【龔成問答信箱】（Q22101-22120）

Q22101：

龔sir 我今日做左進階班功課 有d問題想下，我用左莎莎既年報去計財務比率

1）我計到既ROE 分別係-26.4同-31.1, 但係你比的價值網同bochk 係-23.5 同-24.9，點解會有d分別呢？

2）EBITDA 利潤率 其實我唔係好識搵個EBITDA出黎 自己跟住年報計除息除稅除折舊後 都計唔到價值網 顯示既-3.85同-3.67億(價值網顯示2020年係正數

我諗應該係負數先岩？）個EBITDA利潤率 價值網 係-12.7同6.41，而bochk係 4. 06同5.47, 想請教下可唔可示範一下點計？

3）存貨週轉日數 我計到160，呢個數字同價值網差唔多，但bochk係106, 又係想請教下邊個數字先岩？

4) 關於杜邦分析法

2020年: 1.97 x 1.75 x - 9.02% ＝-31.1
2021年: 1.89 x 1.21 x - 11.5% ＝-26.3

ROE 2年都負數 不過2021負得冇得多 2021年純利率差左 不過財務槓桿 同總資產週轉率個數細左 所以負少左

我就唔係好明 總資產週轉率 應該愈大愈好 但係假設2021年都係1.75 (instead of 1.21) 咁計出黎個ROE負得仲勁 咁咪調返轉應該係愈細會愈好？請指教一下

龔成老師︰

1) 我相信係你和其他網站，係計個"發行股數"和"股東權益"出現分別。

因為每個網站的公式都不同的，就算發行股數都不同，計年頭？年尾？平均？加權平均？通常我睇財經網站，都唔會太著重d細數字，你了解大方向就得，同埋，不同財經網站的數據，一定會有d誤差，正常的。

2) 至於EBITDA利潤率，你可以參考BOC個數字。你可以用佢年報中"經營虧損"，再加翻"按性質分類之開支"中的折舊部份(2021年年報P.177)。但會有少少差別，可能係提取數據或匯價問題，影響不大。

價值網部份，都係用類似計法。但2021年數據，可能系公式不同，其實，一般網站在計算EBITDA時，都計左「使用權資產折舊」，但這並不是真正的折舊，所以數據的參考價值會低左。

其實較精準方法，我建議係用EBIT - 折舊，但這個折舊，應該排除左"使用權資產折舊"的數字，咁會更準確。2020和2021年EBITDA，應該為-7.6%和-10%。

2020年︰(-5.53 + 1.17) / 57.17 = 7.6%
2021年︰(-3.91 + 0.87) / 30.43 = 10%

3) 如果用我教法，拿年初和年末平均數計，答案係160。至於點解BOC會有分別，因為佢係計算存貨時，唔係用年初和年末平均數去計，所以有落差。

你照用160，咁就可以。

4) 你這個杜邦分析計算，係正確。你睇翻個3組數字﹐你會發現中間組數(營業額/總資產)，係變動最大。

你就會發現，企業這2年面對問題，係銷售數字出左最大問題，有明顯轉差情況。

之後，我地再睇翻客觀環境。由於這2年有社運和疫情影響，令到營業額受損，係正常。這些都係中短期因素，因此我地係分析企業質素時，唔洗過度在意。

至於你話總資產週轉率愈大，個ROE就會負得愈多，係正常。因為現時佢生意少左好多，但好多固定成本，好似舖租、人工等，唔係話停就停到。

佢現時基本上，每件貨品都係蝕住做。但當這些不利因素過去，營業額回復正常，有更多銷售單位去攤分這些固定成本時，就會令佢轉虧為盈。

這時候，每賣一件貨都係賺錢，自然會係總資產週轉率愈大愈好。

------------------------------------------------

Q22102：

你好 龔sir本人持倉如下：

778 @$10.3 x 5000
823 @$71 x 1500
941 @$83 x 500
968 @$13 x 8000

1177 @$4.5 x 12000
1928 @$41 x 2400
6823 @$10.5 x 10000

另月供5隻各$1000, 現值16萬多

3,285,823,1177,1299

本人50歲 月入33K 還有十年退休，想法是退休時將所有股票轉成有5厘息以上的收息股 作生活補貼

1) 這個組合有沒有問題？

2) 因為未來還有10年穩定收入 這組合是否過於保守？

謝謝 祝生活安康

龔成老師︰

1) 你持有和月供股票，都係有質素。但由於你50歲，係一個要為退休開始準備的年紀。

因此，你要將組合中的股票，慢慢轉成較保守組合。按年紀增長，慢慢加大收息股比重。目標係10年後退休時，組合100%係收息。

現有持股，暫時可以不用改變。但月供組合中，中生(1177)和比亞迪電子(0285)都係潛力股，風險對你而言，用點高，唔建議用佢地作為月供組合。

你可以將這2隻股票，換成為收息股，會較適合你現時的年齡配置。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

還有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

另外，你要留意一下，你組合持股的佔組合比例。個別企業和行業，不要佔組合15%和30%以上，否則會有過度集中性風險。

你現時部份股票，係超過這個標準。但由於都係有質素股票，故不用沽出。用未來新資金，去慢慢拉平衡翻個比例，咁就可以。

現時大市只在合理區，每月月供之餘﹐緊記都要留少少現金，用來等大跌市出現時，可以去掃平貨。

2) 你大致上跟我所講的方法，去進行配置，增長力度就會配合到你年紀所需。

我假設投資回報有10%（連股息再投資），你每月投資$5000 + 55萬持股，10年後大約會增值至250萬。

你再將佢換成6%收息股，大約每月就會有1.25萬的現金流。你可以以此作為參考，調整自己投資計劃。

------------------------------------------------

Q22103：

我正在研究電動車和自動駕駛，有什麼介紹

對這個行業未來的看法

龔成老師︰

電動車方面，我自己一直較看好比亞迪（1211），係佢的電動車。

首先，電動車有環保的概念，這點令政府會加以幫助，而市民亦會支持，但其實，電動車真正的價值並非在環保，而是慳錢，用電比起用油平得多，因此只要各種配套都完善，車主沒有理由不選擇電動車。

只要有金錢利益推動，人們的習慣將輕易改變，在70年代的石油問題，完全改變了美國人使用汽車的習慣，由一向追求大汽車的習慣，轉變到鐘情於小排量慳油的日本車，令日本車大舉入侵市場，當其他車廠發覺時已經太遲，最終成就日本車霸主的地位。

雖然將來的油價難以估計，但到經濟好景，各國都大量用油的情況下，石油需求大增，電動車的優勢亦愈來愈明顯。

另外，比亞迪在中國發展電動車，可說是佔盡地利因素，因發展電動車必需要有完善的配套，政府的支持十分重要，另外，若政府肯帶頭使用對推廣很有幫助，現時比亞迪的電動巴士已經行走在中國多地的公路上，由公共交通開始發展，可見政府對電動車是正面及支持的，然而，中國政府在支持電動車背後亦有個重要因素，就是石油。

中國並非產油大國，未來的石油供應難以滿足中國的汽車需求，而發展電動車就成為辦法，同時中國在西藏擁有不少能生產電池的鋰資源，若能用電動車取代傳統燃油車，中國對石油的依賴可減少，對別國的依賴能減少，從整個國家發展的戰略角度分析，中國發展電動車的誘因並不少。

同時，中國是政府主導的國家，要建立配套及支持業界，比資本主義國家更容易（在西方國家，石油業的既得利益者並不希望見到電動車的出現）。

投資中國的企業有一個要點，就是順從中央的方向，這不是指個別一兩個政策，而是一個大方向，因這會對企業的長遠發展有重大的影響。

比亞迪在新能源汽車方面，經過幾年的發展開始有起色，混能車銷情理想，而電動大巴在政府支持下銷量亦理想，而部分歐洲國家亦開始試行比亞迪的電動大巴（這是有利的指標，因歐洲的標準甚高的），雖然只屬起步，但情況不錯。

現時比亞迪的新能源汽車遍佈全球6大洲、多個國家和地區，其中包括美國、德國、 英國、日本等主流汽車強國市場。

所以，我睇好這企業的電動車，但並不是一兩年就見到收成。

至於自駕技術，見集團都一直有同科技企業合作，相信發展上都係正面。

但這股經常都處略貴水平，大約去翻$135先算合理，如果真的好想買入，現價小注月供好了。始終現價投資風險高，回翻先考慮正式買入。

或者，你可留意下中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

------------------------------------------------

Q22104：

老師你好！岩岩開始睇你既書，好似展開左我人生新既一頁，原來一直以來既理財觀念（淨係識得放錢係銀行儲）係好old school同好無效率。依家將你一本本書慢慢睇，希望可以快啲財務自由啦

小妹25歲，月入4萬，家用一萬，用一萬（下個月開始想用少啲儲多啲)，儲兩萬。

黎緊應該會同男友買樓，想買約7-800萬既樓，有首期，希望可以快啲供完，唔想負咁耐債，其實睇完書真係好唔想供樓，覺得要借錢再負咁耐債呢件事好矛盾，更無奈樓價愈黎愈唔合理，但又想有個安樂窩

1。儲蓄約15萬；需要再拎錢出黎投資嗎？

2。美股：少量voo

3。睇完老師你講既野，想試下月供股票
你覺得我每月供
$5000 （2800）平穩增長股
$5000 （3067）潛力股
如何？

4。如果二人都用呢個組合投資，可以加快供完層樓嗎（男友都係月入4萬）
希望你可以比啲意見我，謝謝呀！

龔成老師：

你現時25歲，係累積財富的黃金時期，你要好好把握，盡你一切的力量去儲蓄、投資、學投資知識。

你盡快加儲蓄到每月$2萬，是正確的。

1）你表示「有首期」，是否已另外預左一筆足夠的資金，去準備買樓，我假設你已準備好，餘下的$15萬就可以投資/等投資，不過，我會較建議你等完成買樓過程，先開始投資。

另外，現時低息環境，其實唔需要太急去還錢，你照正常速度去還錢就得，資金可以用作增值。

2）VOO可長線持有。

3）可以，這兩隻都是不差的選擇，但現時好睇你會幾時買樓，而決定投資多少，留現金多少。

4）你概念上不用想著「想盡快供完層樓」，你只要照正常速度去供樓就得。每月保持進行財富增值，照上述月供模式進行，就得。

------------------------------------------------

Q22105：

你好龔成老師, 首先感謝你的無私分享，令我有希望可以有天財務自由。

先跟你分享我的現況

工作方面：我今天25歲，月收入13K，上年原本收入18K，但因為轉行由低做起，希望將來可以收入更穩定，所以即使收入下降仍堅持轉行。

我亦有PT工作，大概月入3K。而今年9月我打算花約80K讀PT PGDE，預計2年後畢業後起薪點可以升至30K。

儲存方面：我答應自己每月要儲14K，預期3年後有500K。

資產方面：我現有資產350K，當中股票佔6成，3成是銀行定期，其餘是流通現金。股票比例:

1) 316, 買入價119, 股數419
2) 823, 買入價62.76, 股數131
3) 1177, 買入價7.73, 股數1414
4) 2388, 買入價24.4, 股數1447
5) 2800, 買入價26.37, 股數2301
6) 3067, 買入價17.6, 股數692
7) 3988, 買入價3.07, 股數3252

目標：我期望3年後可以儲到一百萬，與男朋友夾份置業再結婚。

1) 請問老師認為我的方法適當嗎? 有更快達到目標的方法嗎?

2) 請問老師認為我的股票比例恰當嗎? 有需要更集中投資/賣走哪隻股票嗎? 我暫時只有穩定地月供1177及3067各約$2000。謝謝你

龔成老師：

1）現時的股票與現金比例，適合的，持有的股票都是有質素的股，但你25歲，其實未必適合持有收息股，因此，中行（3988）這類收息股，就未必是最好的選擇。

至於大方向，基本上無問題的，但由於你轉左工，收入減少，你要睇下自己能否做到每月儲$14000的目標，如果可以做到，相信3年資產達至$100萬，可以的。

2）比例基本無問題，由於你3年後要資金，因此不能太過進取，你預潛力股與平穩增長，各佔一半就可以，潛力股不能太多，反而當你買完樓後，資金可以更長線投資，到時可以再增加翻潛力股的比例。

------------------------------------------------

Q22106：

Hi老師，最接近神的男人
因2年前無意中係fb識到你

另外，知道你聽過好多 多謝你的人留言，
我都一樣
我都好想多謝老師！同埋多謝我自己！

我有間居屋 供緊， 在職媽媽
小朋友x2 有一個工人姐姐
以前就算好慳好慳，
都儲得好小錢！

人工唔高 只是普通文職 ，
但我2年內竟然都儲到多達十萬以上！
都係你帶來的正能量影響

除左正職外，亦多層面地搵到額外收入（如投資，網上填問卷，任務/網店/etc....）
真係好多 原來增加收入來源係好重要
，
而我也揾到真正搵錢方法 好開心）
為了令自己收入更大，我偷時間去投資自己身上！去學習不同知識！
賺取更多額外收入！
多謝你無私奉獻

龔成老師：

哈哈，太誇張了，其實我做的事不是好誇張，我原本都是好普通的人，只是我比一般人更加努力，希望你都要明白，好多事情你都能做到的。

見到你有正面的影響就太好了，你最重要是保持進步，無論知識，以及財富。

你現時的方向正確，同時，你應該思考一些長遠增加收入的方法，例如自己在現時職位上的發揮，有無進步的空間，長遠的事業發展怎樣。在自己的能力上，以子職業上，都要從長遠角度出發，加油！

------------------------------------------------

Q22107：

你好，有些投資問題想求你指教

我月入3萬，太太月入7萬，有兩個3歲小朋友。我有層自住樓，貸款金額仲有500萬，每月供$18000左右。因為我人工唔夠借，所以太太是我擔保人。

另外，我太太和她的家人有層已供完聯名物業市值720萬，但她家人住緊。

現在，我哋想喺太太和家人的聯名物業按揭貸款，之後買入的士（的士牌連新車約$550萬）收租作投資，但我們現金儲蓄得50萬其餘就按揭借回來，你認為可行嘛？

以我的背景會唔會好大風險？還是作其他投資好呢？

謝謝你的賜教

龔成老師︰

我相信你年紀都唔係太大，應該係年青至中年人士的階段。

在這個年紀，其實借貸比例高少少，都係可以。你預總負債，最多可以去到總資產7成。從負債風險角度，只要你做到7成以內，風險水平都係可以接受。

所以，你要計一計數，所有負債，比起所有資產的市值計算。如果超過7成，就是開始高風險。

但你要留意，的士牌過往是增值類別，而家已偏向收息類別(增值都仍有，但不算多)。

本質上，的是牌可以不斷有租金收入，而這個租金都會按貨幣系統的向上，而不斷向上的，但行業近年出現了叫車程式等新的競爭模式，對佢點都有影響。

所以，在長遠計，佢的增長能力只是中等，視為收息類的資產會比較好。

以你們年青至中年年紀，我比較建議集中係一些較有增長力資產，例如一些有增長力的優質股。

投資的士牌唔係唔得，但佢增長力唔會好強，財富增值效果，現時未必有優質股咁好。

------------------------------------------------

Q22108：

龔成，你好啊！好緊張，希望你會答我呢個投資初哥問題

我目前有HKD80,000資金專門預留作為投資用途，宜家30歲，希望係2022年2月前投資而賺到HKD160,000;請問有咩嘢建議？

我之前有月供股票買盈富同CLP,都有小量投資美股，只限tesla, ARK及台積電。

Thanks!!!!

龔成老師︰

我地做財富增值，一般希望做到架合理回報，係每年增長10-15%。你現時這個目標(1年升倍)，用股票投資去做，風險會好大，較難達到。

而且，1年係一個好短架時間，就算再優質股票，都要時間升值。1年太短，好易會有股價波動風險，令最終回報不確定性好高。

如果你無其他增值方法，建議你按部就班，透過月供去買入優質股，去為自已資產作增值。

你過往投資股票，都係有質素，用來增值係可以。但以你30歲年紀，應以增值為主。中電(0002)增長力不高，未必太適合你。

建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

另外，我建議你加強每月儲蓄，這是重要的。

------------------------------------------------

Q22109：

你好呀, 老師, 我今年29, 有以下兩件事情想各你請教:

1. 想與姐姐置業 兩人月入共7萬 流動資金約有100 萬, 本住青衣區, 想買樓齡不超過20 年的, 正考慮藍澄灣, 同埋想問2人自住, 建議入手呎價為多少

（實用面積為500呎會過大負擔嗎？ 想做9成按揭，另想問下老師你覺得此區樓宇有升值潛力嗎？ 由於是第一次置業，想先請教老師有何建議?

2. 另外，因父母抽到居屋，費用為200多萬， 父母正考慮做多少成按揭，如一次過付款，流動資金便所剩無幾，但做按揭又要俾利息，所以想請教老師

建議按幾成才合適呢？

謝謝你的解答!

龔成老師︰

1) 青衣區內大型屋苑唔算好多，成個區潛力度只算中等。但東大嶼計劃落實的話，有機會刺激到這區樓價上升。

藍澄灣質素算中等，佢距離港鐵站較遠，係一個扣分地方，但整體算係可以。

但你這個作為自住樓，我建議較從你自身需要作出發點，去作出考量。你要諗這間屋，係唔係適合你長遠需要，講緊係未來5-20年。

呎吋方面，只要唔好太細(少於300呎)，符合到你生活要求，咁就可以。另外，我地自住樓一定要堅守一個大原則，就係長線要"供得起"。如果可以的話，置業係無問題。

2) 現時貸款息口在低位，無論係你和你父母，我都建議盡量做高成數貸款，去空出更多資金，做財富增值。

如果你父母本身好怕風險，就將按揭成數調低，但其實在財富運用上，高成數會較好的。但要留意，你自己買物業時，高成數按要比按保，你要平衡翻。

雖然高成數按揭表面上，係要比多左利息，但我地要從機會成本做考慮。你利用低息貸款，空出來資金進行投資增值(投資優質股)，去爭取更大回報，相信長線財富增值效果會更理想。

同時，你父母都可以因此留下更多資金，以備不時之需。

------------------------------------------------

Q22110：

Hi 呀Sir你同唔同意1211黎緊要加強品牌宣傳，佢銷量好似唔夠多，我明白佢有技術，但始終作為買家都想要多人識既牌子咁。

比如比亞迪做公交車，人地買左會唔會覺得自己個檔次低左

龔成老師︰

其實比亞迪(1211)品牌，的確有改善空間，特別係在國際市場。

但由於佢有技術，這方面係佢主要勢所在，品牌雖然唔算好強，但無損其投資價值。

而且，集團將來未必只係集中係出售新能車，可以會慢慢加大電池和新能車相關技術銷售。故零售品牌的強弱，未必對佢影響十分大。

其實，比亞迪其中一個往後的發展，就是「賣電池」，即是同不同的車企合作，而這方面的發展，自己的品牌，未必是核心。

------------------------------------------------

Q22111：

龔成老師，你好！距離上次請教問題，原來已經有1年7個月，最估唔到既係呢段時間自己既資產價值升左有65%(105->175)。主要係將過去持有既現金部分轉左去股票+每月部分剩餘資金作月供

所以出現左較大既升值。

一、打算準備置業，而因為我目前有接近6成既資產都係股票，因此若要置業就需要放左一D股票，目前股票（買入價，未扣除過往收息）如下：

完美醫療[email protected]，24000股
騰訊700@408，400股
銀河[email protected]，1000股
盈富基金[email protected]，6910（月供緊10000）
中生製藥[email protected]，10000股
小米[email protected]，3000股
建設銀行[email protected]，10000股
阿里巴巴9988@176，100股
港鐵[email protected]，1449股(月供緊3000）
閱文[email protected]，406股

我有考慮既係因完美醫療同騰訊升幅較大，再接觸到較平宜價較難，所以計劃：

1.先放左升值潛力無咁大：如建設銀行、閱文集團；

2.現時買入價與成本價相距較近：港鐵、阿里巴巴、小米

3.再考慮剩餘（優先考慮銀娛，及部分盈富基金）的股票。

你覺得呢個安排會唔會較好？

二、由2019年11月開始月供到而家，見盈富基金佔現時比例較大，想降到3000/月，因為澳門月供股票成本較貴，50hkd/隻/月，

唔想月供分得太散，想10000就分別5000福壽園，5000港鐵。會唔會都可以？但若果成功置業，到時候可能只月供到3000-5000。

三、最近睇完你本《80後千萬富翁》，好有感觸，特別係我對現時份工完全感受唔到滿足感，甚至厭倦，現時一有時間就會睇報表，樓宇相關資訊，

目標向住有基本財務自由後辭職。感謝你本書再俾我動力去向股票，樓宇，老闆方向發展。

龔成老師︰

一) 你的策略，有部份需要修正。

我地考慮持有邊D股票，要從佢是否適合你、組合平衡性和現價平貴(而唔係睇買入價與成本價的差距)，去作出考量。

你還未到30歲，建行(0939)這類收息股，唔適合你。閱文集團（0772）確定性較高，可以減持少少。

完美醫療(1830)現價偏貴，加上佢佔你組合比重較高，我都建議你沽出部份。

至於餘下股票，持有價值差不多。若你有需要進一步套現，你可以按比例去每隻沽少少。

二) 你這個調整，都可以。暫時你就用你新的調整，去繼續進行月供。到你置業後，才按需要減少月供供款，就可以。

三) 本書能幫到你就好，記住要做好財富增值，唔係短時間可以做到的事。要保持學習、維持現有投資習慣，你自然會一步步走向財務自由。

------------------------------------------------

Q22112：

你好！ 家父將於4年後退休，佢想我幫佢用1百萬做投資，希望長期收息亦可有小許本金增長。

80% 穩定收息
303 vtech 15%
778 置富 15%
1310 香港寬頻 12%
941 中國移動 12%
2638 港燈 15%
2800 盈富 11%

20% 增長股票
1810 小米 7%
981 中芯 3%
823 領展 5%
066 港鐵 5%

請問以上可以嗎？定比例或股票有些轉換會更好？
Thanks！

龔成老師︰

由於你父親，尚有4年就退休，投資上應要較保守。

你現時持股和配置，大致上都可以。但盈富(2800)唔係收息股，佢派息平均只有2-3%，但有穏定增長力，可持有。

另外，中芯(0981)和小米(1810)雖有質素，但波動性較大，不宜持有太多，故不要再加注。

現時大市只在合理區，資金唔好盡用。最好留有部份，一方面，可以等大跌市出現時，用來掃貨。另一方面，你父親都應該留有一定現金，以備不時之需。

------------------------------------------------

Q22113：

龔成老師你好，我想請教下你，我已經賣左我既單位，宜家手頭上現金有130萬，我和先生的入息加埋有6萬，我地想買返樓

但係樓齡新少少已經去到700萬，供唔起，我地打算租住先但係又驚上唔返車，請問我地點做會好d？

龔成老師︰

若現時財政，不足以直接承擔心目中的理想單位，你有2個方法。

你可以先購買一個較細單位，之後放租去「以租養樓」或自住。另一邊，就用優質股繼續增大個資金，之後才用較高成數去買大屋，令自己可以供得起。

這樣做，可以有平倉樓市的效果。你們資產，相對受樓價波動的影響，就會較細。當你地將來再換物業，會較有預算。

另一個方法，就係直接用優質股去增值。現時以租金回報率計，股市值博率會較高，潛在回報都會較大。

但由於佢同樓市，唔係有直接關聯。若長線樓市升幅跑嬴股市，變相反而令你置業成本上升左，得不償失。

你要自己衡量下，邊個方法會較適合你。

------------------------------------------------

Q22114：

本人49歲，丈夫51歲，一子將升中學。夫婦兩月入約15萬。在何文田擁有一物業，以丈夫名下持有，仍欠銀行180萬。

我與丈夫現共有公積金約700萬。現金260萬，定期200萬，基金保險200萬。我自己有9手滙豐股票、1手工商，1手港交所。

丈夫常想多買一層樓，因現單位不夠住，想多買一間三房單位，何文田單位出租。但我想以我們的年紀，再重新供一間樓是儍事嗎？

最近見大埔一大屋苑800呎單位，售950萬，26年樓齡，可考慮嗎？

龔成老師︰

其實，每個人都有自住需要，一個適合家庭長線生活的物業，係需要的。你用現時方法，買入一間3房，再將現有物業放租，係可行。

你現時有一定的現金，只要利用作首期，餘下部分現金，你每月供款，我相信可以應付，但的確，每月支出會增加左，你要計好數。

而你現有物業按揭$180萬，將其放租，我相信每月都有基本的正現金流，可以幫少少你每月供樓部分。

另外，如果日後能善用公積金，無論作為部分還款，又或投資一些能產生現金流的工具，都能有助你供樓的。

但當你再買入一個物業時候，你成個財富組合，就會偏晒係物業類，出現過度集中性風險。故你在買入新物業後，長遠來說，加大翻優質股的投入﹐去令財富組合回復平衡。

另外，你現時持有股票，都係有質素。但你要留意，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時明顯，係偏重左係銀行股，未來要加大其他行業股票佔比，去平衡翻個組合。

以下是一些適合你的股票，現價都在合理區，可分注入貨。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

現時大市只在合理區，資金唔好盡用。要留有部份，等大跌市出現時，可以用來掃貨。

------------------------------------------------

Q22115：

龔sir，我是你的學生，想就爸媽的情況請問你意見：

爸媽是退休公務員，60歲，有長俸(每人每月約$15,000)。他們持有一個單位，市值約$1,000萬。下年中他們將搬來跟我一起住，請問他們應該：

(1) 將樓放租，租金大概$20,000/月，每月$2,000管理費；或

(2) 將樓放賣，將部份所得資金(大概$700萬)換入保守投資股票組合，希望有4-5%年回報，換取現金流。

請問那個方案較適合他們的情況？如是(2)，請問除了港燈般的公用股，還有那些是最穩健的收息股？因為就算領展置富這些近年都比較波動，謝謝

龔成老師︰

你父母由於會跟你同住，所以無自住樓需要，其實用分法1和2去處理，都係可以。

若你父母透過長俸和租金收入，已經足以應付基本生活支出，我會建議一動不如一靜，用方法1就可以。

相反，若現時長俸金額和他們生活開支，係有一段距離，你就可以考慮用方法2。

另外，你可以考慮將層樓加按，套現部份資金，去買收息股(最好係方法1，不足夠支付生活才用)。

但由於借貸始終有一定風險，唔好按太多，大約2成左右好了。同時你要明白，這樣會令你父母負債增加，風險會增加。

另外，如果你投資的股票不幸股價下跌，你就會出現「賺息蝕價」，對你不利。

同時間，如果日後加息，又或你收息股的派息減少，都會令你得到的息差回報收窄，你的回報會減少。

你要從實際情況和風險中，取一個平衡的方法。

以下是一些有質素的收息股，給你作參考。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

領展(0823)都可以考慮，但因為佢都有一定增長力，所以股息率未必太高，你要留意這點。

我較建議方法（1）。

------------------------------------------------

Q22116：

我想請教，以收息股為例

我既3號仔，早前收左利息，我係咪應該將息做investment ，Otherwise 就achieve 唔到個compound effect ?謝謝你

龔成老師︰

其實複息效應，係分2部份。第一部份，係企業賺到錢，攞去再投資在業務上，創造更多盈利。

另一部份，就係你所講的派息。這部份，就要投資者，將這筆資金去再投資，去創造更多財富。

但如果你持有股數不多，收到股息可能較少，不足以買1手股票。你可以將這些股息先儲起，到有一定數量，目標股票價值又合理，就可以出手。

------------------------------------------------

Q22117：

龔成老師: 現時持股組合中，有1928金沙 $33.9買入，但擔憂政治風險影響續牌，以至可能帶來毀滅性打擊，

眼見880 澳博股價下跌不少，值博率上升，請問是否換馬較好?

龔成老師︰

金沙(1928)無論在賺錢能力、規模、物業質素和協同性等等，都係優於澳博(0880)。

現價計，雖然澳博值博率係較高。但長線計，金沙(1928)增長相信會較好，我比較建議用金沙，作為長線投資目標。

至於澳門賭牌問題，我係課堂上，都有課程的同學們分享過。簡單而言，佢成功續牌機會，會係較大。

------------------------------------------------

Q22118：

龔sir, 有事想請教你意見。我將會離職，公積金約有40萬可選擇取回或者繼續存放於景順，目前都係放高風險的100%環球股票基金。

僱主供款30萬幾（我唔洗供），而家收益9萬幾。

請問我應該選擇取回所有現金再作其他投資？（扣取放回MPF的錢之後應該還有28萬左右可以取回）還是應該先繼續放，等個市好啲再取出？（佢五年內再隨時取回）, 先謝

龔成老師︰

首先，你按翻人生財富配置就得，睇翻自己年齡情況，是否適合說基金的風險度。

另外，你可以睇翻隻基金表現和目標，去做決定。

例如投資的資產類別、投資策略、風險程度、市場、費用成本、以及過往的表現。

你可以睇佢過往5-10年，如果回報係比主要投資市場高，有機會值得繼續放在公積金戶口投資。

------------------------------------------------

Q22119：

老師，請問你有沒有覺得最近市況有點過熱，大市市值有點偏高？

我留意到HSI的市值已高達17倍，比以前一般10-12高出不少，另外一流的公司市值升很多不在話下，但連不少質素很好的2線公司都有2-3倍的升幅，

例如中國軟件，中遠海控，這情況令我擔心市場正在開始形成泡沫。

針對這種情況，我繼續保留質素很好的公司，但我應該把手上投資組合中質素一般的股票賣出，換成現金還是換成較好質素的股票比較好？

現在我有1百萬股票，1百萬現金，我希望5年後能夠增值成1千萬，跟隨老師你的步伐，請問我怎樣做才可以達成目標。感謝你的時間和思考，如果上面寫得不夠清楚，請見諒。

另外一提，在我只有十萬時看百萬富豪，給予我希望及目標，最終我得到百萬，果然意念成就事實。

現在，我正在看千萬富豪這本書，給予我新的目標，而且我已經不會再覺得是希望，而是信念，必定能做到的信念。

感謝你，這些都是因為老師影響到我。

我現在是創業，會計師樓老闆之一，算是正在做創富類的工作吧。

我想變得更好。

龔成老師︰

先恭喜你，達成首個理財目標，成為百萬富翁。

由於近期恆指加入不少新成份股，令到PE合理區，都作出相應調整。你預13倍左右，算係合理區底部。

中國軟件國際(0354)和中遠海控（1919）係貴，但整體大市依然算係合理區，暫時唔見有好明顯泡沫。

你持有優質的股票，應長線持有。但較一般的股票，若持有比重較多，可以考慮換碼至其他優質股

其實，我地投資股票，就等同投資一間企業。係要時間，比佢慢慢成長。一般希望做到架合理回報，係每年增長10-15%。

你現時這個目標，用5年將財富由200萬，增值至1000萬，用股票投資去做，風險會好大，較難達到。

其實，正如《80後千萬富翁》書中所講，要致富其實有5條路，投資只係其中之一。

而生意，都係其中一個出路。一盤生意打理得好，回報係可以遠超投資優質股，所以你想達至你的1000萬目標，可以先從自己盤生意著手。

若再用空閒資金，才用來投資優質股和物業，令財富組合更平衡，咁就可以。

如果你這筆100萬資金，係已經諗住預留去投資優質股。你可以先儲起，因為現時大市只在合理區，你可以等有明顯回調時，才用來慢慢分注入貨。

------------------------------------------------

Q22120：

老師，不知不覺就過左2年多没有message你, 其間我有睇你書及留意你facebook

亦成為我這幾年的鼓勵，現在有些問題想請教你意見, 我同男友想在明年初結婚, 我們都打算未來幾年內移民, 我們打算未來1-2年生BB,

我男友想買樓, 他會用大部份積蓄, 但我反而叫他租樓住, 因為咁様，cash flow會較多, 而且怕幾年後樓價會跌, 放樓也不容易, 一買一賣涉及很多費用, 又要用錢装修

我們這個情況, 你會有甚麼建議? 贊成我男友買樓嗎？還是盡量租樓, 留多d cash係手?

因政局常變, 而買樓有3年禁售期, 因為我才建議男友租樓, 但他不喜歡租, 只想買, 你意見如何? 這刻可怎樣為將來同移民打算?

龔成老師︰

過幾年樓市升跌，無人知。從自住角度，若你係有實際生活需要，而有"供得起"，置業都係可以。因為除了優質股，物業都係一種資產，都係可以幫到你累積財富。

較理想的情況，就係在置業同時，可以留有一定優質股係手，保持增值。令成個財富組合，唔會過於遍重物業，因而造成過度集中性風險。

但其實，你距離移民只有幾年時間,如果移民時，你可能不會保留任何香港資產，我就建議你地租屋會較好。

加上一買一賣的成本高，同時無人知樓市到時是高是低。

因為本身樓市有一定波動性，加上装修和買賣成本都高，還有額外印花稅等問題。為幾年生活，而去置業，未必真係值得。

你反而用移民前的幾年時間，將資金投資一些優質股，去幫你移民前做些增值，相信會較好。

而你男友想買樓，我估有機會係從投資角度出發。但其實現時樓市算略貴，整體租金回報率不高。投資值博率計，會係股市會較高。若他真的有從投資角度考慮，你可以提一提他這一點。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20941-Q20960）

Q20941：

老師你好，想問小小配股既野因為呢排有好多公司配股

1. 配股係咪牛市既特點呢?

因為係課堂你話牛市其中一個特質就係好多IPO黎上市，咁如果經常配股係咪姐係公司覺得估值高要拎錢，其實係咪要小心呢?

2. 配股拆讓其實係咪好機會去加注呢?

好多時配股會折讓5-10%，其實係咪好機會去加小小注?因為而家呢個年代既配股好似好小事，比起以前配股好似會好大獲咁?

而且市場資金好似好多，呢半年小米/藥明/騰訊/安踏/美團/比亞迪都有大規模配股，但好多時配完幾日內就會升番去原本價位什至更高。

好似對股價冇半點影響，咁我如果趁配股加注有冇問題?例如藥明每3~4個月都有一次配股，我有好幾次想買但都買唔落手。

3. 配股次數多其實係咪好事?

藥明基本上近呢兩年，每三至四個月都有一次配股，但股價仲繼續升，其實如果經常問市場拎錢。會唔會係好/壞事?麻煩曬你啊

龔成老師︰

1) 可以算係牛一其中一個特點，會有較多企業係配股。

因為牛市時，市值一般會較高，集團配股可獲得資金，會相對一般市況時為多，故配股較多在牛市時出現。

但配股唔代表間公司一定係估值已經好高，只係機會較大。你要自行估值，來作判斷。

2) 唔一定，你要睇翻本身企業的估值。如果企業現價已經係好貴，拆讓5-10%其實意義唔大。

至於這些大型企業，在配股後依然大升，有機會係受當時大市氣氛影響。記住，我地投資一隻股票的策略，一定係睇平貴而定，唔好受大市氣氛影響到判斷。

3) 配股本身如果會發行新股，其實係會令現有股東利益被攤薄，是不利因素。

至於企業不停做集資動作，要睇翻個原因。如果係為了合理的發展，而發展對公司長遠又有正面影響，其實係可以接受。

------------------------------------------------

Q20942：

阿sir我係你舊生， 我以下係我初步推算968的合理區， 屬水桶1至2間。

・ PE 15至25 倍左右，所以判斷出現時為為理區頂部。
・按企業基本面的5點分析是合格，且總負債約26%，是理想。 （當中7成來自廠房及機器虧蝕所產生，屬正常支出）

・平均將盈利 45%派息並穩定，其餘留作發展技術及擴展廠房，提高生產效率 (管理層平穩務實，正理地將回報與股東分享）
・roe 22.4%，反映再投回報中等。
・EPS : 13% （合格）

利好
1）太陽能長遠發展潛力，等待技術在各在市場滲透及廣泛運用
2) 市地地位屬龍頭，但未到壟斷，進入此行業需求有一定技術需求
3）產品面臨原料加價仍然有轉嫁成本能力，反映在股東溢利上。
4）即使在疫情期間，業務有持續正現金流入，盈利及收益都有上升。

風險
1）原材料成本上漲
2）季節性（如6至8月的雨季，影響太陽的產量）
3）出售電力的應收帳款大
4）依賴政府對電費補貼 （這點 我有點不明白 平價上網政策對這企業的影響）
5）投入的固定資產 （如廠房）需要1至2年後才可以反映，有機會未能即使提升生產效率

我對信義既玻璃產品仲未有深入既了解，在產品質素如果有分析得唔夠好既地方，希望阿sir 俾d 意見

龔成老師︰

你大致上都講到佢架優勢，PE估算都正確。

至於佢支出，主要來自銷售、營銷、行政方面等正常支出(唔係廠房及機器虧蝕)，大致係正常。

信義光能（0968)本質不差，股本回報率算係處高水平，加上現金流強勁。

之後將賺翻黎的資金，再投資在新設備去加大產能，為未來作準備。因為新產能不會在1,2年內立即出現，所以每年都新建新生產線，係必需的。

而且，除左佢負債指標理想外，你再仔細睇，其實佢負債水平一直下跌，都係利好因素。

集團過往依賴政府對電費補貼，但近年補貼已陸續退場。所以，集團將加快非補貼大陽能發電場項目併網，令非補貼部份成主流。

而整個行業去分析，取消補貼有助行業汱弱留強，將令信義光能（0968)這類有規模和實力的企業，優勢進一步擴大。

至於你到13%的，應該係ROA，資本回報率。在這類行業，可以作為輔助性參考。

而EPS，係代表每股盈利，係一個數字，唔係百份比，你要留意翻。

至於其玻璃產品，主要用在太陽能發電上。相關產品要分析，要有一定專業知識，才可以做到。

但我地可以從佢表現，得知佢是否有優勢存在。例如你說成本轉嫁能力，就係其中之一。

你見到佢太陽能玻璃銷售毛利率係按年上升，可見佢有較高成本轉嫁能力，和規模經濟優勢，令此股長線發展正面。

------------------------------------------------

Q20943：

龔成老師你好，最近，老闆加了我人工，資金上稍為鬆動一下，所以想請教老師，當年除了月供股票和買物業外，還有沒有供人壽保險？謝謝！

龔成老師：

要睇你本身是那一種類型，如果你比較保守，而你本身在財富組合中，無乜防守性資產，投資儲蓄型的保險，可以助你這部分的建立。

當我地進行理財，攻守兼備是應該的，問題是比例如何，以及這個人風險度如果。

如果是純保險，你可以留翻更多資金，用作自己投資增值，「攻」方面的效果會更好。

當然，我認為保險在我地的理財中，有一定作用，但就未必要太多

因此，好睇你自己的風險度，自己的投資能力，以及你本身、你想的財富配置。

------------------------------------------------

Q20944：

龔sir，我係恆生工作，佢地有個職員嘅shareplan，每個月可以供HSBC，供幾多就自己決定，一期係3年，供完3股送1股，我依家已接近供完佢兩期。

我想請教一下龔sir我應唔應該繼續供，定係依家果期供定就停？？？thanks

龔成老師：

原理等同有折扣價買入匯豐（0005），這股雖然賺錢能能力不及過往年代，但質素都算有的，都有投資價值。

你預佢主力收息及少少增長，不是增長型公司。都有投資價值。

除非股價已貴，你就算有折扣價買入都等如唔值，就時就唔值得。我相信你可以做多一期（3年），之後再睇情況決定。

但都要題翻，唔好將財富過度集中在單一股票。

------------------------------------------------

Q20945：

你好，我現在39歲左右收入17000左近。

住公屋我太太收入大概7000，有請姐姐，3歲小朋友同一架車。係疫症前，太太收入大概有萬四蚊。因為工人約期滿咗返咗去印尼所以太太冇工作一年。

龔成老師：

現時經濟始終較弱，暫時你地守住先，相信過3-6個月會開始好翻D，希望到時收入增加。至於長遠，都要想一些提高收入的方法。加油！

------------------------------------------------

Q20946：

龔成老師恭喜你, 你又救多個人啦 ---- 我 ^^

雖然我湊住兩個年幼小朋友之餘仲要番工, 還未靜到下來睇你既書, 平時只有小量時間望下你 facebook 既分享, 明白你不停講的理論

但我係燥急子, 就在 1211 比較高位買入, 而家係我自己抵死, 坐緊股票監, 唯一幸好係, 我知 1211 都算係有質數, 這點令我比較放心. 唯有慢慢等佢回番. 重整財務後再重新部署

今次我真係實實在在地 LA 野, 知痛了. 呢D咪就係冇股票知識同心急囉, 就跌得痛.
另外亦都明白股市升趺, 開始冇感覺.

由短時間win10萬變賬面上輸10萬, 由抽到居屋諗住簡樓,點知比人DQ左.

短時間太多大上大落, 幸好平時睇得你D分享多, 個人在處理危機時冇咁慌, 比較鎮定.

非常感激你不斷教我們, 令我們渡過每一個難關.
感謝你哦. 你也繼續加油.

龔成老師：

比亞迪（1211）有得守的，但唔好再心急加注了。

其實投資經歷，都是一個學習過程，我20年前都試過多資因為無知識，而輸左當時好多錢，好痛。

但正為有知痛，先逼自己不斷學習，提翻自己如果無知識、唔做功課，往後只會輸。

所以，我現時每星期用6小時去分析一隻股票，一年睇50隻，但只投資1、2股，就是明白做功課的重要性。

加油！

------------------------------------------------

Q20947：

老師 之前見到你有個讀者問答提到外幣存款戶口
想問係點運作架？

因為我自己本身都有d 唔同國家嘅外幣係戶口
唔知做乜好 而家又無得旅行

如果想將呢d外幣全部整合做d穩陣投資有無d咩選擇？邊種最穩陣但又可以慢慢滾存到賺錢？謝謝

龔成老師：

你可以做定期，又或者投資該地方的股票，例如美股。

如果不懂選股，可以投資一些ETF。

例如，你手上有一些美元，長期無太大作用，與其持有美元，不如投資美股基金，例如VOO，只要有美股戶口就能投資。當然要注意基金與現金風險度不同。

------------------------------------------------

Q20948：

龔sir你好，Follow你Facebook 4年多 一直想上你嘅堂 但因為要照顧小朋友所以一直抽不出時間

1）而家睇緊你嘅股票勝經 想請問有無邊一本書會講多啲關於計算合理區跟便宜區的方法？定係一定要上你堂先可以學到？

2）另外想請問Tesla近來回了不少 幾多錢先算係合理區同便宜區？

期待過幾年小朋友大啲可以抽到時間上你堂

龔成老師：

1）要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

你可以睇《股票勝經》《年報勝經》，以及巴菲特相關書，都有部分的。但由於估值要配合最新的經濟、經營、企業情況，因此，書一般都好難表述，所以較多都會在課堂講的。

2）Tesla不差，增長快，近年當業務由虧轉盈時，股價向上好勁。不過穩健度不足，股價上落好大。

例如在資金上，要不斷在市場各途徑集資，以維持營運及研發，未能憑以戰養戰的模式，去穩健地發展新項目，資金鏈斷裂風險存在。

市場方面，有危有機，因為電動車是高增長市場，但行業結構變化大，存有未知數。

另外，股價上落太大，市場超前反映前景因素，只要增長力比預期差少少，都會有明顯回落。只可以話，現水平略貴。

如果你長線睇好，預佢股價上落一定好大，唔好理中短期股價，只要你投入注碼不過多，可長線，等更大收成。

------------------------------------------------

Q20949：

老師，你好，我最開始留意你啲Facebook ,不斷咁去增加投資知識，亦會買你的書，和已報投資班。

現時最想問問你是否贊成買年金 達到扣稅目標，幫自己儲蓄/慳啲交稅錢，謝謝！

龔成老師：

扣稅年金有好有壞，好處是稅務上的優惠，但就要強行投資一個較低回報的項目，你的資金會因此而被鎖死。

當然，如果你本身都想買的話，絕對是無問題的，但如果只是為買而買，就要清楚翻對自己是否長遠有利。

至於儲蓄保險，如果當中有投資成份，回報就有機會比退稅年金為高，當然，風險度都會高左。但整體上，一般都是穩健的。

如果你目的是較低風險，投資退稅年金會較適合你的。

------------------------------------------------

Q20950：

我46歲。公務員。自住物業市值12M. 剛剛賺取回贈。欠mortgage 5M. 現金有3.5M，看完老師的書後想將現金買入股票資產, 因系統運行，現金長遠貶值

資產長遠向上可否推介一下。另外,女兒今年會去英國讀書，英磅走勢如何？

龔成老師：

我地最重要是將現金，轉為真財富，優質股、物業都是真財富，你可以並行持有。你現時已有物業，將資金投資股票會較好，以你的年齡，適合投資平穩增長股的。

至於英磅，相信最差時間已過，如果你有實質需要，就應該分注買入。

你可以投資「平穩增值股」+「潛力股」

$350萬，暫時可動用$100萬-$150萬。

平穩增長股：潛力股
8：2
（如果你投資實力較強，可增加潛力股比例）

平穩增長股：考慮盈富（2800）。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20951：

龔sir 想推薦給你一隻研究了很久的股票：中國電信

希望你能重新研究一下中國電訊業，將其重估。

我認為5g時代下，中國電訊業會有很大發展空間，而且就算我看錯了，現價安全邊際亦非常大，但如我看對了，中國電信728 會有5倍上升空間

原因如下：

在5GAIOT时代，工業互聯網，雲服务，物聯網都產生巨大需求，移動營運商的價值将從原主要提供语音及流量的傳統管道升華，價值重塑。

而中國電信是天翼雲是中國第三大雲服務商。

中國電信在18年已開始研究5g MEC ,為企業提供邊緣雲計算服務，包括laas,paas,saas等更多增值服務，收益從管道轉向軟件和服務

未来是數字化时代，工業互聯網、自動駕駛，智慧醫療要用到大量的算力，IDC,雲計算，物聯網業務会飛憫增长。

龔sir看好比亞迪電動車，無人駕駛是其中核心價值之一，其亦需要用到電訊業的算力

龔sir看好小米物聯網平台，其中亦會產生大量算力，亦需要電訊業提供

電訊業to b 利潤會大增，而且這不是to c ,不需要太大讓利。

龔sir能否重新分析一下941，728？

尤其是728， 其5g建設和聯通 共享，能節省大量成本

龔成老師：

好，多謝。我研究下。

其實你上述都講出了不少中國電信（0728）的利好因素，這些因素的確會帶動，我都認為對佢有正面影響，長期會向上。

但都要留意，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

因此，仍要睇5G的應用能發揮到幾大。

你的方向是正確，長遠有增長，但政策因素，以及5G的發展力度，應用程度，就會影響你上述分析的因素，對這企業有多大影響。

------------------------------------------------

Q20952：

你好 本人28歲 未結婚 最近月入大概40k
最近一年才開始學習投資，想請教一下投資分配

現在現金和股票的資金大概1:1

匯豐1手-》不會加注，會考慮賣
置富4手-》不會加注，會考慮賣
港鐵1手
中銀香港 2手
中電3手
阿里 3手

未來想買入小米(~$20)和加注港鐵，請問這樣配置可以嗎？如加注港鐵，請問合理價位大概是多少？

最後一個問題，如果股市大跌，應用多少現金儲備買入股票？謝謝！

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，匯豐（0005）、置富（0778）未必適合你的年齡，你長遠要賣出。

至於其他股票，你持有就得。

你28歲，其實可以集中「增值」方面。

你買入小米（1810）可以，你預現價合理區頂，可小注。而港鐵（0066）在合理區，你分注買入已得。

另外，你可以考慮加入恆生科指ETF（3067）。

如果出現大跌，要睇平的程度，正如2020年3月，當時大跌市，出現了恐慌，我自己動用了之前儲落的儲備現金去買入（這部分現金在正常市況不動用），我分了多少買入，但未用盡時，股市已上翻，只掃了部分貨。

------------------------------------------------

Q20953：

成哥 我有少少想請教你
現時我手上

1810平均價30.2 6000股
2013 26 3000
700 566 100
9988 288 300
241 23 4000

大多數都在高位入了 你覺得我需要調整嗎
特别小米 現在跌得得多

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

你現時的持股，都有質素的，根本無問題，微盟集團（2013）風險略高，不宜過多。

整體上，組合可以持有，小米（1810）雖然你在貴的價位入，但這股有得守的。

但你太過集中新經濟股及近期熱炒股，這是最大的風險，你應該建立更平衡的組合，例如加入盈富（2800）、港鐵（0066）等。

------------------------------------------------

Q20954：

老師，想問下992 聯想
應該幾錢係平宜區/合理區?

一般般，個人電腦市場競爭大，賺錢能力不強，你見個人電腦十年來，價格都無乜加過，就知行業賺錢能力弱左。而手機方面，佢定位一般，出現高不成，低不就的情況。

但見你2019 有咁樣分析, 唔知現時有冇新既睇法?
不過如果我係想月供既話， 覺得係咪一個可取既選擇？

龔成老師：

你的分析都正確。

聯想集團（0992）都是有質素的企業，但增長力不算好強，產品的競爭大，如果講個人電腦市場，過往多年來價格都無乜上調。

近期因為疫情，需求大左，所以整體正面，發展力都提高左。

長遠都有發展的，始終有些業務都有增長力，整體是平穩增長型，但未必是高增長，現價合理區中上部。

長遠都是正面，但要睇疫情過後，真正的市場情況。算是平穩增長類，但不是高增長類。

------------------------------------------------

Q20955：

龔sir, 想請問你對新鈕科技9600點睇? 原本因為佢話係saas概念, 係上市前都一直唱好, 但點知一直跌到而家超過50%, 而家睇人話佢係假saas, 點解我睇唔明既?

相反睇中國有贊同微盟我係由佢分別1蚊同9.9開始持有, 基本上已經係倍升股, 到底點樣先分析到何謂真假saas呢?

新鈕蝕超過60%, 仲值得持有嗎?

龔成老師：

新紐科技（9600）係IT解決方案提供商，質素都有少少，但不算強。

佢主要為金融機構提供以軟件驅動的傳統型解決方案，於金融機構及醫療機構提供以軟件驅動的創新型解決方案，包括由數據分析以及圖像及文字識別技術提供支持的解決方案。

佢係2,500名中國金融機構IT解決方案提供商中排名前100，亦為一家中國醫療IT解決方案的提供商，解決方案包括特色醫療質量控制與安全預警平台，使醫院主管及部門主管能夠實時監控醫療專業人員的行為。

佢亦提供機器人流程自動化解決方案（或RPA解決方案），通過以機器人執行實現流程自動化來取代勞動密集型程序。

長遠都有發展的，但未能確定佢有好強的競爭優勢。過往生意上升，整體算是不差，但以佢過往的盈利水平，價位唔算平。投資值博率未算高。因此，唔算在saas有特別技術，你唔好只睇報導，要睇「招股書」。如果是已上市的企業，就要睇「年報」。

我地是買入企業，你自行研究企業十分重要，另外新紐的市值只有$20億，而微盟（2013）的市值有幾百億，大細好唔同。

另外，你投資微盟賺錢的原因，是你在較久之前買入，然後當市場熱炒相關版塊時，新紐科技上市（佢當然會利用熱炒期，以一個好貴的價上市）（其實當時整個版塊都貴），之後，微盟及這股都回到合理價，因此，最大的問題是平貴及時機。新紐減持會較好。

------------------------------------------------

Q20956：

龔SIR你好 小弟又有事想請教你 先多謝你用寶貴的時間回答小弟問題

我的投資組合當中 因由以前家的指引下 舊經濟股的佔比都比較多 而很多在高價位時買入 但由於舊經濟股在市場上

跟過往幾年來講 價錢已下降不少 而有些未必可重回到舊時高位 好像 941, 11, 5, 1, 883 等等 而令我難以調整投資組合

因為如果現時放部份的股份時, 需要先承受了一定的虧損, 而長期持有 未必可以令我在這年齡層上最大化我可以有的財富增長 想請問 我這些股票應如果處理會較合適? 謝謝！

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

941, 11, 5, 1, 883，不是無質素，但如果比例太多，就要賣部分。這些股的增長力不強，但收息可以，持有與否，以及多少，要睇你的投資目標。

我見你話賣出有虧損，其實你最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q20957：

我有6手291($67)及3手1211($232)在銀行户口。現金只剩$12萬左右。

本來部份錢希望作首期，投資一間約$9M樓租出去，現在股票跌咁多又不忍賣，請問應該点部處？

另外如康怡/西半山/黃竹坑(Southland)你會建議边區作投資？

龔成老師：

華潤啤酒（0291）有質素，品牌價值高，銷售網絡強，過往的生生意盈利都理想，長遠有發展力。

相信長遠的盈利增長仍不差，不過，現價貴，與行業其他股都有類似情況，現價唔平，成為投資最大的風險因素。你有貨可持有。

至於比亞迪（1211）有質素有潛力，但貴，你有貨持有，但唔好心急加注。

要提翻，買入股票一定要長期的，所以如果你中短期要資金，即是你方向錯左。

如果真的需要資金，就要賣出部分，先賣部分優質及增長力較一般的，之後再賣佔你組合比例較多的。

康怡/西半山/黃竹坑都是有質素的，都可以考慮，其實你方面自己就得，西半山有校網因素，而黃竹坑潛力就較高。

------------------------------------------------

Q20958：

阿sir，我想問宜家恆指pe 息率都去到好高估既水平，係咪即係風險好大，會有好大下行風險？

另外，我想請教下，歷史既恆指都無乜科技股，只有少量，但宜家多左好多入恆指，咁會唔會pe同息率都相對之前20年高左？

啲科技股既pe極高，息率近乎0，咁係咪唔可以再用歷史平均pe去估算恆指高低？應該調整番少少？

龔成老師：

當市盈率太高，同時股息率太低，代表指數已去到貴的水平，我地投資的值博率已減左，不過，不代表一定會跌，因為貴完可再貴，同時，就算這刻貴，如果之後的企業價值有明顯增長，就會慢慢合理翻。

至於你提出歷史恆指的問題正確，恆指因為將會有較大變數，所以平貴定義都不同。公司數目由50間慢慢變為100間，當中更會加入更多新經濟類股。

而我地都要調整指標。

你可以當30000點，是恆指的合理區中上部。33000初步貴，22000初步平。（當然，這些都會因時間而改變），所以，你要自行計出這幾個點數，當之後加入新公司至100間後，該點數最新的市盈率，而日後就以市盈率作平貴指標。

------------------------------------------------

Q20959：

龔成老師，你好，我月入八萬左右，按揭430萬，現金只得80萬。應不應該買股票投資？應該買邊隻？謝謝

龔成老師：

如果你平時供樓無問題，支出不會過多，每月仍有現金儲到，其實可以動用資金投資，$80萬，動用$40萬-$60萬是無問題的。

至於投資那些股，要睇翻你年齡與風險承受能力。

平穩增長股：潛力股
8：2（如果你投資實力較強，可增加潛力股比例）

平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20960：

阿Sir, 呢排大跌市先知有現金係手係咁重要，合理價想入貨都冇子彈，我近乎全倉進入跌市，好彩平衡既配置先未有真正蝕到本金，所以我依家考慮緊賣d貨攞番d現金，你建議咁做嗎？

如果要賣，你建議賣賺緊錢既舊經濟股定係蝕緊錢既新經濟股？定係都係以企業質素行先？

P.S,我依家開始用地獄省錢法，做多一份兼職，希望身體頂得住啦。

龔成老師：

如果你現時無現金，的確要賣部分。質素是分析的核心。

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

新舊經濟股都要有，問題是比例如何。

儲蓄當然好重要，但都要平衡，不要損失健康。我地累積財富，不是用死力，而是用腦，將資源有效發揮。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20881-Q20900）

Q20881：

老師又想打擾你啦，最近因為要處理小朋友黎緊入學問題，遇到唔少黑暗既一面..覺得自己好傻，令到小朋友報唔到理想既學校。

我覺得好對佢唔住，明明佢表現得好好；所以我突然就諗，或者要送佢去國際學校讀，先能夠配合到自己對佢既教育理念..

因為我真係唔想佢係傳統學校裏面被培訓做一世打工既人，我想佢成為一個愛身邊嘅人愛自己嘅人識得同自己溝通嘅人，唔好為錢而活。

我同先生月入真係唔多.. 月入5.5萬.. 供樓係2萬，工人姐姐 4千5 ... 如果讀國際學校一年係7萬5。

對於我地唔算好富裕既家庭黎講..的確係會用左我地好大一部份既收入，當然同先生本來都唔係物質主義者，平日嘅使費都係應使則使唔會買奢侈品。

我又喺度諗唔知自己投資嘅嗰個部份三年後嘅升幅實質上會唔會應付到三年既學費.. 所以真係想打攪你睇吓可唔可以幫我望一望我嘅投資比例，再俾啲意見我。

因為我真係諗咗成個星期 每一晚都好唔開心 登個仔覺得不忿同埋委屈 我唔想佢要退而求其次 去讀一啲咁差嘅學校 ..

龔成老師︰

入學個部份，已經過去了，現在多想也沒用。我地應著眼係可以改變的地方，向前看。

首先，我唔希望你將「學校」和「學習」劃上等號。

「學校」只係人生中學習的其中一個媒介，當中主要學習一些學術上基本知識。

但其實好多知識、思考方法、待人處事等，都係從日常生活和家人身上，慢慢累積而得來的。

我並不是說「學校」不重要，只是唔希望你將佢視為全部。

你認真想下，今天的你，到底有多少來自「學校」建構出來? 又有多少是你自己學校以外的「學習」建造出來?

當然，我理解你在國際學校，是有一些想法和考量，唔係單純為讀而讀。

所以，你只要確認自己清楚理解成件事，都覺得係有必要實行，那我們就從實際財務上，看看是否可以做到。

由於你已有自住房屋，算係解決一部分。

之後就係財富增值部份，較理想情況，就係你家庭收入，能在供小朋友讀國際學校之餘，都有餘力做好財富增值。

如果唔得，我地就要睇下，點樣可以係而個情況下，維持或者有限度地增值，盡量唔好比財富增值動作，完全停下來。

你可以考慮增加額外收入、做兼職、有時間做一些網上小生意等，都係可行做法。

------------------------------------------------

Q20882：

龔sir, 我想請教下我今年30歲
之前完全唔識買股票，比經紀遊說左買左兩份儲蓄保險，已經供左一段時間，但都仲要供多10年。

近年接觸股票，都是用便宜價買優質股長期持有的策略，諗緊好唔好斷供回報低的保險，將資金用黎買回報較好的股票(就算用來買2800回報都高過儲蓄保）。

暫時保費佔收入約10%，我都明白買儲蓄保可當配置中較穩陣的部分，但又想趁後生更加進取。

你認為我應不應該斷供保險呢？
謝謝龔sir

龔成老師：

其實，要睇你本身是那一種類型，如果你比較保守，而你本身在財富組合中，無乜防守性資產，投資這些保險產品，可以的。

當我地進行理財，攻守兼備是應該的，問題是比例如何，以及這個人風險度如果。

因此，好睇你自己的風險度，自己的投資能力，以及你本身、你想的財富配置。

建議點都留一份儲蓄保，至於另一份，視乎你自己的投資目標、實力，如果想進取，將資金轉做月供股票，長遠的確有較好的效果（當然風險度都會有所提高）。

------------------------------------------------

Q20883：

老師, 想問一問9922，6690兩隻股30入，可長期持有嗎？

龔成老師：

九毛九（9922）係內地中式快時尚餐飲品牌管理及運營者，佢係內地所有中式快時尚餐飲餐廳收入中排名第三，於華南地區則排名第一。

可見，在業務上、品牌上、市佔率上都不差。現時運營269間餐廳，以及管理41間加盟餐廳，而「九毛九」及「太二」為佢的兩個主力品牌。

睇翻佢的財務數據，唔差的，不過現價就少少貴，雖然這股都有長線投資的價值，有貨就持有，但暫時唔好心急加注。

海爾智家（6690）主要從事生產及銷售家用電器，並以３個自主發展的品牌（包括海爾、卡薩帝、Ｌｅａｄｅｒ）及４個收購的品牌（包括ＧＥ　Ａｐｐｌｉａｎｃｅｓ、Ｃａｎｄｙ、Ｆｉｓｈｅｒ＆Ｐａｙｋｅｌ及ＡＱＵＡ）營運業務。

佢家電產品涵蓋冰箱、冷櫃、廚房電器（包括油煙機、灶具、消費櫃及烤箱）、家用空調、商用空調、淨化器、新風系統、洗衣機等。

業務不差的，有質素，長遠有發展，現價合理區頂位，你可持有。

------------------------------------------------

Q20884：

龔sir你好 , 我今年33歲，我bb而家五個月大, 如果想依家開始儲三百萬畀佢14年後去外國升學，而家應該揀啲乜嘢嘅月供股票組合比較好？

每個月供5000是否足夠？心水得港鐵(66)， 請問有什麼更好的選擇？謝謝

龔成老師：

以你的年齡與情況，可以投資一些平穩增長類為主的組合，加少少潛力類。

目標是追求10%的年回報。

如果每月投資$1萬，14年，10%，到時預期能滾存到到$330萬。

因此，現時你有兩個方法，第一，增加每月投資資金至$10000。第二，提高回報率，但你都要明白風險度會提高左，以及要求你的投資知識更多。

10-12%回報率，可考慮以下組合。

平穩增長股：潛力股
7：3
（如果你投資實力較強，可增加潛力股比例）

平穩增長股：考慮盈富（2800）。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20885：

你好~ 我係高位33.5時買咗2000股175吉利汽車，最近跌到2X蚊...是否應該沽走部分或低位入少許溝淡？

968信義光能現時值得買嗎？
謝謝

龔成老師：

吉利（0175）可長線，不用擔心。

本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區頂，股價波動，有貨可長線。如果你資金多，可以回多少少，如10%加注。但仍要有現金剩。

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價合理區頂，如果想入，要慢慢分注，但仍不是大注投資的時候。這股股價上落都大，要注意金額。

------------------------------------------------

Q20886：

龔老師 請問909 明源雲 及9633 農夫山泉 有質素可長揸嗎? 我高追買入了 賬面輸唔少... 可待公司發展嗎?

龔成老師：

明源雲（0909）有潛力。你有貨可持有，只要不過多就得。

佢主要係中國房地產開發商及房地產鏈參與者，提供企業級ERP解決方案及SaaS產品。

睇翻佢之前的資料，佢係中國房地產開發商的第一大軟件解決方案供應商，市佔率有約2成。係呢個市場裡面，按收入計，亦為ERP解決方案及SaaS產品的最大提供商。

其實，佢的角色可以話中國房地產行業的數字化轉型，為房地產開發商及其他參與者，開發了一套行業垂直的ERP解決方案及SaaS產品，以助其管理廣泛的業務運營。

包括銷售及營銷、採購、成本管理、項目管理、預算以及房地產資產管理，佢的SaaS產品包括雲客、雲鏈、雲採購及雲空間。

業務雖然有增長力，但股價都唔平，如果初步分析，處貴水平，值博率未算強，始終市場現時對這類股有好大期望。

農夫山泉（9633）有質素的。

是中國包裝飲用水及飲料的龍頭企業，旗下品牌包括農夫山泉、東方樹葉、尖叫等。佢係中國擁有10個區域取水許可證，並在其周邊建立生產基地。

其產品覆蓋包裝飲用水、茶飲料、功能飲料及果汁飲料等類別。根據弗若斯特沙利文報告，2012年至2019年間，連續八年保持中國包裝飲用水市場佔有率第一的領導地位。

業務上，的確有吸引力的，不過，我一向都新股半新股都無興趣，因為真實面要慢慢先見到。此股可投資，但只建議小注，同時你要明白當中的風險。

由於有一定的品牌價值，因此企業質素與發展正面，財務數據不差，生意與盈利都有理想增長，不過上市不久，股價較波動，同時上市前數據可能執靚過，因此要注意風險度。

基本上，兩隻股都有質素的，不過可能你在貴的價位買入，要耐心少少，而兩股都有得守的。只要持貨不過多就得，特別是909。

------------------------------------------------

Q20887：

你好 老師。因為公司要改名的緣故， 我可以拎回MPF 大約11萬作為遣散費，請問sir這些錢可以怎樣投資最好呢 ?

目標想將這11萬一年後可增至20至30萬，是否可行呢？

感激sir回覆

龔成老師：

如果你這$11萬是「閒錢」，而你本身都有一定的現金，這$11萬就可投資。

如果要將$11萬一年後變成$20萬，這是一個一倍的回報，在投資上，是極高！

因為連全球投資回報最高的人，巴菲特，他能取得的回報是20%。

如果你要追求一倍回報，你就要面對好大的風險，而我並不建議。

因此建議你調整翻目標，投資一些穩健優質股，長期財富增長，會較為合理。

------------------------------------------------

Q20888：

龔成先生你好，我由2018年開始供月供股票，每月$5000建行，$5000港鐵。3年後由於月供股票計劃完結，想把轉其他股票進行月供，想問問保持好或是轉其他呢？
其中一個心水是領匯，第二隻可以選擇什麼？
謝謝你

祝工作順利
身體健康

龔成老師：

你可以轉其他，令你的組合更加平衡。

領展（0388）是考慮之選，另外，盈富（2800）都可以。如果你能承受風險，想進取少少，可考慮香港交易所（0388）或舜宇光學（2382）。

其實要睇翻你的投資目標及風險承受能力，盈富一定最平衡的。

------------------------------------------------

Q20889：

Hello 您好，本人唔係身處hk & Macau ，之前網上睇咗股票勝經想學點計股票合理區，但似乎講係概念，唔係教實戰點計。見網上課程好似冇提及依個課題，請問有咩其實方法可以學到？

另外，見您都有推介小米。我亦有留意其他股評人講呢隻股票，大家都認為小米唔值咁高。請問您心目中的目標價大概係幾多呢？其實我之前高位已經入咗少少⋯

By the way.. 我之前有睇50值博倍升股，近日計咗入面50隻股票，2018 同前幾個星期股價升跌% ，回報近2倍。

而我自己組合（已經一早賺少少就放咗），如果一路冇賣，同一時期，就是+70%，所以就更加激勵我要喺依方面研究多啲！

龔成老師：

由於企業估值，我會集中在課堂內講述，如果你上唔到，可以睇《股票勝經》《年報勝經》，有少少的。另外，你多睇巴菲特相關書都有講的。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區頂位，小注分注可以，但唔好入得太急，預佢股價仍波動。回多15%更有投資值博率。

加油，選股是一個好大的題目，要花好多時間的，我每星期用6小時分析一隻股票，一年50間公司，但我一年只會投資1、2間。我唔清楚我的投資實力是否比別人強，但肯定花的時間比99%投資者多！

------------------------------------------------

Q20890：

本人45歲，月入穩定6萬，有現金200萬，當中有55萬於$30買入吉利汽車，而家坐艇，賬面蝕12萬。希望10年內可財富增值到千萬，然後移民。我選了以下股票：
平穩增長股：

港鐡（00066）
長建（01038）
恆基（00012）
領展（00823）
希慎（00014）

潛力股
安碩恆生（03067）
港交所（00388）
阿里（09988）
小米（01810）

問題：

1）我打算留30萬現金，其餘平均分布以上9隻股，這樣可以嗎？

2）請問以上各股邊個價位以下買入好呢？

3）另外，希慎今年的財務報表顯示出現虧損，是否仍值長期持有呢？希望得到你的回覆

龔成老師：

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

其實這股無問題，不過你持貨太多就要小心，最好股價上翻多D，減少少貨，平衡翻。

1）大方向是可以，上述股票，都是有質素的，選股無問題配置都可以。

2）平穩增長股，基本上都處於合理區，這5股，已經可以分注投資。

至於潛力股，由於處於合理區頂至略貴，因此，這4股你投資時，唔好太急，現價可以開始第一注，但之後就要慢慢分注去買入，買入的速度要比平穩增長股為慢。

另外，如果大市只處合理區，現金最好有$50萬-$80萬，若出現大跌市，可以把握到買入的機會。

3）無問題。佢只是物業重估方面，出現了一些賬面上的虧損，營運上是無問題的。優質度不變，相信佢最差時間已過，慢慢會好轉的。

------------------------------------------------

Q20891：

我想先睇你嘅書籍，請問有推介新手教學的嗎？

老師，你提及到同一行業不能太多，同一股不能太多。
即同一股應該手持幾多先為之合理？
謝謝你

龔成老師：

你可首先睇：

《80後百萬富翁》
《股票勝經》
《財務自由行》

之後再睇其他。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

至於持股比例。我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，例如要在30%以下，同一股不能太多，例如要在15%以下。要平衡，建立後長期持有，不是買賣賺差價，而是成為你財富組合一部分。

------------------------------------------------

Q20892：

龔成老師你好！本人現年44歲，已婚，未有子女，有計劃生育；有保險 (延期年金、人壽、醫療)；有自住物業，仍需供樓(2024/11供完)。

現在年收入約 $720,000，每年開銷約HKD$521,000，另有欠債 HKD$50,000。清還債務後，每月能$10,000作儲蓄和投資。

現想請教﹕
- 請問我應如何投資？
- 我應如何調整已有的投資組合？

本人投資現況﹕

證券
香港股票
00003 4,765股 平均價HKD$16.426
01398 5,000股 平均價HKD$5.002
01475 10,000股 平均價HKD$6.385
01818 4,000股 平均價HKD$9.415
02130 1,000股 平均價HKD$7.55
02238 2,000股 平均價HKD$8.13
03988 50,000股 平均價HKD$3.065

美國股票
AMD 1股 平均價USD$110.5
ARKK 5股 平均價USD$138.84
FUTU 1股 平均價USD$186
INTC 1股 平均價USD$77.85
KO 1股 平均價USD$68.24
PEP 1股 平均價USD$154.29
TSM 2股 平均價USD$146.35

單位信託基金
富達基金 - 美元高收益基金 (A類-每月派息-現金)
持有單位﹕1869.78 投資額﹕USD$20,152.13 收息﹕約USD$772.63/年
施羅德亞洲高息股債基金 (A類-人民幣對沖-每月派息-現金)

持有單位﹕1000 投資額﹕RMB102,046.88 收息﹕約RMB6709.08/年
恒生指數基金 (A1類-港元-累積)
持有單位﹕6139.496 投資額﹕HKD$60000

另代親人打理以下項目
香港股票
00003 5775股 平均價HKD$16.145
03988 25000股 平均價HKD$2.976

單位信託基金
JPM亞太入息(加元對沖)A股(利率入息)(每月派息-現金派息)
2936.796 投資額﹕CAD$27,600

摩根國際債券(加元對沖)(每月派息-現金派息)
1566.923 投資額﹕CAD16,000
Eric Tam
投資目標﹕
- 能提供穩定增長和現金流，以應付日後開銷 (子女、退休)

龔成老師：

基本上，現時你的持股都是正路，你持有的港股都是有質素的，不過，增長力唔強，以你這個年齡，其實可以投資平穩增長類，而收息股，如1398、3988。

至於美股，我自己無太多研究，但初步睇你持股都是正路的。

至於基金方面，初步睇都是正路的。

你現時每月能儲$1萬，由於你將會生小朋友，所需現金較多，因此，你先要計算好自己預期現金所需情況。餘下先投資。

在「可投資部分」，會集中投資一些平穩增長股，可考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。你利用月供或自行分注都得。

到2024年後，你供完樓，每月現金流運用數會增加，你可以加大原有的投資，甚至有小部分投資較有潛力的股票。

------------------------------------------------

Q20893：

老師你好，在《大富翁致富藍圖》，書入面以租養樓的例子，用超過1成首期做按揭，變相每月供樓錢不太大，再去計算租金回報同出正負現金流。

但如果我只有一成首期，每月供樓錢相對會多，那麼租金回報一定不能出現正現金流？

到底，應不應該用一成首期買樓去出租投資？是不是我扣除租金收入後，還有能力供樓，就可以了？還是租金回報比按揭利率好就可以？

另外，《5年買樓四步曲》入面，有沒有教點樣計算租金回報，利率等事項？對買樓零知識！

覺得自己很遲先起步，機緣下睇到你嘅書，40歲先開始識得認真儲錢和投資。

睇過你的《財務自由行》、《50優質潛力股》、《股票勝經》，《大富翁致富藍圖》，就是覺得《80後百萬富翁》不適合自己看，不是80後啊！這麼遲起步還行嗎？早點認識你就好了！

龔成老師：

如果你做9成按，出現負現金流是正常的，但我地可以再深入分析。當中可以計回報率與成本的關係，回報率包括租金及升值，而最基本要計算租金回報率，至於成本，就是資金的成本，即是按揭的利率。

如果你按息低過租金回報率，其實你借錢已經能產生額外回報，方向已正確，你用高成數按揭是可以的，但就要明白當中的風險。

《5年買樓四步曲》入面，都有教點樣計算租金回報，利率等事項，以及有教各種買樓事宜，你可以睇。

《80後百萬富翁》並不是只適合80後的，其實這是一本心理學、金錢學的書。有心唔怕遲，加油！

------------------------------------------------

Q20894：

你好 龔成老師 我有隻股票中國有贊(8083) 成本價3.743 有4萬股

我知道應該一早止損離場 但係我又見佢分拆上主板 所以就硬住頭皮揸住

請問龔成老師我應該如何處理？應該狠心斬倉之後考慮建滔層積板(1888) （因為我留意到佢係跌市都仲創新高）定係等有贊科技上到主板再觀望？謝謝！

龔成老師：

中國有贊（8083）集團主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這刻投資值博率不高。

這股建議你減持或賣出。

建滔積層板（1888）質素中等。佢最大的問題是盈利波動，反成本等因素影響得好勁，近年派息的確不差，有時只是由於特別息，之後未必再有咁高。

中期業績的生意與盈利出現下跌，這裡會扣分。

而睇翻佢長期的經營現金流都有正數，所以又未去到差的情況。整體來說，這股的投資價值都有，但未到最高，算是中等，現價不算貴，值博率中等。

所以，未未算好值得你將資金轉到這股。

------------------------------------------------

Q20895：

請問我手上嘅股票，係應該換碼定繼續keep?

3000股，823，＄91.6
800股，5，＄79.5
600股，11，＄168
2000股，868，＄22.1
500股，1038，＄57.2

請問買VOO,追蹤S&P指數
會否回報比2800更快？

龔成老師：

領展（0823）、信義（0868）有質素，可長線。

至於兩隻銀行股，你預佢地只是收息，增長力不強，持有與否要睇你的投資目標，如果你想增長，就宜轉其他。

至於長建（1038）是不錯的企業，有一定規模，資產亦有一定質素，並擁有相當充足的現金，而過往的發展亦很理想，能平穩發展及再投資的回報亦不算差，而開拓新業務亦能平衡當中的風險回報，整體有相當的質素。不過，規模大，國家保護資產，都令這企業增長力有所減弱。

長建有不少歐洲及英國業務，脫歐因素、歐洲經濟較弱難免對其造成影響，反而，脫歐情況明朗化會更有利企業，可說是最壞情況已過，之後將會慢慢向好。

其實長建近年仍不斷進行投資，但由於歐洲業務較弱，令股價並沒有顯現，但只要歐洲情況慢慢好轉，當中的資產價值就會更有效反映。

不過，歐洲的經濟，總不能用「強」去形容，所以長建並不是高增長類，只是最弱時期相信已過，往後會平穩向上。但回勇之路，仍然較長。

另外，由於企業已有一定規模，加上作風穩健，發展的速度不會太快，但平穩增長則無問題，手持的現金相信會逐漸收購其他海外業務。

是收息及平穩增長類，現價是合理的。你持有就得。

至於VOO，都是值得投資的，你可長線。至於增長是否比盈富（2800）快，暫時是，不過都要留意，這基金的平貴度，比盈富為貴。

------------------------------------------------

Q20896：

Hi, 想请教下汽車之家是否合適投資？

龔成老師：

汽車之家（2518）都有質素的。

佢中國的汽車消費者在線服務平台。根據資料，以移動端日活躍用戶計，在汽車服務平台中排名第一。

http://xn--autohome-t39lf9n8ned38fwc3culiu05e22a.com/ http://xn--cnche168-0c2n.com/，為汽車消費者提供全面、獨立及交互式的內容和工具並為汽車價值鏈的汽車製造商和經銷商提供全套服務。

根據資料，集團是最大的在線汽車廣告及線索服務供應商，就媒體服務及線索收入而言，於中國在線汽車垂直媒體廣告及線索市場中佔據的市場份額約3成。

佢收入源自媒體服務、線索服務及在線營銷及其他。

佢係2008年成立，最開始是一家內容型垂直媒體公司，專注於媒體服務。於 2016年，推出「4+1」戰略轉型方案，打造了一個囊括「車內容」、「車交易」、 「車金融」及「車生活」的平台，從內容型垂直公司轉型和升級為數據和技術驅動的汽車平台。

自2018年起，專注於用人工智能（AI）、大數據及雲技術（統稱ABC）開發全套智能產品和解決方案，透過提供跨價值鏈的端到端數據驅動產品和解決方案，構建一個連接汽車行業所有參與者的集成生態系統。

展望未來，計劃繼續利用「軟件即服務」（SaaS）能力連同核心AI、大數據及雲技術同時進行橫向和縱向擴張。

發展力是有的，但價位都唔算平，如果控制注碼，這股都可長線的。

------------------------------------------------

Q20897：

想問埋1876 現價合理嗎同值得買埋？

同埋九毛九買左一手 37 蚊入左點算

龔成老師：

百威亞太（1876）有質素，佢係AB InBev Group的一部分，係亞太地區最大的啤酒公司。

從事生產、進口、推廣、經銷及出售超過50個自家擁有或獲許可使用的啤酒品牌組合，包括百威、時代及科羅娜，以及旗下多國品牌和當地品牌，如福佳、凱獅及哈爾濱。

百威亞太係多個國家都有相當的市佔率，同時增長力強，就近年的數據睇，盈利每年都有雙位數增長，業務、品牌、質素絕對有。

整體來說，這股質素是有的，增長力都有，之前較貴，現價合理區中上部，都可分注投資。有長線持有的價值。

九毛九（9922）係內地中式快時尚餐飲品牌管理及運營者，佢係內地所有中式快時尚餐飲餐廳收入中排名第三，於華南地區則排名第一。

可見，在業務上、品牌上、市佔率上都不差。現時運營269間餐廳，以及管理41間加盟餐廳，而「九毛九」及「太二」為佢的兩個主力品牌。

睇翻佢的財務數據，唔差的，不過你買入價就貴，雖然這股都有長線投資的價值。

如果持貨不過多，可守。一手無問題，但唔好心急加注。

------------------------------------------------

Q20898：

龔成老師你好，我於3年多前開始拜讀你的著作，當時以一年多時間財富由零累積至20萬，實在感激！

可惜至2019年因個人及家庭因素，全數清零，而近一年因疫情關係工作收入更減少了。

現在與男友同住，有結婚及置業的需求，兩人扣除所有開支，每月儲蓄共約$10000。

本來已有16萬現金，我們太心急於高位買了很多科技股(1810/$35/18手、2013/$28/3手)，現在跌了很多，很後悔自己的衝動，大調整心情真的很難捱，男友比我更不懂投資，他比我更難過。

（但我其實又不太擔心，明白企業本質及價值沒有改變，是長線投資而不是炒賣投機。)

不過還是想聽聽你的意見，請問你認為還可守嗎？有沒有什麼特別情況會需要先沽出？

現在再努力儲現金當中，今天趁書店特價最後一天，再買了兩本新書《5年買樓4步曲》《股票勝經》，我們會好好閱讀並努力去實踐，希望5年後可以有好消息話你知！謝謝你！

不好意思，忘了還有一事想請教：男友老闆知道我們想結婚置業，他很高興，因為男友是他的得力助手，說可以幫我們首期，意思應該是當中一半作賀禮

一半借給我們再還(想了想我們只有跌了一半的股票在手，可能要等幾年才有增長...)，你認為這方法可行嗎？還是應該按書中4步慢慢來比較好？

龔成老師：

你持有的股票，都是有質素的，但如果你太中在科網類，其實有風險的。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你持貨可以守，但要注意風險，同時，慢慢要平衡翻個組合。當然，如果你持貨過多，當股價上翻少少時，宜減。

股票無問題，你買入價及策略有問題。

另外，如果你地將會有結婚置業等資金需要，就要儲下現金，較多部分留現金，投資比例不宜太多。我地投資，要長線，要「閒錢」。

至於你男友老闆資金方面，如果可以有免息借貸，從資金運用上，是借得過的，不過，就要明白風險，以及不要太進取投資。

------------------------------------------------

Q20899：

老師，你以前有冇報過投資班？

龔成老師：

18歲開始，初投資的幾年，大量去上投資班。無人一開始識，所有野都要一步步去學。就算到而家，都不斷睇巴菲特相關書，保持進步。如果認為自己乜都識，才是最無知的人。

------------------------------------------------

Q20900：

龔成老師，你好！
本人由今年2月起開始買股票
有收睇老師嘅書

我持有：

6618、696、2388、855、1928、520、0005

想請教一下，我手持的都是優質股嗎？
期待老師的答覆
謝謝你

你所持有的股票，都是有質素的。

銀行股以收息為主，增長力不強，加上你已有兩隻，如果你不是年齡太大，銀行股之後不同增持，原有貨就持有。

至於其他，都是有質素的，可長線持有。

京東健康（6618）由京東（9618）分折出來京東健康，將會來港上市。這股可長線。

其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，暫時合理區頂至略貴，所以如投資，小注都可以。當然回翻1成更有值博率。

這股如本身有貨，可長線。但唔建議你持有太過多。

至於呷哺呷哺（0520），有質素的，但近一年股價升得過多，所以最近股價受壓都是正常，你持有就得。

整體上，持股都不差的，你長線就得，但就唔好心急加注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

｜MIRROR追星族｜80後港媽帶仔女追MIRROR 父母早亡曾變蒲妹染毒 現追星當身教：填補咗以前嘅空白
香港樂壇已死、香港電視已死，這些咸豐年代的口號，恐怕難再得到認同。皆因這一年，香港人史無前例熱烈地追香港星、聽香港歌、睇香港節目，流行文化再次焫着大眾成為熱話，浩浩蕩蕩迎來另一新世紀。單憑一隊港產天團MIRROR，成功令港女們由追韓星變回追港星，一批有心有力的「迷媽」，更成立媽媽專屬的鏡粉後援會，帶埋仔女齊齊追活動，買周邊，排隊十小時只見偶像一面，香港人，很久未笑得如此開懷，壞時代裏追星，彷彿成了集體的情緒出口。

「臨時收到消息，MIRROR今天下午在旺角有扭蛋活動，我們現在趕去，你在哪？」4月某個早上，收到媽媽鏡粉群組管理員、32歲的Catherine來電，立即更衣拎相機出發，跟這位素未謀面的受訪者追星。打開她們今年年頭新開的粉絲Telegram群組，未讀訊息幾千個，原來昨夜已在熱烈討論今天追MIRROR的策略，如何內應外合，先拔頭籌見到12子。
早上11時，烈日下在旺角某商場外已圍了百多人，外表細細粒、打扮年輕的Catherine特別易認，她說9時排隊頭的成員霸了好幾個位，有剛湊完仔女上學的，有趁lunch time瞞着老闆趕來的，也有剛被老公以電單車送過來的幸福師奶。媽媽們一呼百應，比同場少女更狂熱。這邊廂，年輕時追開星的迷媽忙着給意見，研究MIRROR從哪個出口現身，追蹤着12子的IG猜測到場時間；那邊廂忙着交換剛花了兩天搜刮的MIRROR封面雜誌，順道投訴一下，如果阿仔默書再退步就不帶他看演唱會。
現場又熱又吵鬧，我只覺暈眩，但偶像出場時，即使距離千百丈遠，卻莫名地欣喜若狂。記者在一遍尖叫聲中完成了第一次追星體驗。為何只見到幾分鐘甚至只是背影，都已覺值得？「看見喜歡的事物，就能釋放某種壓力，而且能影相畀阿仔阿女睇。」矮小的Catherine應該很難看到甚麼，卻瞇眼滿意地笑了，媽媽們你一言我一語地分享着剛拍的直播影片。
孩子想追星　「努力考好呈分試」
「她追起上來很瘋狂，是黐線的！有一次在房中看Chill Club頒獎禮，我在房中做功課，她突然尖叫，MIRROR拿組合獎時又叫，見到Jer和教主又叫。」提起媽媽的瘋狂程度，子女不禁捧腹大笑，直指她迷妹指數有10粒星。
港媽Catherine在追看全民造星時已留意MIRROR，正式「落坑」變成忠粉，卻是受8歲的兒子迦諾和11歲的女兒迦稀所感染，「其實是女兒『荼毒』我，本來我對MIRROR一無所知，但前陣子工傷放假，身邊的朋友和仔女都叫我看《男排女將》，又說《全民造星》好正，於是就開始翻看ViuTV的節目。」無限斜棟有限公司、考有feel、 晚吹、Chill Club……一家人對ViuTV節目如數家珍，連原本沒興趣的爸爸，跟老婆馬拉松式看過《全民造星1》後都喜歡上MIRROR，雖不至於陪跑追星，但至少不會投訴。
Catherine笑言開始時只陪仔女追星，「我女兒很想入MIRROR fans club，她最喜歡Jeremy，一直想知道他的最新消息，我怕她年紀太細亂入group會說錯話，就陪她一起加入後援會。」 對TG、IG一竅不通的Catherine入齊12子的fans club收集偶像情報，MIRROR演唱會飛一票難求，Catherine除了準備好幾部iPad、電腦和電話搶飛，也特別在fans club為女兒抽飛，「抽到飛那天我們都開心到尖叫。不過我跟仔女約法三章，例如要努力考呈分試才能去，最後除非嚴重失手，否則我都會讓他們去看。」
我們小時候總會喜歡一些明星，聽情歌喊濕一個枕頭才叫青春過。Catherine的少女時代卻一片狼藉。母親在她4歲時自殺離世，父親忙工作，自小她得倚賴親戚照顧，寄人籬下，爸爸亦在她15歲時因末期肝癌離開了，她孑然一身，搬離從沒有愛的家，心卻一直空洞，「那時我開始半工讀，識了班朋友，早上返工，夜晚就落disco蒲。」飲酒、吸毒、尋開心，過了一段天花亂墜的日子，「身邊有些朋友因為吸毒後不願返工，甚至因為玩毒品而出事，有一刻覺得不能繼續墮落，惟有自救，就找些事寄託。」那年側田的歌陪她度過了艱難的階段，「側田真的救了我，那時我很喜歡他，但我基層家庭出生，拎綜援，平日生活已拮据，我有畀錢加入側田歌迷會，但沒閒錢追活動。」
曾是蒲妹染毒癮　追星夢未圓
「二百年後在一起，應該不怕旁人不服氣。」側田的《命硬》是Catherine跟前夫的愛情寫照，「我家庭背景比較複雜，前夫是獨子，成長於小康之家，他家人難免覺得我不是好的媳婦。」本想歷劫還是在一起，然而婚姻生活波濤洶湧，二人最終分開，子女跟Catherine一起生活。
「我本身已沒有好的家庭背景，到最後也未能為仔女提供一個跟親生爸爸一起生活的完整家庭，但想讓他們知道我愛他們，小時候我缺乏關顧，不想他們因為缺乏愛而行差踏錯。」一起追星成為親子活動，圓夢之餘也想讓他們明白，追星也是種身教和學習過程，同時在偶像奮鬥故事中彌補自己過去的空白，「跟他們一起追，一起瘋，希望關係親密一點，長大後他們有甚麼都跟你說。」
Catherine學舞十多年，鍾情跳Jazz，更考過CSTD（澳洲聯邦舞蹈教師協會），在舞蹈學校教過跳舞。她天生一把好嗓子，學校、教會合唱團總有她身影，然而只得146cm高的她常被笑像小儀，「中學比賽時很緊張，唱歌時常反白眼，就給人恥笑拿你來做笑話，自此不敢再參加比賽，因為沒人真正欣賞我把聲，由小到大我都自卑，覺得明明有才能，但永遠做不到自己想做的事。」所以Catherine鼓勵子女發展自己興趣，迦稀由小喜歡跳舞，就讓她學舞。
迦稀和迦諾以前愛韓星K-pop，但文化語言成為追星障礙；直至MIRROR出現，除了外表與才華，也迷上全民造星參賽者的追夢歷程，一班素人經歷無數次失敗才成功踏上舞台，「姜濤說自己沒朋友，因為以前是個胖子，可能都觸動到我兒子，因為他也是個小肥仔，但努力總會成功。所以他想學跳舞，之後會去偶像AK（Anson Kong）開的學校試堂。」迦諾擺出AK的招牌手勢，笑嘻嘻話要參加第18屆全民造星。
媽媽組粉絲團　照顧小鏡粉
今年1月，Catherine加入由一班媽媽組成的粉絲群組MIRROR HK Mama Fans Club，每天交流偶像情報甚至親子資訊，因為正職是CS公關姐姐，她擅長跟別人溝通，在群組中活躍度高，很快成為副會長，協助舉辦應援活動，例如到《男排女將》拍攝場地「瑜家廚房」用餐；到Jer《狂人日記》拍MV的雲吞麵店朝聖，近期大家密鑼緊鼓為MIRROR演唱會製作應援物品。除了相約買偶像周邊產品，媽媽們會分工合作走勻各區尋找有MIRROR訪問的報章雜誌，跟一般追星族最大的分別是，很多場合她們也帶同孩子，年紀4歲至十多歲的大小鏡粉，形成了一個特別的親子活動群組，互相照應。
過程中Catherine看見很多小朋友獨個追星，有工人姐姐帶同8、9歲女童出活動，也有些小學生獨個兒街上蹓躂，有時Catherine不忍心就會主動照顧小鏡粉，跟小朋友和少女打成一片，「重要的是識到一班朋友，大家都是有經歷的母親。雖然已不是妹妹仔般年輕，但現在可告訴別人，做媽媽也可以有鍾意的偶像，也可去追星。」問迦稀有個跟自己一起瘋狂的媽媽，會感到幸福嗎？內斂女孩想推搪了一會，才娓娓道出：「我覺得她很厲害 ，很少媽媽會這樣做，多謝你這樣不尋常地跟我們一起追星，不尋常得非常好。」

影片:
【我是南丫島人】23歲仔獲cafe免費借位擺一人咖啡檔 $6,000租住350呎村屋：愛這裏互助關係 (果籽 Apple Daily) (https://youtu.be/XSugNPyaXFQ)
【香港蠔 足本版】流浮山白蠔收成要等三年半 天然生曬肥美金蠔日產僅50斤 即撈即食中環名人坊蜜餞金蠔 西貢六福酥炸生蠔 (果籽 Apple Daily) (https://youtu.be/Fw653R1aQ6s)
【這夜給惡人基一封信】大佬茅躉華日夜思念 回憶從8歲開始：兄弟有今生沒來世 (壹週刊 Next) (https://youtu.be/t06qjQbRIpY)
【太子餃子店】新移民唔怕蝕底自薦包餃子 粗重功夫一腳踢 老闆刮目相看邀開店：呢個女人唔係女人(飲食男女 Apple Daily) https://youtu.be/7CUTg7LXQ4M)
【娛樂人物】情願市民留家唔好出街聚餐 鄧一君兩麵舖執笠蝕200萬 (蘋果日報 Apple Daily) (https://youtu.be/e3agbTOdfoY)

果籽 ：http://as.appledaily.com
籽想旅行：http://travelseed.hk
健康蘋台： http://applehealth.com.hk
動物蘋台： http://applepetform.com

#Mirror #姜濤 #全民造星 #AnsonKong #男排女將
#果籽 #StayHome #WithMe #跟我一樣 #宅在家