青蛙王子（下） . 估唔到，森林裡面真係有好多動物係人變嘅，唔止有王子，仲有丞相嘅仔、高官嘅仔......總之全部都係家世好好嘅男人。 . 其中有一個，係右國嘅王子，佢係獨生子。 . 右國國王同王后夫妻情深，所以無納妃嬪，自從王子失蹤後，王后亦無再生仔女。 . 呢個王子返去右國，一定係王位繼承人。 . 當佢話要娶我嗰陣，我非常心動，嫁畀佢，我就唔駛再做唔受寵嘅公主，即刻成為太子妃，第日係王后，一人之下，萬人之上。 . ， 但我見到右國王子感激嘅眼神，我忽然意識到，我對咁多權貴有恩，即係有各國嘅人脈同資源，點解我仲要企喺「一人之下」？ . 女人嘅終極目標，唔係王后，而係女王。 . 我拒絕咗右國王子嘅求親，我聯絡我吻過嘅所有權貴，計劃奪取西國嘅王位。 . ， 當然，我自己都要出錢出力，為咗賺錢，我逼不得已，開始變賣母后留低嘅首飾。 . 執首飾嗰陣，我搵到一封密函，係母后生前寫畀我嘅。 . 母后話，佢係一個巫女，但身體唔好，生咗我之後，佢知道自己命不久矣。 . 佢希望令我有幸福嘅人生，女人嘅幸福，自然係嫁個好男人。 . 但我嗰陣仲係個細路，母后實在無辦法估計，我第日會鍾意咩類型嘅男人，對方又會唔會接受我。 . ， 所以，母后用盡僅餘嘅法力，周遊各國，將各國權貴嘅仔，變成各種動物，並且擺晒喺皇宮嘅森林度。 . 母后同佢哋講，只有「真愛之吻」先可以解除魔咒。 . 事實上，魔咒嘅內容係，只有我嘅吻，先可以解除魔咒。 . 我恍然大悟，怪唔知得，森林度會有咁多「青蛙王子」。 . ， 嗰本引起我聯想，令我想試吓錫青蛙嘅《美女與野獸》，都係母后留畀我嘅書。 . 一切一切，都係母后一片愛女之心。 . 我流下感動嘅眼淚，我一定要過得好！ . 喺眾多勢力嘅幫助下，我終於成為一代女王，我亦好感激母后，為我留低咁多「遺產」。 . ， 但十年後，有一次我出去打獵，居然遇到一個巫婆。 . 巫婆向我下詛咒，將我變成一隻老虎。 . 我身邊有好多士兵，但佢哋都被巫婆嘅巫術迷暈咗，無助嘅我被巫婆帶走，去到一個森林度。 . 巫婆同我講，只有「真愛之抱」先可以解除魔咒。 . 咪住先，同我母后嘅「真愛之吻」諗法一樣喎。 . 唔通，呢個巫婆又有一個仔，佢又想幫佢個仔搵籌碼？ . 甚至，呢個巫婆係我母后嘅同門師姐妹？ . ， 我有好多問題想問，但我依加係老虎，講唔到人話。 . 我只可以眼睜睜睇住巫婆離開，默默等我嘅「真愛之抱」出現。 . 唉，母后留低咗咁多「遺產」，點解佢無諗過留低修煉巫術嘅方法？ . 如果我識巫術，依加我就唔駛咁無助。 . ， 與其依靠人哋，不如自己努力。 . 要有自己嘅成就，最緊要就係有實力。 . 否則，就算你手上有好多資源，但你無相應嘅實力。 . 終有一日，你擁有嘅嘢，都會失去。 . －完－ . #短故 #短篇 #小說 #陳美濤 #廣東話 #粵語 #tomatochan #青蛙王子