#在日落前交換日記
星期一至五 5-6 叱咤903
阿檸 - 毒檸王國
【我的朋友：阿城，阿和，翠翠，嘉儀】

玩具攬炒城 檸

公道啲講啦，則係唔係話我幫住邊個嘅～ 阿城呢，又真係唔抵爭嘅，偷偷地話個秘密你知，我有個朋友，喺旺角一帶蒲開嘅，叫和仔啦，入啲貨有啲係同阿城一樣嘅，則係例如妖怪手錶哥瑪先生塑膠模型咁啦，和仔放返出去先賣緊三十零蚊，就算係另一個朋友，住黃埔嘅，叫趣趣，出名開價貴架啦，都係賣緊四十零蚊，阿城佢賣緊九十幾蚊喎，足足三倍喎！咩原因我要幫趁佢先，因為我同佢係好朋友？無得咁講架喎，隨著人嘅成長，朋友越來越多，大家都係我朋友，間唔中去探下佢我都盡咗朋友責任啦，仲要我經濟資助佢，未免太擔心啦下嘛～

阿城個人今時今日搞成咁，衰乜？憑佢賣嘢嘅價格睇得出啦，咪就係將自己睇得太高，覺得自己係永遠嘅玩具大王囉，係，無可否認佢係玩具大王，但係今時今日做明星都要講貼題啦，尤其係個價錢，無論你個朵幾咁響，永遠都擺到個姿態天咁高，真係會越來越少朋友㗎～ 嗱，介紹返俾阿城，一係參考下我另一個朋友，叫做嘉儀，賣傢俬嘅，喺北歐一帶發跡，全球都非常出名，可以話係傢俬界大佬，但係佢賣嘢嘅價錢呢，又真係都算相宜，間唔中又搞下啲大減價，最叻係佢仲識搞埋飲食生意，啲肉丸整得幾鬼好食，咁玩法嘉儀咪長玩長有囉，阿城呢啲做玩具嘅，都可以學下嘢，搞多幾條路線架喎，例如喺自己舖頭間番個區域，參考下美國啲冒險家，擺啲遊戲機呀推銀仔機呀喺度收錢比人玩，吸引唔到小朋友都吸引到班阿婆啦！又或者，而家咁鬼興啲party room，直頭喺舖頭間幾間party room，租自己啲玩具出去俾人玩，明明自己最多就係玩具，都唔識得好好利用，咁係咩呀？咁咪不思進取囉，不合時宜囉，就係睇得自己太高，覺得自己唔使改變到過到日辰，於是而家咪充滿危機囉，你話搞唔搞得掂呀？

差唔多放工啦，我去旺角探一探阿和啦，你得閒就去同阿城傾兩句，佢至少至少要知道，班怪獸家長可能可以比佢呃到，買啲特級貴價BB玩具，但係我哋呢啲玩具精明眼，妖怪手錶模型幾多錢，one piece手辦幾多錢，我會唔知？唔好玩啦～

反斗孱兵 Oscar