【龔成問答信箱】（Q22361-Q22380）

Q22361：

龔sir你好呀呢排上緊你進階班，有幾條問題想問

1. 記得你講過話如果非控股權益條數太大，就直接用盈利條數去計純利率，咁大概幾多為之大呀? 如果非控股權益佔盈利10%算唔算大?

2. 如果一間公司旗下淨係有聯營或者合營公司，冇任何附屬公司，咁係咪盈利=股東應佔溢利? 冇非控股權益呢條數?

3. 假設旗下有聯營公司，如果用盈利-聯營公司應佔溢利去計純利率，理論上純利率數字係咪會更加準確?

4. 最近試下分析2138，近年逐漸以醫療業務為核心，係全港最大非醫院醫療機構，亦都不斷有收購動作，以擴展專科範疇。本身醫療行業係有前景嘅，

市民消費力越黎越大，營業額有平穩上升，本質應該唔差嘅。但睇佢財務數據唔算太理想，近年純利率有下跌趨勢，我留意到註冊醫生同僱員開支比例不斷上升，佔成本好重。

但係轉個角度睇，近年香港環境係幾差，目前企業仍然以香港業務為核心，始終會影響業績。而管理層對前景有信心，就算面對大環境影響仍保持擴展動作，醫生團隊不斷擴大，

所以拉低左純利率。長遠將營運模式複製到內地，大環境利好情況下，都有唔錯增長力

我分析成點呀，有冇其他我未睇到嘅因素? 呢度都幾大段野非常感激

龔成老師︰

1) 我地要估這個調整，主要係因為當集團對附屬公司持股，較接近50%時，即附屬公司盈利中，有不少比重非有集團所有，令計算出來的純利率出現偏差。

所以，我地有時係會唔扣"非控股權益"，直接用盈利(而非股東應佔溢利)去除營業額，去計算純利率。

但我地唔需要一見到"非控股權益"有數字，就去做這個調整。因為有時個數字好細，當你調整後，發現純利率其實無明顯變化。

所以，你預"非控股權益"大於"盈利"10%，我地才會對純利率進行調整，令佢數字更能反映真實情況。

2) 係，因為聯/營公司只會將所佔利潤入帳，而非好似附屬公司咁，就算持股<100%，都會100%先入帳。

因此，若企業只係有聯/營公司，非控股權益係會零。

3) 係，因為你"營業額"中並無計入這些聯營公司收入數字，若不扣除的話，純利率會被高估。

4) 香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

你分析中都說到一些重點，佢員工成本係有上漲，而該部份佔成本比重都唔細。由於集團近年加快內地發展，係員工和醫生方面開支增加，都係正常。

但係數據中，你會睇到佢賺錢能力，因成本增加而出現倒退。但由於集團加大發展，成本增加係正常。

重點係這些成本，長線能否轉化成更高收益效率，就要再觀察。暫時睇佢業務發展不差，長遠有增長力，不過業務中短期會有少少波動。

現價算略貴，由於都有不確定性，故投資時要控制注碼。

------------------------------------------------

Q22362：

龔成 你好。我30歲嫁啦。但都係儲得10萬。點先可以令到啲錢滾大啲。但我完全無投資經驗。我連MPF都係揀最保守嗰啲

可以幫幫我嘛，thanks

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」 + 「潛力股」作組合，去創造一個增值平台。

你現時無投資知識和經驗，對企業估值，點去定平貴未必會太了解。所以，我建議你先利用月供模式，去做增值，可以減低買貴貨風險，對你而言會較理想。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股。

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有10萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

至於MPF，配置其實唔複雜，你只要按你的年齡階段，去進行分配就得，年輕時較進取，中年平穩，退休前就保守。基本上你按年齡，慢慢跟這樣比調整就得。

強積金是一個超長線投資，中短期當然會有上落，但就唔需要轉來轉去。

只要按你的年齡，長線配置就得。我自踏入社會工作後，一直都是100%恆指，無變過，根本唔需要理會。

------------------------------------------------

Q22363：

你好呀 請問可以指點一下嗎?
1919 平均價$17.9 入咗
1022 平均價$0.91 入咗
833 $10 入咗
請問未來應該點部署??
麻煩晒 感激不盡

龔成老師：

飛魚科技（1022）較弱，華訊（0833）就一般，中遠海控（1919）算是有質素。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

現價略貴，回1、2成會合理翻d。

飛魚科技（1022）質素不太好。業務不穩，持續虧損，投資價值不高。

之前得到騰訊（0700）入股，往後會提高企業價值，潛力度高左，但由於仍有未知數，業務不能推算一定成功。

華訊（0833）主要從事生產及銷售電子產品、塑料模具、塑料及其他電子產品元件、買賣生物柴油產品及提供煤氣爐頭、以及提供節能業務解決方案。

業務不過不先，生意都有增長，但盈利有點波動，之前有虧損。整體的企業質素算是中等。

現時股價合理，但由於規模細，加上企業優質並不是很強，投資價值唔算高。如投資，小注好了。

------------------------------------------------

Q22364：

我有睇呀老師
但我手上的股票都從高位下跌了不少，不知應該怎做

270、364、388、700、823、1316、1833、2013、2800、3690、9988

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

區塊鏈集團（0364）停牌，暫時只有等，但睇翻佢過往財務數據，年年虧損，不宜投資。

微盟集團（2013）風險會高少少，不能持有太多

而美團（3690）則較波動，要注意風險。

至於其他，問題不大，但就較集中在科網類股，成為你最大核心風險。

------------------------------------------------

Q22365：

龔Sir你好！多謝你的意見！最近我終於入了維他奶($25.1)和騰訊($534)，重基礎分析我覺得這兩間是有質素的公司，我認為襲警事件和監管事件長遠都不會影響 企業的核心賺錢能力，所以決定入貨！

學你話齋長揸有質素的企業享受長時間覆式成長的威力！ 另外想請教你石藥集團(1093) 和福壽園(1448)是否石藥集團較優質一點？

龔成老師：

對，騰訊（0700）、維他奶（0345）都可長線的，最重要是睇翻企業長遠的發展。

石藥（1093）有質素的股票，佢係國內主要醫藥製造商之一。成藥產主要在中國出售，包括抗生素、心腦血管用藥、糠尿病用藥、精神病用藥、抗腫瘤用藥及中醫用藥。

原料藥包括粉狀抗生素、維生素Ｃ及咖啡因，大部分於海外市場銷售。

佢的財務數據不差，有增長力，不過，行業本質有風險，加上近年的政策風險，都令佢股價甚為波動。

這股可投資，長線持有，現價合理區中上位，唔好太心急去一次過投資，宜慢慢投資，長線持有。

福壽園（1448）有質素有發展力。

佢係中國最大的殯儀企業，有一定的規模，而針對的是高端市場，服務有一定的質素，擁品牌及知名度，有相當的賺錢能力，財務穩健負債少，因此企業本質不錯。
由於行業處增長的市場，而新競爭者要入行不易，因此對原有企業有利，故福壽園是優質的企業。

佢憑著本身的優勢，能取得比同業更好的回報，而福壽園管理層表明會持續擴展，策略上會透過併購同業及買墓園去擴充。

由於福壽園的模式成功，因此只要投入資金去發展，複製過往的成功，已經能取得理想的再投資回報率，長期來說此股有一定的增長潛力。

不過，由於此股業務好獨特，因此業務情況在年報上或資料上，未必能完全反映，雖然數據及資料上都顯示此股有質素，但往往要時間證實。

至於企當估值方面，太約$7.5是合理區頂的水平。但不能太一次過投資太多太進取，以分注小注投資是一個策略。

管理層的野心大，投資後不要升少少就賣，要耐心持有，等長期更大的收成。

其實兩隻都有質素，可能福壽園略好。

------------------------------------------------

Q22366：

阿sir，我預計下月會再跌市，請問想撈貨，應幾時入市？

龔成老師：

無得預計的，巴菲特等投資大市都不會預期股市走勢，不要認為自己勁過佢地。我地只知股市會波動，因此當有些股在合理區，已經可以分注買入，當然同時要留現金。

------------------------------------------------

Q22367：

你好老師，老師 想請教下

有關3067 17.231入跌左19％應該點處理呢？
有關6862 34.6入跌左30％應該點處理呢？

龔成老師：

安碩恒生科技（3067），有長線投資價值，你耐心持有就得，你買入價在合理區頂至略貴。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區中上部，你可持有，如果佔組合比例少，可慢慢分注投資。

至於海底撈（6862），這股就要小心股價上落大，如果持貨多可能減。

從業務長遠本質分析，佢又是不差的，長遠仍會正面，不過中短期會弱。

第一，管理層有講過，之前市場對佢地公司過度樂觀，估值偏高。第二，管理層話公司面對中國的市道，其實業務不是一直都好的。

加上這股之前貴，相信中短期股價仍一般。

不過以長遠來說，這股仍有質素的，佢以「海底撈」品牌經營火鍋店及外賣業務，火鍋菜單由鍋底、醬汁蘸料以及在鍋底烹飪的食材三個主要部分組成，可點單鍋、鴛鴦或四宮格鍋底組合，餐廳提供多種調料及食材，以及供應小吃、酒和飲品。

在中國有好多分店，以及外國都有。

有規模，有品牌，整體正面。相信長遠仍有發展的。

不過，這股市場之前比佢好高估值，就算近期回落，最多只能稱為合理區頂，一定未平。如果有貨可長線，但太多貨要減，股價始終波動。

------------------------------------------------

Q22368：

老師你好 我睇左你個page好耐下 想請教你買股票嘅問題 28歲 我係2019年開始買股票嘅 係隨便買 一出糧錢就好似shopping咁買股票

感受平平地就買 我覺得我好似有啲問題同好危險 因為我唔知幾錢叫平 總之平過我上次買我就覺得平 買股票又無plan 你可唔可以幫我睇下我啲組合有無問題，我蝕緊錢：

700 2手 $629
9988 4手 $232
175 3手 $22
1810 4手 $26
7226 6手 $6
66 1手 $37
17 0.5手 $34

我無儲開錢 啲錢係曬股票度算唔算儲錢？

龔成老師︰

我地做財富增值，其實就係將只會貶值現金，換成長線有增長力的優質資產的一個動作。優質資產可以係物業，可以係優質股、生意等。所以，你買的股票只要有質素，就等同儲緊錢。

但我地唔係完全唔留現金，因為我地要進行日常交易、同時要留有部份，以備不時之需，和當有大跌市時去入貨。

而我地去決定是否投資一隻股票時，你要知道佢到底係做乜、點賺錢、有無質素、行業發展前景係點、財務有無問題等等，才決定值不值得投資。

之後，我地再去用上述資訊，去估算出佢平貴程度，才去制定入市策略。

今天買入價，比上次買入為低，唔一定係"平"，可以係2次都係買貴左。而且佢股價下跌，你一定了解翻，會唔會係一些長線因素影響，令佢投資價值有變。

以你28歲年紀，應以增值為主。你現時持有股票，都有質素，可持有。而且都好好彩，大體上買入價都合理。

但有一隻要留意，ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

我會較建議投資無槓杆的恆生科指ETF（3067），始終較好。

以你現時狀況，你投資經驗唔算多，你可以每月用一半儲蓄去做月供，另一半儲起等大跌市這個模式，去慢慢儲貨，相信會較穏當。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

------------------------------------------------

Q22369：

你好，有啲問題想請教你下的。我有50萬儲蓄 想問有咩比較 穩陣嘅投資？

定係買啲派息基金 個個月收3千幾蚊息 用簡單啲呢？thanks

龔成老師︰

以你每月派$3000計，派息基金的派息率(7.2%)都算吸引，但你要確認到底派息金額是否保證，而且產品本身，有無"賺息蝕價"的可能性。

如果你想投資一些較穏陣股票，可以用以下優質股。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，如果你係較年青，我會建議用平穏增長股，去做增值。若你較退休之年，穏定現金流對你相對重要，你資金就應集中在收息股類。

你可以因應自己人生階段，去進行選擇。

平穩增值股，例如指數基金、金沙（1928）、長建（1038）、中銀（2388）、港鐵（0066）、恆基（0012）、平安(2318)、粵海(0270)、領展(0823)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

現時大市只係合理水平，入市要分注，同時要留有3-5成現金，去等大跌市出現，才用來加大力度掃貨。

------------------------------------------------

Q22370：

龔成老師，你好。認識了你一個月，第一次發問。本人32歲，已婚有兩名子女。沒有股票投資知識。

有一層已供完的自住樓，另有一層放租，租金12k，貸款400萬，供30年。現金200萬，沒有持有股票。

本身有個目標就係希望50歲退休，到時每個月可有50K被動收入。可能受屋企人熏陶，一直諗住用買樓收租方式去實現目標。即系退休時要擁有4個已經供完，月租12k-13k的單位就可以了。

但睇咗老師嘅專頁後，發覺有啲師兄都係訂咗呢個被動收入50K為財務自由目標。而老師分析只要有1000萬流動資金，做到每年6%回報，其實已經可以做到我個目標。

對比之下好似簡單過買多3層樓收租，所以如果好似我咁樣嘅個案，應該點樣部署投資組合。

P.S題外話，長遠來講自己覺得退休有四層樓收租另一個好處，係當中兩層更可以等子女成家立室時送贈。

謝謝解答

龔成老師︰

若你希望50歲退休時，每月有5萬蚊現金流，以股息率6%計，的確係需要1000萬本金。但只係一個參考數值，總點唔係放係1000萬，而係如何創造出每月5萬現金流。

其實我地退休後，獲得現金流係有好多方法，物業(收租)、收息股、優質債券、年金，定息產品等等。(除了物業，其他都係退休後，唔係而家就買)

無話邊一種係特別好，因為我地重點係要創造一個平衡組合，希望萬一個別投資項目出問題，都唔會嚴重影響到我地全個退休計劃，所以資金會平衡分配係這些項目上。

所以，收租物業都應該成為你財富組合，其中的一員。只要唔係全個組合，大部份比例都被物業佔據，咁就可以。

你現時已持有2間物業，餘下資金和每月儲蓄，應先投資在有增長力優質股，去累積退休所需資金。

你32歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

但由於潛力股有一定風險，你可以先集中投資平穏增長股，到你有一定投資經驗，才慢慢加入潛力股類。

現時大市只是合理區，你現有200萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你現投資$200萬，18年後大約會增值至1100萬，再加上你本身收租物業現金流，相信這樣安排，很大機會達至你的財務目標。

------------------------------------------------

Q22371：

龔成老師你好。本人34歲，穩定收入，月入4萬7千。有100萬現金，每月可蓄1萬多。請問如買邊隻股票較合適？偏向想長線高回報個種。

謝謝老師。

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時34歲去計，可以投資「平穏增長股」和「潛力股」。你每月5成儲蓄，即是用$5000做月供。其餘先儲起，用一邊月供一邊儲蓄的策略。

潛力股係增長力上，會相對較大，但風險同樣地，都係會較高。如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成。你可以視乎你投資經驗多寡、了解這些股票程度和風險取態去決定。

大市現處於合理水平，那100萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q22372：

你好丫龔成，我睇左你個page一年，想問問你，本人28歲，儲蓄300萬現金，50萬股票，但股票全部都蝕錢，因早期聽人講買落走唔到，

現有額外流動300萬現金，共600萬，想同時買2個單位，你覺得可以嗎？有咩地區可買？月收入十萬，現租11000單位

龔成老師︰

我先講物業部份，如果係自住樓，地區主要係適合你長線生活需要，咁就可以。

如果係投資樓，除左鄰近商區地段，好似中環、東九、北大嶼(或有變數)外。你都可以留意一些潛力較高地區，好似堅尼地城、大圍、黃竹坑等。

現時整體樓市唔算平，租金回報率唔算太高，用物業做投資增值，值博率不及股市。

但從平衡配置角度，你現時買1個單位投資，我覺得都可以。但2個的話，就會太偏重係物業類，唔係咁理想。

而股票方面，我地投資股票，其實就即係投資一間企業。你一定要知道佢業務、質素、行業發展、財務狀況等，唔好只係聽日講，就走去買。

你要睇翻這些股票有無長線投資價值，如果有，中短期波動唔洗太在意，照持有係無問題。但若無質素，就算現時是賺是蝕，都應該要減持，甚至完全沽出。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你28歲，應以增值為主，建議你用「平穏增長股」 + 「潛力股」作組合，去創造一個增值平台。

除了現有資金，你可以用每月5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有300萬資金可投入多50-100萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22373：

本人34歲。供強積金後，月入$27000。每月儲$16000。預計出年儲蓄有100萬。想問獲100萬後投資溫哥華大概港元300萬樓宇好嗎？

另外，現在持有20萬投資建行，港交所，龍源電力，匯豐股票組合。另外想加30萬儲蓄投資股票，以藥明生物，招商銀行，騰訊股票組合， 好嗎？

龔成老師︰

我對溫哥華物業市場，無特別研究。你可以睇翻佢租金回報率，同物業本身升值潛力作決定。

大前題，你必需係認識這項目，「不認識就不投資」。如果你真的已了解當地的物業市場、租務市場、法例、經濟發展，就可以考慮。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你34歲年紀，應先做好增值部份。建行(0939)和匯控(0005)只係收息股，增長力好弱，不宜持有太多。

而且，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。你現時組合有3隻銀行股，好大機會會超標，要注意。

其餘股票，都係適合你。但藥明生物(2269)不確定性較大，投資時要控制注碼。

我見你不少股票，都係潛力股類，佢地增長潛力大，但風險都唔細。建議你未來投資時，加入以下平穏增長股，去令成個股票組合更平衡。

另外，除了用現有資金投資外，你可以用每月一半儲蓄，去進行月供股票，去提升組合增長力。餘下一半儲蓄就留起，去等大跌市機會。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。

------------------------------------------------

Q22374：

可唔可以分析下美股 Faraday Future

龔成老師︰

Faraday Future Intelligent Electric Inc. (FFIE)是一間智能電動汽車發展的美國初創科技公司。

我自已無研究過此股，見集團剛與特殊目的收購公司(SPAC) Property Solutions Acquisition Corp.合併。

市場預期會獲得一筆資金，用於未來發展，都算係一個正面訊號。而且集團聲稱2022年第一季，就可以交付首款電動車。比起還只在研發階段的企業，會好少少。

但始終佢業務都算係好初期階段，不確定性會好高，就算你投資， 也不建議太大注。

------------------------------------------------

Q22375：

我高位，$3.32入左1769

星期五出左政策，我现在，应该点做。。。。谢谢你

龔成老師︰

思考樂教育（1769）面對政策風險，賺錢能力減，你宜減持。

本質上，不是劣質，佢主要透過結構性合約於中國提供課後教育服務，包括以「升學」品牌提供學業備考課程，及以「樂學」品牌提供初階小學素質教育課程。

學業備考課程主要針對提高學生的學業表現，以及備考初中入學考試、中考和高考，面向一年級至十二年級的學生。

學業備考課程囊括小學、初中和高中的多門學科，並以小班制形式開展，每班通常不超過２０名學生，一般每周開課一次或兩次，每節課時長介乎１﹒５小時至３小時。每節課由檢查作業、講課時間、課堂考核、練習及小測討論組成。

過往業務有增長，長遠仍有發展力，不過由於規模不大，獨特性未算好強，因此未算好高質。

近期中央政策出台，主要係針對性禁止一些課後教育。集團正正就是從是這類企業，故影響較大。由於成個行業不確定性大，故不建議持有太多。

如果你現時持貨，只係佔你組合一個好細比重，你可以守住先，再觀察。但佔較多重，必需要沽出部份，去平衡風險。

------------------------------------------------

Q22376：

成哥，最近覺得副業生意難做，正職又就嚟完約會失業，股票又輸錢，覺得好難受，點算好

龔成老師：

你要從長遠角度去想，如果你本身有儲蓄，無太大生活壓力，可試下加大力度投入副業，當然這是有危有機。

如果你生活壓力大，就盡快找翻正職先，最好是長工，等你安心翻，至於副業的生意，你其實預左做生意是不易的，最後成功者，是一些有強大心理質素的人。

至於股票，集中睇長遠企業價值，不要睇短期股價，成功投資者心理質素都好強的。

------------------------------------------------

Q22377：

老師你好！我想問。我有216萬股票、21萬基金、53萬現金、83萬mpf

41歲想買樓，但新工只係做左3個月，計埋bonus 3萬/月

我可以點做會較好？自己一個供 用幾多錢做首期較好？係咪要選樓齡少過20年較好 但好多我可負擔的樓齡都過30年？是否等做夠1年先買？

以我可負擔價錢，那一區較適合我？
謝謝

龔成老師︰

你有半年的穩定入息證明，已經可以去做按揭，如果你擔心工作有不確定，就做夠一年先去買樓。其實你現時有一定的流動資產，首期方面應該處理到，最緊要你計好供款佔入息比率，來推算能買多少金額樓價的樓。建議你睇睇《5年買樓4部曲》。

我地投資物業，最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

你要再要審視其升值潛力，未來地區上、交通上、生活等等的配套發展，才去下一個結論，咁會較好。

其實樓齡，都係其中一個要考慮的因素。樓齡當然越少越好，但唔代表30年以上的樓，就全無價值。由其一些藍籌屋苑，30年都仲好值錢。

但你要留意，30年以上樓宇有機會被要求做樓宇大維修，這是一個唔細的潛在成本，你買物業時，都要加入這個考慮因素。

由於這間係你自住樓，除了以上因素外，更重要係佢能否配合你長線生活所需，講緊係4,5年，係未來10-20年。如果可以，而你又有信心長線"供得起"，就可以考慮入市。

現時借貸息口低，我建議你盡量提高按揭成數，令自己有較多資金可以空出來，作投資之用。

當然，如果你做高按揭成數，會令你月供太吃力，你比多少少首期，都係可以，你要自己去做個平衡。

------------------------------------------------

Q22378：

龔sir,希望長編不騷擾你。我老公已搵到補習工作，現做緊剛開的暑期班，只1～3人一班，一星期有三/四堂。希望九月有新的中四以上的數學班，

佢會容易點，因為一直教中四至六班，現教低年級現多點預備及了解課程。

佢自己已向保險公司借了16.5萬，一年要$12000利息，問他的嫂借了5萬，我在股票攞出5萬，剛好還晒咭數。但現屋企已經無流動錢，要放緊點股票來給他5萬及屋企什使用錢。

股票與利息總共只有約90萬，但是包括我爸放在的幾萬。總90萬減去還錢的5萬，三個月供樓錢，爸放下錢及屋企使用錢。我想就放了1211(現只有一手)及小量其他細股好嗎？

如全部平均放怕剩下是太散、細的股票，這想法好嗎？

現股票有，有提議我先放那種類？

27 1000/入價43.5
66 558 公司送
388 300/入245
700 300/入333
1177 2000/入6.9

1211 500/入183.25
1810 1400/入14.82
2382 300/入140.6
2800 2000/入27.2

2845 50/入121.8
3088 2800/入11.6
3690 300/入110.6
9988 500/入195.6

現在他part-time可能對屋企洗用有幫助，我仍找緊part-time，希望我也有工作會好點。我想申請工時 “不” 提曾做腦腫瘤手術，找工作機會會好點。

希望sir 比點提示。

龔成老師︰

這些股票都有長線投資價值，如果你放，我會優先選擇一些比重較多的股票，建議你盡可能每隻都留有最少1手。

另外，就是一些潛力股，因為佢地雖然增長潛力高，但同時間波動性都較大。以你年紀，不宜持有太多。

所以，我會建議優先沽出"部份"港交所(0388)、舜宇光學（2382）、阿里（9988）、騰訊（0700）、小米(1810)、美團(3690)會較好。

至於你向保險公司借貸(相信你是指，借取儲蓄保單內價值)，這部份息率都算高，其實對你都係不利。你可以睇下銀行，有無其他貸款方法，個息率會少D，咁會較好。

雖然你從儲蓄保單借取現金價值，就算還唔到，最多只會係斷單。但從資產運用角度，這些都是利息支出，都是在蠶食緊你財富。所以長線計，都係找較低利息率的貸款會較好。

至於工作，其實以我所知，很多工作都唔會特別問你這些問題，故相信對你找工作，影響唔算話好大。

但你都要因應自己身體狀況，找工作時不要勉強，任何情況都好，都以自身健康行先。

------------------------------------------------

Q22379：

龔老師，早安！本人持有以下股票一段頗長日子，但股價一直積弱：

511 電視廣播 7000 @$8.60
3918 金界 8000 @$9.50
270 粵海 8000 @ $14.00

應否止損？還請抽空賜教！

特別是金界，是否企業質素轉壞？感謝老師抽空指導

龔成老師︰

電視廣播(0511)已經過了全盛時期，投資價值好一般，長線換至其他優質股較好。

粵海(0270)有投資價值，中短期波動唔洗太在意，暫時睇唔倒佢企業質素，有明顯較壞，你照持有就可以了。

金界控股（3918）都有質素的，但始終新興市場，因此點都有風險。

佢會因全球的疫情，而影響左生意，但這只是中短期。

長遠計，佢仍然正面，佢之前有項目獲當地政府批准發展5幢建築面積共逾580萬平方呎的物業，包括提供共4700個房間的酒店群、娛樂場所及公寓等。我相信長遠對佢仍正面。

此股長線本質，無變差，依然有長線投資價值。但由於佢身處市場新興，股價會較為波動，而你又係退休人士，這類潛力股，其實都唔係太適合你，因為風險太高。

你可以當佢有明顯反彈，就換碼至一些收息股，去為自己創造現金流，支援退休生活開支，這樣會較適合。

------------------------------------------------

Q22380：

本想將一百萬股票值如何滾訣，可惜事與願違

今日再看到恆大被凍結資產這些負面消息，忍痛放曬136，三十萬埋單，第一次蝕六位數字股票，真是一個好好的教訓，不應該重注和要止蝕！

再次感謝龔成老師一直以來的回覆

龔成老師︰

恒騰網絡（0136）始終係有危有機類別，很多價值建構在"未來"2個字。當大環境變差，大市波動，或者係好似現時咁母企出問題。

好容易就會出現較大回調，因此這類企業，投資係可以，但緊記要控制好注碼，來平衡這些風險。

其實你本身係好集中恒騰網絡（0136），現時沽出，再將資金平衡分配一些合適的優質股，反而長線係好事，係百利而無一害。

雖然短期你會見到虧損，但只要你認真去配置這筆資金，長線一定可以賺回來。

若你係年青至中年人士，以下優質股都適合你，你可以參考下。緊記做好組合平衡性，同一行業不能高於組合30%，同一股不能高於組合15%。

平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19321-Q19340）

Q19321：

阿sir 我係你舊生！最近嘗試對幾隻新經濟股進行估值，但面對以下困難：

1. 多隻股票因是半新股，財務數據不足
2.有些仍然處於虧損狀態
3. 市盈率超高，不知如何衡量

另外遇到一個問題是找行業市盈率。阿sir 提過網上的「同行比較」包括範圍太廣，但有時又不知道哪幾間是真正的同業，因此無法找出行業市盈率作比較。

阿sir 可能會叫我先選一些簡單的公司作練習（例如功課六福），但因為想買入一些有潛力的新經濟股，又不想每次麻煩阿sir 給意見，所以想自己先嘗試。煩請阿sir 有時間指導一下，謝謝

龔成老師：

1）半新股的確有這個情況，所以我自己都會保守D，或等佢上市一段時間後，有更多數據，會較好。

2）這類股要睇將來的發展，如果這刻是處於投資期，虧損都是正常，而投資者分析時，就會建基於將來的業務與盈利，多用將來的數據分析。

3）同上一點一樣，如果是一些業務增長快的股，你用過去數據計市盈率無意思，要用將來，預期的數據去計算先得。當然，估值會較難，同時唔會一定準。

至於行業問題，你可以睇一睇佢自己或同業的招股書，一般都有行業分析的，佢可能會講述行業情況及競爭對手，就可以從中找到對手。另外，你要以「消費者」的身份去想，有那些產品會選？這就是尋找對手的方向。

------------------------------------------------

Q19322：

Hello龔成老師，我睇緊你嘅有關50隻優質股嘅書，我有個投資嘅問題想問，就係公司年報顯示股東嘅淨利潤增加，嗰年股價就會上升？多謝！

龔成老師：

這是一個複雜的問題。

我地買股票，就是買企業，企業賺錢，企業價值就會上升，股價自然上升。當盈利不斷增長，股價同樣會向上。

因此，在簡單的概念，盈利向上，股價向上，這是有關係的，但不是一定。

因為企業的價值是長期的，我地不能只睇一年的情況，如果佢今年盈利跌，但預期之後會利好，都可以股價向上。簡單來說，我地買企業，就是買佢往後多年的情況。除了盈利外，仍有好多野要分析的。

------------------------------------------------

Q19323：

請問9988，1177可以咩價入？
3690、388、1299點呢？

龔成老師：

阿里（9988）面對內地監管可能收緊，因此風險度增加左，最大的影響在於螞蟻的貸款業務，這亦是中國叫停上市的其中一個原因。

因為這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同議一些監管方法，以及找到合理的賺錢模式，你預阿里$250以下是合理區的頂位，這股可長線。不過，中短期會波動。

如果有貨，可持有，但就唔需要太急加注，如果未有貨，現金足，可以這刻小注，之後跌1成以上再加注。

中生（1177）出左業績，比預期差，所以股價都有所回落，都是正常市場情況。

不過，又唔需要太過著重短期業務，一間企業中短期業務總有變化，都好正常，最重要是睇長期。這刻長期分析，又未算差，整體質素無變，長遠仍是有發展的。當然，仍要多觀察之後的業績，先有更立體的情況，但暫時見唔到核心改變。

佢由之前的貴，去翻現價合理區中上部，現價又未到大手時機，相信中短期仍波動，要有心理準備，但長遠無問題的。

友邦（1299）有質素，現價勉強合理，都可分注小注。至於另外兩隻，都有發展力，但現價略貴，回翻少少先。

------------------------------------------------

Q19324：

老師 我最近轉了股及加了月供 想問o唔ok呢？
我年齡30 想5年儲到100萬 已婚 1子

股 ～ 6618 500股 ＄117
11 100股 ＄137.8
9988 200股 ＄272

月供
2800 ＄3000
700＄2000
1211＄2000
388 ＄1000

龔成老師：

你持有的股票，都是有質素的，恆生（0011）是收息股，而阿里（9988）及京東健康（6618）則是潛力股，都可以持有，其實你應該加翻D平穩增長股，之後就唔算要增加收息股，因為你年齡仍有增長力的。

我見你供都是都是有質素的股票，都可長期進行，基本上是無問題的。

但要留意翻，現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19325：

咁如果市區物業較細，得200尺左右，但樓齡幾年至10幾年較新，有投資價值嗎？

我怕納米樓將來無價值，而我暫時又只可負擔到400萬以內物業。謝謝老師！

龔成老師：

最好當然在250呎以上，因為這是一個家庭最基本的需要，所以，在價值層面，200呎的樓點都會差少少，或者你找一些樓齡高少少的樓，但又未算太舊，區份唔好太差，去平衡。

------------------------------------------------

Q19326：

6099宜家係入市時機嗎？
謝謝

龔成老師：

招商證券（6099）主要業務包括財富管理等業務，例如代理買賣股票、基金、債券、期貨及其他衍生工具，賺取手續費及佣金。

同時亦有投資銀行業務，為企業客戶提供一站式的投資銀行服務解決方案，包括股票承銷及保薦、債券承銷、財務顧問服務及場外投資銀行等服務。

質素都有少少，但不算好強，因為睇翻佢過往的業務情況，有點不穩定，同時未算好賺錢。業務會較受投資市場影響。

現價合理，但這類股增長力未必好強，唔建議投資太多。

------------------------------------------------

Q19327：

老師，1628你點睇呀？
而家2.8元
值得買入嗎？

龔成老師：

禹洲集團（1628）主要於中國廈門、上海、福州及合肥從事物業開發、物業投資、物業管理以及酒店業務。

佢係新加坡、香港、上海、合肥、福州、廈門等地均設有分支機搆。

整體質素都有，但未算好強，佢在行業中，未算有好大的規模與優勢，另外，負債較高都對這股造成風險。加上業務有點波動，這股唔建議投資太多。

現價合理，如果控制注碼都可考慮這股，長線投資價值都有，但未去到最高質類別。

------------------------------------------------

Q19328：

老師，有什麼優質股可以推介我呢？因為自己買的股全都下跌的。

只希望能在一年賺回30-50万...可以嗎？

龔成老師：

財不入急門。

你要用平衡，穩健的方法有效增值。要建立一個長期的優質組合，唔好太著重中短期股價表現。

你可以考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19329：

你好老師，我就近40歲，打算買一些收息股長擺到55歲左右退休時收息做日常開支 。

我的組合如下
3988+2388銀行
941 電信
87001 +00978 房產
883 資源
548 +1800 基建

共大約200萬
你覺得以上組合如何？
謝謝

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你的年齡，其實財富仍有增長力，建議你投資「平穩增長股」+「收息股」，到50歲先較集中在收息股。

你上述的股票，都可以，建議加上置富（0778）及恒生高股息率ETF（3110）。

另外，建議你同時加上平穩增長股，你可以考慮盈富（2800）。

另外再加幾隻：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19330：

其實本來一直有每月供開 2800，0066，0012，0003，1038同埋金沙的。每月供款11,500.

只是今年股市突然大跌，我停了月供上面幾隻，只保留月供2800。因為看不到前景，所以無為個幾隻股票月供了。

5年一百萬可以嗎？月供仍要20,000嗎？

上面講的0066，0012，0003，1038 同埋金沙，只係供咗8個月左右，所以唔多股數。

龔成老師：

其實月供股票，盡量都唔需要停或改變，只要保持長期策略就得。

另外，當我地分析時，應該著重企業長期業務發展，而不是當刻股價，你上述供的都是有質素的股，可保持進行。

相信$100萬有可能的，月供$11500。

如果你想進取少少，可以加入安碩恒生科技（3067）去月供。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

另外，現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19331：

老師，全球係金融海嘯之後不停印錢，不停借貸，各國負債水平已經好高，加上最近嘅疫情，最近聽到好多嘅有關債券違約嘅消息

聽唔少人講黎緊會有一個金融危機，如果係咁，我係咪應該放曬啲股票，等金融危機出現再買入會好啲呢？

同埋我宜家5成現，5成股票，會唔會太多現金？
5成現金

龔成老師：

如果真正有金融危機來到，可以這樣講。

不過，我過往20年，久唔久都見到有評論話會出現金融危機，可惜，通常多人講都唔會發生。

反而真正的金融危機，通常都是無乜人講，這樣才會造成更大的殺傷力。

我唔建議你賣晒所有股票等，因為有一半機會，你只會眼白白見所有股票不斷升而買唔翻。

因此，你保持原有的投資策略，持有優質股，長線就得，反正優質企業都不會因金融危機而倒閉。而你現時持有3-5成現金可以。

------------------------------------------------

Q19332：

老師你好，剛轉做全職媽媽。早前買咗老師「財務自由行」深受啟發，所以買了年報勝經、股票勝經

想趁空閑時間學習分析年報，希望日後有機會上到老師投資班。

因經驗尚淺，近來見blogger 推介而於 2.73 買了一隻 00697 首程，請問這股合理價如何？

是否一隻有潛力嘅股票？ 另外老師書中提及年報最好睇五年，但首程近呢幾年先轉型，請問如何分析？

另想請問老師仲有無分析年報嘅書推介？

謝謝老師解答

龔成老師︰

首程控股（0697）主要在中國從事停車場經營管理，以及私募基金管理業務。

佢由過往鋼材製造、礦物開採及加工業務，轉型至現時業務。分析年報時，應集中翻現時尚持續的業務上。

其業務會比較波動，甚至出現過虧損。整體質素只屬一般，見佢最近有盈利改善的情況，如果你持股不多，可以睇下企業的業務係唔係真正有改善，才決定處理方法。

我自己對一些轉型企業，一向都只是一般般。

書本上，你可以睇<巴菲特寫給股東的信>、<證券分析>。

記住，在投資一隻股票前，一定要做足功課。好以睇年報、公司網站、一些統計數據等。唔好單單聽消息就去入貨，咁係好危險。

當你想投資一隻股票時，發現答唔倒自已，間公司係做乜生意、個企業架賺錢模式、行業未來發展和競爭會點、財務狀況健唔健康等問題時，就最好唔好入貨住。

------------------------------------------------

Q19333：

龔sir，想問下0823，3319，0012，1038，這四隻的業務是否相關性較高，現價也是合理區，若一同持有會有相關性風險嗎？若4選1，那隻會較好。

還有0941可上望返去$60嗎？

還有0005和0011那一隻較好呢？

謝謝龔sir解答

龔成老師︰

長建（1038）是從事國際基建項目，好似電力供應。而另外3隻，都係地產類，係有一定相關性。

當中講潛力和值博率，現時恆基（0012）會佔優。

中國移動（0941）會唔會上翻$60，或者幾時上翻，我估唔倒。但以現價計，股息率超過7%，有投資價值。如果你目標係收息，現價可分注。

而匯控（0005）和恆生（0011）都是收息股，整體質素上會係恆生較好。

其實你要睇翻自己的年齡與風險承受程度，去設計一個長遠的財富組合配置。

------------------------------------------------

Q19334：

老師你好， 因為我未投資過 想開始試下投資 , 但未知點開戶 ,
是否去任何一間銀行開投資戶口就可以

因我看你問答的講到月供手續費5% 比較貴 , 正常應該係大約幾多%左右？

另外月供股係要每個月自行入錢 定銀行開戶後會自動過數幫你買入？

因看到你其中一個問答講到月供最少應持續3年以上 , 持5年

（係米意思3年keep 住入錢， 3年後就放係到等到大約5年先決定提取與否？

謝謝老師

龔成老師︰

你可以去銀行或者證券行開戶口，睇係邊個方便你。

之後，每個月會在戶口中扣除指定金額，去買入你所選的股票。銀行的話，佢基本上會每個月在你戶口扣數，你可以再問清潔。

而每月月供成本，最好持係1%。即係你用$5000供A股票，咁個成本最好係$50以內，。否則，會較影響你長線回報率。

而月供目的，就要係去平衡價格波動風險，所以越長越好。最基本要求，月供維持3年以上，並持有這些股票最少5年，咁個月供效果先會理想。

------------------------------------------------

Q19335：

亞sir,你好呀...想問你點睇隻1759?之前3.8入咗..而家跌到傻咗...唔知應該點..

龔成老師︰
中油潔能控股（1759）在廣東省、河南省及江西省經營液化石油氣和壓縮天然氣相關業務。

本身這類商品企業，賺錢能力就唔會太強。因為佢產品無差異性，故定價能力唔會太高。

佢本身規模好細，盈利都唔多，連1千萬都無。見佢近年盈利一直下跌，暫時所見質素好一般。長線計，最好慢慢換碼至其他優質股，咁會較好。

------------------------------------------------

Q19336：

龔成老師，您好⋯⋯一直有follow 你FB，所以係2019年開始月供股票，每月各$5000供煤氣同中電。

我現在45歲，開始想10年後可以財務自由。月入有$11萬，但用稅貸早年在外地買了物業，所以要每月要還大概$4萬（直到2022年中），現金流大約只有$10萬，由於在香港沒有物業

租金加上其他使用及交稅同照顧家人，月供股票後，每月都係差唔多月光族。

所以很想知道我要點做才可以在10年後做到財務自由？感謝

龔成老師︰

現時除了審視開支部份，有無一D可以刪減架不必開支。另外，可以做一些兼職或小生意，去增加現金流。

現時你用月供去做財富增值，就是向著財務自由的一個好方法。

但問題是你投資2隻股票都係同業，會有過度集中風險。較理想方法，就係將佢部份資金（或取消其中一隻），分散到其他行業股票，或投放在盈富（2800）身上。

以下股票都適合，你可以從中選擇。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、粵海（0270）、領展（0823）。

另外，現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q19337：

你好呀龔成先生，我係一名師奶仔，自今年5月開始追你post, 一開始跟你建議買盈富基金（$23.9）

之後見你教我地月供組合可以考慮希慎，我又喺$20，$22，$24入左貨

近排見佢升到上$30，我仲應唔應該入貨？

雖然希慎收租暫時未有好大影響，但未來公司可能會傾向WFH,租細啲/ 租平啲

對希慎都有影響。
多謝你的意見，謝謝

龔成老師︰

希慎（0014）有一定的質素，可以長線投資。雖然會多左人在家工作，長遠會對寫字樓有影響，但好多公司都接受唔好員工長期在家工作，我自己都是顧主，都唔完全放心員工在家工作。

佢係銅鑼灣商舖及寫字樓地區中，係其中一個最大商業大廈業主，投資組合擁有逾4百萬平方呎之樓面面積，希慎廣場、利園等，都是十分優質的商場。

佢過往出租率均多處於95%以上，商場及寫字樓很多時更處98%以上的高水平，係典型的收租股。雖然受疫情影響，但長線相信會回復至較正常水平。

這股可長線投資，有平穩增值作用。現價計，在合理區中間。

但你要留意，我地投資時除左要選優質股外，也要注重組合的平衡性。因為一個行業就算更有優勢，也有機會面對行業週期及突發風險，太集中會對你整個財富組合不利。

相同行業不可佔組合多於3成，而單一企業最好不要大過15%。

------------------------------------------------

Q19338：

請問2269 和 2359 大家都係藥明系。請問邊隻會好啲啊？

係咪2269 入左藍籌好d？但每股盈利 2359 又高d。
所以唔識揀

龔成老師︰

藥明生物（2269），主要提供有關生物製劑藥物發現、開發與生產服務。

佢涵蓋生物製劑發展過程的所有五個階段，即藥物發現、臨床前開發、早期臨床開發、後期臨床開發及商業化生產。

而藥明康德（2359）是委託研究機構，佢一定有發展的空間，加上佢是大型的機構，因此本身已有優勢，可以作長線投資。

藥明生物（2269）現價唔平，當價格出現回調，我擔心幅度會唔細。藥明康德（2359）都有類似情況。從業務上，兩隻都是有質素，同時有一定的增長力，質素以藥明生物較好。

從估值上，兩隻都貴，如果要2選1，會選藥明生物。

------------------------------------------------

Q19339：

本人今年50歲，現失業中，現有15只股票，帳面虧損13萬多，不知如何處理，希望阿Sir可以在百忙之中指點迷津

應該如何處理以下股票，是否繼續持有，還是買出，可否拜托教導應怎樣處理

現持有股票：
14@2000股$28.5買
460@8000股$1.9買
547@30000股$0.83買
548@2000股$9.67買
576@2000股$6.33買
939@3000股$7.8買
1060@10000股$3.31買
1093@6000股$18買
1800@3000股$11.6買
2280@8000股$4.25買
2318@500股$87買
2800@3000股$26.2買
1177@2000股$8.72買
9618@200股$340.4買

無限感激🙏

龔成老師：

只要佢地有質素，又適合你人生階段，中短期波動唔洗太在意。

睇翻你現有持股，四環醫藥（0460）比較麻煩，因為曾經停過牌一段時間。

如果你睇翻佢年報中，每年獨立核數師的意見，你會見到在2014年出現「不表平意見」，2015年、2016年出現「保留意見」，這都反映核數師對佢盤數感到有可疑，這是一個十分不利的因素。因此，賣出是較好的策略。

數字王國（0547）如果睇睇佢的業務情況就明，營業額每年下跌，年年虧損，根本沒有投資價值，你賣出這股較好。

阿里影業（1060），炒作較多，風險高。這企業到現時仍未有盈利，市場只憑佢前景去評估，其實這會有相當的風險，這類股最多只能小注。

慧聰集團（2280）多年出現虧損，投資價值不高，建議換至其他優質股。

京東（9618）和中生（1177）係有質素潛力股，但波動性較大，唔係咁適合你年紀。現貨可持有，但不要加注。

未來投資增值時，可集中在以下"平穏增長股"身上，會較理想。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

------------------------------------------------

Q19340：

成哥，我係之前既畢業生，首先多謝你教左我咁多野，用你教既價值投資法，我第一次係股票市場中贏到錢

之前上完你堂，我都睇好未來電動車既前景，由於我之前買唔到比亞迪，又無水桶1既股票，所以現在都幾頭痕

咁唯有轉向其他既相關既汽車類別股票啦（以下依隻都係朋友介紹），我盡量用你之前既估值方法去計算股價，但由於新手信心不足，唔知計得岩唔岩，所以想問呀sir對下答案

1）425敏實集團前程如何？ 是手桶1潛力股嗎？
自己估價
PE 31.4-35.04
Ev/edita 21.06-31.06

2）恆基地產12
自己估價 27-34.8岩唔岩呀？

3）3319雅生活服務
之前上堂聽你介紹過，嘗試初步評估，但好似上市年期得2年資料，真係唔識計，想問估值合理區係邊呀？

4）由於我未有置業，所以想買一些地產股係每月租金支出上做平衡對沖（每月租金11000支出）
現在持有領展+恆基地產

想問我應該買多少金額的地產股，大約平衡租金上既開支？

5）順帶一問，除左香港，成哥有沒有睇好邊一個城市既物業有投資價值？

祝身體健康，財源廣進
你派既note真係好厚

龔成老師：

1）敏實集團（0425）不過不失，佢產品都供應比一d國際著名汽車集團，豐田、福特、通用、戴姆勒等。

佢係中國外部汽車車身零部件供應商，主要從事設計、製造及銷售以下三大類商品車身結構件等。

整體都有發展的，但未去到最高質素的企業類別。這類股，投資不是不可投資，但就唔適合佔組合比例好多，現價合理區中上部，都可長線的。

你計算的估值大致都合理。

2）恆基（0012），這股有質素，可長線，不過增長力不算強。計算估值大致合理。

3）雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

當然，行業有時會有較大的炒作，股價上落大，要注意風險，而整體是有長線投資價值的。

由於佢上市年期較短，因此估值時會運用行業的數據較多，你可以盡量找與這企業相近的公司去比較。現價大約為合理區中間。

4）雖然這做法都可，但你要留意，在你股票組合中，同一行業唔好多過你組合的30%，否則會太過集中。你用長期的角度分析。

5）最重要是地少人多，長遠經濟向好，香港、澳門都是這類地方。另外，吉隆坡、曼谷、倫敦都可留意下。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17781-Q17800）

Q17781：

老師，你好，我最近開始閱讀你既作品《80後百萬富翁》，《股票勝經》，《財務自由行》，你講得好啱，我地買入股票應視為買入一間企業，公司。

我就黎34了，我中幾年開始買股票，同好散戶投資者一樣，虧損收場，賬面已損失15萬左右，以下係我之前買入既股票，希望老師能夠幫我睇睇，有邊啲可以留底，邊啲最好賣出，謝謝老師

000001 長和 $75.3買入3000股
000002 中電 $72.4買入500股
000066 港鐵 $38.8買入500股
000435 陽光 $6.23買入12000股
000981 中芯 $35.15買入1000股

001011 泰凌 $4.54買入500股
001038 長建 $39.2買入500股
001448 福壽園 $7.5買入1000股
001716 毛記 $4.3買入4000股
001972 太古 $17.62買入2000股
006886 HTSC $17.787買入3000股

老師，請問以上咁多隻股，有邊啲可以留，邊啲可以繼續持有啊？希望老師解答，謝謝

另外我剛剛開始月供 $4000 2800盈富同埋
$2000 823領展，請問這可以嗎？希望老師解答

另外我有興趣老師你既投資倍升課程基礎班，但是否只有灣仔地點咋，會考慮其他地區嗎？如屯門元朗等新界地區，因為時間上我放工後會趕不及上課

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。

上述買入的部分有質素，部分則較一般，如果質素比較普通的，持股比例都唔會建議太多。

泰凌醫藥（1011）無質素，應該賣出。

毛記（1716）、HTSC（6886）質素只是一般，這類股唔建議持有太多。

中芯（0981）雖然有潛力，但股價已貴，要注意風險。

至於其他，基本上都是有質素的，不過大部分都是平穩增長類，而以你的年齡，其實可以加翻D潛力股比例。

至於上堂方面，暫時都會灣仔。

------------------------------------------------

Q17782：

成哥你好，我而家薪金$30,000港幣一個月，我每個月拎$10,000月供股票，$5000盈富(2800)，$5000恆基(12),
$5000儲銀行,以備不時之需,另外$7000家用，其餘就自己洗，但係我覺得咁樣儲錢好似有啲慢

請問成哥會唔會有啲更加好嘅建議？另外我之前買落咗啲股票你睇下有冇需要放咗佢,換做第二啲更加好嘅股票,手持股票如下：

盈富(2800)8手 27.8買
中銀香港(2388)3手 26.5
恒基(12) 1手 29.5買
海外宏洋集團(81)1手 4.3買
啊里巴巴(9988) 3手 183買
唔該成哥

龔成老師：

你原本持有的股票，基本上都無問題，可以持有。

至於月供方面，雖然都是優質股，但只是平穩增長型，財富增值的確唔會太快，如果你想提高，可以加入一些較有增長力的股。

盈富（2800）月供可保留，而恆基（0012）可考慮轉供其他，或部分資金轉供，可考慮月供：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

------------------------------------------------

Q17783：

阿Sir....想請敎「基金」同「股票」有乜分別？應該投資 股票 定係 「股票型基金」好？

龔成老師：

股票就是一間公司的擁有權，即是你買股票，如果買入一間公司的一部分。

至於基金，就是一個集體投資的模式，大家夾錢，成為一個較大的資金，然後由基金理經去投資不同的項目，佢可以投資股票、外匯、物業等，要睇翻該基金的主題。

如果你見到「股票型基金」，就是該基金主要投資在股票。

如果你有自己選股的能力，就自行投資股票，如果無，就可考慮投資基金，不過都要了解該基金的投資策略及過往回報，是否理想。

------------------------------------------------

Q17784：

龔sir,因應唔同定位(潛力，穩健增長，收息)的股票分開唔同投資稱略：

1)水桶1潛力股,當去到合理價中部位，就入50%資金，跌到合理價低部就80%資金，之後就每跌5－10%再買，如合理價以上就月供到尾

2 )水桶2，3穩健股及收息股，合理價低部先至買入50%資金，之後每跌5－10%入一手，合理價中部就一路月供到尾
這樣可好？謝謝！

龔成老師：

可以。

這都是一個可行的策略，你可以根據上述模式進行。

不過，潛力股的股價，一般都會比較波動，例如佢可能處於略貴的水平，然後一直再上。當然，又有可能大跌，令佢處於平的水平。

因為你上述的策略，較集中在「合理區」，而潛力股好多時股價會較大上大落，你要考慮這點，建立一套平衡策略。

------------------------------------------------

Q17785：

老師 想問問你9996 同9926點睇？

龔成老師：

沛嘉醫療（9996）主要在中國從事介入手術醫療器械業務，包括研發經導管瓣膜治療醫療器械及神經介入手術醫療器械。

由於佢處理發展階段，不斷燒銀紙，這刻好難有結論是否成功，只可以話存有一定的不確定性。這刻的投資值博率只是中等，如投資小注好了。

康方生物（9926）主要從事生物製藥業務，專注於腫瘤學及免疫學治療領域，發展力是有的，但業務同樣存有不確定性，好難知結果，估值難。只可以話有發展力但同時有不確定性，唔好大注。

------------------------------------------------

Q17786：

龔老師，你好。突然想到一個問題，因我都是住公屋，若收入超過一定水平就會被趕出來。

我自己本身收入不高，但想問股票投資成功帶來額外金錢 是當資產還是入息。

龔成老師：

以我所知，你每年的「股息」，都會當成是收入的一部分。

你可以問清楚公屋的收入上限是多少，我唔大清楚現時的情況，過往收入高是要交2倍租的，但好似唔洗趕出來，不過現時就唔知，你問清楚。

另外，絕對唔好因為公屋因素，而影響左你增加收入及提高資產的決心，如果出現了「限制思維」，你就有問題。

------------------------------------------------

Q17787：

成哥。想現價入
領展00823

或太古A /B/太古地產
想中長線既。點睇

其實中美關係相信疫情好返都好啦 旅遊業都受壓。所以如果要一隻

邊隻主力做商場 同 房屋比重多d?

龔成老師：

領展（0823）有質素的，現價在合理區中下部，可分注投資。

至於太古（0019）/（0087），由於有航空業務，質素一般，投資太古地產（1972）會更好。

不過要留意，你組合中同一行業比例唔好太多。

------------------------------------------------

Q17788：

老師，你好！本人新手一名，因有留意老師專欄，開始月供幾隻股票，亦襯低入手少量0012、285，其中285已經升逾兩倍，打算繼續持有。

我有啲問題想請教老師：

1. 恆大健康（708）短時間暴升，是否被炒作過高？另外又打算改名恆大汽車及拆細為一手500股，但現階段又未見有實質相應業績，此舉何解？值唔值得期待？

2. 白銀有關嘅etf，值唔值得當作長線投資？定還是如果有少量資金不如投資不同種類嘅港股、債券或基金？謝謝

龔成老師：

比亞迪電子（0285）是潛力股，你可長線持有，就算想放，也只建議賣一部分，餘下可以長線。

1）恆大健康（0708）會大力發展新能源汽車，市場對佢有一定的期望，因此股價升左好多，這刻要估值根本好難，因為現時的股價都集中在「前景」，而所謂的前景，其實仍有不確定性，所以，股價會十分波動，大升可以，大跌都可以。

佢拆細只是方便散戶入貨，增加流量及市場關注度。

如果本身有貨可持有，但現價入就要小心。

2）貴金屬可以作為我地財富組合的其中一部分（少量），但不用投資太多。你可以作為長線。

但如果你資金不多，就投資股票先，等財富組合增大左先。

------------------------------------------------

Q17789：

龔sir～你好啊！想請問下你，我揸住幾隻蟹貨，要溝貨定止蝕好？

1號$56，3號$13，981$42，9997$31，6123$2入，最後一隻2238廣氣哩幾日升咗好多，買入$7.1，暫時有賺的，是否還可以keep下？麻煩可以俾d意見我嗎？

龔成老師：

首先你要明白，我地繼續持有一隻股票與否，與你的買入價無關，因為這只是一個心理因素，最重要是企業的質素、前景。決定持股多少，是企業的本質，不是買入價。

長和（0001）、香港中華煤氣（0003）都有質素，但增長力就不強，如果你想組合之後有增長力，就唔需要再加。如果你目標是穩定的，這股回少少可加（如果你現時現金較多）。

至於中芯國際（0981），風險高，小注好了，唔好加。

康基醫療（9997）睇翻佢的資料，佢係中國最大的國內微創外科手術器械及配件(MISIA)平台。質素是有的，你有貨可持有，但相信股價會較波動，除非有較大的回落，否則不用加。

圓通速遞國際（6123）只是一般，上翻D可考慮賣出。

廣氣（2238）有質素的，可長線。

------------------------------------------------

Q17790：

老師你好
我岩岩開始接觸投資
想問下點睇香港前景？
對於港股仍然好樂觀？
投資美股會唔會比較好？

龔成老師：

首先你要學理財及投資的知識，記住，投資並不是坊間的炒炒賣賣，你要從書本或課堂上認真學習。買股票就是買入企業，買入後長線持有，而不是賺差價。

最重要是建立一個長期的組合，這是一個配置的過程。

香港仍是有投資價值的，需要增長力未必及過往年代，但長遠仍是正面，如果你想分散風險，可以同時投資美股。

你入門，可以投資ETF，例如盈富（2800）及VOO都適合你的。

------------------------------------------------

Q17791：

請問老師2138有咩睇法？

我覺得佢業務正面，除咗上年應該因為肺炎原因外，之前利潤都有正增長。而且現金流健康。一直有派息。
一直有做M&A去擴充業務，風險可能係佢購入價高，Goodwill要做減值。

我2月 $5.4入左，之後因為肺炎跌左落來都未升返上去，想現價買多一注溝淡佢。

隻野市值唔高，感覺好易俾人炒高炒低。
唔知而家算唔算合理價以下呢？

龔成老師：

香港醫思醫療集團（2138）我見佢業務發展得唔差。

醫療服務營業額有唔差的增長，另外，美學醫療、美容及養生以及銷售護膚，仍然佔佢好少的生意。仍然是佢業務收入的核心。

整體來說，這企業不差的，業務有質素，有增長力，不過近年負債增長快，加上這企業的規模不算好大，都成為風險。現價合理區中間，你有貨可持有，由於市值唔算好大，唔建議投資太多。

------------------------------------------------

Q17792：

龔成兄，本人對你能貫徹價值投資法深感佩服。更難得的是你能與人分享，教人不倦，實在有益於社會。
祝你和家人在疫情中平安喜樂，你繼續達己達人。

有以下理財問題請教:
本人49歲，尚有11年退休。每月可儲4萬作投資。
過往5年，著重收息，希望及早建立收息組合以便退休，現組合如下:

0005 26400股，
3988 495000股，
1398 90000股，
11 2400股，
12 7500股，
16 2000股，
現金 20萬。

請問應減持匯豐，買領展嗎？因匯豐曾經股息較高，而現價低殘，不捨得賣，怕賣後回升。見領展幾平，想買入平衡組合。

還是應考慮其他呢？
誠心求教。

龔成老師：

匯控（0005）賺錢能力與增長力的確弱左，但又未去到完全無質素，相信長遠是收息股，但股價增長就有限。可以先從佢近年唔派息及財務情況分析。

雖然停派息對收息股從來都不是好事，但在這全球經濟咁差時候，為集團預留一筆資金備用，對集團和股東都是有利的。

在全球經濟環境影響下，集團中短情況相信都會維持波動，未來再停派息也說不定。但我地投資應該要集中考慮翻佢長線因素，雖然預期匯豐中短期表現會受壓，但長線質素依然存在（不過已不是高質，只是一般）。

作為收息股係可以，概念上，就是放棄中短期股息，而預期將來慢慢回到正常狀態。

簡單來講，佢不是零質素，慢慢會好翻D，但賺錢能力的確不及從前，你唔好對股價有太大期望。

因此，如果你作為收息股組合的其中一員，可以。

但你組合有個幾大的問題，就是集中在銀行業，在這理財上是有風險的。

因此，建議你長遠，要慢慢減翻相關股，轉去其他類別的股。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、領展（0823）、置富（0778）、陽光（0435）都可以。

另外，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

------------------------------------------------

Q17793：

龔成老師你好，我今年剛剛供滿樓，想再整理財計劃，所以想請教一下。
以往怕太多不穩定因數，所以一直供樓，提早還款為重心。

直至近兩年，供樓還了超過9成，所以開始儲了點閒錢，亦開始買股票，一直買買賣賣，希望可以谷大本金。每次我都有mark低作檢討，有些股票係贏，亦有些倒輸。

但檢討時發現有些股票其實只是買買賣賣，實實跟本沒賺錢，所以想藉着供滿樓，再重整10年目標。

暫時計劃是將每月收租的一萬作月供，但由於樓可能一年後自住，所以如果自住供股會改為每月5千。

計劃供款股票如下
0027銀娛 $2000
285 比亞迪電子$2000
669 創科$2000
1810 小米$1000
2382 舜宇光學 $1000
2800 盈富基金 $1000
2822 南方A50 $1000
3188 華夏滬深三百 $1000
我感覺好像太多了，但又不知道該減那隻好，老師可否給我建議?

另外我持有
0016 新鴻基地產 3手 均價 106
1211 比亞迪2手 均價 78.85
669 1手 創科 81.7
0001 1手 長和 57.6
9988 1手 亞里爸爸 260.8
1810 5手 小米16.43
9999 網易 1手 150.3
861 神洲 1手 6.75
9618京東 1手 240.8

以上股票我知道都是比較高價買入，0016長期持有至獲利才走部份。

暫時手上只有萬多現金，錢都在股票了，我知道這樣很危險，請問老師我該如何重新計劃?
感謝!

龔成老師：

買買賣賣並不是好的投資策略，你要改為長線投資，以「儲優質股」的方向進行，月供或自行買入，長線持有都得。

現時你持有的股票，大部分都有質素的，可以繼續持有，不過部分就在貴的價位買入，這反映你買貨有點急。可能當你供完樓後，好心急想建立財富，要小心投資都要注意平貴，唔好太快用盡資金。

至於月供方面，都是有質素的，你可以進行。不過，有兩點都要注意。

第一，你組合不少都是潛力股，你要明白當中的風險會有少少高，這類股佔你財富比例唔好過多。

第二，你現金開始少，如果大市出現回落，你會無法把握到機會。

月供股票，你可考慮：銀娛（0027）、比亞迪電子（0285）、舜宇光學（2382）、盈富基金（2800）、南方A50（2822）。

------------------------------------------------

Q17794：

龔sir你好。本人32歲，月入大慨$46000 老公同我既人工差唔多。要供樓$20000

年頭開始有月供股票
00002，00006，00066，1038，6823各$1000
另外有十手建行作收息用。
想問問，呢個月供組合好嗎？

另外流動資金約有15萬，可作怎樣的投資？我希望下年可以買到個百幾萬既車位

仲有，個女岩岩出世，都希望佢將來大左唔洗為我地兩個擔憂，希望夠錢養老。

龔成老師：

你持有的及月供的股票，都有質素，不過，增長力不強，你32歲，其實唔需要太保守。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注，但慢慢可增加。

至於$15萬現金，反而唔好急投資，等機會先。另外，唔好太心急進求高增長，投資要時間先有合理回報的。

------------------------------------------------

Q17795：

龔sir你好 小弟係你5月股票班學生
想講問幾個問題

1.小弟本身經濟投資知識薄弱 上完陪升股堂 其實都未能完全純粹掌握估值技巧 要經常拎note出黎睇 甚至而家持有既股票都係睇龔sir推介同大路野，呢個情況下係咪唔應該上進階班？或者應該到幾時再上？

2.想問下倘若照龔sir講 港鐵 領展呢類現在未算「便宜」但在合理區中下部 (?) 咁係應該繼續持有現金得佢跌 ？又驚佢唔會跌到便宜區就開始長遠升，例如想港鐵到35$入手 但佢長期浮游係37-8

3.另外想問下0752筆克遠東既看法，分析過佢財務狀況都合格，公司主要做展覽活動，因為肺炎 奧運股價受影響，下年奧運再舉辦時應該會帶動股價升（呢個想法有無錯同埋呢d屬於堂上講既週期股？？）希望龔sir可幫忙比d意見

最後感激25歲時遇到龔sir的page
令我很有信心build up自己的財富，
趁後生好好增值自己贏在起跑線

龔成老師：

1）我會建議你睇《股票勝經》《年報勝經》，以及巴菲特相關的書，同時亦可以自己試下睇年報。大約3-6個月後，再上多一次初階班，暫時唔好上進階住。

2）如果你本身無貨，現價已經可以投資領展（0823）如果已經有貨，就等平先加注。

平貴的因素，會影響我地的入市策略，如果現金多，好多時就算合理區都會適度買入。

3）筆克遠東（0752）如果下年奧運股價會向上，但無人知下年是否能夠如期舉行，因此你都要明白當中的風險。都可以話係週期股。

加油！年輕是你最大的本錢，只要你不斷努力學習，以及不斷儲錢投資，長遠財富會不差的！

------------------------------------------------

Q17796：

龔老師你好，我係幾年前買入渣打銀行3000股平均價比帳面已蝕咗三份二我是否應該要換其他股票，如果要換入你介紹嘅潛力股比亞迪或福壽園可以嗎？

龔成老師：

渣打集團（2888）本質的質素已是銀行股中較一般，到近一年，銀行業的賺錢能力進一步減弱。這股長遠的質素有限，你賣出這股是大方向，問題是幾時賣。

現時比亞迪（1211）等其他潛力股，大多處貴的水平，你現時轉去，未必是好時機。

反而你暫時持有渣打先，如果這股升翻D，你可以賣。如果有些潛力股回左，你可以轉。

------------------------------------------------

Q17797：

你好呀龔sir ~ 最近透過友人認識你，你真的是位好老師，若果早幾年認識你就更好。求賜教。

2014 年 ，我先生賣晒1398轉買咗1359，當時以4.57買入70000股，請問我是否應該要馬上離場呢？

現在已經蝕咗很多，我都唔知點做好，請龔sir幫忙分析一下，謝謝你。

龔成老師：

中國信達（1359）的風險度較高，因為佢是資產管理公司，當中主力處理不良資產。

當經濟差時，佢的業務會轉弱得好快，股價亦有較大波動。

如果這股佔你地持股比例好多，可以賣一半，因為這類風險類股票，唔建議持有太多。餘下的可以守住先，如果比例可接受，就持有住先。

你等中國經濟過1、2年後正常翻D，經濟好壞賬少翻，這股都會上翻D，到時先賣（雖然未必上得翻你買入價，但到時股價上翻D都好）。

------------------------------------------------

Q17798：

你好老師，本人45歲，一家三口租屋住$17K。我同太太兩人收入＄75K，每月平均開支連租金要＄50K，現持大約＄80萬現金，另股票有：2手700，3手005，3手772，5手788。

我哋一直想買樓但樓價太貴負擔唔起，但一路租屋住亦唔係辦法，所以希望請教老師，有咩辦法可以將手頭上嘅現金增值，務求可以儲到300萬做首期。

另外我有睇到你經常建議大家投資月供股票，想問吓響邊度可以有呢個服務呢？多謝老師意見！

龔成老師：

如果你想累積到$300萬，投資方向要以增值為主，不過你45歲，又唔建議太過進取，因此，你可以以「平穩增長股」為核心。

你可以善用現時的現金，以及每月儲到的資金。利用月供股票，又或自行分注投資的模式進行。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。唔建議你大注，只能佔組合小部分。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

至於月供股票，你去一般的銀行，匯豐、中銀等都有提供。

------------------------------------------------

Q17799：

Hi!龔sir:我想請教一下我持倉多年的股票虧了不少，我現53歲，已婚，有了自住物業，月入3萬，現金100萬

5000股388@303 已收息2年
5萬股[email protected] 已收息3年
4萬股[email protected]已收息3年
11萬股[email protected]已收息5年
1萬5千003@18已收息4年

1萬2601@37 已收3年息
13萬[email protected]已收4年息
3萬[email protected]已買了5年
1萬[email protected]大約10年
5仠0390@7:30 大約8年

6千0270
8千0728
4千2600
8千3983
3千2628

上面4只買了超過10年，忘了買入價，但只知虧了好多！
請教sir我應該怎樣重新整理個倉
但我短期會賣岀0388

龔成老師：

有質素的可留，質素一般的就要減，無質素的就要賣。

我地最重要睇企業質素、前景。買入價只是一個心理因素。

0388、939、3988、0003、1398、0270，0728、2628可留。

1800、2601、0323、0390、2600：質素與增長力一般可賣部分。

0460、3983要賣。

但要留意，你銀行股較多，長遠都要調整翻。

------------------------------------------------

Q17800：

你好 想問吓你意見？

我現在47歲預計55歲退休 做公務員有退休金及長俸 人工3萬8 現時儲了現金24萬

想計劃下個月開始月供5千盈富 5千港鐵 5千電能實業 5千儲蓄 完全沒有投資經驗 請問你可否給意見？謝謝

龔成老師：

你如果打算55歲退休，這刻應該開始建立一些收息類資產，你上述的月供股票方向正確，你所選的都是有質素，同時適合收息的股。

基本上方向正確，可以進行。

你的方向是建立一個「收息股組合」，目標是5%、6%的股息率的收息股。

你這刻可以供盈富（2800），到了55歲，可轉成股息率更高的股票，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。