在蛋與寫作之間，我永遠選擇寫作

係一個我如常趕稿既深夜，我唔知道係乜撚野原因，但係短暫既異樣感之後，我下體傳黎劇烈既疼痛，果種痛既程度猶如俾一群精壯既男子瘋狂踢下體一樣，同時伴隨住撕裂、撞擊同跌爆蛋既可怕感覺。

我發誓，無一個女人可以再係我面前同我講知唔知M痛有幾M痛，因為無一個女人可以想像到睪丸打kick可以有幾痛。

我未行得出房門口已經標冷汗同嘔白泡，而係呢個深宵一刻，我意識到，我唯一既希望就係三米之外我老豆老母間房。係發軟蹄同全身乏力既情況之下，唔好話三米，我連三十厘米都爬唔郁，最終我係走廊果度暈低咗。

我唔知過咗幾耐，但當我醒之後，我馬上意識到我已經入咗醫院，仲係張床上面俾人推緊去唔知邊度。呢個時候我聽到一把陌生聲音同我老豆老母講：「要即刻做手術，唔可以再拖。」

呢一刻，我面臨住男人潛意識裡面最深層次既恐懼：做一個沒袋的男人，一個無卵用的男人，唔單止生理上，仲要失去一切作為男人係心理上既尊嚴。我捉住個醫生隻手，用盡我最後一口氣係醫院裡面叫咗出黎：留返一粒啊！呢一聲高呼，係作為一個男人，去守護佢最後既尊嚴既吶喊。

而三十分鐘之後，果一雙手，切開咗我下體。

呢段經歷對我弱小心靈既衝擊，係巨大既。手術之後，我成個人變得鬱鬱寡歡、終日不言不語、覺得生命無希望、對一切提唔起興趣、心煩、失眠、躁狂，我甚至曾經有自殺既念頭。果種失去自我、自己唔再係自己既恐懼，一直縈繞係我心頭，久久不能散去。

我開始明白點解啲人話，唔好將全部雞蛋放係同一個籃裡面，但我無得簡，我得一個籃。

術後既康復過程非常漫長而痛苦，一黎係因為手術既位置相當尷尬，二黎係因為器官本身相當脆弱。依從醫生既建議，我必須長期保持M字腳平卧既姿勢避免擠壓傷口，同時應保持通風乾爽，所以可想而知，我當時係有一段時間長期唔著褲。而同一時間，由於今次既意外，本書既進度大幅落後，甚至出版社既編輯小姐方面已經向我提議不如我上去佢地度寫。

我唔知道點樣同佢地講呢單意外，我有諗過用一個婉轉啲方法例如話我大脾內側有啲唔舒服，但好明顯咁係唔work架啦，因為呢句說話根本就係性騷擾。結果我簡咗一個，我認為係最適合既表述方法，我同呢位編輯小姐講：我今個月唔係幾方便。

我相信作為一個女人，佢係絕對有能力去理解「唔係幾方便」呢句說話背後既含意，但係好明顯佢係唔明啦，而我更加唔明白既係，點解女人就可以個個月有幾日唔方便，但男人就唔可以儲埋一次過先？係咪女人就可以M痛男人就唔可以睪丸痛？呢個世界公平咩？

幸好，負責我個案既，係一位男醫生。佢唔單止俾咗好多心靈上既鼓勵我，仲教識咗我一個方法，點樣去自我檢查健復既情況，同時亦都去擺脫呢件事帶俾我既心理影響。佢同我講，男人，係邊度跌低，就要係邊度爬返起身。

所以依家，我每晚都會係同一個地方，去同一個網站，重覆同一個動作，做同一件事。係呢個過程之中，我唔單止意識到我仲係完整既我，我更重建咗我作為一個男人既自信，果種激動同喜悅，係筆墨所不能形容。

至於書本身，當裡面既故事，最初係高登討論區發表果陣，引黎好大既迥響。係一眾高登巴打絲打、CD-Rom同其他網友既支持之下，係網上同現實世界都流傳得非常廣泛，甚至先後係無問過作者，即係小弟我既同意之下係新城電台同D100既節目度登場。

同一時間，係我Facebook Page上面，收到好多人向我求職――無錯，係求職，話好想加入呢間婚介公司。

我寫呢本書既動機係，婚姻對於我地黎講係好切身好重要既一回事，而係香港呢個咁扭曲既社會之下，婚姻介紹可以特顯到一啲特別既人同事。我相信好多人對於故事既熱愛，好大程度係因為裡面既人物似曾相識，同一時間，呢啲婚介眾生相係好代表到係當下呢個社會一啲扭曲、荒謬、乖張既現實。

好多人問我，到底裡面既故事係真定假，裡面既人物係真定假，連編輯小姐都問過我。我唔會話全部都係真或者全部都係假，一啲情節經過戲劇化既處理，而當中既人同故事，更多係一種真實經歷、社會現象、戲劇情節交織既拼貼。

最後，除咗希望大家睇得開心之外，我想同大家講既係：多謝大家買我本書，呢本書我真係付出咗好多貨真價實既血汗同精力，多謝大家，我仲係雙數，唔係陳奕迅，多謝關心。

啊，同埋最後一件事係，如果大家睪丸痛，記得即刻睇醫生，可大可小架。

ps.堂前燕第一本小說《婚姻介紹所》將會係7月15日書展開幕當日係 #點子出版社 發售（攤位1A-C12），紅扑扑果本就係，多謝大家慷慨解囊。