知名品牌 H&M 一篇關於新疆棉花嘅「盡職調查」（Due Diligence），最近引起中國官媒及微博網民不滿，指「強迫勞動」等指控屬抹黑同污名化，引發抵制 H&M 浪潮，同 H&M 有合作關係嘅藝人紛紛割席。 今日戰火蔓延至其他國際品牌，包括 Nike、Adidas、Uniqlo、Burberry、Tommy Hilfiger、Zara、Converse 等，曾合作嘅藝人都發表聲明，指唔會支持任何污名化中國嘅行為，並宣布終止同有關品牌合作。 同 Adidas 合作長達十年嘅陳奕迅，喺傍晚就宣布「堅決抵制任何污名化中國的行為，即日起終止與 adidas 品牌的一切合作。」同品牌嘅彭于晏、Angelababy、楊冪，擔任 Tommy Hilfiger 全球代言嘅陳偉霆等都火速切割，宣布終止廣告合作。部分並未有代言合約嘅藝人，例如容祖兒、陳小春等都喺微博表態，宣布支持新疆棉花，各中港台藝人宣示嘅消息佔據晒微博熱話榜。 未有宣布同廣告商解約嘅藝人，紛紛被微博網民追問，例如同 Converse 有合作嘅歐陽娜娜，被網友留言鬧爆：為什麼還不解約！