香港人，香港事，繼續見諸 Medium ，全文亦畢錄如下。

link.medium.com/5c85MA45NZ

- - -

索女．喪死．機關槍啲 friend 。

經過峰迴路轉嘅一個星期之後，香港仍然都係咁樣樣。分別在於，相信 831 太子車站警察恐襲有死人嘅市民越嚟越多，相信 811 新屋嶺有女被捕者被性侵犯嘅人亦越嚟越多。而警察企喺前線嘅情緒越嚟越唔穩定，對於市民嘅質問、責罵同侮辱都越嚟越容忍唔到，郁啲就出棍出椒，變相令「辱警罪」未立法、先實施。

星期日，盤點一下，香港而家三個比較大鑊嘅問題。 (咁當然大鑊嘅問題有好撚多，但我揀三個嚟寫先，好冇？)

- - -

一、《逃犯條例》修訂：必將捲土重來

或者你會問，乜林鄭唔係宣布咗正式撤回修訂草案嘅咩？仲有乜嘢問題？

有。仍然有。

我唔係講緊林鄭到十月立法會時食言、打茅波或者回馬槍。我係講緊，香港剛接受國際組織 FATF 嘅評估，被評喺打擊洗錢及恐怖份子資金籌集方面符合規定。詳細內容我另文寫咗，有興趣就自己睇啦。

重點係， FATF 嘅報告入面，提到香港同中國大陸並無正式移交逃犯或追討流出嘅黑錢嘅機制，基本上都係行政長官同中國當局說了算。 FATF 建議，香港作為一個獨立金融體系，應該同中國訂立正式合作嘅機制。

喂，咁咪即係都係要香港同中國大陸簽訂移交逃犯嘅協議囉？林鄭之前借陳同佳案之手，借刀想一招了解決埋呢個歷史遺留落嚟嘅問題，差在搞到一鑊粥。

但日後，如果香港呢一輪抗爭平息，政府始終要面對 FATF 嘅建議，始終要同大陸商討移交安排。如果香港抗爭者輸咗，到時香港同大陸嘅談判，會得到啲乜嘢結果？九成九唔係一個合情合理同平等嘅安排。兜咗個圈，付出咁多人命、身體上及人身自由嘅損失，換嚟一個更加恐怖嘅中港逃犯移交安排？唔好喇卦？

- - -

二、香港警隊：調查定解散？

喺林鄭宣布「撤回」之後，示威者仍然留喺街頭同警察對峙嘅原因，係因為五大訴求，缺一不可。其中，第二項「追究開槍責任」 (612 版本) 隨時日演變成「成為獨立調查委員會，調查警察濫權及違法行為」。

問題係，政府選擇借警隊之手鎮壓，警隊就如屎坑觀音，易請難送。呢個事實，從藍絲以至警隊喺林鄭撤回之後嘅反彈、不滿，已經顯而易見。對於警方嚟講，承受龐大生理及心理壓力，日以繼夜咁喺前線同行雲流水嘅示威者搏鬥，然後被政府好似避孕套咁用完即棄、棄如敝屣，唔嬲就假嘅。

愛國愛黨嘅民建聯就已經聯同警察親屬，向政府表達強烈反對成立獨立調查委員會嘅意願。無架，中央政府同特區政府話要「止暴制亂」架嘛，警察都係 take order 做嘢，有乜理由事後畀班九唔搭八嘅人指指點點，甚至要承擔法律後果？我知係歪理，但係民建聯同差佬真係咁諗喎。

同時，喺「撤回」之後，有一派講法係以「解散警隊」作為替補嘅一項訴求。我知道大家出發點喺邊度，不過好認真講，如果呢班警察冇咗份工，佢哋會做啲咩行業去維持生計呢？我覺得啦，好大機會係撈偏，又或者加入一啲親建組織另行成立嘅衛隊，類似義和團咁，到時候情況一樣大撚鑊。

相比起獨立調查同解散警隊，解放軍出動都仲比較有可能。係呀，我嘅睇法係，無論香港人爭唔爭取到獨立調查都好，警隊最終都係被用完即棄，由中共嘅軍隊或武警取代。咁現有嘅警察會唔會被處分，定係另行收編入去新嘅體制？睇下利用價值囉。

- - -

三、公信力：特區政府能否繼續施政？

香港政府喺六月至九月期間，好成功咁將政府、保安局同警隊嘅公信力摧毀。每日下晝四點嘅警察記者會，原意應該係好似 2014 年佔領行動嗰陣咁，用嚟做 propaganda 、操控民意。殊不知 2019 年情況唔同，民意對於警方嘅一方之言冇乜反應，甚至覺得警隊戾橫折曲、顛倒是非。

及至 811 同 831 兩單大事件，網上流言、傳聞根本數之不盡。一系列嘅二手料、三手飯，矛頭全部指向新屋嶺有聳人聽聞嘅惡行，以至太子地鐵站有人被活生生打死，然後警隊封站兩日、毀屍滅跡。

當然，政府已經強烈否認所有傳聞，警方甚至叫「匿藏喺口罩後面嘅人企出嚟、攞證據出嚟作出指控」。雖然我明白證明一件事冇發生或唔存在係好困難，但係差佬要求被殺嘅人出嚟做證，以至被性侵犯嘅受害人挺身而出，真係同叫個盲嘅偷睇國家機密一撚樣。無理。

而家嘅問題，係政府已經失信於民，甚至腐敗到入心入肺。港鐵公司明明係上市公司，但近月亦基本上完全配合警方 (以至中共官方喉舌) 嘅要求，任由警方入站內執法、隨意封站、連 CCTV 片段都顧左右而言他、拒絕公開。市民要求「生要見人，死要見屍」，其實真係好基本嘅要求。求真、求證，亦係還 831 呢單慘劇一個公允定義：係 64 天安門屠殺嘅地下鐵版，抑或係一場誤會？

假如政府同港鐵拒絕開誠佈公 (梁振英語) ，市民對於政府嘅懷疑只會無日無之。啲咩智能燈柱，未來只會起一拆十。呢個局面，如果冇一個大革新，或者冇一個新嘅政府班底執政，承諾洗心革命之類，就只可以靠強權高壓管治。

不過咁，如果美國國會真係表決通過《香港人權與民主法案》，咁就可以向損害香港人權、自由、法治同民主嘅人士實施制裁，對於當權者就算係有所制衡咯。