［勞斯和萊斯，都是花樣男子］都冇乜特別，咪賣車咪到出要出通告。賣架勞蘇萊斯幻影呀。三球半，然後淨賺兩球，有士啤蘇京入帳。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
告個急先：Ivan已被炒，已成失業人士。未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。 一星期至少出返六篇文．月頭訂最抵！月費80

1. 仲一雞兩味添，首先係「適用百分比率」（陣間解），超過5%但唔夠25%，所以今次係係「衰乳披露交易」，即係「通知你」，但唔使問你意見。咁事實係丫，大佬，買部水機都要股東投票咩。

2. 但賣部車都搞到變「衰乳披露交易」，就因為個「適用百分比率」高過5%。點計？就有好多計法（請睇「香港上市規則第14.07條」），好多款，計盈利呀資產呀咁，是但中一樣夠5%都要變「衰乳披露交易」。

3. 今次應該因為……間公司得7000萬市值唔夠。咁你賣架車350萬嘛，恭喜你，剛剛超過5%！中咗「適用百分比率」之中嘅「代價比率」。「有關代價除以上市發行人的市值總額」。但點解賣嘢嘅錢會同市值比？點解我股價炒上幾十巴仙時先做，同一單交易就唔係「衰乳披露交易」？就問證監同港交所了。

4. 咁你話，可唔可以好似慳印花稅咁，賣架車叫條友收順啲，甚至陰陽合同，寫300萬啦，暗啞底畀返50萬你？冇話唔得（啩），但根本唔需要。咪又係個Cum Sec（＊）做！你估老細自己計咩。

5. 第二，由於個買家，同公司本身，都係同一個股東（唔係渣過半但都重要），德祥地產（199，隻嘢認真199的，比1919或者1199或1999更加199）。所以亦都係關連交易。呢啲就防止啲股東自己左手交右手呀，平價將啲嘢收返自己袋，淘空公司資產之類。但因為個「適用百分比率」唔夠25%，又唔夠1000萬，就又係唔使你批，知會你得了。

6. 咁有乜意思？冇的，志在畀啲無聊人（即係我）寫下文咁。咁但，「呢啲咪良好嘅企業管治」，「賣部車都要出公告」。但講真，唔記得出嘅，就恭喜你，九成都係個Cum Sec孭鑊。冇錯有時會罰埋老細（有啲捉去上再培訓班添呀，好Q好笑的，好似你開車畀人扣分咁），但你搞著老細，老細咪又係拎Cum Sec祭旗

7. 不過食得鹹魚抵得渴啦，Cum Sec呢味嘢，唔易做，但都好丕的。但就睇你老細點了。

8. 至於呢間577嘛，早幾年好似仲有10蚊（定合過股？），而家就係仙股。6000萬市值，你話呢？

9. BTW，仲有個都市傳說，話股票跌到1個仙不能再跌（的確掛牌只能夠掛到1仙，亦冇低過1仙嘅報價），所以只有upside 冇downside，希望呢度啲讀者冇咁弱智走去信。邊個同你講嘅，一巴星佢啦。

10. 同樣類似嘅東西，仲有話叫你買大細，輸咗就double，買到贏為止。或者叫你賭世界盃之類，長買和波，輸咗就加倍。

11. 以上之類嘅東西，相信呢度啲讀者冇咁弱智走去信。但更重要係，總有啲友自以為發現新大陸，好撚神秘咁話你知，「拿埃汾我見你係朋友先話你知」「我有條財世發財好橋」。

12. 呢，呢啲友，真係有樣睇的。我有個朋友就係咁，小學佢已經同人講打Street Fighter 去總統山拎條鎖匙之後會有澳洲佬非洲佬，仲可以自己出一陽指七星大波動。佢堅持有件咁嘅事。然後到中學時我串佢佢就話佢冇講過，但之後呢，「拿埃汾我見你係朋友先話你知」，就話畀我知連續打和十round 就會有終極波士「成龍」出現（日本仔啲英文害人不淺，You must defeat Sheng Long to stand a chance）。然後？而家，佢就成為咗一個Fake news 撚。

13. 真的，你身邊總有啲咁嘅「秘技撚」「發財撚」。硬係好地地做個Cum Sec唔得的。

（＊）當然係我特登打錯，但之前有單醜聞，cum-ex scandal，就唔係走去約咗舊女友咁簡單了。詳情可睇維基（https://bityl.co/6IsB）。

＝＝＝＝＝＝＝＝＝＝＝＝＝＝
2021比別人知得多。subscribe now。Ivan Patreon，港美市場評點，專題號外，每日一圖，好文推介。每星期6篇，月費80，半年已1400人訂！（https://bityl.co/4Y0h）。 年費仲有85折
＝＝＝＝＝＝＝＝＝＝＝＝＝＝

［職場胃腩］Network鯨如性行為。你想？哦，咁啱呀？我都想，但點解我要同你？

可以直接睇Patreon 全文，呢篇免費的（https://bityl.co/4dut）．亦畀你熟習下個界面。當然覺得好睇就去訂吧（https://bityl.co/4Y0h），月尾訂即時扣錢，12月1日又再扣，我會回一個月月費畀你。

煙草特醇
Network鯨如性行為，過癮，但點解要同你？
真人真事：那年十八，母娼起二，溫啤霞
Be interesting, my friend
傳音過王傳音：搞個 個人名牌，其實唔難
Let me 心噏 after writing so much

TLDR：個個都知Network鯨緊要，但你想Network鯨，對家做乜要理你？我碌電話睇埃汾Facebook或者Patreon唔好？所以，首先你自己要 become an interesting person。另外，略為搞下你嘅個人品牌，都係必要嘅。唔使咩好大工程，開個FB Page或者開個blog都可以。唔使錢，咁你都話冇時間嘅，就睇返第一句啦下。

煙草特醇



1. 一路都有讀者叫我寫多啲「職場」文，特別係「暗黑職場」（例如呢篇，好大迴響，主要係個題改得好）。自問職場上冇乜咁巴閉，冇乜嘢可以教人，「頂多係跳過幾次草裙舞咁」。不過後來諗到，「我其他方面都冇乜咁巴閉」，都仲係厚顏無恥咁寫，而讀者又受喎。所以，好吧，職場胃腩，重出江湖。


2. 今日想講嘅係，一條巨鯨，Network鯨，哈哈哈，係咪好爛呢。呢個課題想寫好耐，今次觸發點，係冇嘅。勉強嚟講因為我剪頭髮，10分鐘就諗咗呢篇文嘅flow。See？平日練功最重要，你睇到係台上一分鐘啫。

3. 篇文雖然放在Patreon，但open to all．等同平時嘅FB Page Post，不過多啲圖就放Patreon，同埋益埋Patreon讀者。亦都等冇用過嘅熟習下Patreon平台。唔會係常設環節，當然如果反應好嘅，客串可以變正餐。實不相瞞我之前有啲電台節目或者專欄都係客串變正餐，做人抵得諗都幾重要。啱睇就去訂Patreon吧（https://bityl.co/4Y0h）

Network鯨如性行為，過癮，但點解要同你？

4. 講返，Network鯨，大家都知係咩一回事。或者係啲event正餐前嘅foreplay，有時叫Mingle，拎住杯嘢周圍派卡片。或者係乜乜IPO會，台上有台上講，台下有台下講（香港特色），交換下卡片，盤下人地做乜，得閒飲茶。或者係有人搞局，放工去飲嘢，介紹個朋友你識。留意本文只係討論以工作，上位，搵著數，做生意之類嘅Network鯨。約炮求偶當然都有Network鯨，有時第一種會變第二種，但都係分開講。

5. Network鯨重唔重要？你問錯問題了，梗係重要，係好撚重要。香港地嘅嘢（第度都可能係），識人好過識字，幾時都係。如果呢樣你都唔信嘅，都唔使落去，「你去碰幾年釘，之後再返嚟睇」。

6. 我覺得討論「Network鯨重唔重要？」好似討論「應唔應該有婚前性行為」咁，浪費時間。

7. 所以，同性行為一樣，唔使討論重唔重要，爽唔爽。如何成功？如何做得更好？先係重點嘛。

8. 但，同性行為一樣，大家都想，大家都知過癮。「但你有冇諗過對方感受呢又」。直接啲講，「返去搵你_ _ 出火啦」，你想性行為，哦係呀，好呀。但關我鳥事？我唔想喎（主要係唔想同你）


9. 唔係嘩眾取寵，好多人都同你講Network鯨好重要（廢話），教你點Network鯨。但，有冇諗過，「點解人地要同你Network鯨」？點解我唔係睇多套葉念琛（新嗰套相當唔掂），寫多篇文，訓多兩個鐘，而係要同你Network鯨呢，又？

10. 即係唔係話功利計算，做朋友唔係應該咁計較。但做朋友都講「無友不如己者」，Network鯨唔係做朋友嘛，難聽啲講句，「大家都係搵著數」。最熱心Network鯨嘅係乜人？梗係小薯。好合理啫，你想識人，你嘅時間唔多值錢（sad but true ）。你係王維基嘅，大把人巴結你啦，使撚Network鯨咩。你去到邊都人人爭住識你，你要諗下點樣 奀Network鯨，趕走班友又唔好傷害佢地弱小心靈。

11. 咁但，多數人都係小薯做起架啦，唔想行呢步嘅，下世投胎做富二代。所以你一定面對呢個問題：對方嘅時間值錢過你，佢識嘢嘅多過你，佢人脈廣過你。咁，點解人地唔係玩電話，要同你Network鯨呢？

真人真事：那年十八，母娼起二，溫啤霞

12. 好多人會笑，但我再講一次，我真係一個introvert。唔係咩有啲名氣成就（而我冇）就扮晒「其實我好唔鍾意應酬」嗰種，由第一日我都唔鍾意，亦因為我唔掂。點睇我都唔係一個善於社交嘅人，外型也不討好，著平嘅西裝，侏儒村嘅恤衫，好多時呔都唔打，亦唔帶錶。正路一枱人，你只會係出於禮貌唔好skip咗我先會畀卡片我。


13. 咁但，唏，你以為你唔鍾意就唔使做？唔鍾意都要做。我都做過呢種，不停出席呢啲場合，塞卡片畀人啦。或者在個cocktail party中，真係crying in the party，那年十八 母校舞會 站著如嘍囉咁，人人講年尾去邊滑雪，下年花紅幾多，我年尾就在屯門打大快活邊爐。

14. 唔好以為只係「小薯」先係咁。實情去到2014年嗰時，喂，我做咗10年融8年分析員啦，人工職位都唔算太薯啦，但都係咁。你有求於人時就係咁。我好記得，嗰時轉咗工，去到間細嘅公司，真係識你老鼠。咁而嗰時就真係比較「財演」。我最鍾意呢，就係去啲業績會。

15. 業績會有乜？除咗有業績，仲有會，仲有記者。我就去搵佢地傾計，特別係搵啲後生嘅妹妹仔（事實財記係多女仔）—唔係有乜企圖（唔好嗰度屙嗰度食，職場第一誡），而係，因為妹妹仔入世未深會聽我講。「換著啲阿姐十尺外見到我已經閃開，呢條友很煩」



16. 係喎，嗰時做乜？嗰時就塞卡片畀啲妹妹仔。「拿，你可以訪問我的」「拿，你可以叫我上節目的」。成件事十分《出埃及記》嘅溫啤霞， 「你搵我啦！」「你搵我呀！」。


17. 唔止，更加丟人現眼嘅係，我仲叫埋太宰治（以前條靚嘅花名）同我一齊去！真係母娼起二，買一送一，黃子華話齋，未試過雙飛你嘅人生唔完滿。而《母娼起義》就真係一套戲，巧睇，電影節上過，我睇咗，仲同個韓仔導演握手。套戲講乜？英文名就叫Mother Is a Whore。就係個仔孭住不良於行老母周圍接客，好感人的。當時我情況都差不多。太宰治做乜？未試買一送一，「你當佢未成年啦」。但，佢就負責周圍同啲記者講，「拿，你可以搵佢架」。


18. 以上種種，全部係事實，當年幫襯過，I mean收過卡片嘅，可以作證。

19. 點解搞到咁核突呢？咁固然因為我唔靚仔，著侏儒村嘅恤衫，又唔帶勞力士，唔係一個金融才俊。但，今日我依然唔靚仔，仲係著侏儒村嘅恤衫，亦唔帶勞力士，亦唔係金融才俊。但而家情況冇咁差了。

20. 前後有乜分別？好簡單，我出名咗嘛。問題係，無啦啦點會出咗名？雞同蛋嘅問題。

Be interesting, my friend．

21. 講咗咁多，想講嘅係，大家都係Network鯨，都係搵食，咁你作為弱勢小薯，對方點解要理你呢？人地時間寶貴過你，識嘢多過你，人脈廣過你。你有乜著數畀到人？

22. Unless 你有

23. 而作為一個小薯，你總冇可能介紹到好路數畀對方，你亦教唔到佢乜，咁你可以有乜嘢畀到人？

24. Be an interesting person ！

25. 呢個就係我成篇文想講嗁嘢，唔該，Be an interesting person！唔係蘇波榮，好多人都係蘇北京波榮。而在北京人口入面，北京波榮仲大鑊過北京asshole

26. 對面坐嗰個，可能係某投行高層，可能係某CEO，可能係王維基，咩都好。佢乜都勁過你。但你身上係咪就冇佢想知嘅嘢？唔係

27. 世界可愛之處，就係以上呢啲人，如果有幸（對佢地嚟講係不幸）同你同枱，佢地一般都唔會不停玩電話唔理你，真心假意都好，總會同你傾下計。

28. 亦未必真係只係循例，難聽啲講句，佢地都不幸同你同枱，都要苦中作樂，即管睇下你呢條友，有冇咩有趣嘅地方。

29. 呢啲咪你嘅機會咯。

30. 總有啲嘢，係佢唔識，你識。或者佢識，但你熟啲。或者佢識又識，但唔好意思講出口，而你冇所謂。

31. 具體係乜？我唔知。但我發現啲勁人（即係你想去識嘅人），總有啲好奇心。你介紹完你做乜，你仲有乜嘢講？點解王維基要聽你講故事？例如你係搞北韓旅行社嘅（其中一個讀者係！），喂，interesting，「肥仔金係咪香咗？」「北韓啲路人係咪假嘅？」。呢個係一個好有趣嘅身份。

32. 我只係舉例，咁你話，你個人冇乜特別嘢。咁，唔該返返去上面嘅核心問題。既然你冇乜特別嘢，對方做乜要理你？好得閒？我去碌下埃汾Facebook Page唔好？免費仲有得笑。我去睇下埃汾Patreon唔好？一舊水唔使，一個星期六篇文喎（係，直入式廣告）（https://bityl.co/4Y0h）

33. 所以，唔該，Be an interesting person！

34. interesting person，就只不過係，「呢條友有啲意思」。門檻比你想像中低好多，畢竟你都識講，「阿豬阿狗都KOL」。總好過你只係介紹自己，我係邊度做，做乜，講完。

傳音過王傳音：搞個 個人名牌，其實唔難（有冇人唔Google知邊個係王傳音？）

35. 不過，仲有一個問題。你可以諗下，2014年，埃汾同太宰治「母娼起二」嗰時，埃汾係咪一個北京波榮嘅人？我估唔係，其實同而家差不多。


36. 但，冇人識你嘛大佬。邊個大王？冇人識你呀！你有幾interesting，都係冇人知。


37. 而事實，要自吹自擂，好多華人都覺得幾難為情（當然包括我呢個introvert），亦都幾非洲和尚乞人憎（呢個字幾時會變hate speech？）．你總會見啲友滿場飛，name dropping，上星期我又點點點，呀你在星展喎你識唔識呀乜乜乜，靚女都忍佢，係仔嘅，恨不得打七佢。

38. 所以，除咗Be an interesting person外，仲有最重要嘅一步—個人品牌。我覺得我而家變到好似Brian Cha周融或者黃明樂 Ada Ho咁寫文了，哈哈哈，但我講得出佢地四個嘅名，證明佢地都係有個人品牌。

39. 個人品牌呢樣東西，唔係我強項，亦都已經寫咗三千字，可能搵日再講。但呢個年代呢，係真係冇藉口的。

40. 好簡單，唔使你咩搞個網站，或者做特約飛機稿，但至少你搞個Facebook Page，一個仙都唔洗。或者開個blog，拎煙寫下嘢（但唔好多，很煩的）。你唔寫字嘅，咁搵個位放你啲相或者片（唔使比堅尼相，除非搵老細係你嘅工作一部份）。咁你都話唔得閒，或者唔知貼乜嘅。咁又返返去核心問題咯，你自己都覺得冇嘢好睇，咁我做乜要理你呢？「我去碌下埃汾Facebook Page唔好？免費仲有得笑。我去睇下埃汾Patreon唔好？一舊水唔使，一個星期六篇文喎（係，直入式廣告）。」（https://bityl.co/4Y0h）



41. 你係王維基嘅，人人識你，唔使搞呢啲無聊嘢。同樣地，你係星展香港CEO嘅，話知你係南美佬（而星展香港CEO真係一個南美佬），冇人知你乜名都好，都人人畀面你（而南美佬本尊係十分風趣但又demanding的，我都面過聖，拿，name dropping呀）。吳明林卡片都係印「記者」之嘛，謝霆鋒都係印「茶水部主管」之嘛，朱生卡片都係印I’m CEO, Bitch 之嘛（是真的）—而我甚至唔使講邊個朱生。

42. （另一職場心得：但凡卡片幾十個梯圖嘅人，避之則吉。特別係仲要對摺嗰啲。你有幾撚巴閉呢，又？）

43. 可惜，你會睇到呢度嘅，你多數都唔係吳明林謝霆鋒。多數你張卡片上個梯圖，都唔多吸引。你好呀我係埃汾呀，我在星展做Director嘅（事實我係，但有乜新鮮羅白皮？），哦，你拍戲的？一街都Director，一街都VP啦。梯圖現非唇嘛（亦因為咁，見工之類，基本上唔使睇人梯圖，睇人工代表一切，因為梯圖可以任印，但公司唔會無啦啦畀多舊錢你）

44. 你有個地方，放你啲嘢嘅，就唔會出現以下嘅埃汾對白（原文照錄）：

45. 「我有寫文的」「寫乜文？」「乜都寫啲」「例如呢？」「都真係咩都有啲喎，金融為主咯」「即係股票貼士？」「又唔係喎」「咁即係乜」「咩都有啲咯」「……我過去拎杯嘢先」

46. 拿，呢啲就浪費對方寶貴時間啦。掉轉頭，我有個blog，有個Facebook Page畀你睇，係咪簡單好多？呢個係我在老朋友身上學的，大佬，咪得個講字。最緊要有舊嘢睇，畀人見得到。你話你想寫文嘅，請去寫。寫咗出嚟先有得討論。

Let me 心噏 after writing so much（呢句抄陳祉俊的，無友不如己者，記得Follow 佢FB Page同埋訂Patreon）（https://bityl.co/4dtz）

47. To sum up：莫道你在選擇人，人亦能選擇你。你想Network鯨，人地未必想理你．咁你有乜賣點？就唔該你自己做一個Interesting person，唔使有錢，唔使高級，甚至唔使有乜才華。但總之，就係畀人覺得，呢條友，有啲意思。另外，你再Interesting都可，冇人知嘅，即係富貴不還鄉錦衣夜行，所以請你建立你嘅個人名牌。唔使好大陣仗，但開個Facebook Page，開個blog，開個拎煙指點下江山，開個ig（唔係貼你嘅比堅尼相，除非呢個係你工作嘅一部份），就係咁簡單。

48. 其實唔難。再講多次，未訂Patreon嘅，去訂（https://bityl.co/4Y0h）。因為月尾，佢即時扣錢，12月1日會扣多次。所以呢幾日join嘅我都會回返一個月畀你。

《扮工鬥室》好地地打份工，點會諗到暗藏殺機？（試閱三）　
　
「有命過到呢一關？架叔你到底嗡乜嘢……」
　
「企喺度有啲危險，」架叔打斷我，「你跟我過嚟先。」
　
架叔行去會議室大台嘅另一邊然後踎低，見我冇反應先突個頭出嚟講：「過嚟呀！」
　
雖然我真係好想離開呢度，但對方話晒係我直屬上司，為咗未來嘅錢途打算都係照做比較好。
　
＝＝＝＝＝＝＝＝＝＝＝＝＝＝
前兩回連結：
https://www.facebook.com/pg/Echo.of.Heart/photos/?tab=album&album_id=2133975146734290
　
實際已經連載到第１１集啦！訂閱即刻追埋！
https://www.patreon.com/posts/ban-gong-dou-shi-42713909
＝＝＝＝＝＝＝＝＝＝＝＝＝＝
　
「架叔，既然連燈都熄埋，唔係應該走人比較好？」我行埋佢旁邊踎低之後問：「點解要玩到好似捉伊因咁呢？」
　
「我都話太遲囉，你係咪真係撞聾㗎？」架叔脾氣越嚟越差，「用你個死人耳聽清楚，再過一陣外面就會有事發生……我哋就靜靜地避喺度，等件事過就得。」
　
「係咩事？」我心諗，唔會真係發生兇殺案咁邪嘛？
　
「次次都唔同花臣，所以我都唔肯定……」架叔再抬起頭盯住門口，「但幾乎每次都會有『怪物』出現。」
　
「怪物？」聽到呢度終於超出我接受範圍，「架叔，如果你真係輸波嘅話……唔怕老實講喎，我會耐心咁聽……」
　
「你就輸，美斯尋晚幫我贏咗差唔多係你半份糧呀！」架叔反駁我。
　
「贏咁多頭先飲茶你都唔肯請咁孤寒？」講到一半我突然恍然大悟，「哦，我明喇……肯定又係你哋成班同事夾埋玩我，就好似啱啱Me姐咁……呀！？」
　
架叔用力扑咗我一下頭。
　
「邊個得閒夾埋玩你？何況……根本冇人知你條友會突然返轉頭搵耳筒！」
　
「你咁講又有道理……」
　
「唔好再廢話喇，我知道一時三刻要你接受呢個世界有怪物係好難……但假如一陣真係咁唔好彩見到，然後隻怪物又行入嚟會議室嘅話……」
　
架叔講到呢度指向會議室窗邊，呢刻因為俾窗簾遮住所以望唔到街外嘅情況。
　
「我哋夾手夾腳推佢落街？」我問。
　
「唔係，係我哋要跳出去。」
　
「痴線㗎？」我激動到彈起身，「跳出去，呢度成十四樓喎！？」
　
「殊！」架叔用力拉返我落嚟，「你洗唔洗嗌得咁大聲……」佢講到呢度突然望返門口，「弊喇。」
　
就喺佢講完一瞬間，忽然有股陰氣喺走廊方向傳入嚟……接住，有把低沉嘅男聲喺度「餓……餓……餓……」咁叫，仲要一步一步咁靠近會議室。
　
說時遲那時快，下一秒已經有個身影出現喺門口，粗獷而肥胖嘅身軀幾乎完美擋住外面嘅紅色提示燈，我仲依稀睇到佢只係著住短褲，上身露出好似米芝蓮人咁嘅車軚腰……而最詭異嘅，係佢口裡面不斷噴出白色嘅氣體，就好似口裡面含住幾粒乾冰咁樣。
　
雖然成個畫面望落好嘔心，但點睇對方最多都只係露體狂……點睇都未去到怪物嘅程度？
　　
「餓……餓……我好肚餓……」
　
我同架叔趁住「肥佬」轉身望過嚟嘅時候即刻縮返埋個頭。
　
「肉……如果有肉食就好……」
　
架叔輕輕力拍一拍我，再指向窗邊，示意我要準備好隨時要跳出去。我當然打死都唔肯，堅決咁搖搖頭……之後我哋一直盯住紅燈投射出嚟嘅巨大影子。慶幸嘅係，「肥佬」最後冇入到嚟，呆咗一陣就沿住走廊行返出去主辦公室嘅位置。
　
「餓……餓……好餓……」
　
「而家係咪即係冇事？」我細細聲問，心裡面依然懷疑緊成件事嘅真偽。
　
「睇你個表情好似仲係覺得我玩你。」架叔一眼睇穿我，嘆咗口氣之後起身行埋去窗邊，「你過嚟，我俾個有力證據你睇。」
　
我半信半疑咁行過去，盡可能都唔靠太近，以免架叔突然發癲推我落街。見我企低之後，架叔慢慢拉開窗簾……
　
有一瞬間，我仲以為自己睇錯……因為見到嘅並唔係對面大廈，而係同我而家身處嘅會議室一模一樣嘅房間。我有諗過係玻璃反射，但架叔馬上打開其中一扇窗，然後毫不猶豫就跨過去。
　
「你而家信喇？」架叔企喺另一邊同我講：「公司之所以規定員工每晚五點要收工……係因為每晚到咗六點六分六秒，公司就會有機會變成一個異空間。」
　
「咁……」我慢慢行近窗邊望清楚，對面嘅會議室真係好似倒轉過嚟嘅複製品一樣，「既然咁危險，點解架叔你仲會留喺度？」
　
「因為冇得揀囉。」架叔又嘆咗口氣，「只要嚟過呢度一次就會受到詛咒，假如公司變成異空間之後唔喺十四分鐘之內趕返嚟……就會有好嚴重嘅後果。」
　
「即係死？」
　
「慘過死。」架叔認真咁講：「你過嚟先再問喇，記住仲未安全㗎。」
　
我猶豫咗兩秒，正想行動之際……居然感到腳底好似黐立立咁。而且，唔單止地板，連窗框都係一樣，掂完縮手仲可以拉出一條黐手嘅嘔心黏液……
　
「架叔……你係咪趁我唔為意嗰陣偷偷吐咗啖口水？」我問，但只係見到架叔瞪大雙眼望住我身後。
　
「唔係……係隻怪物搞出嚟！」架叔大嗌。
　
我轉身望過去，估唔到隻「肥佬」居然中途折返，再一次企喺走廊外面……下一秒，佢突然發咗癲一樣向住我直衝過嚟，結果一嘢撞埋會議室大台。但佢睇落一啲都唔覺得痛，仲開始沿住會議室台爬過嚟……
　
「仲睇！？」架叔兩手捉住我手臂，「過嚟呀！」
　
今次我冇猶豫，亦都唔理啲黏液有幾核突即刻爬過去。一落地個「肥佬」已經撞到埋嚟，近距離一望……可以見到佢雙眼暴凸，嘴巴一開一合除咗白煙仲有液體不斷吐出嚟……
　
「走喇，跑到外面應該就有人幫手！」架叔拉起我。
　
「幫手？」我抱住疑惑跟住佢跑，去到門口之際回頭一望，見到個「肥佬」已經過咗嚟，再一次起跑然後撞埋會議室大台。
　
「餓……好肚餓……」
　
「你行錯啦……呢邊係左右掉轉！」跑到出走廊，架叔提醒我。
　
「係喎！？」我即刻反應過嚟轉返左邊跑（原本左邊係通去戰略部、右邊係主辦公室）。
　
「前面有人嘅話千祈唔好搞錯呀！」架叔邊跑邊大嗌，唔知係同緊邊個講嘢，「我哋有兩個人！」
　
跑咗幾秒後，我同架叔終於跑出走廊，隨即發現左右兩邊分別都有人貼埋牆邊埋伏──其中一個係厭世臉同事士巴拿，至於另一個就係今朝見過嘅阿和……
　
除此之外……
　
「停呀！」
　
前方突然有把熟悉嘅聲音叫我停落嚟，我差少少就剎唔切制直撞埋去（事後好後悔竟然剎得切），望過去……居然係Me姐，佢呢刻一手拎住旋轉椅嘅金屬椅腳，仲可以見到係改裝過嚟，上面加滿咗鋒利嘅刀片……
　
「咸濕仔……估唔到咁快就見返你。」Me姐笑住講，然後將目光放返去走廊嗰邊。
　
呢刻，「肥佬」已經行出走廊……一場大戰感覺無可避免。
　　
如果你問我對於「肥佬」呢隻怪物嘅睇法──嘔心係當然，而且感覺仲好似著名射擊遊戲《Left 4 Dead》裡面識得自爆嘅怪物Boomer。估唔到，現實居然會有一班人敢去對抗呢隻核突怪……
　
「架叔，你帶佢去後面避一避先……以防萬一。」
　
「收到。」架叔聽完即刻拉住我退後幾步。
　
既然Me姐在場……唔通所謂嘅「戰略部」，存在目的就係為咗對付異空間嘅怪物？
　
「肉……肉呀！」
　
「肥佬」發出一聲咆哮之後即刻向前衝。一聽到腳步聲，守喺走廊外面嘅士巴拿同阿和即刻有所動作，同時間舉起手上嘅粗鐵鏈……睇嚟目標係想躀低隻「肥佬」。難怪頭先架叔跑緊嗰陣要提醒佢哋，唔係躀低嘅就會係我哋。
　
問題係，隻「肥佬」會唔會咁易就中招？既然講到明係怪物，一定有返咁上下能力，隨時用蠻力就可以撞爛條鏈……
　
「餓……餓……嗚啊！？」
　
碰！
　
但事實卻係一啲都唔意外，「肥佬」完全注意唔到條鐵鏈亦都撞唔爛，結果一嘢躀到然後成個人大字型咁瞓落地。因為有返咁上下重量，結果搞到成個地板震咗一下。
　
「嗚……」
　
「阿佑仔。」架叔拍一拍我肩膀，「隻怪物睇嚟只係E級……今次算你好彩。」
　
「E cup？」我有一秒以為佢講緊胸圍size，但情況咁嚴肅應該唔係……換句話說，應該指隻怪物嘅可怕程度？
　
「嗚……」
　
「肥佬」正準備撐起身，但士巴拿反應非常迅速……即刻拎起一把開山刀一嘢劈斷佢左邊腳，乾脆到見到都覺得痛。
　
「大姐……之後靠妳啦！」佢大嗌。
　
就喺下一刻，Me姐開始慢慢行過去，呢種彷彿天不怕地不怕嘅背影，睇落真係不禁令人著迷……
　
「嗚……」『肥佬』抬起頭從下而上望住Me姐，彷彿變態佬一樣，「係腳……係白滑嘅腳……」
　
「呢隻怪物令我諗起以前公司某個同事……佢真係黑人憎到爆。」說罷，Me姐即刻舉起手上嘅改裝椅腳，再用力狠狠一下扑落去。
　
啪！
　
「嗚啊！」
　
「恃住自己係老細嘅親戚，一直喺度遊手好閑！」講完，接住又係另一下重擊。
　
啪！
　
「嗚……」
　
「叫佢做少少嘢都可以拖成個星期……結果鑊就係其他同事孭！」
　
啪！
　
「啊……」
　
「倒瀉成罐可樂仲可以扮唔知……搞到第二朝成地都係螞蟻！」
　
啪！

「仲有佢掂過嘅滑鼠鍵盤全部都係黐立立，諗返都想作嘔呀！」

啪！
　
「佢仲要夠膽喺公司播咸片……個女優仲要同新嚟女同事差唔多樣……諗起都想你死呀！」
　
啪！
啪！
啪！
啪！
啪！
　
我哋幾個就係咁企定定睇住Me姐瘋狂發洩。雖然最初係真心覺得Me姐好型好有魅力，但到佢打到「肥佬」皮肉分離甚至見埋頭殼腦漿（其實打到中途佢已經唔識郁），然後黑色嘅血濺到佢一腳都係……呢種感覺慢慢俾嘔心感所取代。
　
「架叔……嘔……」我終於睇唔到落去了，「我過去旁邊嘔一嘔先。」
　
「渣㗎……唔好行太遠，小心隨時有另一隻怪物。」
　
「唔唔。」我掩住口點點頭，然後快步行到迷你垃圾桶旁邊踎低，一下作嘔感即刻由胃湧上嚟，「嘔……咳……嘔……咳咳！」
　
嘔到咁上下，突然有人遞咗包紙巾過嚟。
　
「多謝……」我望過去，面前係一個長住日式惡鬼臉嘅『人』，「嘩！？」
　
「哈哈哈哈……」見我嚇一大跳，呢個『人』即刻抱腹大笑起嚟，笑到咁上下先將臉上嘅面具除落嚟，「果然新人係最好玩。」
　
戴住面具嚇我嘅係一位及肩位髮嘅少女……年紀睇落應該同我差唔多，即係廿五六歲左右。
　
「忍耐多陣啦。」少女望過去Me姐嗰邊，叉住腰講：「睇嚟應該冇其他怪物……今轉應該好快就完結。」
　
我一邊抹嘴一邊企返起身，呢刻「肥佬」嘅上半身已經變到血肉模糊（好彩燈光唔夠睇得唔清楚，唔係又準備再嘔多次）。Me姐用腳確認多次對方真係死咗之後，轉身望住我哋呢邊講：
　
「海兒，係咪剩係得佢？」
　
「嗯。」旁邊嘅少女點頭回應：「樓上樓下都見唔到其他怪物。」
　
「咁就好……喂，阿York。」Me姐確認完之後望向我，「一陣返到現實世界……樓下酒吧等，架叔你記住拉埋佢嚟。」
　
「係嘅係嘅……等我唔飲得酒喎，費時老婆罵。」架叔回應。
　
就喺下一刻，辦公室嘅紅燈同一時間熄滅，現場瞬間變得一遍漆黑。
　
「以後多多指教啦。」接住，我聽到海兒笑住講呢句。
　　
等到燈光全部著返之後，我注意到自己又返番去會議室裡面，而企喺我旁邊嘅人又重新變成架叔……呢個位置，就同最初熄燈嗰陣係一模一樣。
　
「今晚完咗喇，」架叔拍一拍我背脊，「行喇，我哋落去酒吧霸定位……費時Me姐一陣黑我臉。」
　
*
　
場景一轉，我同架叔已經坐咗喺酒吧等。大約十五分鐘之後，終於見到Me姐推門入嚟，而跟喺佢後面嘅只有海兒、阿和同士巴拿三個人。
　
「其他人呢？」架叔問。

「佢哋話嚟到都係齋坐……所以返去好過，成班都冇責任心。」Me姐邊坐低邊抱怨。
　
「Me姐，妳係咪照舊？」海兒問道，應該係想幫佢嗌酒，「阿和你呢，想飲咩？」
　
「是但就得。」阿和客氣咁點點頭，海兒聽完就行開去酒吧台嗰立邊。
　
「唔廢話直接入正題喇……」Me姐再一次蹺腿，我注意到佢雙腳已經冇晒血跡，「枝針我剩係準備咗俾阿和，應該要等下個禮拜先可以攞多枝新嘅。」
　
「下個禮拜……」架叔皺起眉頭，「咁唯有祈求之後幾日都冇事發生啦。」
　
頭先等緊嘅時候架叔有簡單解釋過──辦公室變成異空間呢件事雖然每個工作天都會發生，但真係出現「怪物事件」嘅機率其實唔高，平均一個星期只係出現一次，所以照計應該唔會咁不幸一個禮拜連中兩次。
　
「枝針到底係咩一回事？」至於枝針，架叔就一直話要等Me姐解釋。
　
「枝針係一個保險措施。」Me姐解釋：「入到異空間嘅人……如果喺冇打過針嘅情況下俾怪物殺死或者因為其他特殊情況而死，咁佢嘅『存在』就會永遠消失。」
　
「吓？」我意外，「存在……即係咩意思？」
　
「字面意思。」Me姐轉用冷冰冰嘅語氣講：「冇人會記得你嘅存在、包括你嘅名、同你有關嘅經歷同資訊通通都會消失……連你嘅愛人、朋友甚至家人都唔會記得返你。唯一嘅例外，就係我哋呢班去過異空間但又仲生存緊嘅人。」
　
「但……咁嘅話實在太誇張啦掛？呢種事現實真係有可能會發生咩？」
　
「唔係可能……而係確確實實發生咗。」Me姐靠埋梳化抬起頭望，「或者……喺我哋唔清楚嘅情況下，已經有好多人因為咁消失咗。」
　
「咁……如果打咗針呢？」我望向阿和，「咁係咪代表死咗都冇問題？」
　
「唔係，只係好少少。」Me姐轉過頭望向落地窗外面，「阿York，你望下外面……」
　
呢刻因為係放工時間，所以不斷有途中喺外面行過。佢哋大多都一臉倦容，帶住疲憊嘅身軀無力咁走……
　
「如果打過針先死……就會徹徹底底咁變成一個行屍走肉嘅人，再冇夢想、再冇目標、再冇衝勁……只係為咗生存而生存，彷彿一個有固定規律嘅機械人咁，最後碌碌無為咁過完一生。」
　
聽到呢度，我不禁沉默了……但其實諗深一層，其實現實有好多人咪都係咁？
　
「既然係咁危險……點解你哋仲要敢用條命去博？」
　
「有好多原因呀。」回答我嘅係拎住酒返嚟嘅海兒，「有人係單純為咗錢、有人係為咗樂趣……」
　
佢講到呢度望向士巴拿。
　
「有人係係為咗擺脫呢一切……」
　
佢望向架叔。
　
「有人係想保護其他無辜嘅人……」
　
佢望向阿和。
　
「最後就係Me姐咁……」
　
我同海兒同一時間望向Me姐……呢刻佢優雅咁飲緊手中嘅Margarita。
　
「為咗……徹徹底底消滅呢個異空間。」
　
（待續）
　
＝＝＝＝＝＝＝＝＝＝＝＝＝＝＝
　
見上兩集試閱反應唔錯所以放多篇！《扮工鬥室》實際上已經連載到第１１集啦，同埋開始會有投票互動！
　
希望大家可以支持下我嘅 Patreon 啦，每月只係一餐飯嘅價錢，就可以追新故同埋睇返舊故，遲下仲會有更多心得趣故分享！
　
https://www.patreon.com/echoofheart
　
IG：echoofheart