【龔成問答信箱】（Q22161-22180）

Q22161：

老師，我見你話如果該股票是近幾年上市的，當分析該股時，都可睇一睇佢的招股書，但不明點解要再看招股書？
有什麼用？

龔成老師：

我地買股票，就是買企業，你要盡能力了解企業的業務情況，以及財務數據，只要企業是近年上市（例如近3年內），我地都會睇佢的招股書，這樣可以了解企業的發展，以及當中的財務數據情況，就能有效評估企業的質素，以及進行估值。

招股書有好多行業的資料，市場研究報告，行業預期的發展，企業預測數據等，都是好有用的。

------------------------------------------------

Q22162：

龔成老師你好！我留意左你FB已半年多，買左你幾本書，已睇完80後百萬富翁和股票勝經，現在睇梗財務自由行。睇左你既書感覺獲益良多，謝謝。幾時會係澳門開班？（已登記留位）

請教一下老師，我今年36歲，月入4萬，扣除供樓、家用同生活費，每月可儲蓄1萬5千左右，層樓仲有140萬要供，現在現金只有20萬左右，持有股票有：

9988 — 200股@206
1810 — 2000股@21
0270 — 18,000股@11.68
1113 — 3000股@38.65
1177 — 3000股@7.08

1113可以長期持有嗎？270要減持嗎？

上面組合如需重組，希望老師多多指導。

短暫目標係五年儲到200萬，退休時希望達到財務自由。

謝謝老師

龔成老師︰

由於疫情關係，暫時都未可以係澳門開班，當情況許可，我會馬上過澳門開班，到時同事會聯絡你。

你現時持股，都係有質素，全部都可以長線持有。

但任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

粵海(270)明顯太集中，要作出調整。

未來投資策略上，你可以投資「平穏增長股」和「潛力股」。你每月5成儲蓄，即是用$7500做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，資金不宜用盡去入市。你現有20萬資金和每月所儲倒的資金，建議等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$15000 + 現有資產60萬(持股和現金)，5年後要增值至200萬，相信係很大機會成事。

至於長線增值，你都係維持這個大方向，咁就可以。

------------------------------------------------

Q22163：

龔老師, 打攪你, 請問1919 中遠海控除淨10送3點樣計算? 除淨前$19.36入左3000股, 應該送900股, 請問到時送的900股系咪除淨後價錢$15?

到時送股到戶口我的成本價點計?吾識計~ 請幫忙解答~

龔成老師︰

我地再精準D咁講，你除淨後每股成本，會下調至$15左右。(而非只係送的900股)

其實佢除淨後，就會按比例，將個股價向下調整。變相你每股買入成本係少左，但你持貨價值係依然不變。

若以佢除淨前$19.36計，除淨後每股就應該係$19.36 X 3000 / (3000+900) = $14.89

當然，實際開市個價未入樣，因為市場還會有其他因素，令股價變動。但單係考慮個10送3，股價就應下調至$14.89。

而你計算每股成本，都應該用$14.89。

------------------------------------------------

Q22164：

老師，您好！我快提早少少退休了，兩個月前第一次買股票。一隻領展，一隻香港寬頻。後者11.4買入, 一直跌去，現在已經跌到8.7了。

請問應該再買溝下，還是等？真的不開心啊！希望你可以盡快指點我。萬分感激啊！

老師，我每天看你的文章，希望好好學投資

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

香港寬頻（1310）主要在香港提供固定電訊網絡服務及國際電訊服務，以及產品銷售。

業務發展不差的，生意與盈利都有增長，不過盈利略有波動。

整體來說，有長線投資價值，收息不差，同時有基本增長力，現價算合理。

由於你將近退休，應以投資收息股為主。透過收息股產出的現金流，去支援你退休後的生活開支。

你現時持有的領展(0823)和香港寬頻（1310）都適合你，你目標主要係收息，所以股價波動，你係唔洗理。除非佢長線質素出左問題，否則你一直持有就可以。

以下係其他優質收息股，供你參考，現價都在合理區，可分注入市。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q22165：

我人工每月可以存20000、想問下有什麼基金或股票可以有15%一年、月供20000

龔成老師︰

你可以選擇一些「平穩增值股」+「潛力股」作投資目標，比例你預大約各一半。

以現時大市合理區狀況，你可以每月先用一半儲蓄(即$10000)去做月供，另一半就先儲起架策略，餘下現金就是等大跌市時出手。

恆指當中有不少平穩增長股，至於潛力股，可考慮：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

但你要明白，「潛力股」係有一定波動性，會有一定風險。你以上配置，拉長線平均計，每年大約有10-15%回報，相信可以達至你目標。

------------------------------------------------

Q22166：

龔成老師，我$31.65已入了345，買貴左，而家仲出左事，如佢有機會升多2元，我想轉去買322，請問322ok嗎？這個做法好嗎？

龔成老師︰

我地持有一間企業，主要係睇佢有無質素。而當佢出問題時，你要分析到底係中短期，還是長遠對集團有影響，才好下投資決定。

維他奶(0345)只是短期不利，但長遠，我相信影響又未算核心性，不過好睇事情的發展，要睇管理層，以及事件發酵程度，仍有未知數。

只可以話短期股價上落都大。

至於，康師傅控股（0322）其實本質不差，有品牌及規模，但內地的市場競爭都激烈。

這企業的長遠投資價值仍在，但在市場競爭較大的前提下，相信盈利會有點波動。可以理解為平穩增值股，因此估值不會太高。

現價算是合理區中上部，分注投資，長線，都可以。

若你持有維他奶(0345)，佔組合比重不高，你照持有，再觀察事態發展，係可以。但若持貨較多，你可以考慮換少少去康師傅控股（0322）或其他優質股，去平衡個風險，都係無問題。

------------------------------------------------

Q22167：

龔sir你好呀，有野想請教你。我今年40歲，月入20K，如可儲7-10k左右。

員工合作社已儲大約有20萬，利息3厘(每月儲$5000)，銀行大約有10萬，利息5.5厘、現金約10萬

現供每年約5萬保險 (醫療大約佔40%, 儲蓄大約佔60% (50歲可收回約70萬))

以前只係用最保本方法增值，但回報都未如願。剛喺Facebook 接觸老師約半年，現持有以下組合，由上年12月開始買股票

目標想年回報有8-10%！可唔可以比少少意見。

請教你應該點配置好，想有好既財富增長效果

持有股票:

1177 1000 $7.69
1345 15000 $1.09
3067 800 $17.24
6618 150 $119.98
6823 3000 $10.28
2845 50 $153.25

謝謝老師~

龔成老師︰

以你40歲年紀，依然係有財富增長需要。你現時銀行5.5息存款，勉強可以。但合作社3%儲蓄，實在太少。建議將這部份資金，用來月供優質股會較好。

"保險"只係理財中防守部份，買足夠保障就可以，增值可以留比優質資產(如優質股、物業等)去做。

你現時持有股票，都有質素，可長線持有。

但當中的中國先鋒醫藥(1345)質素都一般，盈利和股價都十分波動，最多只宜小注。建議你沽少少，換至其他優質股較好。

未來增值策略上，若你想做到長線平均有8-10%回報，你可以投資「平穏增長股」和「潛力股」。你每月5成儲蓄，即是用$5000做月供。其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

現時大市只是合理區，你現有10萬和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22168：

本人34歲，已婚，有2個小朋友，我月入8萬，太太6萬，現金約100萬。

有一層樓收租（17000租金，差銀行400萬，現值800萬），有一層自住（差銀行400萬，現值800萬）。

小朋友開始長大，想換港島3房有工人房，睇過樓心水要2200-2500萬，好不好賣2間換1間？

每月可存6萬，點樣可以快d增值到足夠首期呢？另外要問下你點睇中人壽及華潤水泥。唔該你如果有空請回覆。thanks

龔成老師︰

財富增值方面，你可以用「平穏增長股」 + 「潛力股」作組合，去創造一個增值平台，去累積這筆首期。

現在你每月先用5成儲蓄，即$30000做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

華潤水泥控股(1313)有質素，用來增值係可以，但波動性較大，不宜持有太多。

而中國人壽(2628)都有質素，但近年增長弱左，質素只算係中等，同樣不建議太大注。2隻股票都在合理區，可以分注入貨。

而置業方面，由於你本身已有一定房貸，如果你要買你目標2500萬的自住房，基本上你係較大機會，要沽出現有2個物業，再盡用資金才可以做到。(你心水物業，因為過千萬，故只能做50%按揭)

除非你有好實際需要，否則我唔係太建議你咁做。因為你會資金盡用，令你成個財富組合偏向物業類，而且仲係單一間物業，其實唔係咁理想。

你可以考慮一些樓價無咁貴的3房單位，再用細屋換屋的策略。

目標係希望不用集中在單一物業之餘，又可以每月空出較多資金，用來投入優質股增值。相信這樣配置，你個財富組合平衡性會較高，長線對你較有利。

------------------------------------------------

Q22169：

龔sir,你好。如果我只可以每月用5000供股，想儲20年後退休，退休後我想有每月股息20000，請問有可能嗎

龔成老師︰

如果你希望退休後，每月有2萬蚊現金流，以股息率6%計，你需要本金400萬。

我假設投資回報有10%（連股息再投資），你每月投資$5000，20年後大約會增值至340萬，故很大機會達至你的財務目標。

策略上，你可以用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$2500做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股，例如恆指成份股當中有不少，亦可考慮、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

但由於你月供可用金額不多，我建議先集中指數基金，以免個股月供成本過高。到你可以加大月供金額，才加入其他股票會較好。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22170：

Sir, 我係第31期畢業生

想問下1024 快手前景如何，持貨平均價$300. 而家應唔應該放左佢入番d 平穩股如領展，地鐵？

Thx

龔成老師︰

快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。

現價雖然無之前咁貴，但仍未平，可稱為合理區頂。但短期股仍會十分波動。但佢係有投資價值，雖然你買貴左，但若持資不多的話，可以守。

若持貨較多，你可以沽少少，換成領展(0823)和港鐵(0066)這類水桶2股票，去平衡風險。

------------------------------------------------

Q22171:

你好龔老師，我想問我從來沒有買股票，我每月可供股10000至15000，現在38歲，老公40歲，之前每月供保險現金30萬，長遠供那幾隻股票好？謝謝

保險係赤霞珠

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你38歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$5000-7500做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

你個保險計劃，我無研究過。

其實"保險"你可以好簡單咁理解，佢主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

若你份保險，已經供了一段時間，你可以照持有。但唔好再加大儲蓄保障金額，咁就可以。

------------------------------------------------

Q22172：

老師你好，我係你澳門既讀者，我目前睇左你兩本書，《80後百萬富翁》及《股票勝經》 睇完想上你既堂學深入少少，請問你何時來澳門開課/會不會打算開網課之類？

另外比較推薦我之後看甚麼書，想學習更多評估企業是否優質的能力，謝謝你

雖然自己買入都是大公司，但由於本人評估企業價值能力弱，大大減低自己長期持有的信心。

（目前持有阿里爸爸、小米、藍月亮、東京健康、農夫山泉）平均每隻目前都跌了15-20%。

謝謝老師

龔成老師︰

我同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；
✓股票、基金、債券、的士牌等資產的運用和買賣技巧；
✓懂得分辨資產質素和平貴，在最合適的時機買賣；
✓如何以最低的價錢，買到最具升值潛力的物業
✓致富3部曲，如何從當下這刻開始啟動！

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

澳門班，我會等疫情穏定，可以通關後，就馬上過澳間再開翻。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

如果你睇完《80後百萬富翁》及《股票勝經》，都有一定掌握。你可以再睇埋《選股勝經》和《年報勝經》，這2本書，會再仔細少少，去教你點去初部分析一間企業。

睇完這2本再去上堂，對你課堂上掌握，會有一定幫助。當然，就算你睇唔明都唔緊要，上堂會再由淺入深，去解釋一次。但有個底，就會吸收得快D。

另外，我地持有一隻股票與否的重心，係企業質素、前景，不要過度被買入價影響。買入價只是一個心理因素，如果企業核心因素未被影響，我地係唔需要理會。

你現時持股，都係有質素，適合你長線持有。

------------------------------------------------

Q22173：

你好，龔成老師！最近想了解一下投資，想買你的書學習一下，請問你會建議先看哪一本書先？

另外，我媽咪有20萬叫我學習下幫佢買股票，但係我唔知點樣去選擇買咩股，請問老師你有什麼建議？

謝謝！

龔成老師︰

你可以先睇我架《80後百萬富翁》、《財務自由行》和《股票勝經》，都適合初學者。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

若你媽媽距離退休，都只有10年左時間，其實已要開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

現時的$20萬，暫時只能動用$10萬，因為大市唔算平，你要分注投資，同時留下一半資金。長線投資。

平穩增值股，例如指數基金、金沙（1928）、長建（1038）、中銀（2388）、港鐵（0066）、恆基（0012）、粵海（0270）、領展(0823)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

但若果你媽媽已經好接近退休之年，甚至已退休，我地就應集中係「收息股」，重點係創造現金流，去支援佢退休生活開支。

------------------------------------------------

Q22174：

老師你好 新手一名 完全冇任何知識 想問下第一步應該開始學咩？新手想買股票建議資金幾多？

你邊本書比較岩新手從最基本學起 謝謝

龔成老師︰

作為投資新手，你要做三樣野。

第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

《80後百萬富翁》、《財務自由行》和《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，供指數基金。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，指數基金是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供基金，當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q22175：

龔成SIR，我今年29歲，我與家人持有下列股票，我有一些股票分配的問題想請問你，

我手上有﹔
2手京東9618@$330
1手騰訊700@$560
2手匯豐005@$51

我亦由上年開始每月供股﹔
銀河娛樂0027@$65 - 每月 $1500
中國生物製藥物1177@$7.8 - 每月 $1500
盈富基金2800@$28.5 - 每月 $1000

我知道購買京東的現價格太高，但我上年購買時都已經打算長期持有。

如果下半年時想再購買騰訊或是小米，是否會持有太多新經濟股？

如果持有太多新經濟股，是否應該買傳統經濟股呢？例如﹔領展，港鐵等等？

好多謝你花咁多時間去解答問題！

龔成老師︰

以你年紀計，應以增值為主。你現時持有和月供的股票，都係有質素，就算買貴左，都係有得守，你照長線持有就可以。

但匯豐(0005)只係收息股，增長力一般。若係你家中長輩持有，都可以。但若是你本人持有，就未必太適合。

月供方面，我建議用指數基金做主力，個組合平衡性會較好。

騰訊(0700)和小米(1810)都適合，現價在合理區中上至頂位。但若你加入這2隻股票，會有太集中係科技股的問題。

而且，這類股票雖然有增長潛力，同時風險都較高，不宜持有過多。

你想投資這類股票，唔係唔得。但同時間，你都要買入一些平穏增長股部份，去令組合保持平衡。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q22176：

你好，龔老師 拜讀完股票勝經，增加對股票認知，令自己對股票有基礎概念，多謝老師。已買你另一本著作＜80後 百萬富翁＞

同報左你股票班，繼續學習，增加智識，希望可以達到財務自由。

本人37歲，已供完樓，有大慨20萬流動資金，月入21000，每月可以儲蓄10000蚊，已開始用5000蚊月供股票，留5000蚊作現金儲備買貨。

月供股票我選擇，盈富+港鐵+中電+領展+中銀香港+金沙+小米+港交所+騰訊+安碩A50，盈富月供佔其中2份。以上供股會否太散？

如現在小注買入騰訊，小米，金沙是否合適？謝謝龔老師

龔成老師︰

你所選的股票，係適合你年紀，資金配置比例都正確。

但的確係有點散，因為你月供總金額唔多。若你同時供咁多隻，變相個股月供成本會高左。

最好你用指數基金做主力，月供$2000， 再供多3隻各$1000，咁會較好。

騰訊(0700)和金沙(1928)算係合理區中上部，而小米(1810)就在合理頂至略貴。若你無貨，而價開始分注入資係可以。股票班見!

------------------------------------------------

Q22177：

你好,老師, 我想問下現有自住物業供緊, 近排搵緊心水車位100-130萬車位收租, 你認為加按是1個好途徑嗎? 謝謝你!

龔成老師︰

現時仍處低息期，加按是沒有問題的。

關鍵是加按後，是否能將資金買入其他資產，創造更高的回報，由於加按是要支付利息的，所以新資產產生的利息回報一定要比加按的利率高，這樣才值得做。

近年「車位」價格近年雖然已回落不少，但整體上，只係合理區頂部。相對優質股，佢投資值博率會較低，建議你先用股票增值，會較好。

投資車位與否，你就要自行衡量。

若決定投資，只要加按後，負債比重不會過多，咁就可以。假設你30歲，總負債最多可位總資產9成。但若50歲，比例就要下調至5成，會較穏當。

同時，你要明白將來加息，會令你息差回報收窄，有機會影響你回報效果，你要明白這風險。

------------------------------------------------

Q22178：

你好，龔Sir，我已經30歲，投資左5-6年都係蝕多，已經有10萬投資左係美團，現在開始每月可以$6000投資，

請問每個月$3000月供盈富，$3000月供3067可以嗎？謝謝

龔成老師︰

如果你過去5-6年，每次投資多數都是「輸」，即係你存在一些核心性問題。譬如一些錯誤的投資觀念。

記住，正確和正常的完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

往後，你只要以「長線投資優質股」，作為投資目標。我好有信心，你會結束過往一直虧損的狀況。

以你現時30歲計，你這個月供策略係可以。

緊記月供係一個長線計劃，月供最少維持3年，並持有這些股票5年以上，才會有較理想效果。而中間可能會有股價波動，但你不用理，一直供就可以。因為月供本身，已有平均價格波動的作用。

當然，可以的話，最好一直持有。因為，優質股持有時間越長，財富增值效果就會越理想。

現時大市只在合理區，每月資金唔好盡用。最好留有部份，等大跌市出現時，可以用來掃貨。

至於美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

只可以話，潛力是有的，現價唔算平，之前明顯貴，之後回翻好少少，大約合理區頂。此股可持有，就不能太大注。

若佢佔你組合不多，可以守。但若佔你合較大比重，你要沽出部份，去平衡風險。

------------------------------------------------

Q22179：

老師 如果有時間 可唔可以分折一下美股RIDE Lordstown motors corp 謝謝你 請問合理價位係幾錢？Thanks

龔成老師︰

Lordstown Motors Corp (RIDE)是一家汽車公司。該公司從事設計和製造電動汽車。其卡車產品主要係輕型卡車，專注於商業車隊市場。

其旗艦車 Lordstown Endurance是一款電動皮卡車，是一種利用了四個裝有集成軟件的輪轂電機。

我初步睇過佢資料，產品都有佢價值。但由於現時都尚未有正式盈利，而到底幾時會有，無人肯定到。

此股有一定不確定性，唔係唔投資得。但我地投資時，必須要控制注碼，去平衡不確定性，所帶來的風險。

------------------------------------------------

Q22180：

成哥!! 你好!! 想問8032呢隻股!!我睇佢ROE同PEG都好強!! 前2-3年是蝕錢宜家有盈利!!所以基本面是算不錯嗎??

我感覺他會成為倍升股!!?? 對嗎?

龔成老師︰

非凡中國（8032）主要從事體育人才管理及賽事／項目製作及管理、提供體育諮詢服務；以及物業與社區發展。

過往業務都有發展，不過增長力不強，同時有點波動。而盈利上落都大。

你見佢2019和2020年盈利大升，係由於出售於一間聯營公司之部分權益所致。實際上，業務方面增長，唔算明顯。

整體而言，未見企業有好強的獨特性，增長力唔算強。整體質素一般般，現價偏貴。最好等有大幅下跌，才入貨，而且只宜小小注。

我地分析一間企業時，唔好單憑指標或數據，就覺得佢好左。當佢近年和過去幾年盈利，出現明顯變動。我地就要小心分析，找出當中原因。

是企業賺錢能力提升、市場有所改變、定係其他因素。如果係一些長線利好企業本身因素，我地估值可以提升。

但若只係一次性因素，我地就唔應該用這些原因，去作估值和投資決定。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21201-Q21220）

Q21201：

你好龔Sir , 上完你堂就計一計吉利(175)既估值，麻煩睇下我做成點呀

因汽車界近來有著革命性的改變, 所以只用近5年的數據
主要競爭公司 2016-2020年PE raio

(因比亞迪完全是一間電動車公司而且市盈率太極端所以不用來比較)

以下數據按大小排

吉利(175)8.551 12.58 13.87 14.41 26.97
長城(2333)6.676 7.178 8.777 8.812 11.11
廣汽(2238) 4.22 6.802 8.584 9.454 10.19
北京汽車(1958) 6.236 7.766 8.495 9.402 12.14
(因2018年一次性PE大升,其後回復正常, 所以不用2018年改用2015年)

用你課堂教的調整，再綜合分析，推算行業平均市盈率 : 8.5815 - 10.5195

吉利(175)市值大, 業務規模比其他同業大, 值得調整，大約調整50%。經調整後吉利合理市盈率 : 12.87 - 15.78

吉利5年平均每股盈利 : (0.64 + 1.4 + 1.58 + 1 + 0.61)/5 = 1.046

大行預期2021年每股盈利為 : 0.94

因吉利積極發展電動車品牌及推出新車, 但同樣銷量亦受疫情及芯片短缺帶來一點拖累

所以先假設每股代表盈利是5年的平均數1.046
所以吉利的合理估值為 : 13.46 - 16.51

請問咁計同你計出黎既差得遠嗎? 你計出黎又係幾多呢? 謝謝

龔成老師︰

首先，北京汽車(1958)2018年市盈率大升，並唔係一些會計因素，純粹係當年不少汽車股被炒起。

因為價格大升，所以市盈率就被大幅抽高。將來都有機會出現這種情況，故你都應把這年，計算在內。

吉利(0175)本身的質素不差，擁有一定的銷售網絡及品牌，不錯的市場策略及定位。

佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些因素，都值得給予吉利較高評價。加上佢近年加大新能車部份發展，預期會令增長力增加，故市盈率可以比以往，再調升少少，大約17-22倍。

合理估計，你可再上調多D，會較為合理。

其實，你已掌握了估值的方向，你最重要在計算後，明白這計算背後的基礎，當中是考慮了那些環境情況。

有時我在估值時，會同時計幾個情境，例如好景時的EPS會怎樣，如果差的情況估值又會怎樣，去得到更立體的答案。

另外，你要多做練習，為不同企業進行估值，這樣才會更掌握當中的技巧。

------------------------------------------------

Q21202：

龔老師您好，想問下中國鐵建，長遠和短期投資可以嗎，現時pe2-3，點解佢賺到錢，又有股息，但係格價咁低？

龔成老師：

中國鐵建（1186）業務以鐵路及交通相關工程為主，包括高原鐵路、高速鐵路、高速公路、橋樑、隧道和城市軌道交通工程設計及建設。

業務地區包括中國，以及中國以外地區，工程承包業務是這企業的核心業務，例如基礎設施建設，鐵路、公路等。

這企業的發展不過不失，但增長力及賺錢能力都比過往有所減少，從一些財務數據，例如資產回報率、股本回報率、EBITDA利潤率等，都見到這企業的長期財務數據有轉弱情況，反映企業現時每個項目的賺錢能力，不及過往年代，企業質素因而下跌，而市場估值都會因此而減少。

這股的整體質素算是中等，發展力比過往有所減弱，這類股不是不可投資，但就不值得投資太多資金。

至於市盈率較低，並不一定代表吸引的。

第一，每一間企業，每一個行業，都會有其合理的市盈率，雖然數字愈低一般代表愈便宜，但在實質操作時，先要了解每個行業及企業自身的情況。

第二，當一個行業、一間企業的發展前景不及過往年代，賺錢能力減弱，市場就有可能將其合理市盈率的估值調低，投資者要小心解讀數字背後的意思。

第三，近年一帶一路的發展力，並不及之前所預期，部分國家的工程都減少了，這企業的長遠生意都會因此受影響，同時每項工程的賺錢能力都有可能因此而受壓。

第四，當投資者分析企業時，要了解生意的持續性，例如一些從事零售行業、飲食行業，只要大環境無太大變化，生意往往會持續。但若然企業從事工程，投資者就要了解生意持續性的因素，若果一個國家該類建議最大規模發展的時期已過，企業生意可持續發展能力就會轉弱。

在中國鐵路最大規模建設時期已過，以及一帶一路國家對中國興建鐵路的需求，未必及預期的情況下，這企業自然受影響。

若投資者見到這企業長期的市盈率，經常都處於很低的水平，反映市場認為這企業面對上述因素，只是值這個市盈率，因此，並不代表特別便宜（情況與內銀股一樣，長期低市盈率背後是有原因的）。

------------------------------------------------

Q21203：

你好，想問下你有冇長線投資邊隻美股或者ETF？知道你長線投資1211，覺得你好有毅力，

想問下如果我長線投資arkk / arkf好吾好呢？另外你還睇好邊隻港股可以長期持有呢？thanks

龔成老師︰

其實你只要明白，真正最好架財富增值方法，就係長線持有優質股這個道理，你都可以做得到。

美股和ETF，我自已無投資，我都係自行選股，好似比亞迪(1211)、小米(1810)等。

美股我自已無特別研究，所以這些股票比唔倒太多具體建議比你。

但初步睇佢地都有質素和潛力，但你預佢地波動性會較大，緊記投資持要控制注碼。

而港股方面，都有不少優質股，值得長線持有。若你係年青至中年人士，以下股票都適合。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、領展(0823)

潛力股︰安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。

但你要留意翻，部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

------------------------------------------------

Q21204：

龔sir，你好👋🏻本人30歲，是全職媽咪，現持有以下組合嘅股票：

1. 01093石藥 （平均價$9.56）持有12800股

2. 2342京信通信 （平均價$2.612），持有16000股，現價跌到兩蚊，請問應唔應該再購入？

3. 941中移動（平均價:44.85 ） ，持有1500股

4. 939建行（平均價$6.41 ）持有4253股

請問這些股票是否都是有質素？除了建行外，其他另外三隻都打算長渣，是
否可行？謝謝你抽空解答

龔成老師︰

你以上持股，都係有質素，全部都係可以長線持有。

但選股組合上，京信通信(2342)質素未算好高，唔建議再加注。

現時你除左石藥(1093)外，其餘幾隻增長力都唔高。若果你個人投資取態係較保守，咁都可以。否則，你就你加入多少少有增長力股票，去提升財富增長速度。

另外，有一個較大問題，係你好偏重左係石藥(1093)身上，佔組合比重很高。任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

長期你需要建立一個更平衡架組合，唔好太集中係幾隻股票。

------------------------------------------------

Q21205：

你好，龔sir 小妹今年28歲，月儲一萬左右，想係30歲前有100-130萬，有可能嗎？現時持股如下
(坐艇中）！！！

匯豐2000股@70元
騰訊100股@662元
美團300股@330元

小米400股@32.7元
安碩恒生科技600股@20.58元
21世紀教育33000股@1.38元
易鑫集團500股(新股上市抽中的）

另外有大約價值6萬港幣的美股(哈，終於系正數😅唔洗負數負到懷疑人生）和30萬左右現金！

龔sir,請問有機會達成目標嗎？有無邊d股票應增加或減持？希望你比小小意見我，多謝解答。

btw報左你股票班，因為你太神秘關係，好想揭開你的面紗！

龔成老師︰

其實你唔好太著重係股價上，帳面賺定蝕，從來都不是持有一隻股票與否的因素。

關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

假設回報10%計(連股息再投資)，你每月投資$10000 + 現有資產約值65萬，2年內增值至100萬，計算上係可以。

但由於2年唔係一個長的時間，就算優質股也有機會出現波動，影響到你最終回報，你要明白有這個風險。

先講你現有持股，都有質素。

但匯控(0005)只係收息股，唔會有太高增長力，唔適合你。

易鑫集團（2858）、21世紀教育(1598)質素中等，而美團(3690)有質素，但不確定性較高，都不宜持有太多。

你現時28歲，較適合用"平穏增長股" + "潛力股"的組合。每月用5成儲蓄，去做月供，其餘先儲起，用一邊月供一邊儲蓄的策略。

現時大市只係合理水平，現金和股票最好各佔一半。餘下30萬和每月儲蓄，就等大跌市出現，才加大力度掃貨。

股票班見!

------------------------------------------------

Q21206：

Hello!請問龔sir你覺得比亞迪電子285 現價可以入嗎？其實我都有啲睇好佢，但知道佢，依家呢個價唔平，要落返去20-30蚊都幾難下！謝謝

同埋阿sir 我想問你依家手上有咩股票同平均咩價位入？

龔成老師︰

比亞迪電子（0285）質素不差的，有潛力。睇佢過往發展都正面，有技術，而前景都唔錯。

考慮到近期的增長，$40左右算係佢合理區頂部，現價略貴。要等回翻才好分注，或者可用月供去儲貨。

至於我的持貨，講其中幾隻啦，比亞迪（1211）、小米（1810）、中生（1177）。

現時比亞迪較貴，唔好考慮住，而小米同中生，算是合理區頂至略貴。相信這3隻股，都會好長線持有。

------------------------------------------------

Q21207：

龔sir,你好！本人45歲，已婚有2個子女讀中學，夫妻有穩定工作及收入共6萬元。

我上年12月在FB follow 你，除了睇完百萬富翁系列書籍，也買齊你的聖經及50系列的書，
真是獲益良多。

今年1月開始月供1萬股票，包括2800＄3000, 1810＄1500, 9988＄1500, 66＄1500, 823＄1500
及1928＄1000。

現手持有股票：
1手2382＄175入, 1手9988＄222入, 6手3067＄17.15入, 1手981＄24.5入, 1手2018＄43入

1）有10萬資金想在跌市時再買入上述持有的股票，還是買入月供的股票，哪個會比較好？

2）以上股票分布會否太散太多？有否集中某類型？

3）2018及981仍可持有，還是賣出轉換1928或其他會比較好？

懇請龔sir指教分析，謝謝。

龔成老師︰

先多謝你支持，你可以先睇"80後百萬富翁"、"財務自由行"和"股票勝經"，由淺入深，咁會較好。

1) 其實2者都可以，除了中芯(0981)較一般，唔建議加注之外。

同時間，你入市架時候，唔好太偏重新經濟股，都要加入部份舊經濟股，令組合更平衡。

2) 不算太散，但有少少偏重天係新經濟類別，會令組合波動性偏高。

3) 瑞聲科技（2018）不差的，本身有一定的規模與技術，長遠發展正面，不過，佢增長力不是好強，只能視為平穩增長類別，你可以長線持有。

中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。加上之前熱炒過，股價大上大落，投資要注意風險。現貨1手可持有，但唔建議你再加注了。

------------------------------------------------

Q21208：

龔成老師你好，我今年32歲，其實我已經接觸股票超過十年，在最近開始留意你的fb才發現原來我一直都買錯哂/亂咁買，有一種一言驚醒夢中人的感覺

我已經買了股票勝經，希望重新開始真正學習如何買股票，非常感謝你無私的分享

我現時持有以下股票：

267 - 1000股 @15.48
388 - 100股 @297
745 - 12500股 @2
1733 - 60000股 @0.5

1776 - 1000股 @24.65
1816 - 5000股 @3.71
2382 - 100股 @176
6886 - 200股 @24.8

我知道大部分蟹貨應該賣出，其實我深知積存蟹貨的原因是我買股票後就好少留意股價，到想起來時先發現原來跌咗好多

加上我不知道應該幾時賣出才好，感覺過去十年的時間及金錢都浪費了。

看了老師你的分享後，我才知道月供股票，覺得頗適合我這種很少留意股價，但又想獲得合理投資回報的人，希望老師有時間的話可以對我的投資組合給予寶貴意見。

萬分感激龔成老師，謝謝!

龔成老師︰

你想先更正你一個投資想法，蟹貨與否，唔係一個重點。我地投資最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，賺緊定蝕緊，都要賣。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你今年32歲，建議你先集中做好增值部份。現有持股中，舜宇光學(2382)和港交所(0388)係合適的。

中國國家文化產業(0745)見佢過往有20合一，而且多年出現虧損，好大機會係財技股，建議你盡快沽出。

易大宗(1733)，如果有睇佢的企業年報，就會見到核數師，多年來都有「保留意見」或「不表示意見」，這已經賬目「有古怪」。這類股基本上無投資價值，賣出較好。

中信股份（0267）、廣發証券（1776）、中廣核電力(1816)、ＨＴＳＣ華泰證券（6886）質素一般，唔建議你持有太多。

至於月供適合較初學者原因，唔係因為唔洗成日睇住個價。而係佢可以透過拉平均左個買入成本，令你減少買貴貨架風險，從而長線得到較佳回報。

月供策略上，現在你每月用5成儲蓄，去做月供，其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

而何時賣出，基本上企業質素一直無變差，你係唔洗賣。除非個市去到好狂熱，如果你現階段無信心判斷大市平貴，你可以用"升一倍、沽一半"架策略。

先收回成本，餘下一半讓佢自行慢慢增值，咁就可以。

書本上，我建議你先睇埋我寫架"80後百萬富翁"、"財務自由行"，咁會較理想。

------------------------------------------------

Q21209：

我爸爸岩岩過身
原本供緊層樓諗住比佢養老
我租左新樓 $12500
但依家舊樓就空左市值300萬左右
我諗緊賣唔賣好
層樓倍升左幾倍
岩岩我公司燉我冬菇
減左20%人工

股票我仲有
比亞迪
盈富
領展
小米
3033
全部小量
想睇下你會點睇

龔成老師︰

每個人都有自住需要，除非間屋已經明顯無乜增值潛力，咁你才考慮沽出。

否則，你可以考慮自已住，可利節省新樓租金，用來投資增值。又或者，放租比人，自己另租地方。大前題係，如果物業依然係有質素，就應留住這個物業。

你現時持有的股票，都係有增長力和質素，適合年青至中年人士。這些股票，你長線持有就可以。

若你將來會再投資恆生科技股ETF，建議你用安碩恒生科技(3067)。

相對南方恒生科技(3033)，佢每年收費和追蹤誤差都較低。但由於幾隻恒生科技ETF都係初上市，追蹤誤差只能作參考。實際誤差未必一樣，你要知道這個風險。

------------------------------------------------

Q21210：

龔sir,你好，又要你幫手解答問題了，想問萬國數據值得持有嗎？我知道都有新意網，2隻長遠黎講邊個好？

新意網又持續上升，萬國數據就蝕錢，但又因為覺得中國發展潛力大

另外亦知道美股亦有呢隻股，那麼大家有什麼分別?見佢低過招股價 想入手，那麼我買美股定港股?唔清楚呢d範疇，謝謝。

龔成老師︰

我地持有邊一隻，唔好太著眼係中短期股價走勢，要用翻佢長線質素去做考量。

新意網集團（1686）主要提供數據中心、設施管理、網上應用及增值服務，系統之安裝及保養服務。

行業長遠發展正面，佢已經做到全港最大，加上行業的需求不斷增長，對佢長遠都有正面影響。佢過往生意與盈利保持增長，財務數據正面。

這股有投資價值，不過現價就唔算平，大約在合理區頂。如投資，小注分注都可。

萬國數據（9698）有質素的。

佢的業務為開發及營運數據中心，根據佢公司提供的資料，佢係全中國最大的運營商網絡中立數據中心服務提供商，市場份額約2成。

現時主要通過GDS上海、GDS北京及其子公司進行該等業務。GDS北京及GDS上海各自持有經營業務所需的互聯網 數據中心牌照。

佢提供託管和管理服務，包括創新和獨特的託管雲價值主張，機房面積為266,260平方米，有一定的規模。

見佢生意有一定的增長，行業前景正面，只是現價唔算平，投資價值都有，但就唔建議太大注。跌翻10%較合理。

2者都有長線投資價值，規模上，萬國數據（9698)會佔優。但此刻值博率，會係新意網集團（1686）較高。

至於，買港股定美股，其實分別唔大。

------------------------------------------------

Q21211：

龔SIR，我想講你知，我上過你股票班，跟咗你兩年之後，認同你套方法係得！

我今年28歲，成功說服家人賣了住了20年的兩房自住物業，目的一部分資金幫老人家做收息作生活費，還了另一物業的樓貸(因自住物業作抵押)

剩下部分讓我倆兄弟(弟弟22歲)投資增長股，目標是5~10年再運用借貸買兩個物業，一個值300多萬的細價樓，一個過千萬的三房物業。

目標投入潛力股的資金約340萬港元，目標組合:舊經濟股1177, 3319, 1830, 新經濟股 2382, 0636, 2845, 9988

340萬本金的組合，若選擇投資以上的股票，應選幾多隻好呢?建議比例如何?我會留意股價睇值博率

龔成老師︰

你所講的組合，都適合用來做財富增值。

但這個組合中有主要係潛力股，佢地雖然有增長潛力，但同時波動風險都唔細，唔建議全部資金盡用在這些股票身上。

我建議你加入一些平穏增長股，同你上述架潛力股，比例上各佔一半，咁會令到個組合更平衡。

大市現處於合理水平，那340萬資金，你可以先用一半，以"分注"形式慢慢入貨。餘下一半就等大跌市機會出現，才大力度掃貨。

由於你現處於"沽空樓市"狀態，股票增長和樓市增幅未必同步。所以，假若股票升幅跑輸樓市，反而會令你日後買樓成本上升。

你可以在投資組合中，加入多少少房產類股票，去盡量平衡翻這個風險。

至於老人家收息部份，就唔好用以上股票，應以一些優質收息股為主。策略上，都係先用一半資金，分注入市，餘下就等機會。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

------------------------------------------------

Q21212：

老師我想請教，其實我等緊2020居屋結果，搞珠號碼好後，本身以為冇機，但又收到信補料，之後仲收到二次急件要我補料，好似比咗個希望我。

現在有現金100 万，覺得而家係買樓時機，唔買冇機會，目標500万樓下，做9 成，其實冇咩實力。

聽講居屋5、6 月𢵧樓，如果到嗰時先知自己原來冇机先再睇返私樓巿場，會唔會太遲，我已經41，買舊樓驚做唔到長年期，500 樓下變得冇乜選擇，好心急，求意見

龔成老師：

你可以等埋居屋果邊先，我相信私樓未必會一下子上得太快，估計1年內上落都唔會太過多。

如果居屋果邊唔成功，到時就睇私樓（當然，現時你久不久睇下私樓先，都無壞的）。

要留意，你的「供款能力」是最重要的考慮因素，唔好太過勉強，如果這方面不足，就寧願調低目標樓價金額。

------------------------------------------------

Q21213：

你好龔老師 關於上次你既解答 我風險過高，除左買3067，如何可以提升組合平衡性？ 現持有小米及雅迪，但不是月供

小米有1800股，雅迪4000股； 是否建議買短期股？想每個月都增加$4000以上收入，有可能嗎？

龔成老師：

恆生科指（3067）是一個組合，會比單一股票的風險度較低，當然，由於佢持股都是潛力類股票，因此本身都有一定的波動性，你要留意。

小米（1810）絕對有質素，可長線。

至於雅迪控股（1585），都有潛力，不過要留意股價升左好多。

佢主要係中國以「雅迪」品牌從事電動兩輪車（包括電動踏板車及電動自行車）的開發及銷售，亦銷售電動兩輪車用的電池、充電器及其他零部件（包括電機、車架等）。

睇翻過往財務數據，唔差的，生意的確有增長力，潛力度有。不過現價唔算平，因此唔建議持有太多。

另外，不建議你短炒，全部都要長線投資，不要著重每月賺多少，要睇長線。

------------------------------------------------

Q21214：

龔成老師本人30中，有一自住物業育有一子，供樓等家庭開支全一力負擔，每月可尚餘2-3千元。。。

而儲蓄則由老婆負責，現有100手a50，2手電能，2手中國建築，3-4萬現金。應該如何重新分配令財富有長遠的增長保障退休後的生活？

而5-6年後除去支出本人每月可有8-10k的餘額，50％作月供股票50％用作儲蓄流動資金合適嗎？而40歲才由零開始理財會否太遲？

本人明白財富增值非一朝一夕的事，但人總有貪婪的一面，會引發一些錯誤的想法，所以唔知醜咁希望龔成老師指教一下以滅絕那錯誤的想法！

另外想問問老師的投資初階班學費是多少

龔成老師，我媽媽遲下會退休，強積金大約有50萬左右，我應該以咩比例分配係收息股同平穩增長股，而到左退休年齡可以投資少少係潛力股嗎？

龔成老師：

你現時現金其實不足，以一個家庭來說，加上要供樓，如果只有$4萬現金並不足夠，最好去到$7萬-$10萬作備用現金，餘下的才投資，這會較好。

另外，A50中國可長線的，但要留意，雖然這是組合，但都不能過度集中，宜同時投資其他股，如果不懂選股，就考慮其他ETF。至於電能（0006）及中國建築（3311），質素是有的，但增長力不強，收息為主，以3X歲來說，算是較保守，因此，日後可增持一些有基本增長力的股票。

至於你自己要5-6年後除去支出本人每月可有8-10k的餘額，50％作月供股票50％用作儲蓄，最好當然盡快啟動這計劃，但如果無計，就等5年後啟動，40歲，有心都唔怕遲。

現時你每月可儲$2-3000，都可以盡力投資，月供股票都得。

當然，希望你在收入上更進一步，想想長遠增加收入方法，對你會更有用。

至於你媽，潛力股就唔太建議，如果佢真的好想，就1、2成好了。

佢你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

股票班共8堂，暫時優惠價：$8800。

------------------------------------------------

Q21215：

龔成老師你好，我40歲，睇左你FB 一段時間，另外都購買左你先前的網上課程，有得益。希望你能指導下。麻煩曬，長文

因為以前父母系股票輸左好多錢，多年前讀 U 就開始兼職賺錢供父母層樓，也一直都抗拒進入股票投資。
但幾年前開始有剩餘錢就學人抽下新股或短炒賺餐晏仔。

現時還繼續持有幾個蝕本股
3883，1916, 8511, 8313, 6886, 1932, 1227(呢個是父親的)

想問下應該蝕住放甘點？

另外上月開始月供3067, 暫時每月7000
還有1833, 6060, 386, 1786, 1299(都是2至3手)

成40歲最近我被裁，有筆20萬長期服務金。請問應該投資股票定放系供樓的高息戶口等跌市？

我同先生目前有2層樓，一層租萬5(月供5千到2016完), 一層自住(月供2萬8). 另外有150萬現金，股票40萬。我同先生月入8萬(我被裁前人工4萬), 但要供養4大長老同個女，經常性使費都大。

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

中國奧園（3883）有質素可持有。
江西銀行（1916）質素一般，增長力不強，宜減持。
ZC TECH GP（8511）無乜質素，賣出較好。
杰地集團（8313）無乜質素，賣出較好。
ＨＴＳＣ（質素中等），可守住先，但增長力不強。
中漆集團（1932）質素一般，增長力不強，宜減持。
國盛投資（1227）無乜質素，賣出較好。

至於你「上月開始月供3067, 暫時每月7000
還有1833, 6060, 386, 1786, 1299」

基本上無問題，只是鐵建裝備（1786）質素不太好，宜賣出。

由於你現時有一定的物業資產，反而股票部分很少，因此應增加股票比例。

你$20萬應投資股市，但你投資知識與經驗不多，暫時只建議你月供股票，以及投資平穩增長股。盈富（2800）、港鐵（0066）、領展（0823）都可以。

你可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21216：

龔sir，有啲野想請教下你
月供基金,我應該要留意啲咩

龔成老師：

首先，要睇翻該基金的投資範疇，投資策略，因為基金有好多種的，你要了解該基金投資的資產類別，是否你睇好的，長遠向好的。

另外，過往回報是否理想，比起大市時否較好或較差。

當確認有質素後，就可以投資，月供是一個方法。如果該基金不是在交易所上市，你就要睇翻有那些條款，會否要求你最少持有幾多年。

------------------------------------------------

Q21217：

老師好！本人50歲持有股票。

公用股：0003 6823 6.51%
REITS：0823 10.96%
醫藥：1177 4.23%
潛力金融：0388 15.54%
石油：0386 1.24%
家電：6690 2%

保險：2318 7.13%
電動車：0175 1211 21.38%
內銀：0939 1398 3988 21.38%
新資訊科技：9888 1.98%

另外以下基金：已供占10.81%
2800 月供$6000
3188 月供$4000

計劃每月買一手3033
已買了一手2845

1. 以上組合是否太亂？有什麼需要加減？
2. 想每月買入一手3069 3109？有咩意見？
3. 手上還有60萬現金，等機會？
多謝

龔成老師︰

1） 都有少少，最好組合數量維持係8-10隻，咁會較理想。

持股方面，都有質素，可長線持有。但你比重上，太偏係潛力股類（1177, 0388, 0175, 1211, 9888）。

佢地雖然有增長潛力，同時風險都較高，不宜持有過多。以你50歲計，潛力股佔組合20%左右好了。

現貨可持有，但未來時間，你要加大翻平穏增長股部份，慢慢令個組合平衡翻。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

月供方面，同樣要作出調節。而你想投資恆生科技股ETF，我建議用安碩恒生科技（3067），佢費用成本會較低。

2） 華夏恒生生科（3069）主要係追蹤恒生香港上市生物科技指數之表現。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線持有會較好。

南方科創板５０（3109）都有投資價值，但成交比較少，會有機會買賣差價偏高。

但你要留意，這2隻都算係潛力型股票，以你年紀，不宜持有太多。

3） 現時大市只係合理水平，現金和股票最好各佔一半。若你持股總值已超過60萬，有手現金就最好等大跌市出現，才加大力度掃貨。

------------------------------------------------

Q21218：

你好，老師
35歲，家庭月入約6萬
每月儲到2萬
2小朋友讀緊幼稚園

持有以下，希望可以盡快儲到200萬作首期，買多層樓收租。不過，我都唔係好清楚當有200萬時，應該購樓收租，還是繼續投資股票？

農行：10萬股$3.38
建行：17000股$6.58
交行：10000股$4.9

9988 阿里：300股$463
快手：200股$402
中移動：1000股$53.8

總成本：70萬

另外可動用多50萬投資股票，請問投資方案應該係點？謝謝你

龔成老師︰

我地做財富增值，係要建立一個有不同優質資產的組合，除了股票，物業都係其中之一。

以你現時情況，由於現時資金較少，應先利用優質股去增值一筆財富，再買入物業。但同時間，必需留有一定數量的股票，作增值之用。

而這物業可以放租，用「以租養樓」架模式去運作。較詳細方法，你可以睇我本<5年買樓4步曲>。

你現時持股，主要有2大問題。首先，農行（1288）、建行（0939）、交行（3288）和中移動（0941）只係收息股，增長力好一般，不宜用來增值之用。

另外，你組合好集中係銀行股。記住，個別行業唔好佔組合3成以上，否則會有過度集中風險。

我建議你用「平穏增長股」 + 「潛力股」作組合，你可以慢慢將部份收息股，換至以下股票。

現在你每月5成儲蓄，去做月供，其餘先儲起，用一邊月供一邊儲蓄的策略。

大市現處於合理水平，那50萬資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21219：

Hi 龔sir你好
我今年35歲 穩定職業
想每月供$5000落金沙、阿里、小米或比亞迪
是但兩隻可以嗎？
邊隻會前景好d?

龔成老師︰

4隻股票都係有質素，但我地做配置時候，都要考慮平貴、年紀等因素，去決定成個組合。

以你35歲計，建議你用「平穏增長股」 + 「潛力股」的組合，比例大約各一半。

現時比亞迪（1211）略貴，回到$120才可以月供。

金沙（1928）係「平穏增長股」，而另外阿里（9988）和小米（1810）係「潛力股」，你可以在當中2選1，去創建你月供組合。

現時大市只在合理區，每月儲蓄不要盡用。你要留有部份，等大跌市機會出現時，用來掃貨。

------------------------------------------------

Q21220：

龔sir,你好，我今年大約35歲，現有股票如下：

788@6000股 買入$1.16
1810@1400股 買入$24.59
1922@8000股 買入$5.1

2031@2000股 買入$16.63
3067@400股 買入$17.11
3718@12000股 買入$1.28

1）想問現有股票會唔會太多？同埋有無長遠投資價值？
2）1922，2031，3718可以長遠持有嗎？
3）想問下京東健康，阿里健康同平安好醫生嘅分別？邊個比較有投資價值？同埋長遠發展
邊個比較理想？有月供價值嗎？
謝謝

龔成老師︰

1） + 2） 數量上，唔算太多，長線維持8-10隻就可以。

持股方面，銀城生活服務（1922）上市時間唔算長，不確定性較大。而澳至尊（2031）質素只係好一般，2隻都不宜持有太多。

其餘都有質素，可長線持有。

3） 京東健康（6618）、平安好醫生（1833）和阿里健康（0241）都係有質素和潛力，業務上都非常相近。

但問題係佢地是有危有機的類別，雖然業務增長好快，但這刻仍處於燒銀紙的狀態中。估值上好困難，因為無實質的盈利數據作為基礎，市場只是估估下。

質素和值博率計，平安好醫生（1833）會較為佔優。但始終有一定不確定性，因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況。

現價算合理區頂，但好波動。你可以用月供儲貨，如直接買入，就只能小注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18501-Q18520）

Q18501：

龔老師，之前睇你的post介紹陽光(00435), 佢現在的每股盈利是負數，這是甚麼意思？現在買正確嗎？

長遠來說，領展還是陽光較好呢？

龔成老師：

陽光（0435）是不差的收息股，佢的每股盈利負數，只是「物業重估」出現虧損，但這只是一個會計上的數字，並無真正現金流的減少。

我地分析房託，最重要是「長期的租金」，有租金就有收入，而房託規定要將90%的「可分派收入」作派息的，因此，我地投資者好重要是分析，長遠的租金。

房託中短期的租金一定差，但這只是影響中短期股價，而疫情影響總會過去，慢慢會好轉，因此，長遠無問題就得。

而陽光持有的物業不差，長遠仍是正面，雖然不是高增長股，但作為收息股，可以，現價仍合理。

至於領展（0823），都是有質素的房託，現價仍合理。佢會比陽光較有增長力，不過，股息率陽光就會較好。

------------------------------------------------

Q18502：

不好意思龔sir ，有個問題想問問你的，關於止蝕和溝貨

如果係高位買了一個資產，就如騰信兩年前若果450 在不懂估值時買了， 佢下跌了一整年幅度都可能有40%； 這些情況是要止蝕還是溝貨？

龔成老師︰

先講"止蝕"，我地唔應該用佢股價跌多少來衡量，咁係好錯，我地係應該用佢本質來做決定。如果企業長線質素和行業前景無變差，就算股價跌多少，我地都唔需要沽出。

反而這種下跌，造就了我們用平宜價錢，買入優質股架機會。

當出現這個拾平貨機會，我地去唔去加注，就要睇"溝貨"與"分注"這個概念。兩者聽落好相似，但實際上係完全不同。"

"溝貨"是愈跌愈入，同時不理企業質素，不理自己的原先設定金額，盲目去入。

"分注"則是「一早定好買入策略，一早定好本金總數，並以有策略的模式進行」。

所以，係而個平貨機會出現時，你預定投資騰訊（0700）架資金未用盡，就應把握機會再入貨。相反，如果預設資金已用盡，就算再平也不要加注，否則只會加大風險。

------------------------------------------------

Q18503：

老師，我今年23，現時有30000存款，試過一段時間投資股票，都輸，所以之後都想月供增值，想請教下咩組合會適合，需要點分配資金

我都有留意老師既post，都會推薦2800，但現時一手股價系一萬幾，但我又睇到你會分配$2000去供2800咁樣，系咪買碎股既意思？

而如果想學習投資股票基本，應該睇咩書先，因為老師既課堂都未能負擔到個費用。麻煩你了

龔成老師：

我所指的是「月供股票」，你要先去銀行或證券行登記先得。每月投入相同金額，買入指定某股。

比起你過往投資出現虧損，利用月供股票，有規律地累積財富，這是更好的方法。

簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

你睇《股票勝經》最適合。

------------------------------------------------

Q18504：

龔sir, 想請教你以下購買的股票是否正確，會不會太穩陣得濟？現時應該先持有現金，不再入貨嗎？

我28歲，月入2萬，每月草8000-10000，供盈富6000，現金快到9萬。

持有股票：
港鐵-41.2 @500
粵海-13.32@2000
領展-70.2@600
長建-51.5@500
中國神華-14.78@2000
金沙-32@400
中銀香港-24.1@500
盈富-25.135@1417
（合計約20萬，正在蝕2萬，即現價18萬）

龔成老師：

上述的股票，基本上都有質素的，不過全部都是「平穩增長股」，而無潛力股在其中，而你28歲，在組合上應該要有潛力股的。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮盈富（2800）$4000。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18505：

請教龔sir, 知你忙長話短說。我再一次複雜股票聖經，其中以下不明白：

股東收益=盈利+折舊攤銷-資本開支 （點解不是減折舊攤銷，折舊不就是等於要開支嗎？）

龔成老師：

因為盈利本身已經減去了折舊攤銷，而這個「股東收益」，其實是想找出一些類似現金流的概念。因此，原本是支出的折舊攤銷，是非現金流的支出，而這個「股東收益」，希望調整翻，所以會從盈利，加上一些非現金流的支出。

------------------------------------------------

Q18506：

老師您好，我媽媽剛剛60歲，月入只得一萬，四年後就退休。

我想幫她每月以$8000買些平穩增長股及收息股，讓她退休時都可以收息作為收入來源。

現時月供計劃：
$3000 盈富 (2800)
$2000 香港電訊 (6823)
$1500 港鐵 (0066)
$1500 港燈(2638)

1. 想請問您對此計劃有甚麼意見，投資比例及選擇是否合理？

2. 如果改以月供金沙或是中國移動會否更好？

3. 我原本心儀陽光房地產（435），可惜這隻股不能月供，我應該選擇繼續月供上述股票，還是每月買入一手陽光房地產更好？謝謝老師！

龔成老師：

1）「想幫她每月以$8000買些平穩增長股及收息股，讓她退休時都可以收息作為收入來源」，方向正確，不過由於距離退休時間較近，所以唔好太進取。

你的月供，無問題，可以進行。

但如果佢本身現金唔多，可能要減少少金額，等佢有一定的現金在手，這都重要的。

2）上述已是很好的計劃，不用改。

3）你可以久唔久買一手陽光（0435），例如每2、3個月。

------------------------------------------------

Q18507：

老師可否淺談近期推出的ETF產品，「2806，中國消費龍頭品牌」和「2845中國電動車」，如果我想投資中國市場，會否比「南方或安碩A50」為好呢？

因為未來國家政策指向雙循環，我覺得疫情過後，經濟慢慢增長，未來的發展路向一定會傾向以「內需，5G和新能源汽車如電動車等為主力的方向性作發展的慨念，謝謝你。

龔成老師：

ＧＸ中國消費（2806）係追蹤Ｓｏｌａｃｔｉｖｅ中國消費品牌指數ＮＴＲ之表現，見到當中都是龍頭股，我相信，不少都是中國消費龍頭品牌，及較為高端化消費的公司。

我相信長遠都會有一定的增長力，不過就比較波動。

ＧＸ中國電車（2845），這基金之投資目標為追蹤Ｓｏｌａｃｔｉｖｅ中國電動車指數ＮＴＲ之表現。這ETF能夠投資於對中國電動汽車業發展類別的公司，例如比亞迪（1211）就是成份股之一。

相信長遠會受惠於電動車發展，不過，由於行業估值現價唔平，你要慢慢分注入，或月供。

你投資這兩基金，會比「南方或安碩A50」更有潛力，但就更加波動，你要明白當中的風險。

我相信中國經濟中短期仍會波動，但在長遠睇，仍是不差的（當然不是高增長年代）。

------------------------------------------------

Q18508：

成哥，我上星期買咗3隻美股共5萬HKD（Tesla, AMC, 理想汽車，蝕緊幾千

今日抽中一手農夫山泉，我知自己性格急進，想主攻短炒但又欠乏投資眼光，求大神指點迷津

龔成老師：

我20年前，都是短炒者，技術分析者，用左幾年，輸足幾年，之後長線投資，就開始不斷賺錢。

我好後悔當時浪費左幾年去學這些分析技術，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒，反對技術分析。

只要我地細心少少去想，都會明短短炒根本賺唔到錢。長線先至係王道。

你買入的股票無問題，只是短炒有問題。

------------------------------------------------

Q18509：

成哥，我想問買樓既問題：

我自己月薪約3萬5，現金有約40萬，股票30萬，同屋企人同住屯門私樓約值5百萬， 一直有個心願想置業，改善生活質素，最好係自己投資有道買樓，唔想按屋企人層樓，話說屋企人最近有興趣搬去4小lung 昇悅居：

(1)你會建議我屋企人賣左屯門私樓買昇悅居一起住（樓換樓）？之後果20年我自己供埋個差價約2百至3百萬。

（2）還是我買屯門細單位自己多個物業第時升值再考慮買最心儀果間？

昇悅2房而家值700至800萬我現時人工唔可以供得起就，所以我一方面諗係咪結婚先係好時機買樓，同 覺得未結婚情況下就供樓

會唔會影響我future 有surplus cash 買樓……另一方面其實自己都想improve 下生活質素同屋企住好D, 供樓咪當儲錢，好彩既話升左值咪到時拎果筆同另一半合份買多樓， 咁昇悅比daddy mommy 住到老。

真心想聽下成哥既見解。

龔成老師：

你長遠的價值來說，四小龍會比屯門較有質素，長遠對你的財富會較正面。

因此，你地考慮四小龍，從財富分配上，會較好。

當然，你都要考慮你地的負擔等能力，以及你本身的需要。方案2的彈性會較高，所以都要睇翻你自己的需要，以及一些財富分配的方法，你自己覺得點樣分配最適合自己。

------------------------------------------------

Q18510：

龔老師你好，我睇完你嘅書優質潛力股已及穩健收息股二本書，但仍然唔知點決定好，我是一個單親媽媽，42歲

仔仔只有8歲，前夫不負責任沒有贍養費，而我因身體差暫時都唔可以做嘢，因有資產約200萬，所以唔可抽公屋，只能每月捱貴租

我有120萬是做咗銀行定期，約50萬想做一啲定期穩陣嘅收息股，我有386（4.25入有10000股）另778（8.75入5000股）2800 （25.36入 500股）

想請教下，以我狀況又是新手，只係想多賺點生活費，我應該買咩股會合適

另1830及1448合我買嗎？如二選一我應選邊隻會合適，另外778我應唔應該加注，另以我情況邊隻收息股會合我⋯⋯感謝龔老師指教...

龔成老師：

由於你有家庭負擔，加上無收入，所以投資要好穩陣，唔好承受大多風險。你$120萬作定期是正確的，我建議這部分唔好變。

至於餘下的資金你應該建立一個穩健組合。你投資$40萬好了，餘下資金就等機會。

現時持有的都可以持有。如果要加注，建議你加香港電訊（6823）、港燈（2638）、陽光（0435），盈富（2800）都可。

------------------------------------------------

Q18511：

龔sir，認識你原來不夠2個月，暫時已睇完《百萬富翁1-3》，《財務自由行》，你既所有youtube片及每日睇你既FB。估唔到短短時間對我既沖擊咁大，思維上影響唔少，當然我真係覺得好有道理。

我而家現狀條件非常一般，有不確定性，但由睇第一本《80後百萬富翁》，到完成剛剛所講既4本書，我竟然夠膽將我既目標放大。

由原先只希望4-5年累積到一個數目財富，到而家目標5年有自己物業，再加7年有第二個物業 (到時50歲了)。

呢啲都係從前認為不可能既事，因為樓價太貴，到而家我覺得原來「這麽遠，那麼近」，全靠你既書有清楚既參考方向。

你其中一個網友講得好啱，的確你每一本書既含金量好高，你既FB亦是，呢2個月我學咗好多野。

由於我本身條件真係好一般，我已為自己定下計劃，去逐步走向目標，包括：

- 增加投資知識 (下個月上你堂了，對呢方面興趣大增，希望學識自己釣大魚，而唔係只靠阿sir捉魚俾我地食，哈哈~)。

- 同時盡力減低開支 (我要先辛苦，後享受) 。

- 及增加額外收入 (要有突破，本身有做網上小生意作為小小副業，主力外國市場，會再發掘下更多網上機會，我相信網上潛力好大)。

希望將來有好消息同阿sir你分享！內心非常感恩認識到你！(早2年睇掌佬話我黎緊10年運會不錯，而家諗，可能因為認識到你~ 但我知阿sir唔信呢啲野，因為你相信自己~)

感謝！！！

龔成老師：

你的方向正確，你只要保持進行就得，知識、財富都要不斷累積！

你一步步行，這刻，首先完成左5年目標先，之後先想其他再之後的目標。

你最重要是保持動力，香港人最弱的就是這部分，第一下好有火，之後就無左，所以，你都要想方法去保持動力。

加油！下個月股票班見！

------------------------------------------------

Q18512：

老師，我月供緊7千，供左2年：

0066港鐵 HKD2000
0823領展HKD2000
2800盈富 HKD3000

最近股市下跌，想大手入買入
請問該什麼價位購入？

龔成老師：

首先，上述的月供，可以保持，你長期進行就得。

如果你現金多，可以等跌多少少大手。港鐵（0066）$33可大手。領展（0823）$55，盈富（2800）$23大手。你預這些價開始平。

當然，如果到時跌到這些位，都要分析翻大市的發生甚麼事，決定入市的力度與留現金多少。

------------------------------------------------

Q18513：

老師，想搵你做少少人生規劃建議..

本人33歲，做part-time ,平均月入$10000草唔到錢...17歲有理財觀念

「股票」
#386 @5.04/28000
#3690 平均買入價@145/200
#823 @75/400
#981 @30/600
#1928 @30

「物業」
市價$430萬樓，現收租回報7里，剩餘還款額80萬左右，另有同家人夾份唐樓湯樓 （我夾$30萬現我果份升值到$90萬，回報10里）

預期1年多另一層供斷既樓可套現$200萬

手頭現金剩餘$60萬左右

請問如何利用資金同搵錢能力係7-10年間滾至$5000萬？生意？工作？

有什麼可有效又成功率高去達成 ，如果賣樓套現又怕日後要再比稅，唔賣又未必有太大資金攪生意，非常感謝老師

老師既人生大目標是什麼可否分享下？除了投資同股票會令資產幾倍升值還有其他方法嗎？

龔成老師：

你33歲，其實擁有的資產不差，不過收入方面較弱，我相信這年齡仍可以做到好多野，你可以想方法提高收入，令你可投資金額增加，相信之後的財富累積會更加理想。

如果你的目標是$5000萬，最好就是做生意，你如果打工做兼職，根本無用，你一定要利用生意，又或投資，又或其他創富方法。

用盡你的時間，去建立一盤生意，我相信你與你家人都有這方面的頭腦的，你可以盡力花時間在這方面。

你初期唔需要投資太多資金，只需要投入時間，到見到生意有增長，是一盤可發展的生意，到時先投資較多資金。

另外，你現時的持股，基本上無問題，都是有質素的，你可以長線。而之後的選股，應該加強潛力股部分，當然，你都要同時提高你的投資實力。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18514：

請問中國銀行$3.25 入了三萬股，現可再入溝淡嗎？
煤氣$14.85 入了萬二股，現又可溝淡嗎？

293 國泰又值唔值得買，咩價買呢
謝謝

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

至於中行（3988）是否加注，不是「你想拉低平均買入價」，而是你想這股佔你組合比例多少。這是收息股，質素不差，但增長力不強，現價合理。

至於煤氣（0003），道理都是一樣，這股有質素，但增長力比過往減少左，不過長遠仍有投資價值。

國泰（0293）的質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。

------------------------------------------------

Q18515：

龔老師， 感謝你的分享，最近follow 你的page讓我對股票略有概念， 亦十分認同你的投資模式!!

我30歲，想進取投資但卻又一竅不通， 多年來只持有939 (平均價6.6).

最近一年持有005 (平均價 44).
睇完你的page, 想跟你的提議買希慎和維達， 現在入合適嗎？

另外 比亞迪都想買, 什麼價位會比較好? 還有沒有其他股票都適合我呢？ 感謝回覆!

另外又想買D 2800 來收息。
唔計已有的939 和005

我打算投資多200K, 請問點分佈好？
Thanks a lot for your kindly help.

龔成老師：

你30歲，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

另外，你持有的銀行股，都只是收息股，因此未必太適合你。

希慎（0014）和維達（3331）會較適合你，希慎現價合理，可以入。維達合理區中上部，分注都得。

至於比亞迪（1211）$7X會較好。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：華夏恆生科技ETF（3088）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金（暫時要留$10萬現金），而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18516：

因為之前就有d誤信左兩個大行既報告目標價,搞到過左賣出價之後個股就跌左唔少,有時都唔明佢個目標價定到咁高做乜。

龔sir 依家美國總統換左人,你會唔會重新估算一下一d中美相關既股票? 畢竟拜登既對華政策好似無特郎普咁強硬,中美相關既股會唔會有機會有更大既上升空間 ?

但我早前入左少少2333長汽,佢有新能源概念但前10個月銷售不太好,洗唔洗換馬去175 好少少? 我都係睇長線,不過175都升左好多,我覺得現價有少少貴。

最近嗰隻831利亞派特別息,我入左一手,因為我都係覺得佢特別息好高,所以想入一兩手。

其實係咪唔應該貪圖佢呢d特別息,但我自己有分析過831,ok店係佢最高收入既一個來源,但佢依家賣左,現金流係好左好多,但係佢無左其中一個賺錢既來源，長遠係咪應該要睇下佢有無其他收購計劃? 我自己係咁諗。

依家都開始睇你出嗰本(年報勝經),從基本面開始學,龔sir你買左股票之後會唔會日日都睇下個市? 定只係一兩日先睇一睇？

龔成老師：

大行報告，最重要是「資訊」，「意見」就不要太著重，當參考下就算。

我自己睇大行報告，要睇佢估值的基礎，這些預測是否可信，就能推算佢計出的目標價是否可信。

至於中美，會有利好的，但要具體先可以知道點樣調整，這刻唔會有具體答案。

我地是重要分析，仍是企業的本質。

長城汽車（2333）都有質素的，你持有都可以。我地分析時，唔好太著重中短期因素，要睇長遠的企業發展。

利亞零售（0831）出售香港「ＯＫ便利店」業務，作價２７﹒９億元現金，交易完成後，擬向股東派發特
別現金股息每股３﹒８５元。利亞零售預期出售收益約２９億元。

利亞零售表示，便利店業務主要以密集運營模式服務香港市場，並且由於其覆蓋之產品種類繁多，因此涉及相對龐大的物流營運設置以及供應鏈基礎設施。

另一方面，剩餘集團的品牌（聖安娜、Ｍｏｎ　ｃｈｅｒ和Ｚｏｆｆ），其實都適合利用互聯網及線上平台，對中等收入客戶群更具吸引力，並且更少依賴物流設置以及供應鏈基礎設施。

但始終賣左資產後，發展只是一般，同埋之後好睇佢資金的運用情況，現價合理區中上部，投資價值只是中等。

要留意，唔好只貪佢特別息，派息後股價會除淨，自然下跌翻，而特別息只有一次，之後唔會有的。

我買股票後，可以一個月唔睇股價，我持有比亞迪（1211）12年，根本好多短期因素，完全唔洗理，你愈集中短期因素，愈難賺大錢。

------------------------------------------------

Q18517：

龔老師你好。想請教有咩股票組合會比較適合我？
我呢家23歲，岩岩出黎做野有穩定入。

現時free cash $400K, 收入約$15K 平均每月儲蓄$7K。
目標28歲前財富增值至$2M。

我最近先開始接觸股票市場，個人認為自己風險取向偏高同心理質素都經得起考驗。

希望老師你可以推薦一些適合我既投資組合同埋未來既選股方向。Thanks!

想補多句 打算每月供＄3000 [2800], $1000 [0027], $1000 [6823], 會適合我嗎？

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你投資經驗不多，所以唔好太進取，同時，你唔好投資太多資金，暫時$10萬先，留多少少現金。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：華夏恆生科技ETF（3088）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

至於你打算月供的3隻股，都有質素的，但香港電訊（6823）只是收息股，因此可考慮其他。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18518：

成哥，想講多謝你，2018上你堂開始月供投資比亞迪，變成我第一隻倍升股，想問過左100蚊會唔會過熱，諗緊放1/3攞尼買領展/長建/金沙

龔成老師：

太好了！

比亞迪（1211）的貨你可持有，賣部分是可以的。可以停一停月供。

資金可以供你上述的3股，無問題。

------------------------------------------------

Q18519：

老師，小弟調整月供組合後,月供$7000下調為$6000

2800 $2000
66 $ 2000
788 $ 2000

剩餘$1000的，等1211/恒指科技ETF回落後先月供

•25歲
•月入20k
•月儲現金5k(已扣除月供股票)
•持有現金$85000
•持有股票$200000

(1) 現金股票比例大約3:7
係咪唔應該加注？現金太少嗎？

（2） 呢兩個月都要睇牙醫，預算$20000內，月供需要減少嗎？

（3）等待恒生科技etf回落後，月供科技etf會否比1211/2388更加好？

（4）等178/1257升返上去，到時再換第二隻股，可以嗎？

（5） 本身持有066，入手270/0002會唔理想嗎？

龔成老師：

1）合理，現時的大市平貴，你預持有3-5成現金適合。

2）唔需要，因為金額不算高。

3）因為月供是一個長期策略，有時唔算太貴，都可以進行，月供科技etf，$1000，已經可以開始。

4）可以。

5）可以，但唔建議太多，因為增長力不算強，你要睇翻自己的投資組合比例與目標。

------------------------------------------------

Q18520：

你好 一直有留意你fb
之前其實都問過你 我有負債問題 點樣可以重新開始？
求下你比啲意見

我做sales，收入唔穩定，
一般$15000-$18000，
月光族，因誤信網上投資騙案，所以有卡數同貸款問題供晒款都無錢剩

卡數只能還minpay,
唔想家人擔心，
有諗過借錢再投資，
定申請破產/債務舒緩

龔成老師：

第一，唔好申請破產。

第二，睇翻卡數而家的實際年利率，如果太高，就要處理左佢。

你可以去銀行，做私人貸款，目的是還卡數，雖然無解決到問題，但就可以幫你減少利息成本。同時，你可以拉長翻個還款期，等自己有空間，無咁大壓力。

你唔好做投資，這刻處理左負債先，理財要一步步，你太急反而仲危險。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。