【阿公講鬼】《虎豹別墅》
　
＝下半部分是繁中華語版＝
＝下半部分是繁中華語版＝
　
「虎豹別墅」，由胡文虎、胡文豹兩兄弟所擁有。兩兄弟生於緬甸，合力創立虎標萬金油。對「老虎」情有獨鍾，來港後買下約70個足球場大嘅地皮興建「虎豹別墅」。
　
別墅無豪華氣派嘅裝潢，相反兩兄弟嘅別墅充滿東南洋風格，後園興建咗一座虎塔，塔內全部都係十八層地獄嘅浮雕，形象嚇人，仲有落油鑊、勾脷筋嘅真實場景。
　
兩兄弟品味獨特，並唔打算將呢啲恐怖場景對外開放，而係私下欣賞。而且，有傳胡文虎、胡文豹兩兄弟更沉迷於養「狐仙」。
　
佢哋兩個確信狐仙可以幫佢助長生意更旺，當初買下呢塊地皮，亦因為算準山上有幾隻狐仙修煉緊，兩兄弟就打算用別墅吸引佢哋嚟住，仲請咗東南西法力高強嘅師傅幫手馴服山上嘅野生狐仙。
　
後來可惜好景不常，虎標生意麻麻，加上胡文虎死咗之後，後人將部份地段售出，兩兄弟從來無同其他人講過養狐仙一事，結果唔小心將狐仙放走埋。
　
逃走咗嘅狐仙亦引發聞名香港嘅銅鑼灣溫莎公爵大廈（現皇室堡廣場）發生狐仙吃童事件。
　
阿公亦有聽說過虎豹別墅嘅傳聞，雖然佢無參與狩獵孤仙。但碰巧鄰居係虎豹別墅二百幾個僕人同清潔工其中之一，叫基叔。
　
做虎豹別墅嘅工人薪水福利都好好，仲包吃包住，宿舍有獨立員工房，但只得少部分員工願意留宿，因為…別墅非常猛鬼！
　
基叔嘅職責係清潔別墅內嘅客房，別墅連地牢總共有三層高。每層客房各有幾十間，地牢有雜物室，儲存糧食嘅倉庫，而地牢嘅客房唔係畀客人住嘅，而係畀遊魂野鬼住嘅。
　
由於地牢除咗幾個通風口，完全無窗，密不透光，日夜四季任何時候都係咁潮濕寒冷。
　
「如何你撐得過一星期，咁真係恭喜你，你可以入住我哋嘅宿舍。」基叔入職嗰時，管工咁樣同佢講。
　
起初基叔以為管工講嘅係工作表現，於是佢決定將每間房都打掃得乾乾淨淨。
　
可惜，當他打掃完雜物室和食物倉庫後，行入第一間客房就出事喇…
　
佢打開房門，房內嘅燈光非常昏暗，地板鋪滿灰塵，床鋪仲因為潮濕而發霉。
　
當佢打算用抹布清潔地板時，就發現唔對路。乜呢間房之前有人住咩？點解成地都係赤腳嘅腳印？
　
可能係太耐無人打掃嘅原故吧？基叔無諗咁多，就跪喺地板使勁用抹布將灰塵抹走。
　
佢將客廳清潔完成後，就打開門進入睡房，繼續跪喺地來回擦拭。
　
呢個時候，佢瞥見床底下有嘢喺度晃動，嚇到佢即刻停低動作企起身。
　
係唔係老鼠？基叔雙手拎住掃把行近去想睇清楚，當他一趴低就發現床下放咗一塊圓形嘅銅鏡，而銅鏡啱啱好對住客房門口。
　
基叔環視間房四周，成間房都無適合擺放呢塊鏡嘅位置。講起嚟，呢間房連浴室一塊鏡都無，反而床底下就放咗塊銅鏡…
　
或者係有錢人嘅風水局啦？基叔想將塊鏡拎出嚟擦乾淨，就從側邊趴入床底下。
　
呢個時候，塊鏡出現咗一雙穿裙子嘅女人腳，好快速咁經過！
　
基叔即刻從床底望出房﹐但唔見有任何動靜。
　
唔通睇錯？基叔好快手咁將塊鏡拎出嚟，爬返出床底企起身。
　
塊鏡啱啱好照到天花板，而基叔就睇到…
　
一個長髮女人好似蝙蝠咁倒喺天花板，目怒兇光望住佢。
　
（待續）
300分享繼續～
訂閱Patreon，就可以請阿公飲茶
https://www.patreon.com/Bluegodzi
　
＝＝＝＝＝＝＝＝＝＝
＝＝＝繁中華語＝＝＝
＝＝＝＝＝＝＝＝＝＝
　
「虎豹別墅」，由胡文虎、胡文豹兩兄弟所擁有。兩兄弟生於緬甸，合力創立虎標萬金油。對「老虎」情有獨鍾，來港後買下約70個足球場大的地皮興建「虎豹別墅」。
　
別墅沒有豪華氣派的裝潢，相反兩兄弟的別墅充滿東南洋風格，後園興建了一座虎塔，塔內全是十八層地獄的浮雕，形象嚇人，還有落油鑊、勾脷筋的真實場景。
　
兩兄弟品味獨特，並不打算將這些恐怖場景對外開放，而是私下欣賞。而且，有傳胡文虎、胡文豹兩兄弟更沉迷於養「狐仙」。
　
他們確信狐仙能助長令生意更旺，當初買下這塊地皮，更是因為算準這山上有數隻狐仙正在修煉，兩兄弟則打算用別墅來吸引牠們，還請來東南西法力高強的師傅幫忙馴服山上的野生狐仙。
　
後來可惜好景不常，虎標生意不佳，加上胡文虎去世，後人把部份地段售出，兩兄弟從沒跟其他人說過養狐仙一事，結果不慎將狐仙放走。
　
逃出的狐仙亦引發聞名香港的銅鑼灣溫莎公爵大廈（現皇室堡廣場）發生狐仙吃童事件。
　
阿公亦有聽說過虎豹別墅的傳聞，雖然他沒有參與狩獵孤仙。但碰巧鄰居是虎豹別墅二百多名僕人與清潔工的其中之一，叫基叔。
　
當虎豹別墅的工人薪水福利都好，還包吃包住，宿舍有獨立員工房間，但只有少部分員工願意留宿，因為…別墅超猛鬼！
　
基叔的職責是清潔別墅內的客房，別墅連地牢有三層高。每層客房各有幾十間，地牢有雜物室，儲存糧食的倉庫，而地牢的客房不是給客人住的，而是給遊魂野鬼住的。
　
由於地牢除了幾個通風口，完全沒有窗戶，密不透光，不管任何時候都一樣潮濕寒冷。
　
「要是你能撐過一星期，那麼恭喜你，你就能入住我們的宿舍。」基叔入職時，管工如此跟他說。
　
起初基叔以為管工說的是工作表現，於是他決定要將每個房間都打掃得乾乾淨淨。
　
可惜，當他打掃完雜物室和食物倉庫後，進入第一間客房就出事了…
　
他打開房間，房間內的燈光非常昏暗，地板鋪滿灰塵，床鋪因為潮濕而發霉。
　
當他打算用抹布清潔地板時，就發現異樣了。
　
這個房間有人住嗎？怎麼滿地都是赤腳的腳印？
　
是太久沒人打掃的原故吧？基叔沒有想太多，就跪在地板使勁地用抹布將灰塵抹走。
　
他把客廳清潔完成後，便開門進入睡房，繼續跪在地上來回擦拭。
　
此時，他瞥見床底下有東西在晃動，便嚇得馬上停下動作站起來。
　
也許是老鼠嗎？基叔雙手握著掃把走近去察看。當他蹲下來，就發現床下放著一塊圓形的銅鏡，而銅鏡剛好對著客房的門。
　
基叔環視四周，整個房間都沒有適合擺放這塊鏡的位置。說起來，這房間連浴室一塊鏡子都沒有，床底卻有放著一塊銅鏡…
　
也許是有錢人的風水局吧？基叔想把鏡子拿出來擦乾淨，便從側邊趴進床底下。
　
此時，鏡子出現一雙穿裙子的女人腳，很快速的經過！
　
基叔馬上從床底望出房間﹐但不見有任何動靜。
　
是看錯吧？基叔很快地伸手將鏡子拿出來，退出床底站起來。
　
此時，鏡子剛好照到天花板，而基叔看到…
　
一個長髮女人像蝙蝠一樣倒立在天花板，目怒兇光則著他。
　
（待續）
300分享繼續～
訂閱Patreon，就可以請阿公喝茶
https://www.patreon.com/Bluegodzi

【屍人屋苑】病毒變種、喪屍橫行，一個屋苑困獸鬥的故事……（完）
　
一切實在發生得太突然。當隻女喪屍撲低我準備咬埋嚟嘅時候，我真心以為自己死硬……
　
但佢咬唔中，可能係我掙扎之下改變咗佢咬嘅位置，又或者一瞬間嘅反射動作避開咗。總之，大難不死必有後福，我即刻出盡九牛二虎之力將佢推埋一邊。
　
「嘶啊啊啊啊啊！」但女喪屍依然死心不息，佢同我幾乎係同一時間撐起身。
　
我本身想抽刀，但佢早一步撲埋嚟，我剩低一隻左手擋唔住，結果俾佢撞埋去煮食爐嗰邊。佢再一次想咬埋嚟，但我右手正好掂到易潔鑊嘅手柄，用力握實向住女喪屍嘅頭直揮過去。
　
碰！
　
一聲悶響，女喪屍俾我直接打中失去平衡、動作亦都慢咗落嚟。見狀，我用一手一腳將佢推出廚房。見拉開咗一個安全距離，今次我順利抽出刀，下次攻勢一定可以殺死佢……
　
「啊啊啊啊啊啊啊！」
　
「唔好去呀！」
　
「琪琪！？」
　
女喪屍、阿俊、琪琪幾乎係同一時間大嗌。我唔知發生咩事，當刻只係一心想解決眼前隻女喪屍。但就喺佢再次衝埋嚟嘅一刻，突然有人擋喺我同佢之間……
　　　
－－－－－－－－－－－－－－－－－－
《屍人屋苑》前三回：
https://www.facebook.com/pg/Echo.of.Heart/photos/?tab=album&album_id=1935947799870360&__tn__=H-R
－－－－－－－－－－－－－－－－－－
　　
「媽！」喺琪琪，佢背對住我用力抱住隻女喪屍，「唔好啊！」
　
我當刻已經落刀，刀口只係差一吋就會插中琪琪嘅後頸。
　
「妳搞乜嘢呀！？」我當然係好難以置信。
　
但琪琪冇理我，佢出盡全身力量將女喪屍慢慢抱後。可以見到隻女喪屍依然係睜大雙眼望住我，雙手不斷揮舞、十指瘋狂咁亂抓，血盤大口又開又合。明明身邊就有一個可以咬嘅人，但佢依然將目標放喺我身上……
　
「媽！夠喇……我已經夠喇！妳入房先……求下妳……」
　
「真係神奇……」阿俊慢慢行入廚房，一直茫然咁望住琪琪同女喪屍，「隻喪屍居然唔會咬琪琪……呢種情況你以前有冇見過？」
　
「冇……」我冷冷咁回應，殺意依然係充斥住我腦海，「唔得，我要過去殺死佢……」
　
「喂！」阿俊伸手想拉住我。
　
「我差啲死呀！」我大聲咆哮，「差少少就會俾佢咬死！你唔係為咗條女搞到傻咗呀！？」
　
「我明……」
　
「你明條撚！」我一直盯住嗰兩母女，睇嚟琪琪係打算推佢入房。
　
「反正你都打算過去啦？」阿俊嘗試說服我，「呢邊不如交俾我處理？」
　
雖然好想拒絕，不顧一切咁衝埋去一刀插落女喪屍嘅天靈蓋。但而家咁樣俾打窒咗條氣，冷靜落嚟，恐懼感瞬間散播全身每一個角落。我可以感覺到雙手喺度震緊，背脊亦都出滿晒冷汗……
　
「你有冇受傷？」阿俊輕輕拍一拍我肩膀。
　
「唔好掂我！」我反應非常大，轉身行埋去窗邊，先搓一搓雙手，然後開始綁繩，「你自己望下個雪櫃……條女係癲㗎，你留喺度肯定死硬！」
　
「嗰條屍就係王伯。」琪琪返到嚟開聲回應，嚇到我成個人震一震。
　
我即刻轉身，再一次舉起刀，好驚隻女喪屍會再一次出現。
　
「就喺你哋闖入屋苑嗰一晚，王伯為咗避喪屍所以上咗嚟呢度。本來頭幾日都相安無事，係直到前晚，佢突然入我房……仲想強……」琪琪顯得相當痛苦，「……強姦我……」
　
「所以妳就殺咗佢？仲分佢屍？」我質問。
　
「唔係我……係我媽……趕到嚟殺死佢……然後……然後我……」
　
「嗰個唔係妳阿媽，係喪屍！妳媽已經死咗！」我咆哮，「哦……我明喇，妳之所以放王伯條屍喺雪櫃，就係想拎佢嘅肉嚟食……」
　
但因為斷電嘅緣故，雪櫃早就冇咗冷凍功能。但放入去多少可以阻隔氣味，所以我同阿俊先一直注意唔到。
　
「我唔係……我只係想……吖吖吖吖吖吖吖吖！」琪琪尖叫一聲，然後跪喺地上面抱住頭。
　
「你而家明喇！？」我望向阿俊，「條女分明有妄想症，覺得佢阿媽仲未死！佢仲要食人！我哋咁耐以嚟都冇試過咁做！」
　
「夠喇，老超……」阿俊跪喺琪琪旁邊，對住我搖搖頭，「你過去先喇。」
　
「算，你死你事！」
　
我用力推開廚房窗，先探頭望出去，可以見到外面有個固定咗嘅晾衫架。雖然唔敢保證踩上去穩陣，但只要事先綁好繩，就算發生咩事都應該唔會跌落去……
　
「我過去啦！」當一切準備就緒之後。我先回望阿俊一眼，佢依然安慰緊琪琪，「如果我跌咗落去，你就喺度同佢長相廝守啦！」
　
說罷，我小心翼翼咁爬出窗外面。一開始先坐喺窗邊，右腳稍微用力踩一踩晾衫架，感覺穩陣先慢慢起身，過程一直扶住窗框，唔敢將重心放喺下半身、更加唔敢直望落下方……
　
我開始感覺到掌心出汗，又擔心自己腰繩綁得唔夠緊……廿五樓，跌落去一定係粉身碎骨……我伸出左手抓住另一室嘅窗邊，好彩呢一戶嘅主人本身冇閂好窗，所以免去一層功夫。
　
我拎出預先準備好嘅爆窗工具，只要解開埋窗框嘅鎖就大功告成。呢三個月實際上已經爆過好幾次，可以話係駕輕就熟……
　
終於，「嘭」一聲爆開窗鎖之後，我即刻用力推開窗框，然後毫不猶豫直接爬入去隔離屋嘅廚房。雖然最難嘅部份完成咗，但我都未敢放鬆心情，因為屋裡面絕對有可能隱藏其他危機……
　
「Hello！？」我邊解開腰繩邊大嗌，同時用刀尖擊打廚房嘅瓦磚。
　
假如屋裡面有人或者喪屍嘅話，聲音咁大係肯定會聽到的。
　
但直到我行出廳，依然冇出現任何異樣。見係咁我終於鬆一口氣，行埋去梳化成個人瞓喺上面。當我望住天花板嘅時候，有一瞬間真係諗過乾脆成世人留喺度就算……
　
但我知道冇可能的。只要捱埋呢兩日，我先可以正式脫離呢個人間地獄。
　
休息咗大約五分鐘，我開始檢查屋入面嘅每一間房。呢間屋嘅主人係一對中年夫婦，佢哋仲有一個睇落似係中學生嘅仔。一啲都唔意外嘅係，間屋果然係冇晒食物。所以估計佢哋應該係為咗搵糧食而被迫離開屋企，結果就再返唔到嚟……
　
類似嘅故事，呢三個月應該發生喺好多家庭身上吧？
　
檢查完畢後，我重新返到去廚房，然後開口問：「阿俊喺唔喺度？」
　
「喺度。」阿俊好快就回應：「你嗰邊咩情況？」
　
「安全，你係咪而家過嚟？」我執返起地下嘅布繩。
　
「睇嚟你唔記得咗我哋要用電話鈴聲吸引班喪屍？」阿俊無奈咁講。
　　
喔，因為頭先根本係怒火中燒，所以確實冇咗件事。
　
「所以點都要有人留喺呢邊，個計劃先可以順利進行。」佢接住講：「你肯定係信唔過琪琪，所以一定係等我嚟。」
　
「你點解硬係要幫佢？」我問：「隻喪屍一直喺屋裡面仲要冇鎖好門，佢根本一早想我哋死。」
　
「真係咁嘅話，佢一開始就唔會千叮萬囑叫我哋唔好入廚房。」阿俊唔同意，「老超，唔怕老實講，頭先見琪琪攬住佢阿媽嘅時候，我真心覺得個畫面好感動……」
　
「吓？」我錯愕。
　
從我呢個受害者嘅角度睇，個畫面根本係又畸形又嘔心，諗返就覺得心寒。
　
「當初我阿媽變成喪屍嘅時候，佢先冇對我咁好。如果我唔係走得快，應該一直就成為下面班喪屍嘅同伴。所以，我真係好同情佢……佢身為一個女仔，可以捱到而家真係唔容易。」
　
我冇回應，而係望返大廈最底，喪屍數量依然係有增冇減。其實到而家，我都幾佩服自己有勇氣爬過嚟。
　
「係嘞，尋日同老豆傾電話嘅時候，佢留低咗個號碼俾我，話必要時可以用嚟聯絡聽晚揸直升機嗰班人。既然我部電話聽晚就會玩完，我想你幫手一齊記低個號碼，話唔埋之後有機會用得著。」
　
「講嚟聽下。」我裝作唔在乎。實際係趁佢見唔到拎出自己部電話，打開然後記低。
　
確認好聽晚九點半行動之後，我哋就各自返去休息。雖然阿俊講到自己好同情琪琪，但我始終唔係佢……我冇辦法原諒一個瞞住我嘅人，何況，我差少少就會俾佢阿媽咬死……
　
所以，我暗暗作出咗一個決定……
　
至於呢個決定最後會引至咩結果，就要交俾阿俊嚟決定。
　
*
　
【阿俊視角】
　
轉眼間就嚟到關鍵嘅一晚。半個鐘之後，直升機就會降落喺屋苑嘅天台。
　
早喺九點半之前，我已經預先較好電話鬧鐘，再將電話擺喺屋最入嘅嗰房間。
　
「媽，我要走喇。」行動之前，琪琪不忘向倒數第二嗰房間裡面嘅「媽媽」道別，睇得出佢仲係依依不捨。
　
……嗚……
　
尋晚我同琪琪傾咗差唔多一整晚，我幾乎係將自己三個月以嚟嘅故事原原本本咁話俾佢知──我阿媽係點死、我係點遇到老超佢哋、點解會剩低我哋兩個，最後又點解會避到嚟呢個屋苑……
　
當然，佢都有同我提到自己嘅故事。雖然三個月以嚟都係留喺屋企難免有啲乏味，但呢個都叫做係好開始……
　
雖然只係一晚，但我感覺同佢嘅距離一下子縮減咗好多。琪琪佢本性善良，正如我所講佢根本冇心害人，只係一直冇辦法放低「媽媽」。只要畀多少少時間，佢一定可以恢復過嚟……
　
而安全島，無疑係一個最好嘅療傷之地。
　
「妳搞掂就入廚房。」我企喺大門前同佢講：「之後等我指示……」
　
雖然隔住大門，但我可以聽到外面班喪屍開始躁動起嚟，就好似感覺到我哋即將會放佢哋入嚟咁。
　
我望住錶，等到最後十秒嘅時候，我先深呼吸一口氣，然後慢慢打開大門……
　
「嘶啊啊啊！」即刻有隻喪屍注意到呢邊然後用力撞過嚟，但結果當然係撞埋鐵閘。
　
雖然咬我唔到，但呢個舉動卻將其他喪屍一齊吸引過嚟。我鼓起最大勇氣解開鐵閘鎖，再輕輕用力拉開少少……
　
下一秒，最入嘅房間響起電話鬧鐘，而我就直奔入廚房。
　
「閂門！」我壓低聲同琪琪講。
　
佢即刻照做，臨閂門之際，可以見到班喪屍已經開始湧入屋。接住落嚟只可以寄望鬧鐘真係可以引晒佢哋入去，清空走廊……
　
我同琪琪合力將雪櫃擋喺門前，然後就照計劃，先由我過去……
　
「妳真係冇問題？」我綁繩嘅時候再問一次，「妳唔驚我過到去之後唔理妳？」
　
「唔驚，」琪琪搖搖頭，「我信得過你。」
　
確認繩綁得夠穩之後，我即刻把握時間爬出窗外。雖然我有少少懼高症，但呢刻已經冇得驚了。我踩上晾衫架，一個反身想直接爬過去隔離屋……
　
「吓？」
　
點會估到，隔離屋嘅窗框居然重新鎖上咗。而老超就企喺窗框後面冷冰冰咁望住我。
　
「老超你搞咩！？」我當然好驚訝，「做乜鎖返住個窗框……」
　
「好彩係阿俊你先過嚟，」老超舉起一條鎖匙，「咁成件事就易搞好多。」
　
「你到底玩咩呀！？」
　
「我冇玩，我要你拋低嗰個癲女人……只要你肯咁做，我就會開鎖俾你入嚟。」
　
「阿俊，發生咩事！？」可能見我留喺外面仲未入到屋，琪琪緊張咁問。
　
「冇事，妳千祈唔好出聲！」我抓實窗框盯住老超，「如果我唔應承呢？」
　　
「咁你哋就一齊留喺嗰邊喇！」老超呢個態度明顯係認真，「呢個女人咁痴線，就算我哋可以去到安全島，終有日都會俾佢害死！」
　
「你諗得太嚴重……」
　
「因為差啲死嗰個唔係你！」
　
「阿俊，班喪屍……班喪屍好似想撞入嚟！」琪琪慌張咁大喊。
　
見到呢個情況，我決定豁出去，直接喺外面解開腰繩，然後拋俾琪琪。
　
「琪琪，妳照我尋晚教妳咁，快啲綁繩爬出嚟！」
　
「阿俊，夠喇！放棄佢喇！」
　
「我唔會！老超，你仲記唔記得阿東？」我講到呢度伸隻手入去屋入面，「如果……我哋每一次都選擇見死不救嘅話，我哋同下面班喪屍又有咩分別？」
　
老超起初聽完係有少少動搖，佢先望咗眼手上嘅鎖匙，最後……
　
隨手將條鎖匙掉喺地上面。
　
「當然有分別……」老超邊講邊退後，「就係我依然生存緊。」
　
「喂，老超！」我終於忍唔住咆哮，「你咪走呀！」
　
但老超並冇停落嚟，一個轉身就跑出廚房。
　
「吖！？」我見到琪琪已經準備爬出窗外面，睇得出佢相當恐懼。
　
而同一時間，廚房嘅拍門聲亦都越嚟越響，班喪屍好快就會破門而入……
　　
「阿俊……到底點解會咁？」琪琪絕望咁望住我。
　
唔通，呢個就係我哋嘅命運？
　
*
　
【老超視角】
　
假如頭先係琪琪先爬過嚟嘅話，其實我係打算直接推佢落樓，一了百了。所以見到係阿俊先過嚟嘅時候，其實我仲鬆咗口氣……
　
但佢最後都係唔肯放棄嗰個女人，既然係咁，唯有等我放棄佢哋。
　
反正，早喺一星期之前我已經有意欲咁做了，只係佢老豆嘅電話改變咗我嘅諗法，所以而家只係回歸初心。
　
可能你哋會問，冇咗阿俊，直升機班人會唔會唔肯接我？我當然有認真考慮過呢點，事實上已經考慮咗成晚。
　
當我打開H室嘅大門，外面走廊果然係冇晒喪屍，睇嚟真係俾電話鬧鐘引晒入屋。我迅速咁推開後樓梯門，雖然聽到下方有喪屍叫聲，但我嘅目標係上層……
　
我一連跑咗好幾層，最後順利跑到天台。就好似怪我狠心一樣，天竟然開始落起滂沱大雨。但對於留喺窗外面嘅阿俊同琪琪嚟講，呢場雨無疑係雪上加霜……
　
我任由雨水拍打身體，一直提防住樓梯門，驚會有喪屍上嚟。等咗大約幾分鐘之後，終於可以聽到旋翼轉動嘅聲音。我抬起頭，見到有道光慢慢靠近。只要再過多陣，我就可以離開呢座大廈……
　
我先留喺安全位置，等到直升機停低落嚟先至敢行近，邊行邊大喊：「太好喇，我已經等咗你哋好耐！」
　
就喺下一刻，直升機一邊廂門打開，有個人舉住長槍指向我。
　
「你就係阿俊？」
　
我曾經有一秒諗過乾脆真係扮阿俊，但一諗到之後肯定會穿煲，最後都係「實話實說」：
　
「唔係，我唔係阿俊！」
　
「咩話！？」因為場雨太大，所以槍手聽得唔清楚。
　
「我唔係阿俊！阿俊佢已經死咗，但佢臨死之前留低咗個遺言俾我，叫我要親口同佢老豆講，所以你哋一定要送我去安全島！」
　
假遺言嘅內容我當然已經諗埋，但如果佢哋唔追問，我都唔會喺呢個緊張關頭慢慢解釋。呢刻，只希望佢哋會上當……
　
「好喇！」槍手揮一揮手，「快啲上嚟！」
　
我聽完當然好激動，正想快步走過去……
　
「喂，喪屍！你後面有喪屍呀！」槍手突然大嗌。
　
我一聽到警告即刻轉身，果然有隻男喪屍偷偷跑到我背後，因為直升機太嘈所以完全察覺唔到。好彩我反應得切，巧妙咁避過佢一撲，再順勢舉刀直插落佢後腦……
　
但危機仲未解決，有更多喪屍出現喺後樓梯位置，呢個數量我冇可能一個人解決。
　
「可惡！」我激動得咬牙切齒，「點解早唔嚟遲唔嚟，偏偏而家先出現？」
　
但令我更絕望嘅係，直升機嘅旋翼居然重新轉動起嚟。我望過去，見到直升機開始急速爬升。明顯係機師感覺到危機，所以唔敢冒險等埋我……
　
「喂！等埋呀！」
　
嘭嘭嘭嘭嘭嘭嘭嘭嘭嘭──！
　
連珠爆發嘅槍聲劃破長空，我下意識抱住頭，再擰轉身，見到班喪屍一隻一隻咁中槍倒地……
　
「好呀！就係咁……！」
　
嘭─────────
　
突然，右腹一下劇痛令我成個人失平衡跪喺地上面。我曾經有一刻以為係隻男喪屍未死，然後俾佢從後偷襲。但唔係，佢依然瞓喺地上面，就同其他喪屍一樣……
　
「……好痛……」
　
我伸手摸向右腹，可以摸到溫熱嘅液體不斷流緊出嚟。當血紅色嘅液體落到地板之後，隨即被雨水所沖淡……
　
「……唔係啩……」我有個好壞嘅念頭，但始終唔想承認。
　
唔通……我係……中槍……？
　
終於，一陣強烈嘅暈眩感襲來，我即刻支持唔住瞓落地。明明係好想起身，好想盡快離開呢個鬼地方，但身體卻開始變得僵硬起嚟。只能勉強向前爬，忍住痛楚不斷爬……
　
……可惡啊……好痛……點解會咁痛……
　
眼皮開始變重，但我知道自己唔可以瞓。就快了，就快會爬到後樓梯，之後我要即刻搵個地方止血……咦？
　
但就喺下一刻，有一個身影慢慢出現喺門前，我睜大雙眼想望清楚……
　
結果，出現眼前嘅，係一個未完嘅惡夢──
　
係琪琪嘅「媽媽」，佢居然嚟到天台，注意到我之後用緩慢嘅步伐行過嚟……
　
……等等先……
　
「……嗚……」
　
……搵人開槍……開槍幫我……喂……
　
一步、一步、又一步，琪琪「媽媽」嘅目標非常明確……
　
救命……救命……啊……好痛……
　
「……開……槍……」我嘅聲音變得好沙啞，「……救……」
　
終於，佢嚟到我面前，慢慢跪低。灰白空洞嘅雙眼裡面可以搵到我絕望嘅身影。
　
「嘶啊！」
　
*
　
*
　
*
　
感覺，好似發咗一場好耐嘅夢。
　
夢入面我去咗好多個地方，先係醫院、然後到地鐵站、辦公室、巴士車廂、最後係一間超市……過程中我遇到好多陌生人，每一個人都係用驚恐無比嘅眼神望住我。
　
尖叫、慘叫、最後恢復平靜……每次都係重複呢個輪迴。
　
記得，夢嘅最後，我去到一個中年女人面前，佢越望就越熟口面，唔知喺邊到見過。佢不斷走，最後俾我迫到去一個角落先嘗試反抗……
　
我本來差少少就會記得佢係邊個。但偏偏喺呢個時候，有一男一女嘅叫聲嘈醒咗我……
　
「係邊個？」我睜開雙眼。
　
返到現實之後，第一個感覺係全身上下都濕晒。慢慢撐起身，自己依然身處喺屋苑嘅天台。昏迷之前最後發生嘅事，係我好似中咗槍，然後琪琪嘅媽媽出現……
　
諗到呢度，我即刻望一望附近，見唔到嗰隻喪屍嘅身影，即刻鬆咗口氣……
　
「啊……」
　
我再摸一摸中槍嘅右腹位置，血好似已經冇再流，亦都再感覺唔到痛楚。
　
係好返咗？抑或我本來就冇中槍？越諗就越覺得神奇。見直升機已經飛走咗，我本來打算搵個安全地方避下。但就喺下一刻，有一對男女從後樓梯門走出嚟……
　
係阿俊同琪琪。
　
「嗄……嗄……」阿俊喘晒氣，見到我嗰刻不禁睜大雙眼，「老超……」
　
「估唔到你哋竟然可以上到嚟。」我無奈一笑，然後慢慢行過去。
　
「阿俊，佢係咪……」琪琪一臉驚慌，類似嘅表情好似喺夢入面見過。
　
「嗯，等我嚟。」阿俊擋喺琪琪面前，「老超，估唔到呢個就係你嘅下場……或者，呢個就係報應？」
　
「報應？」我不解，繼續慢慢行過去，「你到底講咩……」
　
就好似聽唔明我講咩一樣，阿俊居然舉起刀，而且擺出準備對我落手嘅姿勢。
　
「喂，既然情況變成咁，大家咪坐低好好傾下囉……」我就好似唔驚佢會落手咁，繼續行，「我有電話喺手，可以隨時打去叫直升機返嚟……」
　
但我錯了。
　
阿俊未等我講完就直衝過嚟，我完全反應唔切，結果俾佢一刀插落我頭蓋。
　
WTF？
　
發生咩事？
　
中刀後，我再一次倒後瞓低，想郁但係完全郁唔到。
　
阿俊，點解你要咁做？
　
為咗條女，你竟然可以咁狠心？
　
「阿俊，呢度有部電話……開到仲有電！」琪琪激動咁講。
　
「呢部電話係老超嘅，佢之前仲話冇電，原來係一直呃住我……琪琪，只要有電話，我就可以試下打去叫直升機返轉頭……」
　
啊，頭痛。
　
越聽就越頭痛，點解會咁……我係咪仲發緊夢？
　
照道理，頭中刀係冇可能頂到咁耐。冇錯，所以我肯定仲發緊夢……
　
「老超，」打完電話之後，阿俊跪喺我旁邊講：「我諗你將我同琪琪鎖喺窗外面嘅時候，應該估唔到最後嘅結果會係咁？」
　
結果……係咩結果？
　
「本來我真係好絕望，覺得自己死硬，差在係跌死定係俾喪屍咬死……但琪琪嘅媽媽居然救咗我哋。」
　
*
　
*
　
*
　
【回憶】
　
老超走咗之後，我不斷嘗試用蠻力撞開窗框，但結果都係唔成功。而且天仲要開始落雨，令到情況變得越嚟越惡劣。
　
「可惡！我應該一早要準備多套工具！」我自責咁講。
　
「阿俊……班喪屍已經爆咗道門！」琪琪驚慌咁講。
　
因為我身上已經冇綁繩，所以望過去嘅時候都唔敢太大動作。果然，廚房嘅門已經爆開咗個大窿。呢刻鬧鐘已經停咗冇再響，所以班喪屍開始將注意力放到我哋身上……
　
「妳過嚟！」我將琪琪拉近過嚟，喺佢耳邊講：「聽住，我哋可以頂住……等班喪屍走，又或者爬窗嘅時候跌落街……」
　　
但呢個過程班喪屍隨時會搞到琪琪身上嘅繩，又或者跌落去嘅時候撞到晾衫架最後整斷。無論點諗都係絕望，死路一條……

「嗚……」琪琪終於忍唔住喊起上嚟。
　
碰──當我聽到雪櫃跌落地嘅聲音，感覺就好似開始咗我人生最後嘅倒數階段……
　　
「……媽？」但就喺呢個時候，琪琪竟然睜大雙眼望返去廚房嗰邊。
　
「咩事？」我壓低聲問。
　
「係媽！」
　
「妳做咩！」見琪琪試圖想爬返入廚房，我當然想阻止佢，「喂！」
　
但晾衫架突然晃動一下嚇到我唔敢再亂郁，結果只可以眼白白睇住佢爬入去，一邊解開腰繩一邊行到門……
　
呢刻，我再見唔到門窿位置有喪屍手，聽落亦都冇再撞入嚟。見晾衫架好似越嚟越唔穩陣，一個大膽嘅念法突然浮現。我決定跟琪琪返到廚房，然後一齊望出門外……
　
班喪屍居然離開緊，一隻又一隻從大門行返出外面走廊。明明我同琪琪就喺門嘅另一邊，但佢哋完全冇望過嚟。
　
直到，最後一隻喪屍經過。佢先望咗我哋一眼，然後就轉身行出屋……
　
「……媽……」琪琪掩住嘴巴，淚水就好似湧泉一樣不斷咁流。
　
見到呢一幕，我當然都覺得好震撼……
　
「……再見喇……媽……」
　
然後，重拾希望嘅我哋，好自然咁牽住手，準備離開呢座屍人屋苑。
　
*
　
*
　
*　
　　
「雖然唔知實際係點做到，但琪琪嘅媽媽確實係引晒班喪屍走。」阿俊繼續講落去：「有啲應該係上咗嚟天台，但大部份都落返去樓下……我同琪琪見安全之後，先至行樓梯上嚟。」
　
荒謬！冇可能會咁！一隻喪屍點可能做到……
　
「假如我當時由得你殺死佢，或者結局就會好唔同。」阿俊搖搖頭，「點都好，老超……希望你可以安息。」
　
說罷，佢就用手幫我合埋雙眼。
　
「阿俊……佢……點解會變成喪屍？」琪琪問。
　
「我都唔知……直升機到喇。」阿俊回應：「琪琪，之後嘅日子就等我嚟保護妳。」
　
「嗯。」
　
我好想開聲痛罵佢哋、詛咒佢哋。但我講唔到任何嘢、見唔到任何嘢、身體亦都郁唔到，就好似會永遠被困喺呢個軀殼裡面……
　
一秒……
　
一個鐘……
　
一日……
　
一個星期……
　
………………
　
…………
　
……
　
……到底過咗幾耐？
　
終於，我腦海裡面所有複雜嘅思想、昔日嘅記憶，都隨住時間流逝而沖走。
　　
最後只係剩低一個單純嘅欲望。
　
　
　
……肚餓了。
　
（完）
　
　
《屍人屋苑》嘅主劇情到呢度正式完結，不過眼利嘅讀者應該會注意到故事入面仲留咗少少伏筆。我會睇反應決定下寫唔寫多幾篇外傳故事。😂 呢集足足成八千字，睇完記住幫手留個 LIKE 同分享出去呀！
　
各位感謝各位一直嘅支持，有讀者 PM 話好想呢本出書，我會認真研究下可能性！
　
最後，下面有嘢想講！見過嘅讀者可以直接無視，當然都希望可以繼續支持。
　
－－－－－－－－－－－－－－－－－
　
【地方的無默媽資助計劃】（試行中）（非呃嬲 post）
　
呢個計劃其實上年年初已經構思緊，但因為遇上反修例運動，覺得唔係適合嘅時間所以就一直擱置，結果到今年就撞正武漢肺炎。嚴峻疫情下，大眾書局突然宣告結業，令我下定決心要推出呢個計劃。
　
其實喺香港寫作真係好難，之前喺唔同場合都提過，作者透過賣書得到嘅錢真係好少好少。呢點絕對唔係出版社同書局嘅錯。講到底，一本書賣出去，最大筆錢係落咗去地產商身上。所以喺呢個大環境下根本培養唔到作者，一係要兼顧正職結果寫得太慢漸漸被淘汰，一係就主力寫但最後慘到要靠光合作用嚟維持生計……
　
所以我見到好多唔願意放棄嘅作者都開始轉型，一係自己賣書寄書、一係換個平台發展、一係直程轉第二種模式創作。而我暫時都係想寫，堅持寫落去。
　
有時見到讀者們話想支持作者，心裡面都會忍唔住覆一句：最好嘅方法，其實就係直接資助。既然遊戲平台可以資助，拍片嘅平台可以資助，點解寫作唔得？大家都係提供娛樂，無理由有呢種差別待遇。
　
而家大眾書局結業，大型書局其實就得返嗰幾間，而小型書店本身都經營困難。可以預見將來作者嘅生存空間只會越嚟越細，加上疫情持續落去書展隨時可能搞唔成。可以嘅話我都唔想用到呢種方式，但現階段……只想努力掙扎求存。因為我真係鍾意寫故事，好想一直寫落去。
　
而呢個計劃，就係基於以上種種理由出現。
　
放心，資助並唔係強迫性，有困難而資助唔到係絕對了解、想幫手足先更加係應該、剩係想買書支持亦都絕對歡迎。我唔會因為冇讀者資助而罷寫，亦唔會突然有篇故要畀錢先睇到（呢個平台都做唔到呢個效果）。當然，資助得多絕對會加速寫作速度。而資助金額係隨心而定，即使係一蚊都可以，只要有心就得。
　
當然，我都研究緊一啲方式答謝資助得多嘅讀者──例如聖誕送下聖誕卡、間中送下小禮物、甚至研究緊用資助嘅錢去整廣播劇、桌遊嘅可能性。但因為而家只係試行階段，唔想亂咁開空頭支票，有進展一定會即刻通知大家！
　
暫時只提供 payme 同轉數快兩個平台，會睇情況再考慮其他資助方式。再強調一次，資助唔係強制性，一蚊可以、繼續免費睇都得。只要有心，平時肯留個 like 分享下我都已經心滿意足了。
　
Payme 連結：
https://payme.hsbc/echoofheart
　
轉數快 FPS ID：6065460
　
－－－－－－－－－－－－－－－－－
　
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
　
－－－－－－－－－－－－－－－－－
　
IG：echoofheart

《無異之地》惡夢島（七）
　　　
所謂惡夢，其實某程度上係反映緊造夢者最深層嘅恐懼。譬如話最驚嘅事物、最唔想失去嘅事物、又或者一直逃避緊嘅事物。我當然唔係例外，即使我同「一般人」有幾咁唔同，本質上都係一個人類。
　
但惡夢對於我嚟講，一直都有多一層意義──警惕同提醒，亦都可以話係一種自我約束。因為，現實中嘅我只要行錯一步嘅話，惡夢就會成真。
　
「白小姐，唔理妳記得啲咩都好……」Match舉起槍對住佢，「妳都唔可以再行近半步喇。」
　
「但你唔想知道咩？關於無二先生一直隱藏住嘅秘密。」白如初問：「就算你唔想知，鏡頭另一邊嘅人應該係非常有興趣。」
　
啊，估唔到佢會直接戳穿呢個事實……唔知青鹿呢刻聽完會有咩反應呢？
　　　
＝＝＝＝＝＝＝＝＝
《惡夢島》連載中：
https://www.facebook.com/pg/Echo.of.Heart/photos/?tab=album&album_id=1861298627335278
　
《惡夢，藏在門後》全集：
https://www.facebook.com/pg/Echo.of.Heart/photos/?tab=album&album_id=1342167935915019
　
《極樂謊園》全集：
https://www.facebook.com/pg/Echo.of.Heart/photos/?tab=album&album_id=1736011713197304
　
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
＝＝＝＝＝＝＝＝＝
　　　
Match猶豫咗兩秒，正想開口回應，卻俾樓上突如其來嘅槍打斷咗。
　
──發生咩事！？（Match）
　
──係731號！佢好似痴咗線咁對住天花板開槍，跟住就成個人瞓低咗！（664號）
　
──咁有冇人受傷？（Match）
　
──我哋冇，731號都冇事，只係昏迷咗……（664號）
　
──肯定係嗰個女人做嘅好事！隊長，我而家落嚟幫你……（399號）
　
──唔好，你留喺上面，點都要搵返啲實驗數據！呢邊有我同無二……（Match）
　
──隊長，以無二嘅能力，佢冇可能唔知個女人有唔妥，你一定要提防埋佢！（399號）
　
──各位，各位！唔好介意我打斷你哋……無論你哋想做咩，都要即刻搞掂，因為我聽到外面走廊有聲，肯定係班「蝕客」聽到槍聲所以趕緊過嚟。（275號）
　
轟隆──震耳欲聾嘅爆炸聲馬上證實咗275號嘅講法。
　
之所謂爆炸，係因為清理小隊早喺外面走廊設置咗爆炸裝置，以防「蝕客」突然來襲。
　
──664號，唔好理個傻仔，過嚟幫拖喇，外面全部都係你嘅「朋友」。（275號）
　
──好……等我殺晒佢哋，醫好呢場惡夢。（664號）
　
──呯呯呯呯呯呯──接著，就係凌厲嘅槍聲連珠爆發。兩人為咗守住控制室開始一場大廝殺……
　
「無論係咩秘密都好，呢刻最重要都係完成任務。」Match亦都得出結論，再次遞把短刀過嚟，「無二，希望你唔好唔記得自己嘅工作……當係為咗仇小姐。」
　
「你咁樣係咪算係要脅我？」我問。
　
轟隆──第二下爆炸明顯更加接近控制室，即刻有灰塵同碎石由天花震落地上面。
　
「我只係做緊一件正確嘅事。」Match毫不畏懼咁講：「只要控制返呢度，就可以結束呢一切。」
　
睇嚟，呢場鬧劇終於係要結束喇。我接過Match嘅短刀，先望咗眼如初，佢依然係企喺原地，用高深莫測嘅表情望住我哋……呢個表情喺佢本人身上係絕對冇機會出現吧。
　
我無奈一笑，正準備「出手」嘅一刻……成個控制台局然早一步啟動起嚟，而面前百幾格細小螢幕，亦都一瞬間全部著返晒。
　
「點解……」Match當然感到驚訝，因為佢好肯定我仲未出手。
　
「呢個情況應該只係得兩個解釋。」我嘗試推斷，「一係個重啟掣真係有效，只係有少少延遲……」
　
「第二個解釋呢？」Match問，同一時間已經開始操作緊控制台，試圖想趕走或者消滅外面走廊嘅「蝕客」，化解當前危機。
　
──走廊咩情況？（Match）
　
──啲「蝕客」越嚟越多，哈哈……雖然殺得好痛快，但再咁落去肯定會頂唔住……（275號）
　
──你哋再頂多一陣，我哋已經控制返……（Match）
　
「第二個解釋，就係呢度根本就唔係控制室。」回應嘅人唔係我，而係如初，「而係某個人嘅『惡夢』。」
　
聞言，Match即刻停低落嚟，轉身睜大雙眼盯住如初，問：「妳講咩話？」
　
「275號嘅亡子、399號嘅考試、664號嘅醫院……你唔覺得仲漏咗啲咩？」如初嘗試提醒佢。
　
「肯定唔係我，亦都唔係無二……」Match分析起嚟，「係731號，呢個係佢嘅惡夢……」
　
「可憐嘅細路。」如初講咗我內心嘅想法，「為咗滿足爸爸嘅期望，所以一直為難緊自己。佢當然好想順利完成任務，然後得到所有人嘅認同。但等緊佢嘅，只係一場惡夢。」
　
就喺佢講完嘅一瞬間，成個控制室開始出現異變。包括控制台同螢幕在內所有機件開始扭曲變形，甚至開始滲出鮮血。然後係天花板同旋轉樓梯，喺短短一瞬間就崩坍瓦解，仲喺上層嘅399號同昏迷緊嘅731號因為咁跌咗落嚟。
　
「咳……咳咳！」Match即刻戴返頭盔，以免吸入更多灰塵。
　
終於，整個控制室恢復咗本來嘅面貌──原來呢度係一個棄置焚化場。所謂嘅螢幕，其實係一部巨型嘅焚化爐，至於控制台同其他機件，實際上就係由已經變得血肉模糊嘅人類殘肢所堆疊而成……呢刻可以聞到一陣非常濃烈嘅血腥味。
　
「你……」Match望咗眼自己血跡斑斑嘅雙手，再質問我：「一早已經知道係咁！？」
　
「有少少感覺到，但唔肯定。」我如實咁講。
　
「佢講大話！」然而399號並唔相信，仲舉起槍指住我，「隊長，佢根本就冇心幫我哋。計我話佢根本就係同仇雪杏夾埋，想過我哋組織一棟！」
　
「冇可能！」Match回應，簡簡單單三個字卻解答咗我內心一個疑問。
　
「點會冇可能！？佢一直都咁憎我哋組織……」
　
「總之就係冇可能！青鹿可以保證呢點！」Match顯然想盡快結束呢個話題，所以先講出呢個名。
　
而事實的確好有效果，399號聽完即刻靜落嚟，轉去盯實如初。
　
「嘩！？」下一刻，275號突然喺上方門口位置跌落嚟，一個背脊重重咁撻落地，「搞乜鬼，點解成間房唔同咗嘅！？」
　
睇嚟佢太專注外面嘅戰鬥，所以完全意識唔到控制室嘅變化。
　
「可惡！」依然喺上面嘅664號探頭望落嚟，「冇你守唔掂呀！」講完就一躍跳落嚟。
　
幾秒之後，開始有密密麻麻嘅身影出現喺門外面。呢班「蝕客」大部份都係四肢不全，一係斷手、一係就斷腳，斷去嘅部份就由義肢所取代。而全部人嘅眼珠都被挖空，曾經流過嘅血呢刻已經乾成黑色。
　
雖然已經包圍喺外面，但佢哋並冇進一步行動，而係發出淒厲嘅喊聲，低語出「唔好殺我」、「放過我」、「求下你」之類嘅說話。
　
「呢啲都係你殺過嘅人？」我好奇咁問664號。
　
「嗯，為咗成個組織好，總要有人充當儈子手。」664號邊檢查彈夾邊講：「可惡，特製子彈已經用得七七八八。」
　
「點解佢哋唔攻落嚟？」275號好訝異，「等我仲準備好秘密武器……」
　
「咁係因為呢個女人。」399號指向如初，「如果我冇估錯，就係佢搞到731號亂開槍引班『蝕客』嚟……呢班『蝕客』全部都係聽佢指令行事！」
　
「有道理，」664號同意，「頭先731號個精神狀態，好明顯就係俾人催眠咗咁……」
　
「既然係咁，係咪即係搞掂佢就得？」275號將槍口移到如初身上，「隊長，等你落指令。」
　
Match先望咗我一眼，可能有一秒考慮過由我嚟解決。但基於內心嘅不信任，最後作出咗另一個決定，就係點咗下頭，由佢嘅下屬嚟解決。
　
然後，好理所當然咁，399號最先開槍，緊隨其後係275號同664號。我並冇阻止到佢哋咁做，因為老實講，我都好想知道個結果……
　
連續開咗幾十發後，三個人都停低落嚟，表情顯得相當驚訝。
　
「哈……今次真係撞鬼啦。」275號用笑嚟掩飾內心嘅恐懼。
　
結果，全部子彈飛到一半嘅時候就直接消失，最後一發都冇打中到。
　
「無二先生，假如我真係如初嘅話，我肯定已經死咗。」如初微笑道：「你唔係一直好驚呢件事會發生㗎咩？」
　
「因為我知妳唔係。」我淡然咁講。
　
「嗯，我係你嘅『惡夢』……而只有發夢嘅人，先有辦法解決我。」佢用冷酷嘅語氣同其他人講。
　
接著，整個場地又再次出現異變，但今次並唔係改變面貌，而係整個空間好似遭受到強行拉扯咁。如無意外，呢個就係所謂嘅「領地擴張」。
　
只係短短幾秒間，整個空間已經擴張到十倍大，所有清理小隊嘅人都離我越吸越遠。過程甚至憑空出現出現新嘅牆壁同場景，就好似立體聖誕卡一樣。最後佢哋嘅身影完全消失喺視野範圍之內……
　
唯獨如初，我同佢之間嘅距離依然保持唔變。
　
「妳想帶我去邊？」我問，然後搖搖頭，「更正講法，『你哋』想帶我去邊？」
　
「我都好想講，但你只可以自己領會……就好似一直以嚟咁。」
　
如初慢慢行埋嚟，從我手上拎走Match嘅短刀。然後隨手一拋，刀跌落地下之後唔洗幾秒鐘就取消喺百米之外。
　
就喺下一刻，成個空間擴張結束了。而我哋嘅目的地，居然係頭先去過嘅英式大宅，發現如初嘅嗰一間主人房。
　
「點解帶我返嚟呢度？」我問。
　
「因為你根本冇仔細睇清楚過呢度。」如初一語道破，「你內心深處好清楚，卻一直都唔敢去承認。」
　
聽到呢度，我不自覺咁喺褲袋裡面拎出一枝煙。但一打開，卻發現裡面只有幾條煙仔朱古力。
　
「司有義！」就喺下一瞬間，一把令人懷念嘅聲音喺主人房大門傳嚟，「我話過你幾多次呀！唔可以偷王伯伯嘅煙！你點解硬係唔聽？」
　
──但裡面根本就冇煙，只係得朱古力！
　
我依然記得，當時只得七歲嘅我係咁回應。
　
「咁係因為我一早就估到你會咁做，所以靜雞雞換走晒啲煙！」一位年紀只有十二歲嘅少女行到我面前，叉住腰講：「都話咯，唔係咬住枝煙就可以成為大人㗎！」
　
雖然年紀輕輕，但若果跟同年紀嘅人比，佢可以話係成熟得多……當年，佢係孤兒院入面嘅小領袖，亦係我哋所有孤兒最仰慕、最可靠、同時亦係最鍾意嘅姐姐。
　
──唓，都係因為妳唔準我用打火機，所以先只可以咬……
　
「仲駁嘴？聽住呀！食完朱古力就乖乖地出去同王伯伯講對唔住！」少女講完之後就氣沖沖咁行出房。
　
雖然扮到好嬲，但我知道的──已經清走晒煙草味嘅煙盒、煙盒入面嘅朱古力、事前叫王伯伯要原諒我……呢種種細微嘅動作，都係佢溫柔嘅表現。而呢種溫柔，係冇任何私心同目的，純粹發自內心。
　
呢刻，我再望下周圍，主人房已經唔再係主人房，而係放咗四張殘舊嘅碌架床，床隔離仲有個書櫃，放滿咗兒童學習書以及繪本……
　
無論情景定係畫面，所有嘢都依然係歷歷在目。
　
「唔係『幾分相似』。」如初笑住講：「呢度的而且確就係你以前住嘅孤兒院。」
　
「只係我唔想諗返起。」我接住講落去：「所以你係想我面對自己嘅惡夢。」
　
「冇錯。」如初滿意咁點點頭，「然後你就會搵到答案。」
　
「點呀？」見我冇反應，少女突然返番轉頭，「如果你真係驚嘅話，最多我同你一齊去道歉啦。」
　
說罷，佢再次行埋嚟向我遞出纖細嘅右手，可以見到手臂上面滿佈住針拮過嘅傷口。
　
少女叫做「尤心愛」。
　
正如佢個名一樣，佢係第一個令我感受到「愛」呢種感覺嘅人。唔係戀人之間嘅愛，而係親人之間嘅愛。雖然冇血緣關係，但我一直以嚟都當佢係我嘅親家姐……即使係事隔多年嘅今日，我都依然係咁諗。
　
「嗯。」我點點頭。
　
如果唔係佢改變咗我，或者所有嘢都會變到好唔同。
　
正確嚟講，我早就唔存在喺呢個世上。
　
（待續）
　
　
下回：姐姐。
　
　
預計五集左右應該會完呢章！然後會同《極樂謊園》合做一本書出，各位期待下啦！！
　
睇完幫手畀個 LIKE 同留個言啦～你幾秒鐘嘅動作對我已經係非常大嘅原動力 😭
　
下集暫定星期二或三。
　　
＝＝＝＝＝＝＝＝＝＝＝＝＝＝＝＝＝＝＝
　
【非呃嬲植入式廣告時間】《無異之初》《時間守衡者》《絕命上映》《絕望走廊》《絕無轉機》《無限次告白》《醉後的藍》已經登錄各大書局。
　
IG: echoofheart