天演論 2005 我的藝術及文學project🚬 謝謝報道🙏🏻 #窮途裡挫折中拒絕逃避 流行曲當然係藝術，亦同時係商品，需要有流行元素，若果作品題材晦澀需時消化，難免影響其流傳。《天演論》絕對唔係一聽你就會鍾意嘅專輯。正如林憶蓮《野花》或莫文蔚《一朵金花》，具實驗性嘅作品往往需要時間浸淫、發酵，其藝術價值至會歷經歲月而得到更多讚譽同欣賞。 作為唱片中最搶耳嘅歌，〈露西（3,180,000 B.C.-）〉一出即替《天演論》打響頭炮，豐富嘅弦樂同鼓擊奏出佻皮跳脫嘅節奏，略顯變音嘅唱法展現出盧巧音與平常唔一樣嘅聲線，用可堪玩味嘅姿態去點出專輯嘅主題。被嘲笑嘅歌名〈露西〉其實指現存最古老嘅人類化石，周耀輝以文字嘅神奇力量帶領露西穿越到現代，並借南方古猿嘅單純視角去感受同評價複雜嘅現世。《天演論》遵從物競天澤嘅演化過程，嘗試探討生命同死亡嘅意義、慾望、信仰、文明與戰爭嘅拉扯等，而借古喻今、見證百萬年文明變遷嘅露西正好被借代為簡單同複雜嘅分界線，作為專輯中唔同概念嘅對照。「是我在繁囂街裡遠望原始社會好，但沒辦法還原。」 〈天外飛仙〉編曲上仿如UFO飛過嘅音效增添歌曲嘅玩味，林夕寫出外星高智慧生物墮落凡塵後心靈思想被污染嘅經過，明明嫌棄世人各種古怪言行，卻又不自覺身陷其中，自己也染上類似嘅怪習性，開始追求塵世嘅價值，無法自拔。 喬靖夫寫嘅〈阿修羅樹海〉當年係第一主打歌，無論曲風抑或歌詞主題都幾偏鋒，派台後冇乜反應亦正常，但細聽呢首作品其實相當出色，偏向靜態嘅音樂部分暗湧處處，呢喃般唱腔有如森林中悄悄進行嘅資源競逐，直至副歌「也要繼續沒人見的戰爭，戰爭」而激動爆發。物競天澤唔單止出現喺弱肉強食嘅動物世界，其實肉眼睇唔出嘅植物王國一樣係殺戮戰場，樹同樹、花同花之間一樣要爭奪有限嘅養份，〈阿修羅樹海〉將呢種暗地進行嘅緩慢廝殺寫得異常生動而有說服力，令人驚覺表面平靜之下嘅陰狠殺機。 〈天外飛仙〉都想成為凡人，但凡人卻想一步登天。〈步天歌〉原本係隋唐年間出現、以詩歌形式介紹全天星宮嘅著作，喬靖夫喺呢張碟裡面引伸為人類占星問卜為求早日得知未來運程嘅現象，搖滾曲風比較似Candy之前嘅歌路，佢亦因而用返較似前作嘅聲線去演繹，同《天演論》其他轉換唱腔嘅作品有所分別。「窮途裡挫折中拒絕逃避，每步仍然不休，前行不息，縱使已走得筋竭力疲。」歌曲原意可能係講人們意圖掌控前程嘅貪同執念，但細讀之下卻可以有堅持所信、勇往直前嘅另一種解讀。而呢份向前嘅堅定，正正係我哋今時今日所需要。 ---- 【2005年6月14日】 盧巧音推出第十二張專輯《天演論》 ---- #盧巧音 #步天歌 #天演論 #喬靖夫 https://youtu.be/t9BCXh4cIRU Candy Lo 喬靖夫 #廣東歌 #廣東歌好日子 ---- 其他好日子： 沮喪 https://tinyurl.com/2yb3bs9v 接收現實 https://tinyurl.com/26s46rs5 我想國 https://tinyurl.com/ckfhj4kj