【龔成問答信箱】（Q22541-Q22560）

Q22541：

老師！持倉部位現在-40%，請問如何調整心理質素？之前聽你說好像是去跑步

現在我天天飯都吃不下了！

龔成老師：

如果投資影響了生活，你的心理問題都開始大，我強烈建議你：

第一，唔好睇股價3個月。

第二，這段時間逼自己睇10本巴菲特相關書。

第三，這段時間睇你持有股票，佢地的年報，每一間都要睇5年年報。如果你能做到，3個月後，當你見到優質股股價跌（前題要優質股），你會變成天天都開心都不得了，每天的食量都很好。

（當然，我地要分析企業的價值有無改變，但不是睇股價，而是睇業務與前景因素，如果前景轉差，要止蝕的）

------------------------------------------------

Q22542：

龔成老師，我近日面對股票市場感到十分迷失和迷惘，我年初曾大手買入股價20元的心通醫療2160，但今日已跌穿9元，十分心痛，不知如何處理。
希望你能指引一下，謝謝

龔成老師：

微創心通醫療科技（2160）是有危有機類。最大問題是上市價貴，以及之前熱炒。

係一家中國醫療器械企業，專注於心臟瓣膜疾病領域創新的經導管及手術解 決方案的研發和商業化。

佢自主研發的第一代經導管主動脈瓣植入（TAVI）產品VitaFlowTM，於2019年7 月獲國家藥監局審批並隨後於2019年8月在中國進行商業化。

根據資料，截至2021年1月17日，有五款TAVI產品在中國獲批准或商業化，其中，VitaFlowTM是首款使用牛心包作為瓣膜組織的產品。

佢亦推出第一代自主研發的AlwideTM瓣膜球囊擴張導管及AlpassTM導管鞘，使其成為中國唯一一家全面提供自主研發互補性TAVI手術配套產品的醫療器械企業。

VitaFlowTM II是唯一在中國研發並已在歐洲開展臨床試驗的TAVI產品。

除TAVI產品之外，佢目前還擁有五款經導管二尖瓣（TMV）在研產品，通過自主研發及與全球合作夥伴（即4C Medical及ValCare，均為專注於二尖瓣及三尖瓣醫療器械研發的醫療器械企業）的共同開發戰略性地針對所有主流可行的二尖瓣返流經導管瓣膜療法（TVT）方案。

企業都有一定獨特性，同時長遠發展不差，不過估值方面就十分難，因為這刻仍未有似樣的盈利。

如果你持貨多，宜減，但如不多，就長線，耐心等企業好轉。

------------------------------------------------

Q22543：

龔sir:我已經睇緊你本「選股勝經」，想貴埋你本「80後百萬富翁」、但行咗幾間書間都只有2同3，請問喺邊度買到第一呢？

謝謝你的建議，我在過去一星期小注了

2800，0066，0002，0006 及0270 等平穩股，諗住遲D慢慢放曬D 1336 佢，平穩股慢慢長揸

我都係比較心急，在508 及500 各一入了一手 700，在14.62 又入了3500 服3067，睇來都要等下，暫時高風險股都唔入住了

揸住D現金就等個市跌多D時再入吧

龔成老師：

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的13本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第6版）
《選股勝經》（第2版）
《年報勝經》（第2版）
《5年買樓4部曲》（第2版）
《80後千萬富翁》（初版）

記住，最重要是建立一個長遠的優質股組合，用長期角度配置，同長期角度去買入，唔好心急，要有策略。

現時大市波動，點都要有一定的現金在手。

------------------------------------------------

Q22544：

老師，小弟打算4月左右移民，有40萬流動現金，請問有什麽投資建議？附上現有倉資訊，謝謝無私指導

700 一手 430入
3319 1250股 28.8入
3918 16000股 6.343 入
1177 5000股 7.214 入
6862 1000股 30.263入

感激

龔成老師︰

我地投資增值，係要長線，因為中短期有好多波動會出現，我地係預計唔到。

你只有9個月就移民，時間不多。我假設你移民前，係需要賣出所有香港資產，你40萬資金我建議最多做定期好了，一切以保本為主。

而你現時持股，現時就要開始分段沽出，去慢慢換回現金。唔好等到離開前一刻才沽，因為無人知個個時候，個大市係什麼環境。所以你要分段沽貨，去平衡價值波動的風險。

------------------------------------------------

Q22545：

老師，我明白長期持有優質股的道理，亦明白分注重要性，但跌市時分注買入優質股，永遠不懂注碼控制，

本人分注得比夠保守，可能一次恐懼跌浪當中只買了組合的百分之十，手持夠大現金，比如上年2020年3月，能把握機會，但買的量可能只有20-30%，

在上升軌當中便一值錯失加注機會，回報並不理想，記得老師說過上年把握大市購入小米，必瘦站等優質股，當時是用了多少現金或組合百分之幾去買？

過了上年3 月跌浪在之後的升浪有否加注？

同埋永遠保留適當現金當然沒錯，但如果你說恆指在23000是便宜區，我能否在範圍內增持組合股票水平至8成或9成？

我知一個熊市可能長達半年什至兩年，我應以時間比如每月去月供還是在便宜區去大手吸納？從而令自己持倉股票水平夠高，當遇上升市時有夠好的回報，謝謝

龔成老師︰

其實分注，我地無話一個好100%準則，乜野水平，就入幾多貨。

因為大市下跌，唔代表所有股票都會下跌，有時候個市開始平，但你目標股票無乜點跌，你都唔應該視佢為平宜，而去大注入貨。

所以，大市平貴所定的入市比例，只係一個參考。

由於近年恆指將好多波動性較大股票，納入恆指成份股，故便宜區都有所調整，你預23000點左右，係開始平宜。

但你要記住，這只是初步平宜區，未去到好平，持貨比例大約7-8成左右。

我地雖然唔知會唔會再跌，但基於平貴去衡量，我地必需留有資金，去等你個可能再下調的機會。

------------------------------------------------

Q22546：

龔sir, 你好！現時上緊你的課堂，真的獲益良多。有少少野想請教，我想問中泛控股（00715）你點睇？

我家人買了此的股票，已套了很久。請問呢隻係咪就係所謂嘅老千股？

龔成老師：

這企業年年虧損，你持有這盤生意，當然無意義。

這企業本質一般般，長遠價值向下，建議你賣出。如果不想一次過賣，都建議減持部分，將資金投資更有增長的股票，會更好。

你要記住，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q22547：

老師，從國策層面來看，醫藥股（中生製藥）在我們堂上研究target它為未來倍升股潛力會否長遠大受影響而大打折扣和阻力嗎？

從5月上你初班開始，我已列入「中生製藥」在我的配置表中(其中10％的潛力股之列）, 但我一直有留意著股價，

從$8.x跌到$7.x到現時$6.x, 已接近52週新低，雖然你曾說股價由之前好貴（去年$11.x, 現在已跌咗一半) 已經慢慢回落合理估值的上部或中部可以分注買入，

但我看股價圖表一直呈現向下走勢，睇返2019年低位曾經大概是$3.x，就算現在是合理估值中或下部，可分注開始買入也要$6.x，但是還有可能冒著再向下跌一半的風險，

你曾說過唔好去估個底、亦唔好去估個市，買股票就係買公司，唔好事後孔明、就算買貴咗都有得守…………

我已經睇過你很多本書籍，也十分認同你的理財和財務想法與概念，即使我的理念同樣也是———「用便宜價格買入優質股票長期持有而不理會中間價格波動」，

但我心裏仍有忐忑不安，覺得我會用多咗多餘的資金而買貴咗要捱價x年才能返回買入價，雖然你常言道不要看買入價為神聖價位只看股票本質有沒改變，

如果沒有改變不用擔心股價上落，讓優質股票慢慢成長，最終股價也會回歸到合理估值，但我心裏仍覺得不安買貴咗，從而導致少了資金去買配置表內其他優質股票…………..

所以我仍然在迷惘中和猶疑不決，不知道應該第一注資金應該幾時、什麼價位開始買入，（我正常一般都會分3注），請龔sir再指導我一下

龔成老師︰

首先，你唔好再用圖表，或者52週新低這些短炒方法，去做分析。因為股票過往價格，同將來發展唔一定有關係，特別係一些發展好快，有質素的潛力股。

我地無人會知，佢中短期股價會發展成點，只能以平貴，去定策略。係合理頂時，先小注。再回調，就再加注。到平宜區，才大力掃貨。

你唔好有個錯誤想法，等到平宜區先入，就最穏陣和回報最理想。但你要記住，優質股係有權唔回至平宜區。

如果你平宜區先去入，可能最終結果係，你乜都入唔倒，白白睇住隻股票係咁升。

策略性分注，有機會會有一段時間出現帳面虧損，而且一定唔係可以最大回報的方法。但佢可以平衡左各方面不確定性，令你可以係可接受風險程度，得到最好回報。

近期中央推出一些醫藥相關政策，對醫藥股發展的確係有影響。但長線睇，相信會加快左行業汱弱留強速度，對好似中生(1177)這類優質企業，長線反而係有利。

但你預佢中短期都會較波動，長線投資價值未見大變，你可以按我教的策略，去慢慢分注入貨。

另外，你要留意翻2019年最低價係$4.X，你記得我初班上堂有教過，當企業派息或紅股，個股價圖條線，係會全條按比例下調。由於2020年有2送1紅股，所以條線係下調左。

如果直接睇圖見2019年初係$3.X，就當佢係當時真實價位，那就錯了。

------------------------------------------------

Q22548：

想請教，66 2800 應該長持，因為2800可分散風險。66 地鐵公司長遠收息及增值可觀？

3 及11 算高位？ 待其升10%才放較好?

大家樂 大快活又如何 收息及增長?持有誰較好?

這星期港股大跌 應該持有66 2800 11 3 因長遠來說會升番 優質股不用怕 除非作炒賣?

總括咁問，2638 270 等股市升回正常價才放。11 66 2800 3 可長期持有 因是優質股？ 股市波動對其影響有限 只要不是炒賣 風險好低？thx

龔成老師︰

你現時持有股票，都係優質股，係可以長線持有。我地係唔會因為股市中短期波動，去沽出一隻股票。除非佢已經係好貴，又或者佢長線質素轉差，才會賣出。

但港燈(2638)係收息股，增長力不高，若你係年青至中年人士，就不宜持有太多。

大家樂(0341)和大快活(0052)，質素上大快活會較好。佢有平穏增長之餘，都有一定股息。但如果疫情再反復，可能會令佢中短期再現波動，要留意風險。

近期大市比較波動，但未見對上述股票，質素上有明顯轉差，你照持有係可以。

------------------------------------------------

Q22549：

早晨龔成老師，我今年35歲了，近來確診癌症，將有一筆大概250萬嘅危疾保險。想早點將這筆錢增值，因為將來我可能還有好多時間，並不想成為老公及其他家人的負累。

我應該如何分配？

我不會有小朋友，同老公及患病父親同住先母物業，不需要供樓，一家人每月支出3-4萬。

龔成老師︰

以你情況，一切都以你身體健康為重點。

這筆危疾賠償，你要先扣起一部份，最好預多少少，用現金持有，以備不時之需(生活或醫療上)。

未來時間，為了可以令你安心治病和進行療養，投資選項上，我會建議以創造現金流為主。透過現金流，去支援你生活上開支。

目標會係一些優質收息股，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，只能小注）。

現時大市只係合理水平，資金唔好盡用，大約留翻3-5成現金。等大跌市出現，才加大力度掃貨。

當然，如果你精神未必足以你進行上述操作，你可以入完首注後。用銀行月供股票服務，去將餘下資金，慢慢投入收息股當中。

但緊記，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡。同一行業不能高於組合30%，同一股不能高於組合15%。

祝你早日康復!

------------------------------------------------

Q22550：

想請教1. 如公司個人/高層持股多於50%，在評估公司質素上是否要扣分?

2. 在計算669估值上時，為甚麼用現金折流法得出的數字只是$4X? 但現價卻是$130，差距很大。然而，典業主盈餘卻是按年増加，而折現率亦採用了合理的10%，所以想問問現金折流法是否不適合用在669估值上?原因又是甚麼?

3.想請問2128 中國聯塑積素如何?

龔成老師：

1）要睇那類公司，如果是細公司，有可能佢地好易操控股價，如果大公司，可能佢只是正常持股、睇好自己公司，因此問題不大。

2）現金流折現法不易運用的，你在推算增長率時要小心計算。

3）中國聯塑（2128）這股不差，有長線投資的價值。佢主要從事製造及銷售建材家居產品、提供裝修及安裝工程、環境工程及其他相關服務、金融服務和物業租賃及其他相關服務。
生意與盈利都不差，現金流強，股本回報率理想，基本上有長線投資價值。不過股價上落較大，要注意注波動。
現價合理區中上部，分注投資都可，但不是大手時機。

------------------------------------------------

Q22551：

多謝龔成老師回覆和分享，其實我都是大約年初才買136，我現在手上還有好多不同的股票，但係全部帳面都是蝕包括

匯豐 1200@$68
恒生 500@$151
煤氣 5000@$13.28
小米 2000@$26
騰訊 100@$579

阿里巴巴 500@$278
恆大汽車 2000@$16.4
中國鐵路 20000@$1.21
醫渡科技 2000@$65
金沙中國 2000@$30

上述帳面現在合共蝕緊200,000左右

小米同金沙都係睇得你多分享先至跟買，價位都不算貴所以我不擔心，反而阿里巴巴同埋騰訊真係有啲擔心，仲有隻醫渡科技一上市嗰陣高追又冇止蝕所以搞成咁

上面的股票大部份都是由上年七月開始買入，當時因為手頭上套現左一舊資金所以就入市，另外有1,000,000我放咗入每月收息基金，

最理想的都是allianz income and growth, 一年帳面連基金收入已賺了15%，可惜我當時買了少部份，另外我買咗亞洲的基金，到現在連基金收入都是打和！

一年後review, 最大的虧損都是136

我覺得自己好失敗，將所有資金放入銀行mortage link 收息都好過現在做無謂的投資

現在我只希望所有股票回升，不要再蝕太多我已經心滿意足

龔成老師︰

你要記住，我地投資係為左財富增值，而唔係打個平手就算。

唔好用短期帳面賺蝕，去衡量持股質素，或者個投資組合成敗。因為投資係一個長線計劃，就算最優質的股票，中短期都會有波動。只有長線其價值，才會在股價中反映出來。

你現時持股都有質素，若你係年青至中年人士，這個組合係可以長線持有。(我估你"中國鐵路"係打錯，應該係"中國鐵塔")

但若你偏年青，恆生(0011)和匯控(0005)這類收息股，就不宜持有太多。

另外，醫渡科技(2158)、恆大汽車(0708)不確定性較高，不宜持有太多。

至於基金，你可以衡量基金的投資策略，所投資的資產類別、投資策略、風險程度、市場、費用成本、以及過往的表現。

你可以睇佢過往5-10年(唔好只係睇當前的一年表現)，如果回報係比主要投資市場高，就有機會值得繼續投資。

提翻你，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q22552：

成哥，你好，之前是你的學生，有問題想問問。

我計緊銀娛0027價值，用市盈率估值法，但我見他在2020年度市盈率和每股盈利都是負數，這個特別的情況(疫情）我應唔應該計算呢一年的數據？

另外，用市盈率估值法，是否每一隻股票都加多10%緩衝？謝謝

龔成老師︰

其實不論是否市盈率估值法，一些中短期發生事件，如果係一次性，預期將來極細機會會再發，好似今次疫情咁，其實我地就應該將這年的收字忽視。

但由於疫情依然反覆，預期中短期業務，都有較波動，故有需要將估值下調少少。銀娛(0027)現價算係合理區中下部，可分注。

至於10%緩衝區，唔係一定要加。當你發現你計出來合理價區間，係好窄，無法有效反映一個正常合理區時，你就要加這10%緩衝區。

你可以溫習翻初班第5堂的NOTE，重點會係SLIDE26和58，當中有較詳細指引和例子，你睇左會較易明白。

------------------------------------------------

Q22553：

Sir, what do u think about premium financing by insurance company

龔成老師︰

保單融資，其實就係透過借貸，去以槓桿形式放大回報。相比傳統儲蓄保險，佢增長潛力會相對較大，同時風險會相對較高。

若保單實際回報，係多於貸款利息，投保人自然會因為槓桿操作，而令回報放大左。

但由於保單本身，好多時回報和利率都係不保證。再加上貸款利息，多為浮息。在低息環境，固然會受惠。但進入加息週期，利潤將進一步被蠶食。

因此，用保單融資去投保，係有一定風險。

其實係財富增值上，最好集中係優質資產上(如物業、優質股)。

"保險"只係一種產品，主要係用作防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但最好係一些較傳統儲蓄保單，而非這類有槓桿性質的產品。

------------------------------------------------

Q22554：

老師你好! 我和先生40歲, 每月收入共$54000, 有一層自住物業, 市值700萬,尚有170萬要還, 每月供款$12000, 月儲$13000, 股票合共約45萬, 外幣加現金共$44萬,

如果層樓唔想做加按, 如何能制造每月被動收入$15000-$20000?謝謝

龔成老師︰

如果你希望每月有2萬蚊現金流，以股息率6%計，你需要本金400萬。

若你想做到這個財務目標，你可以透過投資一些「平穩增值股」+「潛力股」，去累積這筆資金。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

假如你現時無太多投資經驗，潛力股這類風險較高的股票，你就不要持有過多，最多維持2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-4成，視乎你投資經驗多寡和了解這些股票程度而定。

現時大市只是合理區，你現有44萬現金和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$13000 + 現有約90資產(現金和持股)，預計10年左右時間，就會增值至400萬。

你可以以此作參考，視乎你自己情況，再去調整月供計劃。

------------------------------------------------

Q22555：

本人51歲，計劃四年後退休，先生和我各月入5萬，依家手上有500萬現金，有三個鋪位，租金約6萬，貸款尚欠110萬

股票約90萬，係中銀香港、電能實業同埋永利，計劃買多100萬中銀香港收息，

亦有投資保險類年金，仲有八年要供

小朋友剛剛大學，疫情過後去海外升學，咁樣資產部署退休可以嗎？

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

若你4年後就會退休，我地就要將資產，慢慢轉向收息項目。透過這些收息項目，去創造穏定的現金流，去援你退休生活。

你現時財富組合中，主要係物業類。這些物業用作收租，能提供現金流，所以應保留作你退休組合一部份。但由於佢地佔成個組合比重好高，故物業類就唔好再大了。

現時你應加大優質股部份，去令財富組合更平衡。

你現時持有的股票，都係有質素。但永利(1128)雖有增長力，但派息都幾波動，長線不宜作為收息股一員。你現時可持有，但要慢慢換至其他優質收息股上。

至於中銀(2388)和電能(0006)可長線，退休時都可以持有。

我地唔好成個組合，只集中係2,3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

所以，唔建議你再投資中銀(2388)太多，以免因過度集中，造成風險。

以下是一些適合你的股票，你可以一半資金儲指數基金，佢係一籃子組合，就算持有30%以上，都唔會有過度集中性風險。

你可以用佢，係退休前作適度增值。另一半資金，就買入不同收息股，係用來為退休後生活，作準備。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，只能小注）。

現時大市只是合理區，你現有500萬資金可以多投入150-200萬，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

退休後，除了收息股、收租物業外，你都可以加入一些年金(現有那份可照供)、定息產品、A級債券等，去令自己收息組合更多樣性和平衡。

而小朋友升學資金，由於好快會動用，所以不宜投資。你要另外以現金模式扣起，到升學時就動用。

------------------------------------------------

Q22556：

龔成老師，早前拜讀了你那本80後一、二、三百萬富翁、五年買樓4步曲。你的看法讓我打通了自二十年前看富爸爸窮爸爸開始認識的概念。並且能確實、有效實踐出來。

我打算繼續在股票市場努力學習投資，直至儲夠一百萬，就買樓。

但有以下一些疑問：

想請教如何可了解現時樓市是否合適買樓的時機？因擔心一買樓，樓市便下跌。

龔成老師︰

中短期樓價點樣走，其實好難預測。但我認為香港樓，長期會向上。

首先，我用身邊的朋友去分析（因為佢地都是適婚年齡的），我見到一個現象，唔少朋友結婚後，買唔到樓，要同父母用住，這幾年都係咁，而且人數不斷增長。

佢地正在儲錢，正在等樓價跌，只要在適當時機，就會搬出去住，你知道這是甚麼？這就是潛在的購買力，而且不斷累積！

香港樓長期供應不足，需求正不斷累積，這將會令樓價保持向上，跌少少，又會升過。

另外，你要明白，樓是資產，現金不是真財富，所以物業長期一定向上，中間會有上落。這是財富系統最典型的模式，詳細概念你可以睇《財務自由行》，當中會話你知，點解資產長期一定升，現金一定跌。

另外，我地做財富增值，會考慮埋成個組合平衡性。

所以，係你置業同時，最好留有一定優質股作增值。否則，你就會成個財富組合，偏重左係物業一邊，造成風險。

------------------------------------------------

Q22557：

你好龔sir! 經朋友介紹睇你個page，有問題想問問：

話說早排試下開始接觸股票（0經驗+無study）閒錢只有5萬，入左以下兩隻：

1. 3300(中國玻璃)@2.95/3手
2. 6909(百得利)@7.67/2手

請問龔sir點睇呢兩隻？

另外想買你既書睇但無從入手，邊本較適合我呢類0經驗者睇？股票勝經？

期待回覆，謝謝！

龔成老師︰

中國玻璃（3300）主要從事生產、營銷及分銷玻璃與玻璃製品；設計及安裝藥用玻璃生產線。

佢的產品包括無色玻璃、有色玻璃、鍍膜玻璃、節能及新能源玻璃產品（如超白玻璃、低輻射鍍膜玻璃及光伏電池模塊產品）。

這股不算，但又未到好高質。

整體發展正面，但盈利有點不穩，不值得持有太多，同時要留意股價較為波動。

百得利控股（6909）主要在中國從事提供汽車銷售、售後服務及其他汽車相關增值服務。

佢經銷之汽車品牌包括保時捷（Ｐｏｒｓｃｈｅ）及賓利（Ｂｅｎｔｌｅｙ），而豪華品牌包括梅賽德斯－奔馳（Ｍｅｒｃｅｄｅｓ－Ｂｅｎｚ）、奧迪（Ａｕｄｉ）、沃爾沃（Ｖｏｌｖｏ）及捷豹－路虎（Ｊａｇｕａｒ－Ｌａｎｄ　Ｒｏｖｅｒ）。

售後服務包括維修及保養服務、配件及其他汽車相關產品銷售、保險代理服務及車牌登記服務。而其他汽車相關增值服務則包括汽車融資（將客戶轉介予融資公司及商業銀行）及二手車經紀服務（將客戶轉介予從事二手車評估及交易業務的第三方公司）。另集團的經銷店亦可協助召回汽車事宜（汽車製造商可能不時召回汽車以糾正問題）。

質素算是不過不失，但企業獨特性及增長力唔算強，此股只宜小注投資。

其實你現時無投資知識和經驗，對企業估值，點去定平貴未必會太了解。我比較建議你先利用月供模式，去做增值，可以減低買貴貨風險，對你而言會較理想。

現在你每月先用5成儲蓄做月供。其餘先儲起，用一邊月供一邊儲蓄的策略。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

書本上，你可以先睇我架《80後百萬富翁》、《財務自由行》和《股票勝經》，都適合初學者。

同時間，你要去多讀其他投資相關書本、年報，新聞和課程，努力累積投資知識，長線回報才會好。

------------------------------------------------

Q22558：

龔老師你好啊！想請教你1928 金沙中國而家可以入嗎？重有請問呢隻買得過嗎？

龔成老師︰

金沙（1928）有質素的。

佢中短期會弱，加上全球疫情反覆，都對佢有不利影響，不過，相信這只是中短期，以長遠的角度分析，企業仍是有質素的。

在正常的經營環境分析，佢持有的資產好有質素，行業本身好賺，雖然疫情略有反覆，但全球疫情最壞的情況，相信已過。佢長遠是收息及平穩增長型。

但由於仍有未知數，加上之前虧損，因此將企業估值調低左。

現水平在大約在合理區中下部分，如果本身有貨，可長線，耐心持有就得，如果無貨，現價已經可以分注，但都要留現金。投資貨要有心理準備，中短期會弱，要長線，企業有長線投資的價值。

------------------------------------------------

Q22559：

龔成老師你好，人到中年，想投資股票增值財富，但投資知識拙劣，想請教一下老師。

以下幾隻股票，可以長線持有嗎？（一年以上）

00823 領展
01038 長江基建集團
02638 港燈
00008 電訊盈科
01373 國際家居零售

另外有否其他平穩增長股票提供？謝謝老師指教

龔成老師︰

你持有股票，都係有質素，適合長線持有。當中領展(0823)、長建(1038)會有息收之餘，都有平穏增長力。而其餘3隻，主要係收下息。

但留意電訊盈科(0008)負債較高，唔係無投資價值，只係風險較其餘4隻為高，故不宜持有太多。

其實以你中年人士計，都有財富增值需要，但係策略上就會保守少少，主要集中係一些平穏增長股上。以下是一些有質素的平穏增長股，你可以參考下。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、領展(0823)。如果有投資美股，可投資VOO。

現時大市只在合理區，未算平，你可以先用一半資金，分注慢慢買入上述股票，並長線持有。餘下一半資金，就等大跌市，才去掃平貨。

------------------------------------------------

Q22560：

龔sir 最近d 人話恆指成份股換入d 好高PE 既股票 例如6862. 搞到恆指既代表性不及以前 以致恆指愈來愈弱 無乜起息 月供2800係咪已經失去優勢?

龔成老師：

其實恆指進行較大的改革，長遠會將成份股，加至80-100隻，會加入更多不同類別的股票，例如一些新經濟股，長遠反而會令恆指的增長力提高。不過，同時會令波動大左。

由於這改革只是進行左短時間，而我地睇表現，一定要以長期作單位，所以，你以短期表現去衡量，並不正確。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17961-Q17980）

Q17961：

你好，成哥！我係你之前基礎班既學生。首先感謝你係班上面既指導。

課堂裡面你曾經提及過中國生物製藥(1177)係一間有潛力既公司。之後我睇左佢既業績，發現2018年公司曾經進行拼購另一間公司。關於拼購，有幾個問題想請教一下：

1) 留意到公司業績-商譽 數值大增，咁樣會唔會對日後營利有好大影響（如減值）？

2) 公司收購完另一間公司，係咪應該要將被收購公司業績(如股東權益、負債、盈利等）一拼計算？

3) 就住問題2)，如果需要一齊計，我留意到中生製藥既ROE，因為拼購後低左好多。其實係咪需要忽略新收購公司所產生既影響，再做估值?

期待你既回覆。謝謝

龔成老師：

1）有可能，但我地好難這樣去推算。我地最重要是明白這是一個「會計價值」，在分析及估值上，一般都唔會太著重。所以，當佢日後真的出現減值時，同時唔需要太在意，因為只是會計上的增加，非現金流的增減。

2）對，除非只買好少股權，否則，會以合併賬目模式計算。

3）我地最重要是長期分析，中短期可能未反映新公司的賺錢能力，又或受入賬等因素影響，因此我地會以長期角度去分析。

------------------------------------------------

Q17962：

龔sirigg799值得買入嗎？

呢間公司值得投資嗎

龔成老師：

IGG（0799）業務上都有質素的，但卻是有風險的類別。

雖然佢財務數據不差，但業務本質的不確定性大，軟件及遊戲都是變他較大的行業，這種不確定性可以令企業好勁或好弱，因此你要明白這點。

佢股價上落大是正常的，如果你投資要明白這點，就算長遠企業價值向上，都要明白股價波動。這股不是無質素，但由於有風險，因此唔建議大注，持貨不算多就無問題。

------------------------------------------------

Q17963：

我現時33歲，其實最好持有幾多隻股票？每隻比例應該點分配？

每隻股票佔整體比例上係指股數定係指買入金額定係現時價值？

另外，如股票總值佔總資產一定比例，當股票升升跌跌時需要作出買賣調整以維持相同比例嗎？

龔成老師：

如果股票組合在$100萬以下，可以持有5-10隻股，如果在$100萬以上，就持有10-15隻。

個股佔比唔好多過股票組合的15%，同一行業唔好多過30%。

我地會按現時的股價計算（但一般唔睇中短期，而是長期的股價，你可以用平均價計）。

如果長期股價改變，就有可能要作出調整。

------------------------------------------------

Q17964：

老師 剛剛看了你有關物業的貼文 小弟現時在澳洲只是自住物業 一直在這疫情下看樓市有調整才去看看物業 投資。

但即使樓市有下跌，買了平貨， 但有以下出租率優慮。

1）現時留學生都很難回國繼續進修。

2）政府對本地上車提供2萬5澳元的資助，又令多一點家庭買下自己物業。

3）澳洲重開正常生活後如果因經濟情況又說交上租金，政府又再下令屋主不能吹收租金或趕租客走，又令租金生活不穩。

暫時只見不是入市時機。 老師對澳洲市場有何見解？ 謝謝

龔成老師：

如果疫情令樓市出現較大的下跌，利用這時買入，的確是機會，而我地所有分析點，都要以「長期」為基礎。

1）如果只是中短期影響，而你有足夠的資金去守，去「供款」，就不用擔心。

2）你要睇翻你當區的租務情況，租金回報率。其實，如果政策令人好想買樓，就會對樓價有支持作用，雖然租金回報有機會減，但唔需要太擔心。

3）各地都有不同的租務情況，因此如買樓收租，都要明白這是成本的一種。

你要衡量樓價是否跌得夠多，是否吸引。而記住，我地的分析點，一定是「長期」。

------------------------------------------------

Q17965：

老師，之前有請教過老師$6000月供股票，建議係$3000盈富、$1500恆基、$1500港交所，最近我其實仲想加1211同9988的。但睇完書後，覺得係咪其實唔洗心急

調整為$3000盈富+$3000恆基先會好d？等日後其他幾隻股票回落返d再作調整。

龔成老師：

我地會按翻你的年齡、企業質素、平貴，去決定點配置。

如果你年輕，想組合有多少少增長力（而你組合現時無潛力股），就加入比亞迪（1211），不過，由於現價唔平，因此可能只供$1000。因為你永遠唔知佢幾時回落。

所以，你要先考慮組合的方向，再考慮平貴去決定金額。

------------------------------------------------

Q17966：

龔成老師 你好, 我剛畢業24歲, 預計於九月開始上班, 扣除每年稅項、家用、基礎消費後，每月淨收入$23920。每年會跳point及薪金調整，十年後頂薪約50k。投資初哥, 現有70k現金, 1手[email protected].

想6年內存約100萬作首期、持續增值的投資組會(優質股+倍升股)及維持銀行有一筆備用現錢足以6個月開支(約$200k)。(備用現金可彈性用以應付朋友們的紅色炸彈 但絕不胡亂使用)

一、想向老師請教該如何前進
現打算每月約24k的淨收入
1/2用作定期手動買入2800/823
1/2存銀行作儲蓄及等待1177/1448回落至老師曾提及的合理價後買入
老師認為如何？

二、因為工作是輪班的，請問老師會否辦網上課程讓輪班的學生能自行安排在時限內網上上課？

三、想請教如何得知長線投資的收割位？是否以估價得出預期值？

四、另外，雖然現時工作十分穩固及薪金不錯，但工作壓力大/輪班及危險，曾有研究指出我所屬機構於三十歲年齡層的員工出現離職潮。

在儲下大約5-6年經驗及完成專科試後，我須考慮在本原有機構面試嘗試升一級（該職級現時月入頂薪～70k），還是到私人機構闖？

以我現時的職級在私人機構每月多約20k薪金（未連年花紅），但聽聞可以隨時被辭退及未知晉升前景如何。如考慮私人機構是否太短視？

除此之外，經濟環境會影響我到私人機構的可能性，以及將來另一半的職業是否有穩固收入也是我需顧慮的。我心理上該如何走？

謝謝老師的寶貴意見


龔成老師：

1）你的方向可以，以平穩增長股為核心，例如盈富（2800），而領展（0823）的比例可以比盈富少。同時以潛力股作配置。

所選的都是優質，可長線的股，潛力股等跌先入都正確。

不過，你可以同時考慮其他股，唔好只停留在幾隻股，你的「可選股名單」可增加，但都要耐心等跌，或適當時機先入。

2）我有可能在年底，開一個有關於資產配置的網上課程。

至於股票班，由於內容太重要，暫時唔會。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

3）如果股價升得太多，去到超過合理價，都有可能賣。

不過，你要改變思維，你想「賣出」「收割」，這都是窮人思維的想法，有錢人用另一套思維。你以「現金」為中心，買入想賣出變翻現金，有錢人以「資產」為中心，唔希望持有太多現金（貶值）。

4）你最緊要問翻你自己，5年後、10年後，你想做甚麼，那一邊你最開心，最有發展，對你最好，用長期去分析。

------------------------------------------------

Q17967：

龔成老師，想問中國銀行 3988，還會股價向下嗎？

本人於2018年2月，買入價是4.72。2萬股。

雖然每年派息 3700元左右。可惜股價，每況愈下。
現在只有 2.61。

是否應繼續持有此股呢？

龔成老師：

由於中國經濟轉弱，加上壞賬增加，對內鋸一定有影響的，因此組合唔好太集中在銀行股。

中行（3988）本身不是全無質素，但你預中短期都會較弱，只是收息股，如果你想組合增值，應該轉其他。如果你唔想蝕太多，可以等過1、2年，中國經濟好翻D後，這股都會上翻D，到時先轉其他都得，相信暫時睇，唔會大跌的。

------------------------------------------------

Q17968：

HI``成哥,想問吓你意見~~
點睇817:)

龔成老師：

中國金茂（0817）主要係中國從事城市及物業開發、商務租賃、零售商業運營、酒店經營等。

佢都算有一定的規模，加上生意能保持增長，不過就有少少波動，其實各方面都唔差，唯一擔心的，就是佢的負債問題，負債不斷增加，到了有少少令人擔心的位。

近期股價上升了不少，投資值博率減少左，所以如果投資，就唔建議太大注。

------------------------------------------------

Q17969：

龔成老師你好，本人36歲公務員已婚，收入穩定月儲2萬，預計2020年尾有現金$40萬, 太太有現金約$20萬，沒有任何投資經驗。

剛買了老師的五年買樓四部曲，才發現自己錯失很多時間，浪費左好多吸收投資資訊同投資機會去用資產追資產，雖然有點後悔但此時目標明確，希望下年年尾或22年頭置業上車。

想問一問老師，會否建議我這刻投資在股票市場上？
如果可以，會建議我買入那類型的股票？謝謝。

龔成老師：

如果你在1、2年內置業，你應該持有較多現金，唔太建議投資。

因為投資股票，要長期才有回報，而中短期只會因市況波動而上落，無人知你買樓的一刻，到時的市況情況，因此，你應該持有較多現金。

除非股市出現大跌，你見到有一定的投資值博率，才會將部分（都不能多）的資金，投資股票。

如果投資，你應該選一些較穩健的股票，考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q17970：

老師，想問好耐 你多數分析公司業績果d資料，而好少分析d日線圖

龔成老師：

好簡單，因為分析圖表走勢，是無用的！

我20年前，都是一位技術分析投資者，好中意睇圖，因為技術分析的原理是統計學，而我數學會考欏A的，所以較強。可惜，當時我用左幾年，都是輸多贏少。

之後我做銀行同證券行，見好多客用技術分析，大部分輸錢，反而長線投資優質股的，就贏錢。

因此，我已無用技術分析十幾年，而這十幾年我都是贏多輸少。

------------------------------------------------

Q17971：

龔sir想問，身邊長輩及同事（我35歲）都持有好多手3988，包括我爸爸有超過30萬股，但我見你書入面都係推2388（今日去書局睇，最後買咗財務自由行）

如果我追求增值，唔淨係收息，係咪入2388會比3988好？
謝謝！

龔成老師：

銀行業的賺錢能力，比過往年代弱左，不過，不是全無質素的。

中銀香港（2388）與中行（3988）都不是無質素，不過，就唔好對增長有太大期望，同時，唔好太過集中在銀行業。

2388有少少增長力，至於3988，就只是收息股。

如果你想增長，可考慮2388。不過2388都不是高增長股，你應該同時在組合，投資其他股，以建立一個更平衡的組合。

------------------------------------------------

Q17972：

請問3323中國建材是否優質股？最近升上很多，是否入3323的時候

龔成老師：

中國建材（3323）本質都有質素，但不算強。

這企業最大的問題是盈利不穩，主要由於成本問題令佢出現這情況，結果就是令股價不穩，投資者亦會視為有風險，因此這類股的估值不會太高。

之前因內地水災而令這股上左，但長遠增長力其實不算強。這股現時在合理價水平，但賺錢能力不算好強，長線投資都可以，但就未必值得投入太多金額。

------------------------------------------------

Q17973：

龔成老師 謝謝！今日見阿里巴巴入左1手 打算之後以月供方式長線投資 這方法好嗎？

另外 708 恒大健康 公司推6款電動車 但就一架都未見影 呢間公司您覺得長線投資 值得嗎？ 跟比亞迪相比 應該投資邊間？

感覺電動車未來有market 但我又未見恒大有詳細推出時間表 感覺有d擔心

龔成老師：

如果你無貨，小注阿里巴巴（9988）入一手。之後再月供。可以的。

恒大（0708）要小心，未有產品，不斷賣廣告，可能賣比股東睇，而股價近期上落大，現時估值好難，無實質的銷售情況，根本好難分析。只可以話小心。

寧願投資有實質產品的比亞迪（1211）。

------------------------------------------------

Q17974：

Hi龔Sir,你好！我有現金大概180萬。收入大概每月$42,000.每月供樓＄16,000。

有月供股票一供每月三千元2800和2388。明年先從180萬取50萬給兒子在外國升讀大學。不想餘下現金貶值。想買一個大概120萬車位投資，要上會。

現在見823領展$60幾元，都想買3000到5000股等將來升.…可否給点意見?謝謝你

龔成老師：

買車位投資是可以的，車位都是資產項的一種，不過就要留意，租金回報率是否合理，因為近期的回報率較低，值博率只是中等。

至於領展（0823），現價合理區中下部，的確可投資，但你唔能夠只集中在單一股票，應該建立一個平衡的組合。

你的大方向，就是將部分現金，轉為資產，車位+優質股是可以，但如果你股票部分，只投資地產類，這就會令你連同車位，太集中在地產相關。因此你應該進行優化。

另外，投活股票唔好一次過入，最好分開幾次，以減少買入價風險。

------------------------------------------------

Q17975：

龔SIR, 我剛用家人名義買入了第二層樓, 一層自住另1租投資用, 眼見現時淘股估值不貴, 打算借稅貸(30萬左右)全部投入股票, 再分5年慢慢還, 希望搵到一隻穩中求勝既股票全部買入, 你有無推介?

我暫時心水係長實(1113) 或者潤地(1109), 我希望趁年輕盡量借錢買優質資產, 希望在8年後累積600期資產退休

另外，呢兩日研究左隻股票，雅生活同碧桂園服務，物管股營利極穩定，業務簡單易明，增長潛力高，因為將來仲會有大把樓盤落

上網見到龔sir 你好耐之前都有講過雅生活，但唯一問題係佢地呢排升得太勁，PE 已到4X-5x水平，可是佢地未來2-3年既盈利都可以預估到會升幾倍，因為計到母將落成既樓盤面積有幾多。

面對呢個情況，明知佢業績一定升幾倍，但現價唔便宜亦覺得回落機會好細，應唔應該買入？？

我想靠呢隻股將身家翻一至兩倍，我覺得有潛力，龔sir 請指教呢個隻幾時可以買得

龔成老師：

現時大市只處合理區，未必值得你借錢買股，你最好等到「便宜」才出手會較好。

長實（1113）潤地（1109）都是有質素的，前者合理區中下部，後者則在合理區中間。

你借錢買資產的方向，不是錯，但我地用這一招，一般只會在平的時候才動用，如果你這刻用，之後大市跌，你就沒有資金再買入平貨。

至於物管股，的確不少都有質素，雅生活（3319）我過往一直推介，雖然倍升，但未算好貴，可理解這刻在合理區頂部，你可以小注入左先，之後等跌先再加。

另外，你上述所講的，都同地產有關，這是一個不差的行業，但都不能將財富只集中在單一行業，你要建立一個平衡的組合。

------------------------------------------------

Q17976：

老師，想問最近中美關係緊張，中國會否不續賭牌金莎，因為之前都30元入左金莎所以睇完新聞都有點緊張。

另外想請教銀行股版塊最近息率都6%以上，係咪一個值得長線投資既板塊，如果是有無推薦既優質銀行股

龔成老師：

金沙（1928）成功續賭的機會，仍是相當高，當然，無人知中美玩成點，但我仍相信，金沙好大機會順利續牌。

我自己都持有金沙，之前都在$2X增持左。唔擔心。

至於銀行，你預大部分都是收息股，增長力就唔算強。因此睇翻你想組合有幾多比例想持有收息股。

恆生（0011）、中銀香港（2388）都有質素的。

------------------------------------------------

Q17977：

你好 老師 現在我情況供緊保險 供多一年就供完 我考慮想買多層樓 想攞曬保險D錢出來俾首期買樓

你建議繼續放係保險到退休 還是先攞出來 果份保險係儲蓄保 麻煩老師俾意見

其實都係用來將來退休 但唔知道磚頭好還是繼續放係保險好

龔成老師：

如果你本身已經有物業，再買多一層作收租，就唔需要太急，以現時的租金回報率計，物業未必算好吸引。雖然這刻有自住價值，但投資價值就唔算好高。

你將資金買一些投資產品，或收息股，回報會更好。

因此，你的策略可以暫時繼續留在保險，除非你見到樓市有一定的下跌（起碼都回翻D先考慮），又或你想找資其他投資工具，而這些工具又處吸引水平

------------------------------------------------

Q17978：

老師你好，我家庭係深水埗有一間唐樓物業實用五百多尺，因特殊原因丟空十多年，今年決定要重整旗鼓。

層樓因太舊，沒有業主立案法團，樓梯位置又暗又舊，屋內都有石屎剝落情況，大廈外牆維修中，完成後要付費大約幾萬蚊，另大廈消防設施及公用地方日後都要維修，未知需要幾多錢，可能十幾萬。

現有兩個想法：

1.改裝成3-4間套房出租，但要支付大約40-70萬裝修費，及日後大廈未知的維修費用

2.出售，但唔知有無人會買及可能因太舊太爛而壓低價錢，出售後再作其他投資

老師我諗唔到邊樣會回報同風險好d，希望你會比到意見我

補充：樓齡五十幾年，五十年前買斷左

龔成老師：

1）的回報會較高，但你就要較多野煩，區份是適合造這類的，但你到時的管理會較煩，租客的問題多，欠租等問題多，同時你單位可能日後仍要持續維修。

但如果搞得好，能產生持續的現金流，你回報都唔差。

因此，要睇你是否想承受風險及較煩。

------------------------------------------------

Q17979：

龔成老師你好：本人今年36歲，單身未婚，月入$25,000，因之前家中有財務狀況欠下銀行分期貸款(20萬)每月還1萬還有20個月不能提早償還，每月扣除所有開支淨儲$5000，資產只有現金15萬，請問我這樣情況和市況應該如何部署最好呢？

1. 按兵不動保留現金等大跌市才出手？

2. 每月開始月供股票減低風險？

3. 繼續儲錢直至20個月後償還所有貸款再考慮投資？
感激等待老師專業建議！

龔成老師：

1）首先，你要以選款為首要考慮因素，如果計算資金要還款，就不能投資。但如果你計算後，有資金利，其實可以買少少股都得，如果你本身完全無股票在手，其實可動用現時的少少，投資一些穩健，有質素的股票，如果不懂選股，就投資盈富（2800）。

2）對，因為能將買入價平均，對於未有把握投資時機，以及未有企業平貴概念的人來說，這是一個很好的做法。

3）你最重要是計好數，你可以用兩年作為一個單位，計翻自己預期有多少入入支出，減去還錢後有無現金剩，如果有現金剩的話，其實在這段時間，都可以少少去運用。

------------------------------------------------

Q17980：

你好
你點睇2018呢隻股？

龔成老師：

瑞聲科技（2018）不差的，本身有一定的規模與技術，長遠發展正面，不過，佢增長力不是好強，只能視為平穩增長類別。

現價合理，可以分注投資，長線持有。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17301-Q17320）

Q17301：

Sir, 我係股票班舊生, 用阿Sir這8堂所教知識去分析了1830/必瘦站（包括跟同行比較～發現必瘦站比2138及1827更有發展及優質, 之後填寫6張企業分析表）覺得此企業屬於優質股。

～分析如下（有時間慢慢睇, 唔使急， 謝謝🙏）

目標客戶以中產以上人士為收入來源（屬中高檔次, 有能力將成本轉嫁給客人）睇過他們過去5年的年報, 發現他們現金流非常強，而財務穩建, 沒有向銀行借貸。

營業額～ 除2017年（-13.89％）2016 2018 2019都有增長， 當然2020年疫情下仍然有4％增長已經算係唔錯。

1）管理層積極進取, 拓展海外發展（包括2020年2月在澳洲開業, 表現理想,

2）還想在今年進攻美國美容市場）。但疫情下可能會較謹慎考慮開店舖問題 （或者趁疫情下以平價的租金買或租舖, 去發展美國美容業務）。

3）另外, 亦看了2019 2020 年報， 他們都積極發展大陸市場（包括大灣區）

但集團仍然以香港為主要發展重心地區。

4）至於男士美容業務（講了2年仍沒開始, 可能待2021年才推出）

5）流動比率～過去5年介乎177％～205％（合格）

6）ROE～5年內有增長， 今年53.04％

7）總負債/股東資金比率～今年91.35％ 算合格嗎？過住4年51％～74％

8）投資活動～ 過去5年都有投資發展企業（例如擴充香港及澳門/中國業務）（租舖/買機器/增加員工人手。。等等）

9）其中評估表內（估值～行業市盈率）

我以2138/香港醫思醫療集團的市盈率（12.43～12.85）及1827/卓珈控股的市盈率（28～30）比較, 好似太高, 所以用回必瘦站市盈率（7～9）

過住市盈率～亦以（7～9）

推算合理市盈率～ 以8～10計算估值, 所以推算約$1.44～2.20（這個股價合理區範圍正確嗎）如有錯請賜教！

必瘦站應該不屬於資產型企業， 所以市盈率及市賬率分析應對其分析平貴指標作用不大, 對嗎？

預估下年派息會減少, 因為疫情可能負增長（中國/澳門及澳洲）,但香港營業額應該不會太過差

最後發覺分析1隻股票, 起碼7至14日時間（包括睇年報, 所以我非常佩服你）。 必瘦站的年報算是簡單, 如果地產/銀行或大型企業, 肯定要1個月時間。

非常感謝你細閱以上分析, 已將8堂所學的僅餘嘅投資分析及知識盡量發揮。

龔成老師：

你的分析不錯，基本上已掌握了課堂所學，並講出了重點。

1）2）3）佢的發展方向，以香港為重心，並同時會發展中國，相信中國是其中一個管理層會重點發展的地方。

但由於管理層由的表態曾經出現反覆（你睇佢多年年報的管理層講話就明），過往一直用高派息政策，反映發展心態唔算強，但都會發展。

到近年，曾經表示想大減派息大力發展中國市場，最後，派息後保持高水平，有時都難以完全掌握管理層的方向。

4）暫時唔好有太大期望。

5）6）7）對，合格。但由於高派息比率，ROE無反映到再投資回報率，因此只反映原有資金回報率。

8）相信佢仍會保持發展。

9）你的方向正確，我會比你估值計算出的高少少，主要因為現金流強，派息高同時仍有增長力。加上佢就算在疫情期間，都無虧損，這點令人有驚喜。

另外，由於之前派左大額股息$0.34，因此我地計算出來的估值後，都要減翻相關數目，以反映企業現金的實際流出。

大約$2.X是合理區，去到$1.7以下是平。

------------------------------------------------

Q17302：

疫情人工黎緊幾個月都要減四分一，開始迫我面對之前一直打算做既網上小店副業同埋真係報左幾個課程增值自己。

同埋我更清晰自己一直只有打工都係死路一條，人要多把刀比自己用。性格問題囉，我最討厭停滯不前既感覺。

但萬事起頭難 ，岩岩起步又要儲stock ，要用啲資金。唉 ，好多不確定令我開始有擔心既感覺。

幸運既係 仲有份工頂住，

前兩年我睇過相，批過命 ，又話我無股票運 又唔好同人夾份做生意，所以呢句野一直有啲影響我...好既係我無再玩短炒。

龔成 我都係80後 你真係好叻又努力。無㗎，我單純想呻下 ，我諗你都睇過秘密呢本書 ，我相信呢種力量。加油！

龔成老師：

加油！我地總會面對困難，而我成日同自己講，困難是我令進步的因素，短期當然會辛苦，但長遠反而更加好。

最重要是保持進步，同時要對自己有信心。

《秘密》這書當然有睇過，我的書都有講吸引力法則，因為這的確對我地有影響。網上小店保持發展啦，好多野要試先有答案。

------------------------------------------------

Q17303：

老師，因隻932而差點永不超生既我。因為最近既疫情問題反而令我增加了收入，現在手上既流動現金差不多有十多萬，想捉緊今次機會突破返，將失去既時間同金錢追返晒。

但因為國安法，而中美又會產生太多不明朗因素恐怕引發蝴蝶效應，所以近期前我都未會採取買入資產既行動

想請問老師意思，呢段時間除左留有現金外仲應該要點準備機會來臨？

龔成老師：

順騰國際控股（0932）生意無增長，年年虧損，加上2019年的核數師意見有少少問題，這都反映企業本身的投資價值唔高。你要多從企業的角度去分析。

你唔好太著重中短期分析，唔好太著重事件的分析，要著重翻企業的價值，以及財富組合的配置。同時要長線投資。

現時的大市，你唔好100%現金，雖然有些版塊熱炒，但同時有些版塊較合理，只要你以分注投資進行，仍是可以的。如果你擔心，就唔好入太多貨，但唔能夠無貨。

------------------------------------------------

Q17304：

老師你好，恕我冒昧想問一下關於我的狀況如何投資。

我4X歲，月入$35,000，剛離婚要自己搬出來，暫時租住朋友一間的房屋月租$15000，每月可儲蓄大概$7000

打算短期內購買一間500多萬的房屋，手上流動資金大概10萬元，請問我應該如何部署往後的資金？

龔成老師：

如果你想買一層$500萬樓，就算9成按，都要有一定的金額，你要盡力加大儲蓄，希望每月可以儲到$1萬以上。

你要計算計自己打算幾時買，如果中短期，就未必適合將資金投資，如果是中長期，資金就可以適度投資，但都要投資較穩健的股，平穩增長型，如盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q17305：

你好呀，我一路以來都追開你嘅書 係你嘅fans 呢一兩年都有參考著你嘅書投資 首先想講返聲多謝 因為睇完你嘅建議再去睇年報 最尾成功係比較平嘅位買入恆基兆業

呢排自己睇到金沙中國價錢都嘅吸引 市盈率係15-16咁又見金沙城洒店改建嘅倫敦人就開幕 覺得有潛力 想慢慢分注買入 想問下你嘅意見！唔該曬

龔成老師：

恆基（0012）有質素的，不過增長力比過往減左少少，但長遠仍有投資價值。

至於金沙（1928），現價合理，中短期這股會較弱，始終疫情令佢生意影響，但我地投資股票一定是睇長遠的，因此這股可以長線投資。現價有投資值博率，全注已可以。

但都要同時留有現金，唔好心急用盡資金。

------------------------------------------------

Q17306：

龔老師你好，本人47歲，從事電梯維修判頭，太太家庭主婦，有2幼稚園小孩。本人因上年中風、所以現時身體影響工作。不能夠長時間開工。本月收入不太穩定。

現租住近女兒學校荃灣市區3房單位，租金$18000。早幾年放售物業約5百萬現金。暫未有上車。

現手持5百萬現金，應該買入那些收息股可用來幫補家庭開支及租金？ 謝謝你

龔成老師：

由於你收入唔穩定，加上有一定的家庭負債，投資唔建議進取。持有的$500萬要小心運用。

你最好以「低風險，穩陣，現金流」為資金配置的主軸。你可以將這$500萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、匯豐（0005）、工行（1398）、置富（0778）、陽光（0435）、深高速（0548）等，大多有5%股息

你平衡的投資這些股，除了可以得到穩健的收息收，同時可有效的分散風險。

另外，小部分投資盈富（2800）都可以，而收息的ETF，如ＧＸ恒生高股息率基金（3110）都可考慮。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$500萬資金，平衡地分配在上述的項目上，對你來說是最好平衡風險，同時有穩定的現金流。

如果你能承受到小小風險，就可投資較多平穩增長股，即是銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。這部分要睇你的家庭情況，以及風險承受能力決定。

------------------------------------------------

Q17307：

老師你好！我準備24歲，月入$25000，手持現金33萬（先前用來作定期存款）。而今年開始每月月供匯豐股，每月$10000，已供半年，最近亦開始接觸股票。

而我看到老師在fb都建議月供盈富，我是否應改變現時月供匯豐？

另外，現時想開始學習買股票，應如何入手？以及現時有什麼有質素的股推介？謝謝你！

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，匯豐（0005）以你的年齡來說，並不適合。你應該先投資盈富（2800），月供可以。如果有能力，就加少少其他股，甚至潛力股，但如果選股能力不強，就暫時供盈富先。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。你可以睇《股票勝經》或上堂都得。

------------------------------------------------

Q17308：

你好，本人29歲，有穩定職業，月薪約四萬，扣除開支後大約可月儲二萬八千，現時大約有儲蓄八十多萬。

請問如想盡早開始投資股票的話，應該選擇那些股票呢？

本人屬於低風險和保守的性格，每月投資股票應佔每月可儲收入多少成呢？謝謝。

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，加上你是較低風險，因此這刻不用急著投資潛力股。你可以集中在平穩增值股先。

你可以自行分注或月供，每月預算大約投資$15000。

你可以考慮盈富（2800）$8000。

另外再加幾隻（每隻$3000）：銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

至於現時的$80萬，暫時只能動用$20萬，分注投資上述的股都得。

------------------------------------------------

Q17309：

龔老師,我係投資新手 想打算用15萬去投資收息股 想買中銀香港,長和,中國神華,中移動呢4個 分散投資好定係買晒其中一個好呢?

龔成老師：

分散是較好的，因為你並不是「賭」某一股的表現，而是要建立一個組合，要做好「配置」。

你可以投資中銀香港（2388）、長和（0001）、中移動（0941），都是可投資收息的股。神華（1088）業務有潛在波動，以長遠收息的角度，未必是最適合。

另外，你可以同時考慮香港電訊（6823）、置富（0778），都是不差的收息股。

------------------------------------------------

Q17310：

想問如何計算便宜的價格去買股票？

龔成老師：

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q17311：

老師你好，想請問如果我想月收股息15000

我以家30歲每月只可用2000黎供股我又咩都唔識咁我供哂盈富基金先同埋想學投資又冇時間想堂咁淨係靠睇書得嗎老師有咩書可推介比新手睇?

因為我住離島以家有個女又好困身以家暫時都係買電子書睇咩都做唔到。請老師指點迷津

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你這刻應著重「增值」。

其實你這個年齡，仍是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

你可以先增加知識，可以不斷睇書，《股票勝經》是很好的入門書，你睇完這本再睇其他。

------------------------------------------------

Q17312：

龔成老師，你好 我係你以前股票班的學生，我睇左你本新書《5年買樓4部曲》，覺得老師你分析得好詳細，好活學活用。

我同我女朋友拍拖6年, 打算兩年內有結婚買樓, 我地兩個加埋月入HKD65k, 暫時有HKD1.7m liquidity cash，用作首期及裝修費。

我地亦問左銀行做初步審批按揭，可以做到9成按揭同買700萬左右的樓。因為我地係初階投資者，prefer 大型屋苑/ 藍籌屋苑，有升值潛力，實用面積大概300-400呎，比較鐘意海景。

由今年4月份開始睇樓, 包括大型藍籌屋苑 e.g. 黃埔花園, 將軍澳新都城, 南豐新村, 德福花園, 淘大花園等等。

睇過咁多屋苑, 我地prefer大角咀港灣豪庭, 港島南區置富花園同將軍澳中心. 三區都算近返工地點(中環/ 鰂魚涌), 同返娘家(西環)都比較分便. 想問龔成老師會點選擇?

以下係本人少少分析, 請老師作出指點:-
大角咀港灣豪庭優點:-

- 樓齡17年, 唔算舊
- 位於大角咀, 鄰近栢景灣, 維港灣, 帝柏海灣等豪宅
- 屋苑樓下有個小型商場
- 部份單位有海景
- 鄰近返工and 娘家 (20-40 分鐘車程)

大角咀港灣豪庭缺點:-
- 位於港鐵奧運站同南昌站中間, 交通不算太方便, 由港鐵站往返港灣豪庭需時行10-15分鐘, 中途全程露天步行
- 鄰近九龍殯儀館
- 要買生活必需品要過旺角/ 奧運
置富花園優點:-
- 景觀開揚，部分會有海景
- 比起市區呎價平
- 未來會受惠於南港島線北段(華富站)
- 鄰近返工and 娘家 (30-45 分鐘車程)
- 校網唔錯

置富花園缺點:-
- 大廈外牆正進行維修, 要額外分期灘還到2022年第一季，入住初期要忍受環境差
- 樓齡41年
- 交通往返其他地區遠, 冇會所
- 華富邨將會重建，會影響將來的海景同重建時會影響將來的居住環境

將軍澳中心優點:-
-樓齡較新 (17年樓齡)
-有會所
-交通方便, 鄰近將軍澳站
-鄰近大型商埸 (i.e. PopCorn), 容易買生活用品

將軍澳中心缺點:-
-人口稠密度高
-返工放工等繁忙時間港鐵超多人
-如果港鐵有任何事故, 出市區比較困難
- 離娘家(西環) 比較遠 (45-60分鐘車程)
- 校網一般
仲有兩條問題想請教老師

Q1: 我地prefer買有升值潛力, 會考慮受惠於南港島綫（西段）的樓盤, 知道老師推介田灣, 但係該區單幢樓比較多同樓齡比較舊, 請問老師有冇推介既樓盤? 如果冇, 置富花園會唔會都係一個唔錯的選擇?

Q2: 根據我地現時睇樓既經驗, 比較好的樓盤通常一個月內賣出, 所以議價空間比較少,賣出價一般都比銀行估價高少少。我地應該等市況靜D再壓價, 但係又擔心等等下樓價又升, 定係貼近銀行估價都可以買樓?

龔成老師：

1）就上述的3個屋苑，置富花園及港灣豪庭較好，始終對你的方便程度較高。

兩者中，港灣豪庭的升值潛力會高D，至於置富花園，由於就算將來起南港島線西段，相信都唔會經過置富，只會行下面的華富。

但如果只考慮方便你自己的程度，可能置富又會好少少。

中短期維係問題唔好太在意，最重要是睇長期。

另外，你可以睇下黃竹坑的金寶花園，雖然不是大型屋苑，但近黃竹坑地鐵站，加上將來隔離會有商場，生活配套會慢慢齊。不過呎價都唔算平，但你可以睇睇。

2）如果你可以等得，最好是耐心少少，但你要睇多D盤，要有心理準備有D盤會無左，但有耐性是較易買到好野的。

但現時樓市唔跌，的確較難買到平野，所以只要你認為合理價，有得平少少，都可以考慮。

------------------------------------------------

Q17313：

老師你好，本人買股票已有十多年，不過都係蝕嘅多。
目前的組合也不樂觀，所以想請教你怎樣處理現時的股票。

年初時好不容易才等到2899紫金礦業返到家鄉，放出後以83蚊買入1000股823領展，目前仍持有中，該長線持有嗎？

另外還有以下股票：

9988阿里巴巴 100股，買入價176
3323中國建材 10000股，買入價12.7
1618中國中治 10000股，買入價4.97
1333中國忠旺 25200股，買入價5.85

想問下以上除9988外、其他點處理好、該止蝕轉換成其他股票嗎？謝謝！

龔成老師：

阿里（9988）可以長線。至於領展（0823），有質素的，可以守。

至於另外的3隻，質素與增長力都不算好高，雖然不是劣質，但持有的價值不是好高類別。

中國建材（3323）如貨不多，可守，但預佢增長力唔強。中國中冶（1618）長遠應該賣出。中國忠旺（1333）長遠都應該賣出，但由於不是零質素，因此唔一定要立刻賣，可以等上翻D先。

長遠來說，你應該轉換成更優質、更高增長力的組合。

你有三大問題。第一，選股能力不強，你要考慮企業在行業裡的優勢，以及長遠行業的發展力，唔好只著重當刻的情況。

第二，太過著重買入價，其實你應該著重資產質素，要建立平衡與優質的組合。

第三，無用平均的買入方法，除非你掌握到企業估值，否則，以平均入市的模式進行，這樣能有效減少買入價的風險。

------------------------------------------------

Q17314：

老師，我從上年八月開始買入領展的月供股票，現在佢既市盈率係負數，咁我應唔應該繼續供落去呢？謝謝老師

龔成老師：

我地投資股票，就是買入企業，唔好太著重中短期因素，要睇長遠的企業質素與發展。

領展（0823）有質素的，中短期香港地產市道當然較一般，但長遠仍是正面，增長力或者不及過往年代，但要平穩增長及收息是無問題。

佢市盈率出現負數只是因為物業重估因素，這只是一些會計上的數字，對業務無影響的。

另外，月供股票一定要長線進行，唔好中間轉來轉去。

------------------------------------------------

Q17315：

老師，本人47歲、3年前買咗樓平租比自己人、租同供等同！

我買咗收息股3、6、405、435、778、1038、2388、6823、大約共160萬、現金淨40萬！

月可儲$10000
請問老師覺得我仲有咩安排會比較好呢！
謝謝老師提點

龔成老師：

你持有的，都是有質素的股票，雖然增長力不算強，但以你的年齡情況，其實無問題，配置基本適合。

你現時有物業，同時股票都佔財富一部分，基本上能做到股樓平衡，配置不差。

現金$40萬，以現時的大市平貴情況，都算可以，但暫時唔好再動用這$40萬，除非出現大型跌市，否則作備用及等機會之用。

至於月供可儲$1萬，你可以投資平穩增長股，分注或月供都得，例如盈富（2800），如果你可以承受到風險，就可以將其中$3000供一些潛力股，因為你的組合現時並無潛力股。

------------------------------------------------

Q17316：

成老師！1876 怎樣看 ?

龔成老師：

百威亞太（1876）以質素來說，的確不差，佢係百威亞太控股為AB InBev Group的一部分，係亞太地區最大的啤酒公司。

佢從事生產、進口、推廣、經銷及出售超過50個自家擁有或獲許可使用的啤酒品牌組合，包括百威、時代及科羅娜，以及旗下多國品牌和當地品牌，如福佳、凱獅及哈爾濱。

佢係多個國家都有相當的市佔率，同時增長力強，就近年的數據睇，盈利每年都有雙位數增長，業務、品牌、質素絕對有。

過往股往少少貴，現時合理翻D，你預現時是合理區中上部，分注投資，長線持有都可以。

------------------------------------------------

Q17317：

龔成老師你好，我一直有留意龔成信箱，希望可以為自己制訂一套良好的投資組合，包括美股、港股、RIET、債券等，但過去5年覺得投資上走彎路，錯誤的港股投資及炒股導致數十萬損失。

因此在此希望請教一下龔成老師，以制訂一個健康的投資組合並盡快達到財務自由。以下為本人的基本資料：

今年29歲，從事穩定行業，月入約5萬，每月可儲2-3萬。另每年公司Bonus約20萬。主要資產如下:

1. 一香港物業出租，價格1000萬，做400萬按揭，每月供款約15000，租金收入24200,將來用作自住用途:

2. 香港股票50萬:包括中國石油化工股份(13%)、中國鐵塔(5%)、建設銀行(37%)、石四藥集團(8%)、藥明生物(15%)、長實集團(9%)、中銀香港(10%)、京東集團(2%)

*本人認為太集中在金融股、想調整組合加大中國鐵塔投資組合份額降低平均成本(原買入價2.13)及另外再買入吉利等增長股;

3. 美股約HKD15萬: 包括Beyond Meat、Zoom、波音等;

4. MPF17萬，另外每月額外自願供款1000

5. 現金約30萬

目標希望在40歲前每月產生4萬元現金流，現在正考慮在投資組合中加入星加坡及日本RIET，以及未來到英國置業、請問可以做到嗎?

龔成老師：

首先，你有「建立財富組合，做好配置」這是正確方向，持有優質資產長線是大前題。

不過，你這年齡，可以進取翻少少。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你應該在40歲前，著重增值，到40歲，轉為現金流類別。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，建行（0939）、中石化（0386），以你的年齡來說，並不適合。

你可以加大少少吉利（0175）及中國鐵塔（0778），長線持有。

至於外國的房託，只要有質素的都可考慮，但要留意不少房託都以收息為主，增長力不強，而你這刻應加強增長力。

------------------------------------------------

Q17318：

老師你好，我同先生每個月可以儲10000，有樓，年紀32歲，流動資金50000，請教我地怎樣投資可以做到財務自由

龔成老師：

你地的現金唔算多，建議$5萬唔好動用，除非大市有大型下跌。

至於你每月$1萬，暫時可以將一半投資，你可以月供股票或自行分注投資。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$5000
。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17319：

龔sir,感謝你。
又一年過去，眨下眼我26歲了。我已完成了第一個一百萬。

感激遇到你令我對財務策劃上有更多既認識令我對自己有要求有目標，雖然還未稱得上熟悉股票市場，但我仍然會保持學習的心 堅持每月供股為我的未來努力。

下年目標希望能購入一層800萬以下的自住單位。
希望我會成功

龔成老師：

加油！你已行在正確的路。

理財是長期戰，你要保持進行，方向已正確，保持努力就得。提高自己的投資知識，以及不斷儲錢。希望你能成功置業。

由於你打算在1年裡買樓，因此宜持有較多現金。

------------------------------------------------

Q17320：

老師，目前我23歲
月供2800中。

想問月供美股可考慮嗎？
有邊隻可以選擇？

我上網留意 美股可一股買賣 只需幾百元，對嗎？

龔成老師：

唔好因為入場費低而強行投資某一股。

最重要是這股有質素及長遠發展正面。

美股你可投資，只要當中是優質股，以及你熟識就得，你這年齡，可以投資增長力較高的股票，盈富（2800）可保持月供，至於美股，你可留意一下科技類的，例如GOOGLE等。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。