【龔成問答信箱】（Q22561-Q22680）

Q22561：

想請教如何分析物業是否有質素？是否從地點上分析？我手頭上兩個物業，一個在西營盤港鐵站附近，另一個在馬鞍山港鐵站附近，附近也有幾個大型商場和公園。

西營盤的樓齡比較高，而馬鞍山是新樓接近十年樓齡。

是否港島區的樓一定會比新界、九龍的樓優質呢？

謝謝！

龔成老師︰

最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

另外，你再要審視其升值潛力，未來地區上、交通上、生活等等的配套發展，才去下一個結論。

一般而言，港島區樓係會相關較有價值，因為長線土地供應有限，而且又有中環這個主要商區存在，會較睇高一線。

但當然，我地都要再仔細分析，持有物業有無其他優勢或問題。

西營盤始終算係接近中環一帶，地理上會有一定優勢，加上你近港鐵站，係加分位。而且將來明日大嶼計劃中，如果將有道路連接西環地區，都係一個潛力所在。

但由於你物業有一定樓齡、維修保養會係有一個考量。另外，較高樓齡的物業，按揭年期都會較短，有機會令新投資者郤步。

至於馬鞍山，同樣近港鐵站係加分位，加上港鐵站附近生活配套都較完善，都會令投資價值提升。

近年屯馬線通車﹐進一步令交通完善，有利於居民進出東九和中環這2個商區，故都有一定投資價值。

------------------------------------------------

Q22562：

點睇1022飛魚科技

我高價買，而家蝕左好多

龔成老師：

如果從過往的業務情況，飛魚科技（1022）質素不太好。業務不穩，持續虧損，投資價值不高。

之前得到騰訊（0700）入股，往後會提高企業價值，潛力度高左，但由於仍有未知數，業務不能推算一定成功。只可以話，不宜持貨太多。

------------------------------------------------

Q22563：

騰訊比高位跌唔少，已經無質素？

龔成老師：

騰訊（0700）仍有質素。但受政策因素影響，中短期弱，企業的賺錢能力會略減，以及企業估值都會略減，不過，政策影響未到核心性，無令到企業無法賺錢，只是賺錢減少。

這企業長遠仍有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績理想，又身處長遠有增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。不過，政策會令其賺錢能力減，不過，長遠騰訊仍找到賺錢方法，簡單來說，就是現時定了新的遊戲規則，而企業要時間去適應，中短期賺錢能力減，但長遠會慢慢好轉。

現價合理區中間，分注或月供可以。

------------------------------------------------

Q22564：

老師，想問如想長缐收息，中銀香港同工行比較，怎樣選擇？工行現價好似持續偏低，是否比中銀香港更抵買，或買了工行會否賺息蝕價？

龔成老師：

兩隻都是不差的優質股，而中銀香港（2388）在長遠發展及增長力上，會略好。

中銀香港（2388）係本地銀行股裡面，是較有質素的一隻，有長線投資價值。

不過，整個銀行業的賺錢模式已有減弱，無以前咁好賺，之後主力是收息及平穩增長模式。現價合理。

至於工行（1398），其實本身質素都不差，有一定的規模，在全球都有網絡，本身不會無質素的。

不過，這股增長力不算強，只是一隻收息股，現價投資可以，因為在合理價，但唔好對股價有太大期望。

同時，佢前景算是不過不失，中短期會因中國經濟有影響，銀行業的賺錢能力不及從前，加上壞賬因素，都會令佢中短期弱。不過，初步已好轉，但不是高增長型。

而長遠，會慢慢穩定的，不過，增長力不強。

------------------------------------------------

Q22565：

老師，我買了6666恆大物業，這股票急速下降，我7.x買現在跌到@@

是否應該加倉，我知道這股有一定質素，想問老師現在應怎麽操作、持有股份不多，大概6000股，感激！

龔成老師：

我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

恒大物業（6666）算是恆大系裡，較高質素的一隻。不過，現時整個系都有風險，要小心，小心。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務。

由於始終有風險，只建議你小注持有，原有貨就守，但不要加注，你預佢上落都大。

------------------------------------------------

Q22566：

老師，我最近考慮買居居自位，但20年後 居屋樓齡已達50年。

下手買家無法做9成按揭 只能做8成

市場範圍狹窄也不用怕嗎？

龔成老師：

居屋有自住價值，但始終投資價值，會比私樓差少少。但我相信，不會大幅貶值，日後賣出仍可。

但你首先應以自住角度去想，如果有自住需要，買居屋後每月可省去一些現金流，就算日後的售價不及私樓，只要能在這段時間，利用節省現金流的數目去進行投資，只要投資滾大到一定的財富，其實已經做到財富增長的效果，因此無問題。

------------------------------------------------

Q22567：

龔sir你好。我之前買左楓葉教育（1317）和睿見教育（6068）諗住作長期投資，前者買入價為1.87，後者為4.3。請問兩者既買入價，算不算是合理價

我見現在中央對教育行業既規管加強左好多，特別係K12教育呢方面，有人說直頭毀滅左呢個板塊。

學生想問下，現時既楓葉教育和睿見教育既本質是不是已經完全改變了？還有沒有投資價值呢😅學生我現在應該繼續持有好還是止蝕好

謝謝老師

龔成老師：

由於教育政策大方向是收緊，因此，建議減部分。但這兩股，又未去到劣質，因此，你餘下部分守都可以。

楓葉教育（1317）不是無質素的，但教育類股票增長力比過往減慢，加上政策因素，成為不確定性，始終市場都會擔心之後不少有甚麼政策。

佢的賺錢能力，確的有影響。

睇翻近幾年，教育行業的政策，中國政府都偏向收緊，無論在學費收費上及發展上。

由於市場擔心企業之後的增長力，令這股的股價較弱。

睿見（6068）都有類似情況。

始終政策風險難估，因此唔建議持有太多。

------------------------------------------------

Q22568：

老師你說的2845，現時價位合理嗎？現價每月逐步買入儲貨是嗎？

謝謝你！期待你來澳門教班

龔成老師：

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q22569：

請教老師有沒有其他具較增長力股票可推介？

龔成老師：

可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、比亞迪（1211）、中生製藥（1177）、三星FANG ETF（2814），如果有投資美股可考慮QQQ。

但就要明白波動性比一般的平穩增長股高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q22570：

龔sir，你真係好勁，$14x叫人可以開始留意比亞迪，講完無耐真係開始升返！

當時因為我手上吉利佔我股票比例都算重，所以無買到同樣係車股的比亞迪，其實係咪應該轉股？

龔成老師：

其實這是大量分析的結果，無人能預測到股價走勢，但我地會分析企業質素，叫投資者多留意某一類股票。

同時，會盡力計算企業的價值，去分析投資值博率。

雖然比亞迪（1211）的長遠增長力會好過吉利（0175），但現價你將吉利轉去比亞迪，投資值博率又唔算好高，因此，你保持原有的狀態。

其實吉利本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

------------------------------------------------

Q22571：

老師，想問下你對銀娛的睇法，之前澳門有確診，股價下跌，係咪入市時機？謝謝你

龔成老師：

銀河娛樂（0027）可以分注。

佢中短期會弱，加上全球疫情反覆，都對佢有不利影響，不過，相信這只是中短期，以長遠的角度分析，企業仍是有質素的。

在正常的經營環境分析，佢持有的資產好有質素，行業本身好賺，雖然疫情略有反覆，但全球疫情最壞的情況，相信已過。

但由於仍有未知數，加上之前虧損，因此將企業估值調低左。

現水平在大約在合理區中下部分，如果本身有貨，可長線，耐心持有就得，如果無貨，現價已經可以分注，但都要留現金。投資貨要有心理準備，中短期會弱，要長線，企業有長線投資的價值。

------------------------------------------------

Q22572：

龔 sir. 不明白你的問題。但我可簡述自己資料。我在台灣工作，零售管理，約100店，80-90k salary. 冇樓，

期待樓價回在港物色麗醫城供家人住慳租，只是以前經歷負資產，嚇怕了。剛申請IB account, 想找穩健ETF or ReIT 儲錢。

只係個人睇法覺得個市好狂，直覺有挺大調整，所以資金在過去一年都沒有動用。

龔成老師︰

我地唔好去用"感覺"或者"估"個市架走勢，我地要客觀分析，用企業價值，去判斷個大市平貴水平。

現時大市只在合理區，未算貴，不少優質股依然有投資價值。

若你不想選股，相直接投資一些ETF或者REIT，以下都是一些合適選擇，你可以參考下。

潛力股︰安碩恒生科技(3067)、ＧＸ中國電車基金（2845）、三星FANG ETF（2814）、QQQ

平穏增值股︰盈富（2800）、VOO、領展(0823)

收息股︰置富（0778）、陽光（0435）、收息基金(3110)

以你48歲年紀，最好以平穏增長股，作為組合主力。潛力股風險較高，不宜佔高於組合2成。而收息股增長力不算高，適量就可以。

現時大市只係合理水平，現金佔比重大約3-5成。餘下資金，就等大跌市出現，才加大力度掃貨。

------------------------------------------------

Q22573：

我29歲. 潛力股 將阿里巴巴 資金轉小米同其他板塊可唔可以？

9988 馬雲減持股 對公司業務有冇影響. 我怕返唔到我201

龔成老師︰

阿里(9988)近期受大市氣氛和中央政策等因素影響，有較明顯下滑。但本身企業有質素，相信會慢慢適應新政策，令業務重回正軌。

但你預佢中短期會較波動，馬雲減持，跟企業質素無關，長線投資價值依然存在。長線要回到$201，相信係可以。

雖然阿里隻股票無問題，但問題是佢佔你組合太大心重，接近一半。因此，你必需沽出部份，轉至其他股票去平衡風險。

小米(1810)係一個選擇，但現價偏貴，要回多1,2成才合理。而且佢同是科技股，單一行業唔好佔組合3成以上，否則都會有問題。

不少平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)、QQQ勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22574：

700,9988 股價都好差

想問收息股有什麼比較好

龔成老師︰

不要太著重短期股價，要睇長遠企業價值。

阿里(9988)和騰訊（0700）近期受大市氣氛和中央政策等因素影響，令股價大幅回調。但佢地本身係有質素，相信會慢慢適應新政策，令業務重回正軌。

但你預佢地中短期會較波動，長線投資價值依然存在。

至於收息股，你可以參考以下幾隻。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

若你係較年青，收息股就未必適合持有太多。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

------------------------------------------------

Q22575：

謝謝老師意見，但3067喺HSBC冇得供。如改為:金沙, 港鐵，港交所，中生製藥各$2000, 剩低的$2000儲現金，這樣好嗎？

其實我都唔知2800供到幾多為之夠，但以現在情況睇，就佔我的持股比例中最多。

還是把剩下來的$2000分別加大港交所及港鐵各$1000，這樣安排會否好啲？

龔成老師︰

3067每一手唔貴，你直接每個月自己買一手，咁就可以。

盈富(2800)是包括58間質素不錯上市公司股票的組合，由於佢唔係單一企業，就算佔組合幾大比重，其實都無問題。

但由於你比較年青，只有24歲，全部用晒盈富(2800)，個組合變相有少少保守。

因此，我建議你長遠計，盈富(2800)最多佔5成。餘下資金，你可以分散去供上述5隻股票。

現時大市只在合理區，每月儲蓄唔好盡用。最好留有部份，等大跌市出現時，可以用來掃貨。

------------------------------------------------

Q22576：

投資年金同埋股票 ETF 基金有咩分別？

目標係買千萬既樓 可以點做？

龔成老師︰

"年金"，純粹為你提供現金流收入，唔會有增值能力，主要係適合退休人士。

如果你係為增值買樓，就應選擇有增長力的ETF。

ETF都分好多種，有對應不同指數(如盈富2800 - 恆指 / VOO - 標普500指數)、不同行業(3067 - 科技股)、特定目的(3110 - 收息股份)等等。

而你選擇的，就是一些有質素的增長型ETF，例如盈富2800、安碩恒生科技(3067)、VOO、QQQ等等，都可以考慮。

但你要先了解這些股票，才好入市。當中QQQ和3067風險會較高，你要自己衡量。

------------------------------------------------

Q22577：

感謝大師百忙之中抽空回覆我這位投資小白，之前因有朋友分享了大師您對小米的睇法（24進取小倉、20-22加碼）

當時覺得30蚊的小米根本無可能跌咁低，自己高追後跌到27蚊就割了，然後其仍跌跌不休，仲見到20蚊。但現在看回去又對大師對小米的完整投資計劃很精準，心感敬佩

另因小弟係澳門人，無法參與大師您的課程。實言未來也只能白漂大師您的投資策略。但大師您一直慷慨解囊，深知大師為大好人，在此祝願大師在港股賺到家財萬貫！幸福美滿！

龔成老師︰

多謝你的支持，其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

另外，你可以睇我架《80後百萬富翁》、《財務自由行》和《股票勝經》，都適合初學者。

緊記，我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

------------------------------------------------

Q22578：

老師你好，我現在上緊你的進階班！內容非常豐富！報左你初班及進階班係我今年做得其中一個最好的決定。我今次都係想問番隻788，中國鐵塔。

問題一：
係損益表入面，折舊及攤銷佔左營運開支入面好大部份，係分析時將它除去是否正確？

2020年報除去後的數字變化：
年度利潤（百萬人民幣）：6427》53942
ROE：3.45%》28.96%
純利率：7.92%》66.51%

調查後的ROE及純利率好似有少少誇張地好！係唔係正常？

問題二：
佢營業額5年複合增長大約7.69%，若減去折舊就變成大約14.29%。純利就27.03%（不計2016年，基數太細）。收入及純利近年都有少少減慢情況。

我應該用7.69%，14.29%定還是27.03%去總結鐵塔既複合增長率呢？

問題三：
另一方面，兩翼業務增長好強勁，特別係能源經營業務，最近出新聞指係換電網點係市場佔有率超過50%，鐵塔公司亦宣報同華為數字能源、比亞迪弗迪電池、百度智能雲、郵儲銀行等多家簽署協議。

能源經營業務對收入潛力會唔會加多d分？同埋呢方面的發展應該唔會比三大電訊商好似租塔咁樣壓制？

問題四：
我的持倉
1448（18.4%）
1177（17.5%）
788（17.1%）
3918（11.4%）
968（10.3%）
9988（9.4%）
1810（8.4%）
2318（5.6%）
1211（1.9%）

我今年就27，我真係好想做個倉平均回報有15%甚至係以上，我明白我潛力股佔左好大部份，我願意承受高風險！我會利用多d時間跟進持有股票的情況去平衡番集中風險。

我考慮緊將唔將鐵塔換馬去其他股票，暫時想等到有合理/平位再加去1810/1211，令組合回報更加有潛力！

鐵塔表面睇佢年增長做唔到15%，但佢新業務潛力好似很不錯，我唔知自己係唔係過份睇好788，佢未調整roe及純利率，負債比率等等雖然呢刻普通，

但我見佢5年中都係每年有慢慢改善中。我好掙扎究竟應唔應該留佢係我組合，謝謝老師見

龔成老師︰

1) 其實你唔洗特別去扣除這個數字，因為我地做估值時，都會同時審視經營現金流。這部份係會將折舊及攤銷加回去，以反映企業實際有多少資金係入帳。

因此，只要折舊及攤銷數字係合理，唔係有好大變動，咁就可以。

2) 如果你係用市場比較法，即係市盈率去做估值，你應該直接用營業額和純利個增長去做參考。去解佢有無增長之餘，佢賺錢能力，有無唔同到。

若以中國鐵塔(0788)計，你發現佢整體純利增長，係優於營業額增長，就可以大致估計到佢賺錢能力高左。但當然都要睇埋細節，當中有無其他問題。

但若果你係用現金流折現法，你就要在盈利之上，加回折舊及攤銷，並扣除資本開支去計算。(如果你覺得太複雜，同樣直接用盈利作參考，都可以。)

3) 會係利好，但會有多利好，暫時係未知之數。係能源部份，由於這些客戶並非完全壟斷市場，也非其大股東，故相對被壓價壓力較細。

但你要明白，現時能源相關收入，佔集團比重好少。就算利好，中短期對盈利相信唔會有太大影響，故不會特別去加分。但這部份暫時發展算正面，可以留意。

4) 中國鐵塔（0788）不是無質素的，但增長力係弱左，算係水桶1至2之間。如果你願意承受較高風險，將部份換至小米(1810)和比亞迪(1211)係可以。

但小米(1810)要回多1,2成才開始合理，而比亞迪(1211)係貴，就算月供都要回到近$200才可以考慮，而直接入的話，最好等回到$140以下。

另外，你要明白現時組合，係好進取。雖然潛力股增長潛力較大，但唔代表你最終回報，一定會係最高。

因為佢地發展係符合預期，回報上當然無問題。但如果佢地發展未如理想，就會有較大調整。所以，你要明白高風險，唔一定係有高回報。

係配置組合時，你明白這個風險，才作選股考量。

------------------------------------------------

Q22579：

碳中和有咩股票推介

龔成老師︰

你可以考慮一些跟綠色能源相關企業，例如信義光學(0968)、福萊特玻璃(6865)等。

但佢地現價唔平，前者要回多1,2成，才開始合理。後者更要有好明顯回調，才好考慮開始小注。

如果你無特別睇好邊隻企業，純粹係睇好行業發展，你可以考慮GX中國潔能（2809），其目標為追蹤SOLACTIVE中國清潔能源指數NTR之表現。

當中佔最多為"半導體產品與設備"股份，約組合4成，其次是逾2成的"獨立電力及可再生電力"。

此股平貴不易分析，而且頭10大股份中，除了信義光能（0968）外，其餘都在內地上市。

潛力度是有的，但會比較波動，現價在合理區頂至略貴，如投資宜要慢慢分注，可長線。

------------------------------------------------

Q22580：

你好老師，一直持有的中生製藥價位一直下跌，請問你點睇呢隻股票的前景？

另外，現在現金持有約50萬，計劃在3年內增至90萬- 100萬，每月的人工大約2.5 K，在投資上應該怎樣計劃呢？感謝老師。

龔成老師︰

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

近期由於大市氣氛較弱，加上中央政策等不明朗因素，都令佢股價受壓。但暫時唔見佢長線質素，有明顯轉差，這股可以照長線持有的。

以你目標，可以選擇一些「平穩增值股」+「潛力股」作投資目標。

一般我地預期投資有增長力優質股，年增長約10-15%。要做到你的目標，除了50萬本金外，建議你每月投入$10000預算，去做月供增值。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$5000)，另一半就先儲起架策略。

若你投資知識不高，因此可較集中在平穩增長類股，至於潛力股，只宜小小注。

大市現處於合理水平，那50萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

同時你要明白，3年唔係一個好長時間(一般建議最少5年以上)，就算再優質股票，都有機會出現價值波動，影響你最終回報，你要知道有這個風險存在。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21381-Q21400）

Q21381：

龔Sir 你好！ 請問如何計算企業價值呢？

700 騰訊為例，用NAV (778M/9.6bn no. of share)去睇，2020 佢只值八十幾蚊人仔，化返做HKD 都係一百蚊左右。

而家股價$600, 係咪當中包括左好多市場情緒同對未來憧憬既估算？想請教你通常點去量化。 感謝

龔成老師︰

你上述所講的價值，只是企業的「資產價值」，這是衡量企業平貴的其中一個方向，但絕對不是唯一的方向，同時，並不是所有企業都適用的。

在些企業，其資產價值與盈利能力、長遠發展未必有太大的關係，市場會較著重企業的長遠發展力，多於擁有多少資產。

簡單來說，有些資產有一定的市場價值，有些資產無太大的市場價值。有些企業長遠的發展及盈利與資產有一定的相關性，有些企業則無太大相關性，有基本的資產後，長遠的發展較受大環境影響，而不是有多少資產。

騰訊(0700)偏向係潛力股類，市場會著重將來，而不單是過去資產，同時會著重其業務價值。

至於點去計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21382：

老師現年48歲，月入4萬8，想每月投資2萬

有一層做咗400萬按揭嘅樓，已租出，租金可cover 每月銀行還款。

有現金50萬
冇股票（因曾輸過）

有保險基金單50萬
想5年後移民，想喺呢幾年做進取嘅投資！睇咗你嘅資料，但遲遲未決定到點入手！

銀行職只又不時想我買保險產品！
請問有咩建議？

龔成老師︰

我地進行理財，應說建立一個平衡的組合，你現時有物業、保險基金、現金，但就缺少了股票，因此應該增加翻股票。

你過往投資失利，相信是由於未了解股票最基本原理，只要你往後明白，投資股票就是持有優質企業，長線持有等企業成長，就得。同時，要建立平衡組合，不是賺差價。

另外，你話「想5年後移民，想喺呢幾年做進取嘅投資」，要留意，財不入急門，加上5年時間不算長，反而不能過度進取。

以你現時情況，我建議你以「平穏增長股」 去創造一個增值平台，在這5年為你的財富增值。

現在你每月先用5成儲蓄，即$10000做月供。其餘先儲起，用一邊月供一邊儲蓄的策略。

月供方面，你可以選擇投資這些平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

大市現處於合理水平，那50萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

到你將要移民的一年前，再慢慢沽出手上持股套現，就可以。但唔好到要走個一刻才一次過沽貨，咁樣會令股價波動性風險大大提高。

至於"保險"只係理財中防守部份，買足夠保障就可以，增值可以留比優質資產(如優質股、物業等)去做，個效率會較好。

你現時那份保險基金單，可以睇翻基金的投資策略，所投資的資產類別、投資策略、風險程度、市場、以及過往的表現(可以睇佢過往5-10年，只回報係比主要投資市場高，就可以考慮繼續投資)。

------------------------------------------------

Q21383：

Hello 龔sir!我現有大概HKD3百萬現金及數百萬股票。

一個人租樓住（租每月HKD20K），無小朋友，考慮3 年內退休，其實應唔應該再考慮買樓自住（死後層樓冇用）？

如買樓就無晒現金同要賣股票了(50 歲,就退休好難做按揭)，變咗3年後唔夠錢退休。。。

繼續租又好似好唔安穩因為租金會一路升，同業主可能會收樓...矛盾中 (退咗休會想讀吓書，所以都有不少洗費)

龔成老師：

以你的情況，租樓會較好，第一，你現時做按揭未必做到，因此去唔翻現在的生活質素，第二，你無後人，因此投資物業的誘因會減少左。第三，買樓後會用盡資金，反而風險提高左。

租樓雖然較好，但坦白講，每月$2萬的租金，長遠都會對你有一定的生活壓力，所以，可能要轉一些較平租的地方。

如果利用$300萬，投資不同的工具，收息股、低風險基金、年金、債券等，建立一個組合，如果能平均有5%現金流回報，$300萬即是每月收息$12500，都算是可以幫你提高現金流。

當然，你到時可以再利用手頭上的股票，進行配置，調整一下，如果持有一些現金流強的類別，就可以增加你到時的現金流。

你要思考一下長期的收入及支出情況，是否要調整生活質素，又或要日後想方法增加收入，或略為延遲退休。

------------------------------------------------

Q21384：

我大學嗰時讀嘅Investment，好似無乜用。

龔成老師：

大學課程，其實我都有讀過「財務系」，坦白講，學校教的是學術，我會認為有基本作用，但睇巴菲特相關書，以及年報，會有用得多。

------------------------------------------------

Q21385：

我想問阿sir，睇youtube聽講你以前未價值投資法時，試過儲一筆錢又蝕左佢，儲一筆又蝕左。

其實，因為我剛剛炒衍生工具蝕光了投資户口的錢，一陣約見了心理醫生了，想問下你當年總共蝕左幾多錢？

同埋蝕左幾多次，可以分享下你的心路歷程嗎？

我蝕左本金十萬，還有14萬儲起在家人到，以前都試過買牛熊證蝕曬錢，所以無將所有錢拿去投資

因為以前蝕曬錢，所以好幾年吾再投資，今年2月入返市，你都知呢排跌市，一買就蝕，實在無法子，又買返衍生工具，結果賺13萬，但後來又蝕返，想追又一直蝕，最後 total lose

睇醫生是因為炒牛熊證心理承受吾住了，需要求醫，好後悔買返衍生工具，但跌市蝕自己又控制吾住

龔成老師：

我20年前，都是短炒者，投機，玩幾年，輸足幾年，當年未算好有錢，相信蝕$10萬左右（其實唔記得），但當年已是全部身價，應該話輸左幾次身家。

之後我明白，衍生工具原本發行商食水好深，散戶只有做水魚，所以，我決定以為唔玩衍生工具。之後只做優質股，長線投資，就開始不斷賺錢。

我之後做銀行同證券行，見大部分輸錢的客，都是偏向短炒、玩衍生工具的！

當然，你問我有無人贏錢，是有的。但就我觀察，長線投資贏錢的人，比短炒的較多。

你這類人，我在過往做銀行時見唔少，因為玩衍生工具輸身家，所以，點解我現時，不斷強調再強調，不要短炒。要買優質股長線持有！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特都是反對短炒的，佢都唔用技術分析。

因此，我相信長線投資，是真正助我地贏錢的方法。

我建議你倍止所有衍生工具投資，你現時同賭錢無分別！

之後，慢慢儲現金，月供一些穩健的股票，或ETF，例如盈富（2800）、高息基金（3110），我相信是適合你的。

------------------------------------------------

Q21386：

龔成老師你好,多謝您一直鼓勵我地要投資理財,同時經常比正面的信念我地,實在感恩, 自從留意你FACEBOOK後

本人33, 由2019年開始投資,開始時都有小小升調,但最近大部份買入的股票都回落,現時股票價值同入的資金差不多,之前跣時用了大部份資金,現時手持現金好小,

以下是我的股票組合,希望你能給予意見應該如何調配, 感恩

2800 @ 25.82 4000股
3067 @18.52 4700股
1038 @53.72 1600股
0066 @43.95 1706股
1177 @7.21 2800 股

3033 @ 8.005 1600 股
1810 @26.65 400 股
3188 @52.6 200 股
1038/3067 虧得最多,是否需要減持,謝謝

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

股票中短期上落好正常的，不用太過理會，睇「企業長期質素」就得。

現時你的組合，都是有質素的，可以持有。但我見比例上，潛力股類別開始有點多，你要注意翻，因為這類股的風險較高，股價上落會較大，因此在比例上不能太過多。

長建（1038）是不錯的企業，有一定規模，資產亦有一定質素，並擁有相當充足的現金，而過往的發展亦很理想，能平穩發展及再投資的回報亦不算差，而開拓新業務亦能平衡當中的風險回報，整體有相當的質素。不過，規模大，國家保護資產，都令這企業增長力有所減弱。

長建有不少歐洲及英國業務，脫歐因素、歐洲經濟較弱難免對其造成影響，反而，脫歐情況明朗化會更有利企業，可說是最壞情況已過，之後將會慢慢向好。

其實長建近年仍不斷進行投資，但由於歐洲業務較弱，令股價並沒有顯現，但只要歐洲情況慢慢好轉，當中的資產價值就會更有效反映。

不過，歐洲的經濟，總不能用「強」去形容，所以長建並不是高增長類，只是最弱時期相信已過，往後會平穩向上。但回勇之路，仍然較長。

另外，由於企業已有一定規模，加上作風穩健，發展的速度不會太快，但平穩增長則無問題，手持的現金相信會逐漸收購其他海外業務。

是收息及平穩增長類，現價是合理的。你持有就得。

至於安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你一定要睇長線，不要太著重短期股價，同時由於現價仍唔平，所以如想加注，一定要慢慢分注。

最後，如果你現時持有現金比例太多，就不要投資住，儲下現金先。

------------------------------------------------

Q21387：

龔成, 您好! 手上持有渣打2888 兩年 - 500 股 @HK$54唔係好多, 見派息不好, 又沒甚麼特別消息.......是否應該放晒佢呢? 謝謝 (私人回覆OK)

龔成老師：

渣打集團（2888）質素只是一般。

雖然未到劣質，但質素不高，但本地銀行股中，賺錢能力算是較弱。加上銀行業近年的環境不及過往，賺錢能力不及以前咁好，相信佢之後，都只是好基本增長，不要對股價有太多期望。

投資價值只是一般，我會建議考慮其他更有質素的銀行股仲好。

因此，你可以考慮部分或全部，轉其他。

------------------------------------------------

Q21388：

您好！現時手上有800股1928(金沙)於$32時買入，現考慮趁行業復甦前增持。

不過看過它2020年剛出爐的年報，它的年末現金由2019年的24億美金，大跌至8.6億；這個數字比起它的流動負責14.1億還要少。

一直以來您都看好澳門博彩股，但面對現時的情況，自己對它變得有所保留，甚至企業本身「捱唔住」。請問您認為這個想法是否恰當？

龔成老師：

上述的情況，會令風險度略有提高，因此會少少扣分，但未至於對佢有倒閉影響。

第一，佢規模好大，品牌、資產、現金流強，要在市場進行集資，好易。

第二，佢負債比率未算好高，要再問銀行借貸，有好多空間。

第三，佢持有的酒店等資產好有價值，如果真的經營環境差，要賣出套現救企業，絕對可以。

第四，佢本身現金流好強，只要澳門好翻少少，佢都有一定的現金流，不斷有資金翻。因此，唔需要太過擔心。

------------------------------------------------

Q21389：

龔sir你好。Follow左你好耐，亦上過你堂，好遺憾無早啲認識你。

之前有買1211，但因為唔夠耐性錯過左佢爆升時間，之後16左右買吉利升左一倍都無放。

因為唔想再錯過，而家佢跌到得$20左右，請問你覺得吉利前景如何？值得再長揸嗎？謝謝

龔成老師︰

記住，我地投資優質股，一定會係長線。因為賣出股票最大的風險，就是買唔翻。

不少人會以為「若果現在賣出 到時再以低價買入」，中間可以賺到個波幅。

但「到時再以低價買入」？真的一定會預期中發生嗎？？？

就好似我經常說，700多年不斷上升，388升100倍。如果我地升少少就沽貨，而唔係用質素，去決定是否持有，我地就無可能賺到近100倍回報。。

所以，你現時長線持有吉利(0175)係正確。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂位，股價波動，現貨可長線。如果現價入貨，小注都得。

------------------------------------------------

Q21390：

老師你好，一直遵從你的指導每月將資金一半用來月供，另一半用來儲現金等大跌時入貨。

由於不知道等到何時大市才大跌，可能一等就半年甚至一年或更長時間，就覺得把這筆現金放在銀行的回報率太低了。

請問老師有沒有推薦的現金替代品，可以令這筆現金可以比放在銀行有更高的回報？謝謝！

龔成老師︰

無錯，我地唔會知道下一個大跌市，係何會出現，可能係1,2年後，但同時間可能就是下一天。

因此，我地最理想係持有現金去等待，因為現金流動性最高。

若你將這筆資金，用來買了其他理財產品，要贖回可能需要些時間，甚至會被收取一定的提早贖回費用。

而用來先買部份較穏定的股票(如收息股)，我都唔建議，因為再穏定的股票都有波動性，到時會跟隨大市下跌，以你可投入資金減少。

所以，我建議你都係持有現金最好，最多可以將部份用作短期定期。我地投資唔好睇太中短期，要用整個組合的長線發展機會，去做考慮，因此用現金等待，會係較理想的做法。

------------------------------------------------

Q21391：

龔Sir您好，我夫妻倆在澳門從事教育工作

對於投資沒有太多觀念之前都是拿錢給長輩在國內買樓買車位。

1. 去年疫情開始後股票大跌後，開始學買股票，我該如何學起？

2. 該從你的哪本書看起？

3. 之前做過一些短炒確實賺到錢，但是現在回頭看若當時沒賣掉那些股票的話現在賺更多，現在決心要開始好好學理財放長線。

我現在這組合可以嗎？會不會太保守還是太高風險？

4. 我該繼續專心供一隻還是先分散幾隻建立好組合後再慢慢提高持有比例？

夫妻倆32歲 未有子女
夫妻倆年收入：約110萬hk

現有流動現金約: 20萬
儲蓄險：40萬
(今年剛繳完2025年後開始拿利息)

國內放租樓盤：廣州2樓、中山1樓、中山3車位
(租金拿來當作給長輩的家用，全部以交清貸款)

固定支出：
在澳租樓(11000HK)
兩人保險每年約:10萬hk
年收入至少15~20%捐給慈善機構
無負債

之前
每月供 5000
00066 港鐵 或 00388 港交所

現在打算每月拿8000出來月供股票

00270粵海 或00066 港鐵 $2000 2選1
00087 太古股份公司Ｂ或 港交所 $3000 2選1
9988 阿里巴巴、 00175 吉利汽車、01211 比亞迪$3000 3選1

現有股票 組合總值約16萬HK。組合總表現： 約+7%
分配如下

00066 港鐵@45.172 18.9%
00388 港交所@406.930 19.4%
00694 北京首都機場@5.240 7.28%
00883 中國海洋石油$7.648 10.02%
01398 工商銀行@5.240 3.32%

02588 中銀航空租賃@60.9 8.67%
02800 盈富@24.2 17.6%
00270粵海投資@12.240 2.4%
01810 小米集團 @28.109 12.33%

龔成老師︰

1) 就初學者而言，你要加強吸收知識，多閱讀理財類別的工具書，以及多接觸財經新聞，而進修相關課程亦是重要的知識來源。

另一問題是價格，初學者未能捕捉股價的高低，所以，策略上宜用分注買入的方法，將一注資金分成多注，然後在不同的價位分別買入，這樣就可避免一次過在高位買入的風險。

2) 你可以先睇我寫架"80後百萬富翁"、"財務自由行"和"股票勝經"，都適合初學者。之後，才看我其餘9本書。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

3) 正確，優質股的確係長線持有，才會有最理想的增值效果。

我地做財富增值，除左講增值能力外，也要注重成個組合的平衡性，當中要包含不同的優質資產(如物業、優質股等)。

你現時組合，明顯係偏重左係物業類，未來要增加優質股的投入，去令組合平衡翻。

而"保險"只係理財中防守部份，買足夠保障就可以，增值可以留比優質資產(如優質股、物業等)去做。現時供完的保險可以不變，但未來唔好投放太多資金在儲蓄類保險產品。

我先講你現時持股組合，北京首都機場股份（0694）、中銀航空租賃（2588）和中海油(0883)本身都有質素的，但只屬中等，不宜持有太多，暫時唔好再加注。

另外，我地組合唔好太偏重係個別企業或者行T%，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

你現時有個別股票，港鐵(0066)和港交所(0388)係超過這個比重，但由於佢地好優質，所以唔需要沽出，只要暫時不要加注，讓新資金慢慢調節就可以。

但盈富(2800)係一個包含55間不同行業的股票組合，故不受15%所限。

新月供組合方面，你可以用粵海(0270)，因港鐵(0066)已有一定貨。再加港交所(0388)，而餘下3隻，阿里巴巴(9988)會係3隻中波動性較低，如果你想進取D，可選另外2隻。

但現時比亞迪(1211)偏貴，不宜做月供。你可以用吉利(0175)或GX中國電車（2845）代替。2845這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

另外，我建議你加入一隻盈富(2800)，用佢做主力，可以令你個組合平衡性高D。

你現時用於月供金額，相對你們收入比例唔算高。以你年紀，應盡力做好財富增值，盡可能將閒錢，都放在投資計劃上會較好。

現時大市只在合理區，每月儲蓄宜先用一半去做月供。餘下一半和20萬就等大跌市機會，才入市。

4) 我地唔好成個組合，只集中係1,2隻股票身上。(當然，盈富除外。)

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21392：

老師，我今年32歲，有兩個小朋友，家庭每月收入30K，持有下列股份。

想問個倉比例合唔合適？有無邊隻唔應該再等？要唔要減持？

如果想睇你啲書，你推薦先睇邊本？
多謝！

9988阿里巴巴248 @300
9618京東集團327 @200
3888金山軟件60 @1000
0285比亞迪電子52.6 @1000
0327百富環球8.2 @4000

0880澳博控股9.8 @5000
3988中國銀行2.9 @120000
0914海螺水泥50 @2000
1530三生制藥7.55 @5000

龔成老師︰

我地係創建一個財富組合時，最重要係有優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

現時你持股中，三生製藥（1530）和百富環球（0327）質素算係中等，不宜持有太多。

安徽海螺（0914）佔組合比例開始多，不宜再加注。

另外，我地個組合唔係可太偏重於個別行業或企業，相同行業不可佔組合多於3成，而單一企業不要高過15%。

你現時中行(3988)明顯係佔比過重，而且此股主要用來收下息，唔會有太高增長力。以你32歲計﹐此股太保守，你應先做好增值部份。

因此，你可以慢慢將此股，換碼至其他較有增長力的優質股。

其餘股票都有質素，長線持有就可以。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21393：

龔Sir,我啲股票比較高位買入，家陣坐晒艇，想你幫忙睇睇

9988，均價285
1810，均價29.27
1833，均價116.7
1024，1手價291（250入見穿左240即斬，導致均價升到呢個位)

除左快手之前想短炒（但依家都變長揸），其他一直都打算長揸或再加注。

龔成老師︰

現時你全部股票都在虧損狀態，好明顯你投資方法上，出現左核心性的問題。

首先，記住我地投資係長線持有優質股，而唔係做短炒，去賺差價。

見你不少股票都是較高位買入，相信你較易受市場氣氛影響，同時你由於未有企業估值能力，因此在貴的價位買位。

這些股票雖然帳面值係虧損，但有質素，你可以守。但若個別股票，係佔組合比重好多，就要沽出部份去平衡風險。

建議你在再投資前，先學好正確的財富增值理念，和投資相關知識。你可以睇我寫架"80後百萬富翁"、"財務自由行"和"股票勝經"，都適合你這類初學者。

就算學好，在經驗較淺時期，我都建議你先用月供，或分注的投資策略。等你真正有企業估值能力後，先一手手買，會較好。

------------------------------------------------

Q21394：

龔sir 我而家20歲 Year2

兩年前喺Facebook見到你，努力儲咗兩年錢，今年開始Value Investing。

目前持倉
$70.45 一手領展
$44 一手港鐵
$26.5 一手2388中銀
$7.43 一手置富
$5.41 一手工商銀行

1. 想請問可唔可以比少少意見我嘅portfolio

2.同埋港鐵公佈業務去年虧蝕。現價會否太貴？ 我需要換股嗎？

龔成老師︰

1) 你現時持有股票，都係值得長線持有。

但我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，以你現年20歲計，你組合持股有少少保守。置富(0778)和工行(1398)主要係用來收息，增長力麻麻。你現時應先著力增值部份，故這類收息股就唔係咁適合你。現貨可持有，但不要加注了。

將來，你可以加入一些潛力股，去提升組合增長力。例如中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

但由於潛力股有一定波動性，你投資經驗較淺，暫時不宜持有太多，大約3成好了。到你累積到較多經驗，才慢慢將比重提升至5成。

同時，現時大市只在合理區，資金唔好盡用。最好留有部份，等大跌市出現時，可以用來掃貨。

2) 我地去分析一間企業時，要用「長線」質素和發展去考量，唔係只係集中係1,2年數字。

上年由於疫情關係，對不少企業都造成嚴重的負面影響，港鐵(0066)也不能幸免。

但上年度佢虧損的主要原因，係因為物業重估數字，這只是一個會計上的數字。如果扣除這個因素，其實佢在營運上，是有錢賺的。

但睇翻佢長線，有質素。佢是全港唯一的鐵路營運商，加上政府會比佢地產方面的優勢。長遠正面。

雖然近年有不利因素，影響了中短期盈利，雖然會扣分，但最核心的本質不變。

睇翻資料，港鐵過往正常年份，一年可以賺$160億，就算扣除物業重估，都有過百億，當中包括了鐵路經營部分，以及物業的發展、物業的租金收入。基本上，每年都過百億的。

物業發展部分，長線正面，收租部分，無問題。

因此，長遠發展仍是正面的，可長線持有。現價大約在合理區中上部，未算貴。但由於你有貨係手，如果想加注，要等佢回多1成以上，才出手會較好。

------------------------------------------------

Q21395：

老師你好， 因為不經意 在facebook 發現你， follow你 一段時間也有購買你的書籍， 對我不善理財的人， 實在獲益不少！

因為最近工作 非常艱苦 應該很快失業， 我先生已經因為身體問題，去年年尾已經失業！

所以希望用手上的現金資本，向你請教適合的投資方向。

以下是我的 財務背景， 請你多多指教!

本人50歲 ，目前仍然有Part-time工作， 但因為全球因疫情影響經濟，公司業績非常差。我應該估計會在兩個月內失業, 基於經濟問題及身體狀況，應該再有工作機會。

丈夫56歲 因為身體健康問題，2020年尾被迫退休

沒有子女

目前有資產如下:

1. 4個物業(1個自住，2個放租私樓及1個工厦放租)
所有物業合共市值 HK$2300萬

4個物業合共尚欠銀行貸款 HK$750萬
租金扣除每個月銀行供款差餉管理費及物業稅 (包括自住物業在內)剩餘HK$3600.00

2. 已經投資基金 (高風險 )$80萬
每月派息HK$3600.00

3.股票
過往20年投資股票,已經很有耐性等待，持有股票回報欠佳,種種原因，輸了很多錢 ！

因為近1年看 你facebook 和你的書本 所以決定賣了已經持有十多年 的股票， 希望重新再計劃好 ，才重新買股票作遠投資 。

目前手上只持有:
2638*5000
1038*1000
2800*1000

4.現金:HK$200萬
因為手上持有四個物業 ，仍然有銀行掛鉤存款，大概1.3%
即每月利息合共有HK$1500元

希望 保留100萬現金作為日常全活備用金

5. 人壽及各項醫療保險(所有共2人):HK$10,000.00

6.月供高風險基金: HK$5000*10年(2020尾開始供)

7.日常家庭支出:HK$20,000.00( 不包括保險和月供股票及基金)

8.投資目標:
希望利用手上200萬現金，投資股票，作為未來十年退休日常生活費。

若是中途此現金投資回報不夠支付10年生活開支， 五年後可以，減持基金換取現金 作生活費 或提取 保單內的 儲蓄 價值 昨日常生活費。

估計10後,我先生可以提取mpf大約有HK$150萬( 因為目前有接近100萬) ,希望盡量減慢賣物業資產的日期， 以作日後長遠生活開支。

9. 由現在至未來十年投資計劃-銀行月供基金:

月供費用HK$20000.00

目標 計劃月供股票分配組合內容:
1.2800盈富*$6000(30%)
2.2638港燈*$4000(20%)
3.1038 長江基建*$4000(20%)或1113長實， 請提供意見 二選一 ，那一隻較可取？
4.3140 領航標普500*$3000(15%)
4.3067 安碩科技*$3000(15%)

計劃年期: 3-5年(最少36月=HK$720,000.00)

拜託你提供意見，直接評價，我們目前的財務組合 是否恰當作為長遠退休計劃安排？

感謝你經常分享你的經驗和意見
期待你的回覆

龔成老師︰

以你和你先生的情況，由於未來就業收入不確定性較高，加上你們都較接近退休之齡，投資策略唔可以太進取。

你現時物業算係有正現金流，可持有。但考慮到若不幸有部份物業不能出租，會出現額外開支。

另外，你在整個財富組合中，太過集中物業類資產，因此在之後的財富配置，不要再增加物業類的比例，而之後亦未必適合投資太多地產相關類的股票。

係你成個財富配置上面，我地會保守少少。你係投資前，先儲下一筆最少等同半年開支的應急錢，會較理想。

而所講的高風險基金，雖然以派息率計，尚算可以。但你要了解這部份回報是否保證，而當中又有什麼風險，背後是投資什麼股票、債券或工具，你要了解清楚。

例如債券，佢是否投資的都是A級債券。唔好投資一些高收益債券，其實這些是一些評級不高的垃圾債券，風險不少。

至於現有持股可以，但佔整個財富組合比重太少。現時太偏重左係物業類，未來你要加大翻股票部份，令成個組合健康。

月供組合方面，盈富(2800)和港燈(2638)係可以，而長建(1038)和長實(1113)，我會建議你用1038，佢主要係投資一些公用事業，相對較穏陣，而且派息都理想。

而領航標普(3140)和安碩科技(3067)就波動性較高，以你現時情況，我唔係太建議你用。同時3140將會退市。

你可以在以下的「平穩增值股」+「收息股」去選擇。「平穩增值股」有平穏增長力，加若干股息。而「收息股」則主要係收息，無乜增長力，但波動性較低，會較穏陣。

但緊記，隨著年齡增加，慢慢要增加收息股的比例，去減少波動性風險。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

現時大市只在合理區，資金唔好盡用。最好留有部份，等大跌市出現時，可以用來掃貨。

若然你在月供中途不幸失業，可以先停一停月供都無問題。所有投資的大前題，都係用閒錢。如果資金係用於日常生活或一些短期的必需性開支，就不要動用。要先確保好基本生活，才可以進一步做財富增值。

------------------------------------------------

Q21396：

龔成老師，本人27歲，文職工作，月入約$17000，現在想讀兼讀制大學（外國大學提供的課程，讀商業和英文的範疇，但在香港讀，有資歷架構QFlevel5,今年9月開學，學費共$12萬，讀兩年）

本人現持六萬現金，諗住半工讀。想讀大學的主要原因是增值自己英文的程度，同埋希望有張沙紙多點自信有多點保障。

但又擔心冇咩錢投資，因為要交學費同埋應該會少時間學投資（本人初學，只投資過債券），加上，27歲才開始讀又好似好遲又唔知讀唔讀得黎。

好迷惘，想請教老師意見，會否覺得我應該全副心機集中儲錢同學習財務知識/還是覺得值得一試去讀？先讀一個學期試下？

大學學歷是否很重要？
謝謝！

龔成老師︰

其實學習係無分年紀，但最重要係，這個學習所得到的，是否對你長線發展，係有實際的正面影響。

例如你現時工作的行業，要升職加薪係好需要一紙較高學歷的證書。或者課程當中某些知識，對你將來發展有好大幫助，你都可以考慮進修。

相反，如果你係純粹感覺有張紙會增加安全感，或者你是抱著"人有我有"心態"，我就有保留。你要先認清楚，這個大學課程是實質上，還是心理上幫助你。

另外，如果想增值英文，其實有好多方法，未必一定要上課程。而學習財務知識和報課程係無衝突，你係可以2者並行。

你自已先認清個情況，再決定這些錢，是進修，還是投資。

若然投資，你應該買入一些有質素的優質股，把握在年輕時，累積一筆較理想財富。債券增長力有限，不太建議你用。

------------------------------------------------

Q21397：

你好，我是新讀者，看見板面內容後，真係增長好多股票知識。謝謝你的無施分享。

本人43歲，有2個小朋友，同丈夫供緊層樓。之前貪快，已經係0175，3800，0788虧錢離場。

現手上有貨
2138 ：6000股
2333 ：1000股
0788 ：20000股 （1.27入）
3333 ：2000股 (22.3入）

請問這個股票組合適合嗎？想放棄3333 改入1516，3988適合嗎？

或是直接入你提議嘅3067（安碩恒生科技）好？
感謝你的意見。

龔成老師︰

記住，不要用自己的買入價作為何時沽出的指標。坊間經常用買入價作為何時沽出的標指，這是極度錯誤的。

沽出是基於這股已偏貴，又或沒有前景，質素有問題，而絕非由買入價決定。

因此，若你分析該企業的前景一般，才可沽出。

你已沽出的3隻股票，除了保利協鑫能源(3800)質素一般，其餘吉利(0175)和中國鐵塔（0788）都係有質素，你係應該長線持有。

現有持股方面，香港醫思醫療集團（2138）都有質素的。不過業務中短期會有少少波動，除非你現時現金好充裕，否則我建議你沽出部份，去平衡一下你的風險。

至於，中國恒大（3333）業務本身不算差，但中央有時會出打擊樓市政策，加上佢本身負債極高（這是最大問題，風險太高），相信會對佢有一定的影響。

你預佢中短期都會波動，你現時小注持有，都算勉強可以，但都要明白風險。

融創服務（1516）有質素的，主要在中國提供物業管理服務及增值服務。

財務數據唔差，生意與盈利增長快，現金流強，整體正面，這股有長線投資價值。不過，現價貴，如投資，真的小注好了。

而中行(3988)而價合理，但佢主要係用來收息，唔會有太高增長力。以你年紀，這類股票只宜小注。

安碩恒生科技(3067)都有質素，佢係追蹤包含恆生科技股指數，有投資價值。

但留意你上述股票(除了中行3988)，普遍波動性風險都係較高。我地創造一個財富增值組合時，最重要係平衡性，唔可以偏些係一些波動性高股票。

以你43歲，都可以投資安碩恒生科技(3067)這類潛力股。但若果你投資經驗不多，或者較年長，比例就不宜太多。

同時組合上，應加入一些平穏增長股，並以之作為主力。這類股票波動性無咁高，但有平穏增長能，可以令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

------------------------------------------------

Q21398：

Hi 老師，你好，想請教你，買咗以下股票，可以比一些意見嗎？

同睇到你post 又想月供，我39歲，月糧$19,000每月可儲$2000,如果月供可揀什麼？謝謝

778
$9.09 @2000
$8.92 @3000

11
$177.9 @400

1928
$44.55 @1200
$42.5 @800

9988
$285 ,$254.4 各1@ 100

1833
$117 @100

6820
$3.78 @8000

2400
$97,$90.4,$67.8 各1手

1918
$35.95 @1000

6088
$3.18 @6000

1024
$306,$283.6 各1手

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你39歲，應先以增值為主。你現時買股票，都質素。

但當中，融創中國（1918）業務不差，有規模、品牌、銷售網絡，但同時有一定風險。

首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但要明白背後的風險，自己要控制好注碼。

IT HON TENG（6088）質素中等，雖然都有投資價值，但企業不是最高質之列，因為企業的賺錢能力始終唔算好強，每件產品賺錢唔多。

同時業績有回落情況，不過，這股始終不是無質素，現貨可持有，但暫時不宜再加注。

我發現你主要問題不在於選股，而是手上不少股票的買入價跟現價都有相當距離。雖然部分可以守，但你要預起碼等一段較長時間。

其實你的情況，都是不少投資新手會犯的錯。第一、買入當炒股；第二、在市況最旺（即是最多人認為市場好景的時候）以最貴的價位買入。

其實這些問題，係可以避免。方法其實好簡單，就是投資較穩健的股票，又或是盈富基金（2800），分注買入，例如透過月供股票方式，每月買些少，會是較好的策略。

所以，你暫時最好先用月供去投資，每月可以用$1500供盈富(2800)，餘下資金就儲起，等大跌市機會。

另外，你組合波動性股票係佔較多(1024, 6820, 9988, 1833, 1918)，故你長遠要加入大盈富(2800)比重或加一些平穏增長股，令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

此期間，你要努力學習投資知識，要學好如何選擇優質股，點為股票定平貴。這些技巧，對你長線投資增值，係十分有幫助。

------------------------------------------------

Q21399：

你好，請問2352，順豐怎樣看

龔成老師︰

順豐控股 (002352.SZ)為內地快遞物流綜合服務的提供商，主要提供倉儲管理、銷售預測、大數據分析和結算管理等綜合物流服務。

此股有質素，集團在內地有領先規模。在電商近年高速發展下，集團長遠發展正面。

但此股現價不平，過往佢股票波動都比較大。此股有水資價值，但現時值博率唔算高，同時要控制注碼。

------------------------------------------------

Q21400：

龔成老師，請問1088 是穩陣的收息股嗎？見今年派息over 10%, 派息比率是100%

謝謝！

龔成老師︰

中國神華(1088)佢始終有一定規模，但政策不是好支持行業，的確會對佢有影響，但已經在股價反映左。

另外，由於佢地的產品自主力較弱，因此不算好高質。

所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。

所以整體來講，這股不算差，但又不算非常好，唔好對股價有太大的期望。

如果是收息的，都可以。但留意佢派息會跟隨利潤，而有所變動。因此，就唔建議太大注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19041-Q19060）

Q19041：

你好，請教你怎樣看美團及京東？ 前255買入 後309，都是小注， 應該繼續持有，還是止賺呢？

龔成老師：

這兩股都有質素，長遠的發展不錯，可以長線持有的，但你有心理準備，股價會好波動。

美團點評（3690）有潛力的，佢之前出左業績，見到開始有正現金流，這是一個實質的利好因素，因為之前一直在燒銀紙，現時初步見到成效，市場對佢重新估值。

當然，現時仍有不確定性，估值唔易。

只可以話，潛力是有的，現價唔算平，但不是完全無投資價值，不過，一定不能大注。

京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。同時，根據《財富》按收入統計的全球500強排行榜，集團是中國最大的零售集團。

佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域，其中核心業務為：零售、數位科技、物流、技術服務四大板塊。

京東已建立自己營運覆蓋全中國的物流基礎設施，以支持電商業務，打造了線上購物體驗，係2017年、2018年、2019年，活躍用戶數達到了2.9億、3.0億、3.6億。可見已建立了一個巨大的網絡。

佢經營線上零售，以及電商平台業務，線上零售業務方面，從供應商購買產品，然後直接銷售給客戶，並從24,000多家供應商採購商品。

佢的物流基礎設施佈局覆蓋了中國幾乎所有的區縣，包括遍佈89個城市、累計總建築面積約1,690萬平方米的700多個倉庫，包括京東物流技術開放平台所管理的倉庫面積。

過往的財務數據，收入每年都是20%左右增長，2019年收入為5700億人民幣，已經有實質的盈利，2019年盈利為120億，初步以此推算，股價並不算平。當然，這股有一定的增長力，之後的市盈率會減。

從質素上，這股不差的，但估值上就不算平，持貨要控制注碼。這股可以長線投資的。

------------------------------------------------

Q19042：

你好 龔成老師 ！ 想問下關於樓換樓既問題！我同另一半於幾年前以3百幾萬買左現在居住既單位，
而家單位已經升到630-650萬 。

我地都有意想換樓，目標係想換青衣站上蓋既2房單位。

但都至少要8百幾萬，而我地流動資金亦唔夠比首期。請問係呢個情況下，你有什麼建議

龔成老師︰

幾個方法，第一，先沽出現有物業去取得首期，中間有機會要租屋，變相增加換屋成本。此期間，新物業也可能會出現變數，如貴左、已出售等。

第二個方法，若你想先取得首期，用先買後沽。但你現時唔夠資金，因此要同加按方法，但較進取，同埋有可能會在罰息期賣出要罰錢，因此唔太建議。

先加按，套現一筆錢去做首期，但你要考慮自己還款能力。同時增加了之後按揭的難度。

因為你同時持有2個物業，係做按揭時會用2套房去計。你要確保有足夠收入，過度銀行審批和壓力測試。

另外，由於係第二套房，你要預繳15%「雙倍印花稅」，都會令買樓資金需求增加。（但如果在一年內賣出原有物業，政府會退翻）。

第三個方法，你地將現有物業拆名，然後加按，再用另一人名去買新物業，但就要計清楚數，這方法太進取，所以都唔太建議。

所以，第一個方法較可行，先賣出，後買入，只要買賣中間的時間差唔太長，就無問題。如果計過數資金都唔足夠首期或供樓，就累積多D財富先，遲少少先進行計劃。

------------------------------------------------

Q19043：

你好老師, 我係你舊生, 上完你堂獲益良多, 係選股/估值/心態都feel到自己係有進步. 而家基本上日日坐車, 放LUNCH, 放工返屋企就係上網睇資訊,溫你D NOTES, 睇書(最近睇完非常潛力股&選股戰略, 而家睇緊證券分析)

同睇年報. 身家準備踏入第2個一百萬(都可能因為最近股市很瘋狂吧, 但係第二個一百真係比第一個快好多)

但我而家暫時放低左個市, 升得太多了, 個個朋友係咁買買買. 我暫時目標係40歲1000萬, 仲有13年時間

而家等報你下次進階班，記得你講過大約下年年中，係週末班，希望到時再見。同埋你介紹個價值網都幾好用，比左一年最高級個plan。

龔成老師：

你的心態好正確，你無受朋友影響，同時保持溫書進步，我相信你在40歲有$1000萬是可以的！

該網不差的，我成日都覺得，最重是睇「價值」，唔好太著重「價格」。

加油，你的方向好正確，相信財富會以更快速增值。

2021年中，預期會開進階班的星期六班，到時見！

------------------------------------------------

Q19044：

多謝老師 好詳盡 我最近都有開始睇樓 主要係荃灣/大角嘴區 老師你介唔介意我問埋如果我target 500萬左右物業

我投資大約100萬去物業 會唔會太過進取 身邊好多人話年輕人要keep 多D cash係身

龔成老師：

荃灣/大角嘴區，都是不差的地區，有長線投資的價值。

如果你本身承受到風險，你用$100萬買物業，可以的，不過，你要考慮按揭方面是否順利，這是最大的風險，所以買樓時唔好去得太盡，本身都要有資金剩。

同時買樓最重要是「供得起」，樓價升跌未必是最重點，但「供得起」就好重要。

------------------------------------------------

Q19045：

龔sir你好，睇咗你兩本書，突然有個啟發想做，唔知可唔可行，想你比d意見

我本身住緊居屋，仲有大約一百萬未供完，物業估價約500萬，如果以一般銀行借貸（不是轉按/加手按，能否借到約二百萬？

因為我有個諗法，想用其中一百萬去供斷個物業，然後再用另外一百萬做一d比較穩陣嘅投資，如高息定期， 或買高息藍籌股。

想請問這個方法可取嗎？
謝謝解答

龔成老師：

最重要是計算「息率」「回報率」。

你用一般的銀行借貸，通常都會較高息率（當然你要問清楚），如果銀行借貸息率高過按息，這就無意思。

相反，如果銀行借貸息率好低，用作還按息，就可以。

至於部分投資收息股，不是不可，但都要注意。

第一要睇「息差」，例如借的息為「2%」，之後將資金投資收息股，約收「5%」的股息，息差為「+3%」。這的確過了第一關。

第二關，就是虧損的可能，股價是會升跌的，若然買入後股價下跌，你就會出現「賺息蝕價」的情況，那計劃就會得不償失。

當我地進行上述模式時，要好大程度確保價格上不會損失，將「賺息蝕價」的可能性減少。

收息股平貴度算是中等，都可以考慮，但就不是最好的時機，你要明白仍有「賺息蝕價」的風險。自己衡量。

另外，當你借銀行借貸，還按揭及買收息股，你的還款模式改變左，你要明白翻新還款模式是否適合自己。

------------------------------------------------

Q19046：

亞sir，想問下如果想移民定居英國
香港有一物業 我應該出租當被動收入

還是賣出 因為是村屋租金回報少於3厘 而且都有維修同其他雜費 在英國要處理相對困難

用賣出的錢做一個債券股票的投資會不會更易管理
我很希望可以離港前上進階班
物業已經供完

龔成老師：

如果物業村屋及要維修，我會建議賣出，始終你到時在英國，要睇住該香港物業有點難，因此賣出轉其他資產更好。

資金可以投資股票，平穩增長股及收息股都得，債券都可視為組合的其中一部分，再加一定的現金。到你在當地安定好後，可以再調整。

我應該會在2021年中開星期六的進階班。

------------------------------------------------

Q19047：

你好龔sir,
唔好意思問題較多,希望老師可以幫下我.(唔急)

背景:
小弟今年28歲,月入3萬,每月可存2萬.
現金20萬,股票40萬
當中30萬是收息股
10萬其他股
270 @12.24 2手
788 @2.16 10手
823 @67 2手
1038 @45 1手
(所有股票連同利息帳面上蝕了10%左右)

1) 問題
1)a) 想問問你的書籍中哪些適合新手看?書本的建議閱讀順序是?
1)b) 看過老師的書如股票勝經/選股勝經 是2018年年中出的,幾時會出新一版?會唔會夠Update?
1)c) 如果想報名老師的課堂,睇左邊幾本書先會好D?
1)d) 想知道您係點計個股票合理區/邊本書會提及?
1)e) 股票/現金的比例是? at least keep現金夠用6個月開支?

2)收息股
2)a) 因為年初時才留意到老師的fanspage,想問下你的本人持有的收息股有什麼建議?(已經無再入貨,銀行股居多)

3)增長股
3)a)當中788 由上市初高位買入後到現在接近無左一半,可以長線持有嗎?
3)b) 想問下你的本人持有的增長股有什麼建議?
3)c) 恆基 的合理價位是?
3)d) 港交所 的合理價位是?
3)e) 粵海 的合理價位是?
3)f) 領展 的合理價位是?
3)g) 希慎 的合理價位是?
3)h) 中生 的合理價位是?
3)i) 舜宇光學 的合理價位是?

4)月供
4)a) 盈富 /潛力股/平穏增長股 既建議入市比例係?
4)b) 潛力股有哪幾隻較合適月供同現價適合入市嗎?

thanks.

龔成老師：

1A）你可首先睇：

《80後百萬富翁》
《股票勝經》
《財務自由行》

之後再睇其他。

B）通常一年更新一次，但這兩本書，其實是知識型而不是資訊型，所以就算舊版，都無問題。暫時未必再出新。

C）《股票勝經》《年報勝經》

D）《股票勝經》

E）最少持有3-6個月的備用現金，餘下可以投資。你預現時大約3-5成現金適合

2A）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你持有的收息股，都有質素，不過，以你年齡，唔應該持有太多收息股。

3A）唔好比較「曾經見過的高位」，無意義的。要分析企業現時業務情況、前景、估值等。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。

但如這刻買入，分注入可以的。

B）唔明你問那些股。

C）現價合理區中間

D）現時略貴

E）現價合理

F）現價合理

G）現價合理

h) 現價合理區頂

i) 現價合理區中上部

4A）以你的年齡，可以6成平穩增長股，3成潛力股，1成收息股（但你投資知識增加後，可增加潛力股比例）

B）可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分現價貴，要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19048：

你好 我想問問康師傅買唔買得過？
仲有241 依家高追o唔ok？謝謝你

龔成老師：

康師傅控股（0322）有質素的，現價合理，不過發展力不算好強，只是平穩增長類，不是高增長類。可以投資作收息及有平穩增長之選，現價都可分注。

阿里健康（0241）這是潛力股，佢營運醫藥電商、互聯網醫療等業務。

「醫藥電商業務」，這業務主要有兩種業務模式，由自營電商和天貓代運營，涉及非處方藥品、醫療器械、計生用品等。

另外，就是「互聯網醫療業務」，阿里健康與國內多家二三級醫院建立合作關係，患者可以通過阿裡健康、支付寶等平台，做到線上掛號、問診、諮詢用藥等等的服務。

阿里健康利用醫療AI系統「DoctorYou」去進行營運，該系統包括臨床醫學科研診斷平臺、醫療輔助檢測引擎、醫師能力培訓系統等，輔助醫生睇病。

業務上，有好大的潛力，不過，本質波動，股價上落大，消息多，市場炒作多，這類股風險都不少。最大問題是無人能正確估值，市場現時只是估估下，推將唔到佢將來的價值。

這類股只建議小注持有，唔好加注，原有貨，如果你本身目標是長線，繼續持有無問題，但你預佢股價上落大。

------------------------------------------------

Q19049：

成哥你好！ 因大陸物業賣出後會有6百多萬的現金 ，資金全數會擺反香港銀行。 請問資金應如何分配從而有每月3萬的被動收入？

債券/ reits / 股票？ 唔知道可以點組合而能夠分散風險。 多謝你意見

龔成老師：

要睇你的風險承受程度，如果能承受風險，可以投資一部分在平穩增長股+潛力股。

如果你目標是「低風險，現金流為主」你可以將這$600萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$600萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q19050：

龔Sir,想請教一下, 小妹剛學習投資, 現時手上股票都低於買入價,

我係米繼續持有就可以(每隻大約5千-1萬股)??

386中石化 $3.42
861神州 $6.47
382 中匯 $5.87
1093 石藥 $8.8

龔成老師：

我地投資，最重要是睇企業質素，前景。以及這股是否適合你，在你的組合配置上是否適合。從上述的股票，基本上都可長線的。

中石化（0386），質素算是不差，但又未到好好，始終這只是商品企業，沒有一些太大的優勢。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

生意近5年只是上上落落，無乜增長力，這是受油價等因素影響，反映佢處於一個被動的狀態。收息是可以的，但增長力唔算強。

神州控股（0861）主要從事大數據運營、物聯網及人工智能業務，業務領域包括智慧城市、智慧產業鏈、金融科技、智能製造、智能農業、智能運維、量子通信等。

都是有前景的行業，長遠有發展，不過，業務就有較大的不確定性，始終行業結構不穩，變數大。

過往盈利增長不差，不過就有少少波動，這是企業的風險所在，股本回報率不高是扣分的地方。

整體來說，業務長遠仍有發展，不過現時估值唔算平，投資投資值博率只是中等。長線投資都可。

中滙集團（0382）佢係中國提供民辦高等教育，現時於廣州運營兩家學校（華商學院及華商職業學院）。

睇翻佢的資料，佢主要提供本科課程及專科學歷課程，包括會計、金融、經學濟及商務英語。

亦係澳洲墨爾本營運一間學校（澳洲國際商學院），提供職業教育培訓課程及非學歷教育課程（如短期遊學課程、海外留學生英語語言強化課程、職業培訓課程及文化探索課程）。

財務數據方面不差的，業務發展正面，不過由於上市年期唔算耐，因此分析時的參考價值會減。整體都有質素的，相信長遠前景正面，小注投資都可。

至於石藥（1093）：有質素的，長遠有增長力，可長線。

------------------------------------------------

Q19051：

老師，現時恆指已升現水平，是否已經在高台？我還可以入貨嗎？還是等待回調到23000先？

沒貨在手，有80萬現金

龔成老師：

恆指貨在合理區，你唔能夠100%現金，無人能預知股市升跌，無人知能否等到，建議你先用$20萬-$30萬，分注入貨。

最重要是分注，慢慢入。

可以主力投資優質的舊經濟股，因為這類股現價仍合理。小部分投資新經濟類股，因為現價大多唔平。

完成投資後，等跌先再加貨。

我地最重要是建立一個長期，平衡的組合。

------------------------------------------------

Q19052：

龔成老師你好，本人今年23歲，原本有一份穩定工作，月入$17000，但很可惜因為身體問題，於今年8月辭掉工作休息，打算年尾才會工作。在這3個月來也沒有收入。

本人過往一直對成人用品，情趣內衣生意充滿興趣，以往亦於社交媒體中有嘗試做小生意，每月收入大概$3000-$5000，收入很有限

而且未知如何可以在眾多競爭對手中突圍而出，生意不多，更沒有很多經營生意知識及經驗，再加上以前工作忙碌，所以暫停了此生意。

此外，得到龔老師書中的啟發後，每天不斷學習投資股票。

3手盈富（2800）（平均買入價$24.2），1手領展（0823）（$61），1手金沙（1928）（$30.85）。另持有31萬現金儲蓄，請問龔老師下一步我可以如何計劃？謝謝龔老師！謝謝龔老師

龔成老師：

如果你已能在成人用品這個生意中，每月賺到一定收入，這已經是好成功，你可以集中思考，怎樣發展這個事業。

第一，你要有自己的定位，目標是清晰，要等客戶好易記得你，要做「專」不是做「雜」。

第二，要思考怎樣宣傳，要令人認識你，知道你的存在，要從多各度宣傳，甚至用一些奇怪的方法都可以。有需要就動用你部分現金，投資發展這事業。

第三，你要尋找這個客戶群的群組、年齡等，集中去他們宣傳。

第四，要「創造需求」，要思考怎樣令原本以為無需要的人，變成有需要。

至於你現時的股票，優質，可長線方

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你的方向應是加強增長力。

------------------------------------------------

Q19053：

龔sir 你最近常說大市在合理區 提我們留有現金， 本人現在30歲，我永明mpf 現在是一半在香港股票b 一半在保守, 這配置正確嗎？

請問我這年紀在這市況是不是應該更進取？ 謝謝龔sir
本人現存mpf 金額為50萬

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你30歲，可以進取少少，保守基金的%可減少。

由於強積金是超長線投資，唔需要太著重中短期的大市情況，照你年齡與風險承受程度度，進行配置就得。

------------------------------------------------

Q19054：

龔sir，我最近終有自己既第一個一百萬了！其中1211居功至偉，雖然只係買左3000股，但係一直持有。用左不到5年時間，終於達標！好想同你分享！

不過由於近期1211都升左好多，市盈率過百陪，我放左一半，另一半繼續持有。

感謝龔sir一路一來既分享，你真係好大公無私，我以你為榜樣！

龔成老師：

太好了！

比亞迪（1211）你賣部分都可以，始終有點貴，最重要是點都留翻部分貨長線就得，因為當企業價值向上，就可能由貴，慢慢轉為合理。

期待你財富更上一層樓！

------------------------------------------------

Q19055：

龔sir，我前年在3.52和3.02買咗3988

5萬股作收息用。依家佢跌咗好多 ，我諗住唔放，長揸3 、5年，因為已經退休。請問長揸OK嗎？佢仍然係優質股嗎？多謝你的指教。

龔成老師：

如果你是退休人士，可以建立一價收息股組合，你持有中行（3988）是可以的。

這股都有質素，雖然增長力唔算強，不過收息不差。

但要留意，你最好同時持有其他收息股，建立一個平衡組合，這樣會更有效減少集中風險。

------------------------------------------------

Q19056：

龔Sir，想請教以我既年紀點分配我既資金係投資市場
本人31歲，月入25K，總資產大約40萬

有21萬係股票，5萬實金，2萬外匯，其餘現金
如果我想投資更多的資金係股票市場，留十萬現金會否太多？

如果想平穩增值，黃金可以嗎？想加落7299。還是現有既貨可再加倉？

788@20000share
2342@6000share
2840@55share
7299@5000share
1558@1000share
0008@3000share
3175@7000share

謝謝阿Sir

龔成老師：

財富分配方面，大致合理無問題，黃金可以持有少量，但不用太多，所以唔太建議你加注。外匯同樣不用太多，長遠只會貶值。

至於股票方面，大致無問題。

電盈（0008）增長力不強，未必適合你這年齡。

Ｆ三星原油期（3175）亦不建議長期持有太多。

------------------------------------------------

Q19057：

呀Sir
1. 問置富這股可以用市率盈來到計平價位?

2. 如不適合用市盈率計置富這股,應用什麼方法？
麻煩晒你

龔成老師：

1）置富（0788）由於是房託，在盈利中有一項為「物業重估」，由於只是一個會計數，因此「盈利」數字不能作準，令市盈率都不能作準。

如果要用市盈率計算，你就要調整翻盈利數字。

2）你可以用股息率去進行計算，尋找過往多年的股息率，作為參考。推算下年度股息，從而得出估值。

------------------------------------------------

Q19058：

老師 我記得當初你係話比亞迪係$40以下平 依家都係過左差唔多半年 質素改變應該唔大

咁其實依家成200蚊係咪好高估呢？如果股價長期會回歸價值咁點解你依家唔會諗住賣

同埋我仲想問下 股價每日不斷咁改變係由咩野決定？純粹供求影響？

龔成老師：

比亞迪（1211）$40是平，不過，佢近期公佈的財務數據，都反映業務向好，我遲些會調升的，不過不會大幅調整，始終我在企業估值方面，會偏向穩陣。

至於每日股價，當有人買，有人賣，就有成交，這就是股價，供求影響每日的股價，而供求背後，才是真正的因素，為何這刻買？為可賣？一般散戶無具體的答案。

但專業投資者、機構，就會計算企業價值，去考慮這刻是買？賣？還是等跌先買。而根據研究，長期股價與企業價值的相關系數好高。

因此，短期股價只因短期供求決定，長遠股價就由企業價值決定。

------------------------------------------------

Q19059：

Hello 你好 我係新手 已經睇左你兩本書 都諗住月供盈富基金 但想問下 甘其實月供盈富係點賺$?

係米都係等佢價位升就放?
Thanks a!!!

龔成老師：

原理就是不斷累積盈富（2800），當佢長期增長後，你可以賣出，又或不斷收息，都是得到回報的方法。

月供，一般都是長線投資的，唔建議太急去賣出。因此，你的概念不是心急賺差價，而是一個「財富累積」的過程。

------------------------------------------------

Q19060：

Hello龔sir!
我由上個月開始月供盈富$5000同恒地$2000。
亦都買咗你嘅書繼續增長啲理財concepts!
但係有啲specific嘅問題想問，希望你抽空答我啦

我宜家19歲，每個月有1.6萬可擺落股票。
覺得自己其實算贏在起跑線，所以更加想好好把握自己有嘅資源。

現有股票：
11 1手 $124
12 67股 $29.53
2800 697股 平均價$25.179
9988 1手 $269

本身計劃：
月供$5000盈富$2000恒地
月儲$9000

但係我發現我儲完根本唔知應該投資啲咩
以下係我考慮緊嘅股票：

- 地產：置富
- 珠寶：六福
- 旅遊：中旅
- 港鐵
- 港交所
- 小米
- 阿里巴巴
- 恒生

我的問題：
1. 我宜家好似考慮緊太多股票，請問我應該點取捨？

2. 揀好咗呢啲股票之後如果全部一手手買好唔好？定係揾一啲加入我月供嘅組合好啲？應該點分配？

好多謝你用時間睇🙏🏻希望你可以答我啦
thank you so much!!
祝身體健康

龔成老師：

1）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

首先，你不要思考買入那一隻股票，而是要分析，自己想「設計一個怎樣的投資組合」各類別比例如何，要適合你自己。

有左大方向後，就知道應該點樣分配，選那些股票。

現時的持股，恆生（0011）未必太適合你年齡。而中旅（0308）質素只是一般般。

2）要睇你的現金情況，以及各股票的平貴，上述大部分都是有質素，如果這些股較貴的，例如阿里（9988）、小米（1810），就月供好過一手手買。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。