【龔成問答信箱】（Q15721-Q15740）

Q15721：

Hello, 我剛上完股票班。報了十月進階班。我好多謝你教導，令我重新學識怎樣投資。我由2007年買股票都而家未有好大財富增值。慶幸投資了多年都是打個和。

其實我之前讀書時都讀過估值方法，但當時我問老師，這樣的話就可以知道股票值幾多錢從而買股票，但當時他説作用不大，如果甘易估到，就好多人都發達。令我放棄用FCFF估值方法來計算.

直至我了解你的理念和完成股票班，令我明白估值重要性加上估值概念和怎樣運用。好多理論其實都明白，但不知道怎樣運用，現在知道了。

龔成老師：

其實理論與實際操作，我地要配合運用先得，如果只將教科書的計法，全部「公式化」，你會見到同實際差好遠。所以你當年的學校老師，會話無乜用。

所以你見我在課堂上，盡力將兩者配合，要有估值的基礎，同時考慮現實情況，調整模式去運用，這樣先會實際的作用。

其實我課堂不少估值公式，都有少少調整，因為全跟教科書，只是學術計算，並不是應用層面。就算你見我教的市盈率估值法，其實都同出面有少少唔同，我希望配合實況去應用。

------------------------------------------------

Q15722：

老師，祝你身體健康同生意蒸蒸日上！

我宜家31歲, 最近依一兩年先開始意識到增加財富的重要和嘗試尋找有效的致富方法, 好開心可以發現你的Page, 令我開始認識多左投資理財方面

除左每月供緊樓之外, 我還要:
1. 年供(US$ 1300) 的萬通儲蓄成份危疾保障
2. 月供 (US$ 800) 的富通基金

之外, 有RMB $100,000 係國內做緊定期, 每年約4% 年利率；現有HK$ 270,000 現金; 扣除所有開支, 每月可以儲$10,000

想問問:
1. 我宜家的年紀, 有幾多的儲蓄現金先叫safe？我應該拎幾多現金出黎投資股票)
2. 每月應拎一半的儲蓄去供股票嗎？可以建議一下股票的組合嗎？

希望可以得到你的回覆！十分感謝

龔成老師：

1）如果你無特別負擔，你這年齡可以進取少少，留3-6個月備用現金已可，當然，要睇翻你的資金，會唔會在2年內有用。

餘下的「閒錢」部分，就可以進行投資（當然不是一次過用）。

2）以現時的大市平貴水平，你動用一半是可以的。如果你無乜投資經驗，可以考慮優質的，平穩增長股，例如
盈富（2800）$2000、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q15723：

龔成老師，你好。
有時都會留意你既專頁 睇下有咩投資tips
老實講，我對投資真係冇咩了解

都試過買過幾隻股票 但都係冇賺
以下係我個人既資產狀況同目標，希望你可以俾少少意見我！

月薪22k, 由2019年9月左右開始供匯控，暫時月供緊$8000，現持有大約2200股。
另有15萬現金做定存，4月到期
有幾萬蚊現金係手

1）因為最近匯控一直下跌，加上都睇過啲報導講話不睇好匯控未來發展，就算息率高都怕賺息蝕價，所以猶豫緊是否繼續供匯控...

2）最近有打算有置業既想法，打算收租用。但因為budget有限同埋壓力測試既關係，只能買550萬樓下既樓，暫時都物色緊。如果真係要買物業，就會將股票套現，但就有機會股價未升上黎就要蝕價套現，你認為咁做應該嗎？

另外，你認為現時投資物業又是否正確？一路都等唔到樓價跌，反而係咁升，怕宜家唔買就上唔到車。
如果有時間，希望你可以俾啲意見

岩岩聽左老師講「匯豐宜家仲有冇投資價值」果個video, 如果我淨係當佢係收息股 係咪應該暫停月供？同埋係股價再下跌又是否應該撈底溝貨？咁遲對沽都唔洗蝕咁多？

另外係咪應該將啲錢月供係更有上升潛力既股票上面？如果係有咩股票可以提議？同埋可以供幾多？

但如果真係要購買物業，現時係咪唔應該係股票市場有太多動作，包括暫停所有月供股票，集中儲現金做定存？
麻煩你

龔成老師：

1）如果你年齡不大，匯豐（0005）並不適合你，因為這股是收息股，而增長力是不高的。

其實你的概念好簡單，你月供，得到這個股息，無增長，是否你投資目標？記住，每個人投資目標不同的，你可以因應自己目標衡量。

如果你想增值，你應該停止或減少供款金額，轉供盈富（2800）等類別。

我講多少少有關人生財富累積。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

2）如果樓市有明顯下跌，你認為是合適的機會，都可以賣股套現去買樓。

我地的分析點，是你「長期的財富增長」，將資金投放在那一邊，有最好的增長力，唔好睇「過往買入價」「現時有無賺蝕」。

香港樓中短期有可能會跌，但長遠當經濟好翻，就會向上，你可以留意下個樓市。

------------------------------------------------

Q15724：

你好！本人一直拜讀你的文章舆書籍，获益良多，本人5o+，准备三年後退休，想請教778置富和405越秀房托 這几日跌了好多

相比我買入價計，現好煩惱，應該加碼？持有？减持？望指點迷津，萬分感激！

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

越秀房產（0405）物業以大陸為主，會較受中國經濟因素影響，以及有人民幣風險。同時當中的物業，都以商業為主，所以都較受最近疫情所影響。

加上早前公布業績，派息金額少左，雖然唔係少左好多。但作為收息股，點都會有個負面影響係度。但此股長線質素依然合格，你可以長線持有收息。

置富（0778）這是不錯的房託，佢持有多個屋苑商場，其中一個優勢是「居民生活所需」，這會令佢較有抗跌力。但由於過去大半年社會運動，再加上肺炎問題，就算再出色的房託都難免會出現較大回調。

但此股長線質素無變，上述問題都會令中短期股價出現波動，但長線持有無問題。

2隻股票你都可以維持持有，但可否加注，就要視乎你本身計劃投放在這2隻股票的資金用完與否。

2者現價已開始偏平，但如果這2股已佔你組合比例不少，就唔好加注了。因為任何股票、任何行業（***你2隻都是房產股），我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

------------------------------------------------

Q15725：

你好！我今年30歲，剛首次置業，四百多萬，供三十年。現在餘下現金18萬，只手持一手9988。

過去只儲現金，現在每月最多可儲一萬，有沒有投資建議，十年後可以有2-3百萬？謝謝老師

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值。然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主。你可將$10000分2份，$5000去做月供，其餘$5000先儲起，用一邊月供一邊儲蓄的策略。月供方面，你可以選擇投資在平穏增長股︰

盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）或潛力股︰比亞迪（1211），中生（1177）或福壽園（1448）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

以恆指過去年平均回報10%計（連股息再投資），你每月投資$10000，10年後大約會增值至230萬，故這樣安排相信很大機會達至你的財務目標。

------------------------------------------------

Q15726：

龔sir..有啲野想請教你..希望你可以俾啲意見..

本人30歲..已婚..有2個未夠3歲小朋友.有10萬現金同15萬定期...*唔計花紅..2公婆加埋每月大概有5萬5蚊收入！

每個月有2/5收入去左供樓同保險.. 另外今年開始有5000月供股票（分別系$3000 （2800）& $2000（1928）..同每月$4500現金可以草起..目標想3年內換樓同做到50萬流動現金

因為以前唔識投資..淨系聽人俾no. ..

幾年前高位買落一埋股票（ 1063、1137、1788、2326、2979、1398）... 揸左幾年..到依家加埋已經輸左幾萬..1/3有多..什至有啲股跌左9成😞😞

直至睇左你既書..學識左應該分析一間企業..更加知道自己買左老千股...

依排多左時間..重新睇過自己既投資組合...有個想*重頭黎過*既諗法..考慮梗賣晒所有股票..重新買入啲優質股..！

想請教一下..我應該點樣分配？買啲咩股票？定係應該保留現有股票..等時機再買優質股票..等自己唔洗咁傷？

龔成老師︰

先講你現有持股，工行（1398）無問題，但只是收息股。

香港電視（1137）有兩點都存有風險的。第一，人為的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

另外，這企業現時搞網購，有增長力的，但同時存有一定的未知數。。佢多年來不斷在燒銀紙，不斷等收成，雖然佢的業務的確增長中，但無人知幾時會有真正的盈利，同埋無人知真正的結果會點。所以，這股只合小注投資。

國泰君安國際（1788）是週期股，要上翻去，就要耐心等下一個大時代，如佔你資金唔多，但這股都可以守住先。

其餘的質素不佳，建議你沽出。（2979，你應該打錯了編號。）

至於月供股票，組合和資金方配可以。而你儲的$4500，就等機會，當大市出現一定程度的下跌，就可以動用現金去投資，在平宜價加大力度掃貨。

以恆指過去年平均回報10%計（連股息再投資），你每月投資$9500，3年後大約會增值至38萬。但由於3年只係一個短時間，回報會較大機會受價格波動而影響，你要知這個風險。

如果你想做到50萬這目標，最理想係加長供款年期至5年，會有約69萬。同時間因為時間長了，回報受價格波動影響會減少。

------------------------------------------------

Q15727：

你好，龔成老師！我今年24歲，現有16萬現金，每月可蓄8000-10000，我想將本金增值，我是中低風險的

可是現時不知道應如何分配，買收息股、月供股票還是定存，希望你能指點迷津
謝謝

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主。所以收息股、定期這些增長力欠奉的創造現金流資產，就唔係咁適合你。

現在你每月儲到的錢，可以5成去做月供，其餘先儲起，用一邊月供一邊儲蓄的策略。月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）或潛力股︰比亞迪（1211），中生（1177）或福壽園（1448）。

由於現時大市只在合理區，你現有16萬資金可以先投入一半，用"分注"形式買貨。餘下一半和每月所儲倒的資金，就等大市出現一定程度的下跌，才大力度掃貨。然後長線投資。

如果你個人保守d，資金分配上你可以8成供"平穏增長股"，2成供"潛力股"。

------------------------------------------------

Q15728：

老師，我有一個月供股票組合
港燈 2638
盈富基金 2800
領展 823
友邦 1299
港鐵 0066
滙豐 0005
中電 0002

每隻月供$500，呢個組合供二十年，這個組合安全嗎？我想有增長，又希望有股息。

中電同港燈選那一隻好？

龔成老師︰

你組合中的股票都有質素，但有2個問題想你注意翻。

1） 我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係放配投資項目時，會因應番你的人生階段。

如果你年青，可以"平穏增長股"+"潛力股"，但你已近退休之年，就應集中在"收息股"去創造平穏現金流。

你個組合中平穏增長股（2800, 1299, 823, 0066, 0002）和收息股（2638, 0005）並行，唔係唔得，但並不是一個理想的人生財富增值策略。你最好睇翻你人生階段，去安排合適月供組合。

2） 月供手續費去到本金的1%以上，就開始高，會對你長遠的回報有一定的影響。

你每隻只供$500，費用佔比應該相當重。我會建議減少股票數量，可以考慮集中供盈富（2800），由於盈富本身是一個50隻股票的組合，因此有分散風險的作用。

------------------------------------------------

Q15729：

呀Sir，最近分析完銀娛（0027）將佢同金沙既ROE作比較，發現金沙既ROE透過杜邦公式黎睇，發現大多數都係由槓桿比率推升，水分較多，反而銀娛個ROE會比較實際。

其次想問下，銀娛現金流強勁，有足夠現金應付負債，點解唔借多啲錢去發展？

最後，我分析同業的PE都約係15-20倍，亦都眼見PE比起以往減少，可能反映左高速增長期已過，所以預計銀娛合理價HKD 47-63唔知你點睇

龔成老師︰

在杜邦公式中，以"財務槓桿"這部份計，金沙（1928）的確比銀娛（0027）高。但係唔係代表佢高水份，咁又唔可以咁講。

好多企業，由奇上市公司都會借錢去做生意。"財務槓桿"這個指標有些特別，我地唔會好似其他指標咁，單從佢高低比較，就定佢好壞。我地只會話睇到金沙借貸比例比銀娛多，顯得比較進取而已。

金沙佢本身現金流強勁，進取D，負債高少少，問題也不大。至於銀娛經營現金流不少，佢有條件借錢，但借唔借錢，要視乎實際業務需要。

你個估值都合理，我自已會再保守少少，$40-$5x，即$40以下才算得上平宜。

------------------------------------------------

Q15730：

龔成老師你好，我想請問一下，你對於中國航運業的未來前景有什麼看法，目前影響到航運業的因素是不是只有中美貿易談判，和2019-nCov病毒的短期疫情影響？

中國外運（00589.HK），我看它從2018年1月就一直跌不停，老師你覺得，這家企業公司優質嗎？它目前的現金流充足合理嗎？

有沒有其他行業的競爭對手？謝謝你抽空解答

龔成老師︰

中國作為一間世界工廠，同時間為全球最大消費市場之一，與國際間貨運一定唔會少。但由於近年經濟下滑、中美貿易戰再加上疫情日漸嚴峻，都令中短期航運業受壓，但長線都會係向好。

中國外運（0598）本質不算差，但行業好受貿易等因素影響，因而在業務上有一定的波動性，股價波動亦較大。

佢現價合理，存有一定的投資值博率，股價已反映了當中的風險。長期唔敢話佢好正面，只可以話佢現時估值不高，所以都有投資價值，如果能承受中短期股價波動風險，長期持有，咁基本上可投資，但未必值得太大注，始終質素未去到好高。

------------------------------------------------

Q15731：

你好，龔成。 本人今年27歲，妻子剛懷孕,兩人月入各 35K。本人現有40萬現金，持有20萬股票。沒有物業。

股票分佈如下:
09988 （3手）, 00386 （3手）, 00175 （1手）

本人是股票新手,對股票不熟悉,正努力進修,希望45歲退休。本人是屬於較保守型,最近打算開始每月供$2000盈富和$2000匯豐。請問這策略適合嗎?

龔成老師︰

如果你希望18年後退休，但又投資經驗不足，你可以用月供股票去創造一個資產增值平台。然後到已累積了相當財富後，才漸漸轉成收息型股票，為自已創造穏定現金流支持退休生活。

現有持股可以，除了中石化（0386），質素算是不差，但又未到好好，始終這只是商品企業，沒有一些太大的優勢。而且佢只係收息股，無乜增長力唔係咁適合你，現貨可持有，但唔好加注。

至於你選擇月供組合方面，盈富（2800）可以，但匯豐（0005）只是收息股，增長力欠奉，唔係咁適合，可用其他有增長力股票代替。而你每月設定月供$4000，按你收入而言，比例上太少，最理想可以增加到接近一半收入。

現在你每月儲到的錢，先用5成去做月供，其餘先儲起，用一邊月供一邊儲蓄的策略。月供方面，除了盈富（2800），你可以選擇投資在平穏增長股︰

金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）或潛力股︰比亞迪（1211），中生（1177）或福壽園（1448）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q15732：

445，我跌到5放左10手了，應該等佢再跌到4補倉嗎？

我新手咩都唔識就亂買，真係好傻，一月尾買445已經輸左4萬， 我唔應該跟風聽人哋 買邊隻就邊隻

龔成老師︰

我地投資股票就如同投資一間企業，我地必需要了解佢長遠質素和前景，再分析佢平貴，才決定去唔去買，唔好只係聽人講就出手。

中集天達（0445）主要從事生產及銷售機場設備（妤似登機橋、飛機餐車、其他專用車輛等）；同時提供行李、貨物和材料處理及倉庫系統工程和電腦軟件解決方案；生產及銷售自動化停車系統、消防車及消防設備。

這隻股票唔係無質素，但只算中等，賺錢能力唔算強。而且佢價格都幾波動，長遠轉去其他優質股會較好。

另外，我建議你要去多讀投資相關書本、年報，新聞和上一些投資相關課程，去增長自已這方面知識，才再進行投資會較好。

------------------------------------------------

Q15733：

老師你好！想請教一下

本人47歲，有物業已供完，收入$17000，諗住十年後退休，儲蓄只有$40萬元，怎樣投資才可到退休時儲到多些儲備？謝謝

龔成老師︰

你可以透過月供股票，去為自己創造一個增值平台，去儲退休資金。

你將每月儲到的錢5成去做月供，其餘先儲起，用一邊月供一邊儲蓄的策略。月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）

由於現時大市只在合理區，你現有40萬資金可以先投入一半，用"分注"形式買貨。餘下一半和每月所儲倒的資金，就等大市出現一定程度的下跌，才大力度掃貨。然後長線投資。

以恆指過去年平均回報10%計（連股息再投資），假設你每月投資$8000 + 原有40萬，10年後大約會增值至250萬。再用這筆資金買5%息的收息股，每月大約可以產生1萬現金流。

------------------------------------------------

Q15734：

龔成老師 想請教下 金沙中國市帳率長期處於好高既水平 （7-9倍）如何分析到3x元是合理價？

龔成老師︰

如果你上過我的股票班，相信會具體知點做，我地計算一間企業的價值時，會考慮資產價值與業務價值，而這兩個往往是配合的。

而金沙（1928）主要收入來自博彩收益，我地會更加考慮佢市盈率架情況。考慮到金沙現時係行業裡的地位，以及其增長力，大約會得到金沙市盈率約18-22倍。

以這個市盈率計算，$3X會係一個合理價格。

------------------------------------------------

Q15735：

老師：您好本人是第一次發訊息給你，本人今年47歲，已經失業了近8個月了，人到中年還沒有房子，剛剛單身感覺自己什麼都沒有有點不知所措，想請教龔老師指點一下迷失方向的我。

現在的我跟家人一起住，每月給他們$5K，另外保險約5K,雜費及生活費约$5K,所以每月基本開支約$15K. 所以希望老師幫忙可以令我收支平衡。
本人持有現金約$200 萬

股票持有
HSBC 2400 股平均$67
0001 1000 股 $93
0175 6000 股 $15.4
9988 300 股$206.8
2628 3000 股$18.7
0027 1000 股$51.1
1920 15000 股$0.195

龔成老師︰

由於你現時無收入，在投資前先為自己預留一筆3個月至半年支出的應急錢，以應付日常需要。

開支部份，"保險"主要係確保你有足夠保障，儲蓄相關的保險，看能否先暫時停供或減少，已減少現時支出壓力。其他雜費也仔細看看，有沒有一些不必要開支可以刪除。

你現時持有的股票都有質素，可以長線持有。除了恆新豐控股（1920），這隻股票上市不久，較難估值。但你持貨唔多，可以持有，但唔好加注。

由於現時大市在合理區較低位置，你現有200萬資金（扣去應急錢後）可以先投入一半，用"分注"形式買貨。餘下一半就等大市出現一定程度的下跌，才大力度掃貨。然後長線投資。

選股上，我建議一半"平穏增長股"，一半"收息股"。

以下都是優質的股票，你可以從中作選擇︰
平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、港交所（0388）、深高速（0548）

收息股︰港燈（2638）、香港電訊（6823）、工行（1398）、匯豐（0005）、置富（0778）、陽光（0435）

這個分配安排，除了可以保留增長能力外，同時希望"收息股"產出的現金流，助你減輕日常開支壓力。現時你要做的，就是盡力再為自已找工作，令自已唔好處於一個長期消耗資金狀態。

到將來有穏收入可以儲錢增值，就100%月供"平穏增長股"，加強翻個財富增值能力，為自已儲退休儲備，這樣安排會比較適合你狀況。

我明白到你現在面對一個較大的財務上困境，加上現時經濟環境轉差，可能令你找工作時更氣餒。但希望你明白，你的困境唔係不能解決，但你需要按步就班，比點耐性，一點一點咁去慢慢處理。

我相信你的人生和財務會慢慢重回正軌，加油!!!

------------------------------------------------

Q15736：

老師你好, 我35歲, 最近先開始留意你fb想開始月供股票

我之前無做過任何投資, 只有買儲蓄保險 （年供約3萬）

我而家月入3萬, 每月可儲到大約1.2萬, 請問以下月供股票組合適唔適合?
盈富 $4200
港鐵 $2000
中生 $2000
銀娛 $2000

另外我有50萬現金儲蓄, 請問現金應該點分配比較好?

我黎緊會結婚, 雖然暫時無住屋壓力, 但都希望未來幾年可置業

期待收到你嘅意見! 唔該哂!

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主。你現時月供組合無問題，都是有增長力的優質股，資金分配也做得不錯。

由於你將會結婚，50萬在用來投資前要先儲起結婚用洗費。現時大市只在合理區，你可以先投入一半，用"分注"形式買貨。餘下一半和每月所儲倒的資金，就等大市出現一定程度的下跌，才大力度掃貨。然後長線投資。

以恆指過去年平均回報10%計（連股息再投資），你每月投資$12000 + 50萬現有資金，5年後大約會增值至約170萬，相信對你置業有一定幫助。

------------------------------------------------

Q15737：

你好 龔成老師 感謝你一直以黎既分享 令我呢個股票初哥增值不少！

準備會買老師既書本 去增值自己！

想請教老師

1. 月供股票每次交易都會收手續費 比起我一手一手咁去買 不是更好？是因為想平衡股市買入既風險嗎？

2.今年32歲 目標想5年後有80-100萬現金 月入3萬 每月大約可儲1-1.5萬 現金不算太多 想問我各買一手2800/0066/0823 /1177 /388 定係月供好？

3.以上優質股 現在是合理區嗎？ 請問平宜區大約幾$可大手買入？睇恒指24000嗎？

4. 2128/1137/3690/9988 老師點睇？有潛力嗎？

希望被選中解答 多謝老師！

補充一點 ：大約2年後會計劃有小朋友 每月收入可能會短暫減小，而另一半未來2年會打算做小生意 資金大約要80-100萬

龔成老師︰

唔好客氣，多謝你支持!

1） 簡單來說，月供股票就是你每月將現金，買入某一隻或多隻股票，慢慢咁樣儲貨。月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣，去減低價格波動的風險。

其實一手手買都可以做到以上效果，你現金只要平均地慢慢投入股市（如保持住每月定額買一手）就可以。2個方法都可以，一手手買的確可以節省了銀行月供費用，但重點係你必需確保自已有自律性地進行。

2） 以你1.5萬一個月計，你基本上要5個月才有足夠資金各買一手，這個操作上有點麻煩，加上相隔數個月都唔係咁理想，我建議你簡單點做月供會更好，平衡價格波動風險會更理想。

但由於你2後會生活和事業上會有較大變動，你去安排月供金額是要認真計算，因為月供是"定時定額"咁長期做會最好。2年就停供，或者突然金額大變，都唔係咁理想。

3） 盈富（2800）合理區偏低位、港鐵（0066）合理區偏高、另外3隻仲係算貴。恆指24000點會係初步進入平宜區，盈富就開似進入較平宜狀態。

4） 中國聯塑（2128）有一究的質素，這股在我的《50值博倍升股》都有推介，但推介後已升了一倍，投資值博率大減，不過，這刻仍未算貴，仍有投資值博率，但注碼就無之前咁多。

香港電視（1137）有兩點都存有風險的。第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

另外，這企業現時搞網購，有增長力的，但同時存有一定的未知數。。佢多年來不斷在燒銀紙，不斷等收成，雖然佢的業務的確增長中，但無人知幾時會有真正的盈利，同埋無人知真正的結果會點。

所以，這股只合小注投資，大手就有少少保留，除非已跌到好平宜的水平。

美團點評（3690）我唔敢睇少佢的業務，因為真的業務巨大，同時增長快，不過，佢仍是有危有機的股票。業務較新興，但佢現時仍在燒銀紙狀態，我比較怕這類企業。這類企業不是不可投資，而是不能大注。

因為無人知佢燒銀紙燒到幾時，因此市場對其估值都是「估估下」，這一定會帶來股價上的波動。

阿里爸爸（9988）不少業務都處於有優勢的地位，同時擁有一個超大龐大的客戶群，可說擁有很大的業務優勢。可說在不少範疇，處於一個壟斷的地位，這點令企業處於很大的優勢局面。

此股有質素、有發展，但現價少少貴，因此，你小注入，可以。可長線投資。

------------------------------------------------

Q15738：

老師您好，本人係一位全職媽媽，暫無辦法出去工作，每月只有$5000可以多出來動用，想請教下如供月供股可以嗎？

還是可以儲下再買股?應該如何選擇?如月供10年有機會夠送小朋友出国讀書嗎？謝謝

龔成老師︰

首先，我地理財會先做好防守，才進攻。由於你暫時無法出外工作，你要先為自己預留一筆資金作應急錢。

之後，投資增值方面，你可以用每月可動用的資金5成去做月供，其餘先儲起，用一邊月供一邊儲蓄的策略。月供方面，你可以選擇投資在平穏增長股︰

盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

以恆指過去年平均回報10%計（連股息再投資），你每月投資$5000，10年後大約會增值至95萬，相信這筆錢應該有助你小朋友長大後，到外國升學之用。

------------------------------------------------

Q15739：

成哥，你好，之前在5.5買入12000股405越秀房託作長線收息，但見近幾日跌得幾急，請問公司質素是否有變？還是只是受疫情短期影響？是否值得繼續長期持有？謝謝

龔成老師︰

越秀房產（0405）物業以大陸為主，會較受中國經濟因素影響，以及有人民幣風險。

同時當中的物業，都以商業為主，所以在疫情中波動性也會較大。

剛公布業績，見佢派息金額少左，但又唔係少好多。作為收息股點都會扣少少分，但長線質素佢依然合格，你可以長線持有。

------------------------------------------------

Q15740：

老師 今日跌左1000點，甘我之前hold 既股票係咪應該放曬先？等岩既價位再放？

我現時持有股票：

2800 $27.86 1300股
823 $87 330股
1177 $6.91 2000股
1211 $44.31 466股
66 $45.84 306股

龔成老師︰

大市大跌就散貨，係好多投資者都有架"錯誤"架做法。

你必需明白一個概念，我地持有一隻股票與否，關鍵位是企業質素、前景，不要被買入價或者大市架走勢所影響。買入價只是一個心理因素，如果企業核心因素未被影響，我地係唔需要理會。

有好多人認為，這刻的價位$10，如果一直跌落到$6，咁就是蝕左。不如沽一沽，平D再買翻。但我地無人會知後市點走，會唔會跌到$6，定係轉頭就升上$20，無人會知。

我地唔應該著重「股價」，只要睇「企業質素」就得。你所持有的股票都是優質股，睇唔到佢地質素有乜長線的負面的改變，你長線持有就可以了。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13641-Q13660）

Q13641：

市場上有不少人都有教止蝕這個概念，例如跌1成止蝕，我知道你不認同這種做法，你比較認同長線投資。

不過，我覺得止蝕背後都有一定嘅道理，因為當某一隻股票不斷下跌時，可能代表你之前的基本分析是錯了，止蝕可以防止進一步損失。

龔成老師：

止蝕無絕對的方法的，可能你會找到例子，證明你是正確，但如果套用在港交所（0388），2008年，由$100以上，跌到$50以下，當時應該止蝕嗎？

如果止蝕了，就錯過了幾倍的回報。

六福（0590）在2007年去到$6，其後跌到$3，當時應該止蝕嗎？

但現價是$20。

所以，止蝕無絕對的方法，而坊間所講以股價去衡量的方法，可能會正確，可能會錯誤，你要小心想想這方面的邏輯問題。

「當某一隻股票不斷下跌時，可能代表你之前的基本分析是錯了」這句說話真的正確嗎？

短期股價只反映市場供求與情緒，可能中短期的確反映這企業不利，但如果我地以長線角度分析，那麼，市場反映短期不利，與我地長線投資，就無關係，我地亦不應因這方法止蝕。

其實，止蝕沒有絕對的對與錯，但我地以「長期企業本質」的優質度的分析，仍是最有基礎的方法。

------------------------------------------------

Q13642：

你好龔成老師，我今年26歲，初學投資，月入22k，下月開始會有25k，家用每月要5千，保險月供4千(分6個月)，儲蓄只有25k左右。

睇了你的建議，希望可以開始投資，月供股票。我應該每月可承受月供最多3千蚊，你認為我可以怎樣分配？盈富/港鐵/領展/比亞迪？

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只要小注。

你可以考慮盈富（2800）$2000，港鐵（0066）$1000。

港鐵（0066）的賺錢能力好強，近期只是一些中短期的事件，無影響佢企業的長期價值。這刻反而適合去做月供。

佢收入主要有運輸、收租、地產，如果你從長遠角度，就能分析到近期的事件，對這幾方面長遠的影響都好少。

最多近期會影響了運輸收入，以及成本增加，但無影響長期情況。所以，只要你唔好理中短期股價，保持進行長期月供就得。

------------------------------------------------

Q13643：

我今年50歲，我兩個子女都有比家用我。一全職一個大學半職。想把他們給我的錢部份幫佢地投資，大約8000元。

3、66、1211、823、2388 可以嗎 或者有冇建議，謝謝

龔成老師：

你以月供模式，是最好的投資方法，原理就是幫佢地儲錢，因此一定要投資優質股。

盈富（2800）$3000、恆基（0012）$2000、港鐵（0066）$2000、比亞迪（1211）$1000。是一個適合佢地的組合，你只要長期進行月供就得。

------------------------------------------------

Q13644：

多謝您 龔成
係創業路上睇到呢篇文
「打工仔致富術」

令我好鼓舞
我而家都係要回歸返一份正職
但創業果度繼續去 , 只能周末去幫手

龔成老師：

創業這路並不簡單，要我地堅持再堅持，由於可以做到堅持的人不多，因此創業成功的人不多。

我其實都幾建議一邊打工，一邊並行創業，因為創業始終風險高，如果有打工收入支持，會比較好。當然，咁會比較辛苦，但如果想成功，就要付出，相信自己，一定有回報，加油！

------------------------------------------------

Q13645：

你好，本人29歲，香港的樓放租後，月供約一萬多，前兩年買了一點煤氣，盈富，金沙，目前現金流不多，但明年中估計會有一筆收入。

想月供以上已買入的股票外，想未來五年增值後再買樓，想問中國燃氣值得月供嗎？比例如何安排比較好？謝謝

龔成老師：

你可以利用物業，作為累積資產的方法，因此，如果你5年後資金足夠，緊守「供得起」原則，而到時樓價只要不太貴，你都可以再買多一層，作投資。

只要你兩層樓之間的買入時間唔好太近就得，因為唔想你同一經濟週期買入。

至於近幾年，你可以利用月供股票，作為財富增值的方法，盈富（2800）金沙（1928）中國燃氣（0384）你都可以月供的。盈富較多就得。

------------------------------------------------

Q13646：

本人今年28歲，月薪有二萬幾，今年8月先至開始投資股票，每月可以儲到一萬至一萬五（如果要做到好慳），現在手上有7萬現金作備用、應急錢，已投資左既股票總值十四萬幾，股票組合如下：

3煤氣16.44蚊@3手
257光大國際6蚊@5手
1876百威亞太28.7@10手
1821ESR16.8@1800股
2638港燈7.58@3手
11月會開始月供2800盈富基金作投資儲蓄之用

請問以上既組合有需要改進嗎？

手上既現金想留番股市下跌既時候再入貨，而我自己比較睇好1876百威亞太既前景。我應該等佢未來跌既時候再加注嗎？

我想在35歲之前能夠儲到首期，先謝謝成哥分析！

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。以你年紀，是投資增值的黃金時期﹐應以增值為主。

煤氣（0003） - 有質素﹐有平穏增值效果，適合你。
光大國際（257） - 本質不錯的，但股價都幾波動，加上佢負債愈來愈多，只宜小注。

百威亞太（1876） - 有品牌和規模，有長遠投資價值。但你有留意我fb，都會見我經常講唔會太推薦人買IPO。因為業務上，集團就算有吸引力，但新股半新股真實面要慢慢先見到，加上佢估值困難。

所以，此刻只建議持有小注，同時你要明白當中的風險。
ESR（1821） - 同樣上市不久，較難估值，不宜大注。
港燈（2638） - 有質素，但只是收息股，無甚增長力，唔適合你。你持貨唔多，可持有，但不要加注。

如果你開始月供，你可以投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）或潛力股︰比亞迪（1211），中生（1177）或福壽園（1448）。這些股票都有質素，而且具增長力，會較適合你。

假設你月供$15000，以恆指年平均回報10%計，到你35歲大約可增值出170萬資產，相信對你置業計劃已有一定幫助。

------------------------------------------------

Q13647：

請問老師對0012將來的分析如何？
我在$36入了一手，現在一直每個月供$1000

龔成老師︰

恆基（0012），是有質素的股票，前景正面，加上佢是全港持有最多農地的發展商，長遠的價值一定會慢慢釋放。

近期香港社會的確出現不少問題，對樓市中短期樓市一定構成負面影響，但當中還有很多變數，結果真係到時先知，但相這種動蕩情況唔會係長期。

香港長期往屋需求仍然大，因土地和供應不足，因此樓價長遠仍會有向上。作為香港持有農地最多的發展商，長遠盈利有一定增長潛力。

現價處合理區，你可以保持月供，長期進持有就可以。

------------------------------------------------

Q13648：

龔成老師你好，想問一下有關資產配置既問題，我自己本身32歲，月入大概5萬左右，有8000股騰訊，80萬現金左右，冇車冇樓，總共330萬net asset。

暫時未結婚都係同屋企人住，做野其實壓力都大，自己個人洗費唔大，一個月支出加家用大概2萬左右。

如果我想做到唔番工都可以財務自由既話，老師可唔可以比d建議小弟。

我都想好似你咁有8位數字身家，唔洗有番工手停口停既煩惱，感謝!

龔成老師︰

你現時每月開支2萬蚊，如果要達至財務自由，以股息率5%計，你需要有480萬資產才可以做到。以你每月可以儲$30000。以恆指年平均回報10%（連股息再投資）計，大約9年可以增值到你需要的480萬。

操作方面，你可以用15K去做月供股票，而餘下15K先儲下，用邊投資、邊儲蓄策略。

月供你可以投資在4-5隻平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）或潛力股︰比亞迪（1211），中生（1177）或福壽園（1448）之上，長線持有讓其自然增值。

至於80萬現金，可以一半分注買入上述票。而另一半和未來儲蓄累所得資金，待大市大跌才大手入貨，咁安排會增值得較好。

而你現有的騰訊（700）有質素，有長線投資價值。但你有8000股之多，有嚴重過度集中風險，萬一騰訊有什麼意外，你整個組合會出現嚴重問題。所以，你最好將部份騰訊換碼到以上股票中。

以你現時資產，加上月供股票，在9年後達到過千萬是絕對有可能！只要你在這段時間適當投資，保持累積真財富同時加強投資知識就可以。

------------------------------------------------

Q13649：

老師你好，自我介紹一下，我今年39歲，空中服務員，零投資經驗，唔需要供樓，現金有大約800,000萬喺銀行，有差唔多50萬港紙，30萬外幣，我諗住攞一半即係大約400,000出嚟買股票，你覺得我應該點樣投資好？

應該用月供嘅方式，定係我平均分去四至五隻大嘅股票入邊，每隻大約投資10萬蚊？例如匯豐煤氣中電等等等。

因為我自己覺得自己睇極啲資料都睇唔明，所以開始想保險少少，純粹收下息咁樣。

另外我嘅外幣主要都係美金，但係仲有好多唔等洗嘅嘢其他貨幣例如星加坡紙，應唔應該將佢哋換埋做美金或者做其他投資呢？多謝指教。

龔成老師︰

在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

當然你工作需要，可能不時要用到外幣，故保留部份係有必要的。但作為投資增值，基本上持有港元就可以了。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀，適合買入平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）。

如果你對這些股票唔認識，可以只投資盈富（2800），這是包括50間質素不錯上市公司股票的組合，有效平衡你組合的風險。

現時大市在合理區，你可以先用一半資金用分注形式買入，例如每月1號買入1手盈富，不論價格高低，每月1號持續進行，可以幫平衡價格波動風險。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨。

同時間，建議你多看投資相關書本和新聞，和上一些投資課程。本人【投資倍升股課程】適合初學者的，因為整個課程的設計都是針對初中階投資者的。到你讀完整個課程後，你已能自己選股、投資、評估平貴，在投資上已掌握了一定的知識。詳情和時間，你可以留意我FB。

------------------------------------------------

Q13650：

龔成老師，如果買房托應該買那幾個房托好，現時價位是否不適合買，如果投資50萬房託，一年可以大約收到幾厘息？

因為本人不熟悉房託的投資，是否很大風險的？謝謝老師的用心教導！

龔成老師︰

房地產信託基金（REIT）的原理如同買樓收租，基本上是穩健的。而房託規定要將可分派的90%收入作派息，故利息有一定保證。而租金長遠一定會上升，故長期持有不錯。但要注意以下三點：

第一、房託分好多種，有商場、車位、酒店、寫字樓等，投資前要分析內裡物業組成及質素；
第二、租金在中短期可升可跌，當租金下跌就會令股息減少，同時亦有可能令股價下跌；
第三、股票市場波動，會令房託的股價有上落，就算本身物業組合無問題，也可以因大市下跌而受影響。

所以，房託是不錯的投資工具，但當中都要小心選擇，除了要投資質素較好，出租率較高的物業外，投資時亦要注意股息率，股息率太低，反映你的買入價過高。另外，無論是房託，或是某一股票行業，都不能佔你股票組合的比例過多，否則會有集中風險。

陽光房地產（435）、置富（0778）、泓富（808）這些房託此刻都在5%以上，現價已有長線有投資價值。

以5%股息計，投資$500,000房托一年可以大約收$25000股息。但要留意，此刻大市只在合理區，買入時要分注進行。

------------------------------------------------

Q13651：

老師你好！最近1211跌至$36-38,我只有一手價位在$44,現在應該大手入貨嗎？謝謝！

龔成老師︰

比亞迪（1211），早前出左業績，的確有點弱，除左中國車市競爭大，中國經濟轉弱，補貼減都是其中一個因素，相信佢業績、股價中短期仍會弱。

但要留意，我地分析時，唔需要太著重中短期的數據。佢出來的數據的確有點失望，但一年前，都開始預中國車市有不利情況，因此都是預期之事。

中國車市放緩、外來競爭、行業競爭加劇，都成為不利的因素，相信中短期仍會對佢不利，這會影響整個行業。

長遠來說，企業仍有潛力，發展仍是正面，因為這企業正在靜靜起革命，好多大型投資仍在進行中，例如超大型的電池廠等。加上中國政府對行業仍支持，佢長遠會慢慢有野睇。

可能你會問，補貼減，仍是支持行業嗎？

其實，中央的政策只是有所調整，而不是全面改變，減補貼是希望行業不會永遠依靠政府，而可以自己出到「市場化」的產品。另外，中央將來政策方向，會調整至補貼一些「有技術」的電動車企，而不是胡亂資助，簡單來說，就是希望行業發展技術，這是令行業長期更健康發展的方法。

同時，中國因為能源問題，長遠一定要發展電動車，這是大方向，行業成功是遲早的事，只要技術不斷提升，行業發展一定會更強。不過，一切都是長期的，而比亞迪這類潛力企業，總存有不確定性，所以，這企業長遠雖然正面，投資亦要注意風險，不能太大注，這是一直所強調的。

股價波動，如投資要分注（最好是小注月供），不能大注，同時一定要長線投資，車市要慢慢才好轉為這股要好長線先有野睇，所以要著重分析長遠的因素，唔好太理會中短期的情況。

同時，潛力股存有風險，你要衡量自己的風險承受能力，年齡較大的投資者亦不適合。

預期佢中短期有可能進一步弱，但所有野，都是有危有機，如果想買入後1年就有利潤，咁就買錯股了，這股從來都是長期的，預期3年、5年、7年，後先有真正的爆發情況。

現價已開始初步進入平宜區，可以加注，待跌至$35會更理想。

------------------------------------------------

Q13652：

你好呀龔Sir ，想請教一下組合投資
今年30歲,月入20000左右
月儲12000, 現時持有3500股（02388） 流動現金70000

想問一下老師如下月開始
投資02800 每月500股

這投資組合是否理想 還是有更好的選擇？

補充上述情況
我目標係4年後上到100萬
想問一下有無機會達成？

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。

盈富（2800）和中銀香港（2388）都是平穏增長類，都適合你這個年紀。以恆指年回報10%（連股息再投資），月供12K在4年後約有66萬，當然要視乎當時情況。

現有流動現金70K，可以考慮分注買入一些潛力股︰比亞迪（1211）、中生（1177）或福壽園（1448），以加大增長力度。此舉可令你增值快點，但同時會增大了回報波動性風險，你要明白這點。

相信以上這計劃安排，4年後儲到100萬機會係有的。

------------------------------------------------

Q13653：

龔sir，我暫時個股票組合如下
2800 約10000股
66 約3000股
1038 約2000股
1928 約5000股
1211 約4500股
2638 約4000股

Total約90萬係股票到

現時仲有一百萬閒置資金，想請教一下根據依家既市場形勢 可以點分配d資金落呢個組合到？有冇其他股票你會建議加落呢個組合？

如果想穩中求勝 有冇一d 有穩定既增長力 派息又唔錯 現時股票屬於合理或平宜區 既股票推薦？

龔成老師︰

你現時持有的組合，都是有質素的股票。其實我地做資產配置，唔係睇市場形勢，而係睇資產質素和你人生階段。年輕的投資較多增值類資產，較年長則應投資較多保守類項目。

現時大市在合理區，你可以將100萬分成2份，頭50萬分注買入以上股票，其餘等大市大跌才入手。資金分配方面，4成買盈富（2800），其餘平均分配多其餘組合中股票就可以。

但留意翻比亞迪（1211）是潛力股，港燈（2638）是收息類，其餘都是平穏增長類。如果你較年青，新資金就不要分在港燈，反之就不要分在比亞迪。

穩中求勝、有穩定既增長力和派息高，金沙（1928）是這類型。但近期升了不少，已在合理區頂部，你可以等回調再分注買入。

------------------------------------------------

Q13654：

Hello老師，請問你點睇1114 華晨中國？
業務黎講，佢賣車，中國經濟放緩但仲有一定業績，點解2018個年既股價升到高位之後會跌到咁甘？

2017年頭 $8-9
2018年頭 $20-21
2019年頭 $5-6
2019 11月 $8-9

佢地仲有新廠房起緊 亦努力發長電動車業務 其實係咪意味住公司仲有進展空間？
其實佢既合理價大概係邊？
謝謝

龔成老師︰

華晨中國（1114）有質素的，但中國車市放緩、外來競爭、行業競爭加劇，都成為不利的因素，相信中短期仍會對佢不利。

加上佢品牌的市場並不是行低端，這路線相對經濟的敏感度較高，當經濟回落時，影響較大，因此，市場對佢的股價反應都較大。

未來電動車將為汽車業帶來很大發展空間，但華晨在電動車方面技術和品牌都唔算十分高，相比比亞迪（1211）等電動車生產商，優勢唔算明顯。故對這部份唔好有過高期望，但正面影響係會有。

股價由高位回落不少，除了反映過往處貴水平，現在回落至合理水平偏低位置，反映市場預期中國車市的不利情況。相信這股中短期股價仍會不利，但長遠前景仍在的，有貨可持有，無貨可小注。

------------------------------------------------

Q13655：

成哥，你好！覺得你所建議的投資策略比較隱健，希望獲得你的分析及指點。

我現年43歲，單身，每月收入56K，供養父母6.1k。自住居屋，用姐姐及老豆名，我月供9.7K，2022年2月供完。

有一份月供aia 基金，21 年期，已供14年，月供約1.6K，現有270K，現時持平冇增長，並沒有當日sell我時的增幅。

2018年12月開始一份恆生人壽儲蓄，每月4.8K，供5年，目的是迫自己儲錢，但25年後才可回本（以沒有紅利下）。

宏利MPF有約700K

現金有500K

股票約300K，如下：

1398，10000股，$6.74買入
0005，1600股，平均$67買入
1810，3000股，$15.62
1690，150000股，平均$0.47買入
8423，50000股，$1.47買入
386，10000股，平均5.948買入

想重整投資組合，是否應該將aia基金取出現金，投資到其他有穏定利息的股票上，例如滙豐？是否應停止供恆生，將現金投資在其他資產？500K現金應如何投資?

希望10年後退休可每月有15-20K零用錢，如想3-5年內置業，應該如何計劃?謝謝

龔成老師︰

保險公司的基金，有好有壞，我好難評論，但當中的潛在費用，往往不少，反而簡單的投資在指數基金，例如盈富基金（2800），長期回報往往更多，而且管理費好少（0.1%左右）。

你再了解下，你之前所投資的基金，當中的投資策略，以及投資在甚麼類別的項目中，分析是否有長線投資價值。如果預期未來餘下時，都是像過往10數年回報平平，取回資金會較好。

恆生人壽儲蓄，這類有保險成份產品係需要，我地投資要先做好防守，才去進攻。但重點係足夠就可以，唔需要多。

如果你計劃10年後退休，每月有15K現金流，以股息率5%計，你就需要有360萬資金。

建議你可以利用月供股票去創造這筆資金，以恆指平均年回報10%計（連股息再投資），你需用在這10年間每月供款20K，選股以平穏增長股為主，如盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823），10年後大約可以增值至380萬。

到時你再慢慢換碼至收息股（5%或以上），以股息為自己創造穏定現金流。

至於5年後置業目標可以借用你現有50萬資金，同樣投資在平穏增長股。但現時大市只在合理區，你可以先將一半資金分注買入上述股票，其餘待大市大跌才入市。5年後大約會增值至70-80萬，當然要視乎到時情況。

最後講你現有股票，有2隻要特別留意。

立基工程（1690），此股市值不高，上市年期唔長，價格會較波動。加上財務數據表現一般，唔好再增持，長遠轉至其他優質股更好。

潪㵆發展（8423），市值和上市年期比立基更短，財務數據表現一般，同樣不宜持有太多。

------------------------------------------------

Q13656：

龔老師你好，本人女兒為2020 DSE考生, 原打算在本地升學後去才外國讀碩士，但近月社會問題現改變計劃提早來年英國留學，目標是4年，每年預算約45萬，由於事先沒有這個預算，故資金並沒有準備充裕，希望你指教一下:

*手頭資金約有30萬，現放銀行定期約2%
* 股票約10萬，其中兩手匯控(十年多前高位$140入一手，現在連以股代息之股數計僅平手多少少)
* 2020年中 及時 2022 年初有兩筆約各25萬教育基金，合共50萬
* 毋須供樓，每月可儲2.5萬(4年共120萬)
* 10年後退休約有160萬退休金可取回 (非MPF)
* 另夫婦合共有些已供滿保險可取回約30萬-40萬
* 居住已供滿居屋，必要時向房署申請加按

問題:

1) 第一筆留學費用約於明年5/6份前準備，是否應該全數將手頭現金兌換英鎊以防匯價上升? 還是持有港元用多少才兌多少? 因為睇過英鎊定期利率低到冇朋友，港元暫時仍有2%以上。但又怕匯率升高

2) 另外考慮借一筆約30萬稅貸，總利息約9千，分期36個月，每月約還8600，從每月可儲的錢內償還，此筆現金投資你介紹的收息股，一來抵銷稅貸利息，又可以留為緊急備用，這想法正確嗎？

3) 每月25000減去還款8600後仍有16000，應做月供股票嗎？

4) 現時股票除005之外其餘都是零碎一手手的IPO (包括1800，2007，0939，1898，1313，3998，0981，0808), 現階段應放晒轉去投資你介紹的收息股例如盈富煤氣港燈嗎？

本人投資眼光基幾乎是零，一直是明燈買邊隻死邊隻，故此十年前已不再投資股票，只會想穩陣保本去做定期，希望能為煩惱中的我指引一下，先感謝你的幫忙!

龔成老師：

1）你的確要開始轉英磅，第一，你有實際需要，所以你可以分幾次轉，同時要開始轉了。第二，歐洲問題有可能會明朗化，這樣英磅就有機會上升。

我地唔係要估事情點發展，而是要平衡你的風險，因此，你可以分幾次轉。

2）這類借貸投資，是創富方法，但都有利有弊，你一定要明白這點。

首先要考慮你本身的風險情況，你負債會因此而增加。當然，負債不一定有問題，但你要考慮自己的年齡、情況、風險承受能力，去決定是否增加這負債。

現時低息環境，如果你的「實際年利率」不高，投資一些收息股，已能取得一定的息差回報。不過，股票的價格總有上落，你如何保證不會出現「賺息蝕價」的情況？

這正正是你要思考的問題。

由於現時收息股及其他類別的股票，暫時只處合理區，未到平宜區，你好難確保不會出現「賺息蝕價」的情況，因此，這刻做加按買股的值博率，只屬中等。

如果大市處平宜區，那你投資，蝕價的可能性就會較低，你這動作的值博率就會大增。

因此，現時借貸買股，不是不可，但值博率只屬中等。而由於這筆錢增加了你的負債，因此不能太進取，你只能投資平穩增值股及收息股類別，同時最好有部分留跌市後先入。

3）可以，但由於你之後仍有資金的需要，你只能動用部分，不能全部用作月供，你可以動用每月$10000去月供，同時不能供一些進取的股，相信盈富（2800）最適合你。

4）部分較有質素，以及較適合你情況的，可以留，包括：建行（0939）、泓富產業信託（0808），如果持貨不多，華潤水泥控股（1313）可留。

至於其他，可以賣出，轉為收息股，會比較適合你的情況。

如果你過往投資成績一般，你就更加要集中投資穩健、有質素，業務穩定，有穩定股息的股。例如港燈（2638）、深高速（0548）、香港電訊（6823）、匯豐（0005）、置富（0778）、陽光（0435），盈富都可以。

------------------------------------------------

Q13657：

HI我係你讀者,我係初學股票既人,第一本股票書係你既股票勝經,你比到好好既價值觀我,但我有個問題。

本書睇到一半,依家有個觀念就係（揀優質投票 然後長期持有）咁趺又唔賣（因為會升返）,升又唔賣（因為係優質會繼續升） 趺同升都唔賣優質股出去。

就係你本書比到我既觀念....咁咪正係得食息?

因為趺升都唔賣,無動作,唯一增資既動作就係派息,咁我揀隻派息派得勁既,然後長期持有咪得...係咪咁既想法?

龔成老師︰

財富增值，絕對唔係單單找有一隻高息股一直持有。

在增值過程中，只要股票是優質，而且質素不變，就價格變動都唔洗理。長期持有，讓佢自行慢慢增值。到退休之年，你就將佢換成收息股，為自已創造穏定現金流支付退休生活。

而優質股係唔係一直唔賣? 答案係"不是"，除了優質股質素轉差時要沽出。當市況過熱，市場處牛市三期的狂熱狀態，股價被嚴重高估時都會沽出部份。

仲有一個情況，就是將近退休之年，將有增長力優質股換碼至收息股，都會作出沽售動作。所以，你最終賺到不是只有股息，仲有資產增長的價值。

我地選擇一隻什麼樣的股票，是潛力型、平穏增長型、還是收息型，要視乎翻你人生階段。如果你年青，應著重資產增值（即一些有潛力和增長力股票），但如果你已退休，就應以收息創造現金流為重。

------------------------------------------------

Q13658：

老師您好，我今年22歲，近一年開始接觸投資的知識，同時有追縱您的專頁的內容，現時持有︰
0788（18000股、平均價2.16）
3988（12000股、平均價3.14）

希望年輕可以慢慢累積財富，0788的賣入價較貴，請問︰
（1） 現時計劃將部分0788賣出，套現連同部分持有的現金買入增值股。
（2） 現時有留意0027、6862、0823、0345，請問老師您的意見。
（3） 除以上提及的股票外，老師您還有甚麼好的推薦﹖謝謝解答

龔成老師︰

1） 首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

中國鐵塔（0788）有質素的，早前有少少炒概念，所以這刻唔能夠太進取。這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。這股有質素，你可以唔洗理現時價格波動，維持持有。但如果此股佔你組合比重比較多的話，你就可以賣出部份轉至其他增值股。

2） 我地投資會運用「先增值，後現金流」作方法，初期應投資較多增值類資產，較後期則應投資較多保守類項目。你22歲，是財富金增長期，你應以增值為主。

你選的4隻都有質素，而且都有增長力，都適合你。當中維他奶（345）雖然優質，但現時偏貴，最多只可做月供。而海底撈（6862）雖有一定的質素，但上市年期不算長，令企業的真實業務情況及價值，仍要時間評估，不宜大注。

3） 平穏增長股︰盈富（2800）、恆基（0012）、中銀（2388）、港鐵（0066）、煤氣（0003）、港交所（388）、長建（1038）或潛力股︰比亞迪（1211），中生（1177）或福壽園（1448）等都適合你，由於你年青有時間去增值，所以潛力股份佔你組合1/3都可以。

------------------------------------------------

Q13659：

老師，其實現時比亞迪的投資風險是否很高，因為總負債佔總資產近9x%。

現時汽車市場，中美貿戰的影響，1211倒閉的可能性會唔會好大。

龔成老師︰

比亞迪（1211）以佢現時負債指標來看，的確較高，但又去到9成，作為優質股的確是未必全合標準。但佢過往的現金流仍算不差，要去到倒閉，可能性好低。

而我地考慮番佢整體狀況，佢正在發展期和未來電動車潛力，其實係可以接受。早前出左業績，的確有點弱，除左中國車市競爭大，中國經濟轉弱，補貼減都是其中一個因素，相信佢業績、股價中短期仍會弱。

但要留意，我地分析時，唔需要太著重中短期的數據。佢出來的數據的確有點失望，但一年前，都開始預中國車市有不利情況，因此都是預期之事。中國車市放緩、外來競爭、行業競爭加劇，都成為不利的因素，相信中短期仍會對佢不利，這會影響整個行業。

長遠來說，企業仍有潛力，發展仍是正面。而且集團收入非全靠電動車，"手機部件及組裝服務"和"光伏部份"也為集團貢獻近4成營業額，可以見其收入多元化，故暫時睇唔倒佢有倒閉的可能。

你要注意潛力股存有風險，你要衡量自己的風險承受能力，年齡較大的投資者亦不適合。

預期佢中短期有可能進一步弱，但所有野，都是有危有機，如果想買入後1年就有利潤，咁就買錯股了，這股從來都是長期的，預期3年、5年、7年，後先有真正的爆發情況。

------------------------------------------------

Q13660：

龔sir 您好，本人近月在網上見倒您既文章有所啟發，我一向只存錢入銀行，現在亦有長供股票既意向，我亦有向家母提及您既事，佢亦都認同長揸既理念，今次想幫家母提問一下。

現年57歲，距離退休尚有八年，手持4000股滙豐，現金二十萬，另有一間屋收租但租金不能蓋過供款，每月大概需要供款一萬，尚有19年還款期，家母現時想長期月供股票，2800,12,778,66 各二千，請問應該四揀二，四揀三，定係四隻都可以月供？

個案重點
以下係家母的情況
今年57歲
現金20萬
四千股滙豐
另有一間屋收租後要供一萬元還须供19年

去除所有開资每月可儲2萬蚊

想開始月供
2800 2000元
12 2000元
778 2000元
66 2000元

麻煩哂

龔成老師︰

我地會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你母親尚有8年才到退休之齡，可作有限度財富增值，建議平穏增值股和收息股各佔一半。

你所選的4隻股票，除了置富（770）是收息股，其餘3隻都是平穏增長類。你母親可以將月供加大至$12000，組合可以用盈富（2800）供2K，置富（770）、港鐵（0066）和恆基（0012）各供$2K，再加2隻收息股，如港燈（2638）、深高速（0548）、香港電訊（6823）、工行（1398）。到接近退休之齡，就將這些股票慢慢換馬至100%收息股去為佢創造平穏現金流。

現金20萬和每月儲的8K︰可以分2份，一半現時用分注模式買入上述股票，另一半則待大市大跌時才加碼掃貨。

滙豐（0005）︰有質素，但增長力唔會高，是收息類，適合退休之用。這4000股可以持有，不用換馬。

收租樓︰由於扣除租金收後，還要多要供一萬元，令你出現負現金流狀態。就算租金長線會上升，但短期內估計唔會出現正數，故此項目對將退休的母親，不是理想的選項，對佢而言穏定現金流才是最重要。

如果這單位有長線投資潛力，你可以考慮將物業轉為自已名下，而你支付資金給母親也可以。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【信貸評級你要Check】

低息環境持續多年，透過槓桿賺息差是常見的投資方法。這種方法成功關鍵在於找尋好的投資工具及較低的融資成本。好的投資工具不難尋找，如高息股、物業或公司債券等等，但是否能借到較低的融資成本主要取決於你的信貸評級。

信貸評級一共分10級─ A至J，當中以A為最高。信貸評分的高低對你的投資理財有很大的影響。一般而言，信貸紀錄良好(例如A級)的借貸人可以獲得更佳的實際年利率(APR)，即融資成本較低; 信貸評分不佳(例如J級)，銀行不但有機會拒絕貸款，就算成功申請，亦可能要支付較高利息。在比較及申請樓宇按揭過程當中，銀行有可能向申請人索取更多資料，延誤申請時間。

更重要的是，若你在一個月內多次被銀行查閱你的信貸評級，銀行的查閱會留下查詢記錄，因而有機會影響你的信貸評級。相反，透過環聯信貸查閱你的信貸報告，並直接將報告交給銀行參閱，就不用擔心影響信貸評分的問題。 想立即了解自己的信貸評級?

請立即按此連結免費7日試用環聯信貸評級及提示服務: http://bit.ly/2qM8Rv3

#環聯 #免費查閱信貸評級 #TU

「 本益比估值法的利弊與實際運用」

新手買股票最怕就是買貴
尤其是一些很夯的股票
往往不知道應該幾時下手？多少錢下手？
如果買錯時機
辛苦賺來的錢都化為烏有
那我們應該根據什麼來判斷股價的高低呢？

那就是學會估算投資新手必學的
「本益比估值法」！ （PE Ration）
這套基礎中的基礎能夠讓你在30秒內判斷一家公司價值！
也是判斷股票價格高低的重要依據之一

別擔心！
我知道你們的擔憂和顧慮
即使學會算後也不懂該如何判斷，對嗎？

影片除了跟你分享
「本益比估值法」的實際運用方式
也會教你3種方法進行價值判斷與比較
還有一些能夠避免踩地雷概念。

千萬別錯過這集的分享！

影片概括：
01:07 什麼是本益比
03:08 實際投資中的運用
05:51 好處、壞處、限制
07:14 總結
.
【免費】我的獨家理財貼士
http://bit.ly/get-spark-financial-tips
.
【免費】股票投資工作坊 - 從0開始學股票
http://bit.ly/join-free-webinar-now
.
🔥點擊連結瞭解更多詳情或購買🔥
用以下連結可獲得10％折扣優惠，只需輸入：SSSOFF
（只限於購買理財投資訓練營和配套：理財投資訓練營2.0 + 投資思維訓練營）
優惠截止30/4/2021
https://valueinmind.co/zh/sparks/
.
我們需要人才
我們需要你
向我們展現你不可多得的能力與實力
數不盡的各種公司福利就等你
點擊鏈接提交求職申請：https://bit.ly/SSS-join-us
.
🔥【Etoro】Spark 投資組合和表現 🔥
http://bit.ly/31FPXEz
.
全世界都可以用

eToro申请链接
简体
https://bit.ly/3rZ8vMR

繁體
https://bit.ly/3t2Djxk

英文
https://bit.ly/3uB7Pia

.
免責聲明：
高波動性投資產品，您的交易存在風險。過往表現不能作為將來業績指標。
視頻中談及的內容僅作為教學目的，而非是一種投資建議。
.
👇更多相關影片👇
为什么马来西亚人疫情后更富有
https://bit.ly/3aasi5G
.
越借越有钱
https://bit.ly/3uPqVRX
.
Youtuber 随随便便赚大钱
https://bit.ly/3fK2qkN
.
⚡ Spark 的 Facebook 很熱閙
http://bit.ly/2X3Cgwr
.
⚡Spark 的 YouTube 很多教學
http://bit.ly/2KMqMvR
.
⚡Spark 的 Instagram 很多八卦
http://bit.ly/31YMLon
.
⚡理财交流站
http://bit.ly/finspark-group
.
⚡美股交易交流区
http://bit.ly/finspark-foreign-stocks

#本益比估值法 #股票估值法系列 #实际操作 #股票雷区 #基础中的基础 #价值投资