 @ 236.1 2手

005 @ 70.8 1手 437
576 @ 7.19 2手
788 @ 1.23 1手
941 @ 72.8 1 手
2018 @ 98 2 手

龔成老師︰

你唔好用買入價或帳面賺蝕，作為判斷一隻股票或組合的成敗標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

你現時持股，都係有質素，你照持有就可以。

但你要留意，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時港交所(0388)，持股佔組合比重很高，故暫時不要再加注。未來時間，你要透過加大其他股票比重，令佢回復平衡。

------------------------------------------------

Q22607：

成哥，我現有以下股票，請問這幾隻股長遠是向好的嗎？我應該用什麼心態去面對。例如不須理會或平常心？

有以下股票如下：

345維他奶 25.5有10000
1810小米 25.75 有10000
175 吉利 20 有10000
1177中國生物 6.71 有10000

謝謝

龔成老師︰

你現時持有股票，都係有質素和增長力，若你係年青至中年人士，照持有就可以。

近期維他奶(0345)係4隻中下跌較多的一隻，由於之前事件，對佢短期股價一定不利，但長遠，我相信影響又未算核心性，但回勇的路仍長，現時仍要睇事件發展程度，中期的影響，當中仍有未知數，只可以話短期股價上落都大。

長遠來說，佢仍有質素，有品牌、有銷售網絡。

這股可長線的，只要貨不多，可守，但有心理準備中短期弱，要耐心持有。

另外，你上述持股，都好偏重係潛力股類(1810, 0175, 1177)，佢地雖然有增長潛力，同時風險都較高，不宜持有過多。

若你算年青，潛力股最多可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

而且長線計，組合唔好只係得3,4隻股票。你要建立一個多行業，平衡，或適合你年紀的組合。

未來時間，你就要加大翻平穏增長股部份，令組合更平衡。

------------------------------------------------

Q22608：

如每個月供需要幾多錢先可以買入呢隻股

龔sir想問吓有冇啲人係真係以一個普通人玩股票致富,而其實美股同港股邊樣好啲

Sir，本人資金10000$準備開戶口。上次講嘅盈富有留意，但想問吓有冇啲增長速度較快，賺得較多穩陣嘅美股或港股，可能短線投資的！

龔成老師︰

所謂致富，每個人定義都唔同。如果以全球富人排行榜計，巴菲特就係全球最成功，以投資致富的普通人。

而預期未來一段時間，中國和美國會係全球最重要的經濟體系。因此港股和美股，長線都係有投資價值。

以現價計，港股投資值博率，係會比美股高少少。但長線投資價值，2者都係有。

至於增長較快的潛力股係有，但我係唔會做短炒，因為當有有好多不確定性因素，會影響股價，有些因素甚至係與企業本質無關。

只有長線持有，企業質素才會反映在股價當中。就連全球投資最賺錢的巴菲特，都係唔會做短炒，所以你不要持有短炒致富這種想法。

以下是一些適合你的股票，潛力股增長力高，但風險同樣都唔細。以你18歲年紀，長線可佔你組合4-5成。但由於你投資經驗較淺，不宜持有太多，最多2-3成好了。

但由於現時你投資經驗不多，暫時可先月供指數基金。到你有較多資金和經驗，才考慮其他股票。

而現有資金，可現價先入一手盈富。只後再有明顯回調，就再入一手，並長線持有。餘下資金，等大跌市地動用。

------------------------------------------------

Q22609：

我40歲，收入39000， 每月支出費用26000，如果想月供股票作退休收息之用，應該買幾多隻組合。心水2648，3110，6823，2800，各供$1000？定月供三種各供1500

如果再有多啲錢、哪隻可以月供多D

早晨，可以。俾D意見我嗎買哪幾隻月供適合我年紀。另外我應該買哪幾本書學習多啲

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

以你40歲年紀，投資著力點，唔應該係收息。而係先用一些有增長力的優質股，去累積一筆財富。到有一定金額時，才將佢地轉換成收息資產，創造稳定現金流，去支援你退休生活。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約4成，視乎你投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

書本上，你可以先睇我架《80後百萬富翁》、《財務自由行》和《股票勝經》，都適合初學者。

------------------------------------------------

Q22610：

我睇緊你寫的80後百萬富翁，希望5年能儲到人生的第一個一百萬。我計現金每月儲1萬元，然後月供$2000兩隻股票。

心目中的股票包括小米，比亞廸，騰訊，京東物流等。想問下龔sir 有冇咩意見？

我係年過45的中年婦人，有工作的，月薪$35000左右，要供樓約萬多元。謝謝

龔成老師︰

比亞迪（1211）現價偏貴，最好回到翻D先開始月供，如果你真的好想買，就小小注月供，或考慮月供2845。而京東物流（2618）不確定性都高，唔建議作為月供目標。

而小米(1810)和騰訊(0700)都係可以，但由於佢地係潛力股，有一定風險，以你年紀最多佔組合3-4成好了。

餘下部份，建議用平穏增長股作組合。因此，較理想做法，係在小米(1810)和騰訊(0700)2選1去月供，如果你想2隻潛力股都保留，則每隻各$1000。

之後再加入2隻(各$2000)的平穏增長股，餘下的$4000就儲起，等大跌市才出手入平貨。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

------------------------------------------------

Q22611：

我想問下以我個人為例 我一個人儲到$25000。如果用一半去月供，大約$13000，有冇話一般供幾多隻股票會比較理想？

定係keep住依家果3隻，加大銀碼就可以呢

我心儀係1448 同2382 ，1928 其實係咪應該直接現價買入呢 定做月供會好啲。

我哋想買或租既地區會係大埔，有考慮租或買太和寶雅苑居屋 或者 大埔中心私樓。但比較擔心既係 因為大埔好多樓盤都30年以上

而兩個盤都未做大維修，擔心買左之後 會有一大舊錢要洗 因為維修既錢應該無得預計 （居屋是否都要夾錢維修？ ）

而考慮租買既另一原因係男友 將來有可能排到宿舍 但最快都10年後

真心感謝， 你唔識得我都幫我地咁多 睇你既書同fb 好似做左朋友咁

龔成老師︰

無話供幾多隻才理想，長線計，只要你維持到個組合平衡性，咁就可以。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。

另外，你要注意翻，如果供得太多，可能會令你個股月供費用成本好高，影響長線回報。

其實你照每隻供最少$1500左右，應該問題不大。

至於你心儀的股票，福壽園(1448)和金沙(1928)都在合理區，月供和直接分注入貨，都係可以。

而舜宇光學科技（2382）要回D，才算合理區頂，才可以小注入貨。但月供，現時開始都可以。

金額方面，最緊要唔好偏重左任何一隻，咁就無問題。當然，最好加入指數基金就能令組合更加平衡。

居屋和私樓都有要大維修的可能，所以你係買這些樓齡較高物業時，你要了解清楚這大廈的大維修安排。

如果你一心係諗住等宿舍，即係長線無買自住樓的必要。其實現時先租樓，都係可以。

但由於物業都係一種資產，我地成個財富組合，唔可以只係得優質股。所以，你未來累積到較多資金時，可考慮買入收租物業投資，令財富組合更多樣化和平衡。

現時整體租金回報率不高，故不用急於投資物業，可以先以優質股為目標，去提升自己財富。

------------------------------------------------

Q22612：

龔成老師，今日我終於都買了[email protected]

我計算過估值︰
合理PE~16.73-19.63
有代表性eps~2.4
估計疫情後每年10%增長

預期有代表性Eps～2.64
合理區大約$44-$51

如果保守不計eps增長
合理區大約$40-$47

而我的買入價45.9比較以下，計算的價格應該是合理區中或中上，請問小弟的計算對嗎？

想問這輪抗疫措施對0027對中長期有核心影響嗎？

龔成老師︰

銀娛(0027)的長線投資價值無受今次疫情影響。但始終疫情尚未穏定，你預佢長線

你計出的估值，大致都合理，現價大約合理區中下。因此，你買入價係在合理區水平。

你預係大約合理區中下部，此股有質素，可長線持有。

------------------------------------------------

Q22613：

哈囉 我啱啱開始出嚟做野 想開始每個月儲錢作為買樓基金 有睇開你啲盈富月供 但又對呢方面唔識 想你比下意見 長供建行定盈富好

龔成老師︰

策略上，你可以投資「平穏增長股」和「潛力股」，去累積這筆置業資金。你每月5成儲蓄做月供。其餘先儲起，用一邊月供一邊儲蓄的策略。

盈富(2800)和長建(1038)都可以，但前者係58間優質企業的組合，更有效分散風險。如果你不懂選股，可以先全數供盈富。以下係一些適合你的股票，你可以參考下。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

由於你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類，或者暫時只供盈富(2800)，都係可以。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q22614：

龔sir，如果700有機會跌到$400, 我想入1手作長線，那麼在我投資組合裏面「潛力股」的百分比又會再增加。

我日後再入市時，如果集中翻在「平穩增長股」及「收息股」是否可以平衡翻呢？這樣操作是否可以？請指教。謝謝！

龔成老師：

騰訊（0700）在$400，你可買。

你首先要設計好自己的長期「組合%」，如果年輕潛力股比例可較多，年長就收息股比例較多。另外，潛力股風險較高，這點你都要明白

設計好大方向，比例，之後就慢慢作出配置，這刻買入潛力股後，之後買入收息股等，可平衡。

總之，要建立一個「長期」的平衡組合。

------------------------------------------------

Q22615：

龔成老師你好，我同老公係理財方面有較大分歧，所以想請教下你。因為生左小朋友，我哋計劃3年後買樓，預大約買800萬左右既樓，首期預俾2成左右。

但佢呢一年，完全儲唔到錢，將我地的儲蓄計劃搞亂左，佢同我理財概念完全相反。

然後我哋吵大架…想問下我應該點樣去解決呢個僵局？

唔知呢個似感情問題定理財問題多啲，點都好，我以前係覺得係香港買樓係無可能，係你令我知道一步步黎，最終都可以達成目標，令我賺到人生既第一個一百萬，多謝你！

龔成老師︰

出現分歧，係正常事。100種人，就會有100種不同想法，100種不同目標。最重要，我地要"互相"遷就和諒解，才可以一同生活下去。

所以，你們真正背後的問題，有機會不是投資理念上，而是在溝通上。

我建議你地先將自己冷靜下來，之後再找個機會，作理性討論。因為係不理智情況下，只會令你地愈做愈錯。

你地要嘗試令對方明白，自己所想的未來計劃、目標和擔憂。新車已經買左，係一個定局，唔好再浪費心力去諗。

往後的路，依然係可以改變，想一想如何係現有資源，和大家都可接受情況下，繼續向前，才是你們應該做到事。

我明白準備結婚，去成家立室這個階段，係好忙，一定有好多野煩，好多野會不如意。

但這個正是你2口子要上的必修課，你試下放輕個心情，唔好比買樓或者投資問題困死自己。你現在重點，應該係要學習如何2人同步，一齊去走往後的路。

我會建議你地日後，多溝通，定共同目標，例如「如果我地的財富去到XXX水平，就可以買XX當獎勵大家」。

只要係一起走，好多問題都解決得了，加油!

------------------------------------------------

Q22616：

Hello, 想問問少少股市知識

可以這樣假設，只要標指股息率不低於10年期美債孳息率的0.54，美股就有一定吸引力，若然這比率降至0.4或以下，對美股是危險訊號。

觀乎金融海嘯市況最蕭殺時，債息率曾高見4.1厘，而股息率低見1.7厘。

"標指股息率" 係講緊咩同埋邊度搵到?

龔成老師︰

其實可以係其中一個參考，10年期美債孳息率你可以理解為一個無風險利率。而股票股息率，係一個你需要承受一定風險，才可以獲得的回報。

因此，若果你無風險回報，比有風險回報還要高的話，其實係反常，某程度係代表個市大過熱情況。

但我地唔會因為咁樣，就斷言大市已經好危險，純粹只係一個參考訊號。

因為如果企業係賺錢的話，股息會增加，慢慢2者差異又會重回正軌。而且大市熱，唔代表個股係貴，我地一定要獨立分析企業，去得出一個較準備的結論。

------------------------------------------------

Q22617：

龔Sir,我是一個40歲單親母，月入两萬，無資產，每月草一两千（甚至幾百）現只有現金流两萬，請教我可以買D乜？眼看你介绍的，全部都是一手幾萬的，可買不起

龔成老師︰

以你年紀計，投資應以增值為主。但你現時資金不多，我建議你2萬不要動用，用來作生活上應急會較好。

至於每月儲蓄，你都比較少和波動。你要找出一個你覺得每個月都儲到的金額，用佢去做月供指數基金，去累積資產。

你可以去銀行或證券行，開個月供股票戶口，之後每個月定期咁去月供，咁就可以。

同時間，你睇下有無方法開源節流，去提升每月可儲蓄金額，用去月供更多不同股票，令你財富增值能力得以增升。

------------------------------------------------

Q22618：

我想了解下咩係月供股票，因為我岩岩睇到你既po。

我係新手31歲，有2-3萬可用資金！

龔成老師︰

簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入某股，假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3年以上，之後持有5年以上。

月供最重要的一點，是「選股」，如果你無選股能力，就投資指數基金。

而財富增值方面，當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時31歲去計，可以投資一些「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

但由於你係新手，我建議先集中係指數基金。餘下資金和另一半儲蓄，我地就等機會，當大市出現較大回調，就加大力度掃貨，然後作長線投資。

------------------------------------------------

Q22619：

龔成老師您好！前两年間中有留意你的專欄，已覚得你的投資概念很好，近来才知道你開了臉書，原来老師那麼年輕，真的是後生可畏！

本人47歲，家庭主婦，與先生大部分在海外生活，没有子女，海外有自置物業(巳供満)，先生还有10年多退休，退休後有年金，

估計可補貼至少—半生活費，他有儲蓄習慣，近来開始投資海外股票市場。

本人因不熟悉海外投資市場，故選擇持續投資港股。幾年前因沒有投資知識將现金集中於收息股，但發觉組合較保守難以増值。

希望老師給予意見如何調動股票以達至最好的增值效果，如賣出那些股票轉其他増值股票。生活負担不重，可承受風險中上。

现金$10萬+保险儲蓄約$20萬

(以下是持有股票的平均買入價)
1)中国銀行(3988) @4.28 /10,000
2)中交建(1800) @10.88/2,000
3)煤氣(03) @14.16/14,000
4)中石油(857) @4.42 /16,000
5)中移動(941) @48/2,000

6)京東健康(6618) @128.5/400
7)招金(1818) @8.0 /2000
8)山東黃金(1787) @13.98/2000
9)鞍鋼(347) @5.12 /4000
10)騰訊(700) @470 /100

老師無私賜教，感激無限！

龔成老師︰

首先，你有一個投資理念很正確，我地永遠只應投資自己了解的股票和市場，這點其實很重要。

以你47歲，都有增值的空間，但選股上會保守少少，主要集中係一些平穏增長型股票。

山東黃金（1787）、招金(1818)、鞍鋼股份（0347）和中石油(0857)都是商品類股票，本身產品無獨特性，價格很受市場影響，故投資價值較中等，不宜持有太多。

中交建(1800)質素只算不過不失，而京東健康(6618) 雖有質素，但不確定性好高，這2隻股票同樣不宜持有太多。

其餘持股，都係有質素，可以長線持有。但煤氣(0003)佔比重太高，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

因此，我建議你沽少少，換至其他優質股，去平衡翻個風險。

現時大市只在合理區，資金不宜盡用。你10萬現金可以先留起，等大跌市才出手。以下是一些適合你的股票，現價合理，你煤氣套現和新資金，都可以以此為投資目標。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。

至於保險，其實你買基本保障就可以。儲蓄保險增長力唔高，不宜投資過多。

以上策略，主要係講你地增值部份。但當你們將正式踏入退休之年，就要進行調整。開始慢慢將手上增長股，換成收息股，透過其派出股息，去支援你退休生活。

------------------------------------------------

Q22620：

老師您好，首先多謝你耐心解答大家問題。想請教投資方法。

本人42歲，月入兩萬幾，有現金90萬，有一層樓值520萬，淨番50萬樓宇按揭就供完。每月可儲6000。

大概持股票市值20萬：包括：

0005匯豐1600股，平均買入價79.9，
1088中國神華500股，平均買入價37.75，
1398工商銀行5000股，平均買入價5.093，
2388中銀香港3000股，平均買入價27.7，
3913合景悠活3000股，平均買入價7.9，
總括黎講共蝕左約9萬。

我投資知識極少，唔識分析股票，“月供股票”都係最近睇你嘅信箱先知有呢樣野。請指教什麼投資股票策略適合我。

另外，我是否應該還清按揭50萬，但現金就得番一半龐身，不過按揭利息唔多，每月千幾蚊。請問我應該點樣善用我現有資源，令自己財務自由，有被動收入，可輕鬆退休？

好同意你話應該長線投資，令財富增長。謝謝指教！

龔成老師︰

首先按揭方面，由於現時市場息口不高，我建議用來投資增值，財富增長效率會較好。

另外，你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你現時持股，都係有質素，可長線持有。但較大問題係你組合中，大部份只係收息股(0005, 1088, 1398)，佢地增長力不高，主要係收下息。

以你年紀都有一定增值需要，未來最好加入一些有增長力股票，去增升翻個財富增值效率。

其次，我發現你好集中係銀行股。記住，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

所以，你暫時唔好再增持銀行股了，到你組合平衡性回復正常，才再考慮。

未來時間，除了90萬現金，你都可以用埋每月儲蓄，去做月供股票，為自己財富增值。

你42歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$3000做月供。其餘先儲起，用一邊月供一邊儲蓄的策略。

但由於潛力股有一定風險，你投資知識不高。我建議你先$2000月供指數基金，再$1000供多隻平穏增長股。到你學會更多投資知識和技巧，才好考慮加入潛力股類。

現時大市只是合理區，你現有90萬資金可以先投入20-30萬，用"分注"形式，慢慢買入上述平穏增長股。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定金額，你就可以將佢地慢慢換成收息資產，透過其產出的現金流，去支持你財務自由後的生活。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22481-Q22500）

Q22481：

老師，如果我找你私人教學股票，可以？我想有機會私人向你好好學習。

我可以自己做到快速睇完一份財務報表就知道呢隻股票會升定跌，我本身都有一定的股票知識。

另外，其實你認為股票算唔算是一種技能和手藝？？

因為我較多時間放在研究股票，但啲人成日話我不務正業，又講股票等同於賭博。但我自己認為喺一盤生意。

龔成老師：

抱歉，我教學10年，都是大班教學，一次過令多人得益，而不提供私人的教授。

始終我一個人的時間是有限的，我要想想如何在相同時間，令最多人有所得著。

這與你是否有實力無關，而是我本身的時間問題。

我過往做過銀行、證券行，當中都要用到股票知識的，你現時擁有技能，其實可以好好發揮。我建議你大量閱讀，增加你的知識，然後再上我的股票班。

------------------------------------------------

Q22482：

老師，你好！因承繼了家人的股票遺產，我地想買樓所以已沽了一部分的股票，現在還持有以下的股票，想請問老師的意見

01398
01813
00005
01888
03333

00939
02689
03913
01288
02380

03377
00941
02238
00175
00388

02238
02314
02689
02800
03988
06837

因不想持有過多的股票，請問邊隻股票合長揸？有邊隻股票可以現時/近期可沽？適合賣出的價位係邊呢？請指點

龔成老師︰

1398, 0005, 0939, 1288, 2380, 0941, 2314, 3988係收息股類，增長力不高，主要只係收下息。若你係年青至中年，這類股票不宜持有太多，你可沽出大部份。相反，你都將近退休之年，這類股票你應保留，去為自己創造現金流。

3913, 2238, 0175, 0388, 2800這些股票較有質素和增長力，若你係年青至中年，這類股票建議保留。若你較年長，就不宜持有太多。

1813, 1888, 3333, 6837風險比較高，唔建議持有太多，你可以沽出部分。

2689, 3377質素較弱，建議沽出。就算相保留，都只宜好小注。

現時這些股票，大致上都在合理價位，未算好貴。但無人會知，幾時先去到一個好貴架水平，所以我建議你有策略地，去慢慢出貨。

你唔好等到要買樓先一次過沽，最好係分段，每距一段時間就沽少少。例如你一年後會買樓，可能你就每2-3個月就沽少少，以減低價格波動，所造成之影響。

------------------------------------------------

Q22483：

你好，龔Sir,小弟睇完你兩本著作獲益良多，正在步處未來十年財務計劃，希望可以盡快財務自由，希望你可以俾d意見小弟。

我和太太42 歲，三年前買了一層公屋450萬，收租$1.1萬（三成首期）

一年半前買了一個$760萬單位自住（2成首期供30年）

家庭月入10萬，扣除開資每月儲蓄3萬，手持現金$400萬，目標希望可以盡快把自住物業供完千+每月有被動收入5萬，應該可以退休。

請問應該如何投資及要花多少時間才能達成以上目標呢？

龔成老師︰

由於你現時財富組合，已經有2個物業，因此我地係未來進行增值時，會先集中係優質股上，以免成個財富組合，太偏重物業類，而造成風險。

如果你希望8年後每月有5萬蚊現金流，以股息率6%計，你需要本金1000萬。

以你42歲，可以選擇一些「平穩增值股」+「潛力股」作投資目標，去累積這筆所需資金。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

如果你現時無太多投資經驗，潛力股這類風險較高的股票，你就不要持有過多，最多維持2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-4成，視乎你投資經驗多寡和了解這些股票程度而定。

大市現處於合理水平，那400萬資金，你可以先用100-150萬，以"分注"形式慢慢入貨。餘下資和每月儲蓄，就等大市有明顯回調，才慢慢大力度掃貨，並長線投資。

我假設投資回報有10%（連股息再投資），你每月投資$30000 + 400現金，10年後大約會增值至1600萬，這樣安排相信很大機會達至你的財務目標。

------------------------------------------------

Q22484：

老師，記得你叫唔好破產
但又差卡數 又有貸款 唔知點搞好

龔成老師：

第一，提高收入。

第二，減少支出。可以剪去所有信用卡。

第三，債務重組，將高息負債轉到較低息。

第四，定一個還款計劃。

------------------------------------------------

Q22485：

你好，請問 2814 三星 現價值得投資嗎？

龔成老師：

三星FANG ETF（2814）的投資目標，係追蹤NYSE
FANG+指數的表現。是一個美股潛力股基金。

首先，FANG+係代表美國上市多隻領先既科技股票，即係代表Facebook、Amazon、Netflix、Google，而該指數會再加上其他科技股，如Twitter、Tesla、百度等，即是全球處最前列的科技類公司。

這基金是一個潛力基金，長遠正面，但要留意價格會較為波動，加上近年科技類公司上升左唔少，因此現價唔算平，建議以月供的模式投資，或少注好了。

買入後長遠持有。

如果同時持有香港上市的科技股，再加上這基金，能有平衡配置的效果。

------------------------------------------------

Q22486：

你好！龔成老師！我係你fans。我想揀隻收息股，現價買入659，6823定939好？

本人30出頭

龔成老師︰

若果以收息股黎講，建行(0939)和香港電訊(6823)，質素上會較高，現價合理，可以分注。

但當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時30歲出頭計，是財富增值的黃金時期，應該先集中投資「平穏增長股」和「潛力股」這類增長股，而唔係收息股。

你應該係先用增長股，去累積大個財富。到你退休時，才換成收息股，去創造穏定現金流，支援退休生活。

------------------------------------------------

Q22487：

你好，我本身有買你嘅書，都有睇你yt 嘅片同留意fb。

我同女朋友依家23歲，兩個人加埋只有40萬，希望5年內儲夠130-150萬，未入過市，想入。

有留意你話要買「潛力股+平穩增長股」，想了解下京東物流、中國龍工、中國銀行、中芯國際、華虹、領展呢幾隻股票如何，值得入貨嗎？

幾多價位先算合理呢？早幾日大跌市冇建倉有啲後悔

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你23歲，應以增值為主，可以用一些「平穏增長股」 + 「潛力股」作組合，去創造一個增值平台。

京東物流（2618）和中芯國際（0981）質素係有，但未到最高質素，只宜小注。前者在合理區，而後者要等佢回多少少，才好開始慢慢入貨。

中國龍工(3339)質素只係中等，現價合理，但不值得太大注。

中行(3988)係收息股，增長力唔會太強，主要係收下息，不適合你年紀。

虹半導體（1347）有質素，發展不差。但現價有少少貴，回翻D才開始慢慢入貨，會較好。

領展(0823)有質素，現價算合理區頂，可分注。

其實我地投資優質股，一般預期年均回報大約10-15%。要單憑40萬，5年內累積150萬，係有點難。

建議你，再加上每月用$12000月供優質股，我假設投資回報有10%（連股息再投資），你每月投資$12000 + 40萬，5年後大約會增值至150萬，這樣安排相信很大機會達至你的財務目標。

策略上，你可以投資「平穏增長股」和「潛力股」。你每月5成儲蓄，即是用$6000做月供。其餘先儲起，用一邊月供一邊儲蓄的策略。

若你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有40萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22488：

龔Sir先前上完你堂明白價值投資道理，但700仍高位五百幾買入，見現在一直下跌，上了堂仍不懂補捉合理價而且現在一直下跌，

所以恐慌此股能否上回五百幾，是否要四百幾時止蝕，本身認為它是有質素的，但看完一堆股評人說好像會跌至三百幾而且好難上返去五百，

因此現在好像沒信心自己先前是選了優質股，好像選擇錯誤入了的心情。但你上堂時分享了比亞迪跌至底點仍持有的心態，好像有點困難學到。

所以想知道現在騰訊俾中國政府這樣大壓，而且北水同外資同時流走，那股價是否不能上回去，因為股值已經不是當初計的這樣，如果重身估值將可能是大跌了，

那賺錢優質股會否變成無法上升回去的股，希望老師指點下，謝謝

龔成老師︰

你要學識分辨企業質素和價格之餘，都要學懂冷靜分析大市現狀，和一些發生的因素。

就好似近期股市大跌，主要係中央一系列政策出台，加上大市氣氛較弱，令不少優質股都出現較大調整。但我地要了解翻，這些因素，係唔係會對企業造成長線影響。

騰訊(0700)的確係會對佢賺錢能力，有負面性影響。

所以，估值上會減，同時如果持有太多貨，可能要略為減持，因此政策對佢長遠有影響，影響了賺錢能力與估值，不過，未到核心性影響（即是未去到令企業無錢賺、無優勢，而是賺錢能力略減）。

但由於企業有一定規模和質素，相信佢長線會適應到這些新規則，令業務重回正軌。

我暫時唔見到，騰訊長線投資價值有明顯差，現貨可持有，相信回翻上去5XX，唔係大問題。但你預佢中短期，個股價一定會好波動。但只要你目標係長線，咁就無問題。

------------------------------------------------

Q22489：

如果有500萬，全部買港燈成世收息係味最好，唔想煩。無今多時間，成日心驚驚 驚d錢變廢紙

買左50隻穏健收息股本書，重有咩會適合我架

龔成老師︰

港燈(2638)係有質素收息股，適合你家人退休之用。但完全集中晒係佢身上，就唔係咁理想。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

若你不太懂選股，你可以集中未來恒生高股息率（3110），大約佔6,7成，再加上幾隻不同行業的收息股，咁會較好。

如果你真係完全對這些收息股，無任何概念，你才100%持有3110。

但你緊記，現時大市只在合理區，未到好平。你只宜先用一半資金，分多注去慢慢入市，唔好貪快一次過入晒。

我地要分開多注，去平衡價值波動所帶來的風險。而餘下一半，就等大跌市才出手。

以下是我的13本書：書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）
《80後千萬富翁》（初版）

除了50隻收息股，建議你首先睇埋以下3本，之後再睇其他。

《80後百萬富翁》
《股票勝經》
《財務自由行》

------------------------------------------------

Q22490：

您好，龔sir，我今年26歲，月薪2萬。無投資經驗，又想資產增值，會睇下啲行業龍頭股，一年前心急入左市，依家9成資金用左黎買阿里巴巴

因為股價一直跌我又一直買，依家買左30萬貨，平均會242元，不過佢長期低位，我唔知應該一直等，定依家低位放再轉下其他股，又應該持有咩組合？希望指點一下，感謝！

龔成老師︰

其實你買入一隻股票後，買入價已經唔重要。你是否持有，應該係睇佢質素，有無長線投資價值。如果有，帳面虧損唔洗太在意，因為佢長線會增長，慢慢令價值提升。

你26歲，投資應以增值為主，阿里巴巴(9988)係合適。

但問題係，我地唔好成個組合，只集中係1隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

因此，你要沽出部份，換碼至以下增長股。未來新資金，都可以用以下「平穏增長股」 + 「潛力股」作目標。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

現在你每月先用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22491：

老師，想請教有關1024快手，我277數蚊買了很多貨，之後不斷跌，有咩對策？隻股前境仲好喺嗎？謝謝指點

龔成老師：

快手（1024）有兩大問題，第一，佢一直都貴，現價仍唔平，你在高位重貨，其實要在反彈減持。第二，政策因素，對佢賺錢能力都有少少影響，不過，佢仍是有質素的，未到劣質類。

係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展，但不宜持有太多貨。

------------------------------------------------

Q22492：

老師你好啊！ 今天大市跌了千多點，我分注買了幾隻股票，也想你對我的組合給予意見。謝謝你。

月供股票：
中電：521 @$87.6 （這隻已停供了，在高位時供的）
煤氣：1827 @$14.08
港鐵：984@$43.93
粵海：1168@$11.89
領展：326@$78.8
中生：5097@$7.11
盈富：488@$28.28

分注買入：
福壽園：2000@$7.2
金沙：[email protected]
阿里巴巴：200@$196
3067：1000@@17.23

組合共11隻，會否太散？

而大部份買入價都略高，所以現在賬面都是蝕的。 希望老師有時間可以給予意見，謝謝你

龔成老師︰

你現時持有股票和月供組合，都係有質素，買入價大致都合理。若你係年青至中年人士，這些股票都係合適的。

你要記住，就算再優質股票，中短期都會出現波動，只要質素無變，你唔洗理佢帳面虧損，照持有就可以。

組合有11隻股票，又少少多，勉強可以。

由於上述的股票都是有質素的，因此，不用改變，投資要長線，你保持進行就得。不用理短期的股價波動。

------------------------------------------------

Q22493：

老師，多謝你之前比既議建。另外改變左投資既方式，都開始睇緊你既書吸收知識。呢半年我同男朋友都為左將來煩腦緊，一直15/16唔知點決定買樓定租樓既問題

我地兩個分別37同39歲， 兩人月入$63000 因為黎緊想結婚，所以打算搬出去住， 兩人家用同保險供款$25000左右 ，一個月可儲$38000

1/ 想買細價樓 $520萬樓下 但唔知手頭既錢夠唔夠 定 應該租兩年樓 用手頭上既錢黎增值下

2/ 手頭有110萬cash , 股票39萬

如果要租樓 股票同cash 應該點分配

1038 長基建 - 500 $46
388 港交所 - 100 $508
2800 盈富 - 500 $28.956
3067 安碩 - 558 $17.458
1475 日清 - 9000 $7.348

1337 雷蛇 - 10000 $2.58 (準備放)
3399 粵運交通 - 1000 $4.96 (準備放)
700 騰信 - 100 $565
1810 小米 -2000 $24.277

3690 美團 - 100 $204 (準備放)
9988 阿里 - 100 - $279.4
241 阿里健康 - 2000 $27.2

年頭開始做月供，依家供緊
2800 -$2000
3067-$1500
1810 -$1500

想老師比d 建議我哋

龔成老師︰

以你2人收入，做9成按揭供25年或以上，應該可以供到520樓下的物業。當然最終你要睇埋，銀行佢地審批、估值、當時息率，才會知道最終結果。但粗略估值，應該可以。

至於先置業定租屋，你可以睇翻在你能力範圍內的樓盤，能否滿足你生活需要。講緊唔係而幾年﹐係未來20年。如果可以，你地又有信心長線「供得起」，咁就無問題。

但從資產平衡配置角度，你在買樓同時，必需留有一定股票，以免財富組合過於偏重物業類，造成過度集中性風險。

若你決定先租屋，去要增值多D本錢，才去置業。你可以用「平穏增長股」 + 「潛力股」作組合，去創造一個增值平台。

現時你組合和持股，都係合適。但當中的粵運交通（3399）質素未算強。美團(3690)、阿里健康(0241)、雷蛇(1337)不確定性較高，這4隻股票，不宜持有太多。

你可以減持少少，但不至於要全數沽出，因為佢地唔係無質素，只係風險較大，要控制注碼。

另外，現在你現時月供金額有點少。建議你用每月先用5成儲蓄做月供。其餘先儲起，用一邊月供一邊儲蓄的策略。

大市現處於合理水平，那110萬資金可以多用30-50萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

而租金部份，你就唔好去投資，直接留起現金去支付。

------------------------------------------------

Q22494：

龔老師妳好，首先祝你事業和運氣蒸蒸日上！我想請教一下，我有本金300萬左右，沒有投資經驗，想買一些保本的產品，目標是有4%回報和安全

之前聽你說買2800，我也打算買，不過我想買幾種產品以策安全，請問你有甚麼投資策略可推薦嗎？感謝！

龔成老師︰

其實完全保本產品，係現時低環境，你基本上係唔會找到4%。

如果你想完全保本，你可以考慮做定期、A級債券、年金之類，但唔會有4%，而且債券都有違約風險。

至於我講的盈富(2800)，或者一些優質收息股，佢地係相對穏健。但始終都係股票，一定會有股價波動，無可能做到保本要求。

而且，你現時才22歲，十分年輕，風險承受力應該較高。就算你無投資知識，都可以透過有策略地投資一些優質股，去進行增值。

你22歲，應以增值為主，建議你用「平穏增長股」 + 「潛力股」作組合，去創造一個增值平台。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

或潛力股︰安碩恒生科技(3067)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

大市現處於合理水平，那300萬資金，你可以先用30-50萬，以"分注"形式慢慢入貨。餘下資金，就等你提升投資知識後，再慢慢因應市況，加大注碼，並長線投資。

另外，除了用現有資金，我都建議你用每月儲蓄，進行月供股票，去加快你財富增長。

策略上，你每月先用5成儲蓄做月供。其餘先儲起，用一邊月供一邊儲蓄的策略。餘下一半，就等大跌市時，才出手入平貨。

------------------------------------------------

Q22495：

想問老師，點睇私樓與居屋?我目標係馬鞍山 首選新港城，呢一年升幅太誇張。337實呎2房已經要670萬起跳（議價可能650萬都得），計埋裝修30-50萬，差不多用盡2人儲蓄先比得起

而居屋可以4xx呎5xx萬，但我擔心過多十年會甩皮甩骨 始終質素不及私樓。

但我地深信10年後300呎係唔夠住 有了小孩一定要換大啲

依家好忐忑不安 唔知買咩先啱

龔成老師︰

如果你買入新港城，要資金盡用，其實唔係咁理想。我比較建議，係買樓同時，都可以留有一定資金和優質股作增值。

其實，居屋投資價值不及私樓，但勝在入場費較低，令你可以有更多資金空出來，作其他投資。所以，作為自住樓，居屋都有佢存在價值。

你可以睇翻你長線生活需要(10-20年)，如果4xx呎係可以，而佢質素又唔係太差，其實你選擇居屋都無問題。

相反，如果4xx呎都係唔夠住。你就可能先買一個較細單位(私樓/居屋)，去暫住。同時間，用優質股保持增值，等將來可以細屋換大屋。

另一個方法，就係唔買屋住，直接用優質股增值，之後買理想物業。但就有一個風險，就係萬一股市跑輸樓市，你買樓成本變相會升左。

選擇那一個方案，你可以睇翻自己人生計劃和實際情況，去作決定。

------------------------------------------------

Q22496：

我今年27歲，每月可以儲1萬5千，現時流動資金約15萬

股票持有：
騰訊$492 100股
雷蛇$2.5 15000股
金沙$31.52 4000股
海螺水泥$42 1500股
香港寬頻$11.3 10000股
安碩恆生科技$18.07 1500股

我現時投資組合可以嗎？

我另外想儲錢買樓、我應該買居屋(假設實抽到)定私樓好？

龔成老師︰

你現時才27歲，應以增值為主。你現有持股，大致上都適合。

雷蛇(1337)不確定較大，唔建議你持有咁多，最好沽出部份，換至其他有增長力的優質股。

香港寬頻(1310)主要係收息，唔適合你年紀。

現時大市只在合理區，你現有15萬就等大市有明顯回調，才慢慢加注。

至於置業方面，居屋投資價值，比私樓為低。但由於佢售價跟市場價相比﹐係有折扣。

你考慮時，可以從長線角度去考慮，邊個方法先至可以令我地，有較多現金流空出來，作投資增值。

因此，從財富增值角度，居屋係值得考慮。

所以，其實無話邊個明顯較好。若係自住樓，你可以考慮埋邊個物業，可以配合你長線生活需要，而且又有信心"供得起"，去作最終決定。

------------------------------------------------

Q22497：

龔老師，你好，想請教你。我有100股阿里巴巴，買入價是$287，應唔應該現在再買入100或200股呢？或者，會唔會應該將資金買入小米（冇貨在手的？

另外，想問下，如果吉利及渣打，應該選擇邊隻好？我有400股渣打，買入價50.5。本身是沒有其他銀行股的，亦沒有任何車股。

麻煩晒你，更加多謝你，得到你的提醒，及看你的書，知道應看企業質素，買入優質股，沒有因股市大起大落就情緒波動。

龔成老師︰

從現價計，阿里(9988)算係合理區中間，而小米(1810)仲有少少貴，要回多1成倒，才算開始合理。

以平貴水平計，你係應該加注阿里(9988)。但你要考慮多一件事，就係持股組合平衡性。

如果你本身資金不多，我建議你分少少去買小米(1810)，去分散風險會較好。如果你資金較充裕，尚有2,3注資金係預留入阿里，現價可加1注。

至於吉利(0175)及渣打(2888)，我會建議等入吉利(0175)，但現價略貴，要等佢回多1,2成才好開始入貨。

而渣打集團（2888）質素只是一般。

雖然未到劣質，但質素不高，但本地銀行股中，賺錢能力算是較弱。加上銀行業近年的環境不及過往，賺錢能力不及以前咁好，相信佢之後，都只是好基本增長，不要對股價有太多期望。

投資價值只是一般，我會建議你慢慢換至其他銀行股較好。

你可以考慮恆生(0011)或中銀香港(2388)，現價合理。前者係收息為主，加少少增長。而後者增長潛力會較強，但風險都會略高。

------------------------------------------------

Q22498：

1: 老師，我想問下，如果想用nav來衡量股價的高低，除左地產同銀行類，仲有冇其他行業係適合？

2：老師，想問這幾天都跌了咁多，最大持倉可加到幾多成？

3：老師，我自己計9698估值係下限大約60附近，依家跌穿左咁多，但我又真係唔認為我計錯，因為我都綜合左好多卷商報告，想問算唔算係恐慌式下跌跌凸左？

4：另外承上題，第3題，通常呢d殺錯價，係未好快會升番，因為我又諗，冇理由咁好比個錯位我地慢慢買，我呢個諗法岩唔岩？

龔成老師︰

1) 一些資產可以明確反映到佢價值和賺錢能力的股票，其實主要係地產同銀行類，有部份製造性行業，都可以用到。但你要先了解清楚，佢資產價值，有多大程度可以反映佢賺錢能力。

如果係有好核心性影響，你才可以用市賬率去分析。

2) 無大變，大致持有3-5成現金等機會

3) 萬國數據（9698）有質素的。

佢的業務為開發及營運數據中心，根據佢公司提供的資料，佢係全中國最大的運營商網絡中立數據中心服務提供商，市場份額約2成。

現時主要通過GDS上海、GDS北京及其子公司進行該等業務。GDS北京及GDS上海各自持有經營業務所需的互聯網 數據中心牌照。

佢提供託管和管理服務，包括創新和獨特的託管雲價值主張，機房面積為266,260平方米，有一定的規模。

見佢生意有一定的增長，行業前景正面，現價算係合理區中間倒，未至於跌到好平。此股投資價值都有，但就唔建議太大注。

4) 佢幾時會上翻，無人會知。近期不少中央政策，令成個大環境多左不確定性。佢客戶當中，包括阿里巴巴(9988)和騰訊(0700)這些最近較受打擊的大企業。

故市場可能憂慮，佢生意會唔會受到影響。畢竟佢頭2大客戶，佔生意額過半。雖然年報無列明頭2個客戶是誰，但相信離不開某2間。

只能說，投資此股係可以，現價都合理，但唔好太大注。

------------------------------------------------

Q22499：

想問老師，最近研究緊新能源氫氣概念股，這些都是未來世界大趨勢？我見到有好多大國家都有實質政策扶持

想問長城汽車，金馬能源，中國旭陽，中國石化和濰柴動力都是有優質股嗎？

老師你有哪個氫能源股推介？

想問老師 我有3手阿里巴巴。依家跌穿左招股價，應該走哂3手？

受監管下，阿里巴巴本來的質素有下降嗎？

龔成老師︰

其實綠色能源，一定會係未來大趨勢，新能源氫氣有機會係其中之一。

但我地唔會因為咁，就盲目去投資一些相關概念股。因為你要本身這個能源，係有一定效益，而企業又能成功將之市場化，才有機會有投資價值。

好多時，當中央出現政策扶持時，就會造就不少相關企業急速發展，但好多時都係良莠不齊。因此，你要認真分析企業本質，才去下投資決定。

我未有研究氫能源相關股份，所以無建議比你。

如果你睇好新能源類，可以考慮GX中國潔能（2809），其目標為追蹤SOLACTIVE中國清潔能源指數NTR之表現。

當中佔最多為"半導體產品與設備"股份，約組合4成，其次是逾2成的"獨立電力及可再生電力"。

此股平貴不易分析，而且頭10大股份中，除了信義光能（0968）外，其餘都在內地上市。潛力度是有的，但會比較波動，如投資宜慢慢分注，可長線。

長城汽車（2333）、濰柴動力（2338）、金馬能源（6885）、中石化(0386)都有質素，但未算係最高。

濰柴動力（2338）不確定較大，要控制注碼。而金馬能源（6885）、中石化(0386)增長力唔高，主要係收下息。

中國旭陽（1907）無特別分析，只見之前有些報導。

佢之前公布，澄清最近涉及其於河北省定州市及內蒙古的氫能項目的若干媒體新聞報道，指定州項目試產，並擬於呼和浩特市建加氫站。

該集團指，有關於定州經濟開發區河北旭陽新能源產業園內建設運營氫氣儲運和建加氫站，有關生產基地去年7月開始試產，探索區內在氫能存儲、運輸和燃料相關電池布局機會，開拓京津冀市場等。

至於去年，該集團合營企業與呼和浩特清水河縣政府簽訂另一項氫氣項目框架協議，合作於清水河縣開展氫氣開發項目。

與定州項目相似，該集團將負責於清水河縣進行氫能生產、運輸和建設加氫站，把該市發展為華北地區氫能輸出基地。

只可以話有風險有回報的類別，如真的想投資，一定要控制好注碼。

另外，你唔好用買入價，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

阿里(9988)近期受中央政策風險和大市氣氛影響，出現明顯回調。但暫時唔見長線質素，有明顯變差，現貨照持有就可以。

------------------------------------------------

Q22500：

你好呀龔sir！請問面對依家嘅跌市，我應該點變動我嘅投資組合呢？

00909@1000 (31.4)
01044@1000 (52.35)
01177@3000 (7.5)
01299@200 (92.5)
01448@1000 (7.35)

01530@1500 (9.067)
01810@400 (24)
02126@500 (25)
02158@400 (52.75)
03309@2000 (9.4)
03690@300 (331.667)

06618@300 (111)
06690@600 (28.433)
09633@600 (45)
09988@300 (235)
ibond@400

月供緊(每月每隻$1000)
00066@326 (43.4)
00388@17 (482.176)
00823@257 (70.086)
02800@498 (28.559)
03067@776 (17.372)

我明白依家嘅組合實在太散，而且資金只能夠支持我繼續保持月供股票。請問我應該蝕放D貨再趁低買其他股票溝貨定點？

唔該哂

利申：我27歲

龔成老師︰

這些股票，只要係有質素，你係應該長線持有，等佢自然增值。唔建議你咁換來換去(除非已經好貴)，如果其餘股票真係平，你可以用新資金投資。

你現時持股真係好亂，好散。未來時間，你要集中翻係10隻以內，否則你好難定期去審視佢地質素和管理。

以你27歲計，應該先做好財富增值部份。你現時月供組合，係可以。

而ibond只係收息產品，唔適合你。

你現時持股，都係有質素，但有個好大問題，就係你非常集中係醫藥股。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但你唔洗沽出，只要用你新資金，去慢慢將個比例拉翻平衡，咁就可以了。

另外，明源雲(0909)、三生製藥（1530）、藥明巨諾(2126)、醫渡科技(2158)、美團(3690)、京東健康（6618）不確定較高，雖有長線投資價值，但不宜持有太多，暫時唔建議加注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22441-Q22460）

Q22441：

龔sir你好，本人係聾人，最近對於聾人遇到很多不公平的事，例如社會上健全人在最上層，盲人、其他殘疾人士比健全人地位低，佢哋可說話，可溝通。

可是聾人呢，卻是更低，在最最低層。我們手腳都沒問題，但不能溝通，不能聽電話，只能被壓到社會的最低層。其實政府對殘疾人士，完全零支緩。但我沒有自卑，從來沒有，我總希望自己可以堅強一點。

本人很想向你學習下，為買股票想財富增值。

從未睇你FB前第一次買咗[email protected]（二手）跌咗蝕得甘慘，咁難升番上0.64，打算想賣出後轉到有質素的股票。有咩意見？

今年3月頭，一向都有留意你分享，日日都有睇你的Q&A, 覺得有用，得益不少。如你開班我第一時間會報名，可惜我不能因聽不到（聾不代表啞）

你教的課堂內容，變相會跟不上進度，就係我遇上很大的學習困難,so sad, 唯一方法是購入你的作品，

最近睇咗你三本“80後千萬富翁“，“50後穩健收息股“，“股票勝經“，睇呢本書有d未必一定可以理解，想請教你，有個問題我唔明白又唔懂点計算，

例如建立咗一個長期的「平穩增長組合」，佢哋收入都增長，盈利都保持向上，加上股本回報高，有機會回報高10倍or可能未必成為10倍股 ，所以要睇佢哋之後的業務發展，

請問呢個点計算法？可以舉個簡單例子？可簡單解釋嗎 謝謝

我35歲，月入19k, 每月約有10000作儲蓄，給家用9000元，希望在10年可資產增至200~400萬, 目標：50歲前提早退休，想做財務自由。

現時持貨如下：

平穩增長股
1928 ＄28.25(1手)
0012 ＄35.9(1手)
2318＄68.85(1手)
0270 ＄10.6(1手)

潛力股
1810＄21.65(1手)

收息股
939＄6.13(1手)

我自覺賺的幅度不大，打算將邊投資（平穩股70％ 潛力股30％）邊儲蓄的策略，等跌下會大力掃貨。請問有沒邊啲股票係有機會做到5年或10年後有200~400萬？

不好意思我講到甘多，期望得到你的回覆，謝謝

呢本書你講句“現金不斷會貶值，不是財富“ 你講得好好講得有道理

買咗你本80後，希望睇完增加了一些投資嘅知識，努力

voo定期定額好？月供好？謝謝

龔成老師︰

這個世界，有好多客觀條件，未必到我地控制。唯一可以做的，就是唔好比這些因素，去限死自己。盡力去打破這些限制，為自己創造出更多空間。

只要你有夢想，內心夠強大，其實無野可以難到你。

我當然不能夠明白你的情況，但現時利用文字，在網上或其他平台，都可以作出溝通、發聲、工作，你要加油！

現金，由於可以無限量發行，因此長線必然會造成貶值。所以，我地財富增值，就係將只會貶值的現金，換成優質資產的過程。

令我地財富不被貶值影響之餘，可以有一定增長能力。

你所講的歐科雲鏈（1499），我本身無特別研究，佢屬較高風險類，要睇下你博唔博。過往持續虧損，見佢股價上落好大。只可以話，唔建議大注，自己衡量風險。

計算企業的價值方面，過程其實比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

所以，我好難係而度解釋，或者用例子去講解估算方法。

雖然你未懂估值，但唔代表你唔可以進行投資增值。但方法上，要進行調整，例如用月供或者分注模式，去減少你買貴貨風險。

以你35歲計，現時持股係可以。以你年紀和投資經驗計，平穏增長股和潛力股比重都正確。

你現時應以增值為主，建議你用「平穏增長股」 + 「潛力股」作組合，去創造一個增值平台。

正如你先前計劃所講，你現時將每月5成儲蓄，即$5000做月供。其餘先儲起，用一邊月供一邊儲蓄的策略。

但如果你對這些股票認識不深，可以全供指數基金。如果你都有認識，就可以用你平穩增長股70％ 潛力股30％的分配策略，去選股。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

我假設投資回報有10%（連股息再投資），你每月投資$10000 + 現有持股約10萬，10年後大約會增值至200萬。

至於你能否50歲提早財務自由，就要睇這筆資金，是否足以滿足你期望的退休生活水平。我假設你退休後，預期每月需要用2萬開支。以股息率6%計，你就需要本金400萬。

你可以用這個計算結果，作為參考，再去調整你投資計劃。

至於Vanguard標普500指數ETF〈VOO〉，是追蹤標普500指數的ETF，算係平穏增長股類別，都適合你年紀。

其實你做月供或"定期定額"都可以，因為2者都可以做到平均價格效果。但重點係必須長線(建議最少供3年和持有5年)去進行。如果供下停下，或者成日轉變，就唔會有意義。

------------------------------------------------

Q22442：

想請教，阿里巴巴旗下菜鳥網絡牽頭投資一百二十億元，在香港國際機場南貨運區的過路灣興建智能物流中心，作為一帶一路的貨運設施布局，

將為本港出口商再增一個貨運出口選擇，亦便利消費者經由淘寶購物收貨。阿里巴巴這個ai 物流倉是否未來企業關鍵？

帶來豐富收入，9988現價合理？

阿里巴巴這個ai 物流倉是否未來企業關鍵？

好似Amazon AI物流中心，之後股價一直上升

龔成老師︰

阿里巴巴(9988)宣布投入1000億人民幣，於香港機場打造高端物流中心，預期在2023年投入營運。此營運中心，將會是該地區同類設施中規模最大，技術最先進之一。

中心由菜鳥網絡帶頭開發，中航、圓通快遞都係當中投資者。

此個新營運中心，配有全自動化倉庫、溫度空調、空運處理中心、訂單處理中心等。

集團過往一直收入核心，都係來自內地零售商業部份﹐佔收入近75%。集團在內地發展，其實已相對成熟，相信集團預期該部份增長，會開始有機會放緩。

因此，集團開始著力開發更多其他市場，在香港機場打造高端物流中心這個布局，可以睇到佢這方面野心唔細。

這個物流中心，係一個利好因素。但這只是一個資本性投資，到底到集團有多大幫助和效益，現在言之尚早。但長線計，一定係對集團有利。

但估計方面，我暫時唔會有調整，宜再觀察，才再決定。

------------------------------------------------

Q22443：

老師你好，我是之前曾經向你請教過一些問題的讀者。亦都購買了老師的著作

其實我在今年12月便會前住加拿大工作。我現在存有12萬現金。13萬保險基金和12萬股票總值。

1. 0068 （15.3入）2000股
2. 00823 （67.25入）500股
3. 00939 （5.84入）10000股
4. 03918 （7.940入）2000股

想請問在移民的前提下如何分配現有的資產?謝謝老師

龔成老師︰

首先，你要先清楚，移民時是否所有在港資產，都係會變現。

如是，由於你12月就要走，多於1手的股票，你現在就要慢慢分段沽出股票，唔好等到走先一次過沽。

如否，以你剛畢業年紀，應先做好增值部份。建行(0939)只係收息股，增長力欠奉，不宜持有太多。

利興發展(0068)無投資價值，但由於佢停左牌，你現時無野可以做，等佢復牌就沽出。

其餘2隻都有質素，可以照持有。但金界(3918)由於疫情關係，中短期一定會較弱，但長線持有係可以。

12萬現金就先留起，等大跌市機會。

另外，緊記要開始月供計劃，因為我地長遠組合，唔可以只係得1,2隻股票，應該係有不同行業優質股，才算平衡。

------------------------------------------------

Q22444：

1) 明白老師,咁買入一隻股票之後預算要擺幾耐左右先至係最理想?即係要擺幾耐之後先至等收成?去睇吓佢有冇升?

2) 同埋老師我之前睇過你啲書, 如果你話價值投資係一定要買入優質企業然後長線擺好耐,咁樣係咪唔使理個價位高低月供股票都可以?

只要我知道呢個公司好有價值,例如好似中電煤氣咁, 咁咪就算幾貴都好都應該買?

咁樣嘅話月供股票都唔使煩㗎喎?淨係買呢兩隻都乜都得喇?用成副身家買晒佢哋? 總之有錢剩就擺晒落去咁係咪一定賺㗎?

3) 同埋老師想請教你, 我好似你咁講試吓買吓啲月供股票, 但我發覺裏面個倉可能有幾隻上升,同時間有幾隻又會下跌, 情況就好似啲資金只係搬龍門,擺嚟擺去,

咁其實我哋嘅策略應唔應該逢親嗰啲股票上升就賣咗佢, 然之後將同一舊錢入返啲一齊下跌左嘅股份?如果唔係好似每次嘅上升浪同跌浪都好似唔關自己事咁?

其實舊大錢都冇乜點變?定抑或應該全部都長線投資?只要等嘅時間夠耐,長時間全部整體都會升?因為我擔心就算我擺咗好長時間如果佢都係只係搬龍門,有啲上升又有啲跌,

咁最終就算我擺咗好長時間舊錢都唔會多咗好多個喎?謝謝老師

4) 唔好意思老師, 同埋想請教你, 最近睇你寫嘅嘢,你都話要我哋趁後生嘅時候掘多啲井, 儲多啲錢, 準備充足,

咁我想請問如果我每一個月將我全份人工扣除晒開支使費比屋企人同埋信用卡,有政嘅錢如果全部都擺晒落股票有冇問題?

因為我做緊月供股票, 同埋買嗰啲股票都係喺低位先買,逢親低位先至月供個一隻股票,因為我嘅概念就係銀紙係會貶值，咁我每個月將啲錢擺落去一啲穩陣同收利息嘅股票,

就算我將所有剩餘嘅積蓄擺落去,唔知會唔會都冇問題呢?

PS: 我都有啲流動資金可以應急, 有一舊錢可以靈活運用冇問題, 但係每個月出糧嘅人工可唔可以用晒嚟買股票?

龔成老師︰

1) 一般我建議持有最少5年，當然優質股永遠都係長線持有，增值效果才會最好。中短期股價會有波動，會有起有落。但長線股價，必然會將企業質素反映出來。

2) 其實我地買股票，除了要有長線投資價外，"股價平貴水平"和"組合平衡性"，都係好重要。

月供雖然有平衡價格波動能力，但太貴時候，我地都會考慮減供款，甚至停供。但如果你係初學者，對企業估值無太大信心。

我就比較建議你不理價格平貴，一直去供，反而會更好。因為你自行調整，若果判斷錯誤，有好大機會拖低左長線回報。反而不理價格，對你會更有利。

另外，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

3) 你唔好依然停係賺差價模式，我地現在投資增值，係將長線只會貶值的現金，轉換成資產的過程。而優質股，係資產的一種。

但再優質股票，中短期都會有波動，你係唔洗太在意。只要你長線持有，佢都就自然會有唔錯增長。

4) 現時大市只係合理水平，未到平宜區，每月儲蓄你預用一半左右，去做月供好了。餘下一半，我地先儲起，去等大跌市機會。

你現時才33歲，係選股時，應選擇一些較有增長力股票，先去為自已累積一筆資產。到近退休之年，才慢慢換回收息資產，支援退休生活。

所以，你應先集中增長，而唔係收利息。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

------------------------------------------------

Q22445：

你好龔成老師，想請教下: (我45+歲) 現持有組合：

長和 500 股
香港中華煤氣 600 股
匯豐控股 1,091股
恒生銀行 111 股
港鐵公司 1,100股

香港交易所240股
陽光房地產投資信託基金 2000股
領展房產基金 900 股
建設銀行 4,280股
長江基建集團 500股

華潤置地 260 股
工商銀行 4,180股
平安好醫生 100股
金沙中國有限公司 580 股
中銀香港 1,570股

盈富基金 1,090股
交通銀行 930股
中國銀行 2,200股
阿里 100股

這樣既組合是否可以。

請問你是否贊成賣出交通銀行買入復星醫藥 (2196)?

想供月供股，每月$3,000，領展（823）-$1500 & 比亞迪（1211）$1500? Or 領展（823）- $3000, 不知道可以適合我 ? 請問你會建議我買哪些股票呢? 盼回覆～謝謝！

請問你陽光房地產 or 越秀房產信託基金 or 領展比較適合我?

龔成老師︰

你現時持股，雖然都係有質素，但數量實在係太多，好難定期檢視管理。長線計，你最好集中翻係10隻左右。

另外，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。你組合中，銀行股佔左唔少，你要審視翻個比重，以避免出現過度集中的情況。

唔建議賣出交通銀行買入復星醫藥 (2196)，復星現價略貴，要回多少少才算合理。

以你年紀，我建議集中在平穏增長股類。領展(0823)係可以，但我地投資唔可以只集中係單一股票，我建議你都加入指數基金，指數基金供$2000 / 領展供$1000。

陽光房地產(0435)和越秀房產信託基金(0405)都可以考慮，但佢地主要係收下息，增長力無領展咁高，以你年紀，領展(0823)會係比較適合。

------------------------------------------------

Q22446：

想問多一問你意見，假設我而家買入一個單位450萬，俾首期兩成，呢個單位會放租，但有機會未必一定請時間可以放租，有機會預算自己都要供樓，

用以上呢個方法就係擔心樓價不斷上升， 而萬一幾年之後股票增長不太理想，可以自住。但假設股票增長理想 呢個單位會賣出 而買入反一個600-700萬單位自住。

問題係，咁會現金用左100萬 俾首期，剩返180萬投資

1） 是否唔應該現在買入一個單位先？ 因為自己租樓住唔想追唔切樓價上升，所以諗緊要唔先買一個單位，同埋有機會五年之後賣出呢個單位，會比起集中只投資效果冇咁理想？

另外擔心一買一賣 都需要印花稅 等費用

2）以我諗法希望5年後有500萬以上 當然希望回報可以再大，可以50%潛力股 50% 平隱增長嗎？

3） 如果用五年時間投資，預留一半現金等大市大跌再埽貨，但冇人知道大跌市係咩時候，咁應該點樣去衡量？

所以例如如果兩至三年仍未大跌市，佢應該keep住月供，或者分注見低就入？

謝謝老師

好希望盡早投資 生活會較理想，多謝你成日比正能量人

4) 老師， 現在平衡股票如下 會長線投資。請問一問 以下組合如何，可給一點意見嗎？

用180 萬 先分注入
再留100 等機會

大約
60%潛力股 ：
1177 12％
1810 17％
3067 17%
9988 12％

40% 增長
2388 14％
1972 14％
0548 14%

月供 $2000 2800
月供 $2000 2845

龔成老師︰

1) 這個問題，無一個100%答案。正如之前所講，現時樓市租金回報率不高，正常用優質股增值，個效果會較好。

但無人知5年後，樓市升快D，定優質股升快D。我地只能用現有水平，去得知值博率係而一刻，係優質股較好。但唔代表最終，樓市唔可以跑嬴翻優質股。

所以，"用投資優質股換大屋"，定係"細屋換大屋"，你要自己衡量。從現時值博率計，會係前者。

但若你相穏陣D，其實先買細屋，再換大屋都未嘗不可。但你要確保細屋升值能力，最少能跟大市同步。

另外，你可能會用來自住，即係佢都要滿足你長線生活需要。而且，間屋唔好太細，最少要有300呎以上(一個家庭基本需要大細)，才有基本投資價值。

2) 可以，但留意如果要直接入貨，現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)算在合理區中上至頂部，可分注入貨，其餘都略貴，想買就要等一等。

但如果係月供，我之前推介你的股票，現價都可以開始。

3) 的確係無人知，但我地投資係唔會"估"走勢，只會用平貴去定策略。現時市況係合理水平，我地應預留3-5成現金，去等大跌機會。

因為我地唔會知幾時大跌市出現，但如果你無現金係手，真係出現時，你會錯失良機。

4) 你計劃係可以，但小米(1810)都仲係有D貴，最好回多1成才入。

你緊記180萬係分多注咁，慢慢入貨，唔係一次過買晒。

另外，深圳高速公路（0548）只係收息股，增長力好弱，唔係咁適合。我建議你將佢換成指數基金，去增值組合平衡性。

------------------------------------------------

Q22447：

龔成老師，這個失敗的組合(0003, 0012, 0778, 1299, 2388,3067, 3383, 9988) …應該怎麼辦…？ 除了aia , 有很多股票由2017，18年坐到現在… 到了3067，我不停加註，怎知愈來愈跌

很灰

龔成老師︰

你整體的持貨不是劣質，不少都是有質素的，但部分你可能在較貴的價位買，以及市況波動，令股價向下，建議你日後多用平均入市法，又或提高計算企業估值的能力。

另外，你提及3067不停加注，記住，投資要有策略，買入前寫低具體的進行方法，投資後要長線，持股5年以上。

只要長線質素無變，中短期波動我地唔需要理會，長線持有就可以。

另外，我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

你現時持有股票，都係有質素，可長線持有。但當中雅居樂集團（3383）負債水平較高，不宜佔太高比重。

我見你安碩恒生科技(3067)都加注左唔少次數，你要留意此股和阿里(9988)都係潛力股類，雖然有長線投資價值，但風險會比較大。如果你年紀較大，或者投資經驗不高，這類股票不宜持有過多。

------------------------------------------------

Q22448：

龔成sir, 你好，多謝你用心的分享，增加咗我唔少投資方面的知識。一直以來都無去做過咩投資，特別是股票，了解不太多。

最近數月，我開始透過youtube及朋友了解到股票投資。

想透過穩建的投資組合去增值資產，而非將錢放銀行貶值。增值資產主要目的在放：

1. 短：5年內換2房半或3房單位（$900萬以下）
2. 中：（10-20年內）孩子將來有到外國留學需要時用
3. 長：（20年）將來退休生活費

現時我（33歲）與老公（39歲）有穩定工作和收入，每月收入扣MPF約$68000。每月家庭開支約$56000，可儲約$12000。育有1個幼兒，有計劃1-2年內生多一個小朋友。

資產：
1. 現金$30萬
2. 物業：市值約$620萬，每月供約$14000（仍欠銀行$296萬），出租每月$13000（自己租樓住$16500）
3. Ibond: $30000
已買基本醫療保險

現在有些投資想法：用一半現金儲備投資股票（用一半在黎緊尼次股市下落中分注買入一些平價位優質潛力股(0700、9988、2845，各100股）；

一半投資穩健收息增值股和EFT（0823/VOO/HD/0303/0006/6823）作儲蓄增值之用；另外，計劃每月供$6000股票（0823/VOO/HD/0303/0006)

Q1. 以上這個投資計劃會否太進取？分佈是否平衡？

Q2. 月供股票主要想放在有穩定收息增長及分散風險的股票，想問我較適合先投資哪些我計劃內的股票？

Q3. 美股我計劃待下跌後再供，VOO & HD咩價位為之適合入市？

Q4. 以上三個潛力股到何價為平（以作參考入市價位）？會否有另一些更合適我投資的優質潛力股？

Q5. 我也有想過入0388，咩價位才適合入市？

謝謝你。

龔成老師︰

其實你3個目標，我地都可以透過用優質股增值，去達成。

1) 潛力股部份，係可以。但另一半，以你們年紀和計劃作考量，我較建議集中在平穏增長股，而非一些收息股。

領展(0823)、VOO、HD係可以，但其餘3隻都係收息類股票，增長力唔高，唔建議用。你可以用以下股票，去取代這3隻。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

現時大市只係合理水平，現金佔比重大約3-5成。餘下資金，就等大跌市出現，才加大力度掃貨。

2) 由於你3個目標，都係需要財富增值才可做到，因此選擇方面，應以增長股為主。

你月供計劃，同樣有少少保守，建議你將偉易達(0303)和電能(0006)這2隻收息股，換成潛力股，去增升組合增長力。若你相保守少少，換成平穏增長股，都係可以。

每月餘下$6000就先儲起，等大跌市機會。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

3) 現時佢地價格在合理區，你照保持月供，咁就可以。我地月供只會係去到好貴，才會考慮下調供款額，甚至停供。

如果你本身定平貴能力不高，我建議你不理價格，一直月供會較好。因為你自己調整出錯，就好大機會影響你長線回報。反而一直供，會對你更有利。

4) 上述的潛力股，都適合你。你可以睇翻自已對邊個行業或企業更看好，本身對隻股票，又有一定認知，去決定投資目標。

部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 騰訊（0700）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

5) 港交所(0388)都係一隻可選擇的潛力股，但現價略貴，回多1,2成才入，值博率會較高。

另外，你持有的IBOND只係定息產品，無增長力，唔適合你。建議沽出，用來投資優質股會較好。

------------------------------------------------

Q22449：

成哥，想問下以下組合係米仍然繼續特有適合?

700 ，556買入
799，10.94買入
3383，10.94買入
3690，281買入
1810，28.61買入
939，6.2買入

龔成老師︰

騰訊（0700）、小米(1810)、美團(3690)和IGG（0799）有質素，可長線持有。但美團(3690)和IGG（0799）不確定性較高，不宜持有太多。

上述4隻都係潛力股，如果你年青，持有係可以。但若你年紀較大，就只宜好小注。

雅居樂（3383）業務上是有質素的，但中國經濟有少少風險，加上佢本身負債較高，相信會對佢有影響。

這股都有長線投資價值，但負債高始終是風險，唔建議太大注。

而建行(0939)都有長線投資價值，但佢增長力不高，只係收息股類。如果你係較年輕，這類創造穏定現金流的股票，就唔適合你。

------------------------------------------------

Q22450：

龔sir，請問2158 $35.5入 1044 $50.9入現價可溝嗎？可以長期持有嗎？

龔成老師︰

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

之前貴，現價依然係略貴，唔建議加注。而且，此股不確定性較大，只宜小注投資。

恆安國際（1044）主要業務為在中國生產，分銷及銷售個人衛生用品，零食產品及護膚產品。

恆安擁有多個品牌，如「心相印」、「安而康」、「品諾」、「安爾樂」等，而業務大致可分為紙巾產品、衛生巾產品、一次性紙尿褲產品、零食產品。

恆安具有品牌，又處於增長中的市場，前景不俗，故此企業為不錯的優質股。不過，市場競可能令毛利略為受壓，但相信隨著此企業發展更多較高毛利產品，影響不算大。

長遠來說，恆安仍有一定的前景，故有投資價值的。成本上升，令佢略有風險。整體而言，有長線投資價值，現時大約在合理區中間。

若你本身計劃分多注投資恆安的話，現價加1注係可以。如果你資金不多，等佢再回多1成左右，值博率會較高。

------------------------------------------------

Q22451：

龔sir, 你好！想請教你，我現在月供

$5000港交所
$6000騰訊
$6000 阿里巴巴
$5000中國平安

中國政府現時加強監管科技、教育、物管和外賣股，我應唔應該繼續供？還是有其它股票可以平衡風險？請龔sir 指教！

另外，美股科技ETF 值得買嗎？

龔成老師︰

中國政府在不同行業拖加新政策，都造成不同程度的風險。但我地要分析翻，這些政策係唔係明顯會對企業長線發展，造成核心性影響。

就你所月供4隻股票而言，影響係有，就暫時唔算係一些核心性問題，這些股票依然有投資價值。

但你而家月供組合，太偏重左係潛力股(0388, 0700, 9988)，佢地雖然有增長潛力，同時風險都較高，不宜持有過多。

若你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

同時間，每月儲蓄唔好盡用，要留有3-5成現金，等大跌市時去入平貨。

美國科技ETF，都有投資價值。

你可以考慮三星FANG ETF（2814），佢係追蹤NYSE FANG+指數的表現。是一個美股潛力股基金。

首先，FANG+係代表美國上市多隻領先既科技股票，即係代表Facebook、Amazon、Netflix、Google，而該指數會再加上其他科技股，如Twitter、Tesla、百度等，即是全球處最前列的科技類公司。

這基金是一個潛力基金，長遠正面，但要留意價格會較為波動，加上近年科技類公司上升左唔少，因此現價唔算平，建議以月供的模式投資，買入後長遠持有。

但你要留意一點，你現時港股有內地的阿里(9988)和騰訊（0700），再加上這美國科技基金，你就會成個組合，非常集中係科技相關股份。

由於佢地係同業，最好維持不多於組合3成，以免出現過度集中性風險。

------------------------------------------------

Q22452：

想問一問愛康
點解 我買入既一手 都咁差

龔成老師：

投資要不斷學習的，如果投資因為自己分析不夠完整，下次就分析得更好。我15年前開始，一年平均睇50隻股，每隻要花6小時分析，然後一年只買1、2隻股票。

其實愛康醫療（1789）不算差，以長遠業務分析，正面的。

佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。

睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。

這股業務不差，有增長潛力，盈利增長，這反映企業有實際的價值提升。

不過，投資時要考慮價格風險。現價合理區頂，另外，佢業務是有潛力有風險類，因此要明白較為波動。

------------------------------------------------

Q22453：

成哥，我上年先開始學投資，果陣見到d科技股 升極都仲有得升， 有幾隻股等左好耐想入，之後早排回落左都算多 就入左 d，發現原來仲有得繼續跌

例如阿里 果陣300，跌到落 230 我無貨 ，果陣都見你話仲係略貴 但都係入左1手 ，依家落到191 ，其實都有信心呢隻股係無問題

但覺得買貴左好多， 如果當拒上返 大約23x度 我放一放，再耐心d等拒跌 比較平既價位再入 如唔會比較好？因為初初開始投資 唔知道原來耐性好重要

龔成老師：

阿里（9988）有質素，中短期一般，但長遠仍有增長力，之前貴，現價去翻合理區。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，但現價未算特別平的股票。

你有貨，可持有，上到230，其實未算貴，如果你賣出，無人知能否買得翻。

你這種想法，就是一種估走勢的做法，而巴菲特等投資大師，都不會這樣做（因為佢地認為無人能做到），你現時的想法，同一般散戶一樣。而我希望你能進步，加強知識，不要停留在一般散戶層次。

------------------------------------------------

Q22454：

龔Sir 你好
對於股票最近真係跌到懷疑人生
股票長期持有，其實應該點處理
有些股票原先有賺，但諗住長期持有，近期一直下跌，已經跌至虧損。

其實對於長期持有，應該係賣出？一直持有不理？還是依然要睇圖下跌時離場？

係咪就唔使理止蝕，只要長期持有就得？
應該點操作才對

龔成老師：

我記得2003年，香港樓跌到好勁，港股都是，我已有投資港股，當時好多朋友都講「港股玩完」「樓市玩完」。

98%的投資者，都會以短期股價做分析點（樓市都是一樣），這是一般散戶的思維，而投資大師，則能平常心面對股價，著重企業的長遠發展。

到樓市、股市升翻，散戶又話「如果比多一次沙士價我就好了」。

這種思維，就是散戶。

你現時，要睇翻該企業，有那些核心因素改變，分析佢3年仍的業務情況，推算佢盈利是否有明顯下跌，唔好好似一般散戶，只著重短期股價。

我希望你能進步，能學知識，而不是停在一般散戶的思維！

------------------------------------------------

Q22455：

阿sir ，企業質素有冇核心性轉差點樣睇？

龔成老師：

你要分析佢的長遠財務數據，分析3年後，財務數據會否明顯減弱，市場佔有率有否明顯下跌，產品的賺錢能力有否明顯減少。

------------------------------------------------

Q22456：

老師，除淨日會自行調整股價，即派$1息股價會減$1, 咁對於買股收息這件事，仲有咩用？反正收幾多息，股價都跌返個數

龔成老師：

對短期投資者，無用。但長線投資者，就是一種現金流的概念，你要以一盤生意去思考，你買入一盤生意，佢會分派股息，分派股息的當刻，市場價值會減，但只要不是短期去出，長遠生意又會慢慢增值，以及不斷分派股息。

------------------------------------------------

Q22457：

龔sir 你好，突然有10萬，我可以點樣漲大呢10萬價值呢？

我指的是買有咩股票好

龔成老師︰

你可以利用這10萬蚊，去投資一些優質股，進行財富增值。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

潛力股︰比亞迪(1211)、中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）。

平穏增值股︰盈富（2800）、港鐵（0066）、金沙（1928）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)。如有投資美股，可考慮：VOO。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

大市現處於合理水平，那10萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

另外，收息股和平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22458：

龔sir ，我依家18歲仲讀緊書，啱啱出嚟做嘢試吓一兩個月，返緊地產行業，眼見好多人都好成功搵到錢，我自己都想成功，遲吓都會想玩下股票請問新手有冇啲咩要注意，

同埋想知道點樣先可以變到有錢，理財很重要嗎？

龔成老師︰

非常好，把握假期時間去工作，吸收工作經驗之餘，可以門開闊視野，對你將來選擇人生路係有幫助。

理財係十分重要，而且範疇好廣泛，由你打工儲錢，到投資增值。若你想成為一個有錢人，你就需要好好學習。

現時你要做三樣野︰

第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，供指數基金。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，指數基金是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q22459：

龔老師。本人睇左好多你講關於月供股票、投資心態的文章和影片，真的獲益良多。本人30歲，工作繁忙，心感難以日日留意市場捕捉買賣價，

所以希望走向月供之路。以下是我的一些想法，希望老師指教。

每月可儲錢$25000︰

1. 5000 現金儲蓄
2. 5000 月供JPM 美國科技
3. 5000 月供JPM 美國企業成長基金 / 美國巴郡B ETF
4. 5000 月供建行
5. 5000 月供長建

如果可以，打算無限供，未知老師可否指教指教，謝謝

龔成老師︰

我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，而唔係短期炒賣，去賺差價。因此，你係無成日睇住個市的必要。

而月供，係一個長線計劃，月供最少維持3年，並持有這些股票5年以上，才會有較理想效果。當然，如果企業質素一直無變，最好一直持有。因為，優質股持有時間越長，財富增值效果就會越理想。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你30歲年紀，應以增值為主。你現時月供股票，大致係可以。但建行(0939)只係收息股，增長力唔高，唔建議你用來月供。

你可以用以下股票，去代替。

平穏增長股︰VOO、盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

另外，現時大市只在合理區，現在你每月先用5成儲蓄，即$12500做月供。其餘先儲起，用一邊月供一邊儲蓄的策略。餘下一半資金，等大跌市出現，才去動用會較好。

------------------------------------------------

Q22460：

老師你好，我今年29歲，與家人同住，無男友，無投資經驗，無保險，每月可儲大約萬三，另有現金40萬。

最近有諗緊需唔需要買保險，另外因為同屋企人（妹妹）基本上喺屋企互當透明唔會講野，有打算搬出去住，但如果買保險同搬出去住，洗費就會大增，

可儲嘅錢就會變少，所以有所卻步，老師可以比少少意見嗎？

三個月前開始月供$7,000股票，分別為

港燈（2638）$500
長江基建（1038）$500
盈富（2800）$4,000
粵海（270）$1,000
安碩恒生科技（3067）$1,000

請問老師我現在嘅月供股票組合有問題嗎？有何需要調整嘅地方？麻煩老師了

龔成老師︰

如果無實際必要，我唔建議你搬出去住，因為會產生額外開支，拖慢了你增值計劃。

我地理財，要做到「攻守兼備」，保險、備用現金等是防守，但防守部分不用太多，餘下資金就應進攻。保險最大的作用是「保險部分」，反而投資作用一般不大。

即是買保險，最大作用是醫療、人壽、財產等的風險轉移，將你不想承受的醫療費用等不可預測支出，轉嫁比保險公司。但儲蓄保險這類產品，但不宜持有太多。

而我地投資增值，係會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你29歲，應以增值為主，你可以用有增長力的股票，去創造一個增值平台。

現在你每月用$7000做月供，其餘先儲起的策略，係正確。但港燈（2638）只係收息股，增長力欠奉，唔適合你。

現時大市只是合理區，你現有40萬資金可以先投入10-15萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

同時間，你要去多讀投資相關書本、年報，新聞和課程。

書本上，你可以睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。