李寧（2331）最新派成績表，巡例都睇睇份業績，Mouse係咁碌，發現業績入面，無啦啦多咗幾Pat黑色嘅嘢（如內文圖示），細心睇，先知呢個同古天樂簽名差唔多樣嘅蛇仔，係李寧副牌個Logo，佢仲有個名堂，叫「彈簧標」，英文叫LNG，喂！同「液化天然氣」英文簡稱撞名呀！

我知，應該會有人話「車！呢個副線，好耐之前就有啦！」就當我Old news is so exciting吧，咁本人平生不買李寧鞋，佢半夜出Brand也不知。

如果你同我一樣咁無知，唔知呢個Brand同「李寧」有咩分別？簡單講，個分別就等如係「Adidas」同「Adidas Original」咁，係咪明晒？睇返業績，話品牌已經喺北京、上海、深圳等20多個城市，開咗約40個銷售點。

其實，「李寧」本來個Logo都算係正正常常，唔單止係「L」嘅變奏，更加係以漢字「人」字做藍本（當然，亦有人話係Nike嘅掉轉）。至於「彈簧標」呢，似啲咩？冇嘅，彈弓？蛇？嗯，總之我可肯肯定佢今次冇老翻Adidas同Nike啦。

一個Logo能夠咁一Pat嘢，本身已經非常難得；更難得係，佢句Slogan都繞口到似彈弓，「Do it with passion or never at all」。嗯…李寧上年多賺44倍至6億人仔，唔派息，預期今年同店銷售只有低至高單位數增長；今日股價仲大跌，最新跌6.5%。要散戶留低，睇怕真係要對李寧Passion好大先得。

by千頌C@堆填區
http://fb.com/winbigwok