現今航運業發達，機票平過十九幾年前，一年飛幾轉再不是夢。 仍然聽到有人說：（你又飛？真有錢。） 講果個，十個有九個係有家室，公一份婆一份，每個月花咗一半收入去供樓，而且仲有個化骨龍要養。 （其實你都可以㗎，你收入仲高過我。）當然，我無任何假設去回答。 （那有錢！） 知人前因莫羨人，我講過N咁多次，每個人都有權選擇其生活方式，我不會羨慕你有老婆仔女，（但係供樓供餐死，明知樓價咁高都仲要入市，你就真係有錢喇；之不過連自己捧了多年的球會，也未曾到過其主場，甚至連收費電視都唔捨得裝，咁仲有咩人生樂趣？今時今日做人父母甚艱難，我又講過N咁多次，而家香港真係唔適合小朋友成長，一出世就要開始競爭，大家真係咁想？第時我唔想見到個仔因受唔住壓力而跳樓呀。）你可以因我自由自在，呢度去果度去而羨慕，但唔好批評我做人唔長進，唔踏實。 起碼，我走嘅路多過你，見嘅嘢多過你，呢啲係用錢係衡量唔到，或者語言能力有限，但出到去外地，唔會失禮人先。 偶然打開以前叫做有交情，而家無再來往，但仲未unfriend的所謂朋友的Facebook，看看他們的近況，我想未來都沒可能重新聯線罷。價值觀唔同，傾嚟做乜？我都咁大個人，時間有限，咁上下啦。 坦白說，以前拍拖果陣，我都無諗過結婚生仔咁遠，而家更加唔會諗，有時我會幻想一下，假設我肯妥協結婚生仔，今日會點？以我的經濟能力，可能要撈兩份才夠供樓養兒，每日收工只對住張床，或者眼光光睇住電視上的CCTVB，然後在Facebook講兩句電視經。 這樣的生活，有甚麼情趣可言？未曾活得精彩就為下一代而活，我才不想。 只讀到中五的我，前度叫我進修，我就進修，而家拿到個文憑，得到甚麼？答案係無。做了一萬四千幾日人，在事業上再沒有任何野心，不如放眼世界好過。 有人早熟有人大器晚成，我的人生就在三十到尾，即係甩拖之後才開始，當時看過村上春樹的著作 - 如果我們的語言是威士忌，被他的文字迷倒，從此愛上的威士忌，雖然當時我偶然會飲，但認真地飲，係由果時開始。 四年以來，作為一個非從事酒業的人，足跡走過十多間酒廠，艾雷島、低地、高地、Speyside，甚至台灣南投，只為飲酒思源，我都覺得自己有點痴能線。上個月參加了The Dramathon，威士忌主題的賽跑，解鎖了另一個成就，下年有無人陪我跑？ 人到中年，要活得精彩，豐富自己經歷，與其讀萬卷書不如行萬里路；其實現代人比較襟老，今時今日四十歲並非很老，與時並進，放開懷抱接受新事物，才不會淪為討人厭的廢老。 難得在人生中遇上與我喜好相若，大家的思路都是帶點意識流的好友小寶，我會好好珍惜他。 一起閱讀，一起看電影，一起走到天涯海角，一起去音樂節，一起拿住菲林相機街拍，我想。