20160526 娛樂蘋台 | 即時新聞
【MK-Pop亂鬥】FFx摸膠小強論盡玩贏天堂鳥 水著透心涼】
http://hk.apple.nextmedia.com/en…/realtime/20160526/55146994
打正旗號sell「MK-Pop」嘅4人女子組合FFx，同埋有MK街霸之稱嘅3人男子組合BOP（天堂鳥），雖然走在同一個地平線，但偏偏從來未合作過，日前兩個組合透過《蘋果》安排終於成功接軌，二個組合7位成員齊齊接受本報遊戲節目《最佳拍檔-玩咁大》測試，以三盤兩勝方法選出同隊友最合拍嘅一隊。

遊戲共分三個回合進行比併，「第一個回合」是兩隊互相替大家選一位隊員矇眼用手摸物件，摸完再用動作告知組員物件是什麼，估中一方為之勝出。「第二個回合」兩隊組員要鬥快將泳池中毛巾取出，再將水透過細小嘅漏斗駐入水樽內，最快將水樽盛滿水為之贏。而「第三個回合」，是兩隊共7位成員齊齊「包剪揼」決勝負。

唔知BOP係咪睇得出FFx嘅Mizaki係最細膽，所以佢哋揀咗Mizaki喺第一個回合做代表，即係要矇上眼罩，喺大會......即係我哋事先準備嘅膠箱入面，單靠手感分辨出水中嘅物品究竟係乜東東，Mizaki果然未摸就已經驚到腳震震，一手插入放滿水嘅膠箱後，仲更加嚇到尖叫，明知箱入面放住嘅係仿真膠曱甴嘅BOP就衰衰咁係咁嚇佢，最後明明模唔到箱入面係乜嘅Mizaki，因為時間關係迫住用動作話俾隊友知係乜，大家亂估一通當然係輸啦！

到BOP玩喇，負責矇眼嘅係Tyrese，完全唔驚嘅佢摸兩摸就開始做動作喇，兩位拍檔Gordon同Lincoln亦好快估到浸住喺水只係一條假嘅蛇仔，話咁易就贏咗，BOP鬼咁得戚，全部熟水性嘅佢哋，仲講明贏埋第二個回合完全冇難度添！

不過，正所謂驕兵必敗，雖然FFx唔係個個識游水，但係佢哋為咗要贏喺第二局可以話博到盡，正式比賽即喺池底不停將浸喺水入面嘅毛巾攞出嚟，然後極速返回池邊，將水透過漏斗倒入水樽，以為贏梗嘅BOP呢就全程喺度搞搞震，又扮唔小心將FFx入好嘅水倒瀉，現場一片混亂，好彩FFx論論盡盡四圍騰來騰去，終於都贏咗喇，仲喺最後7人「包剪揼」中猜贏3個男仔添！