【龔成問答信箱】（Q21621-Q21640）

Q21621：

龔Sir, 想請教一下你，我現在持有股票
1801 1000股 89.65入
9992 400股 92入
2125 2000股 10.7入
在這之前我止蝕了1024 300股 300 -> 210

我想全部走曬買入比亞迪股份，咁追會否快D？

謝謝解答

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你如果集中在比亞迪（1211）就會出現單一風險，加上這股現價貴，這刻買入的值博率唔高。

信達生物（1801）、泡泡瑪特（9992）並不是無質素的，泡泡瑪特由於你在貴的價位買，因此要較耐心先守到，你可以等佢上翻多D，減少少。

至於稻草熊娛樂（2125）本身不差的，但未算好強，雖然有藝人作為主要股東，但不一定對長遠發展有利。同時行業的變化大，不確定性高，未能確定企業好有獨特性。

這股小注投資都可，但又唔太值得佔組合比例太多。

我發現你有3個的核心問題，第一，就是心急，你偏向在貴的價位買入，無耐性去等一個較合理的價，另一個核心因素，就是不懂企業基本的估值，建議你多學習，對你長遠將有好大影響，第三，你無經過嚴緊分析，就好快買入股票，記住，買股票前要做足夠的功課，先可入市。

------------------------------------------------

Q21622：

龔成老師你好, 我是您的讀者, 希望港澳通關後可做您的學生. 有拜讀閣下選股勝經內講述中國電動車的內容,

本來本人對純電動車有一定保留, 因要考慮充電設施是否能真正普及, 所以比較偏向混能車, 近日見比亞廸也推出混能車, 確能填補這方面的需求.

而有關石油方面, 為減少對別國石油的依賴, 本人有設想過中國會否發展生物能源取代石油, 請問閣下對生物能源之類有何看法?

可否跟大家分享一下. 感謝撥冗閣讀本文.

龔成老師︰

我看好比亞迪（1211），主要係佢的電動車部份。在中短期，相信混能車都有一定市場。但長線計，應該會係純電動車為主。

電動車有環保的概念，這點令政府會加以幫助，而市民亦會支持，但其實，電動車真正的價值並非在環保，而是慳錢，用電比起用油平得多，因此只要各種配套都完善，車主沒有理由不選擇電動車。

只要有金錢利益推動，人們的習慣將輕易改變，在70年代的石油問題，完全改變了美國人使用汽車的習慣，由一向追求大汽車的習慣，轉變到鐘情於小排量慳油的日本車，令日本車大舉入侵市場，當其他車廠發覺時已經太遲，最終成就日本車霸主的地位。

雖然將來的油價難以估計，但到經濟好景，各國都大量用油的情況下，石油需求大增，電動車的優勢亦愈來愈明顯。

另外，比亞迪在中國發展電動車，可說是佔盡地利因素，因發展電動車必需要有完善的配套，政府的支持十分重要，另外，若政府肯帶頭使用對推廣很有幫助，現時比亞迪的電動巴士已經行走在中國多地的公路上，由公共交通開始發展，可見政府對電動車是正面及支持的，然而，中國政府在支持電動車背後亦有個重要因素，就是石油。

中國並非產油大國，未來的石油供應難以滿足中國的汽車需求，而發展電動車就成為辦法，同時中國在西藏擁有不少能生產電池的鋰資源，若能用電動車取代傳統燃油車，中國對石油的依賴可減少，對別國的依賴能減少，從整個國家發展的戰略角度分析，中國發展電動車的誘因並不少。

同時，中國是政府主導的國家，要建立配套及支持業界，比資本主義國家更容易（在西方國家，石油業的既得利益者並不希望見到電動車的出現）。

投資中國的企業有一個要點，就是順從中央的方向，這不是指個別一兩個政策，而是一個大方向，因這會對企業的長遠發展有重大的影響。

比亞迪在新能源汽車方面，經過幾年的發展開始有起色，混能車銷情理想，而電動大巴在政府支持下銷量亦理想，而部分歐洲國家亦開始試行比亞迪的電動大巴（這是有利的指標，因歐洲的標準甚高的），雖然只屬起步，但情況不錯。

現時比亞迪的新能源汽車遍佈全球6大洲、多個國家和地區，其中包括美國、德國、 英國、日本等主流汽車強國市場。

所以，我睇好這企業的電動車，但你預不是一兩年就見到收成。

至於中國會否大力發展生物能源，我不排除這個可能性。因為中央政府大方向，係想發展綠色能源，以減少對傳統能源的依賴。

所以生物能源，都有機會成為其中一個發展點。但現時內地，相信依然係光伏和風電，會較為主流。

------------------------------------------------

Q21623：

龔sir 早晨，我睇緊你本80後千萬富翁，講到早日辭職，全力以赴去創富工作。

我情況係我有個興趣，寵物美容，但尼門技術靠一對手，生產力有效，手停口停，所以遲遲都踏吾出步去開始事業。

我可以有咩商業模式靠寵物美容創業，又可以有乘既效果呀？

想睇下你嘅睇法係點

龔成老師︰

寵物市場愈來愈大（因為香港人生育少左，養寵物多左，這是長遠方向）。當然，你要學習多種相關技巧，同時，與寵物相關生意好多。

其實在初期，你未有相關技術和經驗，較難做到「乘」的效果。

但當你有一定技巧，甚至知名度後。你可以從幫人打工，變為發展自己生意。

再慢慢用你經驗，訓練一班技師，為你工作。你的角色，就由一個只有一對手的「生產者」，變成「複製生產者」的人。

到第一間店生意上軌道，你可以將這個成功模式複製，變成多間分店，你就會一步步享受到「乘」的效果。

------------------------------------------------

Q21624：

Hihi 老師請問點睇美股 (已歷史新高), cnooc 883.HK 和 china mobile?

龔成老師︰

美股現價算係合理區頂位置，預期未來一段時間，中國和美國會係全球最重要的經濟體系。因此美股，都有長線投資價值。

如果你想投資美股，但對美股又唔係好認識，你可以先投資係佢的相關ETF。以下2隻股ETF，都係不錯的選擇。

當中，QQQ波動性會較高，要注要風險。

Vanguard標普500指數ETF〈VOO〉，是追蹤標普500指數的ETF。

Invesco QQQ Trust(QQQ) 是追蹤納斯達克100指數。

但由於現價不平，只宜小注，或以月供儲貨都可以。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。現價合理，這類商品企業，都可投資，但就要明白不是最高質的企業。

中移動（0941）有質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，增長力不算強，這股有長線投資價值。現價合理，可分注。

------------------------------------------------

Q21625：

老師，1910最近由過年贏緊2萬幾到而家輸番3千幾，好似變得咁快既

旅遊氣泡出我睇都會好啲，但又一直跌

龔成老師可否指點下

龔成老師︰

新秀麗（1910）本質唔差的，但較受經濟影響。

近期疫情，令市場對其產品需求大幅下降，盈利由2019年賺1.3億，下跌至2020年度虧損12.77億。

就算扣除當中有逾9億的減值虧損，但扣除後都有近4億赤字。

而且，企業近年負債增加得好快，都令佢風險增加左。疫情之前2年，業績盈利都出現下跌，反映佢賺錢減弱，在疫情前已出現。

但這股長期仍是正面的，相信疫情後會轉好。但質素上因負債和賺錢能力減弱，會減左分。

此股投資可以，但若你持資較多，建議減持部份。餘下的部份，可以守。

------------------------------------------------

Q21626：

龔Sir您好！我今年38歲，一家四口，我負責賺錢，月入約$50,000，每月支出$35,000，每月儲蓄約$15,000。手持現金二十萬。

現持有一份儲蓄保單(供十年，年供$40,000，已供五年)；及一份每月派息基金(本金$80,000，每月派$500)。

現並無任何股票投資，近期有意取消派息基金並將$80,000本金買股票。有些問題想請教一下龔Sir，先謝謝您：

1. 如果以$80,000為起步，建議買甚麼股票？1810，3067和2800可以嗎？

2. 708恒大汽車值得買入嗎？

3. 知道龔Sir建議月供股票，但以我所知只有銀行才能月供，而且手續費偏高。如果我能持續地每月以原用作儲蓄的$15,000，透過證券行買入股票，效果是否相近，

對於我這想法龔Sir有何意見？

十分感謝您！

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

你38歲，應以增值為主，你所講的盈富(2800)、安碩恒生科技(3067)、小米(1810)都係可以。

建議你用「平穏增長股」 + 「潛力股」的組合。現在你每月先用5成儲蓄，即$7500做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

你現時投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

至於餘下的現金(每月儲蓄和8萬)，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

而你本身手持20萬，我建議你作家庭應急資金。因為你家庭收入只是單一來自你本人，風險較高。留有這筆應急錢才投資，會較穏當。

同時間，如果出現大跌市，你都可以動用這筆資金，去掃貨。

2) 恒大汽車（0708）雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

我唔係話佢無投資價值，只係不確定性較高。投資時，必需控制注碼，不能太大注。

3) 其實在證券行和銀行，做月供股票都可以。最重要係比對個月供費用，和方便程度。

因為月供費用太高，會影響到長線回報率。

------------------------------------------------

Q21627：

龔成老師你好, 近日幫家人打理股票戶口, 發現當中有不小質量挺甘的股票, 已及時止損.

留下的有788, 968, 2342 和1701, 其中最讓我擔心的是1701, 因為全冇交易量...

請問現時968 2342 有質素可以守嗎

龔成老師︰

中國鐵塔（0788）和信義光能（0968）係有質素，可以守。但由於佢地都有些波動性，若你家人較年長（即係較近退休之年），就不宜持有太多。

京信通信（2342）同樣有質素，增長力唔會有前2者咁高。你預佢中短期業務仍會較一般，要長期先有收成。

途屹控股（1701）本身質素不佳，如果你有睇佢的業務情況，生意大跌，同時出現虧損。長遠計，你一定要賣出這股，但可以有策略地咁賣出。

佢係中國的出境旅遊產品及服務供應商，如果全球疫情過後，有機會升翻少少，你可以等半年至1年時間。

你見佢升翻D，就要賣出。另外，如果這股現時佔財富組合一定比重，最好現時先減少少，去平衡個風險。

------------------------------------------------

Q21628：

覺得自己持貨太散，有邊啲可以放棄?

5, 11, 3988 , 6886 , 1810,
144 ,175 , 823 , 836 , 1317 ,
1288 , 1516 , 3319 , 1918 , 6055 ,
6969 , 688 , 2013 , 2318 , 288 ,
9988 , 1833

龔成老師︰

你這個組合好雜亂，而且數目太多，長線要慢慢集中翻。

假設你組合總值100萬以上，持股大約10-15隻。若不足100萬，則5-10隻左右，就好了。

持股質素上，未見有重大問題。但要留意，以下3隻。

ＨＴＳＣ華泰證券（6886）波動性大，不宜持有太多。

融創中國（1918）不是完全無質素，但佢負債好高，你要明白背後的風險，同時明白這一定會令股價較波動，自己最好控制注碼。

平安好醫生（1833)有質素，但不確定性高，不宜大注。

以你38歲年紀，應以增值為主，除非你好保守，否則收息股(0005, 0011, 3988, 1288, 0288), 不宜持有太多。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你組合中，有4間是銀行類(0005, 0011, 3988, 1288)，小心有過度集中風險。

因為銀行業營運模式較特別，風險會比一般行業為高，所以你要審視清楚。必需堅守30%這個準則，若能控制20%以內，會更理想。

------------------------------------------------

Q21629：

龔成老師你好，最近有意入市買樓自住，由於係第一次買樓，好驚借唔足按揭、又好驚會俾經紀呃、又驚買著間化妝樓要執手尾，發覺真係有好多野要注意，

同時買樓自住隨時住一世而又好怕做錯決定。而且身邊唔多置業人士俾到意見，所以想請教下老師你

背景：

2人共有160萬(股票+現金)

我28歲：月入15000，有雙糧，花紅最近2年都有

佢34歲：月入18000，冇雙糧，花紅去年有今年冇

由於唔想問雙方父母借錢，粗略計過，我地認為買450萬(未計稅..佣金等雜費) 既樓會比較穩陣,不過呢個銀碼既盤少只又少。

有既會係西斜樓或者裝修差既，樓齡35年以上，係咪應該繼續增大本金先買比較妥當？還是先上車？

仲有，雖然睇樓前可以到銀行查詢初步貸款額，但係實際上銀行職員都只係好初步睇你年薪假設你所有條件符合既情況下計算

但係現實係當簽完臨約俾左細訂先可以到銀行正式做按揭，14日後就要再俾大訂，但係呢刻銀行應該係仲未批出按揭，

一諗到呢步就覺得對買家好冇保障，會怯，怕批唔足貸款額就會連首期都輸埋。。

一諗到呢到就想放棄，就會諗都係等抽居屋算啦。。唔想連首期都輸埋。。

唔知係咪睇得太多撻訂新聞，有啲平時信貸紀錄良好既，準時還卡數，做按揭時先驚覺自己俾人偷取資料去借貸或做擔保而導致按揭貸款唔成或不足，

咁作為買家可以點樣做足功課先呢？去環聯做信貸評級有冇用？

龔成老師︰

其實較多的撻訂個案，都是一手樓的，至於二手樓，只要你做好計算，撻訂風險相對就較少。

如果你入息穩定，其實又不用太過擔心，你可以找大型或信譽良好的地產經紀行，到時問清楚，就較安心。

當然，按揭最終審批，都係睇銀行。所以，我地用架計算方法，都只係一個初步數字，不能作準。

我地唯一可以做，盡量預鬆動些，如果你計過按揭入息測試，自己只係剛剛合格，就唔好博。

你可以先投資在優質股，為自己累積更多本錢才再出手，會較安全。

若果你想同一價錢，但希望物業質素較佳，樓齡較少的話。較有效方法，是改變目標地區，選擇一些較偏遠地區。當然都要從你日常生活便利度，去作個平衡。

至於抽居屋，會係其中一個解決方法，但無人知你幾時會抽到。所以，我地一定要2手準備。邊抽居屋之餘，再作財富增值。

當發現居屋以外的置業機會時，你可以有本錢出手。

------------------------------------------------

Q21630：

你好龔Sir，康宏環球（01019）被聯交所取消該公司上市地位，想請教一下呢種情況會對小股東有咩影響？股票會唔會變成癈紙？謝！

龔成老師：

簡單來說，公司仍會存在，小股東仍是持有股票。

不過，就由原本有得在港交所賣出，變成無上市，無得賣出。

之後只能以私人的模式賣出。我見康環球表示，除牌後，將不會有正式機制協助進行股份買賣。公司現正委聘一個為非上巿公司而設的電子交易平台，為有意出售其股份之股東及有意買入股份之潛在投資者提供對盤服務。

------------------------------------------------

Q21631：

老師,想問下樓市, 見你話香港樓長遠向上 , 潛在的購買力是否會推高樓價?

因為現在就係有尼類人存在... 到幾年後大家都儲到一定既錢就去買樓.... 咁樓就愈推愈貴, 愈儲愈少... 我尼個諗法係咪唔正確呢???

龔成老師：

對，潛在購買力會慢慢推高樓市，但不是大升，而是平穩。

因為多年來的供應不足，而需求大，買不到樓的需求並不會無左，而是「累積」，所以這些需求會慢慢釋放。

就是你所講的當儲到錢，慢慢就會買樓。

------------------------------------------------

Q21632：

龔sir, 你好。3月正式月供 ，麻煩看看有否問題，我看過你的財務自由行，我是可承受中風險級別，月供計劃如下 :

$2000, 700
$2000, 388
$2000, 2382
$1000, 2319
$1000, 981
$2000, 77

Total 10000 per month
Many thanks again

龔成老師︰

中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等。再加上中美問題，令不確性增加左。因為有些舉措，未知會否對集團發展，造成長線影響。

這股不宜供太大注，你保持$1000就得。

進智公共交通（0077）主要業務為於香港經營綠色小巴服務及提供中港兩地之跨境公共巴士服務。

企業本身規模唔大，營業額都唔算高。睇翻佢財務狀況，過去數年盈利都十分波動。加上佢本身負債不輕，都係要扣分的地方。此股質素只是一般，唔適合月供。

我建議你用平穏增長股，去取代這隻股票，否則你個組合波動性會好高。另外，現時大市只在合理區，每月資金唔好盡用。最好留有部份，等大跌市出現時，可以用來掃貨。至於其他股，無問題。

------------------------------------------------

Q21633：

龔成你好，有以下問題想請教你︰

1.我想問下我之前0.5時候入左d縱橫遊 8069，依家有擔心佢會唔會有機會執笠，好唔好放曬佢定繼續持有等旅遊業

2.另外想問1250 北控清潔能源呢隻股票如何，值得持有嗎，定放走較好

3.地產或銀行股 有冇較推薦，組合中已有小米以及3067，有金莎和煤氣，想加入多小小較好和進取的股票

十分感謝

龔成老師︰

1) 縱橫遊控股(8069)以「縱橫遊」品牌於香港從事設計、開發及銷售旅行團、銷售自由行產品、提供旅遊配套產品及服務等。當中，以日本旅行團為主。

此股市值不高，過往營業額都好波動，再加上佢多年來都係虧損，狀況不太理想。

暫時睇唔倒此股有投資價值，建議你沽出較好。

2) 北控清潔能源（1250）主要從事光伏發電站的投資、開發、建設、營運及管理、光伏發電相關業務以及風電相關業務。

佢本質不錯，都有一定潛力。但業務比較波動，而且負債好高，都係風險所在。

若你持股較多，建議沽出部份，換至其他優質股。如果持股只係好少，你可以長線持有。

3) 以你28歲年紀，地產或銀行股方面，可以考慮以下股票。

平穏增長股︰恆基（0012）、中銀（2388）、領展(0823)、希慎(0014)、太古地產(1972)

由於優質地產或銀行股，大多數已有一定規模，增長力唔會好高。

若你想提升組合增長力，可以考慮以下潛力股。但由於佢地風險較高，若你投資經驗較淺，這類股票佔組合3成好了。

相反，你已有一定投資經驗，可以進取少少，提升比重到5成都可以。

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

但你要留意翻，部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

------------------------------------------------

Q21634：

你好，龔Sir,今年26歲，我係由上年開投資。

想請教下你我以下嘅投資組合有冇需要改善嘅地方，組合如下：

3號 1000股 $12.040
12號1000股 $29.2
66號 500股 $38.850
590號 1000股$17.56
823號400股 $76

1398號3000股$4.540
1928號400股$29.7
2800號500股$27
01044號 500股 $51.2

叧外想問02148，09888，00293 值唔值得去投資？

同埋我個人覺得我現時投資項目好似有啲散，咁策略應該點好？謝謝你！

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時26歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

你現時組合股票，都係優質股。但工行(1398)係收息股，增長力較弱，唔適合你。

另外，以你年紀計，組合有少少保守。建議你加入一些「潛力股」，去提升個組合增長潛力。

你除左直接入貨之外，我都建議你好好利用每月儲下來的閒置資金，進行投資增值。

策略上，你可以投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了，可先較集中係平穏增長股類。

到你有一定投資經驗﹐潛力股比重可以相應調高，佔組合約3-5成。

餘下的另一半每月儲蓄，我地就等機會，當大市出現較大回調，就加大力度掃貨，然後作長線投資。

VESYNC（2148）有少少潛力的。佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

係美國通過亞馬遜產生的零售額而言，其空氣淨化器於其類別中排名第一，空氣炸鍋於其類別中排名第二。

佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場，主要為美國最大的電子商務交易市場亞馬遜銷售其下的產品。

佢的產品主要銷往美國、加拿大、英國、德國、法國、西班牙、意大利及日本等數個國家的用戶。

業務不算差，發展有潛力，但企業規模始終較細，業務未穩定，加上現價略貴。整體都有風險。

這類股，小注投資都可以，但就要明白當中的風險。

百度（9888）有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

現時佢坐擁不少資訊和客戶群，就可以利用佢地去發展很多不同業務，可以話係一個好大的優勢。佢收入不差，長遠有發展，但由於本身有相當規模，因此，未必是高速增長型。

百度在規模和質素上，一定係有。但近期科網股波動，風險高左，同時到上市一刻不確定性高左。

現價都唔平，合理區頂，但長線有增長力，小注投資都可。

而國泰（0293），質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

過了疫情，生意會好翻D，但長線發展，都唔算係太理想，投資價值只係一般。

------------------------------------------------

Q21635：

同埋好想請教你一樣野，你之前話物業嘅總金額或者首期唔係評價物業平唔貴嘅重點，但好想請教你，有時都要睇吓自己負擔得到個樓價？

即是話如果我搵到一個10,000,000左右嘅樓佢嘅呎價係好抵(就算比較嗰同區最平係佢)，但我都負擔唔起10,000,000嘅樓.

但而家香港現實係如果四百幾萬嘅樓, 用你呢個方式去衡量平貴, 咁佢一定係會好貴, 如果咁嘅話我哋應該點樣揀呀。

有時我都會覺得好矛盾, 我本人33， 月入大約$51000， 其實去到呢一個月薪好似連一棟樓都冇好似唔係好甘心，

依家處於兩難嘅局面，係我究竟應該儲多幾年錢等個首期再多啲然後買再貴啲嘅單位？定係而家唔理佢嘅平貴有四百幾萬嘅兩房細單位

（但係可能已經有三40年樓齡，維修費可能都會好貴嘅私人樓）就買咗先，驚第日通脹再加上銀紙貶值，再加上第二日啲樓越嚟越貴，

再加上驚我儲多幾年錢但係啲樓價嘅升幅仲快過我儲嘅錢。

定抑或我而家一次過買個貴嘅單位780幾萬左右私人豪宅兩房單位，但我諗我會供樓供得好辛苦，仲要搵埋屋企人做擔保人先至可以借到九成按揭。

但係諗落又係呢一種700幾萬嘅單位先比較適合自己長住。如果真係買咗個四百幾萬嘅三40年樓齡舊樓可能自己都唔想喺度住好耐。

(個人又比較喜歡青衣區, 但係區內嘅私樓選擇唔多)

唔知老師你可唔可以俾啲意見幫幫我呀?
謝謝你

龔成老師︰

我意思係，唔好見一間屋入場費細，就覺得係抵。我地要從租金回報率等，去衡量佢價值。

至於置業目標，唔係單從價錢、回報去睇咁簡單。

簡單講，每個人都有自住需要，最終都會買個自住物業。

由於係自住，除了從投資角度考慮(如租金回報率)等，更重要，係可以做到「供得起」這個大原則。

你要找的，不是一定要同區最平，質素最理好單位。而係你要因應自己能力，實際生活需求，去決定買入什麼樣的單位。

這個考量，唔係講眼前而一刻，而係睇長線。你5年、10年、甚至20年的人生計劃，做底要一個點樣架物業，先可以配合到你。

之後，我地再制定一個可行計劃，一步步向你目標DREAM HOUSE推進。

如果你目標單位，唔係太貴，而你又有一定資金。可以買入單位之餘，有一定資金留下，進行投資增值，那計劃可以直接進行。

若你現時資金較少，你可以先用優質股，去累積資金，再去置業。

或者目標單位較貴，你可以先買入較細單位，之後放租。令你可以有一個物業，用以資產追資產方法，減少物業價格波動，對你購入最終目標物業的影響。

另一邊，再用優質股增值，到有一定資金，就細屋換大屋。

你要睇翻自已情況，去決定邊個策略最適合你。你可以睇我本<5年買樓4步曲>，會對以上買樓策略，有較深入解釋。

如果你覺得，最終目標係7XX萬的樓，而現時不論首期和供款，都係尚有一段距離。

我建議你按部就班，先投資優質、再細樓(但質素都唔好太差，要有一定投資價值，因為你要用佢放租和換大屋)，最後才是你DREAM HOUSE，。相信咁安排，會較適合你。

------------------------------------------------

Q21636：

663金山能源，可唔可以幫我諗辦法解套，幫幫忙。

386..中石化$4入...今日已經升咗上去，甘之後繼續持有長渣定係點？

龔成老師︰

金山能源(0663)佢生意好雜，有白銀開採、石油及天然氣、光伏，資產融資、旅遊﹕貿易等等。

佢規模好細，生意額唔多。過去幾年，生意持續虧損，睇唔到有投資價值，建議沽出。

中石化（0386），質素算是不差，但又未到好好，始終這只是商品企業，沒有一些太大的優勢。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

生意近5年只是上上落落，無乜增長力，這是受油價等因素影響，反映佢處於一個被動的狀態。

雖你持有此股目的，係為左收息，你長線持有就可以，但你預佢增長力唔算強。

------------------------------------------------

Q21637：

龔成老師，之前見你推介福壽園，我睇過佢嘅資料，亦都睇好，已經小注入左，靜待收成期。

想問問如果心儀健康股，想問問阿里健康241，京東健康6618，平安好醫生1833，邊隻比較好？另你認為咩價位入算合理區，而咩價位入屬於平呢？

另外，想問必瘦站幾錢入值博率較高？因為由1個幾升到7個幾，最近回落左少少，但都見係高位，暫時唔敢入住

龔成老師︰

福壽園（1448）有質素有發展力，現價在合理區頂，想加注的話，等佢有明顯回調，才再出手。

京東健康(6618)、平安好醫生(1833)和阿里健康(0241)都係有質素和潛力，但問題係佢地是有危有機的類別，雖然業務增長好快，但這刻仍處於燒銀紙的狀態中。

估值上好困難，因為無實質的盈利數據作為基礎，市場只是估估下。

質素和值博率計，平安好醫生(1833)會較為佔優。現時平安好醫生，算係合理區頂，你可以先小注。到有明顯回調，才再加注。

這些企業都可投資，但緊記只宜小注。

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

業績前計佢$4是合理區頂，業績後股價升左好多，雖然我之前好大機會會調高佢合理價值，不過，現價都有少少貴。

所以，如果無貨，你可考慮回少少，先小注，然後等跌多d先正式分注投資。

------------------------------------------------

Q21638：

你好，龔成老師。我36歲，跟太太月入5萬，有430萬的樓宇貸款，每月供樓後儲蓄約18000，另有現金50多萬。現持有以下股票：

1. 中電 1000股，73蚊買入
2. 香港電訊 4000股，10.96買入
3. 領展 400股，68.85買入

最近開始睇你專頁後，認為你的價值投資法很適合我，所以按你推介小注買入以下股票，之後再加注：

1. 安碩恒生 600股，17.13買入
2. 中生製藥 1000股，8.31買入

我只是投資新手，有以下問題想向你請教：

1. 以上組合潛力股比例是否太少？如果再買入潛力股，航空或物流股可有推介？國泰可以嗎？

2. 香港電訊只是收息股，該賣出再買入更多潛力股嗎？

3. 平穩增長股方面知道你推介港鐵，但請問你又點睇載通（062）呢？

4. 你對於我這個組合有意見可再給我嗎？

謝謝你解答。

龔成老師︰

1) 以上持股，都係有質素。但以你36歲計，應先集中係增值部份。

香港電訊6823)和中電(0002)主要係收息，增長力唔高，不宜持有太多，暫時不要再加注。

由於你係新手，未必對企業估值、點去定平貴太了解。我建議你都利用月供模式，將每月儲蓄投入股票組合，以減低買貴貨風險。

將來投資和月供，建議你用「平穏增長股」 + 「潛力股」的組合，比例大約各一半。現在你每月先用5成儲蓄，即$9000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有50萬資金可多投入10-20萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

至於航空股，中短期都會較弱，而且航空業面對競爭和問題都不少，暫時唔建議投資相關企業。

至於物流業，你可以留意嘉里物流（0636）。這股算不差的，順豐入股後長遠發展更正面。

佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的35個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

這股長遠都有發展的，不過近年股價上升左唔少，這點要注意風險。現價算是處於合理區頂，以長線投資的角度，有值博率的，可分注。

2) 此股都有質素，但始終增長力較弱。你可以考慮沽部份，換碼至較有增長力的股票，係可以。

3) 港鐵（0066），係一個不錯的選擇。

但載通（0062）質素只屬中等，但不是無質素，持有不應該太多。佢的優質是現金流強，但如果仔細分析佢的財務數據，會見到佢成本增加的速度，大於收入增加的速度，這反映佢無成本轉嫁的能力。

你預這是收息股，股價增長力不強，唔係太適合你。

4) 你成個財富組合，主要係物業部份較大。但初期係正常的，未來你新資金，盡量先投放在優質股類，令成個財富組合，平衡性提高。

因為我地長線係希望建立一個平衡、優質、有增長力組合。所以，唔好太偏重係單一資產，否則個別市場有較大波動，對你成個組合，就會有嚴重性影響。

------------------------------------------------

Q21639：

龔sir 你好,因為前幾年一直幫屋企還緊債務，所以出左黎做野3年基本上冇儲過錢，直到最近已還清，一直冇任何錢做其他野。

如果想一年內儲返60萬可以嗎？人工每月只得20k 希望老師可以幫到我。感激!

應該點樣既投資方法先適合

龔成老師︰

以你現時人工，想透過用優質股增值，去到一年要儲60萬，比較難。

因為你本身可動用資金不多，加上優質股一般年增長，約為10-15%。而且係講一個長線平均數，如果你1年咁短時間，個回報會好波動。

你唔好預期短期內投資優質股，會有倍數級增長。因為投資股票，就等同投資企業。就算再優質，都要比時間佢慢慢成長，唔係一年可以做到的事。

我建議你按部就班，用每月儲蓄，去投資優質股，為財富增值。

由於你現時收入，較難達至目標。故你首先要做，就係增加收入來源。

你可以考慮轉換工作，做一些多勞多得，例如銷售方面工作。或者，你可以加入副業，可增加收入來源。

另外，你都要審視開支，看看有什麼不必要開支存在，盡量去縮減，加大你每月可投資金額。

投資方面，可以選擇一些「平穩增值股」+「潛力股」作投資目標。

------------------------------------------------

Q21640：

阿sir, 你好，本人現在30歲頭，現握大約10隻股票，全都係有質素，但發現股票組合不平衡。現持有水桶1:2:3 比例為 35:40:25。

而另外亦發現股票行業，比較集中資訊科技和電訊，各大約比例為37%和35%，其他則28%。

想問如果現擁有的優質潛力股持有太多要重新調整組合，但某些買入價偏高，應仍為重新調整組合平衡風險，而蝕賣出一些嗎？

另外想問941 應是桶2 還是桶3？

龔成老師︰

唔係太著重個買入價，我地是否持有一隻股票，要睇佢本身質素，買入價只係必理因素。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

而你現時30歲頭，水桶1:2:3佔比，大約為60:40:0。當然，水桶1風險較高，如果你投資經驗較淺，或者想保守少少，可以調低少少個比重。

以你年紀計，組合有少少保守，潛力股稍為不足。而行業上，都出現過度集中性問題。

但由於情況唔係好嚴重，若你持有股票都係優質，唔想沽貨的話。你可以利用新資金﹐慢慢去調整翻個組合比重，令佢平衡性回復正常。

中國移動(0941)，算係水桶3股票。此股有質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

你可視佢為收息股，但增長力不算強，這股有長線投資價值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21421-Q21440）

Q21421：

龔sir上完你個堂，我分析左152呢間公司，因為阿Sir有推薦過548收息，而152又係548嘅母公司，我睇過佢係業務覺得佢嘅增長能力應該好過548，

所以想考慮用作收息及有所增長。現在有幾個問題唔清楚，想請阿sir解答：

1 佢2020年嘅流動負債得大增一倍幾是否係收購蘇寧易購引致呢，對佢本身有咩影響呢？

2 這股近幾年都派特別息，是否會對往後派息不穩定呢？

3 我搵左佢近5年平均市盈率係7.6-10.4，以佢最新一年嘅盈利1.1嚟剩返，得出嚟嘅估值大概係$8.4至$11.4，是否太低？阿Sir認為合理價係幾多？點計算呢？

唔好意思新手上路要勞煩阿Sir幫幫手

龔成老師︰

先講深圳國際（0152），此股係有質素，是不差的收息股。

佢主要從事收費公路的開發、營運及管理；物流中心及綜合物流港的建設、營運及管理；提供第三方物流服務、物流資訊及金融服務、港口及相關服務、物流園轉型升級服務。

過往業務穩定，生意與盈利都不差，不過就不是高增長類。這股都有長線投資的價值。現價合理，投資收息可以。

1) 此變動與收購蘇寧無關，只要你留意資產負債表，你會發現變動，主要係來自"貨款"部份。

當你再仔細睇附註25，你就會發現，其實係一些"中期票據和債券"到期日，由以往多於1年(計入非流動負債)，變成1年之內(計入流動負債)，因此流動負債才會大增。

以集團現時財務狀況，負債問題不算大。

2) 由於近年特別派息，主要來自土地轉讓的收入，這些收入都是一次性。因此，有機會往後特別派息會有波動。

3) 我地係計算合理市盈率時，會用過去10年數據，抽取中間4個市盈率7.6 - 9.6倍，作為參考。但在採用前，你先要分析，這個4個中位數，是否可以合理反映其價值。

我地睇翻過去10年的市盈率圖表，你會發現自2018年起，整體數字出現明顯回落。

因此，我地就要先去了解當中原因，點解有這樣的變化。只要你仔細留意過去幾年年報，你會發現集團近年特別派息原因，主要係來自轉讓公路資產。

集團本身收入，主要來自公路收費。而公路，自然係集團的重要資產。當這些重要資產減少，市場會預期佢賺錢能力弱左，故近年給予的市盈率估值，都會較再早幾年為弱。

因此，我地計算合理市盈率時，要作出相應調整，大約係6-8倍會較合理。再以過去5年，平均每股盈餘HKD1.846計算。

合理價值︰約為HKD11.0 - 14.7。

當然，這只是其中一個估值的角度，而投資者在進行估值時，會同時用多個估值方法去進行估值，得出更立體的結果。預佢現時估值合理中間至中下。

------------------------------------------------

Q21422：

Hello成哥，上完股票班真係學到好多嘢，令我更有信心選股同埋計算估值。我最記得一上堂時你叫我地分清楚urgent同埋important，我相信上堂學終身受用嘅知識一定係最important

龔成老師：

我地一定要分清「urgent」、「important」。

香港人太多趕急的事，以至一直都唔做重要的事，所以我先第一堂同大家講，課堂好重要，比你用一世的，我見個有部分同學好認真，佢地會為左唔遲到上堂，而要求公司早走。

我見過有同學為左做最後的大功課，請左公司半日假。

如果你之後的決定，都明白「urgent」、「important」，集中處理「important」，你往後會好成功。

------------------------------------------------

Q21423：

龔Sir 你好, 想請教你一個問題, 如果有一隻股票, 股價年頭7元, 入左2000股, 年尾8元, 另每股派息0.472, 咁回報係咪21%？ 見下計法：

原本： 7元 x 2000 = 14,000
一年後： (8元 x 2000) + (0.472 x 2000)
= 16000 + 944 = 16944元
回報： （16944 - 14000）/14000 = 21%

*以上所指係置富房託
如果回報有21%, 咁又唔錯喎
謝謝！

我指如果我無理解錯回報有21% , 收息股黎講好好, 對嗎？ （雖然只有2手）

龔成老師：

對，你計算正確。

以房託及收息股來說，這個回報是高回報，其中一個原因是你買入時，當時房託受疫情因素影響而向下，所以能以一個不差的價位買入。

長遠來說，房託較難每年有這個回報，你預是收息及基本增長。這股可長線，你的投資不差。

------------------------------------------------

Q21424：

成哥，你好啊朋友最近誤入佐以下股票

8083中贊@3.9×8000
3833新彊鑫礦@2.13×20000
235 中策@0.2575x150000
3321 偉鴻@5.2×15000
1357 美圖@2.94×3000
[email protected]×200000
[email protected]×50000

請問應否繼續持有？如重新規劃組合現時有咩可以選擇，謝謝成哥無私既分享

235係0.2575至岩，希望成哥能卑d意思，幫幫我朋友可以重整組合，謝謝

龔成老師：

坦白講，持股大多無質素或只是熱炒類，部分就有少少質素。

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

中國有贊（8083）不是劣質，但不建議持有太多。
新疆新鑫礦業（3833）屬風險類股，不能持有太多。
偉鴻（3321）無質素，宜賣出。

中策集團（0235）質素唔太好。

佢主要從事投資證券、金屬礦物及產品及電子組件貿易、放債及證券經紀業務。

睇翻過往的業務情況，非常波動，生意上落大，有時大賺有時大蝕，風險高。加上企業規模不大，投資價值不高。

這股股價有時會大升，但可能只是中短期業務與消息，長遠未必一定利好。

美圖公司（1357）正面，佢過左最差時期，現時正向好。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

結好控股（0064）質素一般般，不宜持有太多。
英皇國際（0163）質素不太好，賣出較好。

建議之後，投資翻一些穩健類的股，如不懂選，就投資ETF。

------------------------------------------------

Q21425：

老師，你本《5年買樓》的書好正！對我這對買樓O認識的人來說，可以在很短時間內對樓市有個整體概念和有信心可以去買樓！

可措現時樓市已回升不少，很多屋苑已破頂，現在只能繼續等待！

可否請間老師，現在手頭有大约五球，在等待樓市回調才買樓，現在應如何配置這五球呢？因為不知要等到幾時，又不想令這五球繼續遍值！謝謝！

龔成老師：

如果你本身無自住樓，而自己又有這需要，其實已經可以考慮，最重要是你資金足夠，在供款方面無問題，買樓後仍有現金剩，這樣已可買。

好多人會分析樓市走勢，但我相信這是好難的，反而考慮「自己的需要及配置」，才是你買樓更大的分析點。

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

如果有自住需要，只要在供款方面無問題，買樓後仍有現金剩，都可以考慮下置業。

------------------------------------------------

Q21426：

老師請問成本上升算利好定不利消息? 我最近研究紙業，點解紙材成本上升，有d賣紙既公司會賺多左? 究竟成本上升係好事定壞事?

龔成老師：

其實這是複雜的問題，往往要睇行業情況，以及企業營運情況。

有些行業，當成本上升後，能將絕大部分轉嫁比客戶的，可能因為行業的競爭有限，又或全行的營運模式都相同，因此佢地會同步加價，而客戶無太大的選擇權。

當我地分析時，往往會睇翻企業有無「成本轉嫁」能力。

當你分析時，要同時睇企業的毛利率，如果成本上升但毛利率不跌，反映企業有成本轉嫁能力，即是成本對佢無影響，往往有一定的優質度。

------------------------------------------------

Q21427：

想問老師有冇一啲儲蓄型危疾保險推介

龔成老師：

無呀，因為我不從事這方面的銷售，你可以去銀行或保險公司問下。

最重要是，你按自己的「需要」去買，保險就是將你不想承受的風險，轉嫁比保險公司。這是防守的動作，不過，我地理財最重要是攻守兼備，因為不用太多，「足夠」就得。

------------------------------------------------

Q21428：

龔Sir你好！本人3x歲，想問一下長遠收息同增長，可以考慮以下股票持有或買或增持？或龔Sir 有甚麼推介？

1. 1310 （$11買）
2. 1830 （$4.4買）
3. 331 （$4.5 買）
4. 398 （$2.5 買）

5. 1373 （$2.5 買）
6. 1523 想買
7. 1883 想買
8. 3067 （月供1/2手）做增長股票

非常感謝！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你3X歲，我一般會建議你用「平穏增長股」 + 「潛力股」的組合，先做好財富增值部份。

除非你個人極保守，或者本身有其他原因，需要有額外穏定現金流作支援。

否則，而一刻我唔建議你投資太多，中信國際電訊（1883）、香港寬頻（1310）這類收息股。

另外，東方表行集團(0398)質素較一般。這些股票，若持貨不多，可持有。但若太多，最好沽出部份換至其他股票。

珩灣科技（1523）主要以「Ｐｅｐｌｉｎｋ」及「Ｐｅｐｗａｖｅ」品牌從事ＳＤ－ＷＡＮ路由器的設計、開發、推廣，以及提供相關軟件許可及保修與支援服務。

ＳＤ－ＷＡＮ路由器可連接多個廣域網（ＷＡＮ）連接、智能分配流量給多個廣域網、可集中管理，以及必須利用加密技術建立安全連接。

業務及盈利都有不差的增長，發展不差，不過公司規模始終較細，因此始終都有風險。

這股長遠不是無價值的，但都要明白發展緊的，都是有變數的行業，所以股價潛在波動可以較大。

現價都算是合理的，但不建議大注投資，長線投資都可考慮。

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。業績前計佢$4是合理區頂，業績後股價升左好多。現貨可持有，但暫不宜加注。

將來你可以投資以下股票，但若果你投資知識不高，可先較集中在平穩增長類股，至於潛力股，只宜小小注，最好是你提高投資知識，等你有一定知識，先慢慢增加翻潛力股比例。

現時大市只在合理區，資金唔好盡用。最好留有部份，等大跌市出現時，可以用來掃貨。

------------------------------------------------

Q21429：

龔成老師，您好!我見有讀者問你移民後的投資策略，但佢地冇提到一點，就係英澳等國家抽取資產增值稅，

例如股票買賣利潤，政府會抽取約30-40%税。如果考慮埋這因素，我們需要調整投資策略嗎?

例如減少平穩收息股(因為抽税後利潤所餘無幾)集中喺增長股?謝謝

龔成老師︰

我自己無對海外稅務作深入研究，比唔到太多具體意見你。但當考慮到這些增值稅項時，的確會令原先回報被打上拆扣。

但除非你不作投資增值，或者移民到低稅率地區，否則這個問題，基本上係無可避免。

投資策略基本上唔會大變，但你計算長線回報率時，要因應相關稅項作扣減，以免令預測過於樂觀。

最後，我建議你去問翻當地稅務顧問，看看有沒有一些節稅方法，從而減少這方面的影響。

------------------------------------------------

Q21430：

老師你好！

今年28歲
月薪34k
要比10k 家用
有月供2k(2800)
保險每個月1.5k (每年一次過付款)
有50k Savings

有意今年同男朋友搬出黎

啱啱開始上你既堂

想用月供/ 分注投資方法放啲錢入水桶1同水桶2。

另外，今年個市似好熾熱，身邊所有人都喺度講緊股票，如果我用計公司價值判斷佢價格係貴或平，其實係咪都可以放心入股？

今年會唔會算係一個較危險嘅買入時機？

想請教老師意見同指導。感謝

龔成老師︰

現時大市在合理區，雖然部份新經濟股，有輕微過熱架情況。但整體大市水平，尚算合理。

我地唔會去估個市點走去定買賣策略，只會繼續用企業估值，去定平貴咁買貨。

但當成個大市去到一個狂熱的情況，我地就要保守少少，現時未算去到好狂熱。

以你現時28歲，投資在水桶1同水桶2，係正確做法。但你收入計，每月月供金額太少。

如果你唔係有太多必需開支，我建議你盡量將月供金額，提升到1萬以上。因為你年青，應把握時間，盡力去做好財富增值部份。

而一刻，你唔需要急住去配置，或者新加其他股票去月供。因為投資係一個長線計劃，你可以等上完堂，有一定知識和明確概念，才去調整會較好。

------------------------------------------------

Q21431：

hi 你好 龔sir，我是一位18歲學生，沒有part time 現在一邊學習緊投資知識，

1現時我有一萬元想all in 入股票，想搵一隻股票收息邊隻最好？

2我現時打算購買你的書學習投資知識，邊一本系適合我這個BB新手，多謝

龔成老師︰

1) 你這個年紀，就算資金不多，都應努力學好投資知識，甚至小注去吸收經驗，為將來準備。所以，你做法好正確。

由於你暫時經驗和資金都不多，建議你先從以下收息股入手。如果你不太認識這些股票，可以直接買3110派息基金，都可以。

但將來到你有穏定收入，又對投資有一定了解，就要加大投資力度，改為買一些較有增長力的優質股。盡力把握年青時間，去為自已財富增值。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、置富（0778）、陽光（0435）或收息基金(3110)都可以。

2) 以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21432：

龔成老師，很喜歡睇你嘅影片，好多分析都講得好好，特別係價值投資法。

本人看好中國嘅保險業，隨住14億人口開始富起來，相信保險嘅需求會越黎越高。

想問問你對中國人壽2628同財險2328嘅睇法？同業中，長遠有高升值潛力嘅股票又可以推介一下嗎？期待你嘅回覆，多謝

龔成老師︰

我自己都係用「價值投資法」，巴菲特用左這方法賺大錢好多年，這是公開的。

但一般散戶就是貪賺快錢，而不用這方法，因此，令到一般散戶仍是輸多贏少，我們仍是賺大錢的一群。

中國隨著人口增加，城鎮化、人均收入增升等，都對保險這類產品需求，只會有增無減，故長線中國保險叢係正面。

中國人壽(2628)不是無質素，但近年有質素下滑情況。現價合理，但投資價值只係中等。

中國財險（2328）主要於國內為各界客戶提供多種財險產品，包括機動車輛保險、企業財產保險和家庭財產保險。

過往的生意與盈利都不差，不過就無乜增長動力，質素算是中等。這股現價合理，可長線，但就主要預係收息，唔好對股價有太大期望。

如果你看好中國保險業和其增長潛力，平安(2318)會係較理想選擇。佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型。現價算係合理區中上部，分注投資就可以。

------------------------------------------------

Q21433：

老師你好，我最近幾個月開始留意你page，我以往只有3次買賣股票經驗。

但有一次錯信股票group輸了幾萬蚊，加上13元買入石油股，依家跌到得番8蚊左右，真心輸到怕。

想請教依家石油股係咪唯有繼續持有？
求指教

龔成老師︰

近期好多網上騙案，就好似你所講股票group，要小心。

記住，我地買入一隻股票，一定要知道佢質素、行業前景、財務狀況等，才去投資。

如果你連間公司點賺錢、行內有乜優勢、點解未來有發展和增長潛力，都答唔倒自已，純粹係聽消息，甚至係某某群組意見。咁你就要停一停，唔好投資住。

石油股，好似中石油(0857)、中石化(0386)、中國海洋石油（0883）質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。這類商品企業，都可投資，但就要明白不是最高質的企業，不要大注。

如果佢佔你組合好多，你可以每有反彈，就慢慢沽出部份。

------------------------------------------------

Q21434：

成sir 您好！小弟年29。已經有想財務自由的目的。不想再浪費自己的人生了。

最近學習窮人與有錢人的態度及資產與負責的分別。

月入17000
扣除一切開支可以儲1萬元。
銀行有70萬。

有留意你大推盈富 港鐵 領展等等。

以最終目標財務自由及每月被動收入約20k.

小弟投資經驗0。有睇過下成sir 教導以月供模式較適合初學者。留部份現金流等大市跌時可以大手購入長線投資收息股？

小弟會睇書學習如何去計算公司的真正價值。多留意不同公司的年報表等。

有一個最不明白的是睇財經新聞。是否留意新聞介紹公司背景及行業發展？長遠是會否留意公司會否接觸新行業等？

另一個最大問題是如分配70萬去錢滾錢達到 金錢為你工作。

小弟已經開始睇投資書。增值自己才是最大的財富。長遠需要報讀會計課程？好人一生平安

龔成老師︰

如果你希望最終可以每月有2萬蚊現金流，以股息率6%計，你需要本金400萬，這就是你初步目標。

你現時29歲，係財富增值黃金時期，除了增值外，也緊記要努力提升自己投資知識。

由於你未有投資經驗，好易會買貴貨，所以用月供或分注入貨模式，對你這類初學者，會較安全。

以你29歲，可以選擇一些「平穩增值股」+「潛力股」作投資目標。

以現時大市合理區狀況，月供最好用一半每月儲蓄，另一半就先儲起架策略。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845），但就要明白波動性比上述會高左，同時風險大左，你要自己平衡。

若你不懂選股，可以先用盈富(2800)作目標。其餘合適股票，到你對佢地有一定了解，才從中選股。

現時大市只是合理區，你現有70萬資金可以先投入15-30萬，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

由於你很年輕，相信要達成400萬目標不難。

我假設投資回報有10%（連股息再投資），你每月投資$10000 + 70萬本金，大約10年多後，就會增值至400萬。

至於投資知識方面，新聞主要係睇有無一些事情，對企業本身質素，或者長線發展有影響。例如早前內地監管政策收緊，就令阿里巴巴(9988)等企業的風險度增加左，這就是要留意地方。

我地要不斷吸收「資訊」，例如宏觀經濟情況，企業發展，各行業的情況。但我地睇新聞不是要知道所謂的「意見」。

除了看書、年報、新聞外，你可以報讀一些投資相關課程，去提升相關知識。

本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成。

到你讀完整個課程後，你已能自己選股、投資、評估平貴，在投資上已掌握了一定的知識。

------------------------------------------------

Q21435：

Hi 阿sir你好，想聽下你意見，本人38歲，女，月收入$53000，現時有兩個物業，供款分別15000及18000，租金收入為$15000。每月開支$15000左右。

另一單位明年亦打算出租，大概收$11000租金左右。

睇左你好多資訊，有做月供股票，每月$13000，分別銀娛$2000、比亞迪$2000、中銀香港$2000、小米$1000、阿里巴巴$2000、友邦保險$2000、港鐵$2000。

現時股票有11萬左右，現金$25萬，手上保險有50儲蓄。

想10年後，可以有500萬，想問下你意見？我現時股票組合投資是否正確？

希望得到阿sir回覆

龔成老師︰

以你38歲計，應先做好增值部份，你現時持股都係合適合。但留意，比亞迪(1211)現價偏貴，要回到$120左右水平，才建議再開始月供。

此期間，你可以用ＧＸ中國電車基金（2845）- 這基金的目標是追蹤Solactive中國電動車指數NTR「相關指數」表現緊密相關的投資回報。

或其他潛力股代替，如中生(1177)、福壽園(1448)、安碩恒生科技(3067)、港交所(0388)、騰訊（0700）。

現時大市只係合理水平，現金和股票最好各佔一半，你可以多5-10萬去分注入多少少貨。餘下資金，就等大跌市出現，才加大力度掃貨。

另外，"保險"主要係用來防守，買足夠保障就可以。儲蓄成份架保險，我就唔建議太多，增值最好都係留比優質資產(如優質股、物業等)去做。

我假設投資回報有10%（連股息再投資），你每月投資$13000 + 本金36萬，10年後大約會增值至340萬。如要達至500萬目標，你要將月供加大至$22000，才較大機會成功。

所以，我建議你利用明年新增租金收入，加大投資力度，以助你達成目標。

物業方面，你現時已經持有兩個物業，之後就暫時唔好增加固定資產類別，令財富組合更平衡。同時，如果可以的話，盡快將手上物業出租能有助你提高現金流。

------------------------------------------------

Q21436：

龔成老師，你好呀！現年40歲女，剛離婚無業，賣了樓有200萬現金。現在有以下股票，請問我有買啱嗎？

應該長期持有或是到一定嘅時候賣掉獲利？ 909跌了一半，我應該怎樣呢？

#1 2500股 $53.5
#2 1000股 $71.5
#941 1500股 $42.5
#291 10000股 $67
#3690 500股 $278
#909 8000股 $53.5

我嘅目標係可以在短時間內買一個細單位300～500萬內自住，唔駛再租屋，請問我嘅投資方向啱嗎？

應該怎麼樣更好呢？ 麻煩老師解答，萬分感謝！

龔成老師︰

我想先要你明白少少財富增值概念，我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

所以，只要係優質的股票，我地一定會長線持有，而唔會半路中途去沽貨。除非成個大市好狂熱(現在未算)，或者個企業長線質素轉壞，我地先會賣出。

回到你本身情況，首先，你有一個明確目標，就係短時間內購買物業自住。同時間，你現時在待業狀態，故中短期內對現金需求不少。

以你40歲計，應以增值為主。你持有股票，大致上係可以。

明源雲（0909）有潛力。

佢主要係中國房地產開發商及房地產鏈參與者，提供企業級ERP解決方案及SaaS產品。

睇翻佢之前的資料，佢係中國房地產開發商的第一大軟件解決方案供應商，市佔率有約2成。係呢個市場裡面，按收入計，亦為ERP解決方案及SaaS產品的最大提供商。

其實，佢的角色可以話中國房地產行業的數字化轉型，為房地產開發商及其他參與者，開發了一套行業垂直的ERP解決方案及SaaS產品，以助其管理廣泛的業務運營。

包括銷售及營銷、採購、成本管理、項目管理、預算以及房地產資產管理，佢的SaaS產品包括雲客、雲鏈、雲採購及雲空間。

業務雖然有增長力，但你買入價唔平。現時回落近半，但初步分析，依然都係屬於貴水平。始終市場現時對這類股有好大期望，此類股票，波動性較大。

此股可持有，但由於你持股比重有點高，我建議你每有反彈，沽出部份，去平衡風險。

另外，華潤啤酒（0291）都有質素，但佢佔你組合近半，太過高。緊記，個別股票比重不要超過組合15%，否則會出現過度集中性風險。所以可考慮賣出部分。

你可以用沽出部分以上2隻股票資金，再加上30-50萬，去分注慢慢買入以下優質股，並長線持有。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845），但就要明白波動性比上述會高左，同時風險大左，你要自己平衡。

若你投資知識不高，可先集中在平穩增長類股，至於潛力股，只宜小小注。到你提高了投資知識，才慢慢增加翻潛力股比例。

餘下資金，主要係用作你置業基金。再加上，你還未有工作，最少都要留有半年基本生活開支的應急錢，作為後援。

若將來股市有明顯調整，你也可以考慮用部份資金來入市。這樣安排這200萬，相信會較有彈性之餘，當你都會較有保障。

至於置業方面，你係用來自住。緊記要堅守一個準則，就係「供得起」。

現時香港樓市算係合理區頂，你可以慢慢物悉目標，到有較理想價錢，又有信心可以供得到，就可以考慮出手。

------------------------------------------------

Q21437：

你好 龔sir。睇左你fb一段時間 先買入必瘦站 會繼續持有 多謝你既分享。

另外亦留意到你之前講既粵海投資 本身想入手 但最近參股嘉誠環保工程 但網上不多關於嘉誠環保工程資料。

消息公報後 股價有所下跌 請問你對於呢個公司行動有咩睇法?

會否影響你本身對呢個股票既評價呢? 謝謝

龔成老師︰

必瘦站（1830）長遠有發展，這股有長線投資價值。

但現價已經係偏貴，有貨可持有，就唔好加注住。

粵海(0270)宣布收購嘉誠環保工程註冊股本總額合共 53%的股權，在該收購完成後，嘉誠環保工程將成為其非全資附屬公司。

嘉誠環保工程是一家在中國成立的有限責任公司，其於 2005 年成立，主要從事環境工程工作，並為工程相關工程提供投資、設計、建造、運營、諮詢、設備研發和製造服務。

嘉誠環保於中國河北省及河南省的市政給排水工作，相信集團想進一步提升在華北地區的市場份額和品牌影響力，初步睇係正面。

至於中短期股價走勢，未必一定跟企業質素和發展潛力有關。我地分析時，一定要集中用長線質素去做判斷。

現價計，算是合理水平，可分注入貨。

------------------------------------------------

Q21438：

Hello 龔Sir, 最近1638佳兆業跌了很多，值得入嗎？

另外，1503招商局有成8厘息，係咪值得入當收息？ thanks!

龔成老師︰

佳兆業集團（1638）主要從事物業發展、物業投資、物業管理、酒店及餐飲業務、戲院、百貨店及文化中心業務，以及水路客貨運業務等。

業務發展不差，不過盈利就較為波動。另外，由於負債較高，因此都有風險。現價合理的，但唔建議太大注。

招商局商業房託（1503）佢持有及投資中國相關的物業組合，物業組合有深圳市蛇口的多項物業，包括寫字樓綜合物業新時代廣場、數碼大廈、科技大廈及科技大廈二期，以及購物中心物業花園城。

物業有質素，不過較受經濟週期因素影響，租金會有少少波動，令到這股的股價較為波動。現價合理，有投資收息價值，不過唔建議太過集中在這房託。

------------------------------------------------

Q21439：

你好～～老師，我有少少問題希望你幫到我

1）想問一下康希諾6185 我400（200股）同260（200股）都有貨，呢兩日我見升返唔少，今日心大心細諗緊放唔放～～我唔係好識分析呢間公司前景好唔好？

2）我買咗中國電動車2845，138元400股～～有見過你講過買呢一個股票都不錯，我要唔要而家低價再入多少少

3）快手362 有200股，241元又入了200股

4）藥明康德189元 入了200股

我有啲股票分開兩次入，我應該取一個中間價，等升返上去放晒佢，定係低價入嗰啲，覺得升到一個價位可以先放咗佢，高價位嗰啲就照放喺度？

謝謝

龔成老師︰

你好著重個帳面數，其實你放貴個1手先，定平個1手先，係無實質分別。只係心理上，覺得放平個1手，你就賺左。貴個手就放係度，當無事，這種想法好錯。

你要明白一個概念，我地投資唔係賺差價。而係想將一些長遠只會貶值的現金，換成會增長的優質資產(如優質股、物業等)，並長線持有。

因此我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

1) 康希諾生物（6185）主要於中國從事研發疫苗產品，疫苗產品線如下：3種臨近商業化在研疫苗：

包括腦膜炎球菌結合疫苗（ＭＣＶ）組合（四價ＭＣＶ及兩價ＭＣＶＩ，均為集團核心產品）及Ａｄ５－ＥＢＯＶ（其由集團與軍事醫學科學院生物工程研究所共同研發，為中國第一種獲批淮作應急使用及國家儲備的埃博拉病毒疫苗）。

另外，有6種處於臨床試驗或臨床試驗申請階段的在研疫苗；包括針對白喉、破傷風及百日咳的ＤＴｃｐ疫苗組
合（嬰幼兒用在研ＤＴｃｐ、在研ＤＴｃｐ加強疫苗、青少年及成人用在研Ｔｄｃｐ）、肺炎球菌疫苗等。

業務有潛力，但估值好難，市場對佢有好大期望，股價炒得幾勁，反而風險高。

這類股，是有潛力。但因為佢無盈利基礎，市場都只是「估估下」。

如果持有係可以，但一定只能小注。若2手佔組合比重都唔少，建議沽出1手，去平衡個風險。

2) 中國因為能源問題，長遠一定要發展電動車，這是大方向，故此股有一定投資價值。

現價依然係合理區頂區，你已有一定貨係手，唔建議你加注。除非你資金好充裕，就可以而一刻加小小注。

3) 快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。現貨可持有，但你預短期股仍會十分波動。

4) 藥明康德（2359）都有d質素。

佢主要從事藥物研發平台業務。係藥物開發過程，主要分為藥物發現、臨床前開發、臨床研究及商業化生產共四個階段。

睇翻佢的資料，佢的服務對應各個階段，可分為以下四個分部：（１）中國區實驗室服務（２）合約生產組織（３）美國區實驗室服務（４）臨床研究服務。

佢的客戶包括美國、中國、歐洲及全球其他地區的製藥公司及及生物技術公司。

業務其實不差的，過往的生意與盈利增長理想。

當中最大的風險，就是市場估值，現時的市盈率過百倍，就算有增長力，都計都貴，股價上落一定會好大。市場現時對佢前景有好大期望，但如果增長力比市場略減，股價都會調整。

只可以話這企業有增長，同時有風險。現貨可持有，但唔好加注了。

------------------------------------------------

Q21440：

阿sir, 我尋日入3690美團，今日跌

0285 同 2382 應該幾時入呀

剛剛$31入咗3319，係咪都高呀？

龔成老師：

你唔需太著重短期股價走勢，最重要是長期的企業發展。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂至略貴，不過，一定不能大注。小小注，是較好的做法。

只要你持貨不過多，都可持有的。

至於比亞迪電子（0285）去翻$40會好少少。

舜宇光學科技（2382）有一定的質素，但現價合理區頂至略貴。

過往手機市場高增長，令佢鏡頭業務受惠不少，但近年手機增速開始減慢，你預佢增長力會變得較平穏。不過，手機市場又開始向好。

在長遠，無論是手機鏡頭，又或是各種鏡頭方面的應用，只會愈來愈廣泛，前景正面，不過，中短期可能會有少少波動。

這股可以長線投資，分注或月供較好。

雅生活服務（3319）合理價，有質素，可長線。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21381-Q21400）

Q21381：

龔Sir 你好！ 請問如何計算企業價值呢？

700 騰訊為例，用NAV (778M/9.6bn no. of share)去睇，2020 佢只值八十幾蚊人仔，化返做HKD 都係一百蚊左右。

而家股價$600, 係咪當中包括左好多市場情緒同對未來憧憬既估算？想請教你通常點去量化。 感謝

龔成老師︰

你上述所講的價值，只是企業的「資產價值」，這是衡量企業平貴的其中一個方向，但絕對不是唯一的方向，同時，並不是所有企業都適用的。

在些企業，其資產價值與盈利能力、長遠發展未必有太大的關係，市場會較著重企業的長遠發展力，多於擁有多少資產。

簡單來說，有些資產有一定的市場價值，有些資產無太大的市場價值。有些企業長遠的發展及盈利與資產有一定的相關性，有些企業則無太大相關性，有基本的資產後，長遠的發展較受大環境影響，而不是有多少資產。

騰訊(0700)偏向係潛力股類，市場會著重將來，而不單是過去資產，同時會著重其業務價值。

至於點去計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21382：

老師現年48歲，月入4萬8，想每月投資2萬

有一層做咗400萬按揭嘅樓，已租出，租金可cover 每月銀行還款。

有現金50萬
冇股票（因曾輸過）

有保險基金單50萬
想5年後移民，想喺呢幾年做進取嘅投資！睇咗你嘅資料，但遲遲未決定到點入手！

銀行職只又不時想我買保險產品！
請問有咩建議？

龔成老師︰

我地進行理財，應說建立一個平衡的組合，你現時有物業、保險基金、現金，但就缺少了股票，因此應該增加翻股票。

你過往投資失利，相信是由於未了解股票最基本原理，只要你往後明白，投資股票就是持有優質企業，長線持有等企業成長，就得。同時，要建立平衡組合，不是賺差價。

另外，你話「想5年後移民，想喺呢幾年做進取嘅投資」，要留意，財不入急門，加上5年時間不算長，反而不能過度進取。

以你現時情況，我建議你以「平穏增長股」 去創造一個增值平台，在這5年為你的財富增值。

現在你每月先用5成儲蓄，即$10000做月供。其餘先儲起，用一邊月供一邊儲蓄的策略。

月供方面，你可以選擇投資這些平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

大市現處於合理水平，那50萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

到你將要移民的一年前，再慢慢沽出手上持股套現，就可以。但唔好到要走個一刻才一次過沽貨，咁樣會令股價波動性風險大大提高。

至於"保險"只係理財中防守部份，買足夠保障就可以，增值可以留比優質資產(如優質股、物業等)去做，個效率會較好。

你現時那份保險基金單，可以睇翻基金的投資策略，所投資的資產類別、投資策略、風險程度、市場、以及過往的表現(可以睇佢過往5-10年，只回報係比主要投資市場高，就可以考慮繼續投資)。

------------------------------------------------

Q21383：

Hello 龔sir!我現有大概HKD3百萬現金及數百萬股票。

一個人租樓住（租每月HKD20K），無小朋友，考慮3 年內退休，其實應唔應該再考慮買樓自住（死後層樓冇用）？

如買樓就無晒現金同要賣股票了(50 歲,就退休好難做按揭)，變咗3年後唔夠錢退休。。。

繼續租又好似好唔安穩因為租金會一路升，同業主可能會收樓...矛盾中 (退咗休會想讀吓書，所以都有不少洗費)

龔成老師：

以你的情況，租樓會較好，第一，你現時做按揭未必做到，因此去唔翻現在的生活質素，第二，你無後人，因此投資物業的誘因會減少左。第三，買樓後會用盡資金，反而風險提高左。

租樓雖然較好，但坦白講，每月$2萬的租金，長遠都會對你有一定的生活壓力，所以，可能要轉一些較平租的地方。

如果利用$300萬，投資不同的工具，收息股、低風險基金、年金、債券等，建立一個組合，如果能平均有5%現金流回報，$300萬即是每月收息$12500，都算是可以幫你提高現金流。

當然，你到時可以再利用手頭上的股票，進行配置，調整一下，如果持有一些現金流強的類別，就可以增加你到時的現金流。

你要思考一下長期的收入及支出情況，是否要調整生活質素，又或要日後想方法增加收入，或略為延遲退休。

------------------------------------------------

Q21384：

我大學嗰時讀嘅Investment，好似無乜用。

龔成老師：

大學課程，其實我都有讀過「財務系」，坦白講，學校教的是學術，我會認為有基本作用，但睇巴菲特相關書，以及年報，會有用得多。

------------------------------------------------

Q21385：

我想問阿sir，睇youtube聽講你以前未價值投資法時，試過儲一筆錢又蝕左佢，儲一筆又蝕左。

其實，因為我剛剛炒衍生工具蝕光了投資户口的錢，一陣約見了心理醫生了，想問下你當年總共蝕左幾多錢？

同埋蝕左幾多次，可以分享下你的心路歷程嗎？

我蝕左本金十萬，還有14萬儲起在家人到，以前都試過買牛熊證蝕曬錢，所以無將所有錢拿去投資

因為以前蝕曬錢，所以好幾年吾再投資，今年2月入返市，你都知呢排跌市，一買就蝕，實在無法子，又買返衍生工具，結果賺13萬，但後來又蝕返，想追又一直蝕，最後 total lose

睇醫生是因為炒牛熊證心理承受吾住了，需要求醫，好後悔買返衍生工具，但跌市蝕自己又控制吾住

龔成老師：

我20年前，都是短炒者，投機，玩幾年，輸足幾年，當年未算好有錢，相信蝕$10萬左右（其實唔記得），但當年已是全部身價，應該話輸左幾次身家。

之後我明白，衍生工具原本發行商食水好深，散戶只有做水魚，所以，我決定以為唔玩衍生工具。之後只做優質股，長線投資，就開始不斷賺錢。

我之後做銀行同證券行，見大部分輸錢的客，都是偏向短炒、玩衍生工具的！

當然，你問我有無人贏錢，是有的。但就我觀察，長線投資贏錢的人，比短炒的較多。

你這類人，我在過往做銀行時見唔少，因為玩衍生工具輸身家，所以，點解我現時，不斷強調再強調，不要短炒。要買優質股長線持有！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特都是反對短炒的，佢都唔用技術分析。

因此，我相信長線投資，是真正助我地贏錢的方法。

我建議你倍止所有衍生工具投資，你現時同賭錢無分別！

之後，慢慢儲現金，月供一些穩健的股票，或ETF，例如盈富（2800）、高息基金（3110），我相信是適合你的。

------------------------------------------------

Q21386：

龔成老師你好,多謝您一直鼓勵我地要投資理財,同時經常比正面的信念我地,實在感恩, 自從留意你FACEBOOK後

本人33, 由2019年開始投資,開始時都有小小升調,但最近大部份買入的股票都回落,現時股票價值同入的資金差不多,之前跣時用了大部份資金,現時手持現金好小,

以下是我的股票組合,希望你能給予意見應該如何調配, 感恩

2800 @ 25.82 4000股
3067 @18.52 4700股
1038 @53.72 1600股
0066 @43.95 1706股
1177 @7.21 2800 股

3033 @ 8.005 1600 股
1810 @26.65 400 股
3188 @52.6 200 股
1038/3067 虧得最多,是否需要減持,謝謝

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

股票中短期上落好正常的，不用太過理會，睇「企業長期質素」就得。

現時你的組合，都是有質素的，可以持有。但我見比例上，潛力股類別開始有點多，你要注意翻，因為這類股的風險較高，股價上落會較大，因此在比例上不能太過多。

長建（1038）是不錯的企業，有一定規模，資產亦有一定質素，並擁有相當充足的現金，而過往的發展亦很理想，能平穩發展及再投資的回報亦不算差，而開拓新業務亦能平衡當中的風險回報，整體有相當的質素。不過，規模大，國家保護資產，都令這企業增長力有所減弱。

長建有不少歐洲及英國業務，脫歐因素、歐洲經濟較弱難免對其造成影響，反而，脫歐情況明朗化會更有利企業，可說是最壞情況已過，之後將會慢慢向好。

其實長建近年仍不斷進行投資，但由於歐洲業務較弱，令股價並沒有顯現，但只要歐洲情況慢慢好轉，當中的資產價值就會更有效反映。

不過，歐洲的經濟，總不能用「強」去形容，所以長建並不是高增長類，只是最弱時期相信已過，往後會平穩向上。但回勇之路，仍然較長。

另外，由於企業已有一定規模，加上作風穩健，發展的速度不會太快，但平穩增長則無問題，手持的現金相信會逐漸收購其他海外業務。

是收息及平穩增長類，現價是合理的。你持有就得。

至於安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你一定要睇長線，不要太著重短期股價，同時由於現價仍唔平，所以如想加注，一定要慢慢分注。

最後，如果你現時持有現金比例太多，就不要投資住，儲下現金先。

------------------------------------------------

Q21387：

龔成, 您好! 手上持有渣打2888 兩年 - 500 股 @HK$54唔係好多, 見派息不好, 又沒甚麼特別消息.......是否應該放晒佢呢? 謝謝 (私人回覆OK)

龔成老師：

渣打集團（2888）質素只是一般。

雖然未到劣質，但質素不高，但本地銀行股中，賺錢能力算是較弱。加上銀行業近年的環境不及過往，賺錢能力不及以前咁好，相信佢之後，都只是好基本增長，不要對股價有太多期望。

投資價值只是一般，我會建議考慮其他更有質素的銀行股仲好。

因此，你可以考慮部分或全部，轉其他。

------------------------------------------------

Q21388：

您好！現時手上有800股1928(金沙)於$32時買入，現考慮趁行業復甦前增持。

不過看過它2020年剛出爐的年報，它的年末現金由2019年的24億美金，大跌至8.6億；這個數字比起它的流動負責14.1億還要少。

一直以來您都看好澳門博彩股，但面對現時的情況，自己對它變得有所保留，甚至企業本身「捱唔住」。請問您認為這個想法是否恰當？

龔成老師：

上述的情況，會令風險度略有提高，因此會少少扣分，但未至於對佢有倒閉影響。

第一，佢規模好大，品牌、資產、現金流強，要在市場進行集資，好易。

第二，佢負債比率未算好高，要再問銀行借貸，有好多空間。

第三，佢持有的酒店等資產好有價值，如果真的經營環境差，要賣出套現救企業，絕對可以。

第四，佢本身現金流好強，只要澳門好翻少少，佢都有一定的現金流，不斷有資金翻。因此，唔需要太過擔心。

------------------------------------------------

Q21389：

龔sir你好。Follow左你好耐，亦上過你堂，好遺憾無早啲認識你。

之前有買1211，但因為唔夠耐性錯過左佢爆升時間，之後16左右買吉利升左一倍都無放。

因為唔想再錯過，而家佢跌到得$20左右，請問你覺得吉利前景如何？值得再長揸嗎？謝謝

龔成老師︰

記住，我地投資優質股，一定會係長線。因為賣出股票最大的風險，就是買唔翻。

不少人會以為「若果現在賣出 到時再以低價買入」，中間可以賺到個波幅。

但「到時再以低價買入」？真的一定會預期中發生嗎？？？

就好似我經常說，700多年不斷上升，388升100倍。如果我地升少少就沽貨，而唔係用質素，去決定是否持有，我地就無可能賺到近100倍回報。。

所以，你現時長線持有吉利(0175)係正確。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂位，股價波動，現貨可長線。如果現價入貨，小注都得。

------------------------------------------------

Q21390：

老師你好，一直遵從你的指導每月將資金一半用來月供，另一半用來儲現金等大跌時入貨。

由於不知道等到何時大市才大跌，可能一等就半年甚至一年或更長時間，就覺得把這筆現金放在銀行的回報率太低了。

請問老師有沒有推薦的現金替代品，可以令這筆現金可以比放在銀行有更高的回報？謝謝！

龔成老師︰

無錯，我地唔會知道下一個大跌市，係何會出現，可能係1,2年後，但同時間可能就是下一天。

因此，我地最理想係持有現金去等待，因為現金流動性最高。

若你將這筆資金，用來買了其他理財產品，要贖回可能需要些時間，甚至會被收取一定的提早贖回費用。

而用來先買部份較穏定的股票(如收息股)，我都唔建議，因為再穏定的股票都有波動性，到時會跟隨大市下跌，以你可投入資金減少。

所以，我建議你都係持有現金最好，最多可以將部份用作短期定期。我地投資唔好睇太中短期，要用整個組合的長線發展機會，去做考慮，因此用現金等待，會係較理想的做法。

------------------------------------------------

Q21391：

龔Sir您好，我夫妻倆在澳門從事教育工作

對於投資沒有太多觀念之前都是拿錢給長輩在國內買樓買車位。

1. 去年疫情開始後股票大跌後，開始學買股票，我該如何學起？

2. 該從你的哪本書看起？

3. 之前做過一些短炒確實賺到錢，但是現在回頭看若當時沒賣掉那些股票的話現在賺更多，現在決心要開始好好學理財放長線。

我現在這組合可以嗎？會不會太保守還是太高風險？

4. 我該繼續專心供一隻還是先分散幾隻建立好組合後再慢慢提高持有比例？

夫妻倆32歲 未有子女
夫妻倆年收入：約110萬hk

現有流動現金約: 20萬
儲蓄險：40萬
(今年剛繳完2025年後開始拿利息)

國內放租樓盤：廣州2樓、中山1樓、中山3車位
(租金拿來當作給長輩的家用，全部以交清貸款)

固定支出：
在澳租樓(11000HK)
兩人保險每年約:10萬hk
年收入至少15~20%捐給慈善機構
無負債

之前
每月供 5000
00066 港鐵 或 00388 港交所

現在打算每月拿8000出來月供股票

00270粵海 或00066 港鐵 $2000 2選1
00087 太古股份公司Ｂ或 港交所 $3000 2選1
9988 阿里巴巴、 00175 吉利汽車、01211 比亞迪$3000 3選1

現有股票 組合總值約16萬HK。組合總表現： 約+7%
分配如下

00066 港鐵@45.172 18.9%
00388 港交所@406.930 19.4%
00694 北京首都機場@5.240 7.28%
00883 中國海洋石油$7.648 10.02%
01398 工商銀行@5.240 3.32%

02588 中銀航空租賃@60.9 8.67%
02800 盈富@24.2 17.6%
00270粵海投資@12.240 2.4%
01810 小米集團 @28.109 12.33%

龔成老師︰

1) 就初學者而言，你要加強吸收知識，多閱讀理財類別的工具書，以及多接觸財經新聞，而進修相關課程亦是重要的知識來源。

另一問題是價格，初學者未能捕捉股價的高低，所以，策略上宜用分注買入的方法，將一注資金分成多注，然後在不同的價位分別買入，這樣就可避免一次過在高位買入的風險。

2) 你可以先睇我寫架"80後百萬富翁"、"財務自由行"和"股票勝經"，都適合初學者。之後，才看我其餘9本書。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

3) 正確，優質股的確係長線持有，才會有最理想的增值效果。

我地做財富增值，除左講增值能力外，也要注重成個組合的平衡性，當中要包含不同的優質資產(如物業、優質股等)。

你現時組合，明顯係偏重左係物業類，未來要增加優質股的投入，去令組合平衡翻。

而"保險"只係理財中防守部份，買足夠保障就可以，增值可以留比優質資產(如優質股、物業等)去做。現時供完的保險可以不變，但未來唔好投放太多資金在儲蓄類保險產品。

我先講你現時持股組合，北京首都機場股份（0694）、中銀航空租賃（2588）和中海油(0883)本身都有質素的，但只屬中等，不宜持有太多，暫時唔好再加注。

另外，我地組合唔好太偏重係個別企業或者行T%，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

你現時有個別股票，港鐵(0066)和港交所(0388)係超過這個比重，但由於佢地好優質，所以唔需要沽出，只要暫時不要加注，讓新資金慢慢調節就可以。

但盈富(2800)係一個包含55間不同行業的股票組合，故不受15%所限。

新月供組合方面，你可以用粵海(0270)，因港鐵(0066)已有一定貨。再加港交所(0388)，而餘下3隻，阿里巴巴(9988)會係3隻中波動性較低，如果你想進取D，可選另外2隻。

但現時比亞迪(1211)偏貴，不宜做月供。你可以用吉利(0175)或GX中國電車（2845）代替。2845這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

另外，我建議你加入一隻盈富(2800)，用佢做主力，可以令你個組合平衡性高D。

你現時用於月供金額，相對你們收入比例唔算高。以你年紀，應盡力做好財富增值，盡可能將閒錢，都放在投資計劃上會較好。

現時大市只在合理區，每月儲蓄宜先用一半去做月供。餘下一半和20萬就等大跌市機會，才入市。

4) 我地唔好成個組合，只集中係1,2隻股票身上。(當然，盈富除外。)

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21392：

老師，我今年32歲，有兩個小朋友，家庭每月收入30K，持有下列股份。

想問個倉比例合唔合適？有無邊隻唔應該再等？要唔要減持？

如果想睇你啲書，你推薦先睇邊本？
多謝！

9988阿里巴巴248 @300
9618京東集團327 @200
3888金山軟件60 @1000
0285比亞迪電子52.6 @1000
0327百富環球8.2 @4000

0880澳博控股9.8 @5000
3988中國銀行2.9 @120000
0914海螺水泥50 @2000
1530三生制藥7.55 @5000

龔成老師︰

我地係創建一個財富組合時，最重要係有優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

現時你持股中，三生製藥（1530）和百富環球（0327）質素算係中等，不宜持有太多。

安徽海螺（0914）佔組合比例開始多，不宜再加注。

另外，我地個組合唔係可太偏重於個別行業或企業，相同行業不可佔組合多於3成，而單一企業不要高過15%。

你現時中行(3988)明顯係佔比過重，而且此股主要用來收下息，唔會有太高增長力。以你32歲計﹐此股太保守，你應先做好增值部份。

因此，你可以慢慢將此股，換碼至其他較有增長力的優質股。

其餘股票都有質素，長線持有就可以。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21393：

龔Sir,我啲股票比較高位買入，家陣坐晒艇，想你幫忙睇睇

9988，均價285
1810，均價29.27
1833，均價116.7
1024，1手價291（250入見穿左240即斬，導致均價升到呢個位)

除左快手之前想短炒（但依家都變長揸），其他一直都打算長揸或再加注。

龔成老師︰

現時你全部股票都在虧損狀態，好明顯你投資方法上，出現左核心性的問題。

首先，記住我地投資係長線持有優質股，而唔係做短炒，去賺差價。

見你不少股票都是較高位買入，相信你較易受市場氣氛影響，同時你由於未有企業估值能力，因此在貴的價位買位。

這些股票雖然帳面值係虧損，但有質素，你可以守。但若個別股票，係佔組合比重好多，就要沽出部份去平衡風險。

建議你在再投資前，先學好正確的財富增值理念，和投資相關知識。你可以睇我寫架"80後百萬富翁"、"財務自由行"和"股票勝經"，都適合你這類初學者。

就算學好，在經驗較淺時期，我都建議你先用月供，或分注的投資策略。等你真正有企業估值能力後，先一手手買，會較好。

------------------------------------------------

Q21394：

龔sir 我而家20歲 Year2

兩年前喺Facebook見到你，努力儲咗兩年錢，今年開始Value Investing。

目前持倉
$70.45 一手領展
$44 一手港鐵
$26.5 一手2388中銀
$7.43 一手置富
$5.41 一手工商銀行

1. 想請問可唔可以比少少意見我嘅portfolio

2.同埋港鐵公佈業務去年虧蝕。現價會否太貴？ 我需要換股嗎？

龔成老師︰

1) 你現時持有股票，都係值得長線持有。

但我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，以你現年20歲計，你組合持股有少少保守。置富(0778)和工行(1398)主要係用來收息，增長力麻麻。你現時應先著力增值部份，故這類收息股就唔係咁適合你。現貨可持有，但不要加注了。

將來，你可以加入一些潛力股，去提升組合增長力。例如中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

但由於潛力股有一定波動性，你投資經驗較淺，暫時不宜持有太多，大約3成好了。到你累積到較多經驗，才慢慢將比重提升至5成。

同時，現時大市只在合理區，資金唔好盡用。最好留有部份，等大跌市出現時，可以用來掃貨。

2) 我地去分析一間企業時，要用「長線」質素和發展去考量，唔係只係集中係1,2年數字。

上年由於疫情關係，對不少企業都造成嚴重的負面影響，港鐵(0066)也不能幸免。

但上年度佢虧損的主要原因，係因為物業重估數字，這只是一個會計上的數字。如果扣除這個因素，其實佢在營運上，是有錢賺的。

但睇翻佢長線，有質素。佢是全港唯一的鐵路營運商，加上政府會比佢地產方面的優勢。長遠正面。

雖然近年有不利因素，影響了中短期盈利，雖然會扣分，但最核心的本質不變。

睇翻資料，港鐵過往正常年份，一年可以賺$160億，就算扣除物業重估，都有過百億，當中包括了鐵路經營部分，以及物業的發展、物業的租金收入。基本上，每年都過百億的。

物業發展部分，長線正面，收租部分，無問題。

因此，長遠發展仍是正面的，可長線持有。現價大約在合理區中上部，未算貴。但由於你有貨係手，如果想加注，要等佢回多1成以上，才出手會較好。

------------------------------------------------

Q21395：

老師你好， 因為不經意 在facebook 發現你， follow你 一段時間也有購買你的書籍， 對我不善理財的人， 實在獲益不少！

因為最近工作 非常艱苦 應該很快失業， 我先生已經因為身體問題，去年年尾已經失業！

所以希望用手上的現金資本，向你請教適合的投資方向。

以下是我的 財務背景， 請你多多指教!

本人50歲 ，目前仍然有Part-time工作， 但因為全球因疫情影響經濟，公司業績非常差。我應該估計會在兩個月內失業, 基於經濟問題及身體狀況，應該再有工作機會。

丈夫56歲 因為身體健康問題，2020年尾被迫退休

沒有子女

目前有資產如下:

1. 4個物業(1個自住，2個放租私樓及1個工厦放租)
所有物業合共市值 HK$2300萬

4個物業合共尚欠銀行貸款 HK$750萬
租金扣除每個月銀行供款差餉管理費及物業稅 (包括自住物業在內)剩餘HK$3600.00

2. 已經投資基金 (高風險 )$80萬
每月派息HK$3600.00

3.股票
過往20年投資股票,已經很有耐性等待，持有股票回報欠佳,種種原因，輸了很多錢 ！

因為近1年看 你facebook 和你的書本 所以決定賣了已經持有十多年 的股票， 希望重新再計劃好 ，才重新買股票作遠投資 。

目前手上只持有:
2638*5000
1038*1000
2800*1000

4.現金:HK$200萬
因為手上持有四個物業 ，仍然有銀行掛鉤存款，大概1.3%
即每月利息合共有HK$1500元

希望 保留100萬現金作為日常全活備用金

5. 人壽及各項醫療保險(所有共2人):HK$10,000.00

6.月供高風險基金: HK$5000*10年(2020尾開始供)

7.日常家庭支出:HK$20,000.00( 不包括保險和月供股票及基金)

8.投資目標:
希望利用手上200萬現金，投資股票，作為未來十年退休日常生活費。

若是中途此現金投資回報不夠支付10年生活開支， 五年後可以，減持基金換取現金 作生活費 或提取 保單內的 儲蓄 價值 昨日常生活費。

估計10後,我先生可以提取mpf大約有HK$150萬( 因為目前有接近100萬) ,希望盡量減慢賣物業資產的日期， 以作日後長遠生活開支。

9. 由現在至未來十年投資計劃-銀行月供基金:

月供費用HK$20000.00

目標 計劃月供股票分配組合內容:
1.2800盈富*$6000(30%)
2.2638港燈*$4000(20%)
3.1038 長江基建*$4000(20%)或1113長實， 請提供意見 二選一 ，那一隻較可取？
4.3140 領航標普500*$3000(15%)
4.3067 安碩科技*$3000(15%)

計劃年期: 3-5年(最少36月=HK$720,000.00)

拜託你提供意見，直接評價，我們目前的財務組合 是否恰當作為長遠退休計劃安排？

感謝你經常分享你的經驗和意見
期待你的回覆

龔成老師︰

以你和你先生的情況，由於未來就業收入不確定性較高，加上你們都較接近退休之齡，投資策略唔可以太進取。

你現時物業算係有正現金流，可持有。但考慮到若不幸有部份物業不能出租，會出現額外開支。

另外，你在整個財富組合中，太過集中物業類資產，因此在之後的財富配置，不要再增加物業類的比例，而之後亦未必適合投資太多地產相關類的股票。

係你成個財富配置上面，我地會保守少少。你係投資前，先儲下一筆最少等同半年開支的應急錢，會較理想。

而所講的高風險基金，雖然以派息率計，尚算可以。但你要了解這部份回報是否保證，而當中又有什麼風險，背後是投資什麼股票、債券或工具，你要了解清楚。

例如債券，佢是否投資的都是A級債券。唔好投資一些高收益債券，其實這些是一些評級不高的垃圾債券，風險不少。

至於現有持股可以，但佔整個財富組合比重太少。現時太偏重左係物業類，未來你要加大翻股票部份，令成個組合健康。

月供組合方面，盈富(2800)和港燈(2638)係可以，而長建(1038)和長實(1113)，我會建議你用1038，佢主要係投資一些公用事業，相對較穏陣，而且派息都理想。

而領航標普(3140)和安碩科技(3067)就波動性較高，以你現時情況，我唔係太建議你用。同時3140將會退市。

你可以在以下的「平穩增值股」+「收息股」去選擇。「平穩增值股」有平穏增長力，加若干股息。而「收息股」則主要係收息，無乜增長力，但波動性較低，會較穏陣。

但緊記，隨著年齡增加，慢慢要增加收息股的比例，去減少波動性風險。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

現時大市只在合理區，資金唔好盡用。最好留有部份，等大跌市出現時，可以用來掃貨。

若然你在月供中途不幸失業，可以先停一停月供都無問題。所有投資的大前題，都係用閒錢。如果資金係用於日常生活或一些短期的必需性開支，就不要動用。要先確保好基本生活，才可以進一步做財富增值。

------------------------------------------------

Q21396：

龔成老師，本人27歲，文職工作，月入約$17000，現在想讀兼讀制大學（外國大學提供的課程，讀商業和英文的範疇，但在香港讀，有資歷架構QFlevel5,今年9月開學，學費共$12萬，讀兩年）

本人現持六萬現金，諗住半工讀。想讀大學的主要原因是增值自己英文的程度，同埋希望有張沙紙多點自信有多點保障。

但又擔心冇咩錢投資，因為要交學費同埋應該會少時間學投資（本人初學，只投資過債券），加上，27歲才開始讀又好似好遲又唔知讀唔讀得黎。

好迷惘，想請教老師意見，會否覺得我應該全副心機集中儲錢同學習財務知識/還是覺得值得一試去讀？先讀一個學期試下？

大學學歷是否很重要？
謝謝！

龔成老師︰

其實學習係無分年紀，但最重要係，這個學習所得到的，是否對你長線發展，係有實際的正面影響。

例如你現時工作的行業，要升職加薪係好需要一紙較高學歷的證書。或者課程當中某些知識，對你將來發展有好大幫助，你都可以考慮進修。

相反，如果你係純粹感覺有張紙會增加安全感，或者你是抱著"人有我有"心態"，我就有保留。你要先認清楚，這個大學課程是實質上，還是心理上幫助你。

另外，如果想增值英文，其實有好多方法，未必一定要上課程。而學習財務知識和報課程係無衝突，你係可以2者並行。

你自已先認清個情況，再決定這些錢，是進修，還是投資。

若然投資，你應該買入一些有質素的優質股，把握在年輕時，累積一筆較理想財富。債券增長力有限，不太建議你用。

------------------------------------------------

Q21397：

你好，我是新讀者，看見板面內容後，真係增長好多股票知識。謝謝你的無施分享。

本人43歲，有2個小朋友，同丈夫供緊層樓。之前貪快，已經係0175，3800，0788虧錢離場。

現手上有貨
2138 ：6000股
2333 ：1000股
0788 ：20000股 （1.27入）
3333 ：2000股 (22.3入）

請問這個股票組合適合嗎？想放棄3333 改入1516，3988適合嗎？

或是直接入你提議嘅3067（安碩恒生科技）好？
感謝你的意見。

龔成老師︰

記住，不要用自己的買入價作為何時沽出的指標。坊間經常用買入價作為何時沽出的標指，這是極度錯誤的。

沽出是基於這股已偏貴，又或沒有前景，質素有問題，而絕非由買入價決定。

因此，若你分析該企業的前景一般，才可沽出。

你已沽出的3隻股票，除了保利協鑫能源(3800)質素一般，其餘吉利(0175)和中國鐵塔（0788）都係有質素，你係應該長線持有。

現有持股方面，香港醫思醫療集團（2138）都有質素的。不過業務中短期會有少少波動，除非你現時現金好充裕，否則我建議你沽出部份，去平衡一下你的風險。

至於，中國恒大（3333）業務本身不算差，但中央有時會出打擊樓市政策，加上佢本身負債極高（這是最大問題，風險太高），相信會對佢有一定的影響。

你預佢中短期都會波動，你現時小注持有，都算勉強可以，但都要明白風險。

融創服務（1516）有質素的，主要在中國提供物業管理服務及增值服務。

財務數據唔差，生意與盈利增長快，現金流強，整體正面，這股有長線投資價值。不過，現價貴，如投資，真的小注好了。

而中行(3988)而價合理，但佢主要係用來收息，唔會有太高增長力。以你年紀，這類股票只宜小注。

安碩恒生科技(3067)都有質素，佢係追蹤包含恆生科技股指數，有投資價值。

但留意你上述股票(除了中行3988)，普遍波動性風險都係較高。我地創造一個財富增值組合時，最重要係平衡性，唔可以偏些係一些波動性高股票。

以你43歲，都可以投資安碩恒生科技(3067)這類潛力股。但若果你投資經驗不多，或者較年長，比例就不宜太多。

同時組合上，應加入一些平穏增長股，並以之作為主力。這類股票波動性無咁高，但有平穏增長能，可以令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

------------------------------------------------

Q21398：

Hi 老師，你好，想請教你，買咗以下股票，可以比一些意見嗎？

同睇到你post 又想月供，我39歲，月糧$19,000每月可儲$2000,如果月供可揀什麼？謝謝

778
$9.09 @2000
$8.92 @3000

11
$177.9 @400

1928
$44.55 @1200
$42.5 @800

9988
$285 ,$254.4 各1@ 100

1833
$117 @100

6820
$3.78 @8000

2400
$97,$90.4,$67.8 各1手

1918
$35.95 @1000

6088
$3.18 @6000

1024
$306,$283.6 各1手

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你39歲，應先以增值為主。你現時買股票，都質素。

但當中，融創中國（1918）業務不差，有規模、品牌、銷售網絡，但同時有一定風險。

首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但要明白背後的風險，自己要控制好注碼。

IT HON TENG（6088）質素中等，雖然都有投資價值，但企業不是最高質之列，因為企業的賺錢能力始終唔算好強，每件產品賺錢唔多。

同時業績有回落情況，不過，這股始終不是無質素，現貨可持有，但暫時不宜再加注。

我發現你主要問題不在於選股，而是手上不少股票的買入價跟現價都有相當距離。雖然部分可以守，但你要預起碼等一段較長時間。

其實你的情況，都是不少投資新手會犯的錯。第一、買入當炒股；第二、在市況最旺（即是最多人認為市場好景的時候）以最貴的價位買入。

其實這些問題，係可以避免。方法其實好簡單，就是投資較穩健的股票，又或是盈富基金（2800），分注買入，例如透過月供股票方式，每月買些少，會是較好的策略。

所以，你暫時最好先用月供去投資，每月可以用$1500供盈富(2800)，餘下資金就儲起，等大跌市機會。

另外，你組合波動性股票係佔較多(1024, 6820, 9988, 1833, 1918)，故你長遠要加入大盈富(2800)比重或加一些平穏增長股，令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

此期間，你要努力學習投資知識，要學好如何選擇優質股，點為股票定平貴。這些技巧，對你長線投資增值，係十分有幫助。

------------------------------------------------

Q21399：

你好，請問2352，順豐怎樣看

龔成老師︰

順豐控股 (002352.SZ)為內地快遞物流綜合服務的提供商，主要提供倉儲管理、銷售預測、大數據分析和結算管理等綜合物流服務。

此股有質素，集團在內地有領先規模。在電商近年高速發展下，集團長遠發展正面。

但此股現價不平，過往佢股票波動都比較大。此股有水資價值，但現時值博率唔算高，同時要控制注碼。

------------------------------------------------

Q21400：

龔成老師，請問1088 是穩陣的收息股嗎？見今年派息over 10%, 派息比率是100%

謝謝！

龔成老師︰

中國神華(1088)佢始終有一定規模，但政策不是好支持行業，的確會對佢有影響，但已經在股價反映左。

另外，由於佢地的產品自主力較弱，因此不算好高質。

所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。

所以整體來講，這股不算差，但又不算非常好，唔好對股價有太大的期望。

如果是收息的，都可以。但留意佢派息會跟隨利潤，而有所變動。因此，就唔建議太大注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。