[gfmurmur9553] 大家好，我係 #bfmurmur1612 個個投稿者嘅女朋友，而家已經變咗ex，篇投稿出咗嘅第二日我就同佢講分手，唔會亦唔想回頭，甚至有啲後悔同佢一齊咗，當初係因為覺得佢講嘢好好笑，所以中意佢，但係幽默真係唔係大撚晒。 我嚟投稿係因為我想為自己平反一下。我見到有留言話我係因為想跟佢過去英國，所以先咁着緊鬧佢/叫佢去英國，仲要好似都頗多人讚同，所以想澄清返先。 我其實真係唔想同佢組織家庭，因為呢個人除咗唔成熟，仲好撚柒自私，只係我on9，覺得自己會感化到佢改。我有花粉敏感，所以中學個時嘅男友先會送扎西蘭花俾我(當然我都中意食啦)，而我本人亦唔係十分熱衷過紀念日，但係佢係好中意過呢啲紀念日，所以我地5個月個日，我專登冇交更返工，經理求我返工我都拒絕咗。結果，個日佢話因為佢兄弟失戀，所以求其買咗扎真花擺係我屋企門口話頂住檔先，我差啲就頂佢個肺，我個晚打乞嗤打到鼻都甩，更過分係我之後先知原來佢兄弟唔係失戀，係叫佢打排位賽，佢怕我嬲所以講大話呃我。 我個陣差啲同佢講分手，佢明知我個日份pt係高人工啲，佢明知我係專登唔返工，但係佢話佢覺得我會體諒佢，會明白佢呢場排位賽對佢嚟講好重要，佢口講話我係佢嘅第一位，事實證明係倒數第一位。平時啲錢用晒係自己身上，買名牌、周圍同朋友食好西、久唔久要充大頭請朋友食飯，結果同我拍拖嘅時候就話自己冇錢，要有幾頹食幾頹，有時仲要我借俾佢/幫佢俾，十次還得兩三次，真係喺乞衣兜入面拿飯食。 佢quit個份pt嘅時候，我講咗幾日叫佢唔好辭職，同佢講其實份份工都辛苦㗎啦，由最低時薪嘅m記pt，到ft fresh grad已經係60k嘅醫生，都有壓力都係會辛苦，因為辛苦所以quit其實真係冇意思，然後俾佢鬧翻我叫我快啲收嗲，呢啲事又唔見佢講出嚟？仲有更多自撚私嘅事我冇分享出嚟。想問下，咁樣嘅男仔，一齊咗半年都已經咁樣，咁你仲會唔會想同佢組織家庭？如果連組織家庭都唔想嘅話，咁又點會產生”痴住佢跟埋去英國”嘅念頭/心思呢？ 我因為生活而奔波勞碌，我讀緊個科又chur，屋企都俾咗好多無形壓力我，係我鬧佢淨係識痴住阿媽嘅前一日，我屋企養咗17年個隻狗走咗，我知道隻狗走咗嘅時候我返緊工，唔通我一路傳菜一路喊？我連喊都冇時間，因為我真係好攰亦好忙，要應付佢呢個大細路之餘，仲有一大堆要做嘅事，但佢知道之後只係鬧我冇良心好冷血，我聽到之後都唔識反駁。 係啦，可能真係我太冷血，但係我同佢真係兩個世界嘅人，我嘅世界係現實同殘酷嘅，但佢嘅世界係粉紅色嘅，佢冇感受過俾人追債追到覺都冇得瞓，冇感受過因為生活而要東西頻撲，冇感受過真正嘅窮係點，我屋企唔符合資格攞綜援住公屋，但又有幾個人要開飯，同時仲要還貴利。佢當年係日本自己一個玩得不亦樂乎嘅時候，我係香港做到隻積咁，呢啲心酸佢唔明白。 佢好幸運亦好幸福，生係一個好好嘅家庭，所以可以21歲都仲成個11歲細路咁，可以因為怕冇咗阿媽會搞唔掂而扭計唔去外國，但係我唔係。我曾經以為自己好好耐性，會等到佢長大成熟，會等到佢可以明白我，但係等一個男仔長大，要等幾耐？冇人知道，所以我決定早早放手。 可能佢成熟咗之後，會係一個好好嘅男人，會係個完美嘅男朋友、老公、爸爸，但係我自問，真係等唔起，亦唔想浪費時間嘗試去等。 祝你以後都平安幸福。 P.s. “媽寶男”這個大陸詞不是我說的，係佢自己總結咗我講嘅嘢，就係話緊佢係個裙腳仔，我由頭到尾都冇講過”媽寶男”呢個大陸詞。 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig #香港 #情侶 #香港情侶