【龔成問答信箱】（Q22341-Q22360）

Q22341：

睇咗你好多專欄，幫人解決投資/人生上既問題，比左好多好既建議，可以幫下我嗎？

你好。龔成老師!係你既讀者，第一次來信給你。

本人38歲。已婚。想在5年之後財務自由，做自己想做既事，做兼職減少工作時間，想之後幾年生小朋友，多些時間陪BB，老婆。

現在有點迷惘，唔知下一步點做好。希望老師幫忙分析下，產資應該怎樣分配，為日後鋪路，本人投資方面比較保守。

本人每月收入，人工$1.8萬+收租$1.3萬，每月支出(1萬) + 供樓(5千) + 月供股票(1萬)

。現金178萬
。人民幣27萬(定期)
。股票約95萬(同媽媽各佔一半)=47萬
。股票債券基金16萬︰
景順環球消費趨勢基金4萬
瑞銀中國股債基金(每月派息5%)12萬
。單位自住(己供完)
。單位收租(己供完)(市值約700萬)每月$1.3萬
。單位爸媽住(市值約660萬)每月供$5000(欠144萬)

月供股票︰
中華煤氣$2000
香港交易所 $2000
領展$2000
建設銀行 $1000
騰訊 $1000
阿里巴巴 $1000
小米集團 $1000

股票約 $956 939($478 469)
0002。中電控股/500 2500
0006。電能實業/500 2000
6823。香港電訊/1000 2000
2638。港燈/500 2000
0003。中華煤氣/1000 1025
2800。盈富基金/500 226
0823。領展/100 164
0005。匯豐/400 924
1398。工商銀行/1000 10000
3328。交通銀行/1000 5000
0939。建設銀行/1000 18971
0388。香港交易所/100 223
0270。粤海投資/2000 2000
0941。中國移動/500 1000
1310。香港寬頻/500 2000
4246。ibond/100 300

0700。騰訊/100 106
1810。小米集團/200 631
9988。阿里巴巴/100 144
9626。Bilibili/20 40
9888。百度/50 50
3033。南方恆生科技/200 400
3032。恆生科技ETF/200 400
6993。藍月亮/500 500

1)想日後每月有3萬左右被動收入， 應該點樣操作？

2)想喺五年內供完層樓(因為想無負擔)，好定還一半比較好？定係用現金做其他操作好？

3)這個股票組合可以加/減什麼股票，會更好？

4)月供股票應否繼續？有冇供錯股？

#好多問題請多多包涵#80後百萬富翁支持者

龔成老師︰

1) 如果你希望每月有3萬蚊現金流，以股息率6%計，你需要本金600萬。你可以透過投資有增長力的優質資產，去累積這個資金。

而你現有物業，已經可以為你創每月1.3萬現金流，因此你最終只需要額外340萬，基本上你就可以創造到每月3萬現金流的效果。

你現時持有不少物業類資產，未來時間，你應集中在優質股部份，去令成個財富組合更平衡。

2) 現時按息好低，唔建議提早還款。你應該用這些資金，去做投資增值，或者買其他收息資產，個創造財富效率，會更高。

當然，如果你財富已足夠你財務自由，你都可以考慮將額外資金，先還款都無問題。

3) 你現時組合好亂，雖然這些股票都有質素，但隻數太多。長線你要集中翻係10隻左右，最多都係15隻好了，否則你好難定期審視和管理。

由於你現金、定期、債券和股票，加總已經可以有340萬這個金額。所以投資上，唔需要太進取，可以維持現狀，在這5年間，再進行適度增值去提高個本金，咁就可以。

持股中，嗶哩嗶哩(9626)和百度(9888)都有質素和潛力，但風險都係會較高，故不宜持有太多。

到5年後，你就慢慢將組合中股票，換成收息資產，咁去支援你財務自由的生活，就可以。

另外，你債券基金部份，表面上係穏定收入。但你要留意翻佢個回報，有多少係保證，同時會否出現賺息蝕價的風險。

4) 月供股票，大致可以。

現時大市只在合理區，我建議你再多動用50-80萬，去買入一些平穏增長股，去進行適度增值。如果想保守些，你可以將部份投入收息股，都係可以。

至於餘下資金，我地就等大跌市出現，才去掃平貨。

例如收息股，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

------------------------------------------------

Q22342：

老師，你點睇未有盈利，但股價升既股票？

龔成老師：

要深入分析，投資者要了解，企業現時是否發展理想，就算無盈利，都要有一些發展，例如產品、生意有增長、技術提升，市佔率正擴大。

如果無這些因素支持，而市場不斷對將來作無限幻想，只要企業發展有少少不如預期，股價都可能大跌，因為之前的價位無足夠實際因素支持。

------------------------------------------------

Q22343：

有不少人認為即將會有股災，假如目前就算分小住購入，都是損失啊！稍為等待是否更好呢？

龔成老師：

第一，無人能預測到股災，能預測的就不是股災。

第二，只要是優質公司，就算短期股價下跌，企業價值完全無變，你是完全無損失的。

------------------------------------------------

Q22344：

sir,我在$18.5買了5千股3067,求救

另外，我看你的fb,得知你持有1177 ，我也跟着在7.65買了一萬股的1177，現在如何辦？好恐慌
多謝你

龔成老師：

恆生科指ETF（3067）有質素，你長線持有就得，最好長期月供，你唔好太著重短期價格，要睇長線，起碼持有3年，根本唔洗理短期股價。

中生（1177），我有貨，長線，根本完全無野要擔心。

（你的問題都幾大，心理質素好弱，都幾擔心你，因為以我過往做銀行及證券行的經驗，這類人是最不適合投資的。）

------------------------------------------------

Q22345：

龔sir，看到您專欄，知道您對股票投資有獨到見解，想在此方面向您請教：

本人42 歲，有自己投資股票，但以短炒為主，數年前亦在高位入市，致現金股票虧損了約二十多萬。我暫時的存倉有：

1. 005 HSBC 4000 股 （這股佔我虧損一半金額）（平均買入價75）（收了5-6 年息）

2. 0941 中國移動 1000 股 （平均買入價 60）

3. 1336 中華保險 3000 （平均買入價 40）

4.1398 工商銀行 5000 （平均買入價 5.94）

5. 2318 中國平安 500 （平均買入價 87.4）

6. 6127 昭衍新藥 & 9888 百度，均是新股獲分派一手，惟2 隻現也虧損

7. 9988 阿里爸爸，抽新股獲分派一手，暫時是所有股票中有些點微利的......

本人買了數份銀行的儲蓄保險，預期在65 歲可拿回約二百萬現金 （投資合共約一百萬港元）

本人月入約4 萬，每月支出約1.8 萬，有一層未補地價居屋自住。現有約70-80 萬流動現金。

本人期望可以55 歲時有錢可買一層細私人樓自住或出租，請問在投資組合上有何建議？本人正考慮買入一些穩定收息股如煤氣、中電、港燈、電能實業等...不知是否合適？還是您有其他更好建議？

本人在工作出來不久已嘗試投資股票，起初以短炒為主也有不錯斬獲，惟憾15-16 年股災虧損，之後在股市30000 點時高位入市（特別是滙豐），致現今的情況....

非常感謝您閱讀此訊息，也謝謝您賜教！

龔成老師：

建議你之後長線投資，全球最賺錢投資者巴菲特的方法，都是長線的。這是投資的王道。

至於你現時的持股，並不是無質素，但買入價一般都唔平，反映你未有企業估值的能力，建議你之後用平均入市法，例如分注或月供，能減少一次過在高位買入的風險，當然，都要好好提升投資知識，學習選股，計算企業價值。

另外，如果有些個別股佔你組合比例較多，宜減。

匯豐（0005）你可長線收息，但預佢增長力不強，如果你持貨多宜在上升一定水平後減持。經濟好轉後，佢股價都會上翻D，你到時可減部分，餘下再守。

中國移動（0941）你可持有，但預佢增長力不算強。

新華保險（1336），只是不過不失，不宜持有太多。

工商銀行（1398）你可持有，但預佢增長力不算強。

中國平安（2318）雖然中短期較弱，但長遠仍是不差的。

阿里爸爸（9988）可長線。

百度（9888）如果貨不多，無問題，可長線。

昭衍新藥（6127），都有D發展力的。

這股潛力度都有，但業務始終有不確定性，建議小注投資好了。都可以長線的。

另外，同一行業不能多過30%，同一股票佔組合比例不能多過15%，你長遠要跟這指引調整翻。

如果你想55歲完成目標，你可以用「先增值，後現金流」的策略，你42歲，可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

建議你的比例，平穩增長股：潛力股
7：3
（如果你投資實力較強，可增加潛力股比例）

平穩增長股：指數基金。另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、比亞迪（1211）、中生製藥（1177）、三星FANG ETF（2814），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q22346：

月供港鐵，平安好醫生，小米可以嗎？49歲

謝謝老師

龔成老師︰

平安好醫生(1833)和小米(1810)都係有質素，但都是潛力股類。佢增長潛力較大，但風險都會較高。你朋友49歲，不應投資太多這類股票，最多佔組合2成好了。

若月供，我建議佢集中係平穏增長股類。港鐵(0066)係其中一隻唔錯的平穏增長股，可以選擇。

以下係其他平穏增長股，你可以比你朋友參考下。如果佢對這些股票，認識不太多，可以集中供指數基金。

再加平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

現時大市只在合理區，每月儲蓄唔好盡用。要留有一部份，等大跌市機會出現時，可以用來掃平貨。

------------------------------------------------

Q22347：

早晨龔Sir, 可以問下你俾d意見嗎？ 我現時有份marketing 工作月入穩定，可是壓力越來越大，常常OT,我身心累到沒有精神時間處理投資，和女兒相處時間又小，

但我都很多開支，供保險，養父母等都須用上3/4, 餘下可能得番$5000，有時洗費大咗都沒錢儲，所以點想都唔敢遲職，我想問學股票或全職投資取代正職的做法是不可取對嗎？

因為應商也是要希唔定積蓄才可考慮。

龔成老師︰

其實做全職投資者，係我書本《80後千萬富翁》講述5條致富之路，其中之一。

要做到全職投資者，投資對你而言，不單要係興趣，而且更要成為你強項。若你現時對投資無乜了解，你就要先由一個「基本知識投資者」，慢慢開始提升自己。

你要花大量時間，努力去看相關書籍、睇年報聞、睇新、、上課程，去學習如何分析一隻股票。

到你累積到分析50間企業和長期實戰經驗，你就可以變成一個「有實力的投資者」，以算有做全職投資者的基本條件。

但要突破至最高層次的「真正專業投資者」，已經不單是投資知識的問題，因為要突破，就要擁有很強的分析力、很強的眼光、很強的心理質素。這些要更長時去磨鍊，才會做到。

你以前作為目標，係可以。但當現時未有太多相關經驗時，最好都係有份基本收入，用作支付你日常洗費和定期投資之用。

之後，再邊工作，邊學習。到你應為時機合適，或者你被動現金流，已足夠支付你大部傻份開支時，就可以考慮慢慢變成一份全職投資者。

至於你現時工作，從你生活和投資學層上分析，都唔係太理想。但畢竟你開支較多，如果你一時間無法找到相近收入的工作，最好暫時維持現狀較好。

------------------------------------------------

Q22348：

呀sir你好!想請教一下你，我而家29歲，月入6萬-10萬（睇生意而家）

月供緊︰
小米一萬
五千煤氣
2500金沙中國
2500 銀河娛樂

因為儲錢比較近期先開始，暫時有30萬股票係手，都係小米 京東健康 同埋銀河娛樂

想係31歲前買樓，想請教一下你 點部署會比較好

目標：買600-800萬樓，想9成按揭

多謝你呀sir 會繼續睇你page，遲少少希望上埋你堂

龔成老師︰

假設投資回報有10%（連股息再投資），你每月投資$20000 + 30萬股票，2年後大約會增值至85萬，相信足以支援你首期。

但問題係，雖然你現時持股都有質素，但2年係一個短時期，好易會出現股價上的波動，影響最終回報，你要明白這個風險。

若你想保守少少(但回報都會少左)，可以將部份月供資金，改為月供收息股。收息股增長無你上述股票咁高，但股價相對較穏定，再加上有一定股息。

另外，小米(1810)雖然有質素，但唔建議太集中去供任何一間企業。建議你抽走佢部份月供資金，去投資其他優質股。

以下是一些適合股票，若你2年要動用資金，收息股會較穏陣，而平穏增長股，增長力會較高，但波動性都會比收息股高少少。你可以因應自己風險承受能力，去作出選擇。

除了投資優質的平穩增長股外，同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q22349：

龔Sir你好！我有幾個問題想請教你一下：

今年買股票明年才收息，咁應該係睇周息率還是預測息率呢？

為什麼預測息率通常都是高過周息率呢？這是否純屬估計今年盈利增加, 而預示明年派息金額會比今年為高嗎？

點解經濟通和A A Stock同一隻股票同一個股價，息率會有少少分別呢？計算方式有冇咩唔同呢？咁應該睇邊一個才更加準確呢？

另外上一堂聽你提到Vtech303算不算是工業股嗎? 因為有9％股息那麼高，如果作為我上面配置表中10％穩健的收息股作長期收息是否穩陣和適合嗎？

謝謝龔Sir解答並祝週末愉快

龔成老師︰

"預測息率"只係一個估算，你可以作為參考，我實際派多少，要到明年才知道。但投資定平貴時，若你用股息率作估值，我地應主要參考"周息率"。

至於"預測息率"高於"周息率"，主要是預期來年派息會增值。但這只是估算，而且每個網站估算方法都會有所不同，所以這指標只宜作輔助性質。

而經濟通和A A Stock同一隻股票同一個股價，但息率有分別，這是正常。因為佢用邊個時間股價、匯率等，都有機會造成影響。

你做分析時，只要係用同一網站資訊去作比較，咁就可以，用那一個網站都無問題。

偉易達（0303）算係工業股，產品未算係高端科技，但都要一定技術，故都略有競爭力。增長力就不算強。本質正面，長遠投資價值有的。

以佢過往正常的經營環境來講，佢派息比率高達9成，成立於70年代，業務是電子產品，這麼高的派息，反映管理層明白這公司已過了最高增長的年代，之後只會是平穩增長。

公司已不需要每年投資發展，反而管理層、大股東，偏向想收息，因此這是重派息多過重發展的公司。

雖然佢係某些業務做得不錯，但發展心不強，同時大環境並不是高速增長，故相信佢之後都會平穩。近年這公司的生意，都是平穩增長，如果比較幾年前的盈利，都是差不多。

這股係一隻有投資價值的收息股，都有平穏增長力，此股適合你。但不能太過大注，大約佔你組合5-10%就好了。

------------------------------------------------

Q22350：

阿sir你好，因為工作需要黎緊要讀一個碩士學位，想問下應唔應該借學貸確保自己有錢投資？

因為如果我借左黎交學費之後將自己既錢攞去投資喺大型etf （voo qqq 果類）或者穩健/收息型既公司（823，apple果類），

只要佢地年回報率/股息率高於學貸既利息率，理論上我既資產喺讀緊書既時期都係上升緊。

同埋如果借錢係咪應該將還款年期拉到最長？因為宏觀經濟喺大機率情況下會長期通脹，變左我拉長黎還既話越後期還果舊錢既實際購買力其實會越低？

唔該阿sir！

龔成老師︰

碩士課程，你可以睇翻個息率高唔高，如果唔高，其實應該借貸(用較長年期)，再用空出來資金去投資增值，咁個效益會較好。

你所講股票，長期平衡回報相信都有8-10%，如果學貸息口明顯係低好多，咁就會創造出投資效益。

但記住，這個回報我係用長線去估計，中短期都會有波動。所以，你要預算好還款部份。唔好諗住靠這些投資去還錢，因為可能係你要開始還款時，剛好大市在不利環境。

若你要套現，就會變成賤賣資產，令到正向投資效益不能產生。

------------------------------------------------

Q22351：

龔城老師對不起，我之前打錯左，比亞迪係242入，唔係142入，請問應該點做？以下係我嘅資產分佈⋯⋯

100股700 $519.5
100股700 $539.5
100股700 $567
100股700 $557.5
100股700 $527
100股700 $581
100股700 $542.5

200股3690 $211.2
100股3690美圑 $248.2
100股3690美圑 $232
100股3690美圑 $238.4
100股3690美圑 $241.6
100股3690美圑 $366.4
100股3690美圑 $298.2

500股1211比亞迪
$247.2
500股1211 $248.6

500股2269 藥明生物
$129.6

100股9988.HK 阿里巴巴 $197.7

謝謝

龔成老師︰

比亞迪(1211)你係$142，定$242入，其實都唔影響你是否持有的決定。只是心理上影響你。

你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你持股都有質素，係值得持有的股票。

但問題是全部都係"潛力股"，佢地雖然有增長潛力，同時風險都較高，不宜持有過多。

若你算年青，潛力股可佔約5成，餘下應用以下平穏增長股。若你投資經驗較淺或年紀較大，潛力股比重，要再下調。

你美圑(3690)和騰訊（0700）佔比好高，而沽出部份，換至其他股票平衡下，咁會較好。特別係美圑(3690)佢不確定性較高，不宜持有太多。

未來時間，你就要加大翻平穏增長股部份，令組合更平衡。

平穏增長股：指數基金、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

------------------------------------------------

Q22352：

老師請指教 持有︰

長實1000（51.00)
吉利 3000（25.00）
長城1000（29.00）
京東健康400（165.00）
美團 100（322.00）
比亞迪500（225.00）

共蝕3萬幾，應該再等候? 可以長期持有??

龔成老師︰

你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你持有的股票，都有長線投資價值。中短期股價波動，係正常，你照持有就可以。

但你上述股票，都係偏向潛力股較多。若你係年青至中年人士，都係可以。但若你年紀較大，這個組合風險就有點過高。

另外，我見你不少股票，買入價都偏貴。如果你唔係咁識估值，去定平費，最好用分注或月供策略儲貨，以平衡價格波動的風險。

------------------------------------------------

Q22353：

龔老師, 你好！朋友拜讀老師的註作和分享，獲益良多，因而我也開始留意龔老師的分享。我想請教一下，我以下這個財務狀況，要怎樣投資，才能達到兩年後，獲利30萬的目標：

現有投資和資本：

中電（500股）, 2235
恒生銀行（100股）,
勝捷（1000股）,
本金 $50000 （可著量加碼）

因重返校園，没有收入。

中電以$65買入，恒生以$118買入，勝捷錢招股價買入。中電和恒生打算長期持有。

感謝老師幫忙！

還有，set左小米以目標價$26買入兩手。

龔成老師︰

現時你持有的股票，中電（0002）恆生（0011）可持有，雖然你年齡可以進取少少，而這電股增長力不算強，但如果佔組合比例不過多其實可以的。

至於勝捷企業（6090），佢於新加坡及馬來西亞開發、擁有及管理特建工人宿舍。並開發、擁有及管理英國、澳大利亞、新加坡、美國及韓國特建學生宿舍。

佢財務數據只是中等，增長力不強，近年盈利大跌，企業的獨特性唔算高，投資價值中等。

雖然不是劣質，但長遠當股價上翻D時，可考慮賣出。

至於小米（1810），你預$24為合理區頂位。

我地投資股票，等同投資一間企業，就算再優質股票，都要時間成長。2年只係一個好短時間，好大機會會出現股價波動。

而且，我地一般希望做到架合理回報，係每年增長10-15%。你現時這個目標，用股票投資去做，風險會好大，較難達到。

如果你無其他增值方法，建議你按部就班，透過月供和買入優質股，去為自已資產作增值。

除了上述持股和計劃，你可以因應自己年紀，去再月供一些股票，去做財富增值。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金(包括現有5萬)，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22354：

你好，龔成老師，我係你學生黎㗎，上左你投資班！有個小提意，你而家因為幫人愈來愈受歡迎！你又真係好好人，咩問題都答！

其實我想話有個小提議，不如你另外開一個Facebook group，只係for有上過你堂既人先可以join

咁個個group既人可以係group問你上堂教既問題，你又唔會太怕一d無上堂嘅人攞到你既心得！咁我覺得對你公平d！

你得24小時，你救唔到全世界既人，順便都要救下上過你堂d人！haha只係小提議而已！

龔成老師︰

多謝你意見，其實回答問題，的確係會比較費時。因為FB中問題，我99%都係會回答。

但我設立FB平台目的，除了幫助同學，解答一些課堂上的問題外，都希望可以幫到一些投資者(非同學)，找到正確的方向。

所以，我暫時都會保留平台，跟同學或者讀者交流投資心得。

到真係吃不消時，才再算，哈。

------------------------------------------------

Q22355：

龔成老師你好, 我40歲, 丈夫每月給予$18,000家用, 扣除日常開支, 餘下大約$10,000. 現時持有股票如下:

9988_200股@177.9
1398_5000股@4.19
0175_2000股@23.75
3067_2000股@16.2

0135_8000股@6.903
0939_10000股@6.00
6837_2400股@12.55
0005_1600股@69.5

自從一年多前看你的專頁便開始月供股票, 本年6月份前只供2800和2638, 每月供款合共$5,000. 6月份調整每月供款金額為$6,500, 月供股票如下:

0002 每月供款$2,000 (自本年6月份開始供)
2800 每月供款$3,500 (自一年多前開始月供, 目前大約有3000股)
2638 每月供款$1,000 (自一年多前開始月供, 目前大約有4800股)

現金約有60萬, 計劃4年後送女兒到澳洲讀書, 希望能在這4年內有一筆資金可讓女兒留學4年的費用, 即大約160萬,

故來信請教龔成老師給予一些投資建議, 以達成目標.

龔成老師︰

你現時持股，都係有質素。但如果你目標係想做增值，現持部份持股只是收息類(1398, 0939, 0005, 2638)，增長力較弱，你就不宜持有太多。

而且，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

你現時銀行股(1398, 0939, 0005)，係超左標，加上佢地只係收息股，建議沽出部份，換至較有增長力股票。

另外，昆侖能源（0135）和海通證券(6837)質素只係中等，不宜持有太多。現貨可持有，但暫時不要加注了。

新資金和月供，可以集中投資在一些「平穏增長股」和「潛力股」。你每月$6500儲蓄做月供，其餘先儲起，係正確策略。但港燈(2638)增長力弱，建議換成以下股票。

選股上，你可以投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

現時大市只是合理區，你現有60萬資金可以先投入10-20萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

假設投資回報有10%（連股息再投資），你每月投資$10000 + 80萬資產(股票+現金)，4年後大約會增值至160-170萬，故這樣安排相信很大機會達至你的財務目標。

------------------------------------------------

Q22356：

龔sir你好，本人41歲，有兩個小朋友，在職月入$55000，先生42歲月入$70000，自住物業購入$475萬，欠$300萬，月供$20000，每月花費頗多，最多只能淨$15000-$20000.

股票只有滙豐，少於十萬.現金大約$180萬.

以前買過基金及股票輸過太多，所以唔敢亂買，現有小朋友既顧慮，並希望可以盡快退休陪小朋友。

所以好想請教一下龔sir我嘅情況應該如何安排比較合適？謝謝你

龔成老師︰

由於你以往在投資上，都輸唔少錢，相信係有一些核心性問題存在。譬如一些錯誤的投資觀念。

記住，正確和正常的完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

往後，你只要以「長線投資優質股」，作為投資目標。我好有信心，你會結束過往一直虧損的狀況。

以你41歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注(約2成)。此期間，你最好是努力提高投資知識，才慢慢增加翻潛力股比例(最多4成)。

如果你想再保守D，可以全數100%投資平穏增長股，都係可以。

大市現處於合理水平，那180萬資金，你可以再用多40-60萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

到你累積到一定金額，你就可以將佢地，慢慢換成收息資產(如收息股、A級債券、年金等)，去創造穏定現金流，支援你退休生活，咁就可以。

------------------------------------------------

Q22357：

我現年50，股票有大約160萬，分佈如下：

60000股煤氣
500股港交
23000股建行

1000股電能
5200股領展
60股蘋果

自住物業仲有4,600,000按揭，每月人工大約46,000，

問題如下

1. 煤氣好似升得比較，建唔建議用一半＄換港交所？

2. 又或者有冇其他建議？我希望可以做到一年多啲被動收入

3. 同埋如果想買多一層樓收租，細單位，應該點樣部署

龔成老師︰

1) 我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時50歲去計，雖然都可以增值，但就要保守少少。港交所(0388)和APPLE這類波動性較高股票，不宜持有太多。

另一方面，我地創造一個財富組合，除左因應人生階段外，都會講求平衡性。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

你現時持有股票，都有質素。但煤氣(0003)，佔你組合比重太高，點都要沽少少，換去其他行業會較好。

2) 以你年紀，可以用以下股票作增值，去先累積起一筆財富。到你將近退休前數年，就慢慢換成收息股，去創造穏定現金流(即股息)，來支援退休生活開支。

3) 方法一樣，都係透過以上股票，去增值這筆資金。

但現時租金回報率不高，從投資角度，投資優質股會較好。而且，你已有一間物業，再加一間會比較偏重左係物業之餘，都會令你負債進一步增值，造成風險。

以你年紀，總負債最多只好佔總資產一半，所以是否再加一個收租物業，你要自己衡量。

------------------------------------------------

Q22358：

呀sir..想請教下點睇平安好醫生？哩排日日跌，係本質變左定係仲可以keep等佢升返？感謝

而家持倉哩幾隻，請問有無咩建議
（1211、1833、1810、3067、1919、1448、1177、1083）

龔成老師︰

平安好醫生(1833)本質上，唔見有明顯改變。近期大市較弱，這類未有盈利，市值很大程度建基於"未來"的企業，好多時都會有較大調整。

此股有質素，你可以照持有，只要佢佔你組合，唔係好大比重，咁就無問題。

而其他持股，都係有質素，照長線持有係可以。

但組合配置上，就較大問題。你而家組合，太偏重左係潛力股(除了1083唔算係之外)，佢地雖然有增長潛力，同時風險都較高，不宜持有過多。

若你算年青，潛力股可佔約5成，餘下應用以下平穏增長股。如果你投資經驗較淺或年紀較大，潛力股比重，要再調至2-3成以下。

未來時間，你要根據自己人生階段和投資經驗，去加大翻平穏增長股部份，令組合更平衡。

平穏增長股：平穩型指數基金、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)。

------------------------------------------------

Q22359：

龔成老師 你好。小弟今年38，政府工月入42k。有兩個小朋友，居住完全無問題，我由6月中先開始睇你個page和買了你好幾本書睇，真係覺得好有道理完全改變咗我嘅理財觀念，

其實之前對股票投資係0經驗。但我有跟著你的方法月供股票，但由於開支比較大，每月只可存3000左右現金用3000做月供，2k盈富、1k小米、1k金沙。

再入咗2手3067、1手0808、2手0493。雖然剛起步入市好少～但我覺得係要行出第一步，令自己真係參與其中先會有動力繼續落去。

老師現在我有一個問題就係現在我月供金額比較少，現在銀行有個低息貸款，如果我借15萬5年每月還款2900剛好就是我月供嘅金額，

我想用15萬加大月供嘅金額由2k2800加到4k,小米和金沙各2k，請問這個借貸投資方法可行嗎？謝謝

龔成老師︰

你現有持股和月供計劃，大致都可以。

但留意國美零售（0493），從過往分析，質素只是一般。企業連續出現虧損，品牌價值遠不及從前，優勢不強，雖然正加強網上網售網絡。

唯一的賣點是創始人黃光裕回歸，可能帶公司變強，但發展仍有未知數，如果以這刻的業務、發展、現價，整體的投資價值唔算高。

當然黃生可能帶領公司變到好唔同，但這點真的無得計。以理性分析，這刻投資值博率，只是一般。你持貨唔算多，可以守住再觀察，但不要再加注。

至於貸款去投資，唔係唔得。但我會視之為最後皇牌，到大市真係好平，先會動用。

但現時大市只在合理區，唔係最平宜，明顯未係理想時機。即是說，這些借貸投資不是不能用，但要等到有把握才會用會更好。

所以，若你真係打算借這15萬。現階段最多只可動用部份，而且入貨時必需分注進行，等到大市有大跌，才好大注入貨。

或者，你用來加大月供金額至4K，去平衡風險，都係一個可行方法。但你現明白當中風險，咁就可以。

------------------------------------------------

Q22360：

成哥，請問3898何解6個月升了一倍，因晶片関係，它是影子股嗎？不足收入長期月供股，是嗎？請指教。

龔成老師︰

中車時代電氣（3898）係中國鐵路車載電氣系統供應商及集成商。

佢的產品可分為兩大類：（１）車載電氣系統：包括列車牽引變流器、輔助供電設備與控制系統、列車行車安全裝備。（２）電氣元件：包括電力半導體元件、傳感器及其他相關產品。

佢主要客戶為鐵道部及其地方鐵路局、中國主機廠及城軌運營商。

佢向主機廠及城軌運營商提供新造機車車輛的車載電氣系統，以及向鐵道部的地方鐵路局及城軌運營商提供作維修及更替用途的車載電氣系統。

業務不是無質素，但增長力一般是較大的問題，企業價值無乜向上，盈利亦很普通。

佢近半年大升，除了其半導體部份外，其母公司中國中車(1766)，被美國從制裁名單中刪除，都係利好原因。

但現價已被推得太高，由於此股質素只是中等，增長力不強，不宜用作月供。想投資的話，建議有好明顯回調出現，才好考慮小注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22301-Q22320）

Q22301：

Hello 龔 Sir, 幾個月前開始接觸你，另外，我先生買咗幾本你嘅書，我睇咗你其中一本書，其實我二十多年對投資都有少少心得，只係較少接觸新經濟股….

Anyway, 依排個市跌，股票跌了 10%，咁多年股市上上落落我都無乜所謂….

其實我想講返重點，因為做全職媽咪，我十幾年無返工，但我睇了你嘅書後，決定跳出 comfort zone, 揾咗一份我很愛的 part-time, 返咗幾個月，

我真係覺得好有意義又表現幾好….但係，我今日竟然唔知醒，今日公司叫咗第二個人頂上一日，我真係喊足成日….衝動下買了 #700 發洩…

今日的故事講完，想同你分享，希望下星期我繼續有工返

龔成老師︰

如果你有上過我股票班，就會明白，我地的同學好小心投資的。課堂會派一份6頁紙的「企業評估表」，我會逼佢地填好6頁紙，先可以進行投資，所以佢地的投資都好穩健。

人生路上，我地難免會遇到一些令人氣餒的意外。最重要，係我地有無方法，令自己收拾好心情，重新上路。

發洩，其實係無問題，因為係一個情緒抒發，可以幫自己調整好心情。

每個人抒發的方法都不同，有人會做運動、有人會去唱K狂叫、有人會去沙灘對住個海沉思...。只要唔好傷害到自己和其他人，咁就無問題。

當你情緒，開始可以慢慢回復平靜，我地就要客觀分析，點去解決當前問題。(記住情緒未控制好，唔好做重大決定。)

其實遲到，我相信好多打工仔都試過，除非你本身係遲到常客，或者本身比人印象係唔盡責。否則一次半次，你誠心道歉，相信問題不大。

由於你缺席，公司要找人頂一日，都係正常，因為人地都要運作。

希望你可以明白，人生總會遇上不如意的事，重點係你面對的態度，而唔係件事本身。

其實，我好欣賞你走出comfort zone的勇氣。特別你係一個無做野1X年的全職媽媽，就更加難得，你要加油!!!

另外，你好衝動咁買左架騰訊（0700），現價算合理區中部。雖然近期中央政策，對相關大型企業，有不利影響。

但騰訊（0700）係有質素和規模的公司，相信會慢慢適應如何在這些新法規下營運，因此長線投資價值依然存在。

不過，你預佢中短期一定會較波動，但長線持有的話，就無問題。

------------------------------------------------

Q22302：

1) 龔sir你好，最近我學習了SOTP估值方法，我用此方法評估了最近金山軟件的估值，你可以給我一點意見嗎？

金山內在價值：
網遊+辦公軟件=70億人民幣
金山雲= 108億人民幣
淨現金= 140億人民幣
獵豹移動= 10人民幣
但參考aastock 496.93憶市值
我計漏咗啲咩？

網遊和辦公軟件以33%增長，金山雲以一倍增長。獵豹移動大約股價$2美金，大概18億人民幣，現金就參考披露易最近的2020年全年業績

如果計算之後就變成價值$28.46一股，這樣就高了30%

2) 另外，信達生物最近研發出pemigatinib藥物針對治療癌症,並已經在台灣日本美國批准使用,並對信達生物業績增長一倍以上,如果股價跟隨大市回落至$60，即是到250天線附近。有見及此，值得買入嗎？

不好意思一次過問你這麼多問題

有機會出現MACD背馳嗎？恕我班門弄斧

1801信達生物(六個月圖)

龔成老師︰

1) 雖然有參考價值，但你都要明白背後原理，由於唔知你具體每一部分怎樣計算，有可能你這個估值方法，只簡單將企業子公司市值加起(持股部份)，再計入集團本身資產和負債，去做出一個市值作估算。

現時財經網站提供的市值，純粹係現價，再乘以發行股數。

而你這個方法，係要對不同分部，因應其特性和發展階段，用相應估值方法，去作出評估，所以唔一樣係正常。

其實，市值計算本身係好主觀，特別係一些估值方法，如果你唔係非常有經驗，只要數字有些微偏差，個結果可以差好遠。不同估值方法，會適合不同性質企業，唔可以亂用。

而且附屬公司、聯/合營公司計算比較複雜，如果直接閱讀財經網數據，係會有偏差。

所以係估值前，我地要按實際情況，對數字作出相應調整。這部份較難，我都係在自己的進階班，才會教授同學。

因此，我唔建議你單用市值，作為分析基礎。你可以用佢參考，但最重要都係了解企業本質，佢做什麼業務、行業發展狀況、財務數據、競爭情況等，去做核心會較穏當。

金山軟件（3888）主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。

業務有質素，長遠發展力不差，不過擔心股價較為大上大落，現價合理區，唔建議大注投資。這股前景正面的。

2) 你要記住，我地投資股票，就等同投資一間企業。你最重要係知道佢本質、行業等基本因素。

過去股價未必能反映其未來情況，因此唔好再睇圖的趨勢，這是好錯的投資方法！巴菲特已經講到明，技術分析沒有作用的。我地只會分析企業的質素，以及企業的價值。

我20年前，都會用移動平均線、RSI、圖表等分析方法，但當我輸完又輸時，我決定放棄這些技術分析，從此我就不斷贏錢。

信達生物（1801）係一家中國生物製藥公司，開發了集研究、發現、開發、製造及商業化於一體的生物醫藥平台。

睇翻佢資料，佢亦係腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。

你所講的，是一個利好因素。

但由於仍處於燒銀紙的狀態，所以有危有機，潛力度是有的，但估值好難，現時市值都唔細，只能完全「估」佢將來的價值，不確定性好大。

只可以話，這刻投資值博率中等，你投資係可以，但唔建議大注。

------------------------------------------------

Q22303：

Hello 龔成你好，想請教下你關於現況應該點樣投資

我地二個人(30歲頭), 每月固定收入66000(已扣MPF)，係外地有個物業價值600萬左右係按揭每月交17000左右

現在手頭上有大約150萬現金，30萬股票，20萬黃金 (結婚收到的)

現在需要搬屋, 正係度煩惱緊買定租好 (如果租大約13000-15000左右)，銀行就話我地可以最盡係香港置業借到6百萬 (有說明外地物業同按揭情況)

不過我地就怕太risky/未係合宜嘅時間(定係等多1-2年再升人工先), 不過又好似好浪費現金,定係可以做一點其他投資? (唔係買物業)

希望你可以指點下我地. 不過如果你Post出黎我驚比人估到係我地, 好多朋友都有follow 你

萬分感謝!

龔成老師︰

香港物業，我唔知中短期會點走，但長線我預期都會維持上升。如果你2人係計劃，長線都會留係香港生活，我建議你要為自住屋，做定準備。

現時樓市雖然唔算平，但若果有配合到你長線生活所需，價格合理，足以你們長線"供得起"的物業，其實已經可以出手。

若果你都係想穏陣D，等人工高D先再算。現時資金，可以先投資在優質股，去進行增值。

你們可以選擇一些「平穩增值股」+「潛力股」作投資目標。若每月有一定儲蓄，建議進行月供股票，去提升增值能力。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那150萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

而黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多(<3%)，而且持有的應該為實金。

當然，如果這些黃金若有紀念價值，你係可以自行衡量是否保留，不必跟足<3%的標準。

------------------------------------------------

Q22304：

Hello 龔成老師，上次聽左你意見開始抽部分資金去月供2318，現在組合配置更佳。另外有幾隻股票想問下你意見。

1. 3309
2. 1368
想了解你對呢2隻股票睇法

3. 1830
由2.x 見你講必瘦站但一直無入貨，見而加升到差不多10蚊
想問下合理區同便宜區位置係邊呢

謝謝你！

龔成老師︰

希瑪眼科（3309）有質素的，佢主要於香港及中國內地提供眼科服務，及銷售視力輔助產品及醫藥產品。

另外，睇翻佢，都尋找加大在中國擴展業務，係2019年透過收購眼科醫院於昆明及上海拓展服務網絡及在惠州設立一間新眼科醫院。

除了一線城市，佢亦係昆明及惠州等二線城市拓展服務網絡。

這股在業務上，的確有吸引力的，相信生意將會不斷擴大。不過過現時估值都唔平，現時估值略貴，基本上已反映了企業的增長力。長線投資不是不可，但就唔建議太大注。

特步國際（1368）不差的，生意與盈利都有增長，本身都算有品牌，不過盈利就較為波動，部分年份盈利出現下跌。但長遠仍是正面。

個別年份有生意上升但盈利下跌，反映成本增加，同時未能轉嫁消費者，又或者佢要用減價策略才能吸客，反映賺錢能力未必好強，質素有，但不能定義為最高之列。

整體都有長線投資價值，現價偏貴。等佢最少回2,3成，才好開始小注。

完美醫療（1830）長遠有發展，本身有一定的質素。而價唔平，$6/7算係合理區頂部。若你到平宜區，需要出現好大幅回調，才可以。

------------------------------------------------

Q22305：

講完投資，保險個part都想請教下老師

以3X歲女士有家庭，1個3歲小朋友為例，其實要投保（危疾）既保額大概係幾多先叫合理？（另有買醫療）

每個經紀講既都唔同，都唔知幾多先叫足夠

龔成老師︰

危疾，佢賠償係已一個指定金額計算，同醫療保不同。這筆賠償，無指定用途。

因此，危疾除了可用作抵銷部份醫療開支外(超出醫療保保障部份)，最重要係填補你因長期不能工作，所失去的收入。

由於危疾係一些大病，一般治療至休養，可能講緊係2-3年。所以，你可以用你2年年薪，作為基礎標準。

再按你現時和預期將來家庭開支狀況、保單條款等，再進行調整，咁就可以。

------------------------------------------------

Q22306：

龔sir你好，我現在持有 主要是收息股。正為退休作準備，還有少量其它股 等合適時機沽出換馬

現在有點舉棋不定，因為以下4隻收息股都是我比較喜歡的 但只能4選2:

1098 路勁
3383 雅居樂集團
604 深圳控股
1883 中信國際

有勞龔sir幫幫眼 打擾了 謝謝！

龔成老師︰

中信國際電訊（1883）業務穩定，整體質素算是不差，作為收息股係可以。

深圳控股(0604)和雅居樂集團(3383)都適合做收息股，但佢地負債較高，風險會高少少。

而路勁(1098)都有質素，但派息較受盈利所影響，作為收息股，就未必咁合適。

這些股票，現價都在理想，已經可以分注入貨，並長線持有。

------------------------------------------------

Q22307：

想请问Geely Auto 您又怎么看呢？

Xiaomi 现在的价钱算贵吗？


龔成老師︰

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂，至略貴。你預佢股價會波動，有貨可長線。如果現價入貨，小注都可以。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價略貴，回多1,2成，才開始小注會較好。

------------------------------------------------

Q22308：

龔成你好呀, 我一直有睇你既page同專欄, 好讚成你所講, 股票係應該要睇長遠, 加上近期短炒蝕過錢, 更加同意你的觀點。

因為都踏入中年, 加上疫情期間工作大受影響, 所以都好希望可以盡快學識投資,

近期自己心目中都mark定左兩隻, 希望可以請教一下你的意見 (唔知可唔可以咁樣PM你問, 如果唔得都唔緊要的。)

唔知可否請教以下幾隻股, 可長揸嗎?

- 中遠海控 (見佢升咁多一直冇買, 但前景幾好咁)
- 國泰航空 (一直在7蚊左右持有左好耐, 希望等到疫情完後)
- 醫思健康 (有新世界入股, 加上是醫美行業, 自己比較熟悉, 覺得前景不俗, 但之前又係升左好多, 一直未敢入)

多謝指教

龔成老師︰

我想你先明白一些投資概念，我地做財富增值，就係尋找優質企業，用一個合理，甚至平宜的價錢，去買入，並長線持有。讓其自然增值，以達至財富增值目的。

成件事，重點係「優質」之餘，買入價格都要係「合理」。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

這股係有投資價值，但現價略貴，未係投資時機，要等佢回2、3成會合理翻d，我地才可以考慮。

而國泰（0293），坦白講質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。

若你持貨較多，建議等疫情過去，經濟好轉時，佢反彈就減持部份，去平衡風險。如果只係小注，你照長線持有都可以。

香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

業務發展不差，長遠有增長力，不過業務中短期會有少少波動。現價合理區頂至略貴。如果你資金較為充裕，現階段先入一小注，係可以。

否則等佢回多1成才入貨，值博率會較高。

------------------------------------------------

Q22309：

你好, 龔成老師。最近開始睇左你d 文章, 想試下投資股票, 本人沒有投資經驗, 最多只買過ibond, 我對小米, 騰訊, 港鐵, 領展等都有興趣, 但最近個價位好似唔係好夠平, 唔知入唔入市好,

除左上述股票外, 有沒有些係最近較平同值得入手的? 還是等待時機入手上述股票好呢?

本人33歲, 有價值港元$55萬的英鎊, 港元$20萬在銀行高息戶口(2.5 厘息), 如果投資股票的話, 我應該動用英鎊還是高息戶口中嘅港元呢?

動用英鎊的話, 現在係好價位嗎?(其實我一直都想等好價位時把英鎊轉返港元再放入高息戶口) 謝謝!

龔成老師︰

任何貨幣都可以無限發行，因此長遠只會貶值，唔係有一個財富增值的好方法。若你的英鎊無實際用途，建議你將英鎊換回港紙去投資。

如果你擔心匯價問題，你可以分注咁，慢慢換翻做港元就可以。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」作組合，去創造一個增值平台。除了用你現有資金，我都建議你用每月空出來的儲蓄，去做月供股票，去加大你財富增值速度。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市現處於合理水平，那75萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

現價計，平穏增長股都在合理區，可開始分注入市。

而潛力股，暫只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22310：

龔sir, 好感恩幾年前有緣睇到你專頁，一向有買股票，都是輸多贏少，直至睇你分享先開始改變投資概念，1177,1211,285,到1810我都獲利不少，已賣出部份，

再加部份儲蓄，買到一個小單位收租，雖然不算很好的物業，但是真的好開心，剛看到你分享別人的喜悅，我也要向你説多謝，感恩你無私分享

龔成老師︰

唔洗客氣，我都係希望透過這個平台，去分享一些正確投資觀念。

希望可以幫到投資者(特別係一些初階投資者)，知道一些較重要概念，從而令佢地更大機會，找住正確方向。

雖然，你現時已有一定成績。但緊記要保持學習，長線投資才會做得好。

而且，你所講的股票，都係有質素。如果你係較保守投資者，而獲利又較多，可以"升一倍，沽一半"。

但緊記大部份貨，應該保持持有。因為長線持有優質股，增值效果才會係最好。加油!

------------------------------------------------

Q22311：

你好呀, 我脫你有介紹ETF #2800 隻股, 我想問咩價位入好呀? 我本身流動資金唔多, 又還緊債, 但我又希望可以增加資金, 想睇下買邊一隻好?

本身知道ETF 股都係收息多, 好似比較啱我咁

龔成老師︰

首先，盈富(2800)是包括58間質素不錯上市公司股票的組合，這些股票有升有跌，但長期計，都有不錯的回報。

買入盈富主要有兩個回報(分別是股價升幅，加上股息回報)，股息不多，大約只有3%，而股價升幅，其實有升有跌，每年都會波動，但長期平均計，都有5%-10%，當然，這是不一定的。

現價計，算係合理區，已經可以分注入貨。佢係平穏增長股，有一定增長力，但股息唔算多。

若你目標係收息，可以選擇X恒生高股息率（3110），是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

至於投資邊個，你就睇翻你自己投資目標。一般情況，如果你係年青至中年，我會建議你投資盈富(2800)，因為你應先做好財富增值部份。

若你年紀較大，接近退休之年，穏定現金流去支援生活，才是你投資重點，故X恒生高股息率（3110）會較合適。

你可以因應自己人生階段，去進行配置。

另外，你要審視翻自己現有貸款，若息口較高，我優先清還貸款，以免影響長線回報。

------------------------------------------------

Q22312：

想請教1302 6988 及 9666。

龔成老師︰

先健科技（1302）為心血管及周邊血管疾病及紊亂所用先進微創介入醫療器械的研發、製造及營銷商，主要提供先天性心臟缺損封堵器（包括ＨｅａｒｔＲ、Ｃｅｒａ及ＣｅｒａＦｌｅｘ等三代系列）。

雖然近年生意都有增長，都有潛力，但始終規模細，不確定性較高，業務可能有潛力，但現時的市盈率處高水平，值博率較一般。

現價偏貴，要有好大幅回調，才好開始小注入貨。而且此股盈利都好波動，只宜小注投資。

樂享互動（6988）是中國的效果類自媒體營銷服務提供商，利用商業智能技術為行業客戶及自媒體發佈者提供服務。

睇翻近年的財務數據，佢增長力是有的，但上市前的數據參考價值較低。

相信佢長遠，業務都有增長力的，公司話佢自己能盈利高增長。但就唔平，小注持有可以。

金科智慧（9666）有質素。

佢係中國西南第一的綜合智慧物業服務商，如果按佢綜合實力計，集團自2016年至2020年連續五年被中指研究院評為中國物業服務百強企業十強之一，自2015年至2020年，連續六年西南地區排名第一。

收益主要來源於四條業務線：物業管理服務；非業主增值服務；社區增值服務；及智慧科技服務。

包括各類住宅及非住宅物業，包括但不限於中高端住宅、商業樓宇、產業園、政府公建、高校醫院等其他物業。

生意與盈利都增長理想，暫時睇佢都有投資價值，但負債高會係一個扣分地方。此股投資係可以，只要唔好太大注，咁就無問題。相信長遠有發展的。

------------------------------------------------

Q22313：

老師你好，本人和太太各36歲，上年剛剛買樓尚有430萬貸款供29年，月入大概10萬，每月有4萬流動資金作投資，再加現金90萬，

想在3年後儲夠3百萬買多一層樓收租，本人唔識投資，想問下有咩投資組合可以加快達成目標，謝謝

龔成老師︰

我假設投資上進取少少，令你可以做到有回報有12%（連股息再投資）。你每月投資$40000 + 90萬現金，3年後大約會增值至300萬。

但你要明白，3年只算得上係一個中短期時間。最終實際回報，可能會較為波動，風險會較高。

從資產配置角度，你現時已經有一個物業，如果你咁短時間，又在增持有一個新物業。

除左成個組合會好偏重物業之餘，太短期內買2個物業，都會受較高價格波動性風險。(一般2個物業，買入時間最好相隔一個週期，大約8年左右。)

我建議你按部就班，透過月供和買入優質股，去為自已資產作增值。到你累積到一定金額，足夠你買入第二個物業之餘，都可以留下若干優質股增值才出手，會較理想。

財富增值方面，以你36歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

若你投資知識不高，可先較集中在平穩增長類股，至於潛力股，只宜小小注。到你提高投資知識後，才慢慢增加翻潛力股比例。

大市現處於合理水平，那90萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q22314：

1) 我又如何得知此公司的每股盈利有冇加上物業重估呢？

2) 我想計比亞迪電子的合理股值，唔知我計得啱唔啱？

比亞迪電子現價$46.35

市盈率 水牛網沒有提供2021年市盈率所以我用9年
2020年 7.483 2016年 7.871
2012年 9.333 2013年 10.04
2018年 10.24 2014年 12.02
2017年 12.50 2019年 14.13
2015年 16.46

市盈率合理區域是 9.333 ～ 12.5

每股盈利 資料來自Aastocks
2016年 0.6112 2017年 1.3787
2018年 1.1044 2019年 0.7935
2020年 2.8725

5年平均值係1.35206，估計公司盈利還會持續增長，所以保守估計每年增長10%

1.35206 x 1.1 = 1.487266

股值合理區域是13.88 ～ 18.59

不知有沒有計錯，因為現價才$46.35相差太大。

3) 我最近留意緊國藥控股（1099）和中智藥業（3737）。我用阿sir你初階班比的企業評級表頭兩頁查過這兩間公司，機本上兩間公司都過關雖然唔係全部100分。

我睇兩間公司的官網都寫得自己點樣勁，但兩間公司的市盈率都低過10倍。流動資產-流動負債係正數。

初步睇價錢也在合理區之下。

想知道為何這兩間公司的市盈率會咁低？值唔值得投資？

謝謝！

龔成老師︰

1) 你可以睇年報中的損益表，就會知道佢有無物業重估成份。

2) 你現時這個計法，概念上係無錯。但做好初步估值之後，我地要再考量，到底這個估值，係唔係足以反映企業現時價值。

比亞迪電子(0285)近年賺錢能力有所提升，我地用過去5年平均數字，就可以能出現過於保守的情況。

因此，我地會以佢最新一年每股盈利作為指標，即係用HKD2.8725。

由於集團始終係代工企業(雖然有一定技術)，市盈率唔會太進取，我地會用佢過去10年中間4年數字，大約為10-12倍。

之後，再加多10%緩衝區。合理價大約為︰HKD26-38。

3) 其實就算係相同行業，只要業務性質、潛力、風險等不同，個市盈率都可以差好遠。

國藥控股（1099） 質素都可以，但增長力已經不算好強。

睇翻佢資料，佢係中國最大及具實力的醫藥分銷和零售企業，集團在中國主要城市以直接經營和特許經營方式管理零售連鎖藥店網絡，向終端消費者銷售藥品及大健康產品。

此股有質素，但賺錢能力唔算高，而增長力唔算太強，是平穏增長型。佢有個比較大問題就係負債比較高，而度會扣左D分，整體而言此股有質素，可投資，現價合理的。

由於佢已經係平穏增長型企業，增值潛力不及中生(1177)這類潛力股高，故市場給予市盈率，都會較低。

而中智藥業（3737）則相反，由於企業規模和品牌不大。雖然佢近年盈利增長係唔錯，但市場會較擔心，佢這個優勢，能否長線維持。

因此，會給予中智藥業一個較保守的市盈率，以反映當中的潛在風險和不確定性。

此股現價合理，但由於存在一定確定性，故只宜小注。

------------------------------------------------

Q22315：

我個人睇法認為。新世界，長期一定會好番，因為佢再俾人爆大鑊就可以執笠，但問題係驚短期甚至中期都有機會發現更多問題，始終起樓唔係一時三刻，

而今次事件反映QC部門同埋管理層有啲得過且過，其他項目都有一定機會有類似問題，只係未俾人爆或者佢地禁住咗，令中期不確定性同埋風險增加

另外留意到美國嘅經濟數據，FRB話經濟雖然開始復甦，但基層勞工市場仍然麻麻地，而高通漲相信係暫時性，仍未係時候改變貨幣政策。

咁樣會唔會令成個市場失衡，為市場復甦帶黎壓力？

龔成老師︰

中短期，新世界(0017)股價難免會弱。

但我地睇翻佢過去咁多年，其實都無出現過重大問題。所以，我會偏向覺得，個營運和監工上風險，未到話十分高的狀況。

長線投資價值，依然存在，但你預佢短期會較波動。

疫情雖然未算清零，但大部份已發展國家，已經開始穏定。相信經濟會慢慢向好，但這個唔會係一時三刻就出現，可能要幾年時間。

而中短期，依然會有好多不確定因素。例如不少發展中國家疫情未受控，對不少消費市場，或者不少企業的產業鏈，都造成不同程度的影響。

但相信這都是中短期，我都分析最好都係集中翻，係企業本質。外圍經濟因素，各國貨幣政策，係有參考價值，但佔比重不應太多，重點都係放係企業本身較好。

------------------------------------------------

Q22316：

Sir,水桶2 有咩好選擇啊？日清和雅生活算嗎？還有甚麼好選擇的？我今年34歲每月可儲2萬，現在儲一萬現金和一萬每月買d 股票的

暫時如下：

1. 科指 ETF 3032 15000股 $8.37
2. 小米 1810 1000股 $27.48
3. 阿里 9988 300股 $235
4. 京東 9618 100股 $309.5
5. 平安好醫生 1833 100股 $87.8

6. 日清 1475 3000股 $6.87
7. 京東物流 2618 100股 $40.36
8. 雅生活 3319 250股 $36.7
9. 福壽園 1448 2000股 $7.5
10. 鐵塔 788 10000股 $1.545

現金：35萬

龔成老師︰

日清(1475)和雅生活(3319)都係唔錯的水桶2股票，你現有持股，都係適合你。

以你34歲，可以投資「平穏增長股」和「潛力股」。你每月5成儲蓄，即是用$10000做月供。其餘先儲起，用一邊月供一邊儲蓄的策略。

選股上，你可以投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有35萬資金可以再投入多10-15萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22317：

首次置業 按揭多好定係少好？

依家開始有個好習慣就係先儲蓄投資 再消費，一個月儲＄5000 另外$5000攞嚟投資 係3-4年之後有＄100萬 有冇問題？

龔成老師︰

其實多與少，跟你首置無關，我地主要係睇佢現行息率。現時貸款息率低，我地應該盡借，令我地可以空多更多資金，作其他投資增值。

你現時養成這個先儲蓄和投資，之後才消費，係一個非常好的習慣，你保持。

以你2X歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

假設投資回報有10%（連股息再投資），你每月投資$10000，4年後大約會增值至55萬。若你要達至100萬，就需要將金額升至$14000和供5年，才可以做到。

------------------------------------------------

Q22318：

師父1212 利福下至合理價低部5.95 ， 值得加注？

近曰消費股如六福，周生生， 莎莎都上番不少，何解1212返而向下？

啟德項目應該有利佢發展對嗎？

另外完美醫療已升至over $8 , 稍貴， 應否放一半？

3069 ETF 你有什麼意見？

龔成老師︰

我地投資，唔好太在意中短期走勢。我地要睇翻個重點，就企業自己本身狀況。

利福國際（1212）主要從事經營生活時尚百貨店及其他零售業務，以及物業發展及物業投資業務。佢透過崇光在香港專門經營百貨店。

中短期一定弱，但長遠仍會正面，不過回勇就要時間。同埋要留意，佢負債較高，因此唔建議投資太大注，現價合理區中下部至底部。

啟德項目，對佢長線發展係有利。但股價唔會一時三刻反映出來，要需要時間。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

如果本身有貨，就長線持有。若你持貨較多，現價沽少少獲利，都係可以。

華夏恒生生科（3069）主要係追蹤恒生香港上市生物科技指數之表現。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線持有會較好。

------------------------------------------------

Q22319：

龔老師你好，我今日34歲，未婚，冇乜經濟壓力，現時未有結婚及生育打算，月入二萬，月儲大約七千，現時擁有資產大約二十萬，其中八萬現金，十二萬股票。

經過你前三個月的教導，我購入多左水桶二的股票，現在股票組合比例大致平衡，現時持有的股票如下：

水桶1
1177 中生製藥 2000x$7.27 11.7%
3718 北控城市 8000x$0.99 6.4%
3067 安碩恒生 100x$16.06 1.3%
1448 福壽園 2000x$7.46 12.1%
3319 雅生活 250x$32.85 6.6%
2057 中通快遞 50x$230.4 9.3%

水桶2
823 領展 100x$74.55 6.0%
2800盈富 1000x$28.38 22.9%
2388 中銀香港 500x$25.1 10.1%

水桶3
778 置富 2000x$8.34 13.5%

快速增值：平穩發展：收息資產=47:39:13

1）請問現時股票組合比例平衡嗎？我打算長期持有無問題嗎？

2）現在我目標先儲現金，等儲到現金佔50%，才加水桶一股票合適嗎？

3）請問3718北控城市資源質素無問題嗎？現價（$0.96）是合理價還是平？我$1.92同$1.28都入左一手，現價可以再分注入嗎？值博率大嗎？等可以再等下？

還有等$15買3067，或等$80買平安好醫生，或等$23買小米，哪個值博率大些？謝謝指導！

龔成老師︰

1) 現時配置係可以，你長線持有，係無問題。但留意中通快遞(2057)始終唔係上市太耐，要再過一些時間，才可以見真章，所以暫時唔好再加注。

2) 現時大市在合理區，現金應佔3-5成左右。目的係等大跌市出現時，我地可以有資金入市買平貨。

而目標唔係集中係水桶1，因為水桶1雖然增長潛力大，但風險都高。建議你視乎當時平貴，再去慢慢平均分配在水桶1和2，咁會較穏當。

3) 北控城市資源（3718）有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。之前股價貴，現價落翻D，大約合理區中下部。現價加小小注，都可以。

至於平安好醫生（1833），無貨現價小注都可以，但由於佢不確定性都高，要控制注碼。

而安碩恒生(3067)和小米(1810)都有質素，但前者係一籃子科技股，較有分散風險能力。

3067現價中合理區上部，而小米就要回多1,2成，就算合理區頂，才可開始分注入市。以現價計，安碩恒生(3067)值博率會係3隻當中較高。

------------------------------------------------

Q22320：

龔成老師，我44，現在有以下股票，共35萬，另有15萬現金，月入2萬+佣金。

170萬按揭，供25年，每月供樓$7700，因為依家巳44歲，好希望可以10年內供完，請問我應該點做可以達到這個目標?

煤氣 18手
港鐵 3手，正在月供1000
中國鐵塔 5手

領展 1手，正在月供1000
盈富 2手，正在月供1000
阿里巴巴，上月開始月供1000

我有諗過每年年尾將花紅約2萬還按揭去減年期，希望可以加快完成供款，做法正確嗎？

龔成老師︰

以你44歲年紀，你持股和月供組合，都係合適的。你現時可以用這些增長股，去累積財富。

由於現時按息不高，我較建議資金先用作增值，而唔係去還款。這樣做，成個財富增值效率，才會較高。

現時大市只在合理區，每月儲蓄唔好盡用。最好留有部份，連同現時的15萬現金，一齊等大跌市出現時，可以用來掃貨。

我假設投資回報有10%（連股息再投資），你每月投資$4000 + 50萬資產(股票和現金)，10年後大約會增值至200萬。

到時你可以因應情況，再決定先還款(若到時息率好高，係可以先還)，還是保持增值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22241-22260）

Q22241：

請問阿Sir，如果我打算以etf作為投資股票的核心，應該如何決定可以佔的比例？心水的etf有2812,2814,2845

另外，過往一直是打工仔，我想開始一盤生意，有一個意念，請問我可以怎樣在心態、能力、知識等各方面預備/裝備自己？

另外一問，有學做生意的書嗎？

龔成老師︰

你主要可因應自己年紀、風險承受能力和組合平衡性，這3點去做考量。

你所講的3隻都係潛力股，若你係年青人，又有一定投資經驗，可以佔你組合5成。若你係較中年，或投資經驗較淺，就要調低至2-3成。

三星中國龍網（2812）之投資目標為追蹤中證全球中國互聯網指數之表現，基金有長線投資價值。

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

2隻ETF都在偏貴水平，最好月供去儲貨。雖然2隻市場不同，但行業都有關連性，最好加起佔組合3成以內，會較安全。

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

如果你本身有其他汽車股，跟ETF加起佔組合比重，同樣要保持3成以內，以免有過度集中性風險。

由一個打工仔，變成生意人，係十分不同。好多工作、管理和風險，現在都要一力承擔。因此，你要有這放面心理準備。

另外，你除了要掌握生意的相關知識。你都要去市場，睇下相關同業，特別係做得出色的同業，佢地係點樣做。

至於創業書本，可以到坊間找找「XXX創業」之類的字眼就得，另外可睇有關猶太人生意經之類的書。但你要緊記，創業係唔易，好多事都係摸石過河，慢慢從經驗中修正。

而且，成功與否，最大關鍵位唔係你能力，而係你能否堅持。加油!

------------------------------------------------

Q22242：

龔成老師，直銷是否一套有效系統，幫助賺錢？

龔成老師︰

「直銷」係一個銷售模式，我地唔可以話佢一定係好，定壞。其實要視乎行業特性，和企業操作能力。

直銷因為不需要中間渠道和有特定銷售場所，從而節省銷貨成本。

但是否一定係有效，我都要睇埋企業、銷售者、產品等因素，唔可以一概而論，說某種銷售模式，就一定係較賺錢。

------------------------------------------------

Q22243：

8603 有必瘦站的影子嗎？
見佢最近做好多大型收購

龔成老師：

亮晴控股（8603）於香港提供醫學美容服務，以「ｐｅｒ　Ｆａｃｅ」品牌在銅鑼灣及尖沙咀經營兩間提供非手術醫學美容服務的醫學美容中心。

並在各醫學美容中心的同一商業綜合體內擁有護膚產品零售店舖，及於中環一百貨商場內擁有銷售護膚產品及提供美甲美睫服務的兩個零售及美容專櫃。

佢透過非手術醫學美容服務、傳統美容服務及銷售護膚產品，向客戶提供全方位療程解決方案。

非手術醫學美容服務分為能量儀器療程及微創療程；傳統美容服務包括面部、美甲及美睫服務。

表面上行業不差，但佢過往業務卻一般，第一規模唔算大，第二，生意增長力不強，第三，獨特性不強，第四，盈利波動，近年都有虧損情況。雖然近年有收購發展等因素，但在近年處虧損狀態下，風險較高，投資價值不算高。

------------------------------------------------

Q22244：

龔sir, 我再有問題想請教，現在大陸政府實行反壟斷法，但我們投資者偏向投資壟㫁企業或寡頭壟斷，例如福壽園，我們日後有什麽注意既地方，謝謝🙏

龔成老師：

的確會有一些不確定的風險。

但我地最重要分析，是政府背後所想，是甚麼原因要監管相關行業，是擔心企業太過大間，勢力太大？擔心對消費者不利？擔心有好多中國訊息？擔心影響金融體系？

其實現時較針對的，是科網類公司，原因是這是較新的行業，之前的監管跟本進不上行業的發展，因此，當中企業能夠在較少監管情況下快速發展，而政府這刻會收緊翻監管。

至於一些較傳統的行業，就算是龍頭，例如褔壽園（1448），只要佢的龍頭不會對消費者或一些體系造成影響，中央相對會無咁擔心。

當然，我地無可能完全知道中央點定之後的監管，但我地可以從佢背後的目的著手。

------------------------------------------------

Q22245：

老師，我想請教，45歲沒有子女，有自住屋及一間收租，收入剛到好夠生活開支，壓力不算很太大，手上沒有股票，現在手上沒有股票，見最近股市有回調，想建立一個平衡組合！

醫療 1833或1177
房托 823、778或435
銀行 939、1398或2388
公用 2638、270或02
運輸66或548
汽車 175或1585
（1211想要等回落180蚊左右）

這些都是老師推介過的，因剛開始入市，想先從每個板塊中各選一隻，之後再慢慢入市分散風險，請老師幫忙各選一隻，感謝！

科技股買3067及285可以嗎

龔成老師︰

以你45歲年紀，都有增長的需要，但就要保守少少，以較平穏增長股票為主。

你列出的股票，都係有質素，我會建議你用1177, 0823, 2388, 0270, 0066作為目標。

這些股票，現價都合理，可以分注。但中生(1177)只算合理區頂，入貨時不要太大注。

至於汽車股方面，其實3隻當中，比亞迪(1211)一定係最好，但現價太貴，要回到$180才可小注月供，回到$135才可開始直接入貨。

你可以先投資雅迪控股（1585）或者吉利(0175)，但2隻都仲係貴，要等佢回多少少，才好入市。

如果你係睇好新能車，其實我較建議先用GX中國電車（2845）作目標。

這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

至於科技股，安碩恒生科技(3067)和比亞迪電子(0285)都可以，前者係合理區頂，可小注。後者偏貴，回多1,2成才好考慮。

質素上，2隻都係有，但安碩恒生科技(3067)係一籃子科技股(當中包含0285)，較有分散風險能力。

------------------------------------------------

Q22246：

1. 你好，最近有不少財經類專欄 有分享不少人公開表示美股即將迎來大跌市 連富爸爸窮爸爸作者都有。

雖然我冇玩美股 但美股大跌都會影響港股 本來想分注入場 係未應該睇下情況先？

但另一方面 我又覺得他們說的都只係將來有機會 沒有人知道是幾時出現 一直空等 都可能是時間成本

2. 早晨，最近睇緊你既書，有少少不明的地方想問。初階者 可以用市盈率作比較，其中提到行業市盈率 以及預估市盈率

行業市盈率 係要自己計出來的嗎？ 要計行業中全部公司的市盈率嗎?

預估未來市盈率 係如何去預估將來的盈利 或者應該問睇咩資料去預估 睇年報中的關於將來的資料 企業應該會盡量寫好的方面吧？

龔成老師︰

1) 我地投資唔應該用"估走勢"架方法去投資，正確方法應該係去理解企業長線質素和前景，再了解佢處於平定貴，之後去進行資金配置。

無人會知聽日或者幾時會大跌市，現時恆指在合理區，你應因應目標企業現時平貴，去定投資策略，而唔係去估。

2) 其實市盈率係其中一個估值方法，這個方法較易和大多數企業都適用。但更理想，係利用不同估值方法，去為企業計出一個較立體的估值，咁就最穏當。

市盈率，就係市價/每股盈利。當市盈率較高，我地一般會應為個股價就係較貴。但至於多少市盈率為之高，無一個標準答案，不同企業和行業，都會有所不同。

你要懂得如何分析一間企業優勢，一個行業發展、特性、財務狀況等，才會有一個較明確的答案。我在股票班都要用數小時解釋，因為這部份係有點複雜。

而預測市盈率，係對一個未來估算。去估計企業未來盈利，來得出一個市盈率數字。由於只係估算，故作參考好了。

------------------------------------------------

Q22247：

龔老師，本人目前23歲，我想分享我人生第一次較大的虧損（雖然只是短期波動），請教老師這決定是否正確，我賣出了部分阿里巴巴。

未賣出它佔我組合約20%，平均買入價為228，是合理頂區。 賣出後佔組合約10%。我賣出我理由是想減少單一科網股 比重，

而且 我對它的質素不了解，帳面虧損上（每手蝕3000左右），因此狠心做此決定，希望老師指點。

龔成老師︰

首先，我地投資一隻股票，必需對佢本身質素、行業、財務狀況等，要有一定程度了解。否則，你係唔應該去投資。

至於我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

阿里巴巴(9988)係有質素，任何股票中短期都會有機會出現波動，只要長線質素不變，你係應該持有。

但你所講，佔組合較多，所以沽少少，這一點係正確。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

但阿里(9988)其實唔算超標好多，其實你唔沽都可以，等新資金去令組合慢慢平衡翻，都係可以。

------------------------------------------------

Q22248：

老師你好，謝謝你耐心回答，想問下 我既組合有冇問題。

我現時29歲 有30萬現金，股票有約51萬

我持有︰
9988@500股 235買入
6618 @500股 149.6買入
6993 @2000股 15.1買入
1177@10000股 7.28買入
1833@300股 98買入

平穩增值方面
1038 @ 1500股 46買入
270 @10000股 12.1買入
823 @500 股 43買入

新經濟股一沉不起，每逢買入都跌，持續半年都冇起色，我都幾擔心，雖然要用時間等待，但我開始冇咩信心，成哥我既組合請你詳細比D意見及30萬現金如何安排好？

龔成老師︰

你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

近期中央不少政策出台，都係針對大型科技企業，令股價受壓係正常。雖然對佢地未來收入，可能有影響，但唔算好嚴重。

你現時持股，都係有質素，你照長線持有就可以。

但係組合配置上，你要留意一點。任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

你現時阿里(9988)和粵海(0270)都有超標情況，但由於佢地都高質，你可以照持有。但未來新資金，就暫時不要投資這2個企業，令佢比重慢慢回復平衡。

------------------------------------------------

Q22249：

龔sir你好，留意了你的page已有一段時間了，發覺你在分析理論上很中肯和有道理。我也買了你的書80萬富翁 和 股票勝經睇。

發覺當中好多活知識在，實在物超所值。當中引述一些名人金句更令我雄心壯志。所以最近都想去實踐財富增值的道路上。

現時我今年生日後30歲，沒有接觸過任何理財知識和方法。之前儲蓄好一筆資金和留意了市場一段時間，最近決定入市股票市場上。

現時我組合如下, 想請教下我這個配搭可以嗎？

如之後仍想增持，應投放資源去那這股份比例上較好？ 6626係我研究應為是未來3年內裏俱有爆發潛力的心水股！

TOD概念+大灣區發展， 物管服務業我相信係未來一個不錯的版塊之一，加上這間公司本身這三年的盈利也不差，有持續性增長。我打算長期持有先觀察3年，

這時間內會睇時機再增持。 另外阿sir,我發覺只從入市後，好似對短期股價的波動會神經化敏感左……想問應該如何對抗這種心態上的變化？

另外我本來睇好9868的發展，但始終認為佢現時股價太貴了和波動上落太大了，未來相信會出現市場回調到一個合理水平。

即管我在$166.1時曾入手一手，但也在10%止蝕位上放售了，從而把這筆資金再+一點入手了現價的9988。 望指教一下， thanks you sir。 祝身體健康。

6626@$5.028 x10000
1810@$26.01 x1000
6830@$1.8387 x16000
9988@$195.7 x100

龔成老師︰

只要你唔好停留係散戶思維，覺得投資就係賺差價。明白到投資目的係將只會貶值現金，轉化成資產的過程。

而資產只要有質素，佢係會長線不斷幫你財富升值，所以你其實係無必要因為短線升少少，就去沽出。

你現時持有股票，都係有質素，可長線持有。

除了華眾車載(6830)要留意，佢唔係無質素。但見佢盈利和股價都幾波動，加上佢負債都唔少，質素只算一般，不宜太大注。

另外，你唔好用價格升跌，去決定是否持有一隻股票，咁係好錯。我地買入後，只會視乎佢質素，去決定是否持有。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

至於小鵬汽車（9868）有質素。

佢係中國領先的智能電動汽車公司，以領先的軟件、數據及硬件技術為核心，為自動駕駛、智能互連和核心汽車系統帶來創新。

佢於2015年成立，根據數據顯示，可以話係中國唯一一家自主開發包含定位和高精地圖融合、感知算法和傳感器融合及行為規劃、運動規劃和控制的全棧式自動駕駛技術，並在量產汽車上應用該軟件的汽車公司。

佢最新自主研發的自動駕駛系統XPILOT 3.0是目前市場上所售汽車中已採用的最先進的自動駕駛技術之一。

佢於2020年係廣東肇慶工廠開始生產 P7。通過與海馬的承包生產合作在其位於河南省鄭州市的工廠生產G3。肇慶工廠和海馬工廠的年產能分別高達10萬輛及15萬輛。

佢的實體銷售和服務網絡包括約200間門店及數十個服務中心，覆蓋中國幾十個城市。全國共有約200個小鵬品牌超級充電站，覆蓋多個城市。

近年業務增長快述，加上前景正面，這股有長線投資的價值，但現價就唔算平，小注投資都可以的，但預佢股價上落會大少少。

------------------------------------------------

Q22250：

你好龔sir,有以下幾個問題希望你可以指點一下：

我42歲，先生43歲，有兩11 和8歳小朋友，有$1200萬現金，年尾想用BNO Visa 移民英國,有以下幾個問題：

1）係香港買$500樓定英國買樓好？如果係香港買樓，我哋英國就會租樓$16000

2）有冇啲$500萬穩健投資年回報10%介紹？例如收股息，基金，滙率掛鉤…..

萬感謝你的回覆

龔成老師︰

1) 從租金回報率計，香港整體租金回報，係會較英國為弱，即係英國樓一般會係相對較平。

而且，你會係移居當地，在香港留下物業收租，可能會較難打理。因此，我比較建議你係英國置業。

2) 你長線，可以投資以下平穏增長股，拉長計會有年均10%增長，但當然不是保證。

而且，係要長線去拉平均計。你年尾就移民，只有不到半年，由於時間太短，不宜作任何投資，最多做定期好了。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

------------------------------------------------

Q22251：

龔sir, 你好! 小弟今年四十四，未有家室， 近半年開始留意你專欄，覺得你的投資慨念好好，幾個月前開始接觸股票，年青時係月光族無咩儲蓄，

近幾年才積極儲錢，幾個月前開始月供小量股票和直接買入股票，組合有以下幾隻，希望龔sir可以給于一下意見，小弟萬分感激！

股票組合

月供 ：0823($1000)、 0939($1000)、0968($2000)
股票： 1686、3067、0293、1310、3339

以上組合是否平均？我希望幾年可以有比較明顯的財務增長，可以五十歲左右有些少資產，最後我想講我報讀左你九月開的投資倍升股課程，到時可以和你見面!

謝謝你!

龔成老師︰

以你44歲年紀，投資上都可以用增值，作為目標。

你現時月供和持股，大致上無問題。但你相增長力高D，你可以將建行(0939)，換成指數基金。因為建行係有質素，但只係收息股，增長力唔會明顯。

持股當中，國泰（0293）的質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算比佢「捱過這疫情這一關」，你都唔好預佢賺錢能力方面有好大改善。

中國龍工（3339）以企業的質素來計只屬中等，業務波動是風險，因此投資不能大注。但長線基本上可以的。

現時大市只在合理區，每月資金唔好盡用。最好留有部份，等大跌市出現時，可以用來掃貨。

股票班見!

------------------------------------------------

Q22252：

老師，有一理財問題想請教您，我對股票投資一點心得都沒有，但年近退休了，更加唔敢投資。

想請教您對政俯年金睇法，我初步了解，對長者資金唔多，將100萬投資落去，每月取回5千幾，約16年用晒本金，之後每年都有5千幾發放，再申請長者津貼有3千幾，合共8千幾，

直至身故，應該夠每月生活基本開支。請問有另一個投資途徑投資效益更高嗎？

謝謝妳的指導。

龔成老師︰

你計算大致正確，以100萬安老年金加長者津貼，每月大約有8千多現金流，直至身故。

但你要明白，貨幣由於可以無限發行，因此貶值係必然的事。你用今日的物價指數去計，8千多可能足夠你生活，但到若干年後，就未必再足夠。

因此，你要在年金以外，你最好自行累積一筆財富，到退休時換成收息資產，去增高退休後現金流收入。

假設你現時尚在年青至中年階段，你可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於潛力股有一定風險，若你年紀較大或投資經驗較淺。這部份，就不要佔太高比重。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q22253：

午安龔老師, 我今年已经56歲, 時間飛逝, 好快10年到退休, 冇樓的我只有租, 只希望能增值為退休多增點錢, 想請教:

1. 儲蓄只有50萬, 可以點增值？

2. 每月只能儲8仟, 我知道可以供股, 但银行每月供股不用手續費嗎？

3. 持有股票有#939 (10000), #1398 (5000), #2388 (2000), #1086 (3000), #3988 (5000), #270 (2000), 组合可以嗎？需要調整嗎？

先謝龔老師！

龔成老師︰

1) 以你的年齡，其實已開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

現時的50萬，暫時只能動用$20-30萬，因為大市唔算平，你要分注投資，同時約留下一半資金。長線投資。

同時，你可以做月供股票，供「平穩增值股」+「收息股」。每月供$4000，餘下$4000就連同其他餘下資金，等大跌市機會。

但就隨著年齡增加，慢慢增加收息股的比例。到退休時，收息股應佔100%。

平穩增值股，例如指數基金、金沙（1928）、長建（1038）、中銀（2388）、港鐵（0066）、恆基（0012）、粵海（0270）、領展(0823)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

2) 有手續費，但若你投資經驗較淺，我建議用月供儲貨，去減少價格波動的風險。

3) 你現時持有股票，大體上都有質素。

當中好孩子（1086）係中國的國際兒童耐用品公司，主要從事嬰兒推車、兒童汽車安全座、嬰兒床、自行車、三輪車及其他兒童耐用品的設計、研發、生產、營銷及銷售業務。

過往業務不過不失，雖然都有生意，但增長力唔強，到近期的業績有轉弱情況，相信對經濟較為敏感，中短期都會較弱。

現價合理的，但就唔好睇得太好，整體投資價值中等，不宜持有太多。

但你持股組合，有個較大問題，就係太集中係銀行股。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

但盈富(2800)係不受此限，因為它是一個包含58間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

因此，你要沽出部份銀行股，換至其他優質股上，去平衡這個風險。

------------------------------------------------

Q22254：

你好，龔成老師。我40歲, 太太33歲，跟太太月入5萬，有270萬的樓宇貸款，每月供樓, 儲蓄後預留1萬投資，另有現金50多萬。現持有以下股票：

2, 500股 @ 77.25
3, 2152股 @ 12.58
5, 400股 @ 49.33
12, 1000股 @ 34.22
66, 500股 @ 43.51

388, 100股 @ 466.57
823, 200股 @ 73.74
1810, 400股 @ 24.81
2800, 1000股 @ 28.47
2845, 100股 @ 122.01

3067, 1300股 @ 16.50
3690, 100股 @ 293.63
3988, 20000股 @ 3.30
6666, 2500股 @ 10.74

以下問題想向你請教：

1)打算每隔3,4月個買入幾隻潛力股 (2800, 3067, 6666),做到月供嘅效果, 咁樣可以嗎？

2)以上組合是否太分散？如果再買入晤同潛力股(1211, 1448, 9988)可以嗎？

3)你對於這個組合有意見可再給我嗎？ 謝謝你解答。

龔成老師︰

1) 只要你係不理當時價格，定時定額咁去儲貨，都可以做到月供的效果。

你現時想買入股票，都係可以。盈富(2800)和恒大物業(6666)係平穏增長型，而安碩恒生科技(3067)係潛力股，都適合你。

2) 你組合明顯係太散，長線最好集中係10隻左右，會較易打理。潛力股(1211, 1448, 9988)都有投資價值。

但比亞迪(1211)現價偏貴，最好回到$180才考慮小注月供，直接買要等到$135左右。

另外，潛力股雖然有增長潛力，同時風險都較高，不宜持有過多。

以你40歲年紀，潛力股可佔約4成，餘下應用以下平穏增長股。若你投資經驗較淺，潛力股比重，要再調至2成以下。到你學到一定投資知識，才慢慢調高。

其餘部份，你應集中係一些平穏增長股部份，組合才算得上平衡。

平穏增長股：指數基金、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

3) 美團(3690)波動性較大，不宜佔比重過高。

------------------------------------------------

Q22255：

老師，請問如果我想3年後買樓，呢3年我預計每月最少儲2萬，其實呢3年時間係咪唔應該攞錢去投資，而係儲現金呢？

龔成老師︰

其實3年唔算長，但用投資優質股增值，都係可以，但選股上要保守少少，集中翻係波動性無咁大的"平穏增長股"類，會較合適。

你每月先用5成儲蓄，即$10000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨。

雖然平穏增長股，波動性係無咁大，但畢竟3年都稱唔上長時間，始終會有D波動性風險，你要明白這一點。

------------------------------------------------

Q22256：

Hello龔成老師你好，本人現50歲，和太太兩人在去年都放棄朝九晚五，現金大約有$500萬，準備預留其中$100做一點小生意。每月供樓年花費大約$5萬。現在持有的股票有：

1. 粵海投資 270，2000股，$11.3入
2. 騰訊控股 700，500股，$580入
3. 中國鐵塔788，20000股，$1.07入
4. 中升控股881，1000股，$61.6入
5. 安徽海螺914，1000毆，$42.77入

6. 中國移動941，500股, $48.4入
7. 信義光能968，2000股，$10.22入
8. 香港寬頻1310，2000股，$10.2入
9. 山東黃金1787，1000股，$16.22入
10. 金界控股3918，2000股，$7.97入

11. 中國海洋石油883，4000股，$8.97入
12. 中國平安2318，8000股，平均$78入
13. 安碩 3067，2600股，平均$16.7入
14. 港鐵66，500股，$43.45入

我想請教老師：

1./ 以上組合潛力股比例是否太少？組合是否夠平均？我希望投入更多資源在增長力高的股票如平穩增長股，老師你有什麼提議？

2./ 我見大市在這段時間上上落落，以上的股票大約由上年年尾開始，已經逐少買入，在這種情況底下，你建議我應該在這段時間買入什麼類型的股票比較穩陣？預留大約多少再進一步買入？

3. 我也開始留意美股，老師你認為例如TSM, AMD或TSLA在這段時間入貨可行嗎？

謝謝老師你能解答。

龔成老師︰

1) 你們年紀，應該係是時候為退休作準備，投資不可以太進取。潛力股可持有(0700, 0788, 0968, 3918, 3067)，但由於佢風險較高，只宜佔組合最多2成。

另外，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

你現時騰訊(0700)和平安(2318)佔比較重，同埋潛力股都有少少多。但這些股票都有質素，你可以照持有。

但新資金就暫時避開這些股票，先集中在一些平穏增長股，令組合平衡翻先。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

山東黃金（1787）主要於中國從事黃金採礦及加工，以及銷售黃金產品。

資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

2) 以你現時情況，你應集中加入一些平穏增長股。

但由於你現時係做生意，收入開頭未必會太穏定。那500萬除了扣起100萬營運資金外，都要再額外留起半年生活費，以備不時之需。

現時大市在合理區，你現有資金，可以多投資50-100萬，去分注慢慢買入平穏增長股。餘下資金，我地就等大跌市機會，才出手入貨。

3) 台積電(TSM)、Advanced Micro Devices，Inc.(AMD)、Tesla現價都唔平，最多只宜小注，或月供儲貨。

而且，這些都係潛力股類，股價上落會較大。緊記這類股票，只宜佔你組合2成。

------------------------------------------------

Q22257：

呀sir 你好 請教一下。如有我有$6M 應該點樣部署？對股票唔太識，有睇開你Page.

6M要還，一年還1.2M

會唔會放曬去 收息股比較好？

龔成老師︰

由於你這些資金，係惜貸得來，而且借用年期都唔算長。我會建議將資金分成3部份，去作增值。

第一部份，係做定期，因為就算再優質股票，中短期都難保會有波動。因為1年內要還款部份，最多只可宜作定期。

其餘部份，你可以投資一些「平穩增值股」+「收息股」。

若你投資經驗較多，或者風險承受能力較強，可以較集中係「平穩增值股」。相反，你應較集中「收息股」，甚至100%用「收息股」，咁會較好。

現時大市只在合理區，你可以分注買入以下股票。但由於大市未算平，資金唔好盡用。最好留有部份，等大跌市出現時，可以用來掃貨。

同時，可以除投資平穩增長股外，同時可建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q22258：

老師您好，想問下1919如果睇法。我7/7當日16.86入左3手，今日下跌到13.82，請問應否繼續持有？

或是止蝕離場？請老師指教

龔成老師︰

首先，一定要了解股價下跌的原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

此股都算有投資價值，但會較波動。你出現帳面虧損，主要係因為買得貴，現時回調，都只係回到較合理水平。但現價計，依然係略貴，回1、2成會合理翻d。

若你持貨不多，可以守。但若持貨較多，建議沽少少，去平衡下個風險。

另外，如果你不懂估值，去分析股票平貴。未來再投資時，建議用分注或月供策略，去減低買貴貨風險。

------------------------------------------------

Q22259：

你好 老師。我今年26歲女 ，想你幫忙審視股票組合!

背景 total本金 :$138000 現值 : $164000
買入價
285 500股 15.86
1177 6000股 7.45
1810 2400股 22.60
3601 2000股 8.7
3067 1300股 16.3

問題1 想問下持有股票有無太大問題 ，3601還可以持有嗎？我想等佢反彈先買出，可行嗎？

問題2 3067算係潛力股嗎，因為見佢都有多不同組合 風險係咪無相對其他潛力股大？

問題3 心水想入價 有1830，2845，1448,2318 知道自己現時潛力股較多 想儲多d現金入翻平穩增長股 現時組合照持有定係需賣出？

最後好想多謝你教識我長期持有，令到我現時有少少少回報，雖然我唔叻但係已經好開心 會繼續長期持有 等待更多的回報 多謝你!辛苦了!

龔成老師︰

1) 你現有持股，大致上都大質素。

魯大師（3601）係中國的個人電腦及智能手機硬件和系統評測及監控解決方案供應商。

睇翻佢業務，佢主要為用戶免費提供檢測及優化個人電腦及移動設備性能的工具軟件。集團的產品包括魯大師軟件個人電腦版、魯大師軟件移動設備版、手機模擬大
師、Ｄｕａｌ　Ｓｐａｃｅ、ＡＩｍａｒｋ、Ｅａｓｙ　Ｃｌｅａｎ及３６０省電王。

佢透過免費提供工具軟件累積用戶基礎，並自線上流量變現（包括線上廣告服務及線上遊戲業務）及電子設備銷售賺取收入。

業務發展不差的，但規模不大，獨特性未算好強，要注意相關風險，要控制注碼。現貨可持有，但不要再加注。

另外，你而家組合全部都係潛力股，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。這些股票現價合理，可以分注。

平穏增長股：指數基金、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

2) 安碩恒生科技（3067）係潛力股，有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。

所以有長線持有價值。由於基金有30隻股票，比起單一股票，風險能減低。這基金上落較大，現價大約在合理區頂，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

3) 4隻股票中，除了平安(2318)係平穏增長股外，其餘都係潛力股。建議你先加大平穏增長(但現有持貨不用沽)，令組合較平衡，才再加入其他潛力股。

若你真係好想入D福壽園(1448)和GX中國電車(2845)，佢地現價只在合理區頂至略貴，只宜好小注。

而完美醫療（1830）係貴，你要等佢有明顯回調，才好考慮。

我的資訊可以幫到你就好，但緊記相做好投資，係要保持學習。你還很年輕，要努力增進知識，和把握年輕優勢做好財富增值，去令自己早日財務自由。

------------------------------------------------

Q22260：

阿sir, 早晨. 有些問題請教下代建行業是否有前景, 其性質是否係幫地產商或政府起樓. 在港股中就只有兩隻代建股.

其中9979綠城管理控股的質素如何. PE18左右合理嗎? 謝謝

龔成老師︰

代建行業都有投資價值，背後若有較大型母企支持，會較具優勢。但整個房地產業，我自已會較睇好物管部份，好似雅生活服務（3319）這類大型物管企業。

綠城管理控股（9979）在2020年7月由綠成中國（3900）分拆上市，在內地透過與業務夥伴合作為商業項目及政府項目提供代建服務。

此股都有質素，但規模不大會略扣分。但整體而言，有投資價值。現價都算合理的。

PE18的話，算係合理區頂部至略貴。在這水平，若無貨都可以小注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。