[絕無劇透] 評《天能》 - 資訊轟炸塞到窒息 科幻包裝特務電影 鬼哥喺入場之前，睇過無數影評，當時已經知道《天能》嘅故事將會好難明。結果一如所料，就算訓足精神，全程集中，最終都只能夠明白大概8成。 電影推進非常急促，劇情同逆時嘅概念無間斷向觀眾腦袋狂塞，場境同場境之間差不多完全緊接，缺乏抖氣位令大腦消化不能。其實順逆時概念並唔複雜，但係當畫面上不斷有新資訊要觀眾吸收，但又唔俾時間我定期整理一下，觀眾漸漸跟唔上，就會開始放棄。 其實Nolan應該一早深知，拍呢類撚時間題材，「科幻概念/劇本交待/劇情導遊」之間三者關係嘅拿捏，將會係觀眾跟唔跟得上, aka能唔能夠投入，嘅關鍵中的關鍵。睇番《鄧寇克大行動》, 《星際啟示錄》, 甚至《凶心人》, 鬼哥夠膽講Nolan今次算係大失手。導演能夠駕馭劇情復雜如《死亡魔法》，取得完美嘅平衡，今次《天能》喺呢方面確係令一眾Nolan迷大失所望。 不過，逆轉時間確實呈現咗唔少充滿視覺衝擊嘅新鮮感。槍戰、飛車、打鬥等場面，加入咗逆時元素之後，畫面好玩過癮得嚟話晒都未見識過。加上製作夠晒級數，場面拍得火爆有力。唔怪得咁多影評將天能同占士邦片比較，話佢根本係一部特務電影。 人物刻劃係《天能》嘅另一個敗筆。幾位主角背景性格單薄，動機同目的欠缺有力嘅誘因，比起《死亡魔法》兩位主角執迷做一哥嘅惡鬥，或者《星際啟示錄》入面主角為咗出征太空離棄女兒嘅遺憾，《天能》只係一個任務為大大，不惜一切手段嘅任務執行故事，缺少咗Nolan其實好拿手，令人揪心嘅感情投資。 演員方面要特別一提主角約翰大衛華盛頓。呢位前美式欖球職業選手，動作場面演得非常精彩，一拳一腳充滿狠勁，就連一跑一跳，動作感覺利落，甚有效率。另外，佢講對白嘅時候，無論口音、表情、身體語言等，眉宇間都隱約見到佢老豆丹素華盛頓嘅影子。對於丹素粉嘅鬼哥嚟講，係一個另類欣賞呢部戲嘅角度。 至於其他演員，因為受制於劇本，感覺就略嫌平板乏味。喺呢個框架下，新蝙蝠俠Robert Pattinson算係演得最有味道。佢係唯一一位成功將複雜嘅劇情融入演出嘅演員，每一個場口都睇得出佢有用心消化角色當時嘅處境同心理狀態。加上佢介乎「看透」與「未知」之間嗰種煞有介事，衰衰嘅演譯，令佢成為全片最charm(ing)嘅角色。 配樂同音效方面，《天能》都能夠保持一貫嘅高水準。打鬥、槍戰、飛車等場面嘅音效質感紮實，充滿臨場感。配樂緊張緊湊，效果有型兼硬淨。尤其電影下半部份，聽得出導演巧妙地用咗節奏感強烈嘅逆向配樂，喺緊張時刻用觀眾聽唔慣嘅音樂模式衝擊聽覺，大大增加場面嘅不安感，好玩得嚟非常有型。 整體嚟講，《天能》故事太複雜，同時無視觀眾理解進度，投入度稍低。好在製作規模夠大又有心機，動作精彩配樂有型，係一部娛樂性豐富，以科幻包裝嘅特務電影。 鬼哥俾69分。 #天能 #Tenet #Nolan #鄧寇克大行動 #凶心人 #星際啟示錄 #死亡魔法