#家長有野問：之前見到有BB做趴睡訓練死咗，我個B都鍾意趴喺度瞓㗎 😱 會唔會有事? 係咪應該幫佢翻返轉瞓? ｜回答 by 嬰幼兒睡眠顧Catherine@Dolce Sleepers 嬰幼兒睡眠資訊｜ ◤見到發生啲咁嘅事，真係好心傷，同時亦嬲到震！😡😡😡 🙅‍♀️ 呢件事唔應該發生。 不幸地，為咗令BB瞓得好，坊間一直流傳各種冇科學理據支持嘅捷徑。而且，大部分家長對嬰幼兒睡眠缺乏基本認識，造成好多誤解。其實想BB容易啲瞓得著覺，同埋瞓得耐啲，有一套科學方法㗎！只要配合嬰幼兒心理學，就可以令BB瞓得安心又開心😊 的確，BB鍾意趴喺度瞓，甚至趴喺度瞓會瞓得耐啲，都係好常見嘅事。但係，我哋絕對唔可以因為咁，而忽略 #睡眠安全 🚨 BB未有自由活動嘅能力，而且亦冇辦法清楚表達自己，所以作為父母，我哋必須要為BB準備一個安全嘅睡眠環境。BB瞓得安全，我哋亦瞓得安心。 以下由美國兒科醫學會所發出嘅安全睡眠建議，係一套通用嘅標準，適用於1歲前嘅嬰兒。 🚼 #標準落床姿勢 第一點係，無論日夜，都必須將BB以背脊向下嘅姿勢放落床。但如果BB已經可以輕易咁翻身，就唔需要將佢翻返過嚟仰睡，而可以「由得佢」趴睡。「由得佢」嘅意思，即係唔鼓勵，但亦唔需要反對。因為趴睡絕對唔係乜嘢「技能」，需要「解鎖」。就算BB趴睡，亦唔代表佢會瞓得好，可以一覺瞓到天光。所以，如果BB翻身後大喊，你係必須幫佢，唔可以由得佢大喊唔理！ 值得注意嘅係，美國兒科醫學會喺1992年開始推廣仰睡，嬰兒猝死症（SIDS）嘅數字就立即大幅下降。但你又知唔知道，仰睡都未夠100%安全呢？仲有以下 #六大BB睡眠安全要點 需要留意！ 🐻 #清空睡眠範圍 BB嘅睡眠範圍，必須要清空，尤其是BB會趴睡嘅話，一定唔可以有任何軟身物品，例如枕頭、棉被、公仔、攬枕、哺乳枕、分隔床、以及縛喺床邊，聲稱能夠「保護」BB嘅床圍。好多BB鍾意將塊面貼住呢啲軟身物品，除咗可能會遮到口鼻影響呼吸外，BB亦會不斷吸入自己所呼出嘅二氧化碳，吸入過多二氧化碳或氧氣不足，會導致二氧化碳中毒或死亡！另外，床圍條繩有機會會纏住BB條頸，而就算係聲稱能透氣嘅網狀床圍，一樣危險。驚BB夜晚凍親，或者手腳被床欄kick住嘅話，可以用睡袋㗎，而且仲有其他好處添！ 🛏 #床褥要夠硬 好多人唔知道嘅一點，就係BB必須要瞓喺一張堅硬嘅床褥上。要有幾硬？BB瞓落去唔會下陷就可以嘞，否則趴睡時面向下嘅話，BB就會無辦法呼吸。大人床嘅床褥一般冇嬰兒床褥咁硬，BB塊面壓落去會下陷，所以亦有同樣嘅危險。所以，如果BB係瞓大人床嘅話，就唔應該趴睡嘞！另外，張床單亦必須要緊緊包住張床褥至得，唔可以太大張突晒出嚟。 🛋 #平坦嘅地方先好畀佢瞓 千祈唔好將BB放喺梳化上瞓覺，如果BB喺躺椅、搖搖椅、可傾斜式餐椅、汽車座椅、BB車（有可平躺嘅嬰兒籃除外），或孭帶上瞓著咗，應該儘快將BB轉移返去平坦嘅地方繼續瞓覺。好難？BB會即刻醒？咁就應該直接畀BB喺床上入睡嘞，除咗安全外，BB亦能瞓得好啲，唔會一開眼唔知自己喺邊而嚇醒！ 🤱 #同房不同床最理想 最安全嘅做法，係最少頭6個月，大人同BB同房不同床，甚至去到1歲。AAP唔建議母子同床，因為無論你幾小心，都仍然存在一定風險。喺以下幾個情況下，會更加危險： ◾ 4個月以下初生嬰兒 ◾ 早產嬰或出生即體重過輕嘅BB ◾ 父母或其他同床者係吸煙人士（就算唔會在床上煲煙） ◾ 媽媽喺懷孕時有食煙嘅習慣（就算之後戒咗） ◾ 就寢前服食過會令人昏昏欲睡嘅藥物（攰得滯可能會瞓到不醒人事嘅話，其實一樣危險） ◾ 飲咗酒 ◾ 同BB一齊瞓嗰個唔係BB嘅父母，例如係工人姐姐 ◾ 瞓覺張床太軟，例如舊床褥，或梳化等 ◾ 床上有軟身物品 👶🏻 #留意包巾鬆綁時機 包巾有助初生BB瞓得好啲，但當BB開始出現想翻身嘅跡象，就必須停止，畀他雙手能夠自由活動。 😙 #奶咀用唔用好？ 奶咀有助減低發生嬰兒猝死症嘅風險，但亦無須強迫BB使用。 最後提返一句，睡眠訓練應該等BB滿6個月後至開始，而且完全唔需要留低個BB喺房由佢喊到瞓著嘅！想BB學識自行入睡，方法有好多，你絕對可以留喺BB身邊安撫佢，cry it out (CIO) 已經過時㗎嘞！ 希望大家可以幫手分享呢篇文章，令香港嘅媽咪爹哋對安全睡眠有多一啲醒覺，唔好繼續抱住「個個都係咁，邊會有事吖！」嘅心態，避免類似嘅悲劇再次發生 😔 資料來源：Moon, R. Y. (n.d.). How to Keep Your Sleeping Baby Safe: AAP Policy Explained. Retrieved from Healthychildren ＝＝＝＝＝ 作者：Catherine，Institute of Sensitive Sleep Consulting 認證嬰幼兒睡眠顧問，以及Cribs for Kids安全睡眠大使，育有一對孖生男孩。 ＝＝＝＝＝ Follow us on Telegram: t.me/popachannel 投稿看這邊: popa.hk/contribution/ #POPA學問 #家長學問知識庫 🖼️：Pexels