【龔成問答信箱】（Q20941-Q20960）

Q20941：

老師你好，想問小小配股既野因為呢排有好多公司配股

1. 配股係咪牛市既特點呢?

因為係課堂你話牛市其中一個特質就係好多IPO黎上市，咁如果經常配股係咪姐係公司覺得估值高要拎錢，其實係咪要小心呢?

2. 配股拆讓其實係咪好機會去加注呢?

好多時配股會折讓5-10%，其實係咪好機會去加小小注?因為而家呢個年代既配股好似好小事，比起以前配股好似會好大獲咁?

而且市場資金好似好多，呢半年小米/藥明/騰訊/安踏/美團/比亞迪都有大規模配股，但好多時配完幾日內就會升番去原本價位什至更高。

好似對股價冇半點影響，咁我如果趁配股加注有冇問題?例如藥明每3~4個月都有一次配股，我有好幾次想買但都買唔落手。

3. 配股次數多其實係咪好事?

藥明基本上近呢兩年，每三至四個月都有一次配股，但股價仲繼續升，其實如果經常問市場拎錢。會唔會係好/壞事?麻煩曬你啊

龔成老師︰

1) 可以算係牛一其中一個特點，會有較多企業係配股。

因為牛市時，市值一般會較高，集團配股可獲得資金，會相對一般市況時為多，故配股較多在牛市時出現。

但配股唔代表間公司一定係估值已經好高，只係機會較大。你要自行估值，來作判斷。

2) 唔一定，你要睇翻本身企業的估值。如果企業現價已經係好貴，拆讓5-10%其實意義唔大。

至於這些大型企業，在配股後依然大升，有機會係受當時大市氣氛影響。記住，我地投資一隻股票的策略，一定係睇平貴而定，唔好受大市氣氛影響到判斷。

3) 配股本身如果會發行新股，其實係會令現有股東利益被攤薄，是不利因素。

至於企業不停做集資動作，要睇翻個原因。如果係為了合理的發展，而發展對公司長遠又有正面影響，其實係可以接受。

------------------------------------------------

Q20942：

阿sir我係你舊生， 我以下係我初步推算968的合理區， 屬水桶1至2間。

・ PE 15至25 倍左右，所以判斷出現時為為理區頂部。
・按企業基本面的5點分析是合格，且總負債約26%，是理想。 （當中7成來自廠房及機器虧蝕所產生，屬正常支出）

・平均將盈利 45%派息並穩定，其餘留作發展技術及擴展廠房，提高生產效率 (管理層平穩務實，正理地將回報與股東分享）
・roe 22.4%，反映再投回報中等。
・EPS : 13% （合格）

利好
1）太陽能長遠發展潛力，等待技術在各在市場滲透及廣泛運用
2) 市地地位屬龍頭，但未到壟斷，進入此行業需求有一定技術需求
3）產品面臨原料加價仍然有轉嫁成本能力，反映在股東溢利上。
4）即使在疫情期間，業務有持續正現金流入，盈利及收益都有上升。

風險
1）原材料成本上漲
2）季節性（如6至8月的雨季，影響太陽的產量）
3）出售電力的應收帳款大
4）依賴政府對電費補貼 （這點 我有點不明白 平價上網政策對這企業的影響）
5）投入的固定資產 （如廠房）需要1至2年後才可以反映，有機會未能即使提升生產效率

我對信義既玻璃產品仲未有深入既了解，在產品質素如果有分析得唔夠好既地方，希望阿sir 俾d 意見

龔成老師︰

你大致上都講到佢架優勢，PE估算都正確。

至於佢支出，主要來自銷售、營銷、行政方面等正常支出(唔係廠房及機器虧蝕)，大致係正常。

信義光能（0968)本質不差，股本回報率算係處高水平，加上現金流強勁。

之後將賺翻黎的資金，再投資在新設備去加大產能，為未來作準備。因為新產能不會在1,2年內立即出現，所以每年都新建新生產線，係必需的。

而且，除左佢負債指標理想外，你再仔細睇，其實佢負債水平一直下跌，都係利好因素。

集團過往依賴政府對電費補貼，但近年補貼已陸續退場。所以，集團將加快非補貼大陽能發電場項目併網，令非補貼部份成主流。

而整個行業去分析，取消補貼有助行業汱弱留強，將令信義光能（0968)這類有規模和實力的企業，優勢進一步擴大。

至於你到13%的，應該係ROA，資本回報率。在這類行業，可以作為輔助性參考。

而EPS，係代表每股盈利，係一個數字，唔係百份比，你要留意翻。

至於其玻璃產品，主要用在太陽能發電上。相關產品要分析，要有一定專業知識，才可以做到。

但我地可以從佢表現，得知佢是否有優勢存在。例如你說成本轉嫁能力，就係其中之一。

你見到佢太陽能玻璃銷售毛利率係按年上升，可見佢有較高成本轉嫁能力，和規模經濟優勢，令此股長線發展正面。

------------------------------------------------

Q20943：

龔成老師你好，最近，老闆加了我人工，資金上稍為鬆動一下，所以想請教老師，當年除了月供股票和買物業外，還有沒有供人壽保險？謝謝！

龔成老師：

要睇你本身是那一種類型，如果你比較保守，而你本身在財富組合中，無乜防守性資產，投資儲蓄型的保險，可以助你這部分的建立。

當我地進行理財，攻守兼備是應該的，問題是比例如何，以及這個人風險度如果。

如果是純保險，你可以留翻更多資金，用作自己投資增值，「攻」方面的效果會更好。

當然，我認為保險在我地的理財中，有一定作用，但就未必要太多

因此，好睇你自己的風險度，自己的投資能力，以及你本身、你想的財富配置。

------------------------------------------------

Q20944：

龔sir，我係恆生工作，佢地有個職員嘅shareplan，每個月可以供HSBC，供幾多就自己決定，一期係3年，供完3股送1股，我依家已接近供完佢兩期。

我想請教一下龔sir我應唔應該繼續供，定係依家果期供定就停？？？thanks

龔成老師：

原理等同有折扣價買入匯豐（0005），這股雖然賺錢能能力不及過往年代，但質素都算有的，都有投資價值。

你預佢主力收息及少少增長，不是增長型公司。都有投資價值。

除非股價已貴，你就算有折扣價買入都等如唔值，就時就唔值得。我相信你可以做多一期（3年），之後再睇情況決定。

但都要題翻，唔好將財富過度集中在單一股票。

------------------------------------------------

Q20945：

你好，我現在39歲左右收入17000左近。

住公屋我太太收入大概7000，有請姐姐，3歲小朋友同一架車。係疫症前，太太收入大概有萬四蚊。因為工人約期滿咗返咗去印尼所以太太冇工作一年。

龔成老師：

現時經濟始終較弱，暫時你地守住先，相信過3-6個月會開始好翻D，希望到時收入增加。至於長遠，都要想一些提高收入的方法。加油！

------------------------------------------------

Q20946：

龔成老師恭喜你, 你又救多個人啦 ---- 我 ^^

雖然我湊住兩個年幼小朋友之餘仲要番工, 還未靜到下來睇你既書, 平時只有小量時間望下你 facebook 既分享, 明白你不停講的理論

但我係燥急子, 就在 1211 比較高位買入, 而家係我自己抵死, 坐緊股票監, 唯一幸好係, 我知 1211 都算係有質數, 這點令我比較放心. 唯有慢慢等佢回番. 重整財務後再重新部署

今次我真係實實在在地 LA 野, 知痛了. 呢D咪就係冇股票知識同心急囉, 就跌得痛.
另外亦都明白股市升趺, 開始冇感覺.

由短時間win10萬變賬面上輸10萬, 由抽到居屋諗住簡樓,點知比人DQ左.

短時間太多大上大落, 幸好平時睇得你D分享多, 個人在處理危機時冇咁慌, 比較鎮定.

非常感激你不斷教我們, 令我們渡過每一個難關.
感謝你哦. 你也繼續加油.

龔成老師：

比亞迪（1211）有得守的，但唔好再心急加注了。

其實投資經歷，都是一個學習過程，我20年前都試過多資因為無知識，而輸左當時好多錢，好痛。

但正為有知痛，先逼自己不斷學習，提翻自己如果無知識、唔做功課，往後只會輸。

所以，我現時每星期用6小時去分析一隻股票，一年睇50隻，但只投資1、2股，就是明白做功課的重要性。

加油！

------------------------------------------------

Q20947：

老師 之前見到你有個讀者問答提到外幣存款戶口
想問係點運作架？

因為我自己本身都有d 唔同國家嘅外幣係戶口
唔知做乜好 而家又無得旅行

如果想將呢d外幣全部整合做d穩陣投資有無d咩選擇？邊種最穩陣但又可以慢慢滾存到賺錢？謝謝

龔成老師：

你可以做定期，又或者投資該地方的股票，例如美股。

如果不懂選股，可以投資一些ETF。

例如，你手上有一些美元，長期無太大作用，與其持有美元，不如投資美股基金，例如VOO，只要有美股戶口就能投資。當然要注意基金與現金風險度不同。

------------------------------------------------

Q20948：

龔sir你好，Follow你Facebook 4年多 一直想上你嘅堂 但因為要照顧小朋友所以一直抽不出時間

1）而家睇緊你嘅股票勝經 想請問有無邊一本書會講多啲關於計算合理區跟便宜區的方法？定係一定要上你堂先可以學到？

2）另外想請問Tesla近來回了不少 幾多錢先算係合理區同便宜區？

期待過幾年小朋友大啲可以抽到時間上你堂

龔成老師：

1）要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

你可以睇《股票勝經》《年報勝經》，以及巴菲特相關書，都有部分的。但由於估值要配合最新的經濟、經營、企業情況，因此，書一般都好難表述，所以較多都會在課堂講的。

2）Tesla不差，增長快，近年當業務由虧轉盈時，股價向上好勁。不過穩健度不足，股價上落好大。

例如在資金上，要不斷在市場各途徑集資，以維持營運及研發，未能憑以戰養戰的模式，去穩健地發展新項目，資金鏈斷裂風險存在。

市場方面，有危有機，因為電動車是高增長市場，但行業結構變化大，存有未知數。

另外，股價上落太大，市場超前反映前景因素，只要增長力比預期差少少，都會有明顯回落。只可以話，現水平略貴。

如果你長線睇好，預佢股價上落一定好大，唔好理中短期股價，只要你投入注碼不過多，可長線，等更大收成。

------------------------------------------------

Q20949：

老師，你好，我最開始留意你啲Facebook ,不斷咁去增加投資知識，亦會買你的書，和已報投資班。

現時最想問問你是否贊成買年金 達到扣稅目標，幫自己儲蓄/慳啲交稅錢，謝謝！

龔成老師：

扣稅年金有好有壞，好處是稅務上的優惠，但就要強行投資一個較低回報的項目，你的資金會因此而被鎖死。

當然，如果你本身都想買的話，絕對是無問題的，但如果只是為買而買，就要清楚翻對自己是否長遠有利。

至於儲蓄保險，如果當中有投資成份，回報就有機會比退稅年金為高，當然，風險度都會高左。但整體上，一般都是穩健的。

如果你目的是較低風險，投資退稅年金會較適合你的。

------------------------------------------------

Q20950：

我46歲。公務員。自住物業市值12M. 剛剛賺取回贈。欠mortgage 5M. 現金有3.5M，看完老師的書後想將現金買入股票資產, 因系統運行，現金長遠貶值

資產長遠向上可否推介一下。另外,女兒今年會去英國讀書，英磅走勢如何？

龔成老師：

我地最重要是將現金，轉為真財富，優質股、物業都是真財富，你可以並行持有。你現時已有物業，將資金投資股票會較好，以你的年齡，適合投資平穩增長股的。

至於英磅，相信最差時間已過，如果你有實質需要，就應該分注買入。

你可以投資「平穩增值股」+「潛力股」

$350萬，暫時可動用$100萬-$150萬。

平穩增長股：潛力股
8：2
（如果你投資實力較強，可增加潛力股比例）

平穩增長股：考慮盈富（2800）。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20951：

龔sir 想推薦給你一隻研究了很久的股票：中國電信

希望你能重新研究一下中國電訊業，將其重估。

我認為5g時代下，中國電訊業會有很大發展空間，而且就算我看錯了，現價安全邊際亦非常大，但如我看對了，中國電信728 會有5倍上升空間

原因如下：

在5GAIOT时代，工業互聯網，雲服务，物聯網都產生巨大需求，移動營運商的價值将從原主要提供语音及流量的傳統管道升華，價值重塑。

而中國電信是天翼雲是中國第三大雲服務商。

中國電信在18年已開始研究5g MEC ,為企業提供邊緣雲計算服務，包括laas,paas,saas等更多增值服務，收益從管道轉向軟件和服務

未来是數字化时代，工業互聯網、自動駕駛，智慧醫療要用到大量的算力，IDC,雲計算，物聯網業務会飛憫增长。

龔sir看好比亞迪電動車，無人駕駛是其中核心價值之一，其亦需要用到電訊業的算力

龔sir看好小米物聯網平台，其中亦會產生大量算力，亦需要電訊業提供

電訊業to b 利潤會大增，而且這不是to c ,不需要太大讓利。

龔sir能否重新分析一下941，728？

尤其是728， 其5g建設和聯通 共享，能節省大量成本

龔成老師：

好，多謝。我研究下。

其實你上述都講出了不少中國電信（0728）的利好因素，這些因素的確會帶動，我都認為對佢有正面影響，長期會向上。

但都要留意，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

因此，仍要睇5G的應用能發揮到幾大。

你的方向是正確，長遠有增長，但政策因素，以及5G的發展力度，應用程度，就會影響你上述分析的因素，對這企業有多大影響。

------------------------------------------------

Q20952：

你好 本人28歲 未結婚 最近月入大概40k
最近一年才開始學習投資，想請教一下投資分配

現在現金和股票的資金大概1:1

匯豐1手-》不會加注，會考慮賣
置富4手-》不會加注，會考慮賣
港鐵1手
中銀香港 2手
中電3手
阿里 3手

未來想買入小米(~$20)和加注港鐵，請問這樣配置可以嗎？如加注港鐵，請問合理價位大概是多少？

最後一個問題，如果股市大跌，應用多少現金儲備買入股票？謝謝！

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，匯豐（0005）、置富（0778）未必適合你的年齡，你長遠要賣出。

至於其他股票，你持有就得。

你28歲，其實可以集中「增值」方面。

你買入小米（1810）可以，你預現價合理區頂，可小注。而港鐵（0066）在合理區，你分注買入已得。

另外，你可以考慮加入恆生科指ETF（3067）。

如果出現大跌，要睇平的程度，正如2020年3月，當時大跌市，出現了恐慌，我自己動用了之前儲落的儲備現金去買入（這部分現金在正常市況不動用），我分了多少買入，但未用盡時，股市已上翻，只掃了部分貨。

------------------------------------------------

Q20953：

成哥 我有少少想請教你
現時我手上

1810平均價30.2 6000股
2013 26 3000
700 566 100
9988 288 300
241 23 4000

大多數都在高位入了 你覺得我需要調整嗎
特别小米 現在跌得得多

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

你現時的持股，都有質素的，根本無問題，微盟集團（2013）風險略高，不宜過多。

整體上，組合可以持有，小米（1810）雖然你在貴的價位入，但這股有得守的。

但你太過集中新經濟股及近期熱炒股，這是最大的風險，你應該建立更平衡的組合，例如加入盈富（2800）、港鐵（0066）等。

------------------------------------------------

Q20954：

老師，想問下992 聯想
應該幾錢係平宜區/合理區?

一般般，個人電腦市場競爭大，賺錢能力不強，你見個人電腦十年來，價格都無乜加過，就知行業賺錢能力弱左。而手機方面，佢定位一般，出現高不成，低不就的情況。

但見你2019 有咁樣分析, 唔知現時有冇新既睇法?
不過如果我係想月供既話， 覺得係咪一個可取既選擇？

龔成老師：

你的分析都正確。

聯想集團（0992）都是有質素的企業，但增長力不算好強，產品的競爭大，如果講個人電腦市場，過往多年來價格都無乜上調。

近期因為疫情，需求大左，所以整體正面，發展力都提高左。

長遠都有發展的，始終有些業務都有增長力，整體是平穩增長型，但未必是高增長，現價合理區中上部。

長遠都是正面，但要睇疫情過後，真正的市場情況。算是平穩增長類，但不是高增長類。

------------------------------------------------

Q20955：

龔sir, 想請問你對新鈕科技9600點睇? 原本因為佢話係saas概念, 係上市前都一直唱好, 但點知一直跌到而家超過50%, 而家睇人話佢係假saas, 點解我睇唔明既?

相反睇中國有贊同微盟我係由佢分別1蚊同9.9開始持有, 基本上已經係倍升股, 到底點樣先分析到何謂真假saas呢?

新鈕蝕超過60%, 仲值得持有嗎?

龔成老師：

新紐科技（9600）係IT解決方案提供商，質素都有少少，但不算強。

佢主要為金融機構提供以軟件驅動的傳統型解決方案，於金融機構及醫療機構提供以軟件驅動的創新型解決方案，包括由數據分析以及圖像及文字識別技術提供支持的解決方案。

佢係2,500名中國金融機構IT解決方案提供商中排名前100，亦為一家中國醫療IT解決方案的提供商，解決方案包括特色醫療質量控制與安全預警平台，使醫院主管及部門主管能夠實時監控醫療專業人員的行為。

佢亦提供機器人流程自動化解決方案（或RPA解決方案），通過以機器人執行實現流程自動化來取代勞動密集型程序。

長遠都有發展的，但未能確定佢有好強的競爭優勢。過往生意上升，整體算是不差，但以佢過往的盈利水平，價位唔算平。投資值博率未算高。因此，唔算在saas有特別技術，你唔好只睇報導，要睇「招股書」。如果是已上市的企業，就要睇「年報」。

我地是買入企業，你自行研究企業十分重要，另外新紐的市值只有$20億，而微盟（2013）的市值有幾百億，大細好唔同。

另外，你投資微盟賺錢的原因，是你在較久之前買入，然後當市場熱炒相關版塊時，新紐科技上市（佢當然會利用熱炒期，以一個好貴的價上市）（其實當時整個版塊都貴），之後，微盟及這股都回到合理價，因此，最大的問題是平貴及時機。新紐減持會較好。

------------------------------------------------

Q20956：

龔SIR你好 小弟又有事想請教你 先多謝你用寶貴的時間回答小弟問題

我的投資組合當中 因由以前家的指引下 舊經濟股的佔比都比較多 而很多在高價位時買入 但由於舊經濟股在市場上

跟過往幾年來講 價錢已下降不少 而有些未必可重回到舊時高位 好像 941, 11, 5, 1, 883 等等 而令我難以調整投資組合

因為如果現時放部份的股份時, 需要先承受了一定的虧損, 而長期持有 未必可以令我在這年齡層上最大化我可以有的財富增長 想請問 我這些股票應如果處理會較合適? 謝謝！

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

941, 11, 5, 1, 883，不是無質素，但如果比例太多，就要賣部分。這些股的增長力不強，但收息可以，持有與否，以及多少，要睇你的投資目標。

我見你話賣出有虧損，其實你最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q20957：

我有6手291($67)及3手1211($232)在銀行户口。現金只剩$12萬左右。

本來部份錢希望作首期，投資一間約$9M樓租出去，現在股票跌咁多又不忍賣，請問應該点部處？

另外如康怡/西半山/黃竹坑(Southland)你會建議边區作投資？

龔成老師：

華潤啤酒（0291）有質素，品牌價值高，銷售網絡強，過往的生生意盈利都理想，長遠有發展力。

相信長遠的盈利增長仍不差，不過，現價貴，與行業其他股都有類似情況，現價唔平，成為投資最大的風險因素。你有貨可持有。

至於比亞迪（1211）有質素有潛力，但貴，你有貨持有，但唔好心急加注。

要提翻，買入股票一定要長期的，所以如果你中短期要資金，即是你方向錯左。

如果真的需要資金，就要賣出部分，先賣部分優質及增長力較一般的，之後再賣佔你組合比例較多的。

康怡/西半山/黃竹坑都是有質素的，都可以考慮，其實你方面自己就得，西半山有校網因素，而黃竹坑潛力就較高。

------------------------------------------------

Q20958：

阿sir，我想問宜家恆指pe 息率都去到好高估既水平，係咪即係風險好大，會有好大下行風險？

另外，我想請教下，歷史既恆指都無乜科技股，只有少量，但宜家多左好多入恆指，咁會唔會pe同息率都相對之前20年高左？

啲科技股既pe極高，息率近乎0，咁係咪唔可以再用歷史平均pe去估算恆指高低？應該調整番少少？

龔成老師：

當市盈率太高，同時股息率太低，代表指數已去到貴的水平，我地投資的值博率已減左，不過，不代表一定會跌，因為貴完可再貴，同時，就算這刻貴，如果之後的企業價值有明顯增長，就會慢慢合理翻。

至於你提出歷史恆指的問題正確，恆指因為將會有較大變數，所以平貴定義都不同。公司數目由50間慢慢變為100間，當中更會加入更多新經濟類股。

而我地都要調整指標。

你可以當30000點，是恆指的合理區中上部。33000初步貴，22000初步平。（當然，這些都會因時間而改變），所以，你要自行計出這幾個點數，當之後加入新公司至100間後，該點數最新的市盈率，而日後就以市盈率作平貴指標。

------------------------------------------------

Q20959：

龔成老師，你好，我月入八萬左右，按揭430萬，現金只得80萬。應不應該買股票投資？應該買邊隻？謝謝

龔成老師：

如果你平時供樓無問題，支出不會過多，每月仍有現金儲到，其實可以動用資金投資，$80萬，動用$40萬-$60萬是無問題的。

至於投資那些股，要睇翻你年齡與風險承受能力。

平穩增長股：潛力股
8：2（如果你投資實力較強，可增加潛力股比例）

平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20960：

阿Sir, 呢排大跌市先知有現金係手係咁重要，合理價想入貨都冇子彈，我近乎全倉進入跌市，好彩平衡既配置先未有真正蝕到本金，所以我依家考慮緊賣d貨攞番d現金，你建議咁做嗎？

如果要賣，你建議賣賺緊錢既舊經濟股定係蝕緊錢既新經濟股？定係都係以企業質素行先？

P.S,我依家開始用地獄省錢法，做多一份兼職，希望身體頂得住啦。

龔成老師：

如果你現時無現金，的確要賣部分。質素是分析的核心。

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

新舊經濟股都要有，問題是比例如何。

儲蓄當然好重要，但都要平衡，不要損失健康。我地累積財富，不是用死力，而是用腦，將資源有效發揮。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20421-Q20440）

Q20421：

老師，我想請教下，一間冇盈利既公司，例如（1833）佢點解可以令到股價高上，而投資者又願意買呢隻股票？

龔成老師：

因為市場集中在佢將來的價值。

在企業估值的方法，不少都會考慮到將來的情況，例如現金流折現法，就是計算將來現金流，變成現在價值的總加。

這並不是考慮最近1年，而是1年、2年、3年，一直考慮。

就算企業這刻的現金流較少，只要將來的現金流較強，都會有一定的價值。

當然，愈是將來的現金流，不確定性愈高，就會令股價波動愈大。

------------------------------------------------

Q20422：

老師，自從睇左你嘅書（但未睇哂），我開始每月儲錢，而家28歲，月入20k，每月儲到8,000-10,000，而家儲左50k. 我有以下2個大方向想請教：

1. Hkd 5, 000供股＋買增值股，暫時打算hkd 2,500係盈富(2800)，hkd 2,500係比亞迪（1211），再每月買1手etf(3067)

2. 月供4000落儲蓄保險，（之後第2年開始年年派20,000），每月買1手3067，之後佢每年派息先再買股票。

真係多謝老師，如果唔係你嘅書，我好肯定我唔會每個月儲到8000-10000

龔成老師：

太好了！你已經踏上了正確的理財之路，保持知識與財富增長！

28歲，如果你可承受風險，可選（1），而（2）會較保守的（當然，如果你本身好怕風險，就（2））。

不過（1）的方案，現時比亞迪（1211）貴，建議你供其他，盈富（2800）+2845+3067都得，這個組合會較穩健。

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

------------------------------------------------

Q20423：

老師，弱弱一問我用富途牛牛投資如果想買收息股佢會點派息？

同埋3738（阜博集團）值得投資有潛質嗎？
thanks

龔成老師：

當你買入某股後，就要睇翻該股有無息派，以及除淨日幾時，這是一個介定有無息收的日子，如果這日或之後先買，就無法收該次的股息。

如果確定你有息後，就會在派息日派息，一般都是現金的，會直入你戶口，除非佢有「以股代息」，你就有權同佢講要股（但可能要你主動提出）。

阜博集團（3738）是較高風險類。

業務是線上視頻內容保護服務供應商，客戶包括七大全球電影公司、電視網絡公司及其他內容擁有者。

過往一直虧損，近年開始有錢賺，業務增長加快，不過，本身的獨特性不是好強，規模未算好大，因此，未見佢有好確定的優勢。

潛力度有的，不過就存有較有不確定性，這類股只適合小注投資。

------------------------------------------------

Q20424：

請教下：
27.4入左1818
7.7入左1448
長線投資，可以？

龔成老師：

招金礦業（1818）不過不失，佢主要從事勘探、開採及銷售黃金。

本身的資源有一定的價值，但盈利始終受國際黃金價格影響，因此本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

股價很大程度與黃金掛勾，由於人類對資源的渴求在長期不會停止，而資源是有限的，所以，長遠都會有上升的潛力，但中短期就會波動。

近期受惠於金價上升，此股升了不少，市盈率去較高水平，唔平。

此股唔係無質素，但只屬中等，不建議持有太多。

福壽園（1448）有質素有發展力。你可長線。

佢係中國最大的殯儀企業，有一定的規模，而針對的是高端市場，服務有一定的質素，擁品牌及知名度，有相當的賺錢能力，財務穩健負債少，因此企業本質不錯。
由於行業處增長的市場，而新競爭者要入行不易，因此對原有企業有利，故福壽園是優質的企業。

佢憑著本身的優勢，能取得比同業更好的回報，而福壽園管理層表明會持續擴展，策略上會透過併購同業及買墓園去擴充。

由於福壽園的模式成功，因此只要投入資金去發展，複製過往的成功，已經能取得理想的再投資回報率，長期來說此股有一定的增長潛力。

不過，由於此股業務好獨特，因此業務情況在年報上或資料上，未必能完全反映，雖然數據及資料上都顯示此股有質素，但往往要時間證實。

至於企當估值方面，市場對此股的評價亦不低，企業經常處略貴水平，$7是合理區頂，不能太過進取，以分注小注投資是一個策略。

管理層的野心很大，投資後不要升少少就快，要耐心持有，等長期更大的收成。

你有貨可持有，無問題，但就不要太急去加注。

------------------------------------------------

Q20425：

老師你好，我今年42歲，現時財政狀況如下：
本人及先生月入：$60000
年尾花紅：$10-12萬
樓按揭：餘12萬（快供完）
現金：45萬

MPF: 70萬，高風險為主
儲蓄保險：8年前實供9萬，現值12萬，擺多10年會收番20萬（唔知應否提早取出？）

自己人壽儲蓄：$6萬/年，尚要比多2年
自己危疾儲蓄：$1萬/年，比多10年
先生人壽儲蓄：$3萬/年，比多5年
股票：只有1000股匯豐，平均約58入，每月月供股票$4000

本人想財富增值，日後早少少退休，想請問：

1. 月供股價應否轉為2800？
2. 儲蓄保險應否提早取出？今年11月可取回12萬
2. 應該如何投資，可令財富穩定增值？

謝謝你的回覆

龔成老師︰

1） 匯控（0005）主要用來收息，增長能力好一般。建議你轉做盈富（2800），增值能力會較好。至於現有持股，由於唔算多，持有住都可以。

2） 其實"保險"只係理財中防守部份，買足夠保障就可以，增值應留比優質資產（如優質股、物業等）去做。但由於你們保單都就供完，甚至已供完，故唔建議去做變動。

3） 現時你成個資產組合中，股票比例明顯太少。建議你用"平穏增長股" + "潛力股"作組合，去創造一個增值平台。分配上，應用"平穏增長股"作為主力，再加一些"潛力股"。

現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

現時大市只是合理區，你現有45萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q20426：

龔sir，你係成功過程中
點樣調整到蝕左錢個心態

有時蝕左錢就好想即刻追返
心急就亂，亂就好易出事

龔成老師：

我持有比亞迪（1211）12年，多年前由十幾二十蚊，見佢上到$88，其後見佢有$88跌近9成，去翻$12！

比亞迪當時已是我最大持股，由賺變蝕！

我的財富當然大幅貶值，我同自己講，過往的無辦法，最重要是將來，理性分析現時應該持有/加注/賣出，在投資世界，理性是最重要。

我上了一課，經歷財富的大起大跌，心理質素大幅提高。

記住，最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q20427：

男神，我同你報喜
我由2019年12月識你之後
就開始進行月供股票
到目前為止

盈富增值＋16.22%
港鐵增值＋12.18%
中銀增值＋3.47%
金沙增值＋55.16%一手手買
中間有小小炒賣
必瘦站增值＋104.41%
不過中生制藥就－14.85%
都係多謝你先 之前我只會將錢儲定期 一年有1-2萬蚊已經十分開心

而家唔止增值1-2萬蚊
真係好開心

您真係致富明燈
任勞任怨帶領大家財富自由 你真係超級無敵靚仔兼大善人
真心多謝你 ！

龔成老師︰

能夠幫到你，咁就好！

緊記月供係一個長線計劃，月供最少維持3年，並持有這些股票5年以上，才會有較理想效果。

當中會有升有跌，但係正常的。只要持股係有質素，中間股價波動係唔洗理，長線持有就得。

另外，唔好短炒，可能一次半次有賺到錢。但我之前做銀行、證券行咁多年，見證大量客短炒全部最終都係蝕錢，只有長線才能有錢賺。

長遠來說，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q20428：

老師，有個情況想問你意見：

當年我媽退休時（我還未接觸股票），被他人說服用退休金買2628，仲要以高位（大約@33）買入共46手。買入後大跌，她也沒有止蝕（因她也不太懂股票）keep住到而家。

想問一下如何處理？（想幫佢好好咁manage一下佢既退休金）

現在賣出轉其他收息股？等回到某一水平才賣？還是keep住唔賣，就咁收息？謝謝

龔成老師︰

其實已退休人士，應集中係"收息股"身上。用佢產出架穏定現金流（即係股息），去支援退休生活開銷。

中國人壽（2628）近年賺錢能力弱左，質素只算中等（不是無質素）。但佢唔係收息股，唔適合你母親，就算持貨都不應太多。

你可以慢慢沽出（唔係一次過，要分段做），再建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

現時股價只是合理，未到平宜，因此換碼時宜分注。同時，可保留一部份作現金，等大跌市才動用。

最後，你要留意係創建這個收息組合時，唔好太集中係單一股票上。相同行業不可佔組合多於3成，而單一企業不要高過15%，否則會有過度集中風險。

------------------------------------------------

Q20429：

龔sir，想問平有教我們供股票既意思是否定期一手一手禁買入跟晤同既股價追上?

因為我之前入咗隻莎莎國際1.2 入的～ 這股都用供股形式去分段投資合理價嗎？

因為我之前以為供股個意思係張啲股票同一口價落三成本金跟住借七成 畀你股24個月禁供

這樣是否誤會咗你嘅意思

龔成老師：

我所講的是「月供股票」，要先同銀行登記，簡單來說，就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

如果你不想用上述月供，用「自行分注」都得，例如每1、2個月買入一手。

莎莎（0178）都有質素的，相信最差時期已過，你都可以久唔久入一注，但最近升左上去，又唔值得買入得太密，同時未必值得持有得太過多。你原有貨不持有，但就加注未必要加得太急。

------------------------------------------------

Q20430：

請問6837可以入貨嗎？之前d潛力股都未返到買入價。謝謝你

龔成老師：

海通證券（6837）業務有：證券及期貨經紀、資產管理、自營交易、投資銀行、直接投資、管理本部及其他分部、融資租賃、海外經營分部。

業務主要地是中國，近年的生意不算差，但增長力唔算強，同時盈利略有波動，始終行業都會受投資市場上落因素影響。

現價合理，但你預佢都會有波動風險，長線投資價值都有但不是高增長類。

------------------------------------------------

Q20431：

Hello,想問0175 同3993 前景如何

龔成老師︰

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

現時價位在合理區頂，甚至有少少貴，股價波動，有貨可長線。最好回少少，或這刻小注等跌再加。

洛陽鉬業（3993）並不是完無質素，但不能說是穩健，佢的營業額同盈利都十分波動，這點令分析佢較困難。因為好難確定到往後經營環境對佢的影響，同埋，佢亦因成本令佢盈利較波動，這同樣是較難預測的。

我地好需要，用過往的數據去分析，同時判斷往後的經營環境，如果過往數據變化太大，會較較分析。

另外，這股的股價較為波動，這股不是不能投資，但不建議大注。

------------------------------------------------

Q20432：

龔成老師你好！ 睇你專頁都有一段長時間，晌上年開始我入市以下股票：

0003-2100股 平均價$13.14
388-8股 平均價$382.65 （之前月供，上到$500後停供）
823-631股 平均價$65.94
1177-3000股 平均價 $9.4
2628-2000股 平均價 $16.42
3328-5000股 平均價 $4.75
8328-4000股 平均價$5.22

每月我大概可儲$14000，當中有$7000月供領展。
2628同3328 ，我打算升番d就平手或賺少少離場。 到時大概有5萬，再加我手上餘錢，合共8萬左右。

我有諗過以下想法，想問下老師的意見？

1/ 8328最近升左好多，請問值得高追1-2手嗎？
2/我睇中1789及3718，請問老師對此兩隻股票意見？
3/ 0003 現價好平，值得現在加注嗎？

謝謝老師

龔成老師︰

1） 信義儲電（8328）都有質素，但盈利上好波動，不宜持有太多，唔建議加注。

2） 愛康醫療（1789），以長遠業務分析，正面的。佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。

睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。

這股業務不差，有增長潛力，盈利增長，這反映企業有實際的價值提升。不過，這股經常處於少少貴的水平。現時市盈率達40倍以上，投資時要考慮價格風險。

北控城市資源（3718）有質素的。佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。現價大約合理區頂位，不建議這刻太大注。

3） 煤氣（0003）現價係合理區中間，加小注可以。但緊記，個別企業唔好佔組合15%以上，否則會有過度集中風險。

另外，投資記住係用長線持有模式，讓優質股自然咁增值，而唔係做短炒。

現有持股中，中國人壽（2628）質素較中等，不宜持有太多。你可以將部份換至其他優質股，咁會較好。

而交行（3328）主要係收息，若你係年青至中年，由於佢無乜增長力，都唔適合你。

------------------------------------------------

Q20433：

龔成老師您好，本人是來自澳門的一位80後的家庭主婦。最近開始閱讀你的作品，希望從中可以學習到投資的知識，期望你不久的將來可以過來澳門開班。

目前有小小問題想請教一下你，本人大約在6年前自以爲懂投資的情況下，購買了以下股票，購買了之後就一直跌到現在

本人想放售然後入小米，但還是想聽聽龔成老師意見，應該繼續持有，還是怎樣，感謝你的解答

751--10,000股 （成本價$6.6）

1060--60,000股（成本價 $2.78）

1816--20,000股（成本價 $4.5）

龔成老師︰

創維集團（0751）從事電機、智能系統技術業務、智能電器業務等，中國及海外都有市場。

近年增長力唔算強，生意未見有擴展力，盈利有點波動，整體的品牌價值及銷售網絡，未算好強。長遠發展力只是一般。你預佢增長力唔算強，長遠算是不過不失。

如果佢只係佔你組合小部份，持有都可以。

阿里影業（1060），炒作較多，風險高。這企業到現時仍未有盈利，市場只憑佢前景去評估，其實這會有相當的風險，這類股最多只能小注。

中廣核電力（1816）主要從事發電及電力銷售，以及核電項目及非核清潔能源項目的建設、運營及管理。

佢主要於中國從事核能發電業務，包括運營及管理核電站、銷售電力、管理及監督核電站的工程建設，以及向工程公司提供相關技術及維修服務。

這企業發展平穩，但增長力不強，收息可以，但就唔好對股價有太大期望。

現時小米（1810）都有點貴，想換碼入貨，等佢回1成先會較好。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q20434：

希望龔sir可以審視一下我既理財妝況

背景： 26歲，未計雙糧花紅月入20k ，月儲12k,其中7k月供股票，現金儲4-5k

現時現金大約11萬，投資組合現值約32萬

現時月供 2800 - $2000
066. - $2000
788. - $1500
1177. -$1500
手持股票：
2800。2400@$27.3
066。 1100 @$44.2
788. 9750 @ $1.35
1177. 408 @ $7.3
178. 6000@ $2.21
1211. 204 @. $44
1212. 3000@ $8.24
1257. 3000@ $3.45
1928. 800@ $27.83
1972. 1200@ $21
2388. 1020@ $28.2

（1）. 股票組合係咪偏向平穩而唔夠進取？

（2）增持1212會唔會好過增持178？

（3）長遠來說，放走178/2388而換其他增長力較高既股票，得益會唔會更大？

（4）如果公司私有化，對股票持有人會有損失？

（5）. 新經濟股佔比係咪太少？現價太貴而不敢入市

（6） 我將家用交俾家母時，原來她一直都會將一少部分儲起，再若干年後（大約15-20年）送贈給我，
但問題係現金已經不斷貶值，如果我說服家母儲起既現金慢慢入手黃金會唔會更加好？

再次祝福龔sir工作順利！！

龔成老師︰

1） 以你年紀，平穏增長股和潛力股比例，大約各佔一半。所以，你月供配置，係可以。但持股比例，就偏保守。

2） 利福國際（1212）和莎莎（0178）其實都差唔多，大家都受經濟週期和疫情影響。但利福國際（1212）負債較多，風險高少少。

3） 莎莎（0178）都有質素，但近年係弱左，不過不是無質素，只要不過多貨就得。而中銀香港（2388）係有質素，可長線持有。

4） 要睇翻佢私有化個收購價，如果比你買入價低，會有財務上損失。同時，由於你不在持股，你將失去佢升值的得益。

5） 以你年紀計，係偏少，潛力股和平穏增長股各佔一半左右，會較理想。

現時部份新經濟股，有輕微過熱架情況。要若直接入，最好等回翻先好入市，或者用月供去儲貨都可以。

6） 黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多（<3%），而且持有的應該為實金。其餘最好投放在優質股，增值效果會較理想。

------------------------------------------------

Q20435：

龔sir～ 我係一個大學生最近先開始玩股票～ 依家手持01810 06993 03800

暫時感覺都唔錯 都問下有機會突破嗎？ 同埋都買左 01076 00438 想問下呢兩隻股既睇法～

因為都偏冷門小小，麻煩你

龔成老師︰

我唔知佢中短期會唔會有突破，但只要股票係優質，長線持有佢就會自然增長。

小米（1810）係優質潛力股，可長線持有。

藍月亮（6993）有質素，畢竟係新股，有一定不確定性，唔好持有太多。

保利協鑫能源（3800）質素只是一般。佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率不算高，小小注好了。

博華太平洋（1076）主要從事博彩及度假村業務，包括發展北馬里亞納群島聯邦塞班島綜合度假村。

集團生意一直下跌，連年持續虧損。而且，2018和19年核數師意見出現有小問題。

整體而言，此股無投資價值，賣出較好。

彩虹新能源（0438）主要從事太陽能光伏產業業務；生產和銷售發光材料和鋰電池正極材料；太陽能電池元件及其他配件交易。

此股盈利波動，賺錢能力唔高。加上佢負債係一個唔理想架水平，長線我建議你換碼至其他優質股較好。

你在選股能力和經驗上，都未算太理想。我建議你先學好選股和定平貴知識，再慢慢去投資。就算想現在投資，也先集中係一些大路股票，會較穏陣。

你可以睇我寫架"80後百萬富翁"、"財務自由行"和"股票勝經"，會幫助到你。

------------------------------------------------

Q20436：

啊Sir想請問一下我今年37歲。以下組合可以如何優化？太多銀行股同時蝕緊錢。
應止蝕轉其他潛力股嗎？

1. 煤氣x1,000@$16.94
2. 匯豐x400@$76.05
3. 港交所x200@$279.4
4. 騰訊x200@$463.4
5. 領置x200@$59.5
6. 中生製藥x4,000@$8.58
7. 比亞迪x500@$69.8
8. 小米x800@$25.3
9, 舜宇x200@$126.1
10. 中銀香港x500@$26.55
11. 雅生活x250@$37.5
12. 中國銀行x10,000@$4.72
13. 阿里巴巴x100@$176

龔成老師︰

你上述持有的，基本上都是有質素的，問題不算大。而你37歲，可以在當中作一些調整。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，應以增值為主。匯豐（0005）、中行（3988）只係收息，無乜增長力，唔適合持有太多。

其餘股票都適合，但你潛力股佔比重佔好高。佢地有增長潛力，但同時波動性都好高，所以最多只可以佔你組合4成左右。未來新資金，可以優先投資平穏增長股，令組合更平衡。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

另外，潛力股可考慮安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20437：

老師，我媽取25萬給我幫佢投資，我既諗法係用最低成本幫佢買入高息股以賺取股息，我睇了以下兩隻：

00808（50手）及03988 （50手），你覺得可以嗎？
謝謝

龔成老師：

上述兩隻都是有質素的股票，收息無問題，現價合理，可投資。

其實，持有2股有少少集中，你可以建立一個收息股的組合，目標是5%、6%的股息率的收息股，可以考慮加入以下股票（在當中選股）：

例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

------------------------------------------------

Q20438：

老師，想問下你意見，（大概18歲時曾經問過風水師，佢話美容行業唔岩我）

賭場我已經做左十幾年，一直無起色，職場上明爭暗鬥令我很累，加上自身性格問題，做得唔開心就轉工

但以家開始年紀大，唔想捱夜，如果35歲先試學做美容，咩都從新頭開始，係咪太遲。

加上美容店都請勞工（有經驗），而我就無經驗，條路好似好難行。

龔成老師：

我從來不信命運，我只會信我自己。

如果你真心想試，就大膽去做，你這年齡仍是可改變的時期，你試完，如果唔得，都可以轉去賭場。

好多野我都唔試，永遠唔知結果的！

你美容從頭開始雖然有點遲，但如果方向正確，過5年後、10年後，仍可以有一翻作為，加油！

------------------------------------------------

Q20439：

老師，當我見我個倉每日跌2%，個心又不安了，究竟要點樣先可以培養到好嘅心態？

龔成老師：

我持有隻比亞迪（1211）已經有12年，試過由$88跌到$12，跌左9成！之後先慢慢上翻。

你要集中分析「企業長遠的價值」，唔好太理會中短期股價，同時，唔好集中一隻股，要建立「組合」。

記住，「企業」是重點，短期股價不是，要平常心，同埋唔短期股價波動，最好練唔好日日睇股價。

------------------------------------------------

Q20440：

老師，我想問中國生物製藥現價算合理嗎？

另外，騰訊的主要收入來自網絡遊戲，風險會否因此比阿里巴巴高？騰訊現時價格是否太高？

希望㰍sir能抽空解答。謝謝！

龔成老師：

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區中上部，有貨可持有，分注或月供可以，這股可以長線持有的。

騰訊（0700）與阿里（9988）都有質素的，都可以長線投資，月供適合。騰訊雖然網絡遊戲佔了一定的比重收入，但佢最有價值的，就是「平台」，這亦是現世代好有發展的資產。

我地分析企業時，要思考那些是核心的企業價值。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績十分理想，又身處高增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。

現價略貴，如投資要明白當中的風險，這刻在注碼上不過份大注，就可以投資這股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19721-Q19740）

Q19721：

Sir,我是股票基礎班舊生。 嘗試以新能源行業去尋找潛力股。 覺得916/龍源電力有潛力發展。

以簡單來說他們屬於一條龍發展（ 從事風電場的設計、開發、建設、管理和營運。 除了風電業務外, 還經營火電、太陽能、潮汐、生物質、地熱等其他發展項目； 向風電場提供諮詢、維修、保養、培訓及其他專業服務製；製造和銷售用於電網風電場及火電廠的電力設備）

在全國擁有300多個風電場, 業務分佈於中國32個省市和加拿大、南非、烏克蘭等國家。龍源已發展成為一家以新能源為主的大型綜合性發電集團

隨著能源需求不斷增長 能源供給不足的矛盾, 新能源需求不斷增加, 世界各國提出減少對煤炭的依賴 綠色環保及新能源再生 。 國內推行節能降耗, 低碳化以及綠色發展清潔能源。 新能源產業在中國發展有重大發展及前景。

請見如下分析及賜教， 謝謝

1）2015～2019年：營業額、盈利、純利平均有增長

營業額～ 過去五年平均8.67％

盈利～ 過去五年平均 11.16％

純利率～過去五年平均15.10％

2）現金流～ 過去五年都保持有正現金流

3） 流動比率～ 過去平均5年平均36.10％（反映流動負債大過流動資產）對？

4）ROE～過去平均5年平均8.38％

（睇到企業保留盈利, 以及低派息, 可以反映企業有再投資回報）對？

5）總負債比率～平均過去5年平均204.18％（反映企業須要融資借貸發展業務及還債）對？

6）過去5年總負債每年增長不過快

7）推算龍源合理市盈率：16～20

8）計算龍源估值：$9～$11

9）平宜區在$5～$7

10） 從大環境分析, 龍源被受政策風險影響

包括 風電平價上網, 競爭配置等政策陸續出台, 輔助服務市場的逐步開展, 新能源企業面臨著電價下降收益下滑的風險。 只有平價低補貼電站項目才能獲得建設指標。

煤炭價格的波動, 將影響火電業務的經營業績及氣侯風險

龍源2020 打造智能生產管理體系, 開展智能風電場試點建設。 近年進行融資（還負債及發展業務）以及合併發行A股, 將會有更多資產注入, 擴張其國內及國外的業務發展。

至於管理層（睇了過去5年年報）

～ 有野心及藍圖大計, 積極擴大有效投資, 加快工程項目, 建設提升經營管理水平, 增強高質量可持續發展後勁, 加快世界一流心能源公司建設 , 放眼國際將業務擴展國際。

11）龍源的營業額及盈利（過去5年）, 比836 2380 2208要高。所以認為龍源有發展潛力, 但其股價已升太多。

謝謝老師抽空幫忙分析如上企業。 學生已從8堂課所學知識盡量發揮。學生～

龔成老師：

你分析得不差，龍源電力（0916）的有質素，這股有長線投資的價值。你講出了這企業的要點。

佢係中國發展風力發電業務，收入大部分來自銷售風電場及火電廠所發的電力，而有關電力銷售主要倚賴淨售電量及上網電價。

旗下客戶為風電場及火電廠連網的各地方電網公司。

過往業務發展不差，生意與盈利保持增長，不過股價就有少少波動，要留意股價上落風險。這股可長線。

1）2）3）這幾點，反映企業有穩定發展，同時財務數據理想。

4）雖然可反映再投資回報率，但ROE數字不高，反映賺錢能力未算好強，不過這是過去的數據，隨著成本改善及需求增長，這方面將有所提高。

5）可以咁講，不少內地企業都有較高借貸的情況，如果企業能有穩定現金流，這方面的風險會減低。'

6）對。

7）大約。我自己會比低翻少少，保守D。

8）大約，可以拉翻闊少少。現時合理區頂至略貴。

9）大約正確。

10）對，基本上都講出了重點。

11）基本上正確，不過當你比較時，由於龍源是新能源類企業，最好找翻同類比較會較適合。在全球大環境及國策因素下，這股長線是正面的，現價勉強合理區頂，或小小貴。如投資，小注買入後等跌再加，都是一個策略。

你應用得不錯，之後不斷利用課堂知識，以及「企業評估表」去分析企業就得，不斷練習就能提高實力。

------------------------------------------------

Q19722：

老師，我之前投資股票，都是跟風氣買，現在全部帳面虧，全部都虧損....現即使打算買入優質股，但已經沒有多餘資金了，現在應繼續持有？還是賣掉部份的？感謝

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

------------------------------------------------

Q19723：

咁請問現階段有無咩特別平貨推薦值得購入呢？
thx

龔成老師：

現時大市合理，新經濟股貴，已經無平貨了，因此投資不要心急。

合理價，可考慮的：盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

較有潛力，但唔貴平：安碩恒生科技（3067）。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19724：

Sir 覺得今年最感恩嘅事，就係因為疫情太悶所以好得閒係屋企，玩電話認識到你既page，再買埋你啲書！

唔經唔覺原來已經月供左半年+買金沙 ，加加埋埋原來都有13萬帳面，+10%整體組合。由以前月光族，見到第一個投資10萬好開心！

2021 我要12月31日 同你分享
我見到第一個100萬

2021 updated list :

(2800) 盈富 5000
(0027) 銀娛2000
(388)港交所2000
(2382)舜宇光學2000

比亞迪停供了
平啲先再供返2000

而家再儲現金 每月 $15000

Sir 仲有冇修正？
定係加多一個舊經濟股？

多謝你！

龔成老師：

好呀！要保持知識與財富的進步！

其實你的方向正確，無問題，但要留意，現時大市處只是合理區，未算平，你要一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

所以你保持月供加儲現金，方向正確，現金不用心急動用。

而你唔需要加舊經濟股，保持進行就得。

期待你完成$100萬目標！

------------------------------------------------

Q19725：

龔成老師, 你好!因近一個月我在FB開始留意到你的專頁, 亦在華富財經看到你的【龔成問答信箱】, 我是想請教你一些投資問題, 現我這樣發電郵給你, 不知道是否有打擾 , 先說聲不好意思!

我是一個已年過40歲的文職員工, 從未買過股票, 亦未曾有任何投資經驗, 近來想取出可動用的50000元積蓄及每月4000元來投資, 其實我真係毫無idea, 不知道應該是月供股票或是買基金!

我亦沒留意任何股市消息, 身邊朋友只提醒現在亦不是好時候做投資動作, 所以想藉著此電郵向你請教一下, 我應該如何分配50000元積蓄及每月的4000元? 是否可以現在這時候入市? 謝謝, 待回復!

龔成老師：

你40歲，仍有財富增長的能力，但不是高增長，而是平穩增長類。

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。你可以每月供$4000，而現時現金不要動用。

同時，這基金的風險度適合你年齡，到你有一定知識，才加入其他股。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q19726：

龔老師,你好. 上年10月開始接觸股票，一開始跟朋友買汽車股。賺左約20000. 之後係46.01 買入理想100股, 現在跌到31元了。因為之前見佢跌得太利害，我係31.7 賣左50股(我諗已經做錯左)

現在已經蝕左接近1500美元, 想請教如何分配理想及以下股票 ,有那一個是需要放或繼續持有?

100股ACB(11.9買入)
100股BTBT (32買入)
1000股 06808 高鑫 (9.37 買入)
1000股 六福 (19.6 買入)

我只想好好去投資令股票穩定上升，但回想這兩個多月.真係不值一提. 榮幸報左你倍升股票班，期待學職正確知識及方向去投資。謝謝你

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

所以，你最重要是建立一個長期的組合，要優質，要平衡。

美股ACB，有危有機類，這股不建議持有太多，但小注長線無問題。如果你無法承受風險，就賣。

美股BTBT，較高風險。小注持有無問題，但就唔好持有過多，同時你預佢一定會大上大落。

高鑫（6868）及六福（0690），可持有，無問題。

另外，建議你投資盈富（2800），分注入，平穩增長，如果想投資美股，就VOO，這是追蹤標普500指數的基金，適合你。

股票班見！

------------------------------------------------

Q19727：

龔老師你好，本人是股市新手，上年10月才接觸股票，本來賺了一點錢，可惜11月底本人一時大意在USD521時按錯制賣空了23股TSLA

當時還懵然不知，等到收到月結單後 才知此錯誤，現在 TSLA 已升至好多，應該如何減少損失，請 龔老師 救救我！十分感激！

龔成老師：

這股現時雖然貴，但現時是市場焦點，對佢有持續的炒作，無人知佢會升到多少的，因此，你點都要賣，如不想這刻賣全部，最少都要賣部分，減少自己的風險先，因為佢再上升可以好誇張（當然，佢回落都可以好快，但無人知）。你現時同賭一樣。

因此，點都要最少賣一半，餘下你當等多一陣，如不對路就全賣。

------------------------------------------------

Q19728：

Hello 龔sir,2年前開始睇你fb，個時未有D咩股票知識，不過見你初步分析後，開始月供住平穩增值股先
0003 同2800，上年再加埋0066，全部都預長線投資，所以而家都慢慢等收成。

上年9月做左你股票班既學生，好多謝你既教導同分享。
今年踏入30歲，知道應該將多d資金放係潛力股（水桶1）度，睇左你d書既分析都有d心水
但有以下問題：

1. 錯過左上年3月既大跌市，見而家好多股都上升番好多，可能只係合理區什至破頂。未必咁快等到佢落番去平既區域。

我見你話合理區通常都唔多入市動作，但係咪都應該分注入少少再等？因為目前見好多都一直升根本無落番去。。

2. 絕對明白投資需要耐性，亦都有睇股神同你既書，但有時見身邊朋友短炒獲利又真係會心郁郁。。有咩方法可以忍住手。。

3. 好同意股神所講應該投資能力圈範圍/熟悉既企業，不過自問熟悉既範疇好細。。有嘗試去睇d覺得有潛力既行業。但都會太專業好難明。。你係點樣擴大自己既能力圈睇得明咁多唔同既企業。。

我記得你講過你無投資bitcoin...因為自己唔熟。你會建議我地花時間鑽研下呢D新業務，定係花多D時間研究潛力相對無咁大，但睇得明既業務？

有d問題可能你已經答過好多次，多謝你既時間，謝謝你。

龔成老師：

1）如果你組合無水桶1，而你是30歲，你可以睇翻第二堂教你的分配比例，其實你應該加翻多D在水桶1。

你唔應該永遠等，點都要有D貨在手，這刻當然不是最好時機，但不能無貨在手，所以，建議你小注或月供，慢慢入恆指科技ETF（3067）。

你過往不應「一直等跌」，因為我地要有一定的貨，同時留有現金等跌，而不是無貨等跌。

2）減少睇股價，多睇年報，同時現時是「收購公司」。

3）你可以先投資ETF，就可以在自己不太懂得的範疇，都可以投資。同時，你要不斷分析相關企業，假設新經濟股是你的弱項，你可分析阿里（9988）、騰訊（0700）等這類較大型的先。其實，進步無快速方法，就是不斷分析企業年報，你可以用課堂的「企業評估表」去助你分析。

虛擬貨幣，是人為創造出來的，絕對不是「資產」，有沒有真正的價值，如何定義真正的價值，我有相當的疑問。

這些人為創造的貨幣，因為關注度由很少變得大，價格會大升，但這背後是否有真正的支持，我不知道。只能說，投資這些貨幣，投機味好重，可能大賺，亦可能蝕到一文不值，因為，當中有沒有價格，我不知道。

但這不代表佢無價值，佢可能好勁，只是我自己不知佢好勁定好差。

佢長遠的價值，取決於「有多少人用」，即是說，雖然無真實價值，但可以有「交易價值」，如果長遠好多人用，的確可能有高價值。

因此，這些虛擬貨幣，由於我無法作出專業分析，所以，我不會投資。

但如果你分析到佢長遠的交易大，大家都持續關注，就有價值，就值得你投資。

------------------------------------------------

Q19729：

龔成老師 有個問題想請教下你

上次講有層600萬樓 我擺左35萬裝修變套房 但裝修完租唔出 因為平裝 原本諗住租金收入有2萬2/3都可以叫4厘回報 我應該再扔筆錢 預可能十萬。去裝返靚啲 博租金多啲 定平啲租出去算？

平啲租出去可能得$16000-18000 咁樣其實我唔洗變套房都收$13000 租 地段係旺角有電梯其實幾好 不過層樓成60年 定係過左禁售期應該換樓齡新啲樓好啲

每月供款係19200
唔該你 真係唔係好諗得通邊個方案好

龔成老師：

你最重要比較翻市場，你要了解現時市場的情況，同類單位現時租金多少，是否易出現，有裝修及無裝修差多少。

我相信你唔好再加錢裝修，試下去翻合理的市價，相信你會較易出租的，最重要是睇「市場」。

記住，永遠唔好自己估，而是睇翻市埸現時的情況，你地段不差，交通方便，就算60年只是有裝修就能出租，但不能太貴租，只要合理租金就無問題。

------------------------------------------------

Q19730：

成哥，又有問題想請教下～

2021年市場氣氛熾熱，但有兩則新聞令我聯想到股災。

第一則係人民幣兌美元持續強勢，用外幣結算的中國公司會受益，但其他國家會否因此又提高匯率？

如此下去，貨幣政策只會失衡（加上去年大量QE）引發股災

第二則係芒格表示美股已去到泡沫化邊緣，都係因QE所致。知道成哥你唔估後市，但想請教你的分析，謝謝

龔成老師：

新經濟股現時的確有少少過熱，因此這類股如投資要小心，控制好注碼，但如果本身企業有質素，有增長力，又不用太快賣出，我地最重要是「建立優質、平穩、適合自己的組合」。

你第一點，當中的關連好複雜，你好難得出絕對的結論及時間，所以好難作出推論。

第二點，QE不斷印銀紙，的確會令資產出現泡沫，但無人知是否會爆，幾時爆，因此我地只要明白現時新經濟股不平就可以了。

------------------------------------------------

Q19731：

老師，我有份自願醫保係冇投資作用，計過要每個月俾$8000(加價&假設5%通脹)

難題我點樣run呢個保費。。本身我全部月薪計哂支出(eg,洗費，保險，投資本金，etc) 每個月得返$600儲。謝謝老師。

龔成老師：

我地理財，要攻守兼備，這是一個整體性的財富配置。防守部分要有，但同時，不能沒有進攻。

你買醫保是防守部分，但太多，這是最大的問題。你應該調整翻，令到自己有資金投資，令到你之後的財富有增長力。

同埋，你唔能夠太少現金在手，要有基本數，現金都是防守一部分。簡單來說，保費、投資、現金，要平衡。

------------------------------------------------

Q19732：

請問下最近有咩潛力股推介？

龔成老師：

坦白講，近期潛力股都上升左，這刻好多都唔平，強行去買入反而有風險。

安碩恒生科技（3067）算是較平衡又可考慮的，這基金可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19733：

阿sir 你好。我follow你fb 大概有半年。我今年30頭。2018年開始買股票。月入5萬。1個月用1萬左右。股票投入80幾萬。

現金有30左右。而家成個profolio down緊10萬左右。我想34歲前有500-600萬。有無可能？之後有機會轉做全職主婦。

擔心之後無收入唔知點算。我知銀行股唔應該持有太多。我成日覺得個經濟好翻就會升番上我個買入價。所以唔想放住。

同埋自己好留意個股價。賺幾千就想賣。跌左50%都唔肯放手。其實應唔應該有止蝕位？

我知自己如果長遠咁做一定係輸。但我又諗唔到可以點樣令自己可以睇到長線投資。

龔成老師：

你要改變整個投資概念。

我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

所以，你唔好有短炒心態，要以長期的「財富配置」為核心，建立一個適合你、平衡、長期的組合。

你要分析翻，現時的持股是否有質素，如果一個行業過多就要減，而有質素的股應該要長線。

同埋，你要定翻合理的投資目標，34歲$500萬有難度，應該調整翻，太進取只會令你面對太高風險。

------------------------------------------------

Q19734：

老師，呢幾年我都有睇你書同面書，呢個疫情短線中線都有賺過，有保留長線，比亞迪都係睇得多老師先忍手到而家，感謝老師。

本人有家庭未有樓，住緊家人買嘅樓，冇急切自住需要，見樓市回落都睇過樓，但好像投資水位不高，其實咁我應該留錢在股市定買樓呢

龔成老師：

長線投資一定是王道，表面上，短炒好似好易賺，但慢慢你會發現好難賺。你可以忍到手唔賣隻比亞迪（1211），是你應得的回報。

如果你現時無太急要買樓，就不用這刻買。

不過，如果你無樓，而長遠會有自住需要，其實總要買，但就可以等跌多少少，以及自己多少少資金先買。最好的策略，就是你買樓後，仍有現金及股票剩，之後可以進行股樓並行的策略，這是最好的。

暫時買資金在股票，盡快利用股票增值，以及多儲資金，如果之後樓市下跌，就可把握機會。

------------------------------------------------

Q19735：

龔sir，2800可以分散風險，係因為包含左多隻優質股，所以可以以較低風險去享受企業成長的結果，相反如果係7500呢類的反向ETF，就同2800的方向相反。

係呢個前提下，長期黎講優質股會有增長，是否代表呢類的反向ETF就會一直下跌?因為我持有著一定數量的7500，考慮緊應該減持，直接賣出，還是等股市再出跌下跌時再賣出，謝謝

因為止蝕或離場的概念係for，優質度不高的股票，逢低吸納係適用於優質股，但反向ETF 不知應該由甚麼方向考慮

龔成老師：

長遠來說，7500這類反向ETF，會持續下跌，因為貨幣會不斷貶值、經濟會向上、優質企業會成長，令長遠盈富（2800）向上，7500與盈富對立，即是長期向下。

當然，有時股市會大跌，7500會有回報，但以長期計，恆指仍是向上，7500就會向下，因此，7500好難玩的，建議你賣出。

如果你不想一次過賣，就段2次賣。

始終這類反向工具，要捉到時機先有回報，而捉時機，其實好難，因此不建議投資。

------------------------------------------------

Q19736：

老師，我沒有持有小米，現價貴，你覺得幾多錢可以入

仲有500k cash , 每個月50k 可以投資，應該點用好呢
諗住過幾年先買樓

龔成老師：

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，不過現價唔平，去翻$20以下合理，最好都$24先投資會較穩健。

如果你好想入，以月供模式進行都可以。

至於現時的資金及每月儲蓄，你可以月供股票，又或自行分注入，因為現時潛力股大多較貴，所以比例應較少。

你可以投資「平穩增值股」+「小注潛力股」。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。這類股這刻比例宜較少方

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19737：

老師，您認為中旅0308都值得投資嗎？

其實想上你股票班，不過工作輪班未必上到哂課堂，暫時在睇您既書同影片，可以既話我都想。唔知您會唔會考慮推出網上課程可以讓學生重溫呢

龔成老師：

香港中旅（0308）質素只是中等。

佢業務有旅遊景區及相關業務、旅行社旅遊證件及相關業務、酒店業務、客運服務。

過往業績不過不失，但賺錢能力不算強，增長力不多。

疫情對佢有一定的影響，疫情過往會慢慢好轉，但由於本身都不是十分好賺，因此，長遠的投資價值，只是中等。現價合理的。

我最近同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；
✓股票、基金、債券、的士牌等資產的運用和買賣技巧；
✓懂得分辨資產質素和平貴，在最合適的時機買賣；
✓如何以最低的價錢，買到最具升值潛力的物業
✓致富3部曲，如何從當下這刻開始啟動！

至於股票班，由於內容太重要，暫時唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

------------------------------------------------

Q19738：

Hi 龔Sir, 你好.最近由朋友介紹認識龔Sir, 不知不覺一個上午沈醉咗係你FB

不浪費龔Sir你時間了, 廢話少講…以下是有關我同我先生背景及財政狀況.

希望龔Sir你可以在有時間, 有MOOD時比少少意思我, 呵呵…

本人(47歲)已婚與老公(42歲)及一隻小狗共2人+1狗同住房協資助房屋.:

收入:

男: 月薪22000 女:月薪16000

資產:

男: 208萬買入房協資助房屋. (2020年6月入伙) 首期10%, 月供8000左右(H+1.25%)
5萬 備用現金
45萬MPF

女: 2010以133萬買下荃灣中心單位(324呎)，月供5000左右(H+0.7%). Balance 80萬. 時值430萬.
收租11600/月.
30萬 備用現金
40萬MPF

家庭: 5萬備用現金 (聯名戶口), 每月儲蓄3000.

計劃: 過多3年, 女的到了50歲打算申請退休VISA, 一家3口(連同狗狗) 搬去泰國清邁居住.(以前曾經住過2年).
*未諗到過去有咩搞…

請問如果過多3年真係走得成, 好唔好賣哂2層樓過去? 由於房協資助房屋3年後只可以賣給白居易, 不能出租....

3年後, 如果樓市好, 2間賣哂就可以套多D現金, 過去生活...

另外, 自己30萬 備用現金一直放銀行....(因為買親股票都死....😅....) 連小米都可以$10放, 一放就勁升囉..

龔成老師：

唔建議你地太心急賣樓，因為無人知你地過去果邊的生活情況，會否有其他出路，因此，唔好太急賣香港樓，令自己更加彈性。

你地應該把握這段時間，盡力儲蓄及投資物業以外的資產，等自己有更多準備過去。

如果真的想賣樓，首先賣政府樓，私樓就收租先，到日後較後期，你認為香港資產已不需要，先最後賣香港樓。始終買賣物業的動作大，成本高，因此盡量小心進行。

至於你現時的現金$30萬，就大部分持有現金，最多投資$10萬，分注買入盈富（2800），買入後長線。

------------------------------------------------

Q19739：

啊Sir我由上年上完你既初班後開始建立左呢個倉，暫時價值$112萬。

如果我想今年再加大每隻現有股票的數量，目標放多$100萬落去，我應該點部署呢？

我有兩大問題。

第一，我現有的一些股要已比當初的買人價升了不少，但我又未夠貨，應如何是好？例如823, 27, 2382, 1810, 1177, 1448,9988

第二，我現有的組合應增加那隻股票的存貨好？

優質股:
1. 煤氣x6,280@$14.5, 9.8%
2. 銀娛x1,000@$52.25, 5.67%
3. 港鐵x3,204@$38.93, 13.4%
4. 領展x1,701@$61.05, 10.91%
5. 金沙x4,522@$28.41, 13.8%
6. 盈富x2,[email protected], 7.32%

-潛力股
1. 鐵塔x90,[email protected], 11.28%
2. 小米x1,400@$23.42, 3.56%
3. 舜宇x400@$119.2, 5.17%
4. 雅生活x2,500@$32.5, 8.76%
5. 中生製藥x9,[email protected], 7.23%
6. 福壽園x6,000@$7.67, 4.96%
7. 阿里巴巴[email protected], 6.59%

龔成老師：

1）最重要睇翻企業的質素，長遠發展，現價估值，就算股價升了不少，只要佔你組合比例不是過量，而這刻未算貴，就可以買入。

當然，買入的力度有可能減弱，你可以以「一邊買入，一邊留現金」的模式進行。

這幾隻股，可以月供，慢慢收貨，只要注碼不過多就得。

2）現時大市不是特別平，你照你原本計劃進行就得，總之慢慢入貨，同時留現金。潛力股力度不要太急，至於平穩增長股，你可以考慮比例較小的，如盈富（2800）、銀娛（0027）。

------------------------------------------------

Q19740：

龔sir您好，最近想投資美股ETF，但發現voo，spy，arkk近期都不斷創新高或者係高位。雖然係打算定期買嚟長揸

但都想知唔理總之定期買定都等一等回落返先~想知戈三隻衣家入合唔合理~麻煩阿sir了

龔成老師：

你可以考慮VOO，這是追蹤標普500的，是較平衡的一隻，現價合理區中上部至頂，只要你用分注模式或月供，慢慢入，同時留有現金，就可以進行。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。