* 《神探》中的責任悲劇 — 究竟係咪能力愈大，責任就要愈大呢？ 呢個命題，係《神探》故事嘅核心。 — 對於《神探》呢套電影最基本嘅解讀，大概係「天才在左，瘋子在右」，「神」可以係神經個「神」，又或者係神級嘅意思，睇劉青雲遊走於天才同癲佬之間嘅演繹；另一個解讀層次係人「心中有鬼」，可以分裂出恐怖嘅人格，做出好多錯誤嘅事。 — 但《神探》於我，絕對係一個有關責任感衍生出嚟嘅悲劇。林家棟因為心中有鬼，而且仲要有七隻咁多，眾多分裂人格拉扯之下，先喺車入面偷李國麟一千蚊（當差嘅，唔洗為一叉嘢斷送前途啩？），再喺樹林入面殺李國麟意圖掩飾自己失槍嘅犯錯，再改電腦紀錄、打劫運款車、麻雀館、便利店，再想將一切嘅罪行嫁禍於南亞人身上。而劉青雲呢？本身係一個屢破奇案嘅幹探，但因為神神化化而唔可以繼續做差人，被社會標籤為一個精神病患者。 — 人有七種人格，係難得嘅事，因為佢可以將唔同特質安放喺唔同處境入面，做到如魚得水。而劉青雲可以用超能力破案，亦都係天賦嘅禮物，林家棟同神探，就係故事入面嘅一體兩面。林家棟行事可剛可柔，可以好果斷孔武有力咁殺死自己嘅同袍，但犯案之後又可以好冷靜咁諗個天衣無縫嘅計謀去甩身，仲有啲人格負責睇水，負責執行，而可惜林家棟將自己嘅能力，用咗喺錯誤嘅事上面。 — 「做我好辛苦」，當安志杰想學自己被活埋嘅時候，神探同佢講咗呢句說話。劉青雲將自己嘅超能力，應用咗喺查案嘅執著上面。為咗破案，陳桂彬不惜以「代入法」去犯險，例如活埋自己，例如入咗個行李箱入面然後比人踢落樓梯。而佢更加可以睇到人心入面嘅鬼，睇到平凡人睇唔到嘅事。當林家棟有七種人格而成惡魔嘅時候，劉青雲不斷代入抽離再代入，搞到自己有精神病其實一啲都唔出奇，但佢心甘情願。 — 咁劉青雲自己究竟有無鬼？根據我嘅睇法，佢心入面嘅鬼，其實就係佢幻想入面嘅「老婆」。喺故事入面，其實林熙蕾係不斷同劉青雲打對台，林唔希望青雲繼續去查案，但老公偏偏唔聽，即使自己已經唔再係差人，佢都希望可以繼續運用自己嘅能力去幫個社會，就好似圖入面佢屋企嘅剪報，單單案佢都已經破咗。即使每一次都係消耗緊自己嘅生命，即使會搞到自己愈嚟愈癲，神探從來都選擇勇向直前。 — 而原因究竟係啲咩？唔係窮，唔係愛，而係陳桂彬自身嘅責任感。所以明明林熙蕾話插手林家棟單案會死，劉青雲都選擇繼續去查，去到最後求仁得仁。但神探點估都估唔到，佢竟然輸咗比安志杰懦弱嘅人格，靠攏咗去林家棟果邊。 — 《神探》嘅「神」，唔在於佢嘅幻覺幻聽，神經病，亦唔係講緊佢嘅神級超能力，而係描述緊劉青雲對於自己工作，對於貢獻社會嘅執著。其實佢可以選擇做個平凡人，同自己老婆開開心心咁生活落去。但佢無咁做，因為佢相信「能力愈大，責任愈大」。就好似同樣割咗耳仔嘅梵高咁，天才總係無人理解而孤獨嘅，生前只係賣過幾幅畫，但佢就為咗畫畫，而貢獻咗自己嘅一生。