【 歎息橋第六集導讀：全劇最重要的角色 —— 鍾家俊 】 _ 因為寫文，《歎息橋》在中國大陸率先上架時，我看了頭四集半，剛剛好在梁淑媛（伍詠薇飾）與兒子鍾家俊（岑珈其飾）對手戲開始的時候，我停住了，然後再沒有看下去，直至ViuTV今個星期首播為止。不按時序來說，以集數計，鍾家俊最先在第四集出現，他去了「MASSAM」兩次，兩次皆有目的，就是為了接近胡啟源（陳奐仁飾）與何樂兒（衛詩雅飾）。當時已有種強烈感覺，他其實是全劇最重要的角色 —— 因為父親身份不明，因為成年人無數謊話，才會掀起身邊種種問題，鍾家俊的存在，直接或間接衝擊其母與Ken、Joyce、Thomas與Sammy，好比月亮引發潮汐，潮退時，石頭自然露出來。 _ 第四集和第五集裏，非自身視覺的鍾家俊，不多言，似有怨念，亦有妄想，總之就是神經兮兮似的，所以會四處破壞，由母親善後；他讀書不用功，遲到早退欠交功課恐嚇同學；會去寫匿明信警告何樂兒，着她不要一腳踏兩船；又好像會在食物中做手腳陷害親母；第五集最後一幕，編劇更暗示他為了懲罰Ken而放火燒毁居酒屋，心狠手辣。誠如Catherine向觀眾坦白講：「Kevin係所有痛苦嘅源頭！」到底是否如此？周一晚（18/5）播出的第六集「正常」，編劇就會將講故事的責任，放在Kevin身上。 _ 開劇前看過製作特輯，導演二五與編劇交代了一些鍾家俊的背景：他患癌，生命有限期，亦因為自細「被遺棄」（母親不懂教養，父親Ryan說自己是「便宜仔」），他總會很抽離的面對事情，所以他會很直接指出別人的問題，比如會直接問Thomas是否喜歡Sammy。到底他本性是否如此？他與中學同學嘉嘉（易健兒飾）的關係又會怎樣？他會不會在劇中死去？還有：誰是其父？這些都是我很想看下去的情節，而岑珈其的演出，亦有別於以往在《教束》和《二月廿九》那種古靈精怪扮嚴肅，在《歎息橋》裏，他透過屏幕散發出角色的神經質和按捺不住的躁動（如用衛衣的帽將頭包實，手指不斷拍打頭部、不容許物件偏離「原有位置」，偏執得恐怖），跟「伍姑娘」演母子，出奇配合，甚有驚喜，難怪「伍姑娘」大讚他聰明。 _ 岑珈其也認為跟「伍姑娘」合作相當舒服，「監製同導演好好，佢哋安排咗個飯局，等我哋全部人食餐飯見一見，嗰陣時『伍姑娘』已經好好，佢話：『得㗎喇，以後我就叫你做阿仔，我同你交換埋電話！』佢想好快咁培養關係同感情，佢又真係好錫我，去到現場，我哋各自都會分享有乜嘢準備咗，佢會話你有乜嘢即管同我講，我作為演員就覺得好舒服，同埋好有信心去演繹。」 _ 說來搞笑，今年7月岑珈其便會踏入「3字頭」，對於自己在《歎》繼續扮演學生，他笑言對此不抗拒，只是擔心自己演不來。「我唔係驚重複演中學生，因為每個中學生角色都有唔同嘅故事背景，所以冇可能重複，但我驚我做唔到，我真係太老喇，會令觀眾尷尬難受！」我不認同，因為他真的很似學生，《想見你》的柯佳嬿，也是36歲扮18歲，一樣有說服力，我認為珈其是眾多新世代演員中可塑性極高的一位，將來事業定必可以更上層樓，觀眾應多加留意這個名字。 _ 另外要留意訓導主任一角，是由黃素歡飾演，1988年因為參選亞洲小姐競選而入行，記憶中，她在離開亞視前，跟安德尊、苑瓊丹一樣，多數在綜藝節目中扮演搞笑角色，其實她頗能演，《歎》編審黃綺琳與黃鐦 @bosscaiola 第一次合作拍攝的短片《摩登業主》也有黃素歡的演出，近年最深印象的是《非同凡響》，她飾演廖子妤的母親，在極少戲份中能走進觀眾心裏，功力不能少覷，如果說演藝界真正的「滄海遺珠」，名單上必定少不了她。 _ （16052020） _ #游大東 #游大東影視筆記 #歎息橋 #港劇 @viutv @229fans @himmyw @tamsyin @chungxd @heiwardmak #黃素歡 #易健兒 #林保怡 #周家怡 #衛詩雅 #陳奐仁 #yautaitung #16052020 @michellewsn #潘燦良 #伍詠薇 @tvmoviel

*嚴禁劇透，一見即刪* *粗口自行過濾* *大陸先播，故嚴禁估劇情，只討論香港已播出集數* *可瘋狂話戲屎，禁人身攻擊，私生活免提* *留言請明示你講緊邊套劇* ------------------------------------------ [1230隔夜超短劇評][無綫][使徒行者2 EP07] [讚] 袁偉豪愈做愈有，天堂對住各人嗰種花弗少少囂，到對住老細Victor時又可以壓返少少而又keep到，反而陳豪到依家都冇乜氣勢，見到佢唔驚，又做唔到角色嗰種聰明機智。 [彈] 今集大部分由翠如同埋袁偉豪帶住。嗰場妹頭畀人落咗藥之後天堂帶咗佢返屋企，真係露晒底…‥要做到take咗嘢之後嘅感覺，將黃翠如一直都唔夠放唔夠準確嘅問題一次過放晒上枱。對住袁偉豪都係咁，唔知之後同周柏豪會搞成點…… 有冇人覺得啲打鬥同槍戰好似愈來愈hea，一啲都唔緊張……仲好似集集都重複緊。其實我都唔知啲打鬥可以點唔同法，尤其係槍戰，我覺得場場都差唔多，就連今集出埋機關槍都一樣…… [重溫時間線]（內含微劇透）https://www.hk01.com/article/119907 [演員表] 苗僑偉 飾 卓sir / 許紹雄 飾 歡喜哥 / 周柏豪 飾 樂少 / 黃翠如 飾 妹頭 /袁偉豪 飾 天堂哥 / 陳豪 飾 Victor / 宣萱 飾 Scarlett / 張景淳 飾 飛機 / 林偉 飾 猜fing #1230隔夜超短劇評 #無綫 #TVB #使徒行者2 #周柏豪 #苗僑偉 #黃翠如 #袁偉豪 #許紹雄 #陳豪 #宣萱 #張景淳 #林偉 ---------------------------------------- [1230隔夜超短劇評][ViuTV][還來還未來 EP01,02] [讚] 星期一冇時間，琴晚一次過睇兩集。每集嘅結構完整，喺新台電視劇嚟講已經係好難得。今次講後生仔喺香港社會生活生存嘅題材，我就好啱睇。四個主要演員都稱職，黃奕晨熱血得嚟串串貢又未致於乞人憎。阿妹嚴謹呢一面喺Girls' Talk都有出現。Daisy個角色似乎同佢份人都差唔多。最開心係見到劉俊謙做呢啲喜感角色，呢個先係佢強項，因為佢份人都真係認真得嚟傻傻哋。 好快就交代咗幾個主要角色，跟手又交代埋佢哋身邊嘅角色，每個人都立體。舞台劇資深演員袁富華做峰哥好鬼正，啲戲冚冚聲出晒嚟，對手死咗都唔知咩事。但劉俊謙又同佢夾得好好。 Roller位出返啲搞笑NG嘢我覺得好好，認識多啲班演員都係其次，最重要係用呢個方法平衡返套劇。雖然劉俊謙好搞笑，但呢套嘢係黑色劇，真係睇到人心都噏呀。 [唔知讚定彈] 結構工整對於一開始嚟講係好，但希望之後有啲變化，如果唔係會愈來愈悶。半個鐘頭嚟講暫時係好嘅，希望keep住。不過暫時我都會睇《使徒2》直播，再返app睇《未來》。《老表3》睇唔到都唔可惜。 [演員表] 劉俊謙 飾 俊 / 岑樂怡 飾 樂樂 / 羅伊婷 飾 Daisy / 黃奕晨 飾 迪迪仔 #ViuTV #末來還未來 #劉俊謙 #岑樂怡 #羅伊婷 #黃奕晨 #袁富華 劉俊謙 阿妹 岑樂怡 Daisy Law 羅伊婷 黃奕晨 Dixon Wong

*嚴禁劇透，一見即刪* *粗口自行過濾* *大陸先播，所以今次嚴禁估劇情，只討論電視播出集數* *可瘋狂話戲屎，禁人身攻擊，私生活免提* [1230隔夜超短劇評][無綫][使徒行者2 EP02] [讚] 第一集三哥帶，今集就由Benz雄帶住。Bobby歐陽震華喺《誇世代》嘅訪問裡面講過，話好怕同Benz雄對戲，因為畀佢食咗都唔知。今次唔會唔知啦，因為根本係睇佢表演，同佢做對手戲嘅個個畀佢食住晒。話時話呢套嘢真係拍到啲人好鬼型，Benz雄、煒哥、黃文標、何俊軒、袁偉豪、鄭恕峰統統都好型，係陳豪暫時差啲。煒哥抱住個囝嗰吓力抗圍斬真係有血有淚，最後點解歡喜哥成日烚熟咁笑都解釋埋。 劇情仍然係緊湊嘅，要交代新舊長興對戰，引發Victor、歡喜哥、天堂哥嘅關係，同一時間又一路推動歡喜歌唔想再做卧底，做唔返警察做個平民都願，同卓sir唔想做警察一樣，都係受唔住卧底帶嚟嘅生離死別。又再交代埋黎sir漏低咗妹頭（黃翠如飾）呢個卧底。交代得好清楚乾脆。 有觀眾問點解咁電影feel？收到風話呢套嘢係用新機拍，應該係有分別嘅。另外你見打燈都好多設計，可能因為咁大家覺得冇咁「電視」。 [彈] 兩集有10個人死咗，係多咗啲，不過個個都死得好，有助推動劇情。我知好多都係客串，係想睇多陣，不過又怕太多會影響劇情，好矛盾。歡喜哥同老婆喺醫院，得知星仔有先天性心臟病嗰吓係娘啲。希望星仔有心臟病呢吓係同之後嘅劇情有關，如果唔係剪咗佢都可以。 兩集都咁緊張，個個chok行晒咁做戲，開始有啲頂唔順。睇嚟好快就會放慢返速度，希望文戲可以支持到套劇。緩急有序先好睇。 [重溫時間線]（內含微劇透）https://www.hk01.com/article/119907 [演員表] 許紹雄 飾 歡喜哥 / 苗僑偉 飾 卓sir / 張兆輝 飾 黎sir / 袁偉豪 飾 天堂哥 / 黃翠如 飾 妹頭 / 陳煒 飾 歡喜嫂 / 何俊軒 飾 徐sir / 黃文標 飾 白頭彪 / 陳豪 飾 Victor / 鄭恕峰 飾 羅漢 / 蔡國慶 飾 魏松山 #1230隔夜超短劇評 #無綫 #TVB #使徒行者2 #許紹雄 #苗僑偉 #張兆輝 #袁偉豪 #黃翠如 #陳煒 #何俊軒 #黃文標 #陳豪 #鄭恕峰 #蔡國慶