【龔成問答信箱】（Q22521-Q22540）

Q22521：

龔sir：科技指數成立時,當時科技股很熾熱,很多新經濟股天價上市，後來又被納入科技指數，到現在跌幅看似很大，實際是還原基本價值，你看還要下跌幾多，指數才到安全邊際。

龔成老師：

你說得正確，指數「實際是還原基本價值」。

現價是合理區中間，巴菲特要求的安全邊際是一半（即是現價跌一半），我自己認為，跌多2、3成已有基本安全邊際。

------------------------------------------------

Q22522：

呢排跌市，好多股想入。但計計下，股票已經有大概五十萬，現金淨番10萬左右。係唔係唔應該再擺咁多錢响股票市場上呢？前排見939 跌啲，又入左少少，小朋友收息

我一家4口，老公同我收入大概7萬，小朋友4歲半，歲半，自住村屋，唔係太多支出應酬，我之前有錢都會買股票，原意係驚自己亂洗錢，但有時又諗，揸得太多股票好似好亂咁

龔sir，應該點做好？

005 唉。。。前排升到$50，但我錯失機會，無走到

至於3067，應該都已供左3000股，不過均價較高，大概$21左右，但聽sir 講唔好過於集中，所以想揀 3110 或 2845，主要一手一手儲比2個小朋友，那個較好呢？

1038我都有入左一手，都係聽龔sir 教路

3067 823 1810 9988 都係龔 sir教架

感謝感謝


龔成老師︰

驚亂洗錢，係理財問題。而買股票，係做投資增值，你係應該將佢分開考慮。

如果你驚洗大左，你可以唔用信用咭，同時開幾個戶口，一個戶口係基本開支、一個投資、一個係娛樂，分得清清楚楚。之後再每日記數，睇下自己有無不必要開支，咁就可以。

而投資方面，你基本上跟我上次講，去慢慢調整，咁就可以，唔需要急。

至於小朋友投資方面，因為佢有較長時間去增值，所以可以直接選ETF，如盈富(2800)、VOO。

如果想增長力強D，可以儲安碩恒生科技(3067)或者GX中國電車(2845)。但這2隻股波動性會較大，而且只係單一行業，會有少少集中，你要睇翻你自已風險承受能力。

你可以考慮平衡點，盈富做主力，再配上3067和2845。至於收息基金(3110)，主要係收下息，增長力好弱，我不太建議。

基本上，以你小朋友年紀計，持有以上股票都係可以，但你明白當中風險。

------------------------------------------------

Q22523：

同學仔報喜 終於靠自己能力得到第一個一百萬

開始出嚟做嘢9年，由過probation就開始每個月有買基金儲錢。但係因為屋企生意，出自孝心借咗好大份部份儲到嘅錢俾屋企。

雖然我出身係中產在無憂無慮嘅環境長大，但經常受到屋企人嘅感情勒索，希望我按照他們的計劃生活。亦因為父親投資態度進取連我和細佬名下的貸款額都俾埋公司做抵押。

令我覺得生活在巨大的無型壓力中，終於我2年前下定決心不再同屋企人同住，關係接近完全決裂。

就在這個時候我開始睇你的FB提醒我自己要更加專注建立自己財富，花更多時間學習投資、睇你的書和上堂，成功喺呢兩年累積到70萬！

今日發現自己擁有第一個完全靠自己能力得到的一百萬，令我覺得我不需要依靠任何人都有能力過我想過的生活，感覺好實在、好開心，

但係唔敢同身邊任何人分享，唯有有同我的啟蒙老師分享下，多謝你！

P.S同老公都唔敢講

龔成老師︰

恭喜你，獲得第一個100萬﹐見證到你一直努力，係無白費。

當你累積到頭一個100萬，你會發現投資增值，會比以往更有效率，因為有個較大的本金。

雖然你完成左首個100萬目標，但記住唔好自滿，因為投資路上還有很多事情要學習，我自己都一直係保持學習狀態，你都要一樣。

希望你好快，可以為你人生，累積到第2,3,4.....個100萬。

等你好消息，加油!

------------------------------------------------

Q22524：

老師 你好
我想請教一下
2160 $20.1買 2000股
2013 $19 買2000股

虧到入肉。好唔開心
而家可以點有無建議

龔成老師：

如果你太過資金投資在同一版塊，就會出現行業集中風險，要小心！

微創心通醫療科技（2160）不是劣質，但最大問題是上市價貴，加上上市後市場熱炒，這是我對新股/半新股有保留的原因。

以業務來說，這股都有發展力的。

係一家中國醫療器械企業，專注於心臟瓣膜疾病領域創新的經導管及手術解 決方案的研發和商業化。

佢自主研發的第一代經導管主動脈瓣植入（TAVI）產品VitaFlowTM，於2019年7 月獲國家藥監局審批並隨後於2019年8月在中國進行商業化。

根據資料，截至2021年1月17日，有五款TAVI產品在中國獲批准或商業化，其中，VitaFlowTM是首款使用牛心包作為瓣膜組織的產品。

佢亦推出第一代自主研發的AlwideTM瓣膜球囊擴張導管及AlpassTM導管鞘，使其成為中國唯一一家全面提供自主研發互補性TAVI手術配套產品的醫療器械企業。

VitaFlowTM II是唯一在中國研發並已在歐洲開展臨床試驗的TAVI產品。

除TAVI產品之外，佢目前還擁有五款經導管二尖瓣（TMV）在研產品，通過自主研發及與全球合作夥伴（即4C Medical及ValCare，均為專注於二尖瓣及三尖瓣醫療器械研發的醫療器械企業）的共同開發戰略性地針對所有主流可行的二尖瓣返流經導管瓣膜療法（TVT）方案。

企業有一定獨特性，同時長遠發展不差，不過估值方面就十分難，因為這刻仍未有似樣的盈利。只可以話現價唔算平，因此，如果你持貨%不多，這股可長線，但如果太多，可能要在反彈時減持。

至於微盟集團（2013）由於之前熱炒，其實去翻正常情況。你預要上翻去，不是短期事，如貨不多，就當守住先，但要預耐心。不過貨多，就可能要減，見佢財務數據較弱。

集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的趨勢，從業務潛力上，的確是有的，但見佢財務數據較弱。

------------------------------------------------

Q22525：

龔sir你好，本人現年31歲，月入$16000，因為現在覺得人工唔夠洗了，近半年先投資股票，但又唔識應該投資邊種股票，可唔可以指導一下？

現在手上持有 中國有贊 $2.3入咗8000，現在跌到$1.1，前景應如何？

龔成老師︰

首先，你要明白我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。由於係長線計劃，你唔好預期佢對你短期財務上，會有任何幫助。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你31歲，應以增值為主，建議你用「平穏增長股」 + 「潛力股」作組合，去創造一個增值平台。

你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

現在你每月先用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

中國有贊（8083）集團主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較大，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高。若持貨佔你組合較多，建議沽出部份，去平衡風險。如果只係佔你組合好少比重，你守住先，再觀察都可以。

------------------------------------------------

Q22526：

早晨,我係近半年係FB看到老師教導投資增值。2公婆冇投資經驗,已退休,想老師幫忙分析下：

1.本人56歲 自住物業月供7800, 供至75歲
2.長俸每月14000元
3.人壽保險年供7000元
4.醫療保險年供7000元
5.年金到65歲,每年有32000元
6.儲蓄保險75萬已供滿5年
7.手上現金有300萬

8.2星期前第一次買收息股票,
#3988 1000x5/2.77
#1398 1000x10/4.47
#1398 1000x5/4.53

請問老師,現金300萬可以点投資？儲蓄保險75萬有冇增值能力,拎走投資？

謝謝！

龔成老師︰

你本身有自住物業在手，而長俸都足夠去支持供款和若干生活費用。由於居住上已經處理好，我地重點係點將D資金，去創造穏定現金流，去提升你生活水平。

你現時持有保險，都係可以。儲蓄保險75萬，你可以睇翻佢積存生息利率，如果都有近3-4%(只計保證部份)，你都可以持有。如息率較低，就用來投資以下項目。

你可以將這$300萬，分成5部分。

第一部分投資收息股，你可以建立一個收息股組合，你可考慮港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

你現時買入股票，都係適合。但都是銀行股，有少少行業過度集中。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

但你唔洗沽貨，只要用新資金，去拉翻平衡就可以。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。(由於你已持有年金，你可以按比例調整這部份投資金額。)

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之需。同時，若投資市場大跌，你可以在這時買到更多的收息股，股息率會進一步上升。

你可以將$300萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q22527：

老師你好 理想汽車售價合理嗎？謝謝

龔成老師︰

理想汽車(2015)是中國新能源汽車製造商，業務主要是設計、研發、製造和銷售豪華智能電動汽車。

於2015年成立，2019年11月開始量產首款車型理想ONE(屬增程式電動汽車車型)，截至2021年7月31日，已交付逾72,000輛理想ONE。

集團有計劃在2022年推出全尺寸豪華智能增程式電動SUV，以及另外兩款增程式電動SUV車型。2023年起，預計每年至少推出兩款新的高壓純電動車型。

但現時集團只有單一車款理想ONE在銷，故收入完全取決於理想ONE的受歡迎程度。以2020年智能新能車在內地銷售額計，理想ONE排行第二，市佔為7.1%(新能源SUV車型計，市佔:9.7%)，算是不錯。

但畢竟集團只有理想ONE一款商業化車型，始終有集中性風險。

另外，集團成立至今，依然未有盈利，一直處於虧損階段。集團也明言，預計2021年淨虧損將繼續擴大，主要是由於投資未來車型的研發和自動駕駛解決方案；及生產設施以及銷售及服務網絡的擴張。

雖然這些資本開支用途正面，但長遠能否轉化成正現金流，郤是一個問號。

此企業有值得投資地方，但始終不確定和風險較高。由於未有盈利，要做一個穏當的估值，係較困難。只能說，投資係可以，但必需控制注碼，不要持有太多。

------------------------------------------------

Q22528：

你好龔Sir, 我睇左你個page有段時間,再睇左你幾本書,依家有月供388,1177,002,9988,2800. 想問如果我另外每月可儲$60k,

一年半後淨儲就有$1.2m, 諗住用作首期, 咁我可以投資邊方面,定放銀行好啲？投資有幾會增值,加大首期，放銀行好似又太低息

龔成老師︰

你現時月供組合，都有質素，適合年青至中年人士。

如果你預期一年半後，就會要這筆1.2萬資金去置業，由於時間很短，投資選擇上要較保守，最好係用收息股為主。

你可以用月供模式，將這每月6萬蚊投入，分配在以下收息股上。到你置業前半年，就將佢地"分段"沽出，咁就可以。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)

但你要明白，這些收息股雖然波動性較低，但畢竟佢地都係股票，都會有出現波動的風險。所以，如果你想保守D，可以將部份資金，放入定期存款，去平衡風險。

------------------------------------------------

Q22529：

老師你好 我聽你講將Bitcoin 全數賣出 不再投資

現在用了媽媽 我 姐姐名買了 三層樓花 總花費 1600萬 仲有現金1200萬 及250萬股票 分別是美團，阿里，中國銀行，大快活及中國恒大 及120萬外幣定期

現時想用500萬資金做生意

我想開發一種叫顏值借貸服務 利用Ai 人像顏值 身高 體重 用BMI 去判斷 去斷定該貸款利息的高低 限額最高8000元 只做年輕人的市場

假設借貸人顏值 身高 體重比例 綜合評分只係值70分 借貸人借6個月 佢可以選擇3個plan 去決定

假如借貸人本身體重超標BMI的 可以為他設立6個月 減幾多kg 做為目標 假如plan1 6月入面減左5kg 就減幾多利息

如果減得比較多就0元利息 加回增500-1000的現金回增 因為香港從借貸開始沒有這種服務 想吸引一些的新型借貸做招徠 以及為自己定立目標

我知道這個計劃可能比較天方夜譚 所以想問下老師意見

龔成老師︰

你現時有不少資金，已投入樓市，未來要慢慢加大翻股票比重，去平衡組合。

以你年紀，投資上可以以增長為主。美團(3690)不確定性高、中國恒大(3333)負債水平沉重，2隻都不宜持有太多。而中行(3988)只係收息股，增長力較弱，你不宜持有太多。

而外幣，都係貨幣一種。任何貨幣都可以無限發行，長線只會貶值，因此不宜作為增值工具。

建議你投資穩健，平穩增長類股。

至於生意方面，你的想法很特別。但你要明白，開發AI成本未必少，而且你要在這套模式中，找到一個可行賺錢方法。

會唔會有機會，最終只令到顏值高，BMI好的人，才找你做借貸，令你只有支出，毫無收入。

而且，顏值跟BMI不同，比較主觀，有機會引起不少爭論，你都要考慮。最後，因為你係需要放貸人牌照，你要確保你是否符合相關法例要求。

另外，你緊記唔好盡用資金。一定要留有一定數量係手，用來支援你生意、生活可能出現之特殊開支。另外，當大市有較大回調，我地手上都有資金，可以比我地入平貨。

------------------------------------------------

Q22530：

龔成老師你好，爸爸現在70歲，有$500k現金，想請教一下如果幫佢資本增值最好？

正考慮年金，基金，股票等等。謝謝老師

龔成老師︰

其實你爸爸已經係退休人紀，資本增值已經唔係重點，我地係應該諗，點樣用現有資產去創造穏定現金流，支援佢退休生活。

你可以將大部份資金，配置在收股上。現時大市在合理區，已可分注入貨。但必需同時留有一定資金，等大跌市才出手。

收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

其餘資金，你可以分配在一些A級債券、年金、收息產品上。

但緊記，都要留少少現金，以備不時之需。

------------------------------------------------

Q22531：

你好，上星期跌市我剛剛開始買股票。看到你的專頁，資訊實用。有些問題想了解多少少，看看如何有效地投資。

背景：
工作薪金約42000，2個小朋友（3.5及1）
每月大約儲15000
考慮會否5年後移民英國

財政：
現金：800000
剛投放股票約200000，如下：
潛力股
1177 中生 2000股 @6.88
0388 港交所 100股 @468
9988 阿里 200股 @177.4
約95660

增長股
2800 盈富1000股 @26.6
0270 粵海 2000股 @11.06
0823 領展 200股 @75.15
約63700

收息股
1052 越秀 4000股 @4.11
2638 港燈 1000股 @7.83
6823 香港電訊 2000股 @10.58
約45780

1）想了解以上組合如何呢？我想以保守穩陣多少少
2）暫時現金有600000，建議可放多幾多資金在股市呢？
3）如果月供股票，建議每月多少錢？那些股票比較合適呢？

謝謝

龔成老師︰

1) 現時你持有的股票，都是有質素的，質素方面無問題，只是在配置上，怎樣優化整個組合，令組合更配合你個人的情況。

以你小朋友年紀計，我相信你係偏年青的一群。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你人生階段，應以增值為主。你尚有5年才會可能移民，因此有足夠時間，去進行一個正常的財富增值。我明白你係增值之餘，係希望偏向保守。以你現時配置和選股，係合符你的要求。

未來時間，你可以用「平穏增長股」 + 「潛力股」作組合，去創造一個增值平台。當中，你應以「平穏增長股」為主，「潛力股」大約佔2-3成，以免風險過高。

當然，你相再保守少少，可以100%用「平穏增長股」，都係無問題。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

或潛力股︰安碩恒生科技(3067)、比亞迪(1211)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

2) 現時大市只在合理區，未到好平。財富組合中，最好保留3-5成現金，等大市有明顯回調，才慢慢加大力度投資。

因此，你現時應該再投入多少少資金，去加大持股比例。平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)、QQQ勉強算在合理區中上至頂部，可分注入貨，其餘都略貴，想買就要等一等。

3) 月供方面，我建議你每月先用5成儲蓄，即$7500做月供。其餘先儲起，用一邊月供一邊儲蓄的策略。餘下一半，都係一樣等大跌市機會。

而選股方面，你可以參考上面提到的「平穏增長股」 和 「潛力股」就可以。比例都係一樣，按你自己風險承受能力，去自行調整。

最後，如果你係打算5年後移民，而香港資產又必需沽清。你就要係走前一年，慢慢沽出持貨套現。唔好等走才一次過沽，因為無人知到時大市係點。分段出貨，可以減少價格波動的風險。

------------------------------------------------

Q22532：

龔大師，久仰大名。請問內地國策對科技股及教育股的打壓，請教原因何在？

而對投資者來說未有貨的應該趁低吸納？ 而持貨者又如何減低風險？

龔成老師︰

其中一個原因，相信係中央希望減低生育成本，故對一些提供非主流教育企業，落重藥。由於有核心性影響，我對投資教育相關股，有保留。

而科技股方面，過去一段時間，中央對這部份都無太大監管，令有些企業不理性地發展。因此，現在中央想加入一些規則，希望可以令行業更有規範。

相信目標，唔係想佢地賺唔到錢，只係想較有規矩。

至於是否把握這個回調時間，去趁低吸納。首先，你要了解翻該企業是否有質素，另外你自已已持股比重(再加注，會唔會佔組合太多)，同埋該股風險。

有些企業本質不確定較大，就算回調都不可入太多，以免令組合風險太高。

------------------------------------------------

Q22533：

你好龔sir,我想替小孩子月供股票，每月大約兩千元，目標是穩定財富增值和有息率回報，所以是長期投資大概十五年，

等他們成長後可自由決定運用，我自己心水是港交所或中電，請問閣下意見如何？而且還有更好的選擇嗎？謝謝你

龔成老師︰

小朋友由於可投資時間長，策略上十分簡單。你可以儲ETF，盈富(2800)、安碩恒生科技(3067)，如果有投資美股就VOO。以盈富來說，佢係包括58間質素不錯上市公司股票的組合，有一定增長力，而且每年都有若干派息。

若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。

基本上，以你小朋友年紀計，持有以上股票都係可以，但你明白當中風險。

------------------------------------------------

Q22534：

老師，多謝你一直以來無私分享理財知識。我發現自己過往投資方法錯誤，正努力閱讀你的著作，同時希望由而家開始利用新資金糾正返投資組合。我現時持有股票如下：

5@5200 $67.05
823@100 $67.5
3988@31000 $3.26
3@2000 $12.54

2800@2000 $25.86
1972@2000 $22
6618@600 $123.3
12@1000 $35.05

700@100 $468
1830@1000 $8.25
1024@100 $106.9
3067@200 $13.9

手持30萬現金在mortgage linked A/C可隨時入巿，本身收入穩定，每月可有$16,000閒錢用作投資。希望老師比意見，將來應該如何運用新資金。非常感謝！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

假設你係年青至中年人士，你就應先以增值為主。

現時持有股票，都係有質素。但匯控(0005)和中行(3988)只係收息股，增長力唔大，不宜持有太多。

而且，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

但盈富(2800)係不受此限，因為它是一個包含58間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

你現時匯控(0005)和銀行股明顯超標，你必需沽出部份，換至其他增長股，去平衡風險。

另外，京東健康(6618)、快手(1024)不確定性較高，長線不要持有太多。

未來新資金，我建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$8000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

或潛力股︰安碩恒生科技(3067)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

現時大市只是合理區，你現有30萬和每月所儲倒的資金，就等大市出現一定程度的下跌，才大力度掃貨，然後長線投資。

同時你都要努力學習，睇多D投資相關書籍、新聞、企業年報、報讀相關課程，去提升自己知識。這樣做，你長線投資才會做得更好。

------------------------------------------------

Q22535：

龔成老師:我34歲。可以承擔風擔想儲多啲錢做個有選擇既人。想請教你今日賭業股價位低啲。係時候差唔到入未丫。。

我對00027銀河有興趣。上星期降價買左金沙。唔知是否在合理價格內呢。同埋佢公司資產值唔值依家呢個價

因為我自己覺得賭業都係長期收益股。

龔成老師︰

金沙(1928)和銀娛(0027)都係有投資價值，同時都適合你年紀。但澳門和內地疫情又開始反覆，令集團中短期盈利增加了不明朗因素。故令股價出現下滑，你預佢地中短期都會較弱。

不過，相信這只是中短期，以長遠的角度分析，企業仍是有質素的。

在正常的經營環境分析，佢地都持有的資產好有質素，行業本身好賺，雖然疫情略有反覆，但全球疫情最壞的情況，相信已過。

但由於仍有未知數，加上之前虧損，因此將企業估值調低左。

金沙(1928)和銀河娛樂（0027）現水平在大約在合理區中下部分，如果本身有貨，可長線，耐心持有就得，如果無貨，現價已經可以分注，但都要留現金。

投資貨要有心理準備，中短期會弱，要長線，企業有長線投資的價值。

------------------------------------------------

Q22536：

龔 sir你好，我是你投資課程學生，課程令我獲益良多，更加了解價值投資優質股的重要性，希望可以朝這方向邁進。

現有關於美股Google的問題，希望龔sir可以指點一下。

我數年前分段買了Google共20股，上年年尾及年頭分段賣出，現剩下三股。現在有點後悔當初賣出是為了其他較有增長潛力的美股，現發覺Google盈利及潛質一點也不弱。

想問問若果我放棄現時月供的騰訊，美團及阿里巴巴（約每月二萬三元），改為投資Google，不知這是個明智決定嗎？

謝謝！

龔成老師︰

現時GOOGLE股價，唔平，大致算係合理區頂。相比之下，騰訊(0700)和阿里巴巴(9988)只在合理區中間，值博率反而較高。

當然，你其實可以配合的，但都要平衡整個組合。

但你現時組合，存在2個問題。任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時好明顯，係非常集中係科技行業，有過度集中性風險。

而且你上述4間企業，都係水桶1股票，佢地雖然有增長潛力，同時風險都較高，不宜持有過多。

就算你係好年青，我都只建議佔約5成好了。餘下應用以下平穏增長股，若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

平穏增長股：指數基金、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)。如果有投資美股，可投資VOO。

------------------------------------------------

Q22537：

龔sir你好….我係一個投資新手。

我每月儲8000，其中5000等機會入市

3000月供股票 包括
823 $1000
1038 $1000
1810 $1000

另有1手9988 $197.2入
1手1928 $31入
2手 1177 $6.66入

呢d價位會唔會入貴左？

整個配置安排如何？

按呢個計劃，需要幾多年才可達到100萬？

其實如果本人想5年得到100萬，需唔需要再加大儲錢力度？

龔成老師︰

你現時持股，買入價都合理。

但由於你現時無投資知識和經驗，對企業估值，點去定平貴未必太了解。建議你先利用月供模式，去做增值，可以減低買貴貨風險，對你而言會較理想。

月供組合上，都有增長力和質素，若你係年青至中年人士，係合適的。但建議你再加多$1000-2000做月供，目標建議係指數基金，去提高你組合平衡性。

我假設投資回報有10%（連股息再投資），你每月投資$8000 + 現有持股，大約7年後會增值至100萬。

如果你想5年達成100萬目標，你每月投資就要由現時$8000，提升至$13000，才較大機會做到。

------------------------------------------------

Q22538：

你好，龔Sir，無意中留意到你fb page，睇到你有兩篇文章，分別關於投資初哥要學識既其中一件事係止蝕，而另外一篇則係應該以公司長遠業務發展而非股價去決定買入定沽出股票。

我年前係高位大概36買入融創中國，買入後就有內地規範該公司負債既政策，令其股價一路下跌。近期即使有少少利好消息都未能反映股價上。到底應該繼續持有定止蝕？

到底呢間公司業務係咪長遠都唔值得投資？希望請教你專業意見。

龔成老師︰

融創中國（1918）不是劣質，佢有規模、品牌、銷售網絡，但同時有一定風險。

首先，中國樓市如果逆轉會有很大打擊，另外，這股的負債超高，無事就無事，有事大件事。

近期由於中央有不少政策出台，地產類股票一定會較弱和好波動。

投資這股不是不可，因為不是完全無質素，但要明白背後的風險，同時明白這一定會令股價較波動，自己最好控制注碼。

若現時持股佔組合比重好細，你可以守。但若果佔比重較大，你就最好沽少少，去平衡一下個風險。

------------------------------------------------

Q22539：

你好龔sir,我係你投資班的學生，本人39歲，但只係投資股票初哥，但對於風險管理已有一定程度的認識，現有$300000想組合一個投資組合，麻煩可以比d意見小弟嗎？

我自己心目中既組合，300000計︰
40％水桶1 40％水桶2 20％水桶3 / 120000,120000,60000

騰訊 2手$90000 已持有（467.4）
中生製藥2手 (6.9) $13840
阿里巴巴 1手$19230 (192)

水桶2
銀娛 2手$92000 46.7
領展4手$28000 74.2
煤氣5手 $65000左右 已持有

目標長線投資，會定期檢閱組合比例。想請教這組合有無咩問題？謝謝解答

龔成老師︰

以你39歲年紀，這個組合選股，係可以。

但有2點希望你注意翻，首先，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

但ETF不受此限，因為它是一個包含多間優質企業的基金，這些企業來自不同行業。因此，ETF就算在組合中佔較大比重，都唔會造成過度集中性風險。

你現時騰訊(0700)、銀娛(0027)明顯係超過這個標準。

你現時係創建組合初期，組合金額較少，出現超標都係可以接受。但長線你要參照這指標，加入更多優質股，去維持組合的平衡性，才算理想。

另外，現時大市只在合理區，而上述股票都在合理水平，現價可以先入一注。但資金唔好盡用，要留有3-5成，去等大跌市機會。

以下是一些適合你年紀的優質股，你可以參考一下。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、粵海(0270)。如果有投資美股，可投資VOO。

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。

平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)、QQQ勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22540：

明白收到 謝謝你的意見
3878唔捨得放，蝕左8、9成

龔成老師：

這股質素始終有限，建議反彈後，減翻部分先，減少你的風險。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13161-Q13180）

Q13161：

成哥，我係你舊生，請問你關於現金流折現率，謝謝

你筆記都教左(個概念，個模式，啲率點得黎，及簡單拎盈利來計數計該企業有幾多價值)，條數可以係甘無限甘計。

1)但通常用幾多年（最少知該企業值幾多）10年，5年?

若計該企業5年后價值幾多，就計5年，計完條數就知5年后價值比現價高或低或知值幾錢，或可產生盈利幾多

2)若計完知左條數幾多（該企業值幾多）比如計完得5億，甘核心黎睇個5億係多定少，我知5年后有幾多，但唔知條數個意義化係咩，，因為個現金流折現率模式，可以無限甘計，所以好似好虛無甘。

3)就算甘計到條數值幾多（該公司價值），最多都係知該企業值幾錢，但唔知該企業的股價值幾多

4)計完知道該公司價值幾多，
假設值20億，甘個20億點反應或代表，令該企業股價可以升幾多或可以去到咩價位或咩區域（昂貴，合理）。。。姐係個現價，個價受唔受得起

請問成哥，會唔會用你教的市盈率計算方法，會容易知該企業股價合理定昂貴。成哥，唔該你，等候你解答

龔成老師：

1）如果計算企業，而佢的業務並無年期所限，我地會用「無限」。你可以利用筆記所講的公式，有教到假記現金流是無限時，最終如何計出估值。

2）你要明白個計法，就是將往後的現金流（可能假設無限），折現，然後相加，相加後就是企業的內在價值。

下一步你就是進行比較，比這個計出的價值，與現時的市值比較，如果市值遠低於企業價值，就是平宜。

3）你只要將計出的企業價值，除以發行股數，就會知這股的合理價是多少，下一步就是比較現價。

4）如果你計出企業價值值$20億，而現時市值為$10億，即是平，我地可以投資，我地唔會知股價升到幾多，但在「理論上」，長期股價會回歸合理價，即是股價會慢慢向$20億的方向向上升

現金流折現法，是比較深的方法，我建議你先用其他估值方法，打好左基礎先，市盈率估值法相對會較易。

------------------------------------------------

Q13162：

老師，你覺得儲蓄人壽計劃和購買收息股，那一種被動收入比較理想？

就宏X人壽計劃（三十萬元 月派2000元）我見到佢既promotion 係咁寫，同樣價錢，三十萬投資港燈(2638), 收息15873一年, 即月派千三元左右，這樣的話，人壽計劃是比較好？

龔成老師：

因為股票有潛在上升能力，而這類產品就無。

在理財上，這些產品都有其投資的價值，因為可以有持續的現金流，不過就無增長能力，而我地會稱這些為「產品」，而優質股則視為「資產」。

你都可以投資這些產品，但就不用佔組合過多，因為我地應該著重增值，特別是年輕人，以「先增值，後現金流」作策略。

------------------------------------------------

Q13163：

00688 29.15買入 其後不停跌 長遠黎講 內房股仍有佢既價值嗎？

龔成老師：

中國海外發展（0688）本質不錯的，近年的生意都平穩，但就唔算有好強的增長力。

你唔需要太著重中短期的股價走勢，這股有平穩增長的能力，但由於規模都唔細，加上企業不是進取的類別，因此之後相信會平穩增長，而較難有高速增長。整體質素不錯，你可以長線持有的，而你的買入價合理，不用擔心。

------------------------------------------------

Q13164：

成老師你好 我想買一雙$2以下 長期收息 之前心目中想1881 或123 你推介1881 你覺得現時還適合嗎？

還是你有其他更好的推介 本金大概180,000港元

龔成老師：

富豪產業信託（1881）是不錯的收息股，有投資價值，至於越秀地產（0123），同樣是不錯的收息股，同時在增長能力，因此都可以投資。

加上這兩股近期股價回落，提高了投資值博率。

但要留意，當中都與地產類有多少關係，如加多一隻收息股，能減少組合中集中系數的風險。例如可以考慮香港電訊（6823）。

------------------------------------------------

Q13165：

龔成，想問問對6033有咩睇法？覺得未來3 5 7年有咩展望？感謝

龔成老師：

電訊數碼控股（6033）業務算是不差，佢生意都算穩定，但有時都會出現生意下跌的情況，由於這股增長不強，因此不是潛力股。

但見佢過往派息穩定，作為收息股可以，但見佢最近的半年業績，生意額略有下跌，這都會有少少風險。但我相信不太大注就得，這股可以長期收息的。

長遠來說，暫時睇佢唔算有太大突破，除非有其他新搞作，否則，只能視這股為收息股。

------------------------------------------------

Q13166：

Hello 成哥
請問大快活基本因素有改變嗎
見到佢最近跌左好多 你認為值得買入買？

龔成老師：

大快活（0052）本質不差的，雖然快餐業務看似不起眼，但卻持續地賺錢，股本回報率處理想水平。

而佢9最近股價回落，正要受人工成本上升、股市氣氛轉弱、香港的社會運動影響，相信都是中短期的因素。不過人工因素的確會對佢賺錢能力略有影響。

現時股價處合理區，有長線投資價值，但就不能預這股高增長，只是平穩增長型。

------------------------------------------------

Q13167：

老師你好，見你啲post平時話月供2800連息平均每年10%回報。其實呢個回報係點計出嚟㗎？

龔成老師：

其實，這只是一個假設的回報率推算。

盈富（2800）是追蹤恆指，所以我用左過往50年恆指的回報作參考，我計出過往股價升幅連股息，平均為14%。

而近年中港經濟都無過往咁勁，所以我假設回報會下調，為8%-10%，這是一個假設的長期回報。

------------------------------------------------

Q13168：

龔老師,我是澳門的朋友~最近聽完你講澳門的月供股票手續費都比較貴之後,可行的方法是只供盈富然後留現金...那想請問我本身月供開4隻股票, 分別是港鐵$2000

比亞迪$2000,中銀香港$1000及盈富$2000. 如果把資金轉供盈富,應把那1隻股票的資金轉走? 那1隻可以keep住繼續供?

假如 轉走中銀香港的資金轉供盈富,咁先前已供中銀香港的股數可以點樣處理? 保番到回本然後賣出? 謝謝

龔成老師：

因為你要比好多手續費，所以我建議你集中供盈富（2800）。

首先，你停止其他月供股票，正於原有的貨，可以持有，因為你日後仍會以一手手的模式去買，同時這些股有質素，持有無問題。

另外，你可以持有供盈富的金額至$3000。

同時，希望你儲更多的現金，到你現金有一定的數量，就以一手手的模式去投資中銀（2388）、比亞迪（1211）。而每次投資時，都不能用盡現金，最好是投資後仍有一定的現金剩。

------------------------------------------------

Q13169：

成哥、一直都是你的忠心讀者。​小弟想問你對香港股市還有信心嗎？眼見每目​的社會抗爭。有可能需要投資其它地區的股票嗎？

龔成老師：

除非香港的社會運動，持續一年以上，否則，這仍只是中短期的問題，未會對優質企業有核心性的影響，當然，中短期的影響一定有，同時對股價中短期不利，但我地投資，都是長期性的，因此不用太擔心中短期問題。

記住，我地買股票是買企業，長線持有企業，只要企業是優質，你可以想想「這企業3年後的情況如何？」如果仍是正面的話，就可以放心投資。

至於投資其他地區，可以的，這是一個分散地區風險的策略，例如你可以投資ETF，如領航標普五百（3140），已是一個簡單的分散風險方法。

------------------------------------------------

Q13170：

成兄，想請問你，你覺得現時，香港的教育系統入面除左理財之外，仲有咩係缺乏而又係有需要的？

龔成老師：

解決問題的能力。

香港的教育制度，太多著重「標準答案」，但在現實的世界，往往無所謂的標準答案，最好的答案，往往是一些特別的方法。

同時，太過著重標準答案，只會成為機器，沒有解決問題的能力，而社會最需要就是這能力。

其實做生意，已經是一個好好的訓練「解決問題的能力」，所以你見我好建議年輕人試下做生意，除左這可能是一個好大的事業突破外，亦是一個很好的學習過程。

------------------------------------------------

Q13171：

師兄 你有條片曾經分享過一個人的收入是最常接觸5個人的平均數 如果回望過去或觀看現在 你認為一直以來你最常接觸的5個人是誰呢？（相信其中一個就是巴菲特，但也好奇其他）

可以分享一下嗎？謝謝你

龔成老師：

我最常接觸的，是家人，但在思維的層面，我最常接觸的，都是書籍。

因為我每年花最多時間，就是睇書及睇年報，我不斷受成功人士及有錢人的書，當中的思維影響，這對我來說已經好深入。

巴菲特、拿破崙希爾是其中的兩位，其實仲有好多，要講有排講。

------------------------------------------------

Q13172：

老師你好，我自從一年前睇左你既blog開始月供股票，但最近地鐵(66)因為社會問題要停站同修補受損關係同equipment,應該會受唔少影響

想請問老師會建議繼續月供地鐵嘛？

另外最近葯股 (e.g. 1177)上左好多，想問下老師點睇前景？謝謝您

龔成老師：

如果你掌握一間企業的損益表，你就好容易解答到上面的問題，港鐵（0066）每年憑車費、收租、賣地相關，得到的盈利都有成百億，就算近期的社會運動對佢收入略有影響，都只是有限數，同時只是中短期，而我地一定會以長線投資去分析的。

至於支出，一定會大左，但對比佢一年賺一百億來講，只是小數目，這對於企業價值的影響，有，但不多。

加上這企業的獨特性，即是獨特的運輸地位，以及地產方面的絕對優勢，這因素令佢企業的核心賺錢能力無變過，因此從企業的賺鐵能力分析，佢無變過。

至於中生製藥（1177），你預$10以上開始貴，這股是有質素的股，但股價波動大，你要注意注碼不能太過多。企業前景是正面的。

------------------------------------------------

Q13173：

你好龔成老師，我一直睇開你既書，女兒也上過股票初班，好多謝你無私既教導

但有小小野想請教老師你
本人同細妹擁有一間市值$1000萬樓，已供完，現收租，我細妹的一家想獨自擁有此物業，決定永遠不會賣。

佢自己估計物業值960萬，所以他只會給我約480萬現金及我需要放棄擁有權，但我相信是低過市價，而我應該點樣計算物業價值幾多？

龔成老師：

首先，你可以到不同的銀行去做物業估值，這是免費的，你找多幾間銀行去估，會有更好的答案。當然，銀行估值只是銀行對你物業的初步估值，不一定代表真正價，但都可以增加你的參考價值。

另外，你可以參考同類物業的近期成交價，如果你該大廈有類似的單位，在近期成交，就有一定的參考價值。如果是不同的呎數，可以先計算該單位的成交價每呎多少，每乘上你的單位呎數，就可以作出推算。

如果無一些近期的成交價，就可以利用最近期的成交價，然後睇翻近期大市（例如中原指數的變化），去推斷合理價是多少。

------------------------------------------------

Q13174：

成哥，睇你既書都建議大家買優質股，你又點睇E家大行話股災即將來臨，恆指跌穿2萬點，但宜家放股票其實都幾傷。。。。

應該忍痛賣哂佢再撈底還是等三五七年等佢升？

龔成老師：

我投資股票都有20年，中間見好多人在不同時期預測股災發生，基本上，有98%都錯。

反映，真正的股災，根本無人估到。

所以，我地根本唔應該信所謂「專家分析」，同時，我地唔需要用「預期股市點走」的模式去投資，反而我地只要集中「買優質股長線進行就得」。

如果你買入的是有質素的企業，點解要因為一個二手報價下跌，而要賣出？根本是不需要的。

你只要長期持有企業就得。

------------------------------------------------

Q13175：

請教一下老師，我現在月入三萬，只有現在10萬左右，如何在3-5年內累積至一百萬？

每個月大概只儲到一萬左右

龔成老師：

你$10萬不要動用，反而留作「等大跌市時投資」，會更好。

但你要加強儲蓄，否則好難完成到目標。你最好每月儲到$10000，我相信只要你肯定立目標「5年累積$100萬」，你是可以做到的。

然後，你只要集中投資平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

再加上小注潛力股，已能有效地令你完成到目標。

你可以將每月的$10000，做月供股票，在上述股票中選股，保持月供就得。

------------------------------------------------

Q13176：

老師你好，本人34歲，月入27000， 俾家用 8000， 手持現金113000，股票約 1,100,000 分佈如下:

001 長江 共$180000
005 hsbc 共 $78000
772 閱文 共$36000
939 建行 共$360000
2628 中壽 共$20000
3333 恒大 共$170000
3968 招商共$170000
398 東方錶行 共$80000

想問下點可以滾大個資產(一
年至年半)增至160,000?

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你的年齡，仍是財富增值的黃金時期，因此可以集中增值多少少。

長和（0001），有質素，是平穩增值股。匯豐（0005）、建行（0939），增長力不強。

閱文（0772），這類股不能大注。

中人壽（2628）的質素雖然仍在，但轉投資平安（2318）較好。

招商（3968）持有無問題。

恒大（3333）負債太多，風險高。

東方錶行（0398）本質中等，不過現價不貴，小注投資都可。

你唔好太心急一年內要財富大增，我地投資股票是買企業，企業成長需時，因此要耐心持有先有收成。

如果你想之後有更大的財富增長，可以投資更優質的股，同時受香港社運動影響股價較大，保長遠質素仍在的股。

------------------------------------------------

Q13177：

你好，老師，多本書中，次序上，我應睇邊本先呢...！求解答，謝謝

龔成老師：

《百萬富翁》系列相對較入門的，你可以睇先，《80後百萬富翁》。

之後可以再睇《股票勝經》，睇完後，再睇其他邊本無乜所謂。

------------------------------------------------

Q13178：

老師你好，之前睇你既80後百萬富翁，終於改變我既儲蓄方式，現有2份儲蓄，1份2020年供完，要放多5年先叫賺少少，我應該繼續擺到10年期完，還是供完後第6年取出以作投資本金？

最近剛睇你第3集百萬富翁，開始想月供股票，以及累積資金買入一些潛力股票。

可以參考龔老師邊本書作為學習投資既起步? 就快28歲女，之前0投資經驗，先多謝老師抽時間細讀訊息

龔成老師：

你已經養成了儲蓄的習慣，這是理財的重要第一步，然後你就要作出投資，唔能夠只停在儲現金的過程。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

由於你無投資知識，我會建議你每月做月供股票，先集中供盈富（2800），同時在這段時間學知識，之後先投資潛力股。

你可以睇《80後百萬富翁》、《股票勝經》。

------------------------------------------------

Q13179：

你好呀，我27歲月入60000。

屋企人早幾年賣樓呢幾年都係租樓... 租左3年佢地唔想再租，有幾百萬比我做首期供一層樓比4個人一齊住... 你覺得好嗎？定係應該自己供一層納米樓比自己？

但係兩老同埋個無用家姐係無借貸能力。

龔成老師：

這個問題已超越了理財問題，因為涉及了多個家人，如果從自己的角度，供一層細單位比自己是最好的理財模式。

如果你買左買，你要全力供，但日後到你有自己家庭，事情一定會變得好複雜，除非預先傾得好清楚，否則這方案可能會有日後的麻煩。我一向都建議「先小人，後君子」。

------------------------------------------------

Q13180：

龔老師，點睇大陸未來既經濟
我大陸深圳有層樓
應唔應該放

龔成老師：

佢經濟在中短期會弱，這是受中美貿戰的延伸影響，不過，政府會利用谷內需，來帶動經濟，但整體上，經濟都會出現放緩。

我相信這是一個中短期的情況，未去到長期差落去，至於樓價，相信會有少少落，但不會太多，如果你只有一個大陸物業，其實持有都無問題。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

［每年一貼］祝大家小三節快樂！—　情人節，明明唔係紅日嘅日子，人人都講。情人節梗係好重要，梗係要送花食燭光晚餐。千萬唔好同女朋友講道理，講「唔抵」。信我，辯論隊隊長多數都變毒L。記住，抱「長痛不如短痛」、「息事寧人」嘅心態。 母親節、情人節唔破財，之後你損失嘅只會更多。至於咩食中餐打邊爐嗰啲， 留番一齊第三個情人節先好開始。

好多文（主要係廣告）會教情侶點過情人節， 亦有文教單身點過情人節。但有一種人，為數不少，但冇乜人理佢哋感受，冇乜人討論佢地應該點過情人節，彷似佢哋唔存在咁。

呢個就係我寫呢篇文嘅原因。

我唔知呢個世界上有幾多齊人／小三，但可以肯定為數不少；甚至好似房入面嘅大笨象咁，人人都知，人人都見，但冇乜人會講，亦冇乜人會認。想捉大笨象？好簡單，「小三節」2月13號晚，望下邊位女同事着得好靚，睇下佢放工去邊，同邊個一齊。或者留意下你個男朋友或老公係咪2月13號晚例牌OT。

有讀者讚本人善於指出一般人唔想面對嘅殘酷現實。又碰巧（真巧！）本人做過齊人，亦做過小三，情人節去廟街食煲仔飯，入深井食燒鵝（好多人的！）甚至炒大鑊我都試過。就等我化身做01夫人信箱，教下在三角關係中嘅大家，情人節如何自處。

三角關係嘅嘢，唔知情嘅最幸福，不必討論。知情嘅，一係你係享齊人之福嗰位，一係你就係同人共享情人嗰位小三。元配同後來者都可以係小三，不要分這麼細，況且有時邊個係「元配」都唔係咁清楚。本人目測，三角關係以兩女一男多，本文亦主要討論兩女一男，咁當然部分都適用於兩男一女；但其實，兩男一女嘅，男嘅應該唔使煩情人節，「等敵人破財算啦」，女嘅一樣唔會太煩，反正其實兩個男人唔鍾意過情人節。

齊人篇

享齊人之福嘅，每到情人節就諗起藤子不二雄套「神奇小子」。最好有個公仔，按一按個鼻就變個替身出嚟，替身陪元配自己陪小三，爽。但現實邊有咁美好？

分身術：細個睇王晶啲追女仔港產片，就想學主角咁，同一晚約兩個女仔，然後走兩場。 情人節「分身」，是每個風流才子都應該挑戰的終極目標。好似高爾夫一桿入洞，士碌架147度，橋牌大滿貫，麻將十三么，scrabble一次出晒手上嘅牌之類咁。但幻想歸幻想，現實我可以勸你慳番啖氣，極難極難。最多比你七點食一場後，話要番公司做嘢， 九點半再食一場，解釋話老姑婆上司唔放人。成功咗嘅俾個叻自己！

話OT成晚在公司係唔work的。唔好低估女人嘅耐性，為咗情人節，等到九點又如何？最緊要你出現——之後鬧爆你係後話。你可以OT到幾點呢請問？仲要人哋會嚟樓下等你。半夜食糖水都得，你點算？冇得搞的。

出走：最好嘅方法。但首先你要夠高層可以成日出trip，甚至控制到自己幾時出（所以記住俾心機工作）。出走海外嘅，照計解決晒所有問題，兩個都唔陪，唔使煩。就當有人會跟埋嚟，都唔會兩個一齊咁好彩啩？真係咁好彩嘅，下次搵啲唔易放假嘅人拍拖啦（例如教書老師）。或者話出trip去北京，包保兩個都唔肯嚟：「豬豬啲霧霾整污糟你塊面豬登呀」。

送花：最緊要就係人唔到都禮到。去到情人節，如果出走不成嘅，講真好難呃到人㗎啦，至少都會俾其中一個知。 不過陪唔到人都未係死罪，但花都唔送就必死，亦抵死。記住，送花係好重要的。公平講句，人地已經做小三，唔該唔好再委屈人。送花幾時都唔係俾收花人睇，而係俾其他人睇。證據？情人節在星期六日啲花店就叫苦連天。送花，要送得貴，送得大，閃死晒其他人——因為你已經唔陪人呀。999朵玫瑰嘅花語係「我好多錢／我今次好大鑊」。做男人都要講句，一拖二而情人節送花走去團購之類嘅，俾人斬都冇人可憐。

仲有，記得一早落柯打，分開兩間花店。我朋友（嗯）就有一年一間花店送晒兩個女仔，結果當然係掉轉咗，可以想像後果係點。事後佢懷疑可能係花店女店主睇唔過眼，特登掉亂。所以最好搵個道德水平低嘅花店主人，男人最好。

小三篇

記住，小三嘅嘢，就一個原則「以退為進」。目測多年，三角關係最後「勝出」嘅，唔一定係後來者，更唔一定係後生啲、靚啲、身材正啲嗰個。一般都係比較忍得嗰個修成正果奪得賤男一個。原因好簡單，因為個個男人都怕煩，邊個煩佢，佢就唔要邊個。

沉默是金：記住，小三唔使開聲，等男人去安排。佢話正日陪你就陪你，小三節就小三節，你嘈都冇用。但佢咩表示都冇嘅，飛咗佢，唔使討論。情人節當冇件事嘅男人都配做齊人？ 埃塞俄比亞好多人冇飯食㗎。

睇花：花都唔送嘅男人，飛咗佢。仲要扎花夠大、夠靚、夠貴先好收貨。怕佢唔識做嘅，拎部電話俾呢篇文佢睇上半版。「呢個李聲揚寫嘢幾得意喎」。放心，佢唔會睇到呢度的，男人冇咁好耐性。但，就唔好打聽人地元配果扎有冇你咁大，更唔好去研究人哋去邊食飯去邊爆房。何必呢？邊個先邊個後都好，你都用咗人哋半個男人啦，高抬貴手啦，施主。怕男人冇品味唔識送花嘅，自己俾錢送多扎俾自己都可以，係虛偽係自欺欺人，但輸人唔好輸陣。

以退為進：呢招仲勁。當年我朋友（嗯）個小三，主動建議話2月13日食飯，解決晒所有問題，仲即係間接話埋俾我朋友知「我一早知你有元配」。當然做到呢步道行應該好高，而如何控制到你男人唔好有恃無恐，當你冇到又係一門學問，同訓練狗差不多，有機會再講。

冇人陪咁做乜好？其實好簡單，你男人唔陪你嘅，你咪好似平日咁過，唔好太煞有介事。一大班人有男有女食飯OK，但唔好企圖搵新歡，你多數會後悔。三五女閨蜜一齊食飯都可以，但記住，搵啲有拖拍嘅。例如都係小三，例如老公／男朋友出咗trip（唔好問人真定假）之類。切忌成班三高剩女一齊自high，講單身萬歲冇男人真好，咁樣個人好快會充滿負能量，失去競爭力。而據非官方統計話我知，帶頭講單身萬歲嗰個，多數都唔會勁食芝士蛋糕，自己就最快搵到新仔，留低你哋幾個下年再講單身萬歲。

總結

睇完兩千字，你覺得，嘩，咁煩㗎！

係㗎，今日先知？愛情本身已經係高難度，玩三角戀更加係難中之難。我到而家都唔明，我老豆當年小朋友都啤咗兩件，點解仲有時間有錢有精力搵第二個。

不過，齊人小三雖則為主流所不容（睇吓有幾多讀者留言鬧本文教壞人先），但我敬佩佢哋。本質上，做齊人做小三，同而家日日講「追求夢想」嘅冇乜分別，都係為一個夢，受盡幾多冷眼。

《La La Land》話齋：To The Fools Who Dream。Mia 有個姑姐跳河，我就有個老豆包二奶。俾佢哋揀多次，我估都會係咁揀。理得其他人點睇丫！

你今日跳咗塞納河未？好凍㗎，會感冒的。小心。