*嚴禁劇透估劇情* *粗口自行過濾* *可瘋狂話戲屎但免人身攻擊* [1230隔夜超短劇評][無綫][平安谷之詭谷傳說 EP08] [讚] 全集都差唔多係講青蘭點解未死，點樣夾計去救北杏。劇情冇乜爆炸位可以推動我嘅情緒，但係沉實咁講故事已經係唔錯。琴晚聽到阿蘇自己喺訪問時爆首周收視係26點，之後愈諗先覺得有啲唔開心。唔係話《平安谷》唔好睇，我都幾鍾意，但講真劇本冇乜大突破，寫人係好啲嘅，但播到依家都未去到中上嘅級數，喺我心目中佢只係中階。收視咁好，代表大家都其實好想睇劇，一有「正常」啲嘅劇收視就衝上去，我哋做觀眾都幾慘… [彈] 若然安排青蘭未死，咁一開始個墓就唔好挖咁深，又或搞啲情節等青蘭唔係同佢死鬼老公一齊瞓落棺材入面。佢依家破土而出嗰下我真係接受唔到。 劇情決定要到今集先講原來青蘭、北杏、初一、惟明係好姐妹，用咗成一節時間左右去講佢哋幾咁姐妹情深，為咗build up青蘭最後犧牲嗰吓觀眾會投入啲感動啲，但用咁短時間我就投入唔到。青蘭一直喺劇度都係「惡靈般的存在」，講咗7集，到第8集你用一節時間話我知佢哋有幾姐妹情深，不如你抽啲時間話我知青蘭由細到大都被男人蝦到上頭頂，可能我對佢嘅犧牲會感動啲。 水豐叫牛屎妹幫手請雞脾佢食嗰段真係冇眼睇，唔好笑呀搞到兩個人好似白癡咁……條殉葬鄉例一時又話有百幾年歷史，一時又話幾十年，點呀？ 話時話，有人話蘇玉華點解喺青蘭要去死同埋睇住佢死時，唔似龔嘉欣同沈卓盈咁喊到崩潰。我覺得都合理嘅，佢都唔識青蘭，如果做到同另外兩位同青蘭由細玩到大嘅人嘅反應同情緒係一樣，未免太過火。二奶奶不嬲都冷靜開。 [演員表] 陳灐 飾 邱青蘭 / 劉江 飾 陸金谷 / 黃浩然 飾 陸水豐 / 陳凱琳 飾 羅桂思 / 蘇玉華 飾 宋鳴鳳 / 陳沛妍 飾 陸小璇 / 朱晨麗 飾 顧曼儀 / 龔嘉欣 飾 田初一 / 陳庭欣 飾 楊澄澄 / 韋家雄 飾 陸水雄 / 阮兆祥 飾 伍尚舜 / 陳沛妍 飾 陸小璇 / 譚凱琪 飾 伍惟明 / 于洋 飾 陸金草 / 沈卓盈 飾 陸北杏 / 樂瞳 飾 牛屎妹 / 翟威廉 飾 陸水傑 #1230隔夜超短劇評 #無綫 #TVB #平安谷之詭谷傳說 #劉江 #黃浩然 #陳凱琳 #蘇玉華 #朱晨麗 #龔嘉欣 #陳庭欣 #韋家雄 #阮兆祥 #陳沛妍 #譚凱琪 #于洋 #沈卓盈 #樂瞳 #翟威廉 #陳瀅

*嚴禁劇透估劇情* *粗口自行過濾* *可瘋狂話戲屎但免人身攻擊* [1230隔夜超短劇評][無綫][平安谷之詭谷傳說 EP03] [讚] 又係四位太太喺埋一齊嗰吓最好睇，即係桂思話要查谷爺畀人落毒嗰吓，個個都好似身有屎咁。另外一個位係小璇因為《金瓶梅》而畀大奶奶罰，仲call晒全屋人一齊去審小璇，二奶奶明知本咸嘢係谷爺嘅，都唔敢出聲。佢望住谷爺嗰個神眼，又怨恨又無奈，正呀。不過套劇暫時除咗桂思之外，個個角色做戲嘅位成日一吓過就完，冇得延續，演到曉飛都冇用… 有個好大嘅疑問：小璇係二奶奶同第二個所生嘅，咁點解咁要面子嘅谷爺會娶二奶奶？到底係有咩交易定係二奶奶用計謀先可以帶住個囡入到平安谷第一大戶？希望之後嘅劇情會講返啦。 [彈] 見到二奶奶、四奶奶佢哋個嫌棄老爺嘅表情，令到觀眾一見老爺中毒嗰吓就懷疑佢哋。咁大奶奶同三奶奶呢？套劇呢幾集都冇着力描寫過大奶奶、三奶奶對谷爺係點。如果寫大奶奶同三奶奶（表面上）好愛谷爺，咁桂思同水豐查案就有睇頭啲。依家做到個氣氛係四個老婆都唔妥個老公，查嚟查去都冇乜特別。但如果之前令到觀眾覺得大奶奶同三奶奶係敬愛谷爺，桂思一路查揭發佢哋兩個都有可能、甚至仲大機會過其餘兩位奶奶去毒谷爺，咁或者會好睇啲，又唔使改動現有嘅人物背景劇情主線發展。 大奶奶喺佛堂跌咗本《金瓶梅》出嚟嗰吓，啲配樂可唔可以正常啲呀？依家膠到震。係咪每集都要安排一個「輕鬆笑位」？但每集都變咗膠位…… [演員表] 劉江 飾 陸金谷 / 黃浩然 飾 陸水豐 / 陳凱琳 飾 羅桂思 / 蘇玉華 飾 宋鳴鳳 / 陳沛妍 飾 陸小璇 / 朱晨麗 飾 顧曼儀 / 龔嘉欣 飾 田初一 / 陳庭欣 飾 楊澄澄 / 韋家雄 飾 陸水雄 / 阮兆祥 飾 伍尚舜 / 陳沛妍 飾 陸小璇 / 譚凱琪 飾 伍惟明 / 于洋 飾 陸金草 / 沈卓盈 飾 陸北杏 #1230隔夜超短劇評 #無綫 #TVB #平安谷之詭谷傳說 #劉江 #黃浩然 #陳凱琳 #蘇玉華 #朱晨麗 #龔嘉欣 #陳庭欣 #韋家雄 #阮兆祥 #陳沛妍 #譚凱琪 #于洋 #沈卓盈